ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಹ್ಯಾ ಸಂಸಾರಾಂತ್ ಸರ್ವಾಂ ಬರಿಂ, ಸರ್ವಾಂನಿ ಕರ್ಚಿಂ ಸರ್ವ್ ಕಾಮಾಂ ಬರಿಂ ತರ್ - ಇತ್ಲೆಂ ಖೊಟೆಂ ಆನಿ ಧೆಸ್ವಾಟ್ ಜಾಂವ್ಚಿ ಕಶಿ?’
ಪ್ರಗತಿಪರ್ ದೇಸಾಂತ್ ಮನಿಸ್ ಆನಿ ಮನ್ಶಾ ಮೊಲಾಂ?
ವರಸ್ : 2009
ಅಂಕೊ : 49
ಮಯ್ನೊ : ಫೆಬ್ರೆರ್
ಸಂಪಾದಕೀಯ್ - 49.
ವಲ್ಲಿ ಕ್ವಾಡ್ರಸ್
ಎಕಾ ಮಯ್ನ್ಯಾಚ್ಯಾ ರಜೆರ್, ಹ್ಯಾ ಸಂಸಾರಾಂತ್ ಪ್ರಗತಿಪರ್ ಪಾವ್ಲಾಂನಿ ಚಮ್ಕೊಂಚ್ಯಾ ಪ್ರಮುಖ್ ತೀನ್ ದೇಶಾಂ ಪಯ್ಕಿ ಏಕ್ ಜಾವ್ನಾಸ್ಚ್ಯಾ ಆಮ್ಚ್ಯಾ ದೇಸಾಕ್ ಪಾವೊಂಕ್ ಮ್ಹಜೆಲಾಗಿಂ ಆಸ್ಲ್ಲೆಂ ಪ್ರಮುಖ್ ಕಾರಣ್, ಥಂಯ್ ವಸ್ತಿ ಕರ್ಚಿಂ ಮ್ಹಜಿ ಪ್ರಾಯೆಕ್ ಪಾವ್ಲ್ಲಿ ಆವಯ್-ಬಾಪುಯ್ ತಶೆಂಚ್ ಮ್ಹಜಿಂ ಸಯ್ರಿಂ ಧಯ್ರಿಂ, ಇಶ್ಟ್ ಮಂತ್ರಾಂ. ಎದೊಳ್ ಪಾಸೊನ್ ರಾತಿಚೆಂ ವಿಮಾನ್ ಧರ್ನ್ ಬೊಂಬೊಯ್ ಏರ್ಪೊರ್ಟಾರ್ ಕಸ್ಟಮ್ಸಾಚ್ಯಾ ಆಫಿಸರಾಂಕ್ ತಶೆಂಚ್ ರಾಕೊನ್ ಆಸ್ಚ್ಯಾ ಭುಕೆಲ್ಲ್ಯಾ ಝಳಾರಿಂಕ್ ಥೊಡೆಂ ರಗಾತ್ ದಾನ್ ದೀವ್ನ್, ಫಾಂತ್ಯಾಚೆಂ ಕನೆಕ್ಟಿಂಗ್ ವಿಮಾರ್ ಧರ್ನ್ ಉದೆಂತಿಚ್ಯಾ ರೊಮಾ ಶ್ಹೆರಾಕ್ ಪಾಂವ್ಚಿ ಸವಯ್ ಜಾಲ್ಲ್ಯಾಕ್, ಹ್ಯೇ ಪಾವ್ಟಿಂ ಡೈರೆಕ್ಟ್ ಮಂಗ್ಳುರಾಕ್ ವಿಮಾನಾರ್ ಪಾಂವ್ಚೆಂ ನಶಿಬ್ ಫಾವೊ ಜಾಲೆಂ. (ಹ್ಯೇ ಖಾತಿರ್ ಮಿನತ್ ಕಾಡ್ಲ್ಲ್ಯಾ, ಲಾಡು-ಪೇಡಾ ವಾಂಟ್ಲ್ಲ್ಯಾ, ಪತ್ರಾಂನಿ-ಸಾಯ್ಟಿಂನಿ ಬತ್ತೀಸ್ ದಾಂತ್ ಧಾಖವ್ನ್ ಹಾಸೊಂಕ್ ಗೆಲ್ಲ್ಯಾ ತಶೆಂಚ್ ಮೆಜಾವಯ್ಲಿಂ ಖೆಳಿಂ ಕಾಡ್ನ್ ಪಿಲ್ಯಾದ್ ಜೊಡ್ಲ್ಲ್ಯಾ ಸರ್ವಾಂಕ್ ಮಾನ್ ಬಾಗಯ್ತಾಂ)
ಹರ್ಶೆಂಚೊ ಕೊಂಕ್ಣಿ ಭುತ್ ಲಾಚಾರ್ ಜಾಲ್ಲೊಗಿ ವಾ ಹೆರ್ ರಾಠಾವಳ್ಯೊ ಚಡ್ಲ್ಲ್ಯೊಗೀ ಕಳಿತ್ ನಾಸ್ತಾಂ ಮಾಯ್ಗಾಂವಾಕ್ ಪಾಂಯ್ ಥೆಂಕ್ಲೊ ಪುಣ್ ಮಧೆಂ ಲಾಭ್ಲ್ಲ್ಯಾ ಆವ್ಕಾಸಾಕ್ ತಾಂಕ್ತಾ ತಿತ್ಲೊ ಗಳ್ಸಿಲೊ. ಕಾಳ್ಕಾಯೆಚ್ಯಾ ಪಿಡೆಂತ್ ವ್ಹಳ್ವಳ್ಚ್ಯಾ ಮಿತ್ರ್ ಎಚ್ಚೆಮಾಕ್ ಭೆಟ್ಲೊಂ, ತಾಚ್ಯಾ ಪ್ರಗತಿಪರ್ ಚಿಂತ್ನಾಂಕ್ ಸಮ್ಜೊಂಚೆಂ ಪ್ರೇತನ್ ಕೆಲೆಂ, ತೆಂವೀ ಅಪ್ರೂಪಾಯೆನ್ ಮೆಳ್ಚ್ಯಾ ಅನ್ಯೇಕಾ ಮಿತ್ರಾಕ್ ಮೌರಿಸ್ ಶಾಂತಿಪುರಾಸವೆಂ. ಪ್ರಾಯೆನ್ ಲ್ಹಾನ್, ಪುಣ್ ಚಿಂತ್ಪಾಚ್ಯಾ ಪ್ರಭುದ್ದತೆಂತ್ ಜಾಣ್ತೊ ಮ್ಹಣ್ ಲೆಖ್ಚೊ ಮಿತ್ರ್ ಎಲ್ಯೆರ್, ಆಧ್ಲೆ ಮಿತ್ರ್ ರಿಚ್ಚಿ ಕವ್ತಾರ್, ವಾಲ್ಟರ್ ನಂದಳಿಕೆ, ಮೆಲ್ವಿನ್ ರೊಡ್ರಿಗಸ್ ತಶೆಂಚ್ ಸದ್ದ್ಯಾಚ್ಯಾ ಆರ್ಥಿಕ್ ದಿವಾಳೆಂತ್ ಸಂಸಾರ್ ಕಂಗಾಲ್ ಜಾಲ್ಯಾರೀ, ಕಾಳ್ಜಾಂತ್ ಮೊಗಾಚಿ ಕೆದಿಂಚ್ ದಿವಾಳಿ ನಾಸ್ಚ್ಯಾ ಕಾಳ್ಜಾಕ್ ಲಾಗ್ಸಿಲೊ ಮಿತ್ರ್ ಆಂಡ್ರುಕ್ ಭೆಟ್ಲೊಂ. ಸಭಾರ್ ತರ್ಕ್ ಸಂವಾದ್ ಚಲ್ಲೆ, ಸಂವಾದ್ ಚಲ್ಲೊ, ಸುಖ್ ದೂಕ್ ಎಕಾಮೆಕಾ ವಾಂಟುನ್ ಘೆತ್ಲೆಂ. ಮ್ಹಜೆಲಾಗಿಂ ವಾಂಟುಂಕ್ ಸುಖ್ ಉಣೆಂ ಆಸ್ಲೆಂ ತರ್ಯೀ ತಶೆಂ ಭಗುಂಕ್ ಹಾಣಿಂ ಆವ್ಕಾಸ್ ದಿಲೊಚ್ ನಾ.
ಮನ್ಶಾ ಜಿಣ್ಯೆಂತ್ ಹರ್ಯೆಕ್ ಹಂತ್ ಗರ್ಜೆಚೆಂ ಆನಿ ಪ್ರಮುಖ್, ಹರ್ಯೆಕ್ ಹಂತ್ ಶಿಕಯ್ತಾ, ಮನ್ಶಾಕ್ ಎಕಾಮೆಕಾ ಪಾರ್ಕುಂಕ್; ಜಶೆಂ ಮನ್ಶಾಚೆಂ ನೀಜ್ ತೂಕ್ ಕಳಾಜಯ್ ತರ್ ಸಕಾಳಿಂ ನಿರಾಳಾ ಪೊಟಾಂತ್ ತಾಚೆಂ ವಜನ್ ಪಳೆಜಯ್.
ಚಡ್ತಾವ್ ಮಾಲ್ಘಡ್ಯಾ ಬರಯ್ಣಾರಾಂಕ್ ಮೆಳ್ಚಿ ಮ್ಹಜಿ ಆಧ್ಲಿ ಪಿಸಾಯ್ ಕಶಿ ಸೊಡ್ಚಿ? ದೆಕುನ್ ಅಮ್ಸೊರಾನ್ ಮ್ಹಳ್ಳೆಪರಿಂ ವಿಕ್ಟರ್ ರೊಡ್ರಿಗಸಾಕ್, ಡೊಲ್ಫಿ ಕಾಸ್ಸಿಯಾಕ್ ಭೆಟೊನ್ ಘರಾ ಪಾವಾಜಯ್ ತರ್ ಮ್ಹಜಿ ಮೊಗಾಚಿ ವ್ಹಡ್ ಭಯ್ಣ್ ಮ್ಹಣ್ ಅಭಿಮಾನ್ ಪಾಂವ್ಚಿ ಗ್ಲೇಡಿಸ್ ರೇಗೊಚೆಂ ಫೋನ್, ಫೊನಾರ್ ತಿಣೆ ಘಾಲ್ಲೆ ದೋನ್ ಧೆಂಕ್ಣೆ ಬರೆಚ್ ಲಾಗ್ಲೆ. ಹಾವೆಂ ವೆಚ್ಯಾ ಬಸ್ಸಾರ್ ಅವ್ಚಿತ್ ಮ್ಹಳ್ಳೆಪರಿಂ ಜಿಯೋ ಆಗ್ರಾರ್ ಮೆಳ್ಳೊ, ಸುಶೆಗಾತ್ ಸಂವಾದ್ ಚಲಯ್ಲೊ; ಭುರ್ಗ್ಯಾಂಚ್ಯಾ ಫುಡಾರಾ ಪಾಸತ್, ಭುರ್ಗ್ಯಾಂಚ್ಯಾ ದಣ್ಸಣೆಕ್ ವಿರೋದ್ ತಾಣೆ ಚಲಂವ್ಚಿ ಚಳ್ವಳೆವಿಶಿಂ, ಕಾನಡಿಂತ್ ತಾಣೆಂ ಪರ್ಗಟ್ ಕೆಲ್ಲೊ ಬುಕಾವಿಶಿಂ, ಆಯ್ಲೆವಾರ್ ಸರ್ಕಾರಾನ್ ತಾಚ್ಯಾ ವಾವ್ರಾಕ್ ಶಾಭಾಸ್ಕಿ ದಿಲ್ಲೆವಿಶಿಂ ಆಯ್ಕೊನ್ ಅಭಿಮಾನ್ ಪಾವ್ಲೊಂ.
ಗಾಂವಾಕ್ ವೆಚ್ಯಾಧಿಂ ಸಭಾರ್ ಆಲೋಚನ್ಯೊ ಮತಿಂತ್ ಘೆವ್ನ್ ಗೆಲ್ಲೊಂ, ಹರ್ಶೆಂಚೆಪರಿಂ ಮಾಲ್ಘಡ್ಯಾ ಎಡಿಯಾಬ್ (ಎಡಿ ನೆಟ್ಟೊ)ಕ್ ಜಾಂವ್, ವಿಲ್ಫಿಯಾಬ್ (ವಿಲ್ಫಿ ರೆಬಿಂಬಸಾ)ಗೆರ್ ಭೆಟ್ ಜಾಂವ್ ದೀಂವ್ಕ್ ಸಕ್ಲೊಂ ನಾ. ಜೆರಿಯಾಬಾ (ಜೆರಿ ಕುಲ್ಶೇಕರ್) ಗೆರ್ ಗೆಲ್ಯಾರ್ ರಾವ್ಲ್ಲೆಶಿವಾಯ್ ವಚೊಂಕ್ ತೊ ದೀನಾ. ಪುಣ್ ಹ್ಯೇ ಪಾವ್ಟಿಂ ಚಡ್ತಾವಾಂಕ್ ಫೊನಾರ್ಚ್ ಭೆಟಾಜಯ್ ಪಡ್ಲೆಂ; ಮಾಲ್ಘಡೊ ತರ್ಯೀ ಕೊಂಕ್ಣೆಂತ್ ಭೋವ್ ಖಾಲ್ತೊ ವಲ್ಲಿಯಾಬ್ (ವಲ್ಲಿ ವಗ್ಗ) ತಶೆಂಚ್ ಹೆರ್ ಮಿತ್ರಾಂಕ್; ಡಾ|ಎಡ್ವರ್ಡ್ ನಜ್ರೆತ್, ಬಾಯ್ ನಂದಿನಿ, ವಾಯ್ಲೆಟ್ ಬಾಯ್, ಜೆರಿ ರಾಸ್ಕಿಞ್, ರೇಗಾಮ್ ತಾಕೊಡೆ, ಆನ್ಸಿ ಪಾಲಡ್ಕಾ, ಜೋಯ್ ಪಾಲಡ್ಕಾ, ಮೆಲ್ವಿನ್ ಪೆರ್ನಾಲ್, ವಿಲ್ಸನ್ ಕಯ್ಯಾರ್, ಎಚ್.ಜೆ.ಗೋವಿಯಸ್, ಪ್ರಸನ್ನ್ ನಿಡ್ಡೋಡಿ, ಸಂಗೀತ್ ಸಾಮ್ರಾಟ್ ಹೆನ್ರಿಯಾಬ್, ವಿಕ್ಟರ್ ಕೊನ್ಸೆಸೊ, ಲಾರೆನ್ಸ್ ಕುವೆಲ್ಹೊ, ತಶೆಂಚ್ ಆಧ್ಲೊ ಖಾಸ್ ಮಿತ್ರ್ ಮಾಚ್ಚಾ ಮಿಲಾರ್, ಜೆ.ಎಲ್.ಮಂಜರಪಲ್ಕೆ, ಎಡ್ವಿನ್ ಜೆ.ಎಫ್, ಸಿಜ್ಯೆಸ್ ತಾಕೊಡೆ, ಮಾ|ಮೆಲ್ವಿನ್ ಪಿಂಟೊ ನೀರುಡೆ ಹಾಂಚೆಲಾಗಿಂ ಫೊನಾರ್ ಸಂವಾದ್ ಚಲವ್ನ್ಚ್ ಸಮಧಾನ್ ಭಗಾಜಯ್ ಪಡ್ಲೆಂ.
ಕಿತೆಂ ಕರ್ಚೆಂ? ಎಕಾ ವಾಟೆರ್ ಖೊಂಡುನ್ ಘಾಲ್ಲೆ ರಸ್ತೆ, ತರ್ ಅನ್ಯೇಕಾ ವಾಟೆನ್ ಆಸ್ಚೆ ಲೆಖಾಚೆ ದೀಸ್ ಆನಿ ಬಾಕಿ ಉರ್ಲ್ಲಿಂ ಕಾಮಾಂ ಅಡ್ಚಣ್ ಹಾಡ್ತಾನಾ ನಿಜಾಯ್ಕೀ ವಲ್ಲಿಯಾಬಾಚಿಂ ಉತ್ರಾಂ ಉಡಾಸಾಕ್ ಆಯ್ಲಿಂ; ’ಘೊಡ್ಯಾಗಾಡಿಚೆರ್ ಬೊಸೊನ್ ಆಯಿಲ್ಲೆಪರಿಂ ಮ್ಹಜಿ ರಜಾ’. ಪುಣ್ ಹ್ಯಾ ದರ್ವಡಾಂತ್ ಗಾಂವಾಂತ್ ಪಂಚು ಬಂಟ್ವಾಳಾಕ್ ತಶೆಂಚ್ ಮುಂಬಯಾಂತ್ ಕುಟಾಮ್ ಪತ್ರಾಚ್ಯಾ ಸಂಪಾದಕಾಕ್ ಹೆನ್ರಿಯಾಬಾಕ್ ಮುಖಾಮುಖಿ ಮೆಳೊನ್, ರುಚಿಕ್ ಗಾಂವ್ಚೆಂ ಜೆವಾಣ್ ಜೆವಾಣ್ ಜೇವ್ನ್ ಯೇಂವ್ಕ್ ತಶೆಂಚ್ ತಾಚೆಲಾಗಿಂ ಸಭಾರ್ ಸಂಗ್ತ್ಯಾಂಚೆರ್ ಸಂವಾದ್ ಚಲಂವ್ಕ್ ಏಕ್ ಆವ್ಕಾಸ್ ಲಾಭ್ಲೊ - ದೆವಾಕ್ ಅರ್ಗಾಂ.
ಸಂತೊಚ್, ವಿಜ್ಮಿತ್ ಪಾವ್ಲೊಂ ಕಾರಾಂ ಜಿಪಾಂನಿ ಭಂವ್ಚ್ಯಾ ಮ್ಹಜ್ಯಾ ಸಭಾರ್ ಮಿತ್ರಾಂಕ್, ವ್ಹಳ್ಕೆಚ್ಯಾಂಕ್ ಪಳೆವ್ನ್. ಮೆಟಾಂ ಮೆಟಾಂಕ್ ದಿಸ್ಚ್ಯಾ ವೆವೆಗ್ಳ್ಯಾ ಮೊಬಾಯ್ಲಾಂಕ್, ಥಂಯ್ ಹಾಂಗಾ ಖಾಂದಾರ್ ಉಮ್ಕಾಳ್ಚ್ಯಾ ಲ್ಯಾಪ್ಟೊಪಾಂಕ್ ಪಳೆವ್ನ್, ಥೊಡ್ಯಾಚ್ ತೆಂಪಾಧಿಂ ನಿರ್ಜನ್ ಗುಡೊ ಜಾವ್ನ್ ಮಾತ್ರ್ ಆಸ್ಚಿ ಸುವಾತ್ ಆತಾಂ ಜೆಸಿಪಿನ್ ಸಪಾಟ್ ಕರುನ್ ವ್ಹಡ್ ವ್ಹಡ್ ಭಾಂದ್ಪಾಂ ಉಭಿಂ ಜಾಲ್ಲಿಂ ಪಳೆಂವ್ಕ್ ಬರೆಂ ಲಾಗ್ಲೆಂ.
ಹ್ಯಾ ಮಧೆಂ ವಾಲೆನ್ಸಿಯಾಂತ್ಲ್ಯಾ ಮೇರಿಬಾಯೆಚ್ಯಾ ಘರಾಂತ್ಲೆಂ ರುಚಿಕ್ ಮಂಗ್ಳುರಿ ಜೆವಾಣ್ ಜೇಂವ್ಕ್ ವಿಸ್ರಲೊಂ ನಾ, ತೆಂವೀ ಮಿತ್ರ್ ಆಂಡ್ರು ಡಿ’ಕುನ್ಹಾ, ವಿತೊರಿ ಕಾರ್ಕಳ್, ಮೆಲ್ವಿನ್ ಲುದ್ರಿಕ್, ರಿಚ್ಚಿ ಕವ್ತಾರ್ ತಶೆಂ ಥಂಯ್ಚರ್ ಮೆಳ್ಲ್ಲೊ ನವೊ ಕಾಜಾರಿ ಟೋನಿ ಫೆರೊಸ್. ಜೇವ್ನ್ ಭಾಯ್ರ್ ಯೆತಾನಾ ಭೆಟ್ಲ್ಲಿ ಸಿರಿವಂತಾಚಿ ಧುವ್ ಕ್ಯಾರೊಲ್. ದುಸ್ರೆ ದಿಸಾ ಮಾಯ್ಗಾಂವ್ಚಿ ಭೆಟೆ ಮಧೆಂ ಬೆಂಗ್ಳುರಾಚಿ ಭೆಟ್ ಕರುಂಕ್ ಪಡ್ಲಿ, ಆಮ್ಸೊರ್ ತರ್ಯೀ, ಥೊಡ್ಯಾಚ್ ಘಡ್ಯಾಂಕ್ ಮೆಳೊಂಕ್ ಆಯ್ಲೊ ಮ್ಯಾಕ್ಸಿಮ್ ಲೋಬೊ. ಥೊಡ್ಯಾಚ್ ಘಡಿಯಾಂನಿ ತರ್ಯೀ ತಾಚೆಥಂಯ್ ಮ್ಹಾಕಾ ಜಾಯ್ತೆಂ ಪಳೆಂವ್ಕ್, ಸಮ್ಜೊಂಕ್ ಮೆಳ್ಳೆಂ - ನಿಜಾಯ್ಕೀ ಸಂತೊಸ್. ತ್ಯಾ ಶಿವಾಯ್ ತೊ ಆಪ್ಣಾಸವೆಂ ತಾಚೊ ಕವಿತಾಜಮೊ ಘೆವ್ನ್ ಆಯಿಲ್ಲೊ ತೆಂ ಪಳೆವ್ನ್ ಭೋವ್ ಸಂತೊಸ್ ಜಾಲೊ.
ಹ್ಯಾ ಇತ್ಲ್ಯಾ ಸರ್ವ್ ಸಂಗ್ತಿಂ ಮಧೆಂ ಅವ್ಚಿತ್ ಮ್ಹಜಿ ನದರ್ ಕರೆಂಟಾಚ್ಯಾ ದೋನ್ ಸರ್ಗ್ಯಾಂ ಮಧೆಂ ಶಿರ್ಕೊನ್, ಸುಕೊ ತಾಟೊ ಜಾಲ್ಲೊ ಕಾವ್ಳೊ ದಿಸ್ಲೊ; ಕಾಂಯ್ ಆಪ್ಲೊ ಖಾಸ್ ತೊ ಮ್ಹಳ್ಳೆಂ ಪಿಶೆಂ ಚಿಂತಾಪ್ ಉಟಯ್ತಾನಾಂಚ್ ಎಕಾ ಪೆಪರಾಂತ್ ಕಿತೆಂಗೀ ಗಿಚ್ಚಿಲೆಂ; ಬರೆಂ ರೂಪ್ ಆಯ್ಲೆಂ ತರ್ ಮೆಲ್ವಿಕ್ ಧಾಡ್ಚೆಂ, ಆನಿ ಬಾಕಿಚೆಂ ತಾಚೆರ್ ಸೊಡ್ಚೆಂ.
ಹ್ಯಾ ಸರ್ವ್ ದಿಸಾಂನಿ ಸಯ್ರ್ಯಾಂಗೆರ್, ಇಸ್ಟಾಂಗೆರ್ ಗೆಲೊಂ, ಪ್ರಗತಿ ಪಳೆಲಿ, ಬದ್ಲಾವಣ್ ಪಾರ್ಕಿಲಿ, ಎಕಾಮೆಕಾ ದಿಂವ್ಚೊ ಮಹತ್ವ್ ಸಮ್ಜೊಲೊಂ. ರಿತಿಂ ಪಾಕಿಂ ಫೆನಾಂನಿ, ಫೆನಾಂ ಆಸ್ಲಿಂ ಎಸಿಂನಿ, ಸಿಮೆಂಟೆಚಿ ಧರ್ಣ್ ಆಸ್ಲಿ ಮಾರ್ಬಲಾಂನಿ ಬದ್ಲಲ್ಲಿ ಪ್ರಗತಿ ಪಳೆಲಿ. ಗೋಡ್ ಉದಾಕ್ ಆಸ್ಲೆಂ ಶರ್ಬತಾನಿ, ಶರ್ಬತ್ ಆಸ್ಲೆಕಡೆ ಟಿನ್ನಾಚ್ಯಾ ಜ್ಯೂಸಾಂನಿ, ವ ಪೆಪ್ಸಿ, ಕೋಲಾ, ಸಿಟ್ರಾ, ಸೆವೆನಪಾಂತ್ ಜಾಲ್ಲಿ ಬದ್ಲಾವಣ್ ಪಾರ್ಕಿಲಿ. ಮಾತ್ಯೆಚಿ ವಾಟ್ ಡಾಮರಾಚಿ ಜಾಲ್ಲಿ ಪಳೆತಾನಾ, ಎಕ್ರೊ ಜಾಗೊ ಸೆಂಟ್ಸಾನ್ ವಿಂಗಡ್ ಕೆಲ್ಲೊ, ಸೆಂತ್ಸಾಚೊ ಜಾಗೊ ಸ್ಕ್ವೇರ್ ಫುಟಿಂತ್ ಮೆಜ್ಚೆಂ ಪಳೆಲೆಂ. ಯಕ್ಶಗಾನ ಶಿವಾಯ್ ಹೆರ್ ಕಿತೆಂಚ್ ಚಡ್ತಾವ್ ಜಾವ್ನ್ ಸಮ್ಜಾನಾತ್ಲ್ಲ್ಯಾ ಆಮ್ಚ್ಯಾ ಗಾಂವ್ಚ್ಯಾ ಲೊಕಾಂನಿ ಸೆನ್ಸೆಕ್ಸಾಚೆರ್, ಶೇರ್ ಮಾರ್ಕೆಟಿಚೆರ್, ಇತ್ಲೆಂಚ್ ನ್ಹಯ್ ಸತ್ತ್ಯಮಾಚ್ಯಾ ರಾಮಲಿಂಗಮಾಚ್ಯಾ ಸ್ವಿಸ್ ಬ್ಯಾಂಕಾಚ್ಯಾ ಎಕೌಂಟಾಚೆರ್ ಸಯ್ತ್ ತರ್ಕ್ ಜಾಂವ್ಚೆಂ ಆಯ್ಕಾಲೆಂ. ಕಿರಣ್ ಬೇಡಿಚ್ಯಾ ಕಚೇರಿಂತ್ ಜಾಲ್ಲ್ಯಾ ಫಯ್ಸಲಾಚೆರ್ ಸಯ್ತ್, ಪಯ್ಸಿಲ್ಯಾ ಮುಂಬಯಾಂತ್ ಎಮ್ಮೆನೆಸಾಚ್ಯಾ ಕಾರ್ಯಕರ್ತಾಂನಿ ಕೆಲ್ಲ್ಯಾ ಗೂಂಡಾಗರ್ದಿ (ಮಾಫ್ ಕರಾ, ಹಿ ತಾಂಚೆಪ್ರಕಾರ್ ಗೂಂಡಾಗಿರಿ ನ್ಹಯ್, ಹಿ ತಾಂಚಿ ಸಭ್ಯತಾ) ಹ್ಯೇ ಸರ್ವ್ ವಿಶ್ಯಾಂಚೆರ್ ಪರ್ಗಟ್ ರಿತಿನ್ ಜಾಂವ್ಚೆ ತರ್ಕ್ ವಿಶ್ಲೇಷಣಾಂ ಆಯ್ಕೊಂಕ್ ಮಜಾ ಆಯ್ಲಿ. ಕಿತೆಂ ಕರ್ಚೆಂ ಆಮ್ಚ್ಯಾ ದೆಶಾಂತ್ ಕೊಣಾಯ್ಕೀ ಕಿತೆಂಯ್, ಕಶೆಂಯ್ ಉಲಂವ್ಕ್, ಕರುಂಕ್ ಸ್ವಾತಂತ್ರ್ ಆಸಾ ಪಳೆ?
ಬೆಂಗ್ಳುರಾಂತ್ ರಮದಾಂತ್ ಪಾಂಚ್ ದಿಸಾಂಚೆಂ ’ಪ್ರಿನ್ಸ್ 2’ ಟ್ರೇಯ್ನಿಂಗ್ ಆಸ್ಲೆಂ, ತ್ಯಾ ಟ್ರೇಯ್ನಿಂಗಾಂತ್ ಹಾಜರ್ ಆಸ್ಲೆಲ್ಯಾ ವಿಪ್ರೋಂತ್ಲ್ಯಾ ಥೊಡ್ಯಾ ಕನ್ಸಲ್ಟೆಂಟಾನಿ ಸವಾಲ್ ಕೆಲೆಂ ’ತುಂ ಖಂಯ್ಚೊ?’. ಹಾಂವ್ ಚಿಂತುಂಕ್ ಪಡ್ಲೊಂ ಕಸಲಿ ಜಾಪ್ ದೀಂವ್ ಮ್ಹಣ್. ಜಲ್ಮೊನ್ ವ್ಹಡ್ ಜಾಲ್ಲೊ ಮಂಗ್ಳುರಾಂತ್ (’ಅಜೆಕಾರ್’ ಸಭ್ದ್ ಲ್ಹಾನ್ ತರ್), ಸಭಾರ್ ವರ್ಸಾಂ ಕಾಮ್ ಕೆಲ್ಲೆಂ ಮುಂಬಯಾಂತ್, ಫುಡೆಂ ಬೆಂಗ್ಳುರಾಂತ್ ವಸ್ತಿ ಕರುಂಕ್ ಚಿಂತುನ್ ಆಸಾಂ’. ತಕ್ಶಣ್ ತಾಣೆಂ ಅನ್ಯೇಕ್ ಸವಾಲ್ ಕೆಲೆಂ ’ಹೋ, ತರ್ ತುಕಾ ಮುತಾಲಿಕಾಚಿ ಬರಿ ವ್ಹಳೊಕ್ ಆಸೊಂಕ್ ಪುರೊ’? ಹಾಂವ್ ಚಿಂತುಂಕ್ ಪಡ್ಲೊಂ ಕೊಣ್ ಹೊ ಮುತಾಲಿಕ್? ಜಶೆಂ ಸುಂಕುಡ್ಡೊ ಆನಿ ಗಾಸ್ಪರಾವಿಶಿಂ ಚಿಂತ್ಲ್ಲೆಪರಿಂ. ಉಪ್ರಾಂತ್ ಕಳ್ಳೆಂ ಮಂಗ್ಳುರಾಂತ್ ಉದೆಲ್ಲ್ಯಾ ಮೋರಲ್ ಪೊಲಿಸಾಂವಿಶಿಂ.
ಹಾಂವ್ ಚಿಂತುಂಕ್ ಪಡ್ಲೊಂ; ಹ್ಯಾ ಗಾಂವಾಂನಿ ಸದಾಂಚೆಂ ಬಾಯ್ಲಾಂಚೆರ್ ನಾನಾ ರಿತಿಚೆಂ ಶೋಶಣ್ ಜಾತಾ, ಘೊವ್ ಬಾಯ್ಲಾಂಕ್, ಬಾಫುಯ್ ಧುವಾಂಕ್, ಪೂತ್ ಆವಯಾಂಕ್ ದುಖಯ್ತಾ, ಲುಟ್ತಾ. ದೋತ್ ದೆಣ್ಯಾಂಚ್ಯಾ ನಿಬಾಂನಿ ಕಿತ್ಲೆಶಿಂ ಚೆಡ್ವಾಂ ಜಿವ್ಘಾತ್ ಕರ್ತಾತ್, ಕಿತ್ಲೆಶ್ಯಾಂಕ್ ಲಗಾಡ್ ಕಾಡ್ತಾತ್, ಕಿತ್ಲೆಶಿಂ ಬಾಯ್ಲಾಂ, ಚೆಡ್ವಾಂ ಪರ್ಗಾಂವಾಂನಿ ಕೊಣಾ ಕೊಣಾಚ್ಯಾ ಶೋಶಣಾಂತ್ ಅಜೂನ್ ಜಿಯೆವ್ನ್ ಆಸಾ, ತೆದ್ನಾಂ ಹೆ ಮೋರಲ್ ಪೊಲಿಸ್ ಕಂಯ್ ಗೆಲ್ಲೆ? ಆಸೊಂ - ಭೋವ್ಶಾ ಹಾಂಚೆಪ್ರಕಾರ್ ಹಿ ಸಭ್ಯತಾ. (ಪ್ರಗತಿಪರ್ ಸಂಸಾರಿ ಉತ್ರಾಂನಿ ಸಾಂಗ್ತಾಂ)
’ಅಂತರ್ಜಾಳಿಚೆರ್ ಕೊಂಕ್ಣೆಚೊ ಫುಡಾರ್’ ವಿಶ್ಯಾಚೆರ್ ಮ್ಹಾಕಾ ಏಕ್ ಉಲವ್ಪ್ ತಯಾರ್ ಕರ್ಯೆತ್ಗೀ ಮ್ಹಳ್ಳ್ಯಾ ಎಚ್ಚೆಮಾಚ್ಯಾ ಸವಾಲಾಚೆರ್ ಮಂಗ್ಳುರ್ ಏರ್ಪೋರ್ಟಾಂತ್ ಆಸ್ತಾನಾ ಫೊನಾರ್ ಲಾಂಬಾಯೆಚೊ ಸಂವಾದ್ ಚಲಯ್ಲೊ (ಹಾಂವ್ಯೀ ವಿಮಾನಾರ್ ಉಭ್ಲೊಂ ಮ್ಹಣ್ ಸಾಂಗ್ಚೊ ಅನ್ಯೇಕ್ ಆವ್ಕಾಸ್ ಗಳ್ಸಿತಾಂ); ಸಭಾರ್ ವಿಶ್ಯಾಚೆರ್ ಉಲವ್ಪ್ ಜಾಲೆಂ; ಹಾಂತುಂ ಪ್ರಮುಖ್ ಉತಾರ್ ಜಾವ್ನಾಸ್ಲೆಂ ’ಸಭ್ಯತಾ’. ಹಾಂವೆಂ ಸಾಂಗ್ಲೆಂ; ಪೋಯ್ರ್ ಬೊಂಬೊಯಾಂತ್ ಬೋಂಬ್ ಫುಟವ್ನ್ ನಿರಪ್ರಾಧಿ ಲೊಕಾಂಕ್ ಲಗಾಡ್ ಕಾಡ್ಲೆಲ್ಯಾ ಖುನಿಗಾರಾಂಕ್ ಜರ್ ಏಕ್ ಸವಾಲ್ ವಿಚಾರ್ಲ್ಲೆಂ ’ತುಮಿ ಕರ್ಚಿ ವಾ ಕೆಲ್ಲಿ ಸಭ್ಯತಾಗೀ?’ ತರ್ ಜರೂರ್ ತಿಂ ಜಾಪಿ ದಿತಿಂ ’ವ್ಹಯ್’. ತಾಲಿಬಾನಾಕ್ ವಚೊನ್ ವಿಚಾರಾ ’ತುಮಿ ಕರ್ನ್ ಆಸ್ಚಿ ಸಭ್ಯತಾಗೀ?’ ’ವ್ಹಯ್’ ಮ್ಹಣ್ತೆಲಿಂ ತಿಂ. ಅಲ್-ಕಾಯ್ದಾಕ್ ವಿಚಾರಾ ತುಮಿ ಕೆಲ್ಲಿ ವ ಕರುನ್ ಆಸ್ಚಿ ’ಸಭ್ಯತಾ’ಗೀ? ತಿಂ ವ್ಹಯ್ ಮ್ಹಣ್ತೆಲಿಂ.
ಅಶೆಂ ವಾದ್ ವಿವಾದ್ ಕರ್ತಾನಾ ಅಪ್ಶೆಂಚ್ ಏಕ್ ಸತ್ ಹಳ್ತಾರ್ ತರ್ಯೀ ಸ್ಪಶ್ಟ್ ಜಾಲೆಂ; ’ಆಮಿ ಕೆಲ್ಲೆಂ ವಾ ಕರ್ಚೆಂ ಸರ್ವ್ ಬರೆಂ’, ’ಹೆರಾಂನಿ ಕೆಲ್ಲೆಂ ವ ಕರ್ನ್ ಆಸ್ಚೆಂ ಸರ್ವ್ ವಾಯ್ಟ್’.
ಇತ್ಲೆಂ ಸರ್ವ್ ಚಿಂತುಂಕ್ ವೆತಾನಾ ಆಂಡ್ರುಚ್ಯಾ ಕವಿತೆಚಿಂ ಉತ್ರಾಂ ನಾಕಾ ನಾಕಾ ಮ್ಹಳ್ಯಾರೀ ಉಡಾಸಾಕ್ ಆಯ್ಲಿಂ ’ಜಾಗ್ಯಾಚಿಂ ಮೊಲಾಂ ಮೆಜುಂಕ್ ಮೊಳ್ಬಾಕ್ ಚಡಾ, ಮನ್ಶಾ ಮೊಲಾಂ ತಿಳುಂಕ್, ಚರಂಡೆನಿ ಸೊಧಾ’.
ಆತಾಂ ಮ್ಹಜೆಯಿತ್ಲ್ಯಾಕ್ ಚಿಂತುನ್ ಆಸಾಂ, ಪ್ರಗತಿಪರ್ ಪಾವ್ಲಾಂನಿ ಚಮ್ಕೊಂಚ್ಯಾ ಆಮ್ಚ್ಯಾ ದೇಶಾಂತ್ ಮನ್ಶಾಪಣಾಚಿಯೀ ಪ್ರಗತಿ ಜಾಲ್ಲಿ ತರ್?
ಖಾಲ್ತೆಪಣಿಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
