ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ಏಕ್
ಜಿವಿತ್ ತುಕಾ ಆಪಯ್ತಾ
ಆವಸ್ವರ್ ಸಾತ್: ಮಿಶೇಲ್
ತೊ ದೀಸ್ ಶೀತಲಾಚಾ ಕಾಜಾರಾಚೊ ದೀಸ್!
ಶೀತಲ್ ಏರ್ಹೊಸ್ಟೆಸ್ ಜಾವ್ನ್ ವಿಮಾನಾರ್ ಚಡೊನ್ ಭರ್ತಿ ವರಸ್ ಸಂಪ್ಚಾ ಆದಿಂಚ್ ಶೀತಲಾಚಾ ಬಾಪಾಯ್ನ್ ಧುವೆಚಿ ಸೈರಿಕ್ ಘಟ್ ಕೆಲ್ಲಿ.
ವಿಶುಕುಮಾರ್! ಶೀತಲಾಕ್ ಸೈರಿಕ್ ಜಾಲ್ಲೊ ನೊವ್ರೊ ಗಾವಾಂತ್ ಮಂಗ್ಳುರ್ಚೊ. ಪುಣ್ ತಾಣೆಂ ವಸ್ತಿ ಕರ್ಚೆಂ ಪಯ್ಶಿಲ್ಯಾ ತ್ಯಾ ಮುಂಬಯಿಂತ್. ಮುಂಬಯಿಚಾ ಬಾಂದ್ರಾಂತ್ ತಾಚೆಂ ಬೂಟಿಕ್ ಆಸ್ಲ್ಲೆಂ. ಸಾಂತಾಕ್ರೂಜಾಂತ್ ತಾಚೆಂ ಹೋಟೆಲ್ ಆಸ್ಲ್ಲೆಂ. ಗಾವಾಂತ್ ಬಾಪಾಯ್ಚಿ ದರಬಸ್ತ್ ಆಸ್ತ್ ಆಸ್ಲ್ಲಿ. ಹಿ ಸಗ್ಳಿ ಆಸ್ತ್ ತಾಚ್ಯಾ ಬಾಪಾಯ್ನ್ ತೊ ಮುಂಬಯಿ ಗೆಲ್ಯಾ ಉಪ್ರಾಂತ್ಚ್ ಜೊಡ್ಲೆಲಿ. ತ್ಯಾ ಭಾಯ್ರ್ ಶೇರ್ ಮಾರ್ಕೆಟಿಂತ್ ತೊ ಮೆತೆರ್ ಆಸ್ಲ್ಲೊ.
ಪಯ್ಶಾಕ್ ಪಯ್ಸೊ ಸೊಧ್ತಾ ಮ್ಹಳ್ಳ್ಯಾ ಪರಿಂ ಶೀತಲಾಚಾ ಬಾಪಾಯ್ನ್ ಆಪ್ಲ್ಯಾ ಧುವೆಕ್ ಮಂತನಾಚಾ ಕುಟ್ಮಾಂತ್ಲಿ ಸೈರಿಕ್ಚ್ ಹಾಡ್ಲೆಲಿ.
ಶೀತಲಾನ್ ಆಪ್ಣಾಕ್ ಜಾಂವ್ಚಾ ನೊವ್ರಾಚಿ ಸಗ್ಳಿ ಖಬಾರ್ ಮಿಶೇಲಾಕ್ ಸಾಂಗ್ಲ್ಲಿ.
ಶೀತಲಾನ್ ಮಿಶೇಲಾಕ್ ವಿಶು ಕುಮಾರಾ ವಿಶಿಂ ಸಾಂಗ್ತಾನಾ ತೆಂ ತಿತ್ಲೆಂ ಆಜಾಪ್ ಜಾಂವ್ಕ್ ನಾತ್ಲ್ಲೆಂ ಜಿತ್ಲೆಂ ಮಿಶೇಲ್ ಆಜ್ ಶೀತಲಾಚಾ ಕಾಜಾರಾಚಾ ಸಂಭ್ರಮಾಕ್ ಪಳವ್ನ್ ವಿಜ್ಮಿತ್ ಪಾವ್ಲ್ಲೆಂ.
ವಿಶುಕುಮಾರಾಚೆಂ ಬಿಜ್ನೆಸ್ ಮುಂಬಯಿ ಆಸ್ಲ್ಲೆಂ ವ್ಹಯ್ ಜಾಲ್ಯಾರ್ಯ್ ತಾಚೆಂ ಕಾಜಾರ್ ಮಾತ್ರ್ ಮಂಗ್ಳುರಾಂತ್ ಚಲ್ಲೆಂ. ಬೋವ್ಶಾ ಮಿಶೆಲಾನ್ ತಾಚ್ಯಾ ಜಲ್ಮಾಂತ್ ಆಸಲೆಂ ಕಾಜಾರ್ ಪಳಂವ್ಕ್ ನಾತ್ಲೆಲೆಂ. ಕಾಜಾರ್ ಧಾರ್ಮಿಕ್ ರಿತಿ ರಿವಾಜೆ ಪರ್ಮಾಣೆಂ ಚಲ್ಲೆಂ. ಸಾಂಜೆಚೊ ಕಾಜಾರಾ ಸಂಭ್ರಮ್ ಮಾತ್ರ್ ಉಗ್ತ್ಯಾ ಮಯ್ದಾನಾರ್, ವಿಜ಼್ ದಿವ್ಯಾಂಚಾ ಸಜವ್ಣೆಂತ್, ಸಂಗೀತಾಚಾ ವ್ಹಾಳ್ಯಾ ಮಧೆಂ ವಿಬಿನ್ನ್ ರಿತಿರ್ ಆಸಾ ಕೆಲ್ಲೊ. ಮುಂಬಯಿಚೆ ಬಿಜ್ನೆಸ್ ಮ್ಯಾನ್ ಹಾಜರ್ ಜಾಲ್ಲೆ.
ಶೀತಲ್ ಮಿಶೇಲಾಚೆಂ ಲಾಗ್ಶಿಲೆಂ ಇಷ್ಟಿಣ್ ಜಾವ್ನ್ಯ್ ಆಜ್ ತಾಚ್ಯಾ ಕಾಜಾರಾ ದಿಸಾ ಮಾತ್ರ್ ಮಿಶೇಲಾಕ್ ತೆಂ ಪರ್ಕಿ ಮ್ಹಳ್ಳ್ಯಾ ಪರಿಂ ಜಾಲೆಂ. ಶೀತಲ್ ಆನಿ ತಾಚ್ಯಾ ಘರ್ಚಿಂ ಕಾಜಾರಾಚಾ ಸಂಭ್ರಮಾಂತ್ ಚಡ್ ಮೆತೆರ್ ಆಸ್ಲ್ಲಿಂ. ಮಂತನಾಚಾ ಕುಟ್ಮಾಂತ್ ಮರ್ಯಾದೆಕ್ ಪಯ್ಲೆಂ ಸ್ಥಾನ್ ಆಸ್ಲ್ಲೆಂ ಆಸ್ತಾಂ ಹರ್ಯೆಕಾವಾಟೆನ್ ಆಪ್ಣಾಚಾ ತರ್ಪೆನ್ ಕಾಂಯ್ ಉಣೆಂಪಣ್ ಜಾಂವ್ಕ್ ನುಜೊ ಮ್ಹಣೊನ್ ಶೀತಲಾಚೊ ಬಾಪಯ್ ವಾವುರ್ತಾಲೊ. ಉರ್ಲೆಲ್ಯಾ ಸಂಭ್ರಮಾಂಚಾ ದಿಸಾ ತೊ ಎಕ್ಲೊ ಪಯ್ಶಾಂಗಾರ್ ಜಾವ್ನ್ ಫಕತ್ತ್ ತೊ ಮಾನಾಕ್ ಮಾತ್ರ್ ಬಸ್ತಾಲೊ ಶಿವಾಯ್ ಮಾನ್ ದೀಂವ್ಕ್ ಬಸಾನಾತ್ಲ್ಲೊ. ಪುಣ್ ಆಜ್ ತೊ ಎಕಾ ಚೆಡ್ವಾಚೊ ಬಾಪಯ್ ಆನಿ ಆಪ್ಲ್ಯಾಚ್ ಧುವೆಚೆಂ ಕಾಜಾರ್ ಮ್ಹಣ್ತಾನಾ ತಾಣೆಂ ಆಜ್ ಹೆರಾಂಕ್ ಮಾನ್ ದೀಂವ್ಕ್ ಆಸ್ಲ್ಲೊ.
ಉಗ್ತ್ಯಾ ಮಯ್ದಾನಾರ್ ಬಾಂದ್ಲಲೊ ಮಂಟಪ್ ವಿಜ಼್ ದಿವ್ಯಾಂನಿ ಪರ್ಜಳ್ತಾಲೊ. ಪುಣ್ ತ್ಯಾ ಮಂಟಪಾ ಭಿತರ್ ಮಾತ್ರ್ ಅಜೂನ್ ಹೊಕಾಲ್ ನೊವ್ರೊ ಪ್ರವೇಶ್ ಜಾಂವ್ಕ್ ನಾತ್ಲೆಲ್ಯಾನ್ ತ್ಯಾ ಮಂಟಪಾಚಾ ಪರ್ಜಳ್ಕಾಯೆಂತ್ ಥೊಡೆಂ ಉಣೆಂಪಣ್ ಆಸಾ ಮ್ಹಳ್ಳ್ಯಾಪರಿಂ ಮಿಶೇಲಾಕ್ ಭೊಗ್ಲೆಂ.
ಮಂಟಪಾಚಾ ಲಾಗಿಂಚ್ ನ್ಹಯ್ ತರ್ಯ್ ತಿಕ್ಕೆ ಪಯ್ಸ್ ಮಾಂಡ್ಲೆಲ್ಯಾ ರೌಂಡ್ ಟೇಬಲಾಚಾ ಚೇರಾಂಕ್ ಪಾಟಿಂ ವೊಡುನ್ ಜೆರೊಮಾನ್ ಬಸ್ಕಾ ಘೆತ್ಲೆಲಿ. ಕಸಲ್ಯಾಯ್ ಸಂಭ್ರಮಾಂತ್ ಜೆರೊಮ್ ಸಗ್ಳ್ಯಾಂ ಫುಡೆಂ ಹಾಜರ್ ಜಾಯ್ನಾತ್ಲ್ಲೊ. ಹೊ ತಾಚೊ ಪಯ್ಲೆಂಚೊ ಸ್ವಭಾವ್. ತ್ಯಾ ಸೊಭಿತ್ ಮರೂನ್ ರಂಗಾಚಾ ಟೇಬಲ್ ಕ್ಲಾತಾನ್ ಸಗ್ಳ್ಯಾ ಮಯ್ದಾನಾಚಾ ರೌಂಡ್ ಟೇಬಲಾಂಕ್ ನೆಟಯಿಲ್ಲೆಂ. ಮಯ್ದಾನಾ ದೆಗೆಚಾ ರುಕಾಂಕ್ ಸುಂರ್ಗಾರಾಯಿಲ್ಲ್ಯಾ ವೀಜ಼್ ದಿವ್ಯಾಂಚಾ ಉಜ್ವಾಡಾಂತ್ ಹೆಂ ಮೆರೂನ್ ರಂಗಾಚೆಂ ಟೇಬಲ್ ಕ್ಲಾತ್ ಬರೆಂಚ್ ಸೊಭ್ತಾಲೆಂ. ಜೆರೊಮಾನ್ ಪಸಂದ್ ಕೆಲ್ಲ್ಯಾ ರೌಂಡ್ ಟೇಬಲಾರ್ ಜೆರೊಮ್, ತಾಚ್ಯಾ ದಾವ್ಯಾಕ್ ಎಸ್ತೆಲ್ ಆನಿ ಎಸ್ತೆಲಾಚಾ ಬಗ್ಲೆಕ್ ಮಿಶೇಲ್ ಬಸ್ಲ್ಲೆಂ. ತಾಚ್ಯಾ ಬಗ್ಲೆಕ್ ಏಕ್ ಬಸ್ಕಾ ಖಾಲಿ ಆಸ್ಲ್ಲಿ.
"ಜಿಮ್ಮಿ ಆಯಿಲ್ಲೊ ಜಾಲ್ಯಾರ್.....!" ಮಿಶೇಲಾಕ್ ಜಿಮ್ಮಿಚೊ ಉಡಾಸ್ ಆಯ್ಲೊ.
ಜಿಮ್ಮಿಕ್ ಶೀತಲಾನ್ ಕಾಜಾರಾಚೆಂ ಆಮಂತ್ರಣ್ ದಿಲ್ಲೆಂ. ಜಿಮ್ಮಿಚಾ ಉಡಾಸಾ ಥಾವ್ನ್ ತ್ಯಾ ದಿಸಾಚೊ ತಾಣೆಂ ಉಡಾಸ್ ಕಾಡ್ಲೊ. ತ್ಯಾ ದೀಸ್ ಮಿಶೇಲ್ ಆನಿಶೀತಲ್ ದೊಗಾಂಯ್ ಶಾಪಿಂಗಾಕ್ ವೆಚ್ಯಾ ವಾಟೆರ್ ಜಿಪಾಚೆರ್ ಶೀತಲಾನ್ ಜಿಮ್ಮಿಕ್ ಆಪ್ಲ್ಯಾ ಕಾಜಾರಾಚೆಂ ಆಮಂತ್ರಣ್ ದಿಲ್ಲೆಂ.
"ಆಪ್ಣಾಕ್ ಯೇಂವ್ಕ್ ಜಾಂವ್ಚೆಂ ನಾ ಶೀತಲ್. ದೆಕುನ್ ತುಂ ಕಾಂಯ್ ಬೆಜಾರ್ ಕರಿನಾಕಾ!"
ತ್ಯಾಚ್ ತಾಚ್ಯಾ ತ್ಯಾ ನಿಳಾ ನಾತ್ಲೆಲ್ಯಾ ತೊಂಡಾರ್, ತ್ಯಾಚ್ ಘಟ್ ತಾಳ್ಯಾನ್ ಜಿಮ್ಮಿನ್ ಇನ್ಕಾರ್ ಕೆಲ್ಲೆಂ.
"ಆಶೆಂ ಕಿತ್ಯಾಕ್?"
ಜಿಮ್ಮಿಚಾ ನಿರಾಕಾರಾ ಥಾವ್ನ್ ಶೀತಲಾಚಾ ಸಂತೊಸಾರ್ ಶೆಳೆಂ ಉದಾಕ್ ವೊತ್ಲೆಲ್ಯಾ ಪರಿಂ ಜಾಲ್ಲೆಂ. ತೆಂ ಖುಶ್ ಜಾತೆಲೆಂ ಜಾಲ್ಯಾರ್ಯ್ ಕಶೆಂ? ಕಾಜಾರಿ ಜಿವಿತಾಚಿಂ ಅವ್ಯಕ್ತ್ ಭಗ್ಣಾಂ ತಾಚ್ಯಾ ಕಾಳ್ಜಾಂತ್ ಉಮಾಳ್ತಾಲಿಂ. ಕಸಲೆಂಗೀ ಏಕ್ ನವೆಂಸಾಂವ್ ಚಾಕೊಂಕ್ ವೆಚೊ ಸಂತೊಸ್ ತಾಚ್ಯಾ ದೊಳ್ಯಾಂನಿ ಆಸ್ಲ್ಲೊ. ಹ್ಯಾ ಸಂತೊಸಾಕ್ ತಾಚ್ಯಾಂನಿ ಪಾಟಿಂಬೊ ದಿಲ್ಲ್ಯಾ ತಿತ್ಲೆಂ ಶೀತಲ್ ಖುಶಿಯೆನ್ ಫುಲ್ತಾಲೆಂ. ಪುಣ್ ಜಿಮ್ಮಿ....?
"ತುವೆಂ ಪ್ರೆಸೆಂಟ್ ಕಾಂಯ್ ಹಾಡ್ಚೆಂ ನಾಕಾ! ತುಕಾ ಹಾಂವ್ ಖಾಸ್ಗೆನ್ ಹೆಂ ಆಪವ್ಣೆಂ ದಿತಾಂ.....!"
ಏಕ್ ಪಾವ್ಟಿಂ ಜಿಮ್ಮಿಚಾ ತೊಂಡಾಕ್ ಏಕ್ ಪಾವ್ಟಿಂ ಮಿಶೇಲಾಚಾ ತೊಂಡಾಕ್ ಪಳವ್ನ್ ಶೀತಲ್ ಉಲಯ್ಲೆಂ. ಮಿಶೇಲಾಕ್ ಜಾಲ್ಯಾರ್ಯ್ ಜಿಮ್ಮಿಚಾ ಹ್ಯಾ ಇನ್ಕಾರಾಚೊ ಮತ್ಲಾಬ್ ಚಮ್ಜಾಲೊ ನಾ.
"ತುವೆಂ ಪ್ರೆಸೆಂಟ್ ಹಾಡ್ ಮ್ಹಳ್ಯಾರ್ಯ್ ಮ್ಹಾಕಾ ಹಾಡುಂಕ್ ಜಾಂವ್ಚೆಂ ನಾ ಶೀತಲ್! ತುಜ್ಯಾ ಅಂತಸ್ಥೆಕ್....., ತುಜ್ಯಾ ಮರ್ಯಾದೆಕ್....., ಫಾವೊ ತೆಂ ಪ್ರೆಸೆಂಟ್ ದೀಂವ್ಕ್ ಬೋವ್ಶಾ ಹಾವೆಂ......." ಜಿಮ್ಮಿ ಮುಕಾರ್ ಉಲಯ್ಲೊ ನಾ.
ಜಿಮ್ಮಿಚಿಂ ಉತ್ರಾಂ ಆಯ್ಕಾಲ್ಲೆಂ ಶೀತಲ್ ತಶೆಂಚ್ ಜಿಪಾಚಾ ಬಸ್ಕೆಕ್ ಪಾಟಿಂ ವೊಣ್ಕಾಲೆಂ.
ತಾಚಿ ಉತ್ರಾಂ ತಾಕಾ ಭಾಲಿಯೆ ಪರಿಂ ತೊಪ್ಲಿಂ. ತೆಂ ಥೊಡೊ ವೇಳ್ ಮೌನ್ ಜಾಲೆಂ.
"ಪಳೆ ಜಿಮ್ಮಿ!" ಶೀತಲ್ ಆತಾಂ ವ್ಹಳೂ ಉಲಯ್ಲೆಂ. "ಮ್ಹಜ್ಯಾ ಆನಿ ತುಜ್ಯಾ ಅಂತಸ್ಥೆಕ್ ಪಳವ್ನ್ ಹಾವೆಂ ತುಕಾ ಹೆಂ ಆಮಂತ್ರಣ್ ದೀಂವ್ಕ್ ನಾ. ಇತ್ಲ್ಯಾ ದಿಸಾಂನಿ ಆಮಿಂ ಸಾಂಗಾತಾ ಆಸ್ಲ್ಲ್ಯಾಂವ್ ಮ್ಹಳ್ಳ್ಯಾ ಖಾತಿರ್ ದಿತಾಂ. ತುಂ ಮಿಶೇಲಾಚಾ ಘರ್ಚೊ ಡ್ರೈವರ್ ಜಾಂವ್ಕ್ ಪುರೊ....! ಪುಣ್ ತುಕಾ ಹಾವೆಂ ಫಕತ್ತ್ ಎಕಾ ಡ್ರೈವರಾಚಾ ನದ್ರ್ರೆನ್ ಮಾತ್ರ್ ಪಳಂವ್ಕ್ ನಾ.....!"
"ತುಂ ಹಾಂಗಾ ಆಯ್ಕ್ ಶೀತಲ್!"
ಏಕ್ ಪಾವ್ಟಿಂ ಪಾಟಿಂ ಘುಂವೊನ್ ಶೀತಲಾಕ್ ಪಳೆಲ್ಲ್ಯಾ ಜಿಮ್ಮಿನ್ ಪರ್ತ್ಯಾಕ್ ಆಪ್ಲ್ಯಾ ದಿಶ್ಟೆಕ್ ಮುಕ್ಲ್ಯಾ ರಸ್ತ್ಯಾರ್ ಕೇಂದ್ರೀಕ್ರತ್ ಕೆಲಿ.
"ತುಂ ಮ್ಹಾಕಾ ಕಾಂಯ್ಚ್ ನೆಣಾಂಯ್ ಶೀತಲ್. ಹಾಂವ್ ಕೋಣ್? ಹಾಂವ್ ಕಿತೆಂ? ತುಂ ಕಾಂಯ್ಚ್ ನೆಣಾಂಯ್. ಆಮಿಂ ಸಂಭಂಧ್ ಜೊಡ್ಚಾ ಪಯ್ಲೆಂ ಎಕಾಮೆಕಾ ವಳ್ಕೊಂಕ್ ಜಾಯ್. ಆಶೆಂ ಆಸ್ತಾಂ....."
"ತರ್ ತುಂ ಕೋಣ್ ಜಿಮ್ಮಿ?" ಜಿಮ್ಮಿನ್ ಆಶೆಂವ್ಕ್ ನಾತ್ಲ್ಲೆಂ ಸವಾಲ್ ಶೀತಲಾಚಾ ತೊಂಡಾ ಥಾವ್ನ್ ಭಾಯ್ರ್ ಪಡ್ಲೆಂ. ಅಚಾನಕ್!
ಮಿಶೇಲ್ ಮಾತ್ರ್ ದೊಗಾಂಯ್ಚೆಂ ಸಂಭಾಶಣ್ ಮೌನ್ ಪಣಿಂ ಬಸೊನ್ ಆಯ್ಕಾತಾಲೆಂ. ಶೀತಲಾಕ್ಯ್ ಹೆಂ ಸವಾಲ್ ಜಿಮ್ಮಿನ್ಚ್ ಉಟಯಿಲ್ಲೆಂ ತೆಂ ತಾಕಾ ಚಡ್ ಫಾಯ್ದ್ಯಾಚೆಂ ಮ್ಹಣೊನ್ ಭಗ್ಲೆಂ. ಹಾಚ್ಯಾ ಆದಿಂ ಹೆಂ ಸವಾಲ್ ವಿಚಾರುಂಕ್ ಶೀತಲಾಕ್ ಧಯ್ರ್ ನಾತ್ಲ್ಲೆಂ.
".........."
ಶೀತಲಾಚ ಸವಾಲಾಕ್ ಮೌನ್ ಆಸ್ಲ್ಲೊ ಜಿಮ್ಮಿ ಶೀತಲಾಕ್ ಕಾಂಯ್ ಜವಾಬ್ ದೀನಾಸ್ತಾನಾ ತ್ಯಾಚ್ ತಾಚ್ಯಾ ದ್ರಡತಾಯೆಚಾ ಸ್ವಭಾವಾನ್ ಜೀಪ್ ಚಲಯ್ತಾಲೊ. ಶೀತಲಾಚಾ ಸವಾಲಾನ್ ಜಾಂವ್ ಯಾ ಖುದ್ದ್ ತಾಚ್ಯಾಚ್ ಮತಿಂತ್ಲ್ಯಾ ಚಿಂತ್ನಾಂನಿ ಜಾಂವ್ ತಾಚ್ಯಾ ದ್ರಡ್ ಸ್ವಭಾವಾಚೆರ್ ಕಾಂಯ್ಚ್ ಪ್ರಭಾವ್ ಘಾಲ್ಲ್ಯಾ ಪರಿಂ ದಿಸ್ಲೆಂ ನಾ.
"ಆತಾಂ ಕಿತ್ಯಾಕ್ ಉಲಯ್ನಾಂಯ್ ತುಂ?" ಶೀತಲಾನ್ ವಿಚಾರ್ಲೆಂ.
"ತುಮ್ಕಾಂ ಖಂಯ್ಚಾ ಶಾಪಾಕ್ ವಚೊಂಕ್ ಜಾಯ್?" ಜಿಮ್ಮಿನ್ ವಿಶಯ್ ಬದ್ಲಿಲೊ.
"ತರ್ ತುಂ ಮ್ಹಜ್ಯಾ ಕಾಜಾರಾಕ್ ಯೇನಾಂಯ್.....?"
"........."
ಜಿಮ್ಮಿಚೆಂ ತೆಂಚ್ಚ್ ಆದ್ಲೆಂ ಮೌನ್.
"ಕಾಂಯ್ ವ್ಹಡ್ ನಾ. ಆಳೆ.... ಹೆಂ ಆಮಂತ್ರಣ್ ಕಾರ್ಡ್!" ಶೀತಲಾನ್ ಆಪ್ಲ್ಯಾ ಬ್ಯಾಗಾಂತ್ಲೆಂ ಆಮಂತ್ರಣ್ ಕಾರ್ಡ್ ಕಾಡುನ್ ಜಿಪಾಚಾ ಡ್ಯಾಷ್ ಬೋರ್ಡಾರ್ ದವರ್ಲೆಂ. "ತುಕಾ ಬರೆಂ ಮ್ಹಣೊನ್ ದಿಸ್ತಾ ಜಾಲ್ಯಾರ್ ಯೇ. ತುಂ ಯೇನಾಂಯ್ ಜಾಲ್ಯಾರ್ ವ್ಹಡ್ ನಾ. ಮ್ಹಾಕಾ ಕಾಂಯ್ ಬೆಜಾರಾಯ್ ನಾ. ಆಯ್ಲ್ಯಾರ್ ಮಾತ್ರ್ ಮ್ಹಾಕಾ ಮಸ್ತ್ ಖುಶಿ ಜಾಯ್ತ್. ತಿತ್ಲೆಂಚ್!"
ಶೀತಲಾಚಾ ತಾಳ್ಯಾಂತ್ ಬೆಜಾರಾಯ್ ಆಸ್ಲ್ಲಿ ಜಾಲ್ಯಾರ್ಯ್ ತಾಕಾ ಎಕಾ ಥರಾಚೆಂ ಸಮಾಧಾನ್ ಲಾಭ್ಲ್ಲೆಂ.
ಪುಣ್ ಆಜ್!
ಜಿಮ್ಮಿ ಖಂಡಿತ್ ಆಪ್ಲೆಂ ಮನ್ ಬದ್ಲಿತಲೊ ಆನಿ ಶೀತಲಾನ್ ಆಪಯಿಲ್ಲ್ಯಾಕ್ ಮರ್ಯಾದ್ ದೀವ್ನ್ ತರ್ಯ್ ಯೆತಲೊ ಮ್ಹಣೊನ್ ಮಿಶೇಲಾನ್ ಚಿಂತ್ಲ್ಲೆಂ. ಪುಣ್ ಆಶೆಂ ಜಾಂವ್ಕ್ ನಾ. ಜಿಮ್ಮಿನ್ ಕಾಜಾರಾಕ್ ಯೇಂವ್ಕ್ ಭಿಲ್ಕುಲ್ ನಿರಾಕರ್ಸಿಲ್ಲೆಂ. ತಾಚ್ಯಾ ತೊಂಡಾರ್ ಕಾಂಯ್ಚ್ ಉಮೆದ್ ನಾತ್ಲ್ಲಿ. ಜೆರೊಮಾನ್ ಪಾಸೊನ್ ಜಿಮ್ಮಿಕ್ ವತ್ತಾಯ್ ಕೆಲ್ಲಿ. ತೊ ನಿರಾಕರ್ಸಿತಾನಾ ತಾಚ್ಯಾ ಸ್ವಭಾವಾ ವಿಶಿಂ ಜಾಣಾಂ ಆಸ್ಲೆಲ್ಯಾ ಜೆರೊಮಾನ್ ತಾಕಾ ಚಡ್ ವತ್ತಾಯ್ ಕೆಲಿ ನಾ.
ಜೆರೊಮಾಚಾ ಕುಟ್ಮಾಕ್ ಕಾಜಾರಾಚಾ ಸಂಭ್ರಮಾಕ್ ಹಾಡುನ್ ಪಾವಯಿಲ್ಲೊ ಜಿಮ್ಮಿ ಪಾಟಿಂ ಪರ್ತಾಲ್ಲೊ.
ಮಿಶೇಲಾಚಿಂ ಚಿಂತ್ನಾಂ ಪಾಟ್ಲ್ಯಾ ದಿಸಾಂಕ್ ಧಾಂವ್ಲ್ಲಿಂ ತಿಂ ಅಜೂನ್ ಪ್ರಸ್ತುತ್ ಪರಿಸ್ಥಿತೆಕ್ ಪಾವೊಂಕ್ ನಾತ್ಲೆಲಿಂ.
ತಿತ್ಲ್ಯಾರ್!
"ಹಲೋ......!"
ಆಪ್ಣಾ ಲಾಗಿಂಚ್ ಎಕಾ ದಾದ್ಲ್ಯಾಚೊ ತಾಳೊ ಆಯ್ಕಾಲ್ಲೆಂ ಮಿಶೇಲ್ ಆಪ್ಣಾಕ್ ಕಳಿತ್ ನಾತ್ಲೆಲ್ಯಾ ಪರಿಂಚ್ ಪಾಟಿಂ ಘುಂವ್ಲೆಂ. ತಾಚ್ಯೆ ಸವೆಂ ಜೆರೊಮ್ ಆನಿ ಎಸ್ತೆಲ್ಯ್ ಪಾಟಿಂ ಘುಂವ್ಲಿಂ. ತೊ ತಾಳೊ ತಾಂಚ್ಯಾ ಭೋವ್ ಲಾಗ್ಶಿಲ್ಯಾನ್ ಆಯ್ಕಾಲ್ಲ್ಯಾ ಪರಿಂ ಜಾಲ್ಲೊ ನ್ಹಯ್ ಆಸ್ತಾಂ ತ್ಯಾ ತಾಳ್ಯಾಂತ್ ಏಕ್ ವಿಚಿತ್ರ್ ಆಕರ್ಷಣ್ ಆಸ್ಲ್ಲೆಂ.
ಪಾಟಿಂ ಘುಂವ್ಲೆಲ್ಯಾ ಮಿಶೇಲಾಕ್ ತಾಚ್ಯಾ ಪಾಟ್ಲ್ಯಾನ್ ಕಾಳ್ಯಾ ಟೆಕ್ಸಾಡೊ ಸುಟಾರ್ ಉಭೊ ಆಸ್ಲ್ಲೊ ಏಕ್ ತರ್ನಾಟೊ ದುಸ್ರ್ಯಾ ಎಕ್ಲ್ಯಾ ಕುರ್ತಾ ಪೈಜಾಮಾ ನ್ಹೆಸ್ಲ್ಲ್ಯಾ ತರ್ನಾಟ್ಯಾಕ್ ಹಾತ್ ಮೆಳಂವ್ಚೆಂ ದಿಸ್ತಾನಾ, ಎಕಾ ಖಿಣಾಕ್ ತ್ಯಾ ಸೂಟ್ ನ್ಹೆಸ್ಲೆಲ್ಯಾ ತರ್ನಾಟ್ಯಾನ್ ಹೆವ್ಶಿಂ ಮಿಶೇಲಾಕ್ ಪಳೆಲೆಂ.
ತಿತ್ಲೆಂಚ್!
ಮಿಶೇಲಾನ್ ಆಪ್ಲಿ ತಕ್ಲಿ ಪಾಟಿಂ ಘುಂವ್ಡಾಯ್ಲಿ.
"ಮ್ಹಾಕಾ ಪಾತ್ಯೆಂವ್ಕ್ ಜಾಯ್ನಾಂ....! ತುಂ....?"
"ಕಿತೆಂ ಕರುಂ....? ಬಿಜ್ನೆಸಾಂತ್........!"
ಮಿಶೇಲಾಚಾ ಪಾಟ್ಲ್ಯಾನ್ ದೊಗಾಂಚೆಂ ಹಿಂದಿಂತ್ ಉಲೊಣೆಂ ಚಲೊಂಕ್ ಲಾಗ್ಲೆಂ.
"ಓ...ಯಾ.... ಫಾರ್ ಯು ಎವ್ರಿಥಿಂಗ್ ಇಸ್ ಫೇರ್ ಇನ್ ಬಿಜ್ನೆಸ್!"
"ಬಿಕಾಸ್ ಐ ಲವ್ ಬಿಜ್ನೆಸ್!"
ಮಿಶೆಲಾಚಾ ಪಾಟ್ಲ್ಯಾನ್ ಸೂಟ್ವಾಲೊ ತರ್ನಟೊ ಆನಿ ಕುರ್ತಾ ನ್ಹೆಸ್ಲ್ಲೊ ಉಲಯ್ತಾಲೆ.
ಹೊ ಬಿಜ್ನೆಸಾಚೊ ಮೋಗ್ ಕರ್ಚೊ ತೊ ಸೂಟ್ ನ್ಹೆಸ್ಲ್ಲೊಚ್ಚ್ ಮ್ಹಣೊನ್ ಮಿಶೇಲಾನ್ ತಾಚ್ಯಾ ತಾಳ್ಯಾಕ್ ಪಾರ್ಕಿಲೆಂ. ತಾಚ್ಯಾ ಚಡ್ ಲಾಗಿಂ ರಾವೊನ್ ತೆ ಉಲಯ್ತಾಲೆ ಜಾಲ್ಲ್ಯಾನ್ ಮಿಶೇಲಾಕ್ ಕೋಣ್ ಕಿತೆಂ ಉಲಯ್ತಾ ತೆಂ ಸಗ್ಳೆಂ ಸಮ್ಜಾತಾಲೆಂ.
"ಸೀ ಯು ದೆನ್....!" ತ್ಯಾ ತರ್ನಾಟ್ಯಾನ್ ಸಾಂಗ್ತಾನಾ,
"ಫಾಲ್ಯಾಂ ಮೆಳ್ಯಾಂ! ಹಾಂವ್ ತುಕಾ ಪೋನ್ ಕರ್ತಾಂ!" ಮ್ಹಳ್ಳೊ ಕುರ್ತಾ ನ್ಹೆಸ್ಲಲೊ ತೆವ್ಶಿಂ ಗೆಲೊ.
ಹ್ಯಾ ಉಪ್ರಾಂತ್ ಪಾಟ್ಲ್ಯಾನ್ ಥಾವ್ನ್ ಕೊಣೆಚ್ ಉಲಯಿಲ್ಲೊ ಆವಾಜ್ ಮಿಶೇಲಾಕ್ ಆಯ್ಕೊನ್ ಆಯ್ಲೊ ನಾ. ಸಂಪೂರ್ಣ್ ಮೌನ್! ಆಪ್ಣಾ ಪಾಟ್ಲ್ಯಾನ್ ಕೋಣ್ಯ್ ಆಸಾತ್ ವಾ ನಾಂತ್ ತೆಂ ತಾಕಾ ಪಾರ್ಕುಂಕ್ ಜಾಲೆಂ ನಾ. ಕಿತ್ಯಾಕ್ಗೀ ಏಕ್ ಪಾವ್ಟಿಂ ದೀಷ್ಟ್ ಪಾಟಿಂ ಘುಂವ್ಡಾಂವ್ಕ್ ತಾಚೆಂ ಮನ್ ತಾಕಾ ಸಾಂಗ್ತಾಲೆಂ.
ಮತಿಚಾ ತಳ್ಮಳ್ಯಾಂಕ್ ಪಯ್ಸ್ ಕರ್ಚಾಕ್ ಆತಾಂ ಮಿಶೇಲಾಕ್ ಕಿತೆಂ ತರ್ಯ್ ಉಲಂವ್ಕ್ ಜಾಯ್ ಆಸ್ಲ್ಲೆಂ.
ತಿತ್ಲೆಂಚ್!
ತಾಕಾ ಜಿಮ್ಮಿಚೊ ಉಡಾಸ್ ಆಯ್ಲೊ.
"ಜಿಮ್ಮಿ ಆಯಿಲ್ಲೊ ಜಾಲ್ಯಾರ್ ತಾಕಾ ಕಿತೆಂ ಜಾತೆಂ?" ಆಜ್ಯಾಚಾ ತೆವ್ಶಿಂ ಘುಂವೊನ್ ಪಳವ್ನ್ ತೆಂ ಉಲಯ್ಲೆಂ.
"ಹಾವೆಂ ಸಾಂಗ್ಲೆಂಗೋ ಪುತಾ! ತೊ....? ಖಂಯ್ಚಾ ನಮುನ್ಯಾಚೊ ಚೆಡೊ ಮ್ಹಣೊನ್ ಸಮ್ಜಾನಾಂ!" ಎಸ್ತೆಲ್ ಉಲಯ್ಲಿ.
"ಶೀತಲಾನ್ ತಾಕಾ ಕಾರ್ಡ್ ಪಾಸೊನ್ ದಿಲ್ಲೆಂ! ಕಿತ್ಲೆಂ ವತ್ತಾಯ್ ಕರುನ್ ಆಪಯಿಲ್ಲೆಂ ತಾಣೆಂ.....!"
"ಆಸೊಂದಿ ಸೊಡ್! ತಾಕಾ ಮನ್ ನಾ ಮ್ಹಳ್ಯಾ ಉಪ್ರಾಂತ್ ಆಮ್ಕಾಂ ವತ್ತಾಯ್ ಕರುಂಕ್ ಜಾಯ್ನಾ!" ಜೆರೊಮ್ ಮಧೆಂಚ್ ಉಲಯ್ಲೊ.
ತಿತ್ಲ್ಯಾರ್!
ಮತಿಚಿ ಆಶಾ ಸಂಪೂರ್ಣ್ ಕರ್ಚಾ ಖಾತಿರ್ ಮಿಶೇಲ್ ಸವ್ಕಾಸ್ ಪಾಟಿಂ ಘುಂವ್ಲೆಂ. ಪಾಟಿಂ ಪಳೆಲ್ಲ್ಯಾ ತಾಚ್ಯಾ ನದ್ರೆಕ್ ಥಂಯ್ಚರ್ ಕೋಣ್ಯ್ ದಿಸ್ಲೆಂ ನಾ. ಹೆವ್ಶಿಂ ತೆವ್ಶಿಂ ಬೊಂವ್ಡಾಯಿಲ್ಲ್ಯಾ ದಿಷ್ಟೆಕ್ ಆಪ್ಣೆ ಚಿಂತ್ಲ್ಲೆಂ ದಿಸಾನಾಸ್ತಾನಾ ವೆತಾನಾ ತೆಂ ಆತಾಂ ಹೆವ್ಶಿಂ ಘುಂವ್ಲೆಂ.
ತಿತ್ಲೆಂಚ್!
ಹೆವ್ಶಿಂ ಘುಂವ್ಲೆಲ್ಯಾ ಮಿಶೇಲಾಕ್ ಆಪ್ಲ್ಯಾ ದೊಳ್ಯಾಂಕ್ಚ್ ಪಾತ್ಯೆಂವ್ಕ್ ಜಾಲೆಂ ನಾ.
ತಾಚ್ಯಾ ದೊಳ್ಯಾಂ ಮುಕಾರ್ ತೊಚ್ ತರ್ನಾಟೊ ಉಭೊ ಆಸ್ಲ್ಲೊ.
ತೊಚ್ಚ್...! ಥೊಡ್ಯಾ ವೆಳಾ ಪಯ್ಲೆಂ ಆಪ್ಣಾಚಾ ಪಾಟ್ಲ್ಯಾನ್ ಉಲವ್ನ್ ಆಸ್ಲ್ಲೊ ತರ್ನಾಟೊ.
ಎಕಾ ಖಿಣಾಕ್ ಮಿಶೇಲ್ ಲಜೆನ್ ದೊಡ್ಲೆಂ.
"ಹಲೋ.....!"
ತ್ಯಾ ತರ್ನಾಟ್ಯಾನ್ ಜೆರೊಮಾ ತೆವ್ಶಿಂ ಆಪ್ಲೊ ಹಾತ್ ವೊಡ್ಡಾಯ್ಲೊ.
ವ್ಹಯ್! ತೊಚ್ಚ್ ತಾಳೊ! ತ್ಯಾ ತಾಳ್ಯಾಂತ್ ತೊಚ್ ಉನ್ಮಾದಾಚೊ ವ್ಹಾಳೊ.
"ಹಲೋ....!"
ಆಪ್ಣಾ ಸಾಮ್ಕಾರ್ ಹಾತ್ ಮುಕಾರ್ ಕರುನ್ ಉಭೊ ಆಸ್ಲೆಲ್ಯಾ ತರ್ನಾಟ್ಯಾಕ್ ಪಳವ್ನ್ ಏಕ್ ಪಾವ್ಟಿಂ ಜೆರೊಮ್ ಕಾಲುಬುಲೊ ಜಾಲ್ಯಾರ್ಯ್ ತ್ಯಾ ತರ್ನಾಟ್ಯಾಕ್ ತಾಣೆಂ ಆಪ್ಲೊ ಹಾತ್ ಮೆಳಯ್ಲೊ.
ಜೆರೊಮಾನ್ ಆತಾಂ ಆಪ್ಲ್ಯಾ ಉಡಾಸಾಚಾ ತೊಡ್ಪ್ಯಾಕ್ ಆಸುಡ್ಲೆಂ. ತಾಂತುಂ ಖಂಯ್ಚರ್ಯ್ ಹ್ಯಾ ತರ್ನಾಟ್ಯಾಕ್ ಹಾಚೆ ಆದಿಂ ಪಳೆಲ್ಲೊ ಉಡಾಸ್ ತಾಕಾ ಆಯ್ಲೊ ನಾ.
"ಮೇ ಐ....!" ಜೆರೊಮಾಚ್ಯಾ ಉಜ್ವ್ಯಾ ಕುಶಿಕ್ ಖಾಲಿ ಆಸ್ಲೆಲ್ಯಾ ಬಸ್ಕೆಕ್ ಆಪ್ಲ್ಯಾ ಹಾತಾಂನಿ ಪಾಟಿಂ ವೊಡುನ್ ವಿನತೆನ್ ಮ್ಹಳ್ಳ್ಯಾಪರಿಂ ತ್ಯಾ ತರ್ನಾಟ್ಯಾನ್ ವಿಚಾರ್ಲೆಂ.
ಹೊ ತರ್ನಾಟೊ ಹ್ಯಾ ಬಸ್ಕೆರ್ ಬಸೊಂಕ್ ಆಶೆತಾ ತೆಂ ಕಳ್ಲ್ಲ್ಯಾ ಜೆರೊಮಾನ್ ಏಕ್ ಪಾವ್ಟಿಂ ಮಿಶೇಲಾ ತೆವ್ಶಿಂ ಪಳವ್ನ್, ಪರ್ತ್ಯಾಕ್ ತ್ಯಾ ತರ್ನಾಟ್ಯಾಕ್ ಪಳೆಲೆಂ. ತೊ ತರ್ನಾಟೊ ತಸೊಚ್ ಉಭೊ ಆಸ್ಲ್ಲೊ.
"ಬಸ್!"
ಜೆರೊಮಾನ್ ಉತ್ರಾಂ ವಿಂಚ್ತಾನಾ ತೊ ತರ್ನಾಟೊ ತಶೆಂಚ್ ತಾಣೆಂ ಪಾಟಿಂ ವೊಡ್ಲೆಲ್ಯಾ ಬಸ್ಕೆಚೆರ್ ಬಸ್ಲೊ.
ಅಚಾನಕ್ ಆಪ್ಲ್ಯಾ ಕುಟ್ಮಾ ಮಧೆಗಾತ್ ಹೊ ಚವ್ತೊ ಅಪರಿಚಿತ್ ತರ್ನಾಟೊ ಯೇವ್ನ್ ಬಸ್ಲೆಲೆಂ ಜೆರೊಮಾಕ್ ಆನಿ ತಾಚ್ಯಾ ಕುಟ್ಮಾಕ್ ತಿತ್ಲ್ಯಾ ಸುಡ್ಸುಡಾಯೆಚೆಂ ಜಾಲೆಂ ನಾ. ಹೆಂ ತಾಂಚಾ ಬದ್ಲಾಲ್ಲ್ಯಾ ವರ್ತನಾಂತ್ಚ್ ಕಳ್ತಾಲೆಂ.
ಮಿಶೇಲಾನ್ ತ್ಯಾ ತರ್ನಾಟ್ಯಾ ತೆವ್ಶಿಂ ಪಳಂವ್ಚೆಂ ಪ್ರಯತ್ನ್ ಕೆಲೆಂ ನಾ. ಪುಣ್ ತೊ ತರ್ನಾಟೊ ಖಂಡಿತ್ ಆಪ್ಣಾಕ್ ಪಳೆತಲೊ ಮ್ಹಳ್ಳೆಂ ಮಿಶೇಲ್ ಜಾಣಾಂ. ತರ್ಯ್ ತೆಂ ವೊಗೆಂ ಬಸ್ಲೆಂ. ಮುಕಾರ್ ದಿಸ್ಚಾ ಕಾಜಾರಾಚಾ ಮಂಟಪಾಚೆರ್ಚ್ ತಾಣೆಂ ಆಪ್ಲಿ ದೀಷ್ಟ್ ಖಂಚಯ್ಲಿ.
"ಬೋವ್ಶಾ ತುಮಿಂ ಮ್ಹಾಕಾ ವಳ್ಕೊಂಕ್ ನಾಂತ್!" ತ್ಯಾ ತರ್ನಾಟ್ಯಾನ್ ಉಲವ್ಣ್ಯಾಕ್ ಬುನ್ಯಾದ್ ಘಾಲಿ. ತೊ ಜೆರೊಮಾ ಕುಶಿಕ್ ಘುಂವ್ಲ್ಲೊ.
ಅಪರಿಚಿತ್ ತರ್ನಾಟ್ಯಾಚಿಂ ಉತ್ರಾಂ ಆಯ್ಕಾಲ್ಲ್ಯಾ ತೆಗಾಂಯ್ಕ್ಯ್ ಎಕಾಚ್ಚ್ಫರಾ ಆಶ್ಚರ್ಯ್ ಜಾಲೆಂ.
"ಹೊ ಆಮ್ಕಾಂ ವಳ್ಕಾತಾ....?"
"ಹಾಂವ್ ರಾಯನ್....! ಆಲ್ಫ್ರೆಡ್ ರಾಯನ್!"
ತೊ ತರ್ನಾಟೊ ಉಲಯ್ಲೊ.
"ಆಲ್ಫ್ರೆಡ್ ರಾಯನ್.....!?"
ಎಕಾ ಖಿಣಾಕ್ ತೆಗಾಂಯ್ಚಾ ಮತಿನ್ ಹ್ಯಾ ನಾಂವಾಕ್ ತಾಂಚಾ ಉಡಾಸಾಂತ್ ಸೊಧುಂಕ್ ಆರಂಭ್ ಕೆಲೆಂ.
ಕಾಂಯ್ ಫಾಯ್ದೊ ಜಾಂವ್ಕ್ ನಾ. ಹ್ಯಾ ನಾಂವಾಕ್ ತಿಂ ಆಯ್ಕೊನ್ ಪಾಸೊನ್ ನೆಣಾಂತ್.
"ವ್ಹಳಕ್ ಮೆಳ್ಳಿ ನಾಂ ಬಾ ಮ್ಹಾಕಾ!" ಜೆರೊಮಾನ್ ಸಾಂಗ್ಲೆಂ.
"ಚಿಕ್ಮಂಗ್ಳುರ್ಚೆಂ ತೋಟ್ ವಿಕ್ಲೆಲೆಂ ತುಮಿಂಚ್ ನೆ.....?"
"ಬೀದರಹಳ್ಳೆಂತ್ಲೆಂ.....?"
"ವ್ಹಯ್....!"
ಜೆರೊಮ್ ಆತಾಂ ಆಪ್ಲ್ಯಾ ಉಡಾಸಾಕ್ ಪಾಟಿಂ ಧಾಂವ್ಲೊ.
ತೊ ಕಶೆಂ ವಿಸ್ರಾತಲೊ ತ್ಯಾ ತೊಟಾಕ್. ಕಿತ್ಲ್ಯಾ ಕಷ್ಟಾಂನಿ ತಾಣೆಂ ತೆಂ ತೋಟ್ ಎಕಾ ತೊಟಾಚಾ ರುಪಾಂತ್ ಫಳಾಭರಿತ್ ಕೆಲ್ಲೆಂ.
"ತೆಂ ಮ್ಹಜ್ಯಾ ಡ್ಯಾಡಿನ್ ಘೆತ್ಲೆಲೆಂ!" ಜೆರೊಮಾಕ್ ವಳಕ್ ದಾಖಯಿಲ್ಲೊ ರಾಯನ್ ವ್ಹಳೂ ಹಾಸ್ಲೊ.
"ಓಹ್! ಜಾಂವ್ಕ್ ಪುರೊ. ಪುಣ್ ತುಕಾ ಪಳೆಲ್ಲೊ ಮ್ಹಾಕಾ ಉಡಾಸ್ ನಾ. ತಶೆಂ.....!"
"ಉಡಾಸ್ ಕಸೊ ಆಸ್ಚೊ ಅಂಕಲ್..... ತ್ಯಾ ವೆಳಾರ್ ಹಾಂವ್ ಲ್ಹಾನ್ ಆಸ್ಲ್ಲೊಂ. ಮ್ಹಜೊ ಡ್ಯಾಡಿ ಮಾಧವ ಅಂಕಲಾಗೆರ್ ಆಯಿಲ್ಲ್ಯಾ ವೆಳಾರ್ ಹಾಂವ್ ಡ್ಯಾಡಿ ಸಾಂಗಾತಾ ತುಮ್ಚಾ ಘರಾ ಆಯಿಲ್ಲೊಂ. ತುಮ್ಕಾಂ ಉಡಾಸ್ ಆಸಾ ಆಸ್ತಲೊ....!"
"ಹಾಂ... ವ್ಹಯ್! ತೆಂ ಸುಮಾರ್ ವರ್ಸಾಂ ಪಯ್ಲೆಂ!" ಜೆರೊಮಾಕ್ ತೊ ಆದ್ಲೊ ಉಡಾಸ್ ಆಯ್ಲೊ.
"ಕಶಿ ಆಸಾ ಭಲಾಯ್ಕಿ ತುಮ್ಚಿ? ಪಯ್ಲೆಂಚಾ ಪ್ರಾಸ್ ಬರೆ ಆಸ್ಲೆಲ್ಯಾ ಪರಿಂ ದಿಸ್ತಾತ್!"
"ಹಾಂ.... ವ್ಹಯ್! ಹೆಂ ಮಿಶೇಲ್ ಆಯ್ಲ್ಯಾ ಉಪ್ರಾಂತ್ ಮತಿಕ್ ಥೊಡಿ ಶಾಂತಿ ಆನಿ ಸಮಾಧಾನ್!" ಹೆವ್ಶಿಂ ತೆವ್ಶಿಂ ಪಳೆಲ್ಲೊ ಜೆರೊಮ್ "ತುಜೊ ಡ್ಯಾಡಿ....?"
"ಡ್ಯಾಡಿ ನಾ ಆತಾಂ. ತೊ ಸರೊನ್ ದೇಡ್ ವರಸ್ ಜಾಲೆಂ. ಡ್ಯಾಡಿಚೆಂ ಸಗ್ಳೆಂ ಬಿಜ್ನೆಸ್ ಹಾಂವ್ಚ್ ಪಳೆತಾಂ. ಮ್ಹಜ್ಯಾ ಪಾಟ್ಲ್ಯಾನ್ ಆನಿ ಮುಕ್ಲ್ಯಾನ್ ದುಸ್ರೆಂ ಕೊಣ್ಯ್ ನಾ!"
ಎಕಾ ಘಡಿಯೆಕ್ ಬಾಪಾಯ್ಚಾ ಉಡಾಸಾನ್ ರಾಯನಾಚಾ ಮುಖಮಳಾಚೊ ರಂಗ್ ಬದ್ಲೊನ್ ಗೆಲೊ ಜಾಲ್ಯಾರ್ಯ್ ತೊ ಪರತ್ ಹ್ಯಾ ಪ್ರಸ್ತುತ್ ಘಡಿಯೆಕ್ ಪಾವ್ಲೊ.
"ತುಜಿ ಆವಯ್.....?" ಎದೊಳ್ ವೊಗಿ ಬಸೊನ್ ಆಸ್ಲೆಲ್ಯಾ ಎಸ್ತೆಲಾನ್ ಸವಾಲ್ ಕೆಲೆಂ.
"ಮಾಮ್ಮಿ....!"
ರಾಯನಾನ್ ಮುಕಾರ್ ಬಾಗ್ವೊನ್ ತ್ಯಾ ರೌಂಡ್ ಟೇಬಲಾರ್ ವೊಮ್ತೆ ಗಾಲ್ಲ್ಯಾ ಚ್ಯಾರ್ ಗ್ಲಾಸಾಂ ಪಯ್ಕಿ ಎಕಾ ಗ್ಲಾಸಾಕ್ ಆಪ್ಲ್ಯಾ ಹಾತಾನಿಂ ಉದಾರೊ ಕೆಲೊ.
ಲಾಗ್ಶಿಲ್ಯಾ ಮಿನರಲ್ ಉದ್ಕಾಚಾ ಬಾಟಲಿಕ್ ಉಘಡ್ನ್ ತ್ಯಾ ಬಾಟಲಿಂತ್ಲೆಂ ಉದಾಕ್ ಆಪ್ಣೆ ಉದಾರೊ ಕೆಲ್ಲ್ಯಾ ಗ್ಲಾಸಾಕ್ ವೊತ್ಲೆಂ.
"ತುಮ್ಕಾಂ....?"
ಉದಾಕ್ ದಾಕವ್ನ್ ತಾಣೆಂ ವಿಚಾರ್ಲೆಂ.
"ತುಂ ಘೆ!" ಜೆರೊಮಾನ್ ಮಾತ್ರ್ ಜವಾಬ್ ದಿಲಿ. ಎಸ್ತೆಲಾನ್ ಫಕತ್ತ್ ತಕ್ಲಿ ಹಾಲಯ್ಲಿ ಜಾಲ್ಯಾರ್ ರಾಯನಾಚಿ ದೀಷ್ಟ್ ಆಪ್ಣಾಚೆರ್ ಪಡ್ತಾನಾ ಮಿಶೇಲಾನ್ ಆಪ್ಲಿ ನದರ್ ಆಜಿಯೆಚಾ ಕುಶಿಕ್ ಘುಂವ್ದಾಯ್ಲಿ.
"ಮಮ್ಮಿ ಹಾಂವ್ ಲ್ಹಾನ್ ಆಸ್ತಾನಾ ಸರ್ಲ್ಯಾ!" ರಾಯನ್ ಉಲಯ್ಲೊ. ತಾಚೆ ಪಾಟ್ಲ್ಯಾನ್ ಥೊಡೆಂ ಉದಾಕ್ ಗಳ್ಯಾಕ್ ದೆಂವಯಿಲ್ಲೊ ತೊ ಆಪ್ಲ್ಯಾ ಹಾತಾಂತ್ಲೊ ಗ್ಲಾಸ್ ಮೆಜಾರ್ ದವರುನ್, "ತುಮ್ಚೆಂ ಕಶೆಂ ಚಲ್ತಾ ಬಿಜ್ನೆಸ್?"
"ಬಿಜ್ನೆಸ್ ಸಗ್ಳೆಂ ರಾವಯ್ಲಾಂ ಆತಾಂ. ಕೊಣಾಕ್ ಪಳಂವ್ಕ್ ತಾಂಕ್ತಾ? ಗಾವಾಂತ್ ತೋಟ್ ಆಸಾ. ತೆಂಚ್ ಪಳೆತಾಂ. ತಶೆಂಯ್ ಮ್ಹಜ್ಯಾ ಲಾಗಿಂ ಆಸ್ಚೆಂ ಮ್ಹಳ್ಯಾರ್ ಹೆಂ ಏಕ್ ನಾತ್ ಮಾತ್ರ್!"
ರಾಯನಾಚೆ ದೊಳೆ ಆತಾಂ ಮಿಶೇಲಾ ವಯ್ರ್ ಖಂಚ್ಲೆಂ.
ಏಕ್ ಪಾವ್ಟಿಂ ರಾಯನಾಚಾ ದೊಳ್ಯಾಂಕ್ ಪಳೆಲ್ಲ್ಯಾ ಮಿಶೆಲಾನ್ ಸವ್ಕಾಸ್ ಆಪ್ಲಿ ನದರ್ ದೊಡ್ಲಿ.
"ತುಮ್ಕಾಂ ಆತಾಂ ಬಿಜ್ನೆಸ್ ಚಲಂವ್ಕ್ ಜಾಯ್ನಾಂ ವ್ಹಯ್! ಪುಣ್ ತುಮ್ಚಾ ನಾತಿಕ್ ಚಲವ್ಯೆತ್.....!"
"ನಾ. ಮಿಶೆಲಾಕ್ ತಾಂತುಂ ಕಾಂಯ್ ಇಂಟ್ರೆಸ್ಟ್ ನಾ! ತಶೆಂಯ್ ತಾಕಾ ಬಿಜ್ನೆಸಾಕ್ ದೆವೊಂಕ್ ಜಾಯ್ ಮ್ಹಳ್ಳಿ ಗರ್ಜ್ಯ್ ನಾ ಪಳೆ....!"
ಜೆರೊಮ್ ಆಪ್ಲ್ಯಾ ನಾತಿಕ್ಚ್ ಪಳೆತಾಲೊ.
"ಹಾಂವ್ ಜಾಣಾಂ! .....ಮಾಧವ ಅಂಕಲ್ ಸಾಂಗ್ತಾಲೊ! ಪುಣ್ ದೀಸ್ ಸಾರ್ಚೆ ಖಾತಿರ್ ಕಾಂಯ್ ತರ್ಯ್........?"
ತಿತ್ಲ್ಯಾರ್!
"ರಾ....ಆಅ....ಆ..ಯನ್!"
ಆವ್ಚಿತ್ತ್ ಆಯ್ಕೊನ್ ಆಯಿಲ್ಲ್ಯಾ ಎಕಾ ತಾಳ್ಯಾನ್ ರಾಯನಾಚಾ ಉತ್ರಾಂಕ್ ಖಾಡುಂ ಮಾರ್ಲೆಂ.
ತಾಣೆಂ ಆತಾಂ ಘುಂವೊನ್ ಹೆವ್ಶಿಂ ಪಳೆಲೆಂ. ತಾಚ್ಯಾ ತೊಂಡಾರ್ ಹಾಸೊ ಪರ್ಜಳ್ಳ್ಯೊ.
"ಧನ್ನು ಲಾಲ್...!"
ರಾಯನ್ ಉದ್ಗಾರ್ಲೊ.
"ಏಕ್ ಮಿನಿಟ್ ಅಂಕಲ್....!" ರಾಯನ್ ಉಭೊ ಜಾಲೊ
"ತುಕಾ ಖಂಯ್ ಖಂಯ್ ಸೊಧ್ಲೆಂ ರಾಯನ್....!" ತೊ ಖಂತೀಷ್ಟ್ ದಿಸ್ತಾಲೊ.
"ಕಿತ್ಯಾಕ್....? ಕಿತೆಂ ಜಾಲೆಂ....?"
"ತೆಂ ಆಯ್ಕಾನಾ ರಾಯನ್!ಸೇಥಿನ್ ಪಾಸೊನ್ ತಾಕಾ ಸಮ್ಜಾಯ್ಲೆಂ....! ತಾಕಾ ಥೊಡೆಂ ಸಮ್ಜಯ್ ತುಂ! ಯೆದೊಳ್ಚ್ಚ್ ಕಿತ್ಲೆ ಪಯ್ಶೆ ಘಾಲ್ಯಾತ್ ಹಾವೆಂ....!"
"ಸೇಥಿನ್ ಕಿತೆಂ ಸಾಂಗ್ಲೆಂ?"
"ತೆಂ ದೋನ್ ಮಹಿನೆ ದಿತಾ ತಾಕಾ...! ದೋನ್ ಮಹಿನೆ ಪಾಸೊನ್ ಮ್ಹಜೊ ಪ್ರಾಜೆಕ್ಟ್ ಆಸೊಚ್ಚ್ ಭಂಧ್ ಕರುನ್ ಬಸೊಂ? ಎದೊಳ್ಚ್ಚ್ ಮೀಡಿಯಾನ್ ಹ್ಯಾ ಪಾಜೆಕ್ಟಾ ವಿಶಿಂ ಇತ್ಲೆಂ ಲೊಕಾಂತ್ ಆತುರ್ ಕೆಲಾಂ ಕೀ.....! ಆತಾಂ ಹ್ಯಾ ಪಬ್ಲಿಸಿಟಿಚಾ ವೆಳಾರ್ ಹೆಂ ಫಿಲ್ಮ್ ಭಾಯ್ರ್ ಯೇನಾ ಜಾಲ್ಯಾರ್ ಉಪ್ರಾಂತ್ ಲೋಕ್ ಥಂಡ್ ಜಾಲ್ಯಾ ಉಪ್ರಾಂತ್ ಹೊ ಪ್ರಾಜೆಕ್ಟ್ ಭಾಯ್ರ್ ಕಾಡುನ್ ಮ್ಹಾಕಾ ಕಾಂಯ್ ಫಾಯ್ದೊ ಜಾಂವ್ಚೊ ನಾ!"
"ತುಕಾ ಹಾವೆಂ ಪಯ್ಲೆಂಚ್ ಸಾಂಗ್ಲೆಲೆಂ! ತುವೆಂ ಪಯ್ಲೆಂ ಆವ್ಟ್ ಡೋರ್ ಶೂಟಿಂಗ್ ಕೆಲೆಂಯ್! ತುವೆಂ ತ್ಯಾ ಸೇಥಿಚೆಂ ಆಯ್ಕಾಲೆಂಯ್....!"
"ತೆದಾಳಾ ಸ್ಟೂಡಿಯೋಂತ್ ಸೆಟ್ ತಯಾರ್ ಜಾಂವ್ಕ್ ನಾತ್ಲೆಲೆಂ ರಾಯನ್....!"
"ತುಕಾ ಜಾಲ್ಯಾರ್ಯ್ ಮಸ್ತ್ ಆತುರಾಯ್ ಆಸ್ಲ್ಲಿ!"
"ತೆಂ ಆತಾಂ ಸೊಡ್ ರಾಯನ್! ಫಾಲ್ಯಾಂ ಸಾಕಾಳಿಂ ತೆಂ ದುಬಾಯ್ ವೆಚ್ಯಾರ್ ಆಸಾ! ತಾಕಾ ಏಕ್ ಪೋನ್ ಕರುನ್ ಸಮ್ಜಯ್ ರಾಯನ್!"
"ದುಬಾಯ್....!" ರಾಯನಾಚಾ ತೊಂಡಾರ್ ಮಿರಿಯೊ ಫುಲೊನ್ ರಾವ್ಲ್ಯೊ. "ದುಬಾಯ್ ಕಿತ್ಯಾಕ್....?"
"ಥಂಯ್ ದೋನ್ ಸ್ಟೇಜ್ ಶೋ ಜಾಂವ್ಚ್ಯಾರ್ ಆಸಾತ್!"
"ಬರೆಂ......! ಹಾಂವ್ ತಾಕಾ ಉಪ್ರಾಂತ್ ಪೋನ್ ಕರ್ತಾಂ! ಪುಣ್ ಮ್ಹಾಕಾ ಧಯ್ರ್ ನಾ!"
"ತುವೆಂ ಸಾಂಗ್ಲ್ಯಾರ್ ತೆಂ ಒಪ್ವಾತೆಲೆಂ ರಾಯನ್!"
"ಅಚ್ಚಾ!" ರಾಯನಾನ್ ಆಪ್ಲ್ಯಾ ವೊಂಟಾರ್ ಹಾಸೊ ಹಾಡ್ಲ್ಯೊ. ಮಿಶೇಲ್ ರಾಯನಾಚಾ ಆನಿ ತ್ಯಾ ವ್ಯಕ್ತಿಚಾ ಸಂಭಾಶಣಾಕ್ಚ್ ಆಯ್ಕಾತಾಲೆಂ. ಪಯ್ಲೆಚೊ ವ್ಯಕ್ತಿ ಉಲೊವ್ನ್ ಗೆಲ್ಲ್ಯಾ ಪರಿಂ ಹೊ ವ್ಯಕ್ತಿ ಹಿಂದಿಂತ್ಚ್ ಉಲಯ್ತಾಲೊ.
"ಬರೆಂ ಹಾಂವ್ ತುಕಾ ಉಪ್ರಾಂತ್ ಮೆಳ್ತಾಂ! ದುಬಾಯ್ಚ್ಯಾ ಸ್ಟೇಜ್ ಶೋ ಥಾವ್ನ್ ತಾಂಕಾ ಪಯ್ಶೆ ಚಡ್ ಮೆಳ್ತಾತ್. ತುಕಾ ಕಾಂಯ್ ಥೊಡೆಂ ಆಡ್ಜಸ್ಟ್ ಕರುಂಕ್ ಪಡ್ತೆಲೆಂ!"
"ವ್ಹಡ್ ನಾ! ಹಾಂವ್ ಕರ್ತಾಂ! ಪುಣ್ ಮ್ಹಾಕಾ ಹೆಂ ಫಿಲ್ಮ್ ವೆಗಿಂಚ್ ಥಿಯೇಟರಾಂಕ್ ಉಡಂವ್ಕ್ ಜಾಯ್!"
"ಪಳೆಯಾಂ!"
ರಾಯನಾನ್ ಧಯ್ರ್ ದಿತಾನಾ ಆಯಿಲ್ಲೊ ವ್ಯಕ್ತಿ ಆತಾಂ ಚಲ್ಲೊ.
ತಿತ್ಲ್ಯಾರ್ ಕಿತೆಂಗೀ ಚಿಂತ್ಲಲೊ ರಾಯನ್, ಆಪ್ಲ್ಯಾ ರಿಸ್ಟ್ ವಾಚಾಚೆರ್ ವೇಳ್ ಪಳವ್ನ್ ಮತಿಕ್ ಸಮಾಧಾನ್ ಜಾಂವ್ಕ್ ನಾತ್ಲೆಲ್ಯಾ ಪರಿಂ ತಕ್ಲಿ ಹಾಲಯಿಲ್ಲೊ ಪರ್ತ್ಯಾಕ್ ಆಪ್ಲ್ಯಾ ಪಯ್ಲೆಂಚಾ ಬಸ್ಕೆಚೆರ್ ಬಸ್ಲೊ.
"ಸಾರ್ರಿ ಅಂಕಲ್!" ರಾಯನಾನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡುನ್ ಸಭ್ಯತಾಚೆಂ ಬೊಗ್ಸಾಣೆಂ ಮಾಗ್ಲೆಂ.
"ಕಿತೆಂ ಕಾಂಯ್ ಪ್ರಾಬ್ಲೆಮ್....?" ಜೆರೊಮಾನ್ ವಿಚಾರ್ಲೆಂ.
"ಬಿಜ್ನೆಸ್ ಮ್ಹಣ್ತಾನಾ ಪ್ರಾಬ್ಲೆಮ್ ಆಸ್ತಾಚ್ ಅಂಕಲ್!"
"ತುಂ ಚಡ್ ಬಿಜಿ ಆಸ್ತಾಯ್ ಆಸ್ತಲೊಯ್!"
"ಹಾಂ! ಆಸ್ತಾಂ! ಪುಣ್ ಹೆಂ ಸದಾಂಚೆಂ....! ಬಿಜ್ನೆಸ್ ಮ್ಹಣ್ತಾನಾ....!" ಆಪ್ಣೆಂ ಕಿತೆಂಗೀ ಉಲಂವ್ಕ್ ಉಘಡ್ಲೆಲ್ಯಾ ತೊಂಡಾಕ್ ಭಂಧ್ ಕೆಲ್ಲೊ ರಾಯನ್ ಎಸ್ತೆಲ್ ಆನಿ ಮಿಶೆಲಾ ತೆವ್ಶಿಂ ಘುಂವೊನ್ "ಮ್ಹಜ್ಯೆ ಥಾವ್ನ್ ತುಮ್ಕಾಂ ಕಾಂಯ್ ಬೋರ್ ಜಾತಾ....?"
"ನೊ....ನೊ....!" ತೊಂಡಾರ್ ಹಳ್ತಾರ್ ಹಾಸೊ ಹಾಡುನ್ ಉಲಯಿಲ್ಲ್ಯಾ ಮಿಶೇಲಾಕ್ಚ್ ಏಕ್ ಘಡಿ ರಾಯನಾನ್ ಪಳಯ್ಲೆಂ.
ಎಕ್ಚ್ ಘಡಿ!
ಚ್ಯಾರ್ ದೊಳ್ಯಾಂಚಿ ದೀಷ್ಟ್ ಎಕಾಮೆಕಾ ಆದ್ಳೊನ್ ಗೆಲ್ಲಿ. ತ್ಯಾ ರಾಯನಾಚಾ ಮಾದಕ್ ದೊಳ್ಯಾಂಚಾ ನದ್ರೆಂತ್ ಏಕ್ ವಿಚಿತ್ರ್ ಸಕತ್ ಆಸಾ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ಜಾಲೆಂ.
"ಭುರ್ಗಿಂ ಪುಣಿಂ ಗಾಂವಾಕ್ ಆಯಿಲ್ಲಿಂ...?"
"ಹಾಂ ಯೆತಾತ್. ಆದ್ಲ್ಯಾ ಕ್ರಿಸ್ಮಸಾಕ್ ಪೂತ್ ಆಯಿಲ್ಲೊ. ಹ್ಯಾ ಪಾವ್ಟಿಂ ಕಾಂಯ್ ದಾಕ್ಟೆಂ ಧುವ್ ಯೇಂವ್ಕ್ ಪುರೊ! ತಾಂಕಾ ಮನ್ ಆಯಿಲ್ಲ್ಯಾ ಪರಿಂ......! ಆಮಿ ಕಾಂಯ್ ವತ್ತಾಯ್ ಕರುಂಕ್ ಜಾಯ್ನಾ!"
ಜೆರೊಮಾಕ್ ಉಲಯ್ತಾಂ ಉಲಯ್ತಾಂ ಧಗ್ ಜಾಂವ್ಕ್ ಲಾಗ್ಲಿ. ತಾಚೆಂ ಆಂಗ್ ಉಭೆವ್ನ್ ಘಾಮೆತಾ ತಶೆಂ ತಾಕಾ ಜಾಂವ್ಕ್ ಲಾಗ್ತಾನಾ,
ಮೆಜಾ ವಯ್ರ್ ವೊಮ್ತೊ ಆಸ್ಲ್ಲೊ ಗ್ಲಾಸ್ ತಾಣೆಂ ಉದಾರೊ ಕೆಲೊ.
ಹೆಂ ಪಳೆಲ್ಲ್ಯಾ ರಾಯನಾನ್ ಮುಕಾರ್ ಸರೊನ್ ಉದ್ಕಾಚಿ ಬಾಟಲ್ ಹಾತಿಂ ಘೆವ್ನ್ ಜೆರೊಮಾನ್ ಉದಾರೊ ಕೆಲ್ಲ್ಯಾ ಗ್ಲಾಸಾಂತ್ ಉದಾಕ್ ಬಾಗಾಯ್ಲೆಂ.
"ಮಿಶೇಲಾಕ್ ಪುಣಿಂ ಭಾಯ್ರ್ ದಾಡ್ಚಿ ಆಲೋಚನ್ ಆಸಾ....?"
"ಕೊಣಾಯ್ಚಾ ಖುಶಿಯೆಕ್ ಕಾಂಯ್ ಆಡಾಂವ್ಕ್ ಜಾಯ್ನಾ!" ಜೆರೊಮಾನ್ ಉದ್ಕಾಚೊ ಗ್ಲಾಸ್ ತೊಂಡಾಕ್ ಧರ್ಲೊ.
ತಿತ್ಲೆಂಚ್!
’ಸಕ್ಕ್’ ಕರುನ್ ಜೆರೊಮಾಚಾ ಹರ್ಧ್ಯಾಂತ್ ಕಿತೆಂಗೀ ವೊಡುನ್ ದರ್ಲೆಲ್ಯಾ ಪರಿಂ ಜಾವ್ನ್ ತೊಂಡಾಕ್ ವೆಲ್ಲೊ ಗ್ಲಾಸ್ ತಸೊಚ್ ಜೆರೊಮಾನ್ ಪಾಟಿಂ ಕಾಡ್ಲೊ. ತಾಚೆ ಸವೆಂ ತೊ ತಾಚ್ಯಾ ಮುಕ್ಲ್ಯಾ ಮೆಜಾರ್ ಬಾಗ್ವಾತಾನಾ, ಜೆರೊಮಾಚಾ ಹಾತಿಂತ್ಲೊ ಉದ್ಕಾಚೊ ಗ್ಲಾಸ್ ಗಳೊನ್ ’ಡಣ್ಣ್’ ಕರುನ್ ಸಕಯ್ಲ್ ಪಡ್ಲೊ. ಆಜ್ಯಾಕ್ಚ್ ಪಳವ್ನ್ ಆಸ್ಲ್ಲೆಂ ಮಿಶೆಲ್, "ಅಬಾ...!" ಉದ್ಗಾರೊನ್ ತೆಂ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೆಂ.
"ಅಂಕಲ್...!" ಮುಕ್ಲ್ಯಾ ಮೆಜಾರ್ ಪರ್ತಾಲ್ಲೊ ಜೆರೊಮ್ ಭಳ್ ನಾತ್ಲೆಲ್ಯಾ ಪರಿಂ ಬಾಗ್ವತಾನಾ ಹಾತಾಂತ್ಲಿ ಉದ್ಕಾಚಿ ಬಾಟಲ್ ಮೆಜಾರ್ ದವರುನ್ ರಾಯನಾನ್ ಜೆರೊಮಾಕ್ ಘಟ್ ದರ್ಲೆಂ.
"ಕಿತೆಂ ಜಾಲೆಂ ನೆ?" ಎಸ್ತೆಲ್ ಆಪ್ಲ್ಯಾ ಬಸ್ಕೆ ವಯ್ಲಿ ಉಟೊನ್ ಹೆವ್ಶಿಂ ಧಾಂವೊನ್ ಆಯ್ಲಿ. ತಿಣೆಂ ಜೆರೊಮಾಕ್ ಪಾಟ್ಲ್ಯಾನ್ ಥಾವ್ನ್ ಘಟ್ ಧರ್ಲೆಂ.
ಜೆರೊಮಾನ್ ಎದೊಳ್ಚ್ ತಕ್ಲಿ ಆಡ್ ಘಾಲ್ಲಿ.
"ಯೆ ದೆವಾ.... ಕಿತೆಂ ಜಾಲೆಂ ನೆ ತುಕಾ?" ಜೆರೊಮಾಚಾ ತೊಂಡಾಕ್ ದರುನ್ ಹಾಲಯಿಲ್ಲ್ಯಾ ಎಸ್ತೆಲಾನ್,
"ಮಿಶೆಲ್! ಜಿಮ್ಮಿಕ್ ಪೋನ್ ಮಾರ್ಗೋ ಪುತಾ. ಯೆ ದೆವಾ....!" ಎಸ್ತೆಲ್ ರಡೊಂಕ್ ಲಾಗ್ಲಿ.
ತಿತ್ಲೆಂಚ್!
"ಆಂಟಿ.... ತುಂ ಸೊಡ್ ಆಂಟಿ. ಹಾಂಗಾ ಹಾಸ್ಪಿಟಲ್ ಖಂಯ್ ಆಸಾ? ಅಂಕಲಾಕ್ ವೆಗ್ಗಿಂ ಹಾಸ್ಪಿಟಲಾಕ್ ವರುಂಕ್ ಜಾಯ್! ಹಲೋ...?" ಲಾಗ್ಶಿನ್ ದಿಸ್ಲೆಲ್ಯಾ ಎಕಾ ತರ್ನಾಟ್ಯಾಕ್ ರಾಯನಾನ್ ಆಪಯ್ಲೆಂ.
"ಮ್ಹಾಕಾ ತಿಕ್ಕೆ ಹೆಲ್ಪ್ ಕರ್ ಪ್ಲೀಸ್....!" ರಾಯನಾನ್ ತ್ಯಾ ವ್ಯಕ್ತಿ ಲಾಗಿಂ ಉಪ್ಕಾರ್ ಮಾಗ್ತಾನ್ ತೊ ವ್ಯಕ್ತಿ ವೆವೆಗ್ಗಿಂ ಉಟೊನ್ ಹೆವ್ಶಿಂ ಆಯ್ಲೊ.
ರಾಯನಾನ್ ಆನಿ ತ್ಯಾ ತರ್ನಾಟ್ಯಾನ್ ಮೆಳೊನ್ ಜೆರೊಮಾಕ್ ಉಕೊಲ್ಲೆಂ.
"ವಾಟ್ ಕರಿಯಾ.... ತಿಕ್ಕೆ ವಾಟ್ ಕರಿಯಾ ಪ್ಲೀಸ್!" ರಾಯನ್ ಬೊಬಾಟ್ಲೊ.
ಮಿಶೇಲಾನ್ ಆಪ್ಲ್ಯಾ ಹ್ಯಾಂಡ್ ಬ್ಯಾಗಾಂತ್ಲೆಂ ಸೆಲ್ಪೋನ್ ಕಾಡುನ್ ಜಿಮ್ಮಿಕ್ ಪೋನ್ ಮಾರ್ಲೆಂ.
"ಆಬಾಕ್ ಕಿತೆಂ ಜಾಲೆಂಗೋ ಪುತಾ?" ಎಸ್ತೆಲ್ ಬೋಬ್ ಮಾರ್ತಾಲಿ.
"ಬೋಬ್ ಮಾರಿನಾಕಾ ಮಾಂಯ್.....! ಜಿಮ್ಮಿ ಬಾಯ್ರ್ ಜಿಪಾರ್ ಆಸಾ! ತುಂ ಹೆಂ ಬ್ಯಾಗ್ ಘೆ!"
ಮಿಶೇಲ್ ಆಜ್ಯಾಕ್ ಉಕ್ಲುನ್ ವರ್ಚಾಂಕ್ ಕುಮಕ್ ಕರುಂಕ್ ಲಾಗ್ಲೆಂ.
ದೋನ್ಚ್ ಕ್ಷಣಾಂ!
ಶೀತಲಾಚಾ ಕಾಜಾರಾ ಪಾರ್ಟೆಕ್ ಯೇಂವ್ಕ್ ಮನ್ ನಾಸ್ತಾನಾ ಭಾಯ್ಲ್ಯಾ ಪಾರ್ಕಿಂಗಾರ್ ಆಪ್ಲೆಂ ಜೀಪ್ ರಾವೊವ್ನ್ ತ್ಯಾ ಜಿಪಾರ್ಚ್ ಬಸೊನ್ ಆಸ್ಲ್ಲೊ ಜಿಮ್ಮಿ ಮಿಶೇಲಾನ್ ಪೋನ್ ಕೆಲ್ಲೆಂ ಪಳವ್ನ್ ಧಾಂವೊನ್ ಆಯಿಲ್ಲೊ ತೊ ಥಂಯ್ಚರ್ ಪಾವ್ಲೊ.
"ಬಾಬಾ...? ಕಿತೆಂ ಜಾಲೆಂ ಬಾಬಾಕ್?"
ಆಪ್ಲ್ಯಾ ದೋನ್ಯ್ ಹಾತಾನಿಂ ಜೆರೊಮಾಕ್ ಧರುನ್ ಜಿಮ್ಮಿನ್ ಉಕೊಲ್ಲೆಂ.
ಜೆರೊಮಾಕ್ ಉಕ್ಲುನ್ ಘೆತಾನಾ ಪೊಪ್ಸಾಂತ್ ವೊಡುನ್ ಧರ್ಲೆಲ್ಯಾ ಉಸ್ವಾಸಾಕ್ ತಾಣೆಂ ಸೊಡ್ಲೆಂ ನಾ. ಜೆರೊಮಾಕ್ ತಶೆಂಚ್ ಉಕ್ಲುನ್ ಧರುನ್ ತೊ ಆಪ್ಲ್ಯಾ ಜಿಪಾ ತೆವ್ಶಿಂ ತುರ್ತಾನ್ ಚಲೊಂಕ್ ಲಾಗ್ಲೊ. ಥೊಡ್ಯಾ ವೆಳಾಕ್ ತಾಚೆಂ ಕಾಳಿಜ್ ರಾವ್ಲಲೊ ಆನ್ಬೋಗ್ ತಾಕಾ ಜಾಲೊ. ಜೀಪ್ ಚಡ್ ಪಯ್ಸ್ ನಾತ್ಲ್ಲೆಂ. ಧಾಂಬುನ್ ದರ್ಲೆಲ್ಯಾ ಉಸ್ವಾಸಾನ್ ಜೆರೊಮಾಚಿ ಜಡಾಯ್ ತಾಕಾ ಕಾಂಯ್ ಕಳಿತ್ ಜಾಲಿ ನಾ. ಪುಣ್ ತಾಣೆಂ ದಾಂಬುನ್ ಧರ್ಲೆಲ್ಯಾ ಉಸ್ವಾಸಾಕ್ ಲಾಗೊನ್ ತಾಚ್ಯಾ ಹಾತಾಚ್ಯೊ ತಾಳು ವ್ಹಳೂ ಥಂಡ್ ಜಾತಾತ್ ಮ್ಹಳ್ಳ್ಯಾ ಪರಿಂ ತಾಕಾ ಜಾಲೆಂ. ಜಾಲ್ಯಾರ್ಯ್ ಜಿಮ್ಮಿನ್ ದಾಂಬುನ್ ದರ್ಲಲೊ ಉಸ್ವಾಸ್ ಸೊಡ್ಲೊ ನಾ.
ತಶೆಂಚ್ ತೊ ಜಿಪಾ ಲಾಗಿಂ ಪಾವ್ತಾನಾ ಮಿಶೇಲಾನ್ ಧಾಂವೊನ್ ಯೇವ್ನ್ ಜಿಪಾಚೆಂ ದಾರ್ ಉಗ್ತೆಂ ಕೆಲೆಂ.
ಜೆರೊಮಾಕ್ ಜಿಪಾರ್ ನಿದಾವ್ನ್ ಏಕ್ ಲಾಂಭ್ ಶ್ವಾಸ್ ವೊಡ್ಲಲೊ ಜಿಮ್ಮಿ ಡ್ರೈವಿಂಗ್ ಸಿಟಾಚೆರ್ ಉಡ್ಲೊ.
"ಮಾಂಯ್ ಖಂಯ್ ಆಸಾ? ಮಿಶೇಲ್....!ಮಾಂಯ್?" ಜಿಮ್ಮಿಕ್ ಉಲಂವ್ಕ್ ಕಷ್ಟ್ ಮಾರ್ತಾಲೆ. ತೊ ಖರ್ಶೆತಾಲೊ.
ತಿತ್ಲ್ಯಾರ್ ಎಸ್ತೆಲ್ ಜಿಪಾಲಾಗಿಂ ಯೇವ್ನ್ ಪಾವ್ಲಿ.
"ಬಸ್ ಮಾಂಯ್.... ವೆಗ್ಗಿಂ!"
ಎಸ್ತೆಲ್ ಜಿಪಾರ್ ಬಸ್ಲ್ಲಿಚ್ ಜಿಮ್ಮಿನ್ ಜೀಪ್ ಥೊಡೆಂ ರಿವರ್ಸ್ ಕಾಡುನ್,
"ಬಾಬಾಕ್ ಪಳೆ ಮಾಂಯ್....!" ತಾಣೆಂ ಜೀಪ್ ಮುಕಾರ್ ಧಾಂವ್ಡಾಯ್ಲೆಂ. ತೊ ಖರ್ಶೆತಾಲೊ.
ಮಿಶೇಲಾಕ್ ಕಿತೆಂ ಕರ್ಚೆಂ ತೆಂ ಕಾಂಯ್ ಸಮ್ಜಾಲೆಂ ನಾಂ. ತೆಂ ಹುಸ್ಕಾರೊಂಕ್ ಲಾಗ್ಲೆಂ. ಜಿಣಿಯೆಚಾ ಸಂದಿಗ್ದ್ ಪರಿಸ್ಥಿತೆಂನಿ ಮಿಶೇಲ್ ಆಪ್ಲ್ಯಾ ಮತಿಚ್ಯಾ ಸ್ವ ಸಕ್ತೆಕ್ ಹೊಗ್ಡಾವ್ನ್ ಅಚಾನಕ್ ತೆಂ ಭುರ್ಗೆಂ ಜಾತಾಲೆಂ. ಹ್ಯಾ ವೆಳಾರ್ ಫಕತ್ತ್ ರಡ್ಚೆಂ ಮಾತ್ರ್ ಶಿವಾಯ್ ತಾಕಾ ದುಸ್ರೆಂ ಕಾಂಯ್ಚ್ ತಾಚ್ಯಾ ಮತಿಕ್ ವಚಾನಾತ್ಲ್ಲೆಂ.
"ಕಿತೆಂ ಜಾಲೆಂ ನೆ ತುಕಾ..... ಯೇ ದೆವಾ....!" ಎಸ್ತೆಲ್ ಜಿಪಾ ಭಿತರ್ ದುಖಾಂನಿ ಹುಸ್ಕಾರ್ತಾಲಿ.
"ಬಾಬಾ.....? .....ಬಾಬಾಚೆ ಹಾತ್ ಪೊಶೆಗೆ ಮಾಂಯ್....!" ಮುಖ್ಲ್ಯಾನ್ ವೆಚ್ಯಾ ಬಸ್ಸಾಕ್ ಓವರ್ಟೇಕ್ ಕರುನ್ ತೆವ್ಶಿಂನ್ ಥಾವ್ನ್ ಯೆಂವ್ಚಾ ಕಾರಾ ಥಾವ್ನ್ ಬಚಾವ್ ಜಾಂವ್ಚ್ಯಾಕ್ ಜಿಮ್ಮಿನ್ ಜೀಪ್ ರಸ್ತ್ಯಾ ಥಾವ್ನ್ ಸಕಯ್ಲ್ ದೆಂವಯ್ಲೆಂ.
ಹಾಸ್ಪಿಟಲ್ ಲಾಗಿಂಚ್ ಆಸ್ಲ್ಲಿ. ಆಪ್ಲೆ ದೊಳೆ ಆನಿ ರಸ್ತೊ ಏಕ್ ಕರುನ್ ಮ್ಹಳ್ಳ್ಯಾ ಪರಿಂ ಜಿಮ್ಮಿನ್ ಜೀಪ್ ಹಾಡುನ್ ಹಾಸ್ಪಿಟಲಾಚಾ ದಾರಾರ್ ರಾವಯ್ತಾನಾ, ಉಪ್ರಾಂತ್ಲೆಂ ಸಗ್ಳೆಂ ಖಿಣಾ ಭಿತರ್ ಘಡೊನ್ ಗೆಲ್ಲೆಂ.
ಜೆರೊಮಾಕ್ ಎಮರ್ಜೆನ್ಸಿ ಯೂನಿಟಾ ಭಿತರ್ ವರ್ತಾನಾ ದಾಕ್ತೆರಾನ್ ಸಾಂಗ್ಲ್ಲ್ಯಾ ಪರಿಂ,
"ಮಿಶೇಲ್ ತುಂ ಹಾಂಗಾಚ್ ಮಾಂಯ್ ಲಾಗಿಂ ರಾವ್. ಹಾಂವ್ ಬಾಬಾಚೆಂ ಫೈಲ್ ರಿಜಿಸ್ಟರ್ಡ್ ಕರುನ್ ಯೆತಾಂ!" ಜಿಮ್ಮಿಆಸ್ಪತ್ರೆಚಾ ರಿಜಿಸ್ಟ್ರೇಶನ್ ಕೌಂಟರಾ ತೆವ್ಶಿಂ ಧಾಂವ್ಲೊ.
ಥೊಡೊಚ್ ವೇಳ್!
ಹ್ಯಾ ಕುಶಿಂನ್ ಜೆರೊಮಾಚೆಂ ಫೈಲ್ ರಿಜಿಸ್ಟರ್ಡ್ ಜಾತಾನಾ ತ್ಯಾ ಕುಶಿಂನ್ ಚಿಕಿತ್ಸಾ ಆರಂಭ್ ಜಾಲ್ಲಿ.
ಎಮರ್ಜೆನ್ಸಿ ದಾರಾ ಭಾಯ್ರ್ ರಾವ್ಲೆಲ್ಯಾ ಮಿಶೇಲಾಕ್ ರಾವ್ಲ್ಲ್ಯಾ ಕಡೆನ್ ರಾವೊಂಕ್ ಜಾಲೆಂ ನಾ. ತಾಚೆ ಹಾತ್ ಪಾಂಯ್ ಕಾಂಪ್ತಾತ್ ತಶೆಂ ತಾಕಾ ಜಾತಾಲೆಂ. ಎಸ್ತೆಲ್ ತರ್ಯ್ ಲಾಗ್ಶಿಲ್ಯಾ ಕುಂದ್ಯಾಕ್ ವೊಣ್ಕೊನ್ ರಾವೊನ್ ಎಮರ್ಜೆನ್ಸಿ ದಾರಾ ತೆಂವ್ಶಿಂಚ್ ಆಪ್ಲಿ ನದರ್ ಜೊಕುನ್ ಆಸ್ಲ್ಲಿ. ಎಕಾಚ್ಚ್ ಫರಾ ಅಚಾನಕ್ ಭಿಗಡ್ಲೆಲ್ಯಾ ಜೆರೊಮಾಚ್ಯಾಭಲಾಯ್ಕೆ ವರ್ವಿಂ ತಿಕಾ ದಖೊ ಬಸ್ಲ್ಲೊ. ಜೆರೊಮಾಕ್ ಎದೊಳ್ ಆಶೆಂ ಕೆದ್ನಾಂಚ್ ಜಾಲ್ಲೆಂ ನಾ. ತಶೆಂ ಆಸ್ತಾನಾ.....
"ಭಿತರ್ ವಚೊನ್ ಯೇಗೊ ಪುತಾ. ಕಿತೆಂ ತೆಂ ಪಳವ್ನ್ ಯೇ.....!" ಎಸ್ತೆಲಾಚಾ ತಾಳ್ಯಾಂತ್ ಭಿರಾಂತ್ ಸ್ಪಶ್ಟ್ ಝಳ್ಕಾತಾಲಿ.
"ಆಮ್ಕಾಂ ಭಿತರ್ ವಚೊಂಕ್ ಜಾಯ್ನಾಂ ಮಾಂಯ್! ದಾಕ್ತೆರ್ ಭಾಯ್ರ್ ಯೆತೆಲೆ.... ಹಾಂವ್ ವಿಚಾರ್ತಾಂ!" ಮಿಶೆಲಾಚೊ ತಾಳೊ ಕಾಂಪ್ತಾಲೊ.
"ಹೊ ಚೆಡೊ ಖಂಯ್ ಗೆಲೊ? ತಾಕಾ ಖಂಯ್ ದಾಡ್ಲೊಗೋ....?"
"ಆಬಾಚೆಂ ಫೈಲ್ ರಿಜಿಸ್ಟರ್ಡ್ ಕರುಂಕ್ ಆಸಾ ಮಾಂಯ್. ತೊ ಥಂಯ್ಚರ್ ಗೆಲಾ... ಯೆತಲೊ!" ಮಿಶೆಲಾನ್ ಜಿಮ್ಮಿ ಧಾಂವೊನ್ ಗೆಲ್ಲ್ಯಾ ತೆವ್ಶಿಂ ಪಳೆಲೆಂ. ತಾಕಾ ಜಿಮ್ಮಿಚಿ ಝಳಕ್ ದಿಸ್ಲಿ ನಾ.
"ಹೊ ಚೆಡೊ ಆಸ್ಲ್ಲ್ಯಾನ್ ಮಾತ್ರ್ ಜಾಲೆಂ!" ತಿಚೆ ದೊಳೆ ಜಿಮ್ಮಿಕ್ ಸೊಧುಂಕ್ ಲಾಗ್ಲೆ.
ತಿತ್ಲ್ಯಾರ್!
ಮಿಶೇಲಾಚಾ ವ್ಯಾನಿಟಿ ಬ್ಯಾಗಾಂತ್ಲೆಂ ಸೆಲ್ಪೋನ್ ವಾಜೊಂಕ್ ಲಾಗ್ಲೆಂ.
"ಪಳೆಗೋ ಪುತಾ ಹೆಂ ಕೊಣಾಚೆಂ ಪೋನ್?" ಆಪ್ಲ್ಯಾ ಹಾತಾಂತ್ ಆಸ್ಲ್ಲೆಂ ಮಿಶೇಲಾಚೆಂ ವ್ಯಾನಿಟಿ ಬ್ಯಾಗ್ ಎಸ್ತೆಲಾನ್ ಉಗ್ತೆಂ ಕರುನ್ ತಾಂತ್ಲೆಂ ಪೋನ್ ಕಾಡುನ್ ನಾತಿಚ್ಯಾ ಹಾತಿಕ್ ದಿಲೆಂ.
ಟೆಲಿಪೋನಾಕ್ ಪಳೆಲ್ಲೆಂ ಮಿಶೇಲ್,
"ಶೀತಲ್ ಮಾಂಯ್!"ಮಿಶೇಲಾಚೆ ದೊಳೆ ರುಂದಾಲೆ.
"ಹಾಂ ಶೀತಲ್.....!" ಮಿಶೇಲಾನ್ ಪೋನ್ ಆನ್ ಕೆಲೆಂ.
"..........."
"ಅಜೂನ್ ಕಾಂಯ್ ಸಾರ್ಕೆಂ ನಾ. ಆಬಾಕ್ ಎಮರ್ಜೆನ್ಸಿಂತ್ ವೆಲಾಂ!"
"........."
"ಹಾಂಗಾ..... ಕೆ.ಎಮ್.ಸಿ. ಂತ್!"
"........"
"ವ್ಹಯ್! ಹಾಂವ್ ತುಕಾ ಮಾಗಿರ್ ಪೋನ್ ಕರ್ತಾಂ ದಾಕ್ತೆರ್ ಅಜೂನ್ ಭಾಯ್ರ್ ಯೇಂವ್ಕ್ ನಾಂತ್!"
"........"
"ಓ.ಕೆ....."
ಮಿಶೆಲಾನ್ ಪೋನ್ ಭಂಧ್ ಕರ್ತಾನಾ, ಥಂಯ್ಚರ್ ಜಿಮ್ಮಿ ಯೇವ್ನ್ ಪಾವ್ಲೊ. ತಾಚ್ಯಾ ಹಾತಾಂತ್ ಏಕ್ ಫೈಲ್ ಆಸ್ಲ್ಲೆಂ. ತೆಂ ಫೈಲ್ ಎಮರ್ಜೆನ್ಸಿ ವಾರ್ಡಾ ಭಾಯ್ರ್ ಬಸೊನ್ ಆಸ್ಲ್ಲ್ಯಾ ಸೆಕ್ಯೂರಿಟಿಚ್ಯಾ ಹಾತಾಕ್ ದಿತಾನಾ ತಾಣೆ ತೆಂ ಫೈಲ್ ಭಿತರ್ ವರುನ್ ದಿಲೆಂ.
ಥೊಡ್ಯಾ ವೆಳಾನ್ ಎಮರ್ಜೆನ್ಸಿ ವಾರ್ಡಾ ಥಾವ್ನ್ ಭಾಯ್ರ್ ಆಯ್ಲೆಲ್ಯಾ ದಾಕ್ತೆರಾನ್ ಜೆರೊಮಾ ವಿಶಿಂ ಸಾರ್ಕಿ ಖಬಾರ್ ದಿತಾನಾ ತೆಗಾಂಯ್ಕ್ಯ್ ಥೊಡೆಂ ಸಮಾಧಾನ್ ಜಾಲೆಂ.
"ಭಿಯೆಂವ್ಚಿ ಕಾಂಯ್ ಗರ್ಜ್ ನಾ! ಪೇಶಂಟಾಕ್ ಹಾರ್ಟ್ ಅಟ್ಯಾಕ್ ಜಾಲ್ಲೆಂ. ವೆಳಾರ್ ತಾಕಾ ಪಾವಯಿಲ್ಲ್ಯಾನ್ ತೊ ಬಚಾವ್ ಜಾಲೊ!"
ದಾಕ್ತೆರ್ ಆತಾಂ ತಾಚ್ಯಾ ಪಿ.ಜಿ. ಂಚ್ಯಾ ಕುಶಿನ್ ಘುಂವೊನ್ ತಾಂಕಾ ಕಿತೆಂಗೀ ಸಲಹಾ ದೀಂವ್ಕ್ ಲಾಗ್ಲೊ.
"ಡೋಂಟ್ ವರ್ರಿ! ಪೇಶಂಟಾಕ್ ಆತಾಂ ಐ.ಸಿ.ಯು ಕ್ ವರ್ತೆಲೆ. ಟ್ರಾನ್ಸ್ಫರ್ ಜಾಲ್ಯಾ ಉಪ್ರಾಂತ್ ಹಾಂವ್ ಯೆತಾಂ!" ದಾಕ್ತೆರ್ ಆತಾಂ ತಾಚ್ಯಾ ಪಿ.ಜಿ. ಸವೆಂ ಮುಕಾರ್ ಚಮ್ಕಾಲೊ.
ತಿತ್ಲ್ಯಾರ್ ಎಮರ್ಜೆನ್ಸಿ ವಾರ್ಡಾಚೆಂ ದಾರ್ ಉಗ್ತೆಂ ಜಾವ್ನ್ ಸ್ಟ್ರೆಚರಾರ್ ನಿದಾಯಿಲ್ಲ್ಯಾ ಜೆರೊಮಾಕ್ ಘೆವ್ನ್ ನರ್ಸಾಂ ಭಾಯ್ರ್ ಆಯ್ಲಿಂ.
"ತುಮಿ ಜೆರೊಮಾಚಿ ಪಾರ್ಟಿ....?" ಎಕಾ ನರ್ಸಾನ್ ಮಿಶೇಲಾಕ್ ಸವಾಲ್ ಕೆಲೆಂ.
ಮಿಶೆಲಾನ್ ಫಕತ್ತ್ ತಕ್ಲಿ ಹಾಲಯ್ಲಿ ಮಾತ್ರ್ ಶಿವಾಯ್ ತಾಕಾ ಕಾಂಯ್ ಉಲಂವ್ಕ್ ಜಾಲೆಂ ನಾ. ತಾಚ್ಯಾ ದೊಳ್ಯಾಂ ಮುಕಾರ್ ತಾಚೊ ಆಜೊ ತ್ಯಾ ಸ್ಟ್ರೆಚರಾರ್ ನಿದ್ಲ್ಲೊ. ತಾಚೆ ದೊಳೆ ದಾಂಪ್ಲ್ಲೆ. ತೊಂಡಾಕ್ ಆಕ್ಸಿಜನಾಚೆಂ ಮಾಸ್ಕ್ ಆಸ್ಲ್ಲೆಂ. ದೆಗೆನ್ ಗ್ಲುಕೋಸಾಚಿ ಬಾಟಲ್. ಮಿಶೆಲಾಕ್ ಆಪ್ಲ್ಯಾ ಆಜ್ಯಾಕ್ ಪಳವ್ನ್ ದೂಖ್ ಉಮಾಳುನ್ ಆಯ್ಲೆಂ.
ಜೆರೊಮಾಕ್ ಆತಾಂ ಐ.ಸಿ.ಯು. ಚ್ಯಾ ಭಿತರ್ ವೆಲೊ.
ಸುಮಾರ್ ಅರ್ಧ್ಯಾ ವೊರಾನ್ ಶೀತಲಾಚ್ಯಾ ಸೈರ್ಯಾಂಕ್ ಘೆವ್ನ್ ರಾಯನ್ ಆಸ್ಪತ್ರೆಕ್ ಪಾವ್ಲ್ಲೊ. ಮಿಶೇಲಾಕ್ ಆನಿ ಎಸ್ತೆಲಾಕ್ ತಾಣೆಂ ಮಸ್ತ್ ಧಯ್ರ್ ಸಾಂಗ್ಲೆಂ.
ಆಪ್ಲ್ಯಾ ಕಾಜಾರಾ ಪಾರ್ಟೆಕ್ ಸೊಡುನ್ ಶೀತಲಾಕ್ ಯೇಂವ್ಕ್ ಜಾಲ್ನಾ ಜಾಲ್ಯಾರ್ಯ್ ಪಾರ್ಟಿ ಕಾಬಾರ್ ಜಾಲ್ಯಾ ಉಪ್ರಾಂತ್ ಶೀತಲ್ ಆಪ್ಲ್ಯಾ ಕುಟ್ಮಾ ಸವೆಂ ಆಸ್ಪತ್ರೆಕ್ ಯೆವ್ನ್ ಗೆಲೆಂ. ಮಿಶೇಲಾಕ್ ಆನಿ ಎಸ್ತೆಲಾಕ್ ಆಸ್ಪತ್ರೆಕ್ ಸೊಡುನ್ ಖಂಯ್ಚರ್ಯ್ ವಚೊಂಕ್ ಸಾದ್ಯ್ ನಾತ್ಲ್ಲೆಂ.
ಅಚಾನಕ್ ಭಿಗಡ್ಲೆಲ್ಯಾ ಜೆರೊಮಾಚ್ಯಾ ಭಲಾಯ್ಕೆ ವರ್ವಿಂ ಜೆರೊಮಾಚಾ ಘರ್ಚೆಂ ವಾತಾವರಣ್ಚ್ ಬದ್ಲಾಲ್ಲೆಂ. ಹ್ಯಾ ವಾತಾವರಣಾಂತ್ ಧಯ್ರಾಚೆಂ ವಾರೆಂ ಜಾವ್ನ್ ಜೆರೊಮಾಕ್ ವಳ್ಕೊಂಚಿ ಸಭಾರ್ ಆಸ್ಪತ್ರ್ರೆಕ್ ಯೇವ್ನ್ ಗೆಲ್ಲಿಂ. ತಾಂಚ್ಯಾ ಮಧೆಂ ನವೆಂಚ್ ವ್ಹಾಳೊನ್ ಆಯಿಲ್ಲೆಂ ವಾರೆಂ ಮ್ಹಳ್ಯಾರ್ ರಾಯನ್!
ಆಲ್ಪ್ರೆಡ್ ರಾಯನ್!
************
ಸಗ್ಳ್ಯಾ ಸಂಸಾರಾಚಾ ಕೊನ್ಶ್ಯಾ ಕೊನ್ಶ್ಯಾರ್ ಪಾಸೊನ್ ಫುಲೊನ್ ರಾವ್ಲ್ಲಿಂ ಧವಿಂ ಧವಿಂ ಫುಲಾಂ, ಆಪ್ಲ್ಯಾ ದೊಳ್ಯಾಂ ಮುಕಾರ್ ಪಳಂವ್ಚ್ಯಾ ಮಿಶೇಲಾಚೊ ಸಂತೊಸ್ ಸಾಂಗೊಂಕ್ ಸಕ್ಚೊ ನ್ಹಯ್. ಆಪ್ಣಾಭಂವ್ತಿಂ, ಹೆವ್ಶಿಂ ತೆವ್ಶಿಂ, ಸಗ್ಳ್ಯಾನಿತ್ಲ್ಯಾನ್ ಫುಲಾಂಚ್ ಫುಲಾಂ! ಜಶೆಂ ಹ್ಯಾ ಫುಲಾಂಚಾ ಸಂಸಾರಾಂತ್ ಆಪ್ಣೆ ಜಲ್ಮ್ ಘೆತ್ಲಾ ತಶೆಂ!
ಘೊಸ್ ಘೊಸ್ ಧವಿಂ ಧವಿಂ ಫುಲಾಂ!
ಕಾಟನಾಚಾ ಝಡಾರ್ ಭರೊನ್ ವೊಮ್ತೊಂಚಿ ತಸಲಿಂ ಫುಲ್ತಿ ಫುಲಾಂ!
ತ್ಯಾ ಫುಲಾಂಕ್ ಮಿಶೇಲ್ ಆಪ್ಲ್ಯಾ ಮೊವಾಳ್ ಹಾತಾಂನಿ ಪೊಶೆವ್ನ್ ಹಾಸ್ತಾಲೆಂ. ಹ್ಯಾ ಸಗ್ಳ್ಯಾ ಫುಲಾಂಚಾ ಸಂಸಾರಾರ್ ಆಪುಣ್ಚ್ ಎಕ್ಸುರೆಂ ಆಸಾಂ ತಶೆಂ ತಾಕಾ ಭಗ್ಲೆಂ.
ತಿತ್ಲ್ಯಾರ್!
"ಮಿಶೇಲ್ ಡಾರ್ಲಿಂಗ್........!"
ಚಿರಪರಿಚಿತ್ ತಾಳೊ ಆಪ್ಣಾಕ್ ಆಪಯ್ತಾನಾ ತ್ಯಾ ತಾಳ್ಯಾನ್ ವ್ಹಾಳೊನ್ ಆಯಿಲ್ಲ್ಯಾ ತೆವ್ಶಿಂ ಮಿಶೇಲಾನ್ ಆಪ್ಲಿ ದೀಶ್ಟ್ ವೆಲಿ.
ಆಬ್ಳೆ! ಆಜಾಪ್!
ಮಿಶೇಲ್ ಆಪ್ಲ್ಯಾ ದೊಳ್ಯಾಂಕ್ಚ್ ಪಾತ್ಯೆಲೆಂ ನಾ. ತಾಚ್ಯಾ ಫುಡ್ಯಾನ್ ಉಭಿ ಆಸ್ಲ್ಲಿ ಕ್ಯಾಥರೀನ್!
ತೆಂಚ್ ರೂಪ್! ತೆಂಚ್ ಮುಖಮಳ್!
ಆಪ್ಲ್ಯಾ ಲ್ಹಾನ್ಪಣಾ ವಯ್ಲ್ಯಾ ತಸ್ವೀರೆಂತ್ಲೆಂ!
"ಕ್ಯಾಥರೀನ್.....!?" ಉದ್ಗಾರ್ಲ್ಲ್ಯಾ ಮಿಶೇಲಾಚೊ ಸಂತೊಸ್ ವರ್ಣೊಂಕ್ ನಜೊ ತಸಲೊ.
"ಮೈ ಸ್ವೀಟ್ ಹಾರ್ಟ್! .......ಕಮಾನ್ ಪ್ರಿನ್ಸೆಸ್!" ಕ್ಯಾಥರೀನಾನ್ ಆಪ್ಲೆ ಬಾವ್ಳೆ ವಿಸ್ತಾರಾಯ್ತಾನಾ ಮಿಶೇಲ್ ಉಲ್ಲಾಸಾನ್ ಭರ್ಲೆಂ.
ತೆಂ ಆತಾಂ ಧಾಂವೊಂಕ್ ಲಾಗ್ಲೆಂ. ಕ್ಯಾಥರೀನಾಚ್ಯಾ ವೆಂಗೆಂಕ್ ವೆಂಗುಂಕ್ ತೆಂ ಧಾಂವ್ಲೆಂ.
ಧಾಂವ್!
ಸಂಭಂಧಾಕ್ ಸಂಭಂಧ್ ವೆಂಗುಂಕ್ ವೆಚಿ ಸೊಭಿತ್ ಧಾಂವ್!
ತಿತ್ಲ್ಯಾರ್!
ವಾದಾಳ್ಚ್ ಉಟೊನ್ ಆಯಿಲ್ಲ್ಯಾ ಪರಿಂ ಉಬೊನ್ ಆಯಿಲ್ಲ್ಯಾ ಎಕಾ ಜಯ್ತ್ ಸುಕ್ಣ್ಯಾನ್ ಆಪ್ಲ್ಯಾ ದೊನ್ಯ್ ಪಾಂಯಾಂನಿ ಕ್ಯಾಥರೀನಾಕ್ ಧರುನ್ ಉಕೊಲ್ಲೆಂ ಆನಿ ತೆಂ ಸುಕ್ಣೆಂ ಖಿಣಾನ್ ಥಂಯ್ ಥಾವ್ನ್ ನಪಂಯ್ಚ್ ಜಾಲೆಂ.
"ಮಿಶೇಲ್....? ಮಿಶೇಲ್....?" ಕ್ಯಾಥರೀನ್ ಬೋಬ್ ಮಾರ್ತಾಲಿ.
"ಕ್ಯಾಥರೀನ್......?" ಮಿಶೇಲಾನ್, ಅಚಾನಕ್ ಆಪ್ಲ್ಯಾ ದೊಳ್ಯಾಂ ಮುಕಾರ್ ಥಾವ್ನ್ ಮಾಯಾಗ್ ಜಾಲ್ಲ್ಯಾ ಕ್ಯಾಥರೀನಾ ತೆವ್ಶಿಂ ದೊಳೆ ಉಭಾರ್ಲೆ. ಪುಣ್ ತಾಚ್ಯಾ ತಾಳ್ಯಾ ಥಾವ್ನ್ ತಾಣೆಂ ಆಪಯಿಲ್ಲೊ ತೊ ಸಬ್ದ್ ಭಾಯ್ರ್ ಪಡ್ಲೊ ನಾ.
"ಕ್ಯಾಥರೀನ್..?" ತಾಣೆಂ ವ್ಹಡ್ ತಾಳ್ಯಾನ್ ಬೋಬ್ ಮಾರುಂಕ್ ಪ್ರಯತ್ನ್ ಕೆಲೆಂ.
ಸಾದ್ಯ್ ಜಾಂವ್ಕ್ ನಾ. ಮಿಶೇಲಾಚಾ ತಾಳ್ಯಾ ಥಾವ್ನ್ ಆವಾಜ್ ಭಾಯ್ರ್ ಆಯ್ಲೊಚ್ ನಾ.
"ಕ್ಯಾಥರೀ......ನ್!" ತಾಳೊ ಪಿಂದುನ್ ಮ್ಹಳ್ಳ್ಯಾ ಪರಿಂ ಮಿಶೇಲಾನ್ ಬೋಬ್ ಮಾರ್ಲಿ.
ತಿತ್ಲೆಂಚ್!
ಎಕಾಚ್ಚ್ ಫರಾ ಭಂವ್ತಣಿ ಉಜ್ವಾಡ್ ಫಾಂಕೊನ್ ಆಪ್ಲ್ಯಾ ದೊಳ್ಯಾಂಕ್ ತೊ ಉಜ್ವಾಡ್ ತೊಪ್ಲೆಲ್ಯಾ ಪರಿಂ ಜಾತಾನಾ ಮಿಶೇಲಾನ್ ಆಪ್ಲೆ ದೊಳೆ ಉಘಡ್ಲೆ. ಉಘಡ್ಲೆಲ್ಯಾ ತಾಚ್ಯಾ ದೊಳ್ಯಾಂಕ್ ಜಗ್ಲಾಣ್ಯಾ ಪರಿಂ ಭಾಯ್ಲೊ ಉಜ್ವಾಡ್ ತೊಪ್ತಾನಾ ತಾಣೆಂ ಆಪ್ಲ್ಯೊ ದೊಳ್ಯಾಂ ಆಸ್ಡ್ಯೊ ದಾಂಬುನ್ ದರ್ಲ್ಯೊ.
ತಿತ್ಲ್ಯಾರ್!
"ಮಿಶೇಲ್.....!? ಮಿಶೇಲ್?" ಆಪ್ಣಾಕ್ ಕೊಣ್ ತರ್ಯ್ ಧರುನ್ ಹಾಲಯ್ತಾ ತಶೆಂ ಜಾತಾನಾ ಆನಿ ಆಪಯಿಲ್ಲ್ಯಾ ತಾಳ್ಯಾಕ್ ಮತಿನ್ ವಳಕ್ ಧರ್ತಾನಾ ಮಿಶೇಲಾನ್ ಸವ್ಕಾಸ್ ಆಪ್ಲೆ ದೊಳೆ ಉಘಡ್ಲೆ. ಪುಣ್ ತಾಕಾ ಸಾದ್ಯ್ ಜಾಲೆಂ ನಾ. ತಾಚೆ ದೊಳೆ ಶಿರ್ಶಿರೊಂಕ್ ಲಾಗ್ಲೆ.
"ಮಿಶೇಲ್? ಕಿತೆಂ ಜಾಲೆಂ ಪುತಾ....?"
ಭಾರೀಕ್ ಉಗ್ತೆ ಕೆಲ್ಲ್ಯಾ ದೊಳ್ಯಾಂ ಮುಕಾರ್ ಎಸ್ತೆಲ್ ಆಪ್ಲಿ ಆಜಿ ತಾಕಾ ದಿಶ್ಟಿಕ್ ಪಡ್ಲಿ.ತ್ಯಾ ಭಾಯ್ರ್... ತಾಚ್ಯಾ ನಿದ್ಚ್ಯಾ ಕುಡಾಂತ್ಲೊ ದಿವೊ... ತಾಚೊ ವಾರ್ಡ್ರೋಬ್ .... ಆನಿ.....
ವ್ಹಯ್!
ಸಗ್ಳೆಂಚ್ ದುಸ್ರೆಂ!
"ತಿಂ ಫುಲಾಂ.... ಧವಿಂ ಧವಿಂ ಕಾಟನಾ ಸಾರ್ಕ್ಯಾಚಿಂ.... ಕಿತ್ಲಿಂ ಸೊಭಿತ್... ಕಿತ್ಲಿಂ ಮೊವಾಳ್... ಕುಪಾಂಚಾ ರುಪಾಚಿಂ... ಕಾಪ್ಸಾಚಾ ಜಾತಿಚಿಂ... ಖಂಯ್ ಗೆಲಿಂ?" ಮಿಶೇಲಾಚಿ ಮತ್ ಉಲಂವ್ಕ್ ಲಾಗ್ತಾನಾ ಮಿಶೇಲಾನ್ ತಕ್ಲಿ ಘುಂವ್ಡಾವ್ನ್ ಹೆವ್ಶಿಂ ಪಳೆಲೆಂ.
ಕಾಂಯ್ಚ್ ನಾ! ಹಾಂಗಾಸರ್ ಸಗ್ಳೆಂಚ್ ಬದ್ಲಾಲ್ಲೆಂ!
ಸಗ್ಳೆಂಚ್!!
ಕ್ಯಾಥರೀನ್ ಸಯ್ತ್!!!
"ಕ್ಯಾಥರೀನ್....!?" ಮಿಶೇಲಾಚಾ ಜಿಬೆರ್ ಆಪ್ಲೆಸ್ತಕಿಂ ಉತಾರ್ ಸುಟ್ಲೆಂ.
ಎದೊಳ್ ವರೇಗ್ ತಾಳ್ಯಾ ಥಾವ್ನ್ ಭಾಯ್ರ್ ಪಡೊಂಕ್ ಆಯ್ಕಾನಾತ್ಲಲೊ ಸಬ್ದ್ ಆತಾಂ ಸಲೀಸಾಯೆನ್ ಭಾಯ್ರ್ ಪಡ್ಲ್ಲೊ.
"ಮಿಶೆಲ್? ಸಪ್ಣೆಲೆಂಯ್ ಪುತಾ....?"
ಮಿಶೇಲಾಚೊ ಹಾತ್ ಆಪ್ಲ್ಯಾ ಹಾತಾಂತ್ ಧರುನ್ ಪೊಶೆಂವ್ಚೊ ಹಾತ್ ಆಪ್ಲ್ಯಾ ಕ್ಯಾಥರೀನಾಚೊಚ್ ಹಾತ್ ಮ್ಹಣೊನ್ ಸಮ್ಜಾಲ್ಲ್ಯಾ ಮಿಶೇಲಾಕ್ ಮುಕಾರ್ ಆಪ್ಲಿ ಆಜಿ ದಿಸ್ಲಿ.
ತಿತ್ಲೆಂಚ್!
ಎಕ್ಚ್ ಪಾವ್ಟಿಂ ತೆಂ ಆಪ್ಲೆ ಖಾಟಿಯೆರ್ ನಿದ್ಲೆಲ್ಯಾ ಥಾವ್ನ್ ಉಟೊನ್ ಬಸ್ಲೆಂ. ತಾಕಾ ಆಪ್ಲ್ಯಾ ಆಜ್ಯಾಚೊ ಉಡಾಸ್ ಆಯ್ಲೊ.
"ಮಾಂಯ್! ಆಬ್.....?" ಭಿರಾಂತೆಚ್ಯಾ ತಾಳ್ಯಾನ್ ಮಿಶೇಲ್ ಉದ್ಗಾರ್ಲೆಂ. "ಜಿಮ್ಮಿಚಿ ಕಾಂಯ್ ಖಬಾರ್ ಆಸಾ.....?" ಆಪ್ಲ್ಯಾ ಆಜಿಯೆಕ್ ತಾಣೆಂ ಪಳೆಲೆಂ.
ಮಿಶೇಲಾನ್ ಉಲಂವ್ಚಿ ರೀತ್... ಬದ್ಲುಂಚೊ ತಾಚೊ ಜಿನೊಸ್.... ಅಚಾನಕ್ ಉದೆಂವ್ಚೊ ತೊಂಡಾ ವಯ್ಲೊ ವಿಚಿತ್ರ್ ಛಾರೊ... ಪಳಯಿಲ್ಲ್ಯಾ ಎಸ್ತೆಲಾಕ್ ಮಿಶೇಲ್ ಭಿಯೆಲ್ಲ್ಯಾ ಪರಿಂ ದಿಸ್ಲೆಂ.
"ಮಿಶೇಲ್....! ತುಂ ನಿದೆ ಪುತಾ.... ವೊರಾಂ ಅಜೂನ್ ಚಾರ್ ಜಾತಾತ್ ಮಾತ್ರ್!" ಎಸ್ತೆಲಾನ್ ವೊಣ್ತಿ ವಯ್ಲ್ಯಾ ಗಡಿಯಾಳಾರ್ ಆಪ್ಲಿ ದೀಶ್ಟ್ ವೆಲಿ. "......ಆನಿಕ್ಯ್ ದೋನ್ ವೊರಾಂ ಆಸಾತ್. ಜಿಮ್ಮಿನ್ ಸ್
ಆಂಗ್ಲಾಂ..... ಭರ್ತಿ ಸ ವರಾರ್ ತೊ ಯೆತಲೊ! ತಾಚ್ಯಾ ಪಯ್ಲೆಂ ಆಮಿ ಆಸ್ಪತ್ರೆಕ್ ವಚೊನ್ ಕಾಂಯ್ ಫಾಯ್ದೊ ನಾ! ತುಂ ಥೊಡೆಂ ಆಡ್ ಪಡ್.....!" ಎಸ್ತೆಲ್ ಮಿಶೇಲಾಚಾ ಬಗ್ಲೆಕ್ ಥಾವ್ನ್ ಉಟ್ಲಿ. "ತುಕಾ ಸಾಡೆಪಾಂಚ್ ವರಾರ್ಶೆಂ ಹಾಂವ್ ಉಟಯ್ತಾಂ. ದೇವ್ ಆಸಾ ಪುತಾ....! ಕಾಂಯ್ ಜಾಂವ್ಚೆಂ ನಾ ತುಜ್ಯಾ ಆಬಾಕ್!"
"ಏಕ್ ಮಿನಿಟ್ ಮಾಂಯ್.... ಏಕ್ ಮಿನಿಟ್!" ಆಪ್ಲಿ ಆಜಿ, ಆಪ್ಲ್ಯಾ ನಿದ್ಚ್ಯಾ ಸಾಲಾಚೊ ಲೈಟ್ ಬಂಧ್ ಕರುಂಕ್ ವೆತಾ ತೆಂ ಜಾಣಾಂ ಜಾವ್ನ್ ಮಿಶೇಲ್ ಖಾಟಿಯೆರ್ ಥಾವ್ನ್ ಸಕಯ್ಲ್ ದೆಂವ್ಲೆಂ.
"ಹಾಂವ್ ಜಿಮ್ಮಿಕ್ ಏಕ್ ಪೋನ್ ಕರುನ್ ವಿಚಾರ್ತಾಂ!"
"ಆತಾಂ.....? ವೊರಾಂ ಪಳೆಗೋ ಪುತಾ! ಉಜ್ವಾಡ್ ತರ್ಯ್ ಜಾಂವ್ದಿ!"
ಆಜಿಯೆಚಿಂ ಉತ್ರಾಂ ಕಾನಾಂಕ್ ಪಡ್ಲ್ಯಾರ್ಯ್ ತಿಂ ಆಯ್ಕೊಂಕ್ ನಾತ್ಲೆಲ್ಯಾ ಪರಿಂ ಆಪ್ಲ್ಯಾ ಡ್ರೆಸ್ಸಿಂಗ್ ಟೇಬಲಾ ಲಾಗಿಂ ಆಯಿಲ್ಲ್ಯಾ ಮಿಶೇಲಾನ್ ಟೇಬಲಾರ್ ವಿಶೆವ್ ಘೆಂವ್ಚ್ಯಾ ಫೋನಾಕ್ ಹಾತಿಂ ಘೆತ್ಲೆಂ.
"ಹಾಂವ್ ಸಾಂಗ್ತಾಂ ತೆಂ ಆಯ್ಕ್ಗೋ! ತಶೆಂ ಕಾಂಯ್ ಚಡ್ಉಣೆಂ ಜಾಲ್ಯಾರ್ ಜಿಮ್ಮಿ ವೊಗೊ ಬಸ್ಚೊ ಚೆಡೊ ನ್ಹಯ್. ಹ್ಯಾ ವೆಳಾರ್ ತುಂ ಫೋನ್ ಕರುಂಕ್ ವಚಾನಾಕಾ. ಚೆಡ್ಯಾಕ್ ತ್ಯಾ ಆಸ್ಪತ್ರೆಂತ್ ಜೆಮ್ ಪಡ್ಲ್ಯಾ ವಾ ನಾ ತೆಂ ದೇವ್ ಜಾಣಾಂ! ಆಸ್ಪತ್ರೆಂಚೊ ವಿಶಯ್ ತುಂ ನೆಣಾಂಯ್.....!"
ಎಸ್ತೆಲಾನ್ ಆಪ್ಲ್ಯಾ ನಾತಿಕ್ ಪರ್ತ್ಯಾಕ್ ಸಮ್ಜಂವ್ಚೆಂ ಪ್ರಯತ್ನ್ ಕೆಲೆಂ. ಪುಣ್ ಮಿಶೇಲಾಚಾ ಮತಿಕ್ ಕಾಂಯ್ ನಾಟ್ವಾಲೆಂ ನಾ. ಸಪ್ಣಾಂತ್ ಪಳೆಲ್ಲೆಂ ದ್ರಶ್ಯ್ ಅಜೂನ್ ತಾಚ್ಯಾ ದೊಳ್ಯಾಂ ಮುಕಾರ್ ರೂಪ್ ರೂಪ್ ದಿಸ್ತಾ ತಶೆಂ ಜಾತಾಲೆಂ. ತ್ಯಾ ಭಾಯ್ರ್! ಖಂಯ್ಚರ್ಗೀ ಕ್ಯಾಥರೀನ್ ಅಸಹಾಯಕ್ ಜಾವ್ನ್ ಆಪ್ಣಾಕ್ ಆಪಯ್ತಾ. ತಿಕಾ ಆಪ್ಣಾಚಿ ಗರ್ಜ್ ಆಸಾ. ಪುಣ್ ತಿಚ್ಯಾ ಗರ್ಜೆಕ್ ಆಪುಣ್ ಅತಾಂ ತಿಕಾ ಪಾಂವ್ಚಾ ಸ್ಥಿತೆರ್ ನಾ. ವ್ಹಯ್! ಕ್ಯಾಥರೀನಾ ಖಾತಿರ್ ಆಪುಣ್ ಕಾಂಯ್ಚ್ ಕರುಂಕ್ ಸಕೊಂಕ್ ನಾ. ಪುಣ್ ಮ್ಹಜೊ ಆಜೊ....!? ಕ್ಯಾಥರೀನಾಕ್ ಆಪ್ಣೆ ಹೊಗ್ಡಾಯ್ಲೆಂ. ಆತಾಂ ಆಪ್ಣಾಚ್ಯಾ ಆಜ್ಯಾಕ್....? ನಾ! ಆಪ್ಣಾಚ್ಯಾ ಆಜ್ಯಾಕ್ ಆಪುಣ್ ಹೊಗ್ಡಾಂವ್ಕ್ ತಯರ್ ನಾ. ಮಿಶೇಲ್ ಆತಾಂ ಫಕತ್ತ್ ತಾಚ್ಯಾ ಆಜ್ಯಾ ವಿಶಿಂ ಮಾತ್ರ್ ಚಿಂತಾಲೆಂ.
ಆಪ್ಣಾಚೊ ಆಜೊ ತೊ! ನಾ ಆಶೆಂ ಜಾಂವ್ಚೆಂ ನಾ!
ಆಜಿಯೆಚ್ಯಾ ಸಮ್ಜಣೆಚ್ಯಾ ಉತ್ರಾಂಕ್ ಮಿಶೇಲಾನ್ ಗುಮಾನ್ ಕೆಲೆಂ ನಾ. ತಾಣೆಂ ಜಿಮ್ಮಿಕ್ ಟೆಲಿಪೋನ್ ಡಯಲ್ ಕೆಲೆಂ. ಥೊಡ್ಯಾ ವೆಳಾನ್ ತ್ಯಾ ಕುಶಿನ್ ಪೋನ್ ಕಾಡ್ಲ್ಲೊ ಆವಾಜ್.
"ಹಲೋ....." ಜಿಮ್ಮಿಚೊ ತಾಳೊ ತೊ.
"ಹಾಂ ಜಿಮ್ಮಿ! ಆಬ್ ಕಸೊ ಆಸಾ?"
"ಥೊಡೆಂ ಬರೆಂಪಣ್ ಆಸಾ ಖಂಯ್! ನರ್ಸ್ ಸಾಂಗ್ತಾಲೆಂ. ಹಾಂವೆ ವಕ್ತಾಂ ಹಾಡುನ್ ದಿಲ್ಯಾಂತ್!"
"ತುಕಾ ಭಿತರ್ ವಚೊನ್ ಪಳವ್ನ್ ಯೇಂವ್ಕ್ ಜಾಯ್ನಾ....?"
"ಕೊಣಾಕ್..... ಬಾಬಾಕ್?" ಜಿಮ್ಮಿಚಾ ತಾಳ್ಯಾಂತ್ ಆಶ್ಚರ್ಯ್ ಉದೆಲೆಂ.
"ಮ್ಹಾಕಾ ಭಿರಾಂತ್ ದಿಸ್ತಾ ಜಿಮ್ಮಿ. ಆಬಾಚಿ ಭಲಾಯ್ಕಿ ಬರಿ ನಾ ಆಸ್ತೆಲಿ....!"
ಮಿಶೇಲಾಚೊ ತಾಳೊ ಕಿತ್ಯಾಕ್ಗೀ ಕಾಂಪೆರೊ ಮ್ಹಳ್ಳ್ಯಾ ಪರಿಂ ಜಿಮ್ಮಿಕ್ ಭೊಗ್ಲೊ.
"ತುಂ ಕಾಂಯ್ ಭಿಯೆನಾಕಾ....! ಐ.ಸಿ.ಯು. ಂತ್ ದಾಕ್ತೆರ್ ಆಸಾತ್. ಬಾಬಾಕ್ ಆನಿ ಕಾಂಯ್ ಜಾಯ್ನಾ.
"ತುಂ ಏಕ್ ಕಾಮ್ ಕರ್ತಾಯ್....?"
ಮಿಶೆಲಾಕ್ ಜಿಮ್ಮಿಚಾ ಉತ್ರಾಂನಿ ಸಮಾಧಾನ್ ಜಾಲೆಂ ನಾ.
"ಕಿತೆಂ....?"
"ತುಂ ಘರಾ ಯೆತಾಯ್? ಹಾಂವ್ ಆಸ್ಪತ್ರೆಕ್ ಯೆತಾಂ!"
"ಆತಾಂ ತುಮಿಂ ಆಸ್ಪತ್ರೆಕ್ ಯೇವ್ನ್ ಕಿತೆಂ ಕರ್ಚೆಂ ಆಸಾ? ಸ ವರಾಂ ಪಯ್ಲೆಂ ಹಾಂವ್ ತುಮ್ಕಾಂ ಆಪವ್ನ್ ವರುಂಕ್ ಯೆತಾಂ!"
ಮಿಶೇಲಾಕ್ ಕಿತೆಂ ಜಾಲಾಂ ತೆಂ ಜಿಮ್ಮಿಕ್ ಸಮ್ಜಾಲೆಂ ನಾ.
ಮಧ್ಯಾನೆಚಾ ಚಾರ್ ವರಾರ್ ಮಿಶೇಲ್ ಆಸ್ಪತ್ರೆಕ್ ಯೇಂವ್ಕ್ ಖುಶಿ ವರ್ತಾ? ತೊ ಚಿಂತಾಲೊ.
"ಆಯ್ಕ್ ಮಿಶೇಲ್! ಮಾಂಯ್ ಖಂಯ್ ಆಸಾ.....?" ಅಚಾನಕ್ ಆಶೆಂ ಮಿಶೇಲಾನ್ ಆಪ್ಣಾಕ್ ಪೋನ್ ಕೆಲ್ಲ್ಯಾಚೊ ಮತ್ಲಾಬ್ ತಾಕಾ ಸಮ್ಜಾಲೊ ನಾ.
"ತುಕಾ ಭಿತರ್ ವಚೊನ್ ಆಬಾಕ್ ಪಳವ್ನ್ ಯೇಂವ್ಕ್ ಜಾಯ್ನಾ.....?" ಮಿಶೇಲಾಚಿ ಮತ್ ಫಕತ್ತ್ ಆಪ್ಲ್ಯಾ ಆಜ್ಯಾಕ್ ಚಿಂತಾಲಿ.
"ತುಕಾ ಹಾವೆಂ ಸಾಂಗ್ಲೆಂ ಮಿಶೇಲ್.... ಆತಾಂ ಹ್ಯಾ ವಗ್ತಾರ್ ಆಬಾಕ್....!"
"ತರ್, ತುಂ ಘರಾ ಯೆತಾಯ್.....? ಹಾಂವ್ ಅಸ್ಪತ್ರೆಕ್ ಯೆತಾಂ!" ಜಿಮ್ಮಿಚ್ಯಾ ಉತ್ರಾಂಕ್ ಮಿಶೇಲಾನ್ ಮಧೆಂಚ್ ತುಟಯ್ಲಿಂ.
"ಪಳೆ ಮಿಶೇಲ್! ತುಂ ಕಾಂಯ್ ಭಿಯೆನಾಕಾ ಹಾಂಗಾ ಹಾಂವ್ ಆಸಾಂ! ತುಜೊ ಆಬ್ ಮ್ಹಜೊ ಬಾಬ್ ಆಸ್ಲ್ಲ್ಯಾ ಪರಿಂಚ್!"
"ಮ್ಹಾಕಾ ಹಾಂಗಾ ರಾವೊಂಕ್ ಜಾಯ್ನಾಂ ಜಿಮ್ಮಿ. ಆಬಾಚೆಂ ಚಿಂತುನ್....."
"ತುಂ ಏಕ್ ವಿಚಿತ್ರ್ ಚೆಡುಂ ಮಾತ್ರ್!" ಮಿಶೇಲಾಚಿಂ ಉತ್ರಾಂ ಆಖೇರ್ ಜಾಂವ್ಚ್ಯಾ ಪಯ್ಲೆಂಚ್ ಜಿಮ್ಮಿ ಉಲಯ್ಲೊ. ತಾಚ್ಯಾ ತಾಳ್ಯಾಂತ್ ಥೊಡಿ ದ್ರಡತಾ ಆಸ್ಲ್ಲಿ. ತೊ ಬಡ್ಬಡ್ಲೊ. "ಏಕ್ ಸಾಂಗ್ಲೆಲೆಂ ಆಯ್ಕೊಂಕ್ ಜಾಯ್ನಾಂ ತುಕಾ....? ಮ್ಹಾಕಾ ಕಳಾನಾ ತುಂ ಕಿತೆಂ ಚಿಂತಾಯ್ ತೆಂ. ಜಿವಿತಾಂತ್ಲೆ ಹರ್ಯೆಕ್ ದೀಸ್ ಎಕಾಚ್ ಮಾಫಾಚೆ ಜಾವ್ನ್ ಉದೆವ್ನ್ ಯೆನಾಂತ್. ಸುಖ್ ದೂಖ್, ಭ್ಯೆಂ ಭಿರಾಂತ್.... ಸಗ್ಳೆಂ ಆಸ್ತಾ. ಇತ್ಲೆಂ ಶಿಕ್ಲೆಲೆಂ ಚೆಡುಂ ತುಂ! ಪ್ಯಾಂಟ್ ಆನಿ ಶರ್ಟ್ ನ್ಹೆಸ್ಲೆಲ್ಯಾ ಫರಾ ಸಗ್ಳೆಂಚ್ ಬದ್ಲಾಲೆಂ ಮ್ಹಣೊನ್ ನ್ಹಯ್. ಎಕೇಕ್ ಪಾವ್ಟಿಂ ಕಾಳ್ಜಾಕ್ಯ್ ಘಟ್ ಕರುಂಕ್ ಪಡ್ತಾ. ಬಾಬಾಚಾ ಹ್ಯಾ ಲ್ಹಾನ್ ವಿಶಯಾಕ್ ಲಾಗೊನ್ ತುಂ ಇತ್ಲೆಂ ಭಿಯೆತಾಯ್ ಜಾಲ್ಯಾರ್ ಫಾಲ್ಯಾಂ......?" ಭಲಾತ್ಕಾರೆನ್ ಮ್ಹಳ್ಳ್ಯಾಪರಿಂ ಜಿಮ್ಮಿನ್ ಆಪ್ಲ್ಯಾ ಜಿಬೆ ವಯ್ಲ್ಯಾ ಉತ್ರಾಂಕ್ ಖಾಡುಂ ಮಾರ್ಲೆಂ. ತೊ ಮುಕಾರ್ ಉಲಯ್ಲೊ ನಾ. ತ್ಯಾ ಕುಶಿನ್ ಮಿಶೇಲಾಚೊ ತಾಳೊ ಗಳ್ಯಾ ಥಾವ್ನ್ ಉಟ್ಲೊ ನಾ.
ದೊನ್ಯ್ ಕುಶಿಂನ್ ಥಾವ್ನ್ ಮೌನ್! ಸಂಪೂರ್ಣ್ ಮೌನ್!
"ಹಲೋ....? ಆಯ್ಕ್! ಹಾಂವ್ ಸ ವರಾಂ ಪಯ್ಲೆಂ ಯೆತಾಂ. ಮಾಂಯ್ಕ್ ಸಾಂಗ್....... ಆನಿ ದೊಗಾಂಯ್ ತಯಾರ್ ರಾವಾತ್!"
ತ್ಯಾ ಕುಶಿನ್ ಥಾವ್ನ್ ಜಿಮ್ಮಿಕ್ ಕಾಂಯ್ಚ್ ಆವಾಜ್ ಆಯ್ಕಾಲೊ ನಾ. ಮಿಶೇಲಾಚಿ ಜಾಪ್ ಪಾಸೊನ್ ನಾ!
"ಆನಿ ತುಂ....? ತುಂ ಥೊಡೆಂ ಧಯ್ರ್ ಘೆಂವ್ಕ್ ಶಿಕ್! ಸದಾಂಯ್ ಚೆಡ್ವಾ ಜಾತಿಚೊ ಸ್ವಭಾವ್ ದಾಖಾಯ್ನಾಕಾ. ಗರ್ಜ್ ಪಡ್ತಾನಾ ಚಲಿಯೆನ್ ಚಲ್ಯಾ ಪ್ರಾಸ್ ಊಂಚ್ ಜಾಂವ್ಕ್ ಪಡ್ತಾ!"
ಇತ್ಲೆಂಚ್! ಜಿಮ್ಮಿಚಾ ಹ್ಯಾ ಉತ್ರಾಂ ಪಾಟ್ಲ್ಯಾನ್ ಮಿಶೇಲಾನ್ ಜಿಮ್ಮಿಕ್ ಫುಡೆಂ ಕಿತೆಂಯ್ ಉಲಂವ್ಕ್ ಆವ್ಕಾಸ್ ದಿಲೊ ನಾ. ತಾಣೆಂ ಪೋನ್ ಭಂಧ್ ಕೆಲೆಂ.
ಪೋನ್ ಬಂಧ್ ಕೆಲ್ಲೆಂ ಮಿಶೇಲ್ ತಶೆಂಚ್ ಸ್ತಬ್ದ್ ಜಾಲೆಂ. ತೆಂ ಆತಾಂ ಕಾಂಯ್ ಉಲಯ್ಲೆಂ ನಾ. ತಶೆಂಚ್ ಮೌನ್ ಪಣಿಂ ತೆಂ ಸವ್ಕಾಸ್ ಆಪ್ಲ್ಯಾ ಆಜಿಯೆಚಾ ಕುಶಿನ್ ಘುಂವ್ಲೆಂ. ಎಸ್ತೆಲಾಕ್ ನಾತಿಚ್ಯಾ ತೊಂಡಾ ವಯ್ಲಿಂಭಾವನಾಂ ವಾಚುಂಕ್ ಸಾದ್ಯ್ ಜಾಲಿಂ ನಾಂತ್. ಆಪ್ಲೆಂ ನಾತ್ ಆಪ್ಣಾ ಮುಕಾರ್ ಆಪ್ಣಾಕ್ಚ್ ಪಳವ್ನ್ ರಾವ್ಲೆಲೆಂ ಕಿತ್ಯಾಕ್ಗೀ ತಿಕಾ ಮಿಸ್ತೆರಾಚೆಂ ಮ್ಹಳ್ಳ್ಯಾಪರಿಂ ಜಾಲೆಂ.
"ಕಿತೆಂಗೋ ಪುತಾ? ಕಿತೆಂ ಸಾಂಗ್ಲೆಂ ಜಿಮ್ಮಿನ್...?" ಎಸ್ತೆಲಾನ್ ದೋನ್ ಮೆಟಾಂ ಆಪ್ಲ್ಯಾ ನಾತಿ ತೆವ್ಶಿಂ ಕಾಡ್ಲಿಂ.
"ಹೊ ಲ್ಹಾನ್ ವಿಶಯ್ ಮಾಂಯ್?" ಎದೊಳ್ ಮೌನ್ ಆಸ್ಲ್ಲ್ಯಾ ಮಿಶೇಲಾನ್ ಆತಾಂ ಆಪ್ಲೆಂ ತೋಂಡ್ ಉಘಡ್ಲೆಂ.
"ಖಂಯ್ಚೊ ವಿಶಯ್?" ಎಸ್ತೆಲಾಕ್ ಕಾಂಯ್ ಸಮ್ಜಾಲೆಂ ನಾ.
ಆಜಿಯೆಚಾ ಸವಾಲಾಕ್ ಕಾಂಯ್ಚ್ ಜವಾಬ್ ದಿಂವ್ಚ್ಯಾ ಪಯ್ಲೆಂಚ್ ಮಿಶೇಲ್ ಹ್ಯಾ ತಾಚ್ಯಾ ಪ್ರಸ್ತುತ್ ಸಂಸಾರಾ ಥಾವ್ನ್ ಪಯ್ಸ್ ಪಾವ್ಲೆಂ.
ತಾಕಾ, ತಾಚ್ಯಾ ಭೊಂವಾರಿ, ಹೆವ್ಶಿಂ ತೆವ್ಶಿಂ, ಮುಕಾರ್ ಪಾಟಿಂ, ಸಗ್ಳ್ಯಾನಿತ್ಲ್ಯಾನ್ ಆಪ್ಣಾಚೆಂಚ್ ರುಪ್ಣೆಂ ದಿಸೊಂಕ್ ಲಾಗ್ಲೆಂ.
ಮಿಶೇಲ್! ಸಗ್ಳ್ಯಾನಿತ್ಲ್ಯಾನ್ ಮಿಶೇಲಾಚೆಂಚ್ ರುಪ್ಣೆಂ!
ಥೊಡಿಂ ಅಸ್ಪಶ್ಟ್ ತರ್ಯ್ ತಿಂ ರುಪ್ಣಿಂ ಮಿಶೇಲಾಚಿಂಚ್!
ತ್ಯಾ ಭಾಯ್ರ್....!
ಪಾತಾಳಾ ಥಾವ್ನ್ ಆಯ್ಕೊನ್ ಯೆಂವ್ಚ್ಯಾ ಪರಿಂ ಭಾರೀಕ್ ರಡ್ಣೆಂ! ಹಳ್ತಾಚಿ ಪಿಂರ್ಗೊಣ್....!
ತಿತ್ಲ್ಯಾರ್!
"ದಡ್... ದಡ್" ಕಿತೆಂ ತರ್ಯ್ ಆದಾಳ್ಲ್ಲೊ ಆವಾಜ್! ತಾಚ್ಯೆ ಪಾಟ್ಲ್ಯಾನ್ ಕಿತೆಂ ತರ್ಯ್ ಉಭೊನ್ ಗೆಲ್ಲ್ಯಾ ಪರಿಂ... ಉಪ್ರಾಂತ್ ಮೌನ್. ’ಫಟ್...ಫಟ್’ ಆವಾಜಾನ್ ಪೆಟ್ಚೊ ಉಜೊ ಸವ್ಕಾಸ್ ಪಾಲ್ವೊನ್ ಯೆಂವ್ಚಾಪರಿಂ..... ಉಪ್ರಾಂತ್ ಸಗ್ಳೆಂ ಶಾಂತ್!
"ಸ್ವೀಟ್ ಹಾರ್ಟ್!" ಆಚಾನಕ್ ಘಡ್ಗಡ್ಯಾ ಪರಿಂ ಕಾನಾಂ ಪರ್ದ್ಯಾರ್ ಏಕ್ ಆವಾಜ್ ಘಾಜೊನ್ ಧಾಂವ್ಲೆಲ್ಯಾ ಪರಿಂ.
ಗೂಂಡಾಯೆ ಥಾವ್ನ್ ಆಪ್ಣಾಕ್ ಕೋಣ್ ತರ್ಯ್ ಆಪಯ್ತಾ! ಕೋಣ್ ಆಪಯ್ತಾ?
"ಮಿಶೇ.....ಲ್...?" ಭಾರೀಕ್ ತಾಳೊ. ತಾಚ್ಯೆ ಪಾಟ್ಲ್ಯಾನ್ ಹಳ್ತಾಚೆಂ ರಡ್ಣೆಂ.... ವಿಳಾಪ್.... ಎಕ್ಸುರ್ಪಣ್.... ನಾಂ ಕೊಣ್ಚ್ ನಾ! ಸಗ್ಳ್ಯಾ ಸಂಸಾರಾರ್ ಕೋಣ್ಚ್ ನಾ! ಫಕತ್ತ್ ಮಿಶೇಲ್! ಫಕತ್ತ್ ಮಿಶೇಲ್!
ತಿತ್ಲೆಂಚ್!
ಎಸ್ತೆಲಾನ್ ಪಳವ್ನ್ ಆಸ್ಲ್ಲ್ಯಾಪರಿಂಚ್ ಮಿಶೇಲ್ ತಶೆಂಚ್ ಆಪ್ಲ್ಯಾ ಹಾತಾಂತ್ಲ್ಯಾ ಮೊಬಾಯ್ಲ್ ಫೋನಾಕ್ ಆಪ್ಲ್ಯಾ ಹಾತಾಂತ್ ದಾಂಬುನ್ ದರುನ್ ಸವ್ಕಾಸ್ ಆಪ್ಲ್ಯಾ ಖಾಟಿಯೆ ತೆವ್ಶಿಂ ಆಯಿಲ್ಲೆಂ ತೆಂ ಕಾಂಯ್ಚ್ ಉಲಯ್ನಾಸ್ತಾನಾ ಖಾಟಿಯೆರ್ ಆಡ್ ಪಡ್ಲೆಂ. ಆಪ್ಲೆ ದೊನ್ಯ್ ಪಾಂಯ್ ದೊಡುನ್ ತ್ಯಾ ಪಾಂಯಾಂ ಮಧೆಂ ಆಪ್ಲೆ ಹಾತ್ ರಿಗವ್ನ್ ತೆಂ ಮುರ್ಗೊಟೊನ್ ನಿದ್ಲೆಂ. ತಾಕಾ ಪಳೆತಾನಾ ಹಿಂವಾಕ್ ಆಂಕುಡ್ಚೆಂ ಲ್ಹಾನ್ ನೆಣ್ತೆಂ ಭುರ್ಗೆಂ ಆಂಗಾರ್ ಕಾಂಯ್ಚ್ ಪಾಂಗ್ರುಂಕ್ ನಾಸ್ತಾನಾ ಮುರ್ಗೊಟೊನ್ ನಿದ್ಲೆಲ್ಯಾ ಪರಿಂ ಎಸ್ತೆಲಾಕ್ ದಿಸ್ಲೆಂ.
ಆಪ್ಲ್ಯಾ ದೊಳ್ಯಾಂ ಮುಕಾರ್ಚ್ ಜಾಂವ್ಚಿ ಮಿಶೆಲಾಚಿ ಬದ್ಲಾವಣ್ ಪಳವ್ನ್, ಏಕ್ ಪಾವ್ಟಿಂಚ್ಯಾಕ್ ಎಸ್ತೆಲ್ ಭಿಯೆಲಿ. ನಾತಿಕ್ ಜಾಲೆಂ ತರ್ಯ್ ಕಿತೆಂ? ಚಿಂತ್ಚ್ಯಾ ತಿಕಾ ಕಾಂಯ್ ಸಮ್ಜಾಲೆಂ ನಾ. ತಶೆಂಚ್ ಖಾಟಿಯೆರ್ ದೊಳೆ ಉಗ್ತೆ ಸೊಡುನ್ ಮುರ್ಗೊಟುನ್ ನಿದ್ಲೆಲ್ಯಾ ಮಿಶೇಲಾ ಲಾಗಿಂ ತಿ ಆಯ್ಲಿ.
"ಮಿಶೇಲ್? ಪುತಾ ಕಿತೆಂ ಜಾಲೆಂ?"ತಿ ಮಿಶೇಲಾಚಾ ಪಾಂಯಾಂಲಾಗಿಂ ಯೇವ್ನ್ ಬಸ್ಲಿ. "ಜಿಮ್ಮಿನ್ ಕಿತೆಂ ಸಾಂಗ್ಲೆಂ?" ತಿಕಾ ಮಿಶೇಲಾಚೆಂ ವರ್ತನ್ ಮಿಸ್ತೆರ್ ಮ್ಹಳ್ಳ್ಯಾಪರಿಂ ಜಾಲೆಂ.
ಎಸ್ತೆಲಾಚಿಂ ಉತ್ರಾಂ ಮಿಶೇಲಾಚಾ ಕಾನಾಂತ್ ಪಡ್ತಾಲಿಂ ವಾ ನಾ..., ಪಡ್ತಾಲಿಂ ಜಾಲ್ಯಾರ್ಯ್ ತಿಂ ಮಿಶೇಲಾ ವಯ್ರ್ ಕಿತ್ಲೊ ಪ್ರಭಾವ್ ಘಾಲ್ತಾಲಿಂ ತೆಂ ಮಿಶೇಲಾಚಾ ಸಾಂಬಾಳ್ಳೆಲ್ಯಾ ಮೌನತಾ ವರ್ವಿಂ ಎಸ್ತೆಲಾಕ್ ಸಮ್ಜೊಂಕ್ ಸಾದ್ಯ್ಚ್ ನಾತ್ಲ್ಲೆಂ.
ತಿ ಸಮ್ಜಾತೆಲಿ ಜಾಲ್ಯಾರ್ಯ್ ಕಶಿ?
ಹೆಂ ಆಂತರಿಕ್ ಝುಜ್! ಹೆಂ ಝುಜ್ ಹ್ಯಾ ವೆಳಾರ್ ಮಿಶೇಲ್ ಝುಜ್ತಾಲೆಂ!
"ಮಿಶೇಲ್....!? ಮ್ಹಜ್ಯೆಲಾಗಿಂ ಸಾಂಗಾನಾಂಯ್ ಪುತಾ?" ಎಸ್ತೆಲಾನ್ ನಾತಿಚಾ ತಕ್ಲೆರ್ ಹಾತ್ ಚರಯ್ಲೊ. ನಾತಿಕ್ ಪಳೆತಾನಾ, ತಾಣೆ ಮುರ್ಗೊಟೊನ್ ನಿದ್ಲೆಲಿ ರೀತ್ ಪಳೆತಾನಾ ತಿಕಾ ಆಪ್ಲ್ಯಾ ನಾತಿಚಿ ಭಿರ್ಮತ್ ದಿಸ್ಲಿ. ಆತಾಂ ತಿಣೆಂ ಮಿಶೇಲಾಚಾ ತಕ್ಲೆ ವಯ್ಲೊ ಹಾತ್ ಕಾಡುನ್,
"ತುಕಾ ಏಕ್ ಸತ್ ವಿಶಯ್ ಸಾಂಗೊಂ ಪುತಾ....?" ತಿಣೆಂ ಆತಾಂ ಮಿಶೇಲಾಕ್ ಸಮಾಧಾನ್ ದೀಂವ್ಕ್ ಜಾಯ್ ಆಸ್ಲ್ಲೆಂ.
"ಬೋವ್ಶಾ ತುಜ್ಯಾ ಬಾಪಾಯ್ಕ್ ಆಮಿ ಇತ್ಲೊ ಮೋಗ್ ದಿಲ್ಲೊ ನಾ ಜಿತ್ಲೊ ಆಮಿ ತುಕಾ ದಿಲಾ. ಆಮ್ಕಾಂ ಜಲ್ಮಾಲ್ಲ್ಯಾ ಧುವಾಂಕ್ ಆಮಿಂ ಇತ್ಲೊ ಮೋಗ್ ದಿಲ್ಲೊ ನಾ ಜಿತ್ಲೊ ಮೋಗ್ ತುಕಾ ಆಮಿಂ ದಿಲಾ. ಹಾಂತುಂ ಆಮ್ಚೊ ಸ್ವಾರ್ಥ್ಯ್ ಆಸಾ ಜಾವ್ಯೆತ್. ಆಮ್ಚಾ ಮ್ಹಾತಾರ್ಪಣಾರ್ ಸಗ್ಳಿಂ ಆಮ್ಕಾಂ ಸಾಂಡುನ್ ಗೆಲ್ಲ್ಯಾ ವೆಳಾರ್ ಆಮ್ಚೊ ಭರ್ವಸೊ ಜಾವ್ನ್ ಆಯಿಲ್ಲೆಂಯ್ ಮ್ಹಳ್ಯಾರ್ ತುಂ. ತುಕಾ ಆಮಿಂ ಹೊಗ್ಡಾಂವ್ಕ್ ತಯಾರ್ ನಾತ್ಲ್ಲ್ಯಾಂವ್. ಬೋವ್ಶ್ಯಾ ತುಂ ಸಂಭಂಧಾಂತ್ ಮಾತ್ರ್ ಆಮ್ಚೆಂ ನಾತ್! ಪುಣ್.....! ಮುಕಾರ್ ತಿಕಾ ಉಲಂವ್ಕ್ ಜಾಲೆಂ ನಾ.
ನಿಜಾಯ್ಕ್ಯ್ ಜೆರೊಮಾಕ್ ಆನಿ ಎಸ್ತೆಲಾಕ್ ತಾಂಚಾ ತಾಣಿಂ ಜಲ್ಮ್ ದಿಲ್ಲ್ಯಾ ಭುರ್ಗ್ಯಾಂ ವಯ್ರ್ ಭರ್ವಸೊ ನಾತ್ಲ್ಲೊ. ಪುನ್ ಮಿಶೇಲಾ ವಯ್ರ್ ತಾಂಕಾ ತೊ ಆಸ್ಲ್ಲೊ.
"ತುಜ್ಯಾ ಆಬಾಚಿ ಹಿಚ್ಚ್ ಖುಶಿ ಜಾವ್ನ್ ಆಸ್ಲ್ಲಿ ಪುತಾ. ತುಕಾ ತಾಚೆಂ ನಾತ್ ಯಾ ತುಕಾ ತಾಚೆಂ ವಾರಿಸ್ದಾರ್ ಕರ್ಚಾ ಪಯ್ಲೆಂ ತುಕಾ ಏಕ್ ಮನಿಸ್ ಕರ್ಚೆಂ! ಮನಿಸ್ ಮನಿಸ್ ಜಾಯ್ನಾ ಜಾಲ್ಯಾರ್ ತೊ ಮನ್ಜಾತಿಚ್ಯಾಕ್ಯ್ ನೀಚ್ಜಾತಾ ಪುತಾ! ಹೆಂ ಆಮಿಂ ಆಮ್ಚಾ ದೊಳ್ಯಾಂನಿ ಪಳೆಲಾಂ. ಮನಿಸ್ ಆಪುಣ್ ಮನಿಸ್ ಮ್ಹಣೊನ್ ಆಪ್ಲಿ ಬಡಾಯ್ ಮಾತ್ರ್ ಉಲಯ್ತಾ! ತುಂ ಆಯ್ಕಾತಾಯ್.....?" ನಾತಿಕ್ಚ್ ಪಳವ್ನ್ ನಾತಿಚ್ಯಾ ಕುಡಿ ವಯ್ಲ್ಯಾ ವಸ್ತುರಾಕ್ ಎಸ್ತೆಲ್ ಸಾರ್ಕೆಂ ಕರುಂಕ್ ಲಾಗ್ಲಿ.
"ಮನ್ಜಾತ್ ಜಾಲ್ಯಾರ್ಯ್ ಮನಿಸ್ ಜಾಂವ್ಕ್ ಚಡ್ ಸುಲಭ್ ಪುಣ್ ಮನ್ಶಾಕ್ ಮನಿಸ್ ಜಾಂವ್ಕ್ ಭಾರಿಚ್ ಕಶ್ಟ್!" ಎಸ್ತೆಲಾನ್ ಸಾಂಗ್ತಾನಾ ಸವ್ಕಾಸ್ ಆಪ್ಲ್ಯಾ ದೊಡ್ಲೆಲ್ಯಾ ಪಾಂಯಾಂ ಮಧೆಂ ಆಡ್ಚಾಲ್ಲ್ಯಾ ಹಾತಾಂಕ್ ಸುಟಯಿಲ್ಲ್ಯಾ ಮಿಶೇಲಾನ್ ಆಜಿಯೆಚಾ ಹಾತಾಂಕ್ ಆಪ್ಲ್ಯಾ ಹಾತಿಂತ್ ಘೆತ್ಲೆಂ.
"ಪಳೆ ಪುತಾ!" ಉಲಯ್ಲಿ ತಿ. "ಆಮ್ಚಾ ತರ್ನಾಟ್ಪಣಾರ್ ಆಮಿಂಯ್ ಜಾಯ್ತೆಂ ಸೊಸ್ಲಾಂ. ಪುಣ್ ಆತಾಂ ಆಮ್ಕಾಂ ಜಾಯ್ನಾಂ. ಆತಾಂ ಆಮಿಂ ಆಶೆಂವ್ಚೊ ತುಮ್ಚೊ ಫುಡಾರ್! ತುಮ್ಚೆಂ ಬರೆಂಪಣ್! ಹಾಂತುಂಚ್ ಆಮ್ಚಿ ದಾಧೊಸ್ಕಾಯ್! ತುಕಾ ಕಿತ್ಲೊ ತುಜ್ಯಾ ಆಬಾಚೊ ಹುಸ್ಕೊ ಆಸಾ ತಾಚ್ಯಾಕ್ಯ್ ಚಡ್ ಮಾಫಾನ್ ತಾಚೊ ಹುಸ್ಕೊ ಮ್ಹಾಕಾ ಆಸಾ. ತೊ ತುಕಾ ಆಬ್ ಜಾವ್ಯೆತ್. ಪುಣ್ ಮ್ಹಾಕಾ! ಮ್ಹಾಕಾ ತೊ ಮ್ಹಜೊ ಹಾವೆಂ ಹಾತ್ ಧರ್ಲಲೊ ಘೊವ್! ತೊಚ್ ನಾ ಜಾಲ್ಯಾರ್ ಮ್ಹಜೆಂ ಕಿತೆಂ ಆಸಾ? ಜಾಲ್ಯಾರ್ಯ್ ತುಜ್ಯೆ ಖಾತಿರ್ ಹಾವೆಂ ಮ್ಹಜೆಂ ಕಾಳಿಜ್ ಘಟ್ ಕರ್ಚೆಂ...!" ಥೊಡೊ ವೇಳ್ ತಿ ಉಲಯ್ಲಿ ನಾ. "ಮ್ಹಜಿ ಆಶಾ ಎಕ್ಚ್ ಪುತಾ!" ಪರ್ತ್ಯಾಕ್ ತಿಚ್ಚ್ ಉಲಯ್ಲಿ.
"ಜಶೆಂ ತುಕಾ ಆಮಿಂ ಆಮ್ಚಾ ಖುದ್ದ್ ಜಲ್ಮ್ ದಿಲ್ಲ್ಯಾ ಭುರ್ಗ್ಯಾ ಪರಿಂ ಪಳಯ್ಲಾಂ ತಶೆಂ ತುಜೆಂ ಏಕ್ ಬರೆಂ ವಾಯ್ಟ್ ಜಾತಾ ವರೇಗ್ ದೆವಾನ್ ತಾಕಾ ದವರ್ಲ್ಯಾರ್ ಪುರೊ. ಹೆಂಚ್ ಮ್ಹಾಕಾ ಧಯ್ರ್!"
ಆಜಿಯೆಚ್ಯಾ ಉತ್ರಾಂನಿ ಸವ್ಕಾಸ್ ಮಿಶೇಲಾಚಾ ಆಂತರಿಕ್ ಝುಜಾಚೆರ್ ಪ್ರಭಾವ್ ಘಾಲ್ಲೊ. ತಾಚ್ಯಾ ಮತಿಂತ್ ಆನಿ ಕಾಳ್ಜಾಂತ್ ಉಟ್ಲ್ಲಿಂ ತಿಂ ಭಗ್ಣಾಂ ಸವ್ಕಾಸ್ ಸಕಾಳಿಂಚಾ ಧೊವಾ ಪರಿಂ ನಿತ್ಳೊಂಕ್ ಲಾಗ್ಲ್ಲಿಂ. ಆತಾಂ ತೆಂ ಫಕತ್ತ್ ತಾಚ್ಯಾ ಆಜಿಯೆಕ್ ಆಯ್ಕೊಂಕ್ ಲಾಗ್ಲ್ಲೆಂ. ಆಜಿಯೆಕ್ ಆಯ್ಕಾತಾಂ ಆಯ್ಕಾತಾಂ ಕಶೆಂ ತಾಚ್ಯಾ ದೊಳ್ಯಾಂ ಥಾವ್ನ್ ದುಖಾಂ ದೆಂವೊಂಕ್ ಲಾಗ್ಲಿಂ ತೆಂ ತೆಂಚ್ ನೆಣಾಂ!
ಆಜಿಯೆಚಾ ಹಾತಾಂಕ್ ಆಪ್ಲ್ಯಾ ಹಾತಾಂನಿ ಧರುನ್ ತಾಚ್ಯೆ ವಯ್ರ್ ಆಪ್ಲಿ ತಕ್ಲಿ ದವರ್ಲೆಲ್ಯಾ ಮಿಶೇಲಾಚಾ ದೊಳ್ಯಾಂ ಥಾವ್ನ್ ದೆಂವ್ಚಿಂ ದುಖಾಂ ಸವ್ಕಾಸ್ ಎಸ್ತೆಲಾಚಾ ಹಾತಾಕ್ ಭಿಜಂವ್ಕ್ ಲಾಗ್ಲಿಂ.
"ಪುತಾ...? ತುಂ ಆತಾಂ ನಿದೆ! ಆನಿಕ್ಯ್ ಲಾಗಿಂ ಲಾಗಿಂ ದೋನ್ ವೊರಾಂ ಆಸಾತ್. ತಾಚ್ಯಾ ಪಯ್ಲೆಂ ಆಮಿ ಕಿತೆಂ ಕೆಲ್ಯಾರ್ಯ್ ಕಾಂಯ್ ಫಾಯ್ದೊ ನಾ. ಆಬಾಚೊ ಇತ್ಲೊ ಮೋಗ್ ಕರ್ಚೆಂ, ತುಂ ತಾಚೆಂ ನಾತ್ ಆಸಾಯ್ ಮ್ಹಣ್ತಾನಾ ತುಜ್ಯಾ ಆಬಾಕ್ ಕಾಂಯ್ ಜಾಂವ್ಕ್ ಸಕ್ತಾ?"
ಬೋವ್ಶಾ ಎಸ್ತೆಲಾಚಾ ಉತ್ರಾಂನಿ ಮಿಶೇಲಾಚಾ ಮತಿಕ್ ಸಮಾಧಾನ್ ಜಾಲ್ಲೆಂ ಜಾಯ್ಜಯ್. ತಾಚ್ಯಾ ಮತಿಂತ್ ಉಟೊನ್ ರಾವ್ಲೆಲೆಂ ಝುಜ್ ಥಾಂಬ್ಲ್ಲೆಂ. ಸವ್ಕಾಸ್ ತಶೆಂಚ್ ಆಪ್ಲ್ಯಾ ಆಜಿಯೆಚಾ ಹಾತಾಂಕ್ ಆಪ್ಲ್ಯಾ ತಕ್ಲೆ ಪಂದಾ ದವರುನ್ ಮಿಶೇಲಾನ್ ಆಪ್ಲೆ ದೊಳೆ ದಾಂಪ್ಲೆ.
ಎಸ್ತೆಲಾಕ್ ಮಾತ್ರ್ ತಿಚ್ಯಾ ನಾತಿಚಾ ಬದ್ಲಾಲ್ಲ್ಯಾ ವರ್ತನಾಚೆಂ ಕಾರಾಣ್ ಸಮ್ಜಾಲ್ಲೆಂಚ್ ನಾ. ಪುಣ್ ತಿ ಇತ್ಲೆಂ ಮಾತ್ರ್ ಜಾಣಾಂ ಆಸ್ಲ್ಲಿಂ ಕೀ ತಿಚೊ ಘೊವ್ ಆಪಾಯಾ ಥಾವ್ನ್ ಭಾಯ್ರ್ ಆಸಾ. ತಾಚ್ಯೆ ವಿಶಿಂ ತಿಕಾ ಕಾಂಯ್ ಖಂತ್ ಕರ್ಚಿ ಗರ್ಜ್ ನಾ. ಆಶೆಂ ನ್ಹಯ್ ಜಾಲ್ಲೆಂ ಜಾಲ್ಯಾರ್ ಜಿಮ್ಮಿ ಖಂಡಿತ್ ಎದೊಳ್ ಆಪ್ಣಾಕ್ ಖಬಾರ್ ದಿತೊ ಮ್ಹಳ್ಳೊ ಭರ್ವಸೊ ತಿಕಾ ಆಸ್ಲ್ಲೊ.
ಎಸ್ತೆಲ್ ತಶಿಚ್ ನಾತಿಚಾ ಬಗ್ಲೆಕ್, ಸವ್ಕಾಸ್ ನಿದೆಕ್ ವೆಂಗುಂಕ್ ವೆಚ್ಯಾ ಆಪ್ಲ್ಯಾ ನಾತಿಕ್ ಪಳವ್ನ್ ಬಸ್ಲಿ.
*************
ಎಸ್ತೆಲಾಚಾ ಹಾತಾಕ್ ಆಪ್ಲ್ಯಾ ಪೊಲ್ಯಾಕ್ ದಾಂಬುನ್ ಧರುನ್ ಖಾಟಿಯೆರ್ ಆಡ್ ಪಡ್ಲೆಲ್ಯಾ ಮಿಶೇಲಾಕ್ ತಾಚ್ಯಾ ಆಜಿಯೆಚ್ಯಾ ಭುಜಾವಣೆಚ್ಯಾ, ಅರ್ಥಾಭರೀತ್ ಸಮ್ಜಾಣೆಚಾ ಉತ್ರಾಂನಿ ಮತಿಕ್ ಸಮಾಧಾನ್ ಜಾಂವ್ಕ್ ಲಾಗ್ತಾನಾ ಥಕ್ಲ್ಲಿ ತಾಚಿ ಮತ್ ಥಂಯ್ಚ್ ನಿದೆಕ್ ವೆಂಗ್ಲ್ಲಿ.
ಸುಶೆಗಾತ್ ನೀದ್!
ಹ್ಯಾ ಸುಶೆಗಾಂತ್, ಮಿಶೇಲ್ ಆಸ್ಪತ್ರೆಂತ್ ಆಸ್ಲ್ಲ್ಯಾ ಆಪ್ಲ್ಯಾ ಆಜ್ಯಾಕ್ಯ್ ವಿಸ್ರಾಲ್ಲೆಂ. ಪುಣ್, ವೊರಾಂ ಫಾಂತ್ಯಾಚಿಂ ಸಾಡೆ ಪಾಂಚ್ ಜಾತಾನಾ ವೆಗಿಂಚ್ ನಿದೆಂತ್ಲಿ ಉಟ್ಲ್ಲಿ ಎಸ್ತೆಲ್ ಅಪ್ಲೆಂ ನಾತ್ ಅಜೂನ್ ನಿದೆಚಾ ಸಂಸಾರಾಂತ್ ಆಸಾ ತೆಂ ಪಳವ್ನ್ ತಾಕಾ ಉಟಂವ್ಕ್ ವೆಚೆಂ ಪ್ರಯತ್ನ್ ಕರಿನಾಸ್ತಾನಾ ಆಸ್ಪತ್ರೆಕ್ ವಚೊಂಕ್ ತಯಾರ್ ಜಾಲಿ. ದೋನ್ ವೊರಾಂ ಪಯ್ಲೆಂ ಅಚಾನಕ್ ನಿದೆಂತ್ಲೆಂ ಉಟ್ಲ್ಲ್ಯಾಮಿಶೇಲಾಚೆ, ಮತಿಚೆ ತಳ್ಮಳೆ, ಕಾಳ್ಜಾಚೆ ಉಮಾಳೆ, ತೆ ಕೊಣಾಯ್ಕ್ಯ್ ಸಾಂಗೊಂಕ್ ಸಕಾನಾ ತಸಲೆ, ಕಸಲ್ಯಾಗೀ ಎಕಾ ಬಾಂದ್ಪಾಸಾಂತ್ಲೆಂ ತಾಚೆ ಆಟೆವಿಟೆ ಪಳೆಲ್ಲ್ಯಾ ಎಸ್ತೆಲಾಕ್, ಆತಾಂ ಹ್ಯಾ ಸಾಕಾಳಿಂಚಾ ವಗ್ತಾರ್ ಸುಶೆಗಾತ್ ನಿದ್ಲೆಲ್ಯಾ ನಾತಿಕ್ ಪಳವ್ನ್ ತಿಚ್ಯಾ ಮತಿಕ್ ಸಮಾಧಾನ್ ಜಾಲೆಂ. ತಿಕಾ ಆಪ್ಲ್ಯಾ ನಾತಿಕ್ ನಿದೆಂತ್ಲೆಂ ಉಟಂವ್ಕ್ ಮನ್ ಆಯ್ಲೆಂ ನಾ. ತಿ ಎಕ್ಲಿಚ್ ಆಸ್ಪತ್ರೆಕ್ ವಚೊಂಕ್ ತಯಾರ್ ಜಾಲಿ.
ಜಿಮ್ಮಿನ್ ಎಸ್ತೆಲಾಕ್ ಪಯ್ಲೆಂಚ್ ಸಾಂಗ್ಲೆಲ್ಯಾಪರಿಂ ಸ ವೊರಾಂಕ್ ಧಾ ಮಿನಿಟಾಂ ಆಸ್ತಾನಾ ತೊ ಘರಾ ಯೇವ್ನ್ ಪಾವ್ಲೊ. ಆಪ್ಣಾಚೆಂ ವಸ್ತುರ್ ಬದ್ಲುನ್ ವೆವೆಗ್ಗಿಂ ತೊಂಡಾಕ್ ಉದಾಕ್ ಮಾರ್ಲ್ಲೊ ತೊ ಎಸ್ತೆಲಾನ್ ಹಾಡುನ್ ದಿಲ್ಲಿ ಕಾಫಿ ಗಳ್ಯಾಕ್ ದೆಂವೊಂಕ್ ಲಾಗ್ಲೊ.
ಕಾಫಿ ಪಿಯೆಂವ್ಚ್ಯಾ ಜಿಮ್ಮಿಕ್ ಹ್ಯಾ ಮಧೆಂ ಖಂಯ್ಚರ್ಯ್ ಮಿಶೇಲಾಚಿ ಝಳಕ್ ಯೇನಾಸ್ತಾನಾ ವೆತಾನಾ ತಾಚ್ಯಾ ಮತಿಂತ್ ಪಯ್ಲೆಂಚ್ ಆಸ್ಲ್ಲೊ ದುಬಾವ್ ಆತಾಂ ವಾಡೊನ್ ರಾವ್ಲೊ.
"ಕಾಂಯ್.... ಹಾಂವ್ ರಾತಿಕ್ ಚಡ್ಚ್ ಉಲಯ್ಲೊಂ?" ಆಪ್ಣಾ ಇತ್ಲ್ಯಾಕ್ ತಾಣೆಂ ಸವಾಲ್ ಕೆಲೆಂ.
"ಮ್ಹಾಕಾ ತಶೆಂ ಉಲಂವ್ಕ್ ಕಾಂಯ್ ಹಕ್ಕ್ಚ್ ನಾತ್ಲ್ಲೆಂ. ಹಾಂವ್ ತರ್ಯ್ ಕೋಣ್? ಫಕತ್ತ್ ಥೊಡ್ಯಾ ಪಯ್ಶ್ಯಾಂ ಖಾತಿರ್ ಮಿಶೇಲಾಚಾ ಘರಾ ಘೊಳ್ಚೊ ನವ್ಕರ್! ಆಪ್ಣಾಕ್ ಪೊಸ್ಚಾ ಹ್ಯಾ ಮನ್ಶ್ಯಾಂಚೆಂ ಆಯ್ಕೊನ್ ಚಲ್ಚೆಂ ಮ್ಹಜೆಂ ಧರ್ಮ್! ತರ್....? ಇತ್ಲಿ ವ್ಹಡ್ಲಿ ಚೂಕ್ ಹಾವೆಂ ಕಶಿ ಕೆಲಿ? ಮ್ಹಜ್ಯಾ ಚೂಕಿಚೆಂ ಮಾಫ್ ಮಾಗ್ಚೆಂಚ್ ಹಾವೆಂ ಕೆಲ್ಲ್ಯಾ ಆಫ್ರಾದಾಕ್ ಶಿಕ್ಷಾ!" ಕಾಫಿ ಪಿಯೆತಾನಾ ಚಿಂತುಂಕ್ ಪಡ್ಲ್ಲೊ ಜಿಮ್ಮಿ ಕಾಫಿ ಪಿಯೆಂವ್ಕ್ ವಿಸ್ರಾಲೊ.
ತಿತ್ಲ್ಯಾರ್!
"ಜಾಲೆಂರೆ ಜಿಮ್ಮಿ....? ತೆಂ ಕಪ್ಪ್ ಆಸೊಂದಿ. ದವರ್ ಥಂಯ್....! ಯಾ ಚಲ್ಯಾಂ!" ಭಾಯ್ರ್ ಆಯಿಲ್ಲ್ಯಾ ಎಸ್ತೆಲಾನ್ ಆಪ್ಲ್ಯಾ ಹಾತಾಂತ್ಲಿ ಪರ್ಸ್ ಥಂಯ್ಚ್ ಜಿಮ್ಮಿಚಾ ಮುಕ್ಲ್ಯಾ ಬೀಟಿಚಾ ರುಕಾಟಾಚಾ ಬಾಂಕಾ ವಯ್ರ್ ದವರ್ಲಿ. ಥಂಯ್ ಥಾವ್ನ್ಚ್ ತಿಣೆಂ ಮುಕ್ಲ್ಯಾ ವೊಣೊದಿ ವಯ್ಲ್ಯಾ ವ್ಹಡ್ಲ್ಯಾ ಗಡಿಯಾಳಾ ವಯ್ರ್ ಏಕ್ ನದರ್ ಮಾರ್ಲಿ. ವೊರಾಂ ಸ ಜಾತಾಲಿಂ ಮಾತ್ರ್. ತಿ ಆತಾಂ ಆಪ್ಲ್ಯಾ ಪಾಂಯಾಂಕ್ ವ್ಹಾಣೊ ಶಿರ್ಕಾಂವ್ಚ್ಯಾ ಖಾತಿರ್ ಸೊಪ್ಯಾಚಾ ಕೊನ್ಶ್ಯಾ ತೆವ್ಶಿಂ ಚಮ್ಕಾಲಿ.
"ಮಾಂಯ್....?"
"ಹಾಂ....!"
"ಮಿಶೇಲ್ ಯೇನಾ?" ಎಕ್ಲಿಚ್ ಭಾಯ್ರ್ ಸರ್ಲೆಲ್ಯಾ ಮಾಂಯ್ಕ್ ಪಳವ್ನ್ ಜಿಮ್ಮಿಕ್ ಕಿತ್ಯಾಕ್ಗೀ ಮತಿಂತ್ ಕಾಂತಂವ್ಕ್ ಲಾಗ್ಲೆಂ.
"ತೆಂ ನಿದ್ಲಾಂರೆ! ಆತ್ತಾಂ ಭಾಯ್ರ್ ಯೆತಾನಾ ಪಾಸೊನ್ ಪಳೆಲೆಂ ಹಾವೆಂ. ತೆಂ ನಿದ್ಲಾಂ! ಆಸೊಂದಿ ಸೊಡ್!" ಎಸ್ತೆಲಾನ್ ಬಾಗ್ವೊನ್ ತ್ಯಾ ವ್ಹಾಣಾಂಚಾ ರಾಶಿ ಮಧ್ಲ್ಯಾ ಆಪ್ಲ್ಯಾ ಕಾಳ್ಶ್ಯಾ ವ್ಹಾಣಾಂಕ್ ಹಾತಿನ್ ಹೆವ್ಶಿಂ ಕಾಡುನ್ ತಾಂಕಾ ಆಪ್ಲ್ಯಾ ಪಾಂಯಾಂ ಮುಳಾಂತ್ ದವರ್ಲೆಂ.
"ತಾಕಾ ಉಟಯ್ ಮಾಂಯ್!"ಜಿಮ್ಮಿನ್ ಆಪ್ಲ್ಯಾ ವಚಾಚೆರ್ ನದರ್ ಮಾರ್ಲಿ.
"ಆನಿಕ್ಯ್ ವೇಳ್ ಆಸಾ. ತೆಂ ಯೇಂವ್ದಿ. ಬಾಬಾಕ್ ಪಳೆನಾಸ್ತಾನಾ ಸಗ್ಳಿ ರಾತ್ ತೆಂ ನಿದೊಂಕ್ ನಾ ಆಸ್ತೆಲೆಂ! ತಾಕಾ ಆಮಿ, ಆಶೆಂ ಹಾಂಗಾ ಸೊಡುನ್ ಗೆಲ್ಯಾರ್...?" ಎಸ್ತೆಲಾ ಲಾಗಿಂ ಉಲಂವ್ಚ್ಯಾ ಜಿಮ್ಮಿಚಿ ನದರ್ ಮುಕ್ಲ್ಯಾ ದಾರಾ ಮುಕಾಂತ್ರ್ ಭಿತರ್ ಧಾಂವ್ಲಿ. ತಾಚ್ಯಾ ನದ್ರೆಂತ್ ಆಯ್ಚ್ಯಾ ಮೊದ್ಯಾನೆರ್ ತಾಣೆಂ ಮಿಶೇಲಾಲಾಗಿಂ ಚಲ್ಲ್ಲ್ಯಾ ಭರ್ತಾವಾ ವಯ್ರ್ ಭಿರ್ಮತ್ ಆಸ್ಲ್ಲಿ.
"ತಾಕಾ ಉಪ್ರಾಂತ್ ಆಪವ್ನ್ ವರಿಯಾಂ!" ಜಿಮ್ಮಿಚಿಂ ಉತ್ರಾಂ ಎಸ್ತೆಲಾನ್ ಮಧೆಂಚ್ ತುಟಯ್ಲಿಂ.
"ವೇಳ್ ಖಂಯ್ ಆಸಾ ಮಾಂಯ್? ಸ ವರಾಂ ಥಾವ್ನ್ ಸಾತ್ ವರಾಂ ಪಾಸೊನ್ ಮಾತ್ರ್ ಐ.ಸಿ.ಯು. ಚ್ಯಾ ಭಿತರ್ ಪ್ರವೇಶ್ ದಿತಾತ್. ಉಪ್ರಾಂತ್ ಜಾಲ್ಯಾರ್ ಮಾಗಿರ್ ಸಾಂಜೆರ್ ಜಾಲೆಂ! ತಿತ್ಲ್ಯಾ ಪಾಸೊನ್ ಮಿಶೇಲ್ ರಾವ್ತಾ?" ಮಿಶೇಲಾ ವಿಶಿಂ ತಾಚ್ಯಾ ಸ್ವಭಾವಾ ವಿಶಿಂ ಖರೆಂಚ್ ಜಿಮ್ಮಿ ಸಗ್ಳೆಂ ಜಾಣಾಂ ಆಸ್ಲ್ಲೊ.
"ತುಕಾ ಸಮ್ಜಾನಾರೆ ತೆಂ!" ಆತಾಂ ಥೊಡ್ಯಾ ದರ್ವಾಡ್ಯಾನ್ ಮ್ಹಳ್ಳ್ಯಾಪರಿಂ ಪಾಂಯಾಂಚಾ ಬೊಟಾಂಕ್ ವ್ಹಾಣೊ ವೊಡೀತ್ತ್ ಎಸ್ತೆಲಾನ್ ಸಾಂಗ್ಲೆಂ. "ರಾತಿಕ್ ತುಕಾ ಫೋನ್ ಕೆಲ್ಲೆಂ ತಾಣೆಂ.....?" ವ್ಹಾಣೊ ಶಿರ್ಕಾವ್ನ್ ಜಾಲ್ಲಿ ಎಸ್ತೆಲ್ ಪಾಟಿಂ ಘುಂವೊನ್ ಜಿಮ್ಮಿಚ್ಯಾ ಮುಕಾರ್ ನಿಟ್ಟ್ ಉಭಿ ಜಾಲಿ.
"ವ್ಹಯ್...!" ಜಿಮ್ಮಿಕ್ ಕಾಂಯ್ ಆಶ್ಚರ್ಯ್ ಜಾಲೆಂ ನಾ. ತಾಚ್ಯಾ ತಾಳ್ಯಾಂತ್ ಜಾಂವ್ ತಾಚ್ಯಾ ಜಿನೊಸಾಂತ್ ಜಾಂವ್ ಕಾಂಯ್ ಬದ್ಲಾವಣ್ ಉದೆಲಿ ನಾ.
"ಕಿತೆಂ ಉಲಯ್ಲ್ಯಾತ್ ತುಮಿ?" ತಿ ಆತಾಂ ಸಾರ್ಕಿ ಜಿಮ್ಮಿಚಾ ಫುಡ್ಯಾನ್ ಉಭಿ ಜಾಲಿ.
"ಮಿಶೇಲಾನ್ ಮ್ಹಾಕಾ ಫೋನ್ ಕರ್ತಾನಾ ತುಂ ಜಾಗಿ ಆಸ್ಲ್ಲಿ?" ಜಿಮ್ಮಿಚಾ ದೊಳ್ಯಾಂನಿ ಆತಾಂ ದುಬಾವ್ ಉಟೊನ್ ಆಯ್ಲೊ.
"ವ್ಹಯ್!" ಎಸ್ತೆಲಾಚಾ ತಾಳ್ಯಾಂತ್ ದ್ರಡಾತಾ ಆಸ್ಲ್ಲಿ.
"ತರ್ ಮ್ಹಾಕಾ ಮಿಶೇಲಾನ್ ಸಾಂಗೊಂಕ್ ನಾ ಕಿತ್ಯಾಕ್? ಚಾರ್ ವೊರಾಂಕ್ ಜಾಲ್ಯಾರ್ ಚಾರ್ ವೊರಾಂಕ್ ! ಹಾಂವ್ ಯೆತೊಂ ಆಸ್ಲ್ಲೊಂ ತುಮ್ಕಾಂ ಆಪವ್ನ್ ವರುಂಕ್....!" ಆಪ್ಣೆ ವ್ಹಡ್ಲಿ ಚೂಕ್ ಕೆಲಿ ಮ್ಹಳ್ಳ್ಯಾ ಪರಿಂ ಜಿಮ್ಮಿಕ್ ಭೊಗ್ಲೆಂ. ಸೊಪ್ಯಾಚಾ ಗ್ರಾದಿಚೆರ್ ಬಸ್ಲೆಲ್ಯಾ ಕಡೆಚ್ ತಾಚಿ ಪಾಟ್ ಬಾಗ್ವಾಲಿ.
"ಬಾಬಾಕ್ ಆಸ್ಪತ್ರೆಂತ್ ಸೊಡುನ್ ಆಯಿಲ್ಲ್ಯಾ ಥಾವ್ನ್ ಮಿಶೇಲಾಚಿ ಮತ್ ಸಾರ್ಕಿ ನಾರೆ. ಚೆಡುಂ ಭಿತರ್ಲ್ಯಾ ಭಿತರ್ಚ್ ಕರ್ಗಾತಾ! ತೋಂಡ್ ಸೊಡುನ್ ಸಾರ್ಕೆಂ ಉಲಂವ್ಕ್ಯ್ ಉಲಯ್ನಾಂ! ಕಿತೆಂ ಕರುಂ? ಹಾಕಾ ಉಟಂವ್ಕ್ಯ್ ಮನ್ ಯೇನಾ, ಆಶೆಂಚ್ ಸೊಡುನ್ ವಚೊಂಕ್ಯ್ ಮನ್ ಯೇನಾ!" ಎಸ್ತೆಲಾಚಾ ಮತಿಂತ್ ಫಾಂತ್ಯಾಚೆಂ ಘಡಿತ್ ಉಡಾಸ್ ಯೇವ್ನ್ ತಿಚ್ಯಾ ಮತಿಂತ್ಯ್ ದ್ವಂದ್ವ್ ಯುದ್ದ್ ಆರಂಭ್ ಜಾಲ್ಲೆಂ.
"ಮಿಶೇಲ್ ರಾತಿಕ್ ನಿದೊಂಕ್ ನಾ?" ಜಿಮ್ಮಿಕ್ ಆಶ್ಚರ್ಯ್ ಜಾಲೆಂ. ಪುಣ್ ಹಾಚಿ ಪರ್ವಾ ಕರಿನಾಸ್ತಾನಾ ಎಸ್ತೆಲ್ ಮತಿಂತ್ ಕಿತೆಂಗೀ ಚಿಂತ್ಲ್ಲೆಂ ತೆಂ ಸಾಕಾರ್ ಕರ್ಚಾ ಪಾಸೊನ್ ಆಪ್ಲ್ಯೊ ವ್ಹಾಣೊ ತುರ್ತಾನ್ ನಿಕ್ಳಾವ್ನ್ ಪರ್ತ್ಯಾಕ್ ಭಿತರ್ ಗೆಲಿ.
ಎಸ್ತೆಲಾಚ್ಯಾ ತೊಂಡಾ ಥಾವ್ನ್ ಆಯಿಲ್ಲ್ಯಾ ಉತ್ರಾಂಕ್ ಆಯ್ಕಾಲ್ಲೊ ಜಿಮ್ಮಿ ಆತಾಂ ಬಸ್ಲೆಲ್ಯಾ ಕಡೆಚ್ ಚುರ್ಚುರ್ಲೊ.
ತಿತ್ಲೆಂಚ್!
"ತುಮ್ಚಿ ಚಲ್ಯಾ ಜಾತ್ ಕೆದ್ನಾಂಚ್ ಚಲಿಯೆಕ್ ಸಮ್ಜೊಂಕ್ ಸಕ್ಚಿ ನ್ಹಯ್!"
ದರ್ಯಾ ಉಸ್ಕ್ಯಾರ್ ಉಟೊನ್ ರಾವ್ಲ್ಲೆಂ ಏಕ್ ಜಯ್ತ್ ಲ್ಹಾರ್ ಭಳಾನ್ ಯೇವ್ನ್ ವೆಳೆಕ್ ಮಾರುನ್ ಪಾಟಿಂ ವೆಚ್ಯಾ ಪರಿಂ ಏಕ್ ಅಸ್ಕತ್ ತರ್ಯ್ ಭಳಾಧೀಕ್ ತಾಳೊ ಜಿಮ್ಮಿಚಾ ಕಾಳ್ಜಾ ಗೂಂಡಾಯೆ ಥಾವ್ನ್ ಉಟೊನ್ ಆಯಿಲ್ಲೊ ತೊ ವ್ಹಾಳೊನ್ ಯೇವ್ನ್ ತಾಚ್ಯಾ ಮತಿಚ್ಯಾ ಪರ್ದ್ಯಾಕ್ ಮಾರುನ್ ತ್ಯಾ ಮತಿ ಪರ್ದ್ಯಾಕ್ ಉಭೆಂಚ್ ಚಿರುನ್ ಗೆಲೊ.
ಏಕ್ ಭಾರಿಕ್ ಅಸ್ಕತ್ ತಾಳೊ!
ತಾಚ್ಯಾ ಪಾಟ್ಲ್ಯಾನ್ ಏಕ್ ಅಸ್ಕತ್ ಬಾವ್ಲೆಲೆಂ ಮುಖಮಳ್ ತಾಚ್ಯಾ ದೊಳ್ಯಾಂ ಮುಕಾರ್ ಉಭೆಂ ಜಾಲೆಂ!
ಕಾಳ್ಬಾಣ್ ಪಡೊನ್ ಆಯಿಲ್ಲ್ಯಾ ದೊಳ್ಯಾಂ ಆಸ್ಡ್ಯಾಂಚೆ... ರಗಾತ್ ನಾಸ್ತಾನಾಗೊರೆಂ ಗೊರೆಂ ಜಾಲ್ಲೆಂ... ಮಾಸ್ ಸಗ್ಳೆ ಜಿರೊನ್ ಗೆಲ್ಲೆಂ ಮುಖಮಳ್!
ಜಿಮ್ಮಿಕ್ ಆಪ್ಲೆಂ ಕಾಳಿಜ್ ಮುಡ್ಡಿಲ್ಲೊ ಅನ್ಭೋಗ್ ಜಾಲೊ.
ತಿತ್ಲೆಂಚ್!
"ಚಲ್ಯಾಂರೆ ಜಿಮ್ಮಿ! ಹೆಂ ಚೆಡುಂ ನಿದೊಂದಿ! ಕಿತ್ಲ್ಯಾ ದಿಸಾಂಚಿ ನೀದ್ ಬಾಕಿ ಆಸಾ ಕೋಣ್ ಜಾಣಾಂ? ಚಲ್... ಯಾ!" ಉಲಯಿಲ್ಲ್ಯಾಪರಿಂಚ್ ಎಸ್ತೆಲಾನ್ ಪರ್ತ್ಯಾಕ್ ಆಪ್ಲ್ಯೊ ವ್ಹಾಣೊ ಶಿರ್ಕಾಯ್ಲ್ಯೊ.
ಎಸ್ತೆಲಾಚೊ ತಾಳೊ ಆಯ್ಕೊನ್ ಆಯಿಲ್ಲ್ಯಾನ್ ಜಿಮ್ಮಿಚಾ ಕಾಳ್ಜಾಂತ್ ಉಟೊನ್ ಯೆಂವ್ಚೆಂ ತೆಂ ಅಸ್ಪಶ್ಟ್ ರೂಪ್ ಸ್ಪಶ್ಟತೆಕ್ ಯೆಂವ್ಚಾ ಪಯ್ಲೆಂಚ್ ಸವ್ಕಾಸ್ ಮಾಜ್ವೊಂಕ್ ಲಾಗ್ಲೆಂ.
ಆಪ್ಲ್ಯಾ ಹಾತಾಂತ್ ಆಸ್ಲ್ಲ್ಯಾ ಕಪ್ಪಾಂತ್ಲಿ ಕಾಫಿ ಪಿಯೆವ್ನ್ ಜಿಮ್ಮಿ ಆತಾಂ ಭಾಯ್ರ್ ಆಯ್ಲೊ. ತಾಕಾ ಕಾಂಯ್ಚ್ ಉಲಂವ್ಕ್ ಜಾಲೆಂ ನಾ.
ಜಿವಿತಾಂತ್ ಪಯ್ಲೆ ಪಾವ್ಟಿಂ ಎಕಾ ಚಲಿಯೆಚಾ ಭಗ್ಣಾಂಕ್ ನಿಯಾಳ್ತಾನಾ ದುಸ್ರ್ಯಾ ಚಲಿಯೆಚಾ ಭಗ್ಣಾಂನಿ ಬೋಬ್ ಮಾರುನ್ ಸಾಂಗಾತ್ ದಿಲ್ಲ್ಯಾ ಪರಿಂ ಜಿಮ್ಮಿಕ್ ಜಾಲ್ಲೆಂ.
ಜಿಮ್ಮಿನ್ ಜಿಪಾರ್ ಬಸ್ಲ್ಲೆಂಚ್ ಜೀಪ್ ಸ್ಟಾರ್ಟ್ ಕೆಲೆಂ. ಘರಾಚಿಂ ದಾರಾಂ ದಾಂಪ್ಲ್ಲಿ ಎಸ್ತೆಲ್ ಯೇವ್ನ್ ಜಿಪಾರ್ ಬಸ್ಲಿ.
ಘರ್ಚಾ ಕಂಪೌಂಡಾ ಥಾವ್ನ್ಭಾಯ್ರ್ ಆಯಿಲ್ಲೆಂ ಜೀಪ್, ಮುಕ್ಲ್ಯಾ ಲೇನಾಚಾ ಭಾರೀಕ್ ರಸ್ತ್ಯಾಂತ್ಲ್ಯಾನ್ ಭಾಯ್ರ್ ಯೇವ್ನ್ ಮೇಯ್ನ್ ರೊಡಾಕ್ ಪಾವ್ಲೆಂ.
"ಮಾಂಯ್.....!" ಮತಿಚ್ಯಾ ತಳ್ಮಳ್ಯಾಂಕ್ ದಾಂಬುನ್ ಧರುಂಕ್ ಸಕಾನಾಸ್ತಾನಾ ಜಿಮ್ಮಿ ಉಲಯ್ಲೊ.
"ಕಿತೆಂ....?" ತಶೆಂಚ್ ರಸ್ತ್ಯಾಕ್ ಪಳವ್ನ್ ಆಸ್ಲ್ಲ್ಯಾ ಪರಿಂಚ್ ಎಸ್ತೆಲಾನ್ ವಿಚಾರ್ಲೆಂ.
"ಚೂಕ್ ಜಾಲಿ ಮಾಂಯ್!" ಜಿಮ್ಮಿಚೊ ತಾಳೊ ಗದ್ಗದೀತ್ ಜಾಲೊ.
ತಿತ್ಲೆಂಚ್!
ಎಕಾಚ್ಫರಾ ಎಸ್ತೆಲಾನ್ ಆಪ್ಲಿ ನದರ್ ಜಿಮ್ಮಿಚಾ ವಯ್ರ್ ವೆಲಿ.
ಆಜ್, ಖಂಯ್ಗೀ ಕಿತೆಂಗೀ ಸಗ್ಳೆಂಚ್ ಸಾರ್ಕೆಂ ನಾ ಮ್ಹಳ್ಳ್ಯಾ ಪರಿಂ ತಿಕಾ ದಿಸ್ಲೆಂ. ನಾಂ ಜಾಲ್ಯಾರ್ ಹೊ ಜಿಮ್ಮಿ.... ಶೆಂಭರ್ ಉತ್ರಾಂ ಉಲಯ್ಲ್ಯಾರ್ಯ್ ಏಕ್ ಉತಾರ್ ಪಾಟಿಂ ಉಲಯ್ನಾತ್ಲಲೊ ಆಜ್ ಅಚಾನಕ್.....! ತಿಕಾ ಸಮ್ಜಾನಾತ್ಲ್ಲೆಂ.
"ಮ್ಹಜೊ ಉದ್ದೇಶ್ ಫಕತ್ತ್ ಮಿಶೇಲಾಕ್ ಧಯ್ರ್ ದಿಂವ್ಚೊ ಮಾತ್ರ್ ಆಸ್ಲ್ಲೊ!" ಜಿಮ್ಮಿ ಉಲಯ್ಲೊ. "ಹಾಂವ್ ಜಾಣಾಂ! ಜಿವಿತಾಚ್ಯಾ ಸಂದಿಗ್ದ್ ಪರಿಸ್ಥಿತೆಂಕ್ ಫುಡ್ ಕರುನ್ ರಾಂವ್ಚೆಂ ಧಯ್ರ್ ಮಿಶೇಲಾಕ್ ನಾ. ಹ್ಯಾಚ್ ಖಾತಿರ್ ಮಿಶೇಲ್ ಕಾಲ್ಚ್ಯಾ ರಾತಿಕ್ ಮ್ಹಾಕಾ ಪೋನ್ ಕರುನ್ ತಾಕಾ ಆಸ್ಪತ್ರೆಕ್ ಆಪವ್ನ್ ವರುಂಕ್ ವಿನತಿ ಕರ್ತಾ ಮ್ಹಣೊನ್ ಹಾವೆಂ ಚಿಂತ್ಲೆಂ. ಕಿತ್ಲೆಂ ಮ್ಹಳ್ಯಾರ್ಯ್ ಹಾಂವ್ ತುಮ್ಚೊ ಡ್ರೈವರ್ಚ್ ಮಾಂಯ್. ಹಾಂವ್ ಖಂಡಿತ್ ತುಮ್ಕಾಂ ಆಪವ್ನ್ ಹಾಡ್ತೊಂ. ಪುಣ್ ರಾತಿಚಾ ಚಾರ್ ವೊರಾಂಕ್ ಆಸ್ಪತ್ರೆಕ್ ಯೇವ್ನ್ ತುಮಿ ಹಾಂಗಾಸರ್ ಕಾಂಯ್ ಕರ್ಚೆಂ ನಾತ್ಲ್ಲೆಂ. ತಶೆಂಯ್ ಮಿಶೇಲಾನ್ ಉಲಯಿಲ್ಲಿ ರೀತ್ ಪಳವ್ನ್ ತೆಂ ಬಾಬಾಚೆಂ ಚಿಂತುನ್ ಖಂಡಿತ್ ಭಿಯೆಲಾಂ ಮ್ಹಣೊನ್ ಹಾಂವ್ ಸಮ್ಜಾಲ್ಲೊಂ!"
ಜಿಮ್ಮಿನ್ ಆಶೆಂ ಭಾವುಕ್ ಜಾವ್ನ್ ಉಲಂವ್ಚೆಂ ಹ್ಯಾ ಆದಿಂ ಎಸ್ತೆಲಾನ್ ಪಳಂವ್ಕ್ ನಾತ್ಲೆಲೆಂ. ಕೆದ್ನಾಂಯ್ ದ್ರಡ್ ಆಸ್ಚೊ ಜಿಮ್ಮಿ ಆಜ್ ಇತ್ಲೊ.....? ಎಸ್ತೆಲಾಕ್ ಕಾಂಯ್ ಸಮ್ಜಾನಾ ಜಾಲೆಂ. ತಿ ಕಾಂಯ್ಚ್ ಉಲಯ್ನಾಸ್ತಾನಾ ವೊಗಿ ರಾವ್ಲಿ.
"ಮನ್ಶ್ಯಾಕ್ ಎಕೇಕ್ ಪಾವ್ಟಿಂ ಧಯ್ರಾನ್ ರಾವೊಂಕ್ ಶಿಕಾಜಾಯ್ ಪಡ್ತಾ ಮ್ಹಣೊನ್ ಮಾತ್ರ್ ಹಾವೆಂ ಮಿಶೇಲಾಕ್ ಸಮ್ಜಾಯಿಲ್ಲೆಂ ಶಿವಾಯ್....!" ಜಿಮ್ಮಿ ಮುಕಾರ್ ಉಲಯ್ಲೊ ನಾ. ತಾಚ್ಯಾ ದೊಳ್ಯಾಂ ಮುಕಾರ್ ಸವ್ಕಾಸ್ ಎಕಾ ವಯ್ರ್ ಏಕ್ ಪಿಂತುರ್ ಉದೆವ್ನ್ ಆಯಿಲ್ಲ್ಯಾ ಪರಿಂ ಯೇವ್ನ್ ಮಾಯಾಗ್ ಜಾಲೆಂ. ತ್ಯಾ ಭಾಯ್ರ್ ಮುಕ್ಲ್ಯಾ ತ್ಯಾ ಫಾಂತ್ಯಾಚಾ ಮಂದ್ ಉಜ್ವಾಡಾಂತ್ ಭಂವ್ತಣಿ ರಾಜ್ ಕರ್ಚ್ಯಾ ತ್ಯಾ ಧುರಿಯೆಂತ್ ತೆಂಚ್ ಅಸ್ಪಶ್ಟ್ ಮುಖಮಳ್ ಉದೆವ್ನ್ ಅಯ್ಲೆಂ. ಬಾವ್ಲೆಲ್ಯಾ ತೊಂಡಾಚೆಂ.... ಜಿರೊನ್ ಗೆಲ್ಲ್ಯಾ ದೊಳ್ಯಾಂಚೆಂ....... ದಿಸಾಂದೀಸ್ ಜಡೊನ್ ವೆಚ್ಯಾ ಕೆಸಾಂಚೆಂ....... ಮುಗ್ದ್ ಮುಖಮಳ್!
ಆತಾಂ ಹೆಂ ಮುಖಮಳ್ ಸ್ಪಶ್ಟ್ ತಾಚ್ಯಾ ದೊಳ್ಯಾಂಕ್ ದಿಸ್ತಾಲೆಂ!
ಜಶೆಂ ತೆ ಜಿರೊನ್ ಗೆಲ್ಲೆ ಶಾಂತ್ ದೊಳೆ ಆಪ್ಲ್ಯಾ ದಿಶ್ಟೆಂತ್ಚ್ ಆಪ್ಣಾಕ್ ಆಪಯ್ತಾ ತಶೆಂ!
ತಿತ್ಲೆಂಚ್!
ಜಿಮ್ಮಿನ್ ಆಪ್ಲ್ಯಾ ಜಿಪಾಚೆಂ ಆಕ್ಸಿಲೇಟರ್ ಭಳಾನ್ ದಾಂಬ್ಲೆಂ.
ಎಸ್ತೆಲಾಕ್ ಆತಾಂ ಸಗ್ಳೆಂ ಸಮ್ಜಾಲ್ಲೆಂ. ಜಿಮ್ಮಿನ್ ಸಾಂಗ್ಲೆಲ್ಯಾ ಉತ್ರಾಂ ಥಾವ್ನ್ ಕಾಲ್ಚ್ಯಾ ರಾತಿಕ್ ಕಿತೆಂ ಜಾಲ್ಲೆಂ ಮ್ಹಳ್ಳೆಂ ತಿ ಸಮ್ಜಾಲಿ. ಎಕಾ ವಾಟೆನ್ ಜಿಮ್ಮಿನ್ ಮಿಶೇಲಾಕ್ ದಿಲ್ಲಿ ಜಾಗ್ವಣ್ಯ್ ಸಾರ್ಕಿ ಮ್ಹಣೊನ್ ತಿಕಾ ದಿಸ್ಲಿ. ನಾ ಜಾಲ್ಯಾರ್ ಹೆಂ ಮಿಶೇಲ್ ಕೆದ್ನಾಂ ಪಾಸೊನ್ ಆಶೆಂಚ್ ತ್ಯಾ ಆಪ್ಲ್ಯಾ ಮತಿಂತ್ಲ್ಯಾ ಭಿಯಾಕ್ ಘೆವ್ನ್ ಜಿಯೆತೆಲೆಂ? ಚಿಂತ್ಲ್ಲ್ಯಾ ತಿಣೆಂ ಕಾಂಯ್ ಉಲಂವ್ಚೆ ಪ್ರಯತ್ನ್ ಕೆಲೆಂ ನಾ. ಆತಾಂ ತಿಚ್ಯಾ ದೊಳ್ಯಾಂ ಮುಕಾರ್ ತಿಕಾ ಆಪ್ಲೊ ಘೊವ್ ಮಾತ್ರ್ ದಿಸೊಂಕ್ ಲಾಗ್ಲೊ. ತಿ ಆತಾಂ ಆಪ್ಲ್ಯಾ ಘೊವಾ ವಿಶಿಂ ಚಿಂತುಂಕ್ ಲಾಗ್ಲಿ.
*************
ಟ್ರಿಣ್... ಟ್ರಿಣ್...!
ಟೆಲಿಫೋನಾಚೊ ಆವಾಜ್ ಕಾನಾಂಕ್ ಘಡ್ಗಡ್ಯಾ ಪರಿಂ ಮಾರ್ತಾನಾ, ಎದೊಳ್ ಪಾಸೊನ್ ನಿದೊನ್ ಆಸ್ಲ್ಲ್ಯಾ ಮಿಶೇಲಾನ್ ಎಕ್ಚ್ಚ್ ಪಾವ್ಟಿಂ ಆಪ್ಲೆ ದೊಳೆ ಉಘಡ್ಲೆ.
ದೊಳೆ ಉಗ್ತೆ ಕರುನ್ ಪಳೆಲ್ಲ್ಯಾ ತಾಕಾ, ಆಪ್ಲ್ಯಾ ಭಂವ್ತಿಂ ಉಜ್ವಾಡ್ಚ್ ಉಜ್ವಾಡ್ ದಿಸೊನ್ ಕಿತೆಂಗೀ ಉಡಾಸ್ ಆಯಿಲ್ಲ್ಯಾ ಪರಿಂ ಜಾವ್ನ್ ’ಸಟ್ಟ್’ ಕರುನ್ ಖಾಟಿಯೆರ್ ತೆಂ ಉಟೊನ್ ಬಸ್ಲೆಂ.
ಲಾಗ್ಶಿಲ್ಯಾ ಟೇಬಲಾ ವಯ್ರ್ ಆಸ್ಲ್ಲ್ಯಾ ಅಲಾರಾಮ್ ವೊಚಾ ವಯ್ರ್ ತಾಚಿ ನದರ್ ಗೆಲಿ.
ವೊರಾಂ ಆಟ್ ಜಾವ್ನ್ ಬಾರಾ ಮಿನುಟಾಂ ದಾಖಯ್ತಾಲೆಂ ತೆಂ.
ತಿತ್ಲೆಂಚ್!
ಎಕ್ಚ್ಚ್ ಪಾವ್ಟಿಂ ಖಾಟಿಯೆರ್ ಥಾವ್ನ್ ದೆಂವ್ಲ್ಲೆ ಮಿಶೇಲ್ ಹೆವ್ಶಿಂ ವ್ಹಾಜೊನ್ ಆಸ್ಲ್ಲ್ಯಾ ಟೆಲಿಫೋನಾ ತೆವ್ಶಿಂ ಚಮ್ಕಾಲೆಂ.
ಆನಿ ಕಿತೆಂ ಫೊನಾಚೆಂ ರಿಸೀವರ್ ಹಾತಾನ್ ಉಕೊಲ್ತಾಂ ಮ್ಹಣ್ತಾನಾ ಫೋನ್ ಡಿಸ್ಕನೆಕ್ಟ್ ಜಾಲೆಂ.
"ಇತ್ಲೊ ವೇಳ್ ಪಾಸೊನ್ ಆಪುಣ್ ನಿದೊನ್ ಉರ್ಲ್ಯಾಂ? ಸ ವೊರಾಂಕ್ ಮ್ಹಾಕಾ ಆಸ್ಪತ್ರೆಕ್.....!" ಮತಿನ್ ಉಡಾಸಾಂತ್ಲೆಂ ಜಾಗಯ್ತಾನಾ,
"ಮಾಂಯ್!" ಮಾಂಯ್ಕ್ ಆಪಯಿಲ್ಲೆಂ ಮಿಶೇಲ್ ತಶೆಂಚ್ ವೆವೆಗ್ಗಿಂ ಆಪ್ಲ್ಯಾ ಬೆಡ್ರೂಮಾ ಥಾವ್ನ್ ಭಾಯ್ರ್ ಆಯ್ಲೆಂ. ಘರಾ ಭಿತರ್ ಖಂಯ್ಚರ್ಯ್ ತಾಕಾ ಆಜಿಯೆಚಿ ಝಳಕ್ ದಿಸ್ಲಿ ನಾ. ಭಾಯ್ರ್ ಸೊಪ್ಯಾರ್ ಯೆವ್ನ್ ತಾಣೆಂ ಜಾಲಾಂತ್ ಪಳೆಲೆಂ. ಖಂಯ್ಚರ್ಯ್ ಕೊಣ್ಯ್ ನಾ. ಘರಾಂತ್ ಸಂಪೂರ್ಣ್ ಮೌನ್! ನಿರಾಶಾ!
ತರ್?
"ಮಾಂಯ್ ಆನಿ ಜಿಮ್ಮಿ ಮ್ಹಾಕಾ ಸೊಡುನ್ ಆಸ್ಪತ್ರೆಕ್....?" ಮಿಶೇಲ್ ಮುಕಾರ್ ಚಿಂತುಂಕ್ ಗೆಲೆಂ ನಾ.
ಪರ್ತ್ಯಾಕ್ ಆಪ್ಲ್ಯಾ ಬೆಡ್ರೂಮಾಕ್ ಆಯಿಲ್ಲ್ಯಾ ತಾಣೆಂ ಆಪ್ಲೆಂ ಸೆಲ್ಫೋನ್ ಹಾತಿಂ ಘೆತ್ಲೆಂ.
ತಿತ್ಲೆಂಚ್!
ಸೆಲ್ಪೋನ್ ಹಾತಿಂ ಘೆವ್ನ್ ತ್ಯಾ ಪೊನಾ ವಯ್ರ್ ಆಪ್ಲಿ ದೀಶ್ಟ್ ಚರಯಿಲ್ಲೆಂ ಮಿಶೇಲ್ ಆಪ್ಣಾಕ್ಚ್ ಪಾತ್ಯೆಲೆಂ ನಾ.
ಸೆಲ್ ಪೊನಾಚೊ ಡಿಸ್ಪ್ಲೇ ಚಾರ್ ಮಿಸ್ಡ್ ಕಾಲಾಂಕ್ ದಾಖಯ್ತಾಲೊ!
"ಚಾರ್ ಮಿಸ್ಡ್ ಕಾಲಾಂ?" ಮಿಶೇಲ್ ಮತಿಂತ್ಚ್ ಉದ್ಗಾರ್ಲೆಂ. "ಆನಿ ಮ್ಹಾಕಾ ಕಾಂಯ್ ಖಬಾರ್ ನಾ!? ತ್ಯಾ ವಯ್ರ್ ತ್ಯಾ ಲ್ಯಾಂಡ್ ಲೈನಿಚೆರ್ ಕಿತ್ಲಿಂ ವ್ಹಾಜ್ಲ್ಯಾಂತ್ ಕೋಣ್ ಜಾಣಾಂ?"
ಮಿಶೇಲಾನ್ ಪೊನಾಕ್ ಪಳವ್ನ್ ಆಪ್ಲಿ ತಕ್ಲಿ ಹಾಲಯ್ಲಿ.
ತಿತ್ಲ್ಯಾರ್!
ತಾಚ್ಯಾ ಹಾತಾಂತ್ಲೆಂ ಸೆಲ್ ಪೋನ್ ವ್ಹಾಜೊಂಕ್ ಲಾಗ್ಲೆಂ. ಅಚಾನಕ್ ಆಪ್ಲ್ಯಾ ಹಾತಾಂತ್ಲೆಂ ಪೋನ್ ವ್ಹಾಜೊಂಕ್ ಲಾಗ್ಲ್ಲೆಂ ಪಳವ್ನ್ ಏಕ್ ಪಾವ್ಟಿಂಚ್ಯಾಕ್ ಮಿಶೇಲಾಚಾ ಮತಿಕ್ ಕಾವ್ಜೆಣೆನ್ ದಾಡ್ ಮಾರ್ಲಿ ಜಾಲ್ಯಾರ್ಯ್ ದುಸ್ರ್ಯಾ ಖಿಣಾರ್ ತೆಂ ಜಾಗ್ರುತ್ ಜಾಲೆಂ
"ಅಪರಿಚಿತ್ ನಂಬರ್!" ಡಿಸ್ಪ್ಲೇ ವಯ್ಲ್ಯಾ ನಂಬರಾಕ್ ಪಳವ್ನ್ ಮಿಶೇಲಾಚಾ ಮತಿನ್ ತಾಕಾ ಜಾಗಯ್ಲೆಂ.
"ಹಲೋ......?"
"ಹಲೋ....! ಗುಡ್ ಮಾರ್ನಿಂಗ್!" ತ್ಯಾ ಕುಶಿನ್ ಥಾವ್ನ್ ಪರಿಚಿತ್ ಮ್ಹಳ್ಳ್ಯಾ ತಸಲೊ ಅಪರಿಚಿತ್ ಚಲ್ಯಾಚೊ ತಾಳೊ.
"ಗುಡ್ ಮಾರ್ನಿಂಗ್!" ಮಿಶೇಲಾಚಾ ಜಿಬೆರ್ ಆಪ್ಲೆಸ್ತಕಿಂ ಉತ್ರಾಂ ಸುಟ್ಲಿಂ. ಪುಣ್ ತಾಚಿ ಮತ್ ಮಾತ್ರ್ ಪರಿಚಿತ್ ಮ್ಹಳ್ಳ್ಯಾ ಪರಿಂ ದಿಸ್ಚ್ಯಾ ತ್ಯಾ ತಾಳ್ಯಾಕ್ ವಳ್ಕೊಂಚೆಂ ನಾಂವ್ ಸೊಧ್ತಾಲಿ.
"ಕಶೆಂ ಆಸಾಯ್? ತಾಳೊ ಮಸ್ತ್ ಥಕ್ಲೆಲ್ಯಾ ಪರಿಂ ದಿಸ್ತಾ!"
ಆಪ್ಲ್ಯಾ ತಾಳ್ಯಾಚಾ ಬದ್ಲಾವ್ಣೆಂತ್ಚ್ ಆಪ್ಣಾಕ್ ಸಮ್ಜಾಲ್ಲ್ಯಾ ತ್ಯಾ ತಾಳ್ಯಾಕ್ ಮಿಶೇಲಾನ್ ಪಾರ್ಕಿಲೆಂ.
"ರಾಯನ್!" ತೆಂ ಉದ್ಗಾರ್ಲೆಂ.
"ಕಿತ್ಯಾಕ್.....? ತುಕಾ ವಳಕ್ ಮೆಳೊಂಕ್ ನಾ ಕಿತೆಂ?"
"ಹಾಂವ್....."
"ಸಾರ್ರಿ! ತುಕಾ ಡಿಸ್ಟರ್ಬ್ ಜಾಲೆಂ....?" ಮಿಶೇಲಾಚಾ ಉತ್ರಾಂಕ್ ಮಧೆಂಚ್ ತುಟವ್ನ್ ರಾಯನ್ ಉಲಯ್ಲೊ. ತಾಚ್ಯಾ ತಾಳ್ಯಾಂತ್ ಖಾಲ್ತೆಪಣ್ ಆಸ್ಲ್ಲೆಂ
"ನೊ ನೊ....! ಇಟ್ಸ್ ಓ.ಕೆ.....!" ಖುದ್ಧ್ ಮಿಶೇಲಾಕ್ಚ್ ಲಜ್ ದಿಸ್ಲಿ.
"ಬೈ ದಿ ವೇ..... ಐ ಯಾಮ್ ವೆರ್ರಿ ಸಾರ್ರಿ ಹಾಂ! ಮ್ಹಾಕಾ ಕಾಲ್ ತುಮ್ಕಾಂ ಚಡ್ ಹೆಲ್ಫ್ ಕರುಂಕ್ ಜಾಂವ್ಕ್ ನಾ!"
"ಜಾಲ್ಯಾರ್ಯ್ ತುವೆಂ ತಿತ್ಲೆಂ ಹೆಲ್ಫ್ ಕೆಲ್ಲೆಂಚ್ ವ್ಹಡ್ಲೆಂ....!"
"ಆತಾಂ ಕಸೊ ಆಸಾ ತುಜೊ ಗ್ರ್ಯಾನಿ....?"
"ಗ್ರ್ಯಾನಿ.....? ಹಾವೆಂ ಮ್ಹಜ್ಯಾ ಆಬಾಕ್ ಆಬ್ ಮ್ಹಣೊನ್ ಆಪಂವ್ಚೆಂ!" ಮಿಶೇಲಾನ್ ಸವ್ಕಾಸ್ ಹಾಸ್ಚೆಂ ಪ್ರಯತ್ನ್ ಕೆಲೆಂ.
"ರಾಯನ್... ತುಂ ಬೆಜಾರ್ ಕರಿನಾಂಯ್ ತರ್.....!, ಮ್ಹಾಕಾ ಆಸ್ಪತ್ರೆಕ್....!"
"ಬರೆಂ. ಹಾಂವ್ ದೋನ್ ದೀಸ್ ಹಾಂಗಾಚ್ ಆಸಾಂ. ಹಾಂವ್ ತುಕಾ ಮಾಗಿರ್ ಪೋನ್ ಕರ್ತಾಂ!"
ಮಿಶೇಲಾನ್ ವಿನತಿ ಕರ್ಚಾ ಪಯ್ಲೆಂಚ್ ರಾಯನ್ ತಾಕಾ ಸಮ್ಜಾಲ್ಲೊ.
"ಬಾಯ್!"
"ಇಫ್ ಯು ಡೋಂಟ್ ಮೈಂಡ್...... ಹಾಂವ್ ತುಕಾ ಮಾಗಿರ್ ಪೋನ್ ಕರುಂ.......?" ರಾಯನಾಚಾ ತಾಳ್ಯಾಂತ್ ವಿನತಿ ಆಸ್ಲ್ಲಿ.
"ಯ್ಯಾ... ಶೂವರ್!"
"ಬಾಯ್. ಟೇಕ್ ಕೇರ್!"
ತ್ಯಾ ಕುಶಿನ್ ರಾಯನಾನ್ ಫೋನ್ ಡಿಸ್ಕನೆಕ್ಟ್ ಕೆಲ್ಲೆಂ.
ತಿತ್ಲೆಂಚ್!
ಮಿಶೇಲಾನ್ ಆತಾಂ ವೇಳ್ ಕಾಡ್ಲೊ ನಾ.
ಜಿಮ್ಮಿಚಾ ಸೆಲ್ ಪೋನಾಕ್ ತಾಣೆಂ ನಂಬರ್ ಡಯಲ್ ಕೆಲೆಂ. ನಂಬರ್ ಡಯಲ್ ಕರ್ತಾಂ ಕರ್ತಾಂ ಫಾಂತ್ಯಾರ್ ಘಡ್ಲೆಲೆಂ ಸಗ್ಳೆಂ ಎಕಾಚ್ ಖಿಣಾನ್ ಮಿಶೆಲಾಚಾ ಮತಿಂತ್ ಉಡಾಸ್ ಆಯ್ಲೆಂ.
ತಿತ್ಲ್ಯಾರ್!
ಪೋನ್ ರಿಂಗ್ ಜಾತಾಲೆಂ
"ಹಲೋ.....!" ತ್ಯಾ ಕುಶಿನ್ ಥಾವ್ನ್ ಜಿಮ್ಮಿಚೊ ತಾಳೊ.
"ಮಾಂಯ್ ಖಂಯ್ ಆಸಾ?" ಮಿಶೇಲಾಚೆಂ ರಾಗಾಭರಿತ್ ಕಡಕ್ಕ್ ಸವಾಲ್.
"ಆಸಾ! ಹಾಂಗಾಚ್ ಆಸಾ!" ಜಿಮ್ಮಿನ್ ತಿತ್ಲ್ಯಾಚ್ ಶಾಂತ್ ತಾಳ್ಯಾನ್ ಜವಾಬ್ ದಿಲಿ.
"ಮಾಂಯ್ಕ್ ಪೋನ್ ದೀ.....!"
"ಮಿಶೇಲ್....., ಐ ಯಾಮ್ ಸಾರ್ರಿ!" ಜಿಮ್ಮಿಚ್ಯಾ ತಾಳ್ಯಾಂತ್ ಖಾಲ್ತೆಪಣ್ ಆಸ್ಲ್ಲೆಂ.
"ಮಾಂಯ್ಕ್ ಪೋನ್ ದೀ ಪ್ಲೀಸ್....!" ಜಿಮ್ಮಿಚಾ ಉತ್ರಾಂಕ್ ಆನಿ ಆಪ್ಣಾಕ್ ಕಾಂಯ್ಚ್ ಸಂಭಂಧ್ ನಾ ಮ್ಹಳ್ಳ್ಯಾ ಪರಿಂ ಮಿಶೇಲ್ ಧರ್ವಡ್ಲೆಂ.
ಆತಾಂ ಥೊಡೊ ವೇಳ್ ತ್ಯಾ ಕುಶಿನ್ ಥಾವ್ನ್ ಕಾಂಯ್ಚ್ ಆವಾಜ್ ಆಯ್ಕೊನ್ ಆಯಿಲ್ನಾ. ಉಪ್ರಾಂತ್.....
"ಹಲೋ....?" ಮಿಶೇಲಾಕ್ ಆಪ್ಲ್ಯಾ ಆಜಿಯೆಚೊ ತಾಳೊ ಆಯ್ಕಾಲೊ.
"ಆಬ್ ಕಸೊ ಆಸಾ ಮಾಂಯ್....?" ತುರ್ತಾನ್ ಮ್ಹಳ್ಳ್ಯಾಪರಿಂ ತಾಣೆಂ ಆಜಿಯೆಕ್ ವಿಚಾರ್ಲೆಂ.
"ಆತಾಂ ಬರೊ ಆಸಾ ಪುತಾ. ಹಾಂವ್ ಭಿತರ್ ವಚೊನ್ ಪಳವ್ನ್ ಆಯ್ಲಿಂ. ಆಬ್ ತುಕಾ ವಿಚಾರ್ತಾಲೊ....! ತುಕಾ ಸಾಂಜೆರ್ ಆಪವ್ನ್ ಹಾಡ್ತಾಂ ಮ್ಹಣೊನ್ ಸಾಂಗ್ಲೆಂ. ಖಂತ್ ಕರಿನಾಕಾ ಪುತಾ....! ಬರೊ ದೇವ್ ಪಾಡ್ ಕರ್ತಾವೇ? ದಾಕ್ತೆರಾಕ್ಯ್ ಮೆಳೊನ್ ಯಾ ಮ್ಹಣೊನ್ ರಾವ್ಲ್ಯಾಂ. ದಾಕ್ತೆರಾನ್ ಯೆಂವ್ಚೊ ವೇಳ್ ಜಾಲೊ. ಆತಾಂ ಕಾಂಯ್ ಪ್ರಾಬ್ಲೆಮ್ ನಾಂತ್. ಆಬ್ ಬರೊ ಆಸಾ!"
"ಥ್ಯಾಂಕ್ ಗಾಡ್!" ಆಜಿಯೆಚಿಂ ಉತ್ರಾಂ ಆಯ್ಕಾಲ್ಲೆಂ ಮಿಶೇಲ್ ಸಮಧಾನೆನ್ ಉದ್ಗಾರ್ಲೆಂ.
"ಕೆದಾಳಾ ಉಟ್ಲೆಂಯ್ ತುಂ..?" ತ್ಯಾ ಕುಶಿನ್ ಪರ್ತ್ಯಾಕ್ ಆಜಿಯೆಚೊ ತಾಳೊ.
"ಆತ್ತಾಂ! ....ತುಕಾ ಸಾಕಾಳಿಂ ಆಸ್ಪತ್ರೆಕ್ ವೆತಾನಾ ಮ್ಹಾಕಾ ಉಟಂವ್ಕ್ ಜಾಂವ್ಕ್ ನಾ?" ಮಿಶೇಲಾನ್ ಆಪ್ಲ್ಯಾ ಆಜಿಯೆ ವಯ್ರ್ ಹಳ್ತಾಚಾ ರಾಗಾಚೆಂ ನಟನ್ ಕೆಲೆಂ.
"ಆತಾಂ ಉಟ್ಲಾಂಯ್ ನೆ! ಹಾಂವ್ ದಾಕ್ತೆರಾಕ್ ಮೆಳೊನ್ ಯೆತಾಂ. ತೆಂ ಸಗ್ಳೆಂ ಉಪ್ರಾಂತ್ ಘರಾ ಉಲವ್ಯಾಂ....!"
"ಓ.ಕೆ. ಬಾಯ್!"
ಮಿಶೇಲಾನ್ ಪೋನ್ ಭಂಧ್ ಕರುನ್ ಏಕ್ ಸಮಾಧಾನೆಚೊ ಸುಸ್ಕಾರ್ ಸೊಡ್ಲೊ. ಆಪ್ಲೊ ಆಜೊ ಬರೊ ಆಸಾ ತೆಂ ಆಯ್ಕೊನ್ ತಾಚ್ಯಾ ಮತಿಕ್ ಶಾಂತಿ ಮೆಳ್ಲ್ಲಿ.
ಸೆಲ್ಪೋನ್ ತಶೆಂಚ್ ಡ್ರೆಸ್ಸಿಂಗ್ ಟೇಬಲಾರ್ ದವರುನ್ ತೆಂ ಆತಾಂ ಸವ್ಕಾಸ್ ಬಾತ್ ರುಮಾ ತೆವ್ಶಿಂ ಚಮ್ಕಾಲೆಂ.
*************
ಆಜಿಯೆಕ್ ರಾಕೊಣ್ ರಾಕೊಣ್ ತಿ ಆಸ್ಪತ್ರೆ ಥಾವ್ನ್ ಪಾಟಿಂ ಯೇಂವ್ಕ್ ನಾತ್ಲೆಲಿ ಪಳವ್ನ್ ಪೊಟಾ ಭುಕೆ ಖಾತಿರ್ ಕುಜ್ನಾಂತ್ ಆಯಿಲ್ಲ್ಯಾ ಮಿಶೇಲಾನ್ ನಾಸ್ಟ್ಯಾಚಿ ತಯಾರಾಯ್ ಕರ್ತಾನಾ, ತಾಕಾ ಭಾಯ್ರ್ ಜಾಲಾಂತ್ ಜೀಪ್ ಯೇವ್ನ್ ರಾವ್ಲಲೊ ಆವಾಜ್ ಆಯ್ಕೊನ್ ಆಯ್ಲೊ. ವೊರಾಂ ಎದೊಳ್ಚ್ ಧಾ ಜಾವ್ನ್ ಪಂಚ್ವೀಸ್ ಮಿನುಟಾಂ ಜಾಲ್ಲಿಂ. ಜೀಪ್ ಯೇವ್ನ್ ರಾವ್ಲಲೊ ಆವಾಜ್ ಆಯ್ಕಾಲ್ಯಾರ್ಯ್ ಮಿಶೇಲ್ ಕುಜ್ನಾಂ ಥಾವ್ನ್ ಭಾಯ್ರ್ ಆಯ್ಲೆಂ ನಾ.
ಆಪ್ಣಾಕ್ ನಿದೊಂಕ್ ಸೊಡುನ್ ಆಸ್ಪತ್ರೆಕ್ ಗೆಲ್ಲ್ಯಾ ಆಜಿಯೆ ವಯ್ರ್ ಮಿಶೇಲಾಕ್ ರಾಗ್ ಆಯಿಲ್ಲೊ ಜಾಲ್ಯಾರ್ಯ್ ಆಪ್ಣಾಚೊ ಆಜೊ ಬರ್ಯಾ ಭಲಾಯ್ಕೆಂತ್ ಆಸಾ ತೆಂ ಆಯ್ಕೊನ್ ಮಿಶೇಲ್ ಖುಶಿ ಜಾಲ್ಲೆಂ. ತಾಚ್ಯಾ ಮತಿಕ್ ಸಮಾಧಾನ್ ಮೆಳ್ಲ್ಲೆಂ. ಆಜ್ಯಾಚಾ ಅಚಾನಕ್ ಭಿಗಡ್ಲೆಲ್ಯಾ ಭಲಾಯ್ಕೆ ಥಾವ್ನ್ ತಾಚ್ಯಾ ದೊಳ್ಯಾಂಚಿ ನೀದ್ಯ್ ಧಾಂವ್ಲ್ಲಿ. ಆಜ್ಯಾಚೆಂ ಕಿತೆಂ ಜಾತೆಲೆಂ ಮ್ಹಳ್ಳೆಂ ಚಿಂತುನ್ ಭಿಯೆಲ್ಲೆಂ ಮಿಶೇಲ್ ಸಾರ್ಕೆಂ ನಿದೊಂಕ್ ಪಾಸೊನ್ ನಾತ್ಲ್ಲೆಂ. ಮತಿಂತ್ಲ್ಯಾ ವಿರಾರಾಯೆನ್ ಸಪ್ಣಾಂತ್ಯ್ ರಾಜ್ವಟ್ ಚಲಯ್ತಾನಾ ತೆಂ ಚಡ್ಚ್ ಭಿಯೆಲ್ಲೆಂ. ಹ್ಯಾಚ್ ಕಾರಾಣಾಕ್ ಲಾಗೊನ್ ಫಾಂತ್ಯಾಚಾ ಚಾರ್ ವೊರಾಂಕ್ ಸಪ್ಣಾಂತ್ ಜಾಗೆಂ ಜಾವ್ನ್ ಉಟ್ಲ್ಲೆಂ ತೆಂ ದೆದೆಸ್ಪರ್ ಜಾವ್ನ್ ಆಪ್ಣಾಕ್ಚ್ ಸಾಂಬಾಳುಂಕ್ ಕಶ್ಟಾತಾನಾ ಜಿಮ್ಮಿಚಾ ಧಾರುಣ್ ಉತ್ರಾಂಚೆಂ ಪರಿಣಾಮ್ ಜಾವ್ನ್ ವಾ ಆಜಿಯೆಚಾ ಸಮ್ಜಣೆಚಾ ಉತ್ರಾಂನಿ ಮತಿಕ್ ಸಮಾಧಾನ್ ಘೆವ್ನ್ ನಿದೆಕ್ ವೆಂಗ್ತಾನಾ ಕಿತ್ಲೊ ವೇಳ್ ಜಾಲ್ಲೊ ತೆ ತೆಂಚ್ ನೆಣಾಂ.
ಆಶೆಂ ನಿದೆಕ್ ವೆಂಗ್ಲ್ಲೆಂ ಮಿಶೇಲ್ ತಿಂ ಟೆಲಿಪೋನಾ ಸಾಕಾಳಿಂ ವಾಜೊಂಕ್ ಲಾಗ್ತಾನಾಚ್ ತೆಂ ನಿದೆಂತ್ಲೆಂ ಜಾಗೆಂ ಜಾಲ್ಲೆಂ!
ಜಾಗೆಂ ಜಾತಾನಾ....,
"ರಾಯನ್....!"
ವ್ಹಯ್ ಪಯ್ಲೆಂ ಪೋನ್ ರಾಯನಾಚೆಂ!
ತಾಚ್ಯಾ ಪೊನಾಕ್ ಆಪ್ಣೆ ಮಧೆಂಚ್ ಭಂಧ್ ಕರಯಿಲ್ಲೊ ಮಿಶೇಲಾಕ್ ಉಡಾಸ್ ಆಸಾ.
ತ್ಯಾ ಉಪ್ರಾಂತ್.....?
ಜಿಮ್ಮಿ...!
ತ್ಯಾ ಉಪ್ರಾಂತ್......?
ಶೀತಲ್.......!
ವ್ಹಯ್! ಶೀತಲಾನ್ ಆಪ್ಣಾಚಿ ಆನಿ ಆಪ್ಲ್ಯಾ ಆಜ್ಯಾಚಿ ಖಬಾರ್ ಘೆತ್ಲ್ಲಿ. ತಾಚ್ಯೆ ಸವೆಂ ಮಾಧವ ಅಂಕಲ್, ಶೀತಲಾಚೊ ಬಾಪಯ್.... ತಾಣೆಂಯ್ ಪೊನಾರ್ ಆಪ್ಣಾಕ್ ಭುಜಾವಣ್ ದಿಲ್ಲಿ. ಶೀತಲಾಚಿ ಆವಯ್ ಆನಿ ತಾಚೆ ಭಾವ್ಯ್ ಉಲಯಿಲ್ಲೆ.
ಧಾ ವೊರಾಂಕ್ ಆಪ್ಣಾಕ್ ಏರ್ಪೊರ್ಟಾಕ್ ವಚೊಂಕ್ ಆಸಾ ಮ್ಹಣೊನ್ ಶೀತಲ್ ಸಾಂಗ್ತಾಲೆಂ. ವಿಶು, ತಾಚೊ ನೊವ್ರೊ ಆಜ್ಚ್ ಮುಂಬಯಿ ಪಾಟಿಂ ವೆಚಾರ್ ಆಸ್ಲ್ಲೊ. ಶೀತಲಾಕ್ ಪೊರ್ವಾಂ ಬುದ್ವಾರಾ ಕುಳಾರಾ ಥಾವ್ನ್ ಆಪವ್ನ್ ವರ್ಚಿ ವಿಲೆವರಿ ಆಸ್ಲ್ಲಿ. ನೊವ್ರ್ಯಾಕ್ ಏರ್ಪೊರ್ಟಾಕ್ ಪಾವವ್ನ್ ಆಪ್ಣಾಕ್ ಮೆಳೊಂಕ್ ಯೆತಾಂ ಮ್ಹಣೊನ್ ಶೀತಲಾನ್ ಮಿಶೇಲಾಕ್ ಸಾಂಗ್ಲ್ಲೆಂ. ಶೀತಲಾಚಾ ನೊವ್ರ್ಯಾಕ್ ಸಾಡೆ ಇಕ್ರಾ ವೊರಾಂಚೆಂ ಪ್ಲೈಟ್. ಪ್ಲೈಟ್ ಟೇಕ್ ಆಫ್ ಜಾತಾ ಪಾಸೊನ್ ಶೀತಲ್ ಕಾಂಯ್ ಏರ್ಪೊರ್ಟಾ ಥಾವ್ನ್ ಯೆಂವ್ಚೆಂ ನಾ. ತ್ಯಾ ಉಪ್ರಾಂತ್.....? ತ್ಯಾ ಉಪ್ರಾಂತ್ ಶೀತಲ್ ಹಾಂಗಾ ಪಾವ್ತಾನಾ ಉಣ್ಯಾರ್ ಉಣೆಂ ವೊರಾಂ ಬಾರಾ ತರ್ಯ್ ವ್ಹಾಜ್ತೆಲಿಂ!
ಮಿಶೇಲಾನ್ ಸಗ್ಳೆಂ ಲೇಖ್ ಘಾಲ್ಲೆಂ.
ಶೀತಲ್ ಎಕಾ ಕುಶಿನ್ ಮಿಶೇಲಾಚಾ ಆಜ್ಯಾಚಾ ಭಲಾಯ್ಕೆಕ್ ಉಚಾರುನ್ ಮಿಶೆಲಾಕ್ ಸಮಾಧಾನ್ ಕರ್ತಾಲೆಂ ಜಾಲ್ಯಾರ್, ದುಸ್ರ್ಯಾ ಕುಶಿನ್ ಆಪ್ಲ್ಯಾ ಕಾಜಾರಾಚ್ಯಾ ಪಾರ್ಟೆಂತ್ ಆಪ್ಣಾಚೆಂ ಚಡ್ ಲಾಗ್ಶಿಲೆಂ ಇಶ್ಟಿಣ್ ಜಾವ್ನ್ಯ್ ಮಿಶೇಲಾನ್ ಆಪ್ಣಾಚಾ ಕಾಜಾರಾಚಾ ಪಾರ್ಟೆಂತ್ ಹಾಜರ್ ಜಾಂವ್ಚೆಂ ಭಾಗ್ ಹೊಗ್ಡಾವ್ನ್ ಘೆತ್ಲ್ಲ್ಯಾಕ್ ಚುರ್ಚುರ್ತಾಲೆಂ. ಮಿಶೇಲಾಕ್ ಹ್ಯಾ ವಿಶಿಂ ಕಾಂಯ್ ಚುರ್ಚುರೆ ನಾತ್ಲ್ಲೆ. ತಾಕಾ ತಾಚ್ಯಾ ಆಜ್ಯಾಚಿ ಭಲಾಯ್ಕಿ ಚಡ್ ಗರ್ಜೆಚಿ ಜಾವ್ನ್ ಆಸ್ಲ್ಲಿ.
"ಮಿಶೇಲ್....!" ಭಾಯ್ರ್ ಜಿಪಾಚೊ ಆವಾಜ್ ಆಯ್ಕೊನ್ಯ್ ಅಜೂನ್ ಕುಜ್ನಾಂತ್ ಆಸ್ಲ್ಲ್ಯಾ ಮಿಶೇಲಾಕ್, ಭಾಯ್ರ್ ಥಾವ್ನ್ ಆಪ್ಣಾಕ್ ಆಪಯಿಲ್ಲೊ ತಾಳೊ ಆಯ್ಕಾಲೊ. ಆಜಿಯೆಚೊ ತಾಳೊ ತೊ. ಮಿಶೇಲಾನ್ ತ್ಯಾ ತಾಳ್ಯಾಕ್ ಕಾಂಯ್ ಜವಾಬ್ ದಿಲಿ ನಾ. ತಿ ತಾಚ್ಯಾ ಆಜಿಯೆಚಿ ಸದಾಂಚಿ ಸವಯ್. ಘರಾ ಭಿತರ್ ಪಾಂಯ್ ದವರ್ಲ್ಲೆಂಚ್ ’ಮಿಶೇಲ್’ ಮ್ಹಣೊನ್ ಆಪ್ಲ್ಯಾ ನಾತಿಕ್ ಆಪವ್ನ್ ತಿ ಘರ್ ಭಿತರ್ ಸರ್ತಾಲಿ.
"ಮಿಶೇಲ್.....?" ಪರ್ತ್ಯಾಕ್ ಆಜಿಯೆನ್ ಆಪ್ಣಾಕ್ ಆಪಯಿಲ್ಲೆಂ ಮಿಶೇಲಾಕ್ ಆಯ್ಕಾಲೆಂ.
"ಹಾಂವ್ ಕಿಚನಾಂತ್ ಆಸಾಂ!" ಕುಜ್ನಾ ಥಾವ್ನ್ಚ್ ಮಿಶೆಲಾನ್ ಜವಾಬ್ ದಿಲಿ.
ತಿತ್ಲ್ಯಾರ್!
ಭಾಯ್ಲ್ಯಾ ಸಾಲಾಂತ್ ಥಾವ್ನ್ ಕಸಲೆಂಗೀ ಅಸ್ಪಶ್ಟ್ ಉಲೊಣೆಂ ಮಿಶೇಲಾಚಾ ಕಾನಾಂಕ್ಪಡ್ಲೆಂ.
ಜಿಮ್ಮಿ.....?
ತೊ ಜಿಮ್ಮಿಚೊ ತಾಳೊ ನ್ಹಯ್! ತರ್ ಕೋಣ್? ಮಾಂಯ್ ಸಾಂಗಾತಾ ಕೋಣ್ ಆಯ್ಲಾಂ......?
ಚಿಂತ್ಲೆಲ್ಯಾ ಮಿಶೇಲಾನ್ ತಶೆಂಚ್ ತ್ಯಾ ಭಾಯ್ಲ್ಯಾ ಉಲೊವ್ಣ್ಯಾಕ್ ಕಾನ್ ದಿಲೆ. ಭಾಯ್ಲೆಂ ಉಲವ್ಣೆಂ ಆತಾಂ ತಾಚ್ಯಾ ಘರಾಚಾ ಸೊಪ್ಯಾರ್ ಚಡ್ಲ್ಲೊ ಆನ್ಭೋಗ್ ಜಾವ್ನ್ ಮಿಶೇಲಾಕ್ ಚಡ್ ಕಾಂಯ್ ಸಮ್ಜಾನಾಸ್ತಾನಾ ವೆತಾನಾ, ಮತಿಂತ್ ಉಟ್ಲ್ಲ್ಯಾ ಉದ್ವೇಗಾಕ್ ದಾಂಬುನ್ ಧರುಂಕ್ ಸಲ್ವೊನ್, ಭಾಯ್ರ್ ಆಜಿಯೆ ಸಾಂಗಾತಾ ಕೋಣ್ ಆಯ್ಲಾಂ ತೆಂ ಪಳಂವ್ಚಾ ಖಾತಿರ್ ಕುಜ್ನಾ ಥಾವ್ನ್ ತೆಂ ಭಾಯ್ರ್ ಆಯ್ಲೆಂ.
"ಬಸ್ ಬಾ ಬಸ್!" ಆಜಿಯೆಚೊ ತಾಳೊ.
ಆಜಿ ಕೊಣಾಕ್ ಬಸಯ್ತಾ ಜಾವ್ಯೆತ್?. ಸಟ್ಟ್ ಕರುನ್ ಭಾಯ್ರ್ ವೆಚ್ಯಾ ಪರಿಂಯ್ ನಾತ್ಲ್ಲೆಂ.
"ಥ್ಯಾಂಕ್ಸ್ ಆಂಟಿ!"
ಆತಾಂ ಆಯ್ಕಾಲ್ಲ್ಯಾ ತಾಳ್ಯಾನ್ ಮಿಶೇಲಾಕ್ ರಾವ್ಲೆಲ್ಯಾ ಕಡೆಚ್ ಸ್ತಬ್ಧ್ ಕೆಲೆಂ.
ಚಿರಪರಿಚಿತ್ ತಾಳೊ!
"ರಾಯನ್....!" ಮಿಶೇಲ್ ಮನಾಂತ್ಚ್ ಉದ್ಗಾರ್ಲೆಂ.
"ರಾಯನ್ ಹಾಂಗಾ? ಆಮ್ಚಾ ಘರಾ.....? ತೆಂಯ್ ಮಾಂಯ್ ಸಾಂಗಾತಾ?" ಮಿಶೇಲಾಕ್ ಕಾಂಯ್ಚ್ ಸಮ್ಜಾನಾ ಜಾಲೆಂ. ತಾಕಾ ಆತಾಂ ಭಾಯ್ರ್ ಮೆಟಾಂ ಕಾಡುಂಕ್ಯ್ ಸಾದ್ಯ್ ಜಾಲೆಂ ನಾ. ತಶೆಂಚ್ ಪಾಟಿಂ ಮೆಟಾಂ ಕಾಡ್ಲ್ಲೆಂ ಮಿಶೇಲ್ ಪರ್ತ್ಯಾಕ್ ಕುಜ್ನಾಕ್ ಆಯ್ಲೆಂ.
"ಆಸ್ಪತ್ರೆಕ್ ಗೆಲ್ಲ್ಯಾ ಮಾಂಯ್ಕ್ ಹೊ ರಾಯನ್ ಖಂಯ್ ಮುಕಾರ್ ಪಡ್ಲೊ?" ಮಿಶೇಲಾಚಾ ಆಪ್ಲ್ಯಾಚ್ ಸವಾಲಾಕ್ ತಾಕಾ ಜಾಪ್ ಜಳ್ಕಾಲಿ ನಾ. ಪರ್ತ್ಯಾಕ್ ಕುಜ್ನಾಕ್ ಆಯಿಲ್ಲ್ಯಾ ತಾಕಾ ಆತಾಂ ಕಿತೆಂ ಕರ್ಚೆಂ ತೆಂ ಕಾಂಯ್ ಸಮ್ಜಾಲೆಂ ನಾ. ತೆಂ ಆಪ್ಲ್ಯಾ ನಾಸ್ಟ್ಯಾಚೆಂ ಸಂಪೂರ್ಣ್ ವಿಸ್ರೊನ್ ಗೆಲೆಂ.
ತಿತ್ಲ್ಯಾರ್!
ಮಿಶೇಲಾಕ್ ಸೊಧುನ್ ಎಸ್ತೆಲ್ ಕುಜ್ನಾ ತೆವ್ಶಿಂ ಆಯ್ಲಿ.
"ಮಿಶೇಲ್....! ರಾಯನ್ ಆಯ್ಲಾಗೊ ಪುತಾ!" ಕುಜ್ನಾಂತ್ ವೊಗೆಂಚ್ ಉಭೆಂ ಆಸ್ಲೆಲ್ಯಾ ಮಿಶೇಲಾಕ್ ಪಳವ್ನ್ ಎಸ್ತೆಲಾನಾಪ್ಲ್ಯಾ ನಾತಿಕ್ ಖಬಾರ್ ದಿಲಿ.
"ಕಿತೆಂಗೋ ಭಲಾಯ್ಕಿ ಬರಿ ನಾಂಯೇಗೋ....?" ಮಿಶೇಲಾಕ್ ಪಳಯಿಲ್ಲ್ಯಾ ಎಸ್ತೆಲಾಕ್ ತೆಂ ಜಿವಾಂತ್ ಹಾಲ್ಲ್ಲ್ಯಾ ಪರಿಂ ದಿಸ್ಲೆಂ. ತಿಕಾ ಆಪ್ಲ್ಯಾ ನಾತಿಚೆರ್ ದುಬಾವ್ ಆಯ್ಲೊ.
"ಕಾಂಯ್ ಥೊಡೆಂ ಪಿಯೆಂವ್ಕ್ ಕರ್ ಪುತಾ!" ಸಾಂಗ್ಲ್ಲಿ ಎಸ್ತೆಲ್ ಆತಾಂ ಕುಜ್ನಾ ಥಾವ್ನ್ ಭಾಯ್ರ್ ಗೆಲಿ.
ಮಿಶೇಲಾಕ್ ಕಿತೆಂ ಕರ್ಚೆಂ ತೆಂ ಕಳ್ಳೆಂ ನಾ. ಯಾಂತ್ರೀಕ್ರತ್ ರಿತಿನ್ ಮ್ಹಳ್ಳ್ಯಾ ಪರಿಂ ತಾಣೆಂ ಕುಜ್ನಾಂತ್ಲೊ ಫ್ರಿಜ್ಜ್ ಉಗ್ತೊ ಕೆಲೊ. ತಾಂತ್ಲೆಂ ಥೊಡೆಂ ಥಂಡ್ ಉದಾಕ್ ಕಾಡುನ್, ತಾಕಾ ಆರೆಂಜ್ ಕಾನ್ಸಂಟ್ರೇಟಾಂತ್ ಭರ್ಸುನ್, ತೆಂ ಗ್ಲಾಸಾಂಕ್ ವೊತುನ್ ತಾಣೆಂ ಆಜಿಯೆಕ್ ಆನಿ ರಾಯನಾಕ್ ಪಿಯೆಂವ್ಕ್ ತಯಾರ್ ಕೆಲೆಂ.
ಎಸ್ತೆಲ್ ಅಜೂನ್ಯ್ ಭಾಯ್ರ್ ಬಸೊನ್ ಆಸ್ಲ್ಲಿ. ತಿ ರಾಯನಾ ಲಾಗಿಂ ಉಲಂವ್ಚಾರ್ ಪಡ್ಲ್ಲಿ. ಆತಾಂ ಮಿಶೆಲಾಕ್ ಆಪ್ಣೆಂ ತಯಾರ್ ಕೆಲ್ಲೆಂ ಥಂಡ್ ಪೀವನ್ ಭಾಯ್ರ್ ಹಾಡಿನಾಸ್ತಾನಾ ದುಸ್ರೊ ಉಪಾಯ್ ನಾತ್ಲ್ಲೊ. ತೆಂ ಆತಾಂ ಸವ್ಕಾಸ್ ಥಂಡ್ ಪೀವನ್ ಘೆವ್ನ್ ಭಾಯ್ರ್ ಆಯ್ಲೆಂ.
"ಹಲೋ....?"
ಸಾರ್ಕೆ ದೊಳ್ಯಾಂಕ್ ದೊಳೆ ಮೆಳವ್ನ್ ಪಳಂವ್ಚೆಂ ಧಯ್ರ್ ನಾತ್ಲೆಲ್ಯಾ ಪರಿಂ ಎಕಾ ಖಿಣಾಕ್ ಮಾತ್ರ್ ರಾಯನಾಕ್ ಪಳೆಲ್ಲ್ಯಾ ಮಿಶೇಲಾನ್ ರಾಯನಾಕ್ ವಂದನ್ ಕೆಲೆಂ. ತಾಚ್ಯಾ ದೊಳ್ಯಾ ದಿಶ್ಟೆಂತ್ ಲಜ್ ಮ್ಹಳ್ಳಿ ತಿ ಉಟೊನ್ ಯೇವ್ನ್, ತಿ ಲಜ್ ಚಲಿಯೆಚಾ ಸಂಸಾರಾಂತ್ಲೆ ಅತೀ ಊಂಚ್ ಆನಿ ಅತೀ ಸೊಭಿತ್ ಅಲಂಕಾರ್ ಮ್ಹಳ್ಳ್ಯಾ ಭಾಶೆನ್ ಮಿಶೇಲಾಚಾ ತೊಂಡಾರ್ ರಾಜ್ ಕರುಂಕ್ ಲಾಗ್ಲೆಂ. ಹ್ಯಾ ಸೊಭಾಯೆ ಥಾವ್ನ್ ಮಿಶೇಲಾಚಾ ತೊಂಡಾಚೆರ್ ಏಕ್ ವಿಚಿತ್ರ್ ಸೊಭಾಯ್ ಫುಲೊನ್ ಆಯಿಲ್ಲ್ಯಾ ಪರಿಂ ದಿಸ್ತಾಲಿ.
"ಹಾಯ್! ಕಶೆಂ ಆಸಾಯ್?" ಹಾಸೊನ್ಚ್ ಪಾಟಿಂ ವಂದನ್ ಕೆಲ್ಲ್ಯಾ ರಾಯನಾಚ್ಯಾ ತೊಂಡಾರ್ ಆಜ್ ಎಕಾ ಥರಾಚೊ ಸಂತೊಸ್ ಉಮಾಳ್ತಾ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ದಿಸೊನ್ ಆಯ್ಲೊ. ತಾಕಾ ತಶೆಂಚ್ ರಾಯನಾಕ್ ಪಳಂವ್ಕ್ ಸಾದ್ಯ್ ಜಾಲೆಂ ನಾ.
"ಫೈನ್!" ಮಟ್ವಿ ಸಾದಿ ಜವಾಬ್ ದಿಲ್ಲ್ಯಾ ಮಿಶೇಲಾನ್ ಥಂಡ್ ಪೀವನಾಚೊ ಗ್ಲಾಸ್ ರಾಯನಾಕ್ ವೊಡ್ಡಾಯ್ಲೊ.
"ಥ್ಯಾಂಕ್ಸ್!"
ರಾಯನಾನ್ ಏಕ್ ಗ್ಲಾಸ್ ಹಾತಿಂ ಘೆತಾನಾ ದುಸ್ರೊ ಗ್ಲಾಸ್ ಮಿಶೇಲಾನ್ ಅಜಿಯೆಕ್ ದಿಲೊ.
"ಆಬ್ ಕಸೊ ಆಸಾ ಮಾಂಯ್...?" ಮಿಶೇಲ್ ಅಜೂನ್ ಆಜ್ಯಾಕ್ ಹುಸ್ಕೆತಾಲೆಂ.
"ತುಂ ಹಾಸ್ಪಿಟಲಾಕ್ ಯೇಂವ್ಕ್ ನಾಂಯ್?" ಮಧೆಂಚ್ ಉಲಯಿಲ್ಲೊ ರಾಯನ್ ಪರ್ತ್ಯಾಕ್ ಮಿಶೇಲಾ ತೆವ್ಶಿಂ ಘುಂವ್ಲೊ.
"ಆಜ್ಯಾಚೆಂ ಚಿಂತುನ್ ಸಗ್ಳಿ ರಾತ್ ನಿದೊಂಕ್ ನಾತ್ಲ್ಲೆಂ!" ಸಾಂಗ್ಲ್ಲಿ ಎಸ್ತೆಲ್, ಭಾಯ್ರ್ ಜಿಪಾ ತೆವ್ಶಿಂ ಪಳವ್ನ್, ಥಂಯ್ಚರ್ ತಿಕಾ ಜಿಮ್ಮಿ ದಿಸೊಂಕ್ ನಾತ್ಲಲೊ ಕಳೊನ್ "ಜಿಮ್ಮಿ ಖಂಯ್ ಗೆಲೊ...?" ಅಪ್ಲೆಸ್ತಕಿಂ ತಿಣೆಂ ಸವಾಲ್ ಕೆಲೆಂ.
"ಕೋಣ್....? ತುಮ್ಚೊ ಡ್ರೈವರ್...!?" ಪರ್ತ್ಯಾಕ್ ರಾಯನ್ ಮಧೆಂ ಉಲಯ್ಲೊ. "ತೊ ಭಾಯ್ರ್ ಗೆಲೊ ದಿಸ್ತಾ!" ಆಪ್ಲ್ಯಾಚ್ ಸವಾಲಾಕ್ ಆಪ್ಣೆಚ್ ಜವಾಬ್ ದಿಲ್ಲ್ಯಾ ರಾಯನಾನ್ ಮುಕ್ಲ್ಯಾ ಗೇಟಿ ತೆವ್ಶಿಂ ಆಪ್ಲಿ ನದರ್ ಮಾರ್ಲಿ.
"ಭಾಯ್ರ್ ಗೆಲೊ? ಭಾಯ್ರ್ ಖಂಯ್ ಗೆಲೊ ತೊ?" ಎಸ್ತೆಲಾಕ್ ಕಾಂಯ್ ಸಮ್ಜಾಲೆಂ ನಾ.
"ತುಮಿಂ ಉಲಯಾ...! ಹಾಂವ್ ಚೆಡ್ಯಾಕ್ ಕಾಂಯ್ ಪೊಟಾಕ್ ತಯಾರ್ ಕರ್ತಾಂ. ತಾಕಾ ಆಸ್ಪತ್ರೆಕ್ ವಚೊಂಕ್ ಜಾಯ್!" ಎಸ್ತೆಲ್ ಸೊಫಾ ವಯ್ಲಿ ಉಟೊನ್ ಉಭಿ ಜಾಲಿ.
"ತುಜಿ ಭಲಾಯ್ಕಿ ಕಶಿ ಆಸಾ?" ಎಸ್ತೆಲ್ ಭಿತರ್ ವೆತಾನಾ, ರಾಯನ್ ಮಿಶೇಲಾ ತೆವ್ಶಿಂ ಘುಂವ್ಲೊ.
"ತಶೆಂ ಕಾಂಯ್ ನಾ. ಹಾಂವ್ ಬರಿಂ ಆಸಾಂ!" ಮಿಶೇಲಾನ್ ಆಪ್ಲ್ಯಾ ಲಜೆಲ್ಲ್ಯಾ ದೊಳ್ಯಾಂಚಾ ದಿಶ್ಟೆಕ್ ರಾಯನಾಚಾ ದೊಳ್ಯಾಂ ಥಾವ್ನ್ ಚುಕಂವ್ಚೆಂ ಪ್ರಯತ್ನ್ ಕೆಲೆಂ.
"ಕಿತೆಂ....! ಆಬಾಚೆಂ ಚಿಂತುನ್ ದುಖೇಸ್ತ್ ಜಾಲಾಂಯ್...?"
"..........."ರಾಯನಾಚಾ ಸವಾಲಾಕ್ ಮಿಶೇಲಾನ್ ಕಾಂಯ್ ಜವಾಬ್ ದಿಲಿ ನಾ. ರಾಯನ್ ಅಸೊಚ್ಚ್ ಆಪ್ಣಾಲಾಗಿಂ ಉಲಂವ್ಕ್ ಸೊಧ್ತಾ ಮ್ಹಣೊನ್ ತಾಕಾ ಕಳಿತ್ ಜಾಲೆಂ.
"ಹಿ ಇಸ್ ಎಬ್ಸಲ್ಯೂಟ್ಲಿ ಫೈನ್! ಹಾವೆಂ ಪಳೆಲಾಂ ತಾಕಾ! ದಾಕ್ತೆರಾಲಾಗಿಂಯ್ ಹಾಂವ್ ಉಲವ್ನ್ ಆಯ್ಲಾಂ! ಹಿ ಇಸ್ ಓ.ಕೆ.!" ರಾಯನಾನ್ ಮಿಶೇಲಾಕ್ ಧಯ್ರ್ ದಿಲೆಂ. ಆಪ್ಲ್ಯಾ ಆಜ್ಯಾಚೆಂ ಚಿಂತುನ್ ಮಿಶೇಲ್ ಖಂತಿನ್ ಆಸಾ ಮ್ಹಳ್ಳೆಂ ತಾಕಾ ಕಳೊನ್ ಆಯ್ಲೆಂ. ಮಿಶೇಲಾಚಾ ತೊಂಡಾಕ್ ಪಳೆವ್ನ್ ತೊ ತಾಕಾ ಸಮ್ಜೊಂಕ್ ಸಕ್ತಾಲೊ.
ರಾಯನಾಚಿಂ ಉತ್ರಾಂ ಆಯ್ಕೊನ್ ಮಿಶೇಲ್ ವಿಜ್ಮಿತ್ ಜಾಲೆಂ. ಹೊ ರಾಯನ್ ಕಾಲ್ ಪಾಸೊನ್ ಆಪ್ಣಾಕ್ ಇತ್ಲೊ ಅಪರಿಚಿತ್ ಆಸ್ಲ್ಲೊ ಆಜ್ ಎಕಾನ್ ಏಕ್ ಆಪ್ಲ್ಯಾ ಕುಟ್ಮಾ ಸಾಂಗಾತಾ ಆಶೆಂ......? ಮಿಶೇಲಾಕ್, ಕಾಲ್ಚ್ಯಾ ತ್ಯಾ ತಾಂಚಾ ಪಯ್ಲ್ಯಾ ಭೆಟೆಚೊ ಉಡಾಸ್ ಆಸ್ಲ್ಲೊ. ಕಾಲ್ ಜಾಲ್ಯಾರ್ಯ್ ತ್ಯಾ ಶೀತಲಾಚಾ ಕಾಜಾರಾ ಸಂಭ್ರಮಾಚಾ ಪಾರ್ಟೆಂತ್ ರಾಯನ್ ಅಚಾನಕ್ ಜಾವ್ನ್ ಹಾಜರ್ ಜಾಲ್ಲೊ ತೊ ಆಪ್ಣಾಚಾ ಕುಟ್ಮಾ ಸಾಂಗಾತಾ ಆಸೊ ಭರ್ಸಾಲ್ಲೊ ಕೀ....
"ತುಂ ಹಾಸ್ಪಿಟಲಾಕ್ ಗೆಲ್ಲೊಯ್...?" ಆಪ್ಲ್ಯಾ ವಿಜ್ಮಿತ್ಕಾಯೆಕ್ ಮಿಶೇಲಾನ್ ರಾಯನಾಚಾ ಮುಕಾರ್ ದವರ್ಲೆಂ.
"ವ್ಹಯ್!"
"ಆಬಾಕ್ ಪಳಂವ್ಕ್...?" ಮಿಶೆಲಾಚಾ ತಾಳ್ಯಾಂತ್ ಆಪ್ಣಾಕ್ ಪಾತ್ಯೆಂವ್ಕ್ ಜಾಯ್ನಾಂ ಮ್ಹಣ್ಚ್ಯಾ ತಸಲೆಂ ಆಶ್ಚರ್ಯ್ ಆಸ್ಲ್ಲೆಂ.
"ಯ್ಯಾ....!" ರಾಯನಾಚಾ ತೊಂಡಾರ್ ಕಾಂಯ್ಚ್ ಬದ್ಲಾವಣ್ ನಾ.
"ತರ್ ತುಂ ಸಕಾಳಿಂ ಥಾವ್ನ್ ಹಾಸ್ಪಿಟಲಾತ್ ಆಸಾಯ್?" ಮಿಶೇಲಾಕ್ ಆಜಾಪ್ ಜಾಲೆಂ.
"ಎಕ್ಟುವಲೀ ಹಾಂವ್ ಸಾಕಾಳಿಂ ವಚೊಂಕ್ ನಾ! ಕಾಲ್ ಪಾರ್ಟಿ ಕಾಬಾರ್ ಜಾತಾನಾ ಲೇಟ್ ಜಾಲ್ಲೊ. ತಶೆಂ ಹೊಟೆಲಾಂತ್ ಹಾವೆಂ ರೂಮ್ ಬಾಯಾಕ್ ಸಾಕಾಳಿಂ ಮ್ಹಾಕಾ ಜಾಗಂವ್ಚೊ ಟಾಯ್ಮಿಂಗ್ ಸಾಂಗೊಂಕ್ ವಿಸ್ರಾಲ್ಲೊಂ. ತಶೆಂ ಸಾಕಾಳಿಂ ಉಟ್ತಾನಾ ಲೇಟ್ ಜಾಲೊ. ತಿತ್ಲ್ಯಾರ್ ಮಾಧವ ಅಂಕಲಾಚೆಂ ಪೋನ್ ಆಯ್ಲೆಂ. ಹಾಸ್ಪಿಟಲಾಕ್ ವಚೊನ್ ಯೇವ್ನ್ ಮೆಳ್ತಾಂ ಮ್ಹಣಾಲೊ. ಮ್ಹಾಕಾಯ್ ಅಂಕಲಾಕ್ ಪಳೆಯಾಂ ಮ್ಹಣೊನ್ ಮನ್ ಜಾಲೆಂ ತಶೆಂ ಹಾಂವ್ಯ್ ಆಸ್ಪತ್ರೆಕ್ ಭಾಯ್ರ್ ಸರ್ಲೊಂ!"
"ಪುಣ್ ಹಾಸ್ಪಿಟಲಾಂತ್ ವಿಸಿಟಿಂಗ್ ಹಾವರ್ಸ್ ಸಿಕ್ಸ್ ಟು ಸೆವೆನ್ ಪಾಸೊನ್ ಮಾತ್ರ್!" ಮಿಶೇಲಾಚಿ ಮತ್ ರಾಯನಾಕ್ ಸಾರ್ಕೆಂಚ್ ಪಾರ್ಕುಂಚಾಂತ್ ಮೆತೆರ್ ಜಾಲ್ಲಿ.
ಮಿಶೇಲಾಚಿಂ ಉತ್ರಾಂ ಆಯ್ಕೊನ್ ರಾಯನಾನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ.
"ತುಕಾ ತುಜ್ಯಾ ಆಬಾಕ್ ಪಳಂವ್ಕ್ ಜಾಯ್...?"
"ಆತಾಂ.....?"
"ಯ್ಯಾ....!"
"ಬಟ್ ಹೌ....?"
"ತೆಂ ತುಕಾ ಕಿತ್ಯಾಕ್ ಪಡೊನ್ ಗೆಲಾಂ ಮಿಶೇಲ್? ತುಕಾ ಹಾಸ್ಪಿಟಲಾಕ್ ವಚೊಂಕ್ ಜಾಯ್ ಜಾಲ್ಯಾರ್ ಸಾಂಗ್....!"
"ಆತಾಂ ನಾಕಾ ಹಾಂವ್ ಸಾಂಜೆರ್ ವೆತಾಂ!"
"ತುಕಾ ಪಳೆತಾನಾಚ್ ತುಂ ಮಸ್ತ್ ಟೆನ್ಶನಾರ್ ಆಸ್ಲೆಲ್ಯಾಪರಿಂ ದಿಸ್ತಾಯ್. ಡೋಂಟ್ ವರ್ರಿ! ಪುಣ್ ಏಕ್ ಮಾತ್ರ್ ಬರೆಂ ಜಾಲೆಂ. ತುಜ್ಯಾ ಆಬಾಕ್ ಜಾತಾ ತಿತ್ಲ್ಯಾ ವೆಗ್ಗಿಂ ಹಾಸ್ಪಿಟಲಾಕ್ ಪಾವಯಿಲ್ಲೆಂ! ದಾಕ್ತೆರ್ ಸಾಂಗ್ತಾಲೊ! ನಾ ಜಾಲ್ಯಾರ್ ಥೊಡೆ ಪ್ರಾಬ್ಲೆಮ್ಚ್ ಆಸ್ಲ್ಲೆ. ತುಮ್ಚೊ ಡ್ರೈವರ್ ಜಾವ್ಯೆತ್ ಮಾತ್ರ್! ಬ್ರೇವ್ ಬಾಯ್!"
ರಾಯನಾನ್ ಸಾಂಗ್ಲ್ಲೆಂ ಆಯ್ಕಾತಾನಾ ಸವ್ಕಾಸ್ ಮಿಶೇಲಾಚಿ ಮತ್ ಜಿಮ್ಮಿಚಾ ತೆವ್ಶಿಂ ಧಾಂವ್ಲಿ. ನಿಜಾಯ್ಕ್ಯ್ ಜಿಮ್ಮಿನ್, ಕಾಲ್ಚ್ಯಾ ಸಾಂಜೆರ್ ಎಕ್ಲ್ಯಾನ್ ಜೆರೊಮಾಕ್ ಆಪ್ಲ್ಯಾ ಹಾತಾಂನಿ ಉಕ್ಲುನ್ ಹಾಡುನ್ ಜಿಪಾರ್ ಘಾಲ್ಲೆಂ. ಜರ್ ತರ್ ತ್ಯಾ ವಗ್ತಾ ಖಂಯ್ಚರ್ಯ್ ಗಳಾಯ್ ಜಾಲ್ಲಿ ಜಾಲ್ಯಾರ್....?
"ಚೆಡೊ ಆಯ್ಲೊಯೆಗೊ ಮಿಶೇಲ್...?"
ಭಿತರ್ ಥಾವ್ನ್ ಆಜಿಯೆಚೊ ತಾಳೊ ಆಯ್ಕೊನ್ ಯೆತಾನಾ ಬಸ್ಲೆಲ್ಯಾ ಕಡೆನ್ ಥಾವ್ನ್ಚ್ ಭಾಯ್ರ್ ದೀಶ್ಟ್ ವೆಲ್ಲ್ಯಾ ಮಿಶೇಲಾಕ್ ಜಿಮ್ಮಿ ಖಂಯ್ಚರ್ಯ್ ನದ್ರೆಕ್ ಪಡ್ಲೊ ನಾ.
"ಭಿಲ್ಕುಲ್ ಉಲಯ್ನಾ ತೊ!" ರಾಯನಾನ್ ಮಿಶೇಲಾಕ್ ಪಳವ್ನ್ ಸಾಂಗ್ಲೆಂ.
"ತೊ ತಸೊಚ್! ಆಬಾಕ್ ಮಾತ್ರ್ ಜಾತಾ ತಾಚೆಲಾಗಿಂ.....!"
"ಶೀತಲಾನ್ ಪೋನ್ ಕೆಲ್ಲೆಂ....?"
"ಧಾ ವೊರಾಂಕ್ ಏರ್ಪೊರ್ಟಾಕ್ ವಚೊಂಕ್ ಆಸಾ ಮ್ಹಣ್ತಾಲೆಂ. ಮ್ಹಾಕಾ ದಿಸ್ತಾ ತಿಂ ಎದೊಳ್ ಏರ್ಪೊರ್ಟಾಕ್ ಪಾವ್ಲಿಂ ಆಸ್ತೆಲಿಂ!"
"ಹಾವೆಂ ಮುಂಬಯ್ ವೆಚೆಂ ಕ್ಯಾನ್ಸಲ್ ಕೆಲೆಂ!" ರಾಯನ್ ಥೊಡೊ ರಿಲ್ಯಾಕ್ಸ್ ಜಾಲ್ಲ್ಯಾ ಪರಿಂ ದಿಸ್ಲೊ.
"ಮುಂಬಯ್ ವೆಚೆಂ....?"
"ಆನಿ ಚಾರ್ ದೀಸ್ ಹಾಂವ್ ಹಾಂಗಾಚ್ ಆಸ್ತಲೊಂ!"
"ಕಿತೆಂ? ಆಶೆಂಚ್...?"
"ಇತ್ಲ್ಯಾ ಸೊಭಾಯೆಚಾ ಗಾಂವ್ಚಿ ಸೊಭಾಯ್ ಹಾಚ್ಯಾ ಪಯ್ಲೆಂ ಹ್ಯಾ ದೊಳ್ಯಾಂನಿ ಪಾರ್ಕಿಲ್ಲಿ ನಾ. ಆಚಾನಕ್ ಆತಾಂ....! ಬ್ಯೂಟಿಪುಲ್!" ಮಿಶೇಲಾಕ್ಚ್ ಪಳವ್ನ್ ರಾಯನಾನ್ ಉದ್ಗಾರ್ತಾನಾ ಕಿತ್ಯಾಕ್ಗೀ ರಾಯನ್ ಆಪ್ಣಾಚಾ ಸೊಭಾಯೆಕ್ ವರ್ಣಿತಾ ಮ್ಹಳ್ಳ್ಯಾಪರಿಂ ಮಿಶೇಲಾಕ್ ಭೊಗ್ತಾನಾ, ಎದೊಳ್ ರಾಯನಾ ಲಾಗಿಂ ಉಲವ್ನ್ ತಾಚಿ ಸಳಾವಳ್ ಜಾಲ್ಲ್ಯಾ ವರ್ವಿಂ, ಮಿಶೇಲಾಚಾ ಮುಖಮಳಾರ್ ಪಯ್ಲೆಂ ಆಸ್ಲ್ಲಿ ತಿ ಲಜ್ ವ್ಹಳೂ ನಿತ್ಳೊಂಕ್ ಲಾಗ್ಲ್ಲಿ ತಿ, ಆತಾಂ ಹ್ಯಾ ರಾಯನಾಚಾ ಉತ್ರಾಂಕ್ ಆಯ್ಕೊನ್ ಪರ್ತ್ಯಾಕ್ ತಾಚ್ಯಾ ವದನಾರ್ ಲಜೆನ್ ಪಾಲಂವ್ ಪಾಂಗುರ್ಲೊ. ತಾಚ್ಯಾ ಪಾಟ್ಲ್ಯಾನ್ ರಾಯನಾನ್ ಆಪ್ಣಾಕ್ ಹೊಗಳ್ಸಿಲ್ಲ್ಯಾ ಪರಿಂ ಜಾತಾನಾ, ಆಪುಣ್ಯ್ ಸೊಭಿತ್ ಆಸಾಂ ತಶೆಂ ಜಾವ್ನ್, ನಿಜಾಯ್ಕ್ಯ್ ಮಿಶೇಲ್ ಥೊಡ್ಯಾ ಖಿಣಾಂಕ್ ಆಪ್ಣಾಕ್ಚ್ ವಿಸ್ರಾಲೆಂ. ತಾಚ್ಯಾ ಜಿವಾಕ್ ತೆಂ ಬರೆಂ ಲಾಗ್ಲೆಂ. ತಾಚಿ ಮತ್ ಸಂತೊಸಾನ್ ಉಭೊಂಕ್ ಲಾಗ್ಲಿ.
ತಿತ್ಲ್ಯಾರ್!
ತಾಂಚಾ ದೊಗಾಂಯ್ಚ್ಯಾ ಉಲೊವ್ಣ್ಯಾಕ್ ಮೊಡುಂಕ್ಚ್ ಮ್ಹಳ್ಳ್ಯಾಪರಿಂ ರಾಯನಾಚಾ ಬೊಲ್ಸಾಂತ್ಲೆಂ ಸೆಲ್ ಪೋನ್ ವ್ಹಾಜ್ಲೆಂ.
"ಎಕ್ಸ್ಕ್ಯೂಜ್ ಮಿ...!" ರಾಯನಾನ್ ಆಪ್ಲ್ಯಾ ಬೊಲ್ಸಾಂತ್ಲೆಂ ಪೋನ್ ಬಾಯ್ರ್ ಕಾಡ್ಲೆಂ. ಪೊನಾಚ್ಯಾ ಡಿಸ್ಪ್ಲೇ ವಯ್ರ್ ಏಕ್ ಪಾವ್ಟಿಂ ನದರ್ ಮಾರುನ್,
"ಹಾಂ ರಘು.....!" ಉಲಯ್ಲೊ ತೊ.
".........."
ತ್ಯಾ ಕುಶಿನ್ ಲಾಂಬ್ ಉಲವ್ಣೆ ಚಲ್ತಾಲೆಂ. ಬೋವ್ಶಾ ಚಡ್ ಗರ್ಜೆಚೆಂ ಟೆಲಿಪೋನ್ ಆಸ್ತೆಲೆಂ..... ಮಿಶೇಲಾನ್ ಚಿಂತ್ಲೆಂ.
"ಅಚ್ಚಾ....!? ಉಪ್ರಾಂತ್.....?"
ರಾಯಾನಾ ತೆವ್ಶಿಂಚ್ ಪಳವ್ನ್ ಆಸ್ಲ್ಲ್ಯಾ ಮಿಶೇಲಾ ತೆವ್ಶಿಂ ಅಚಾನಕ್ ರಾಯನಾಚಿ ನದರ್ ಗೆಲಿ. ತೀಕ್ಷ್ಣ್ ನದರ್! ಜಶೆಂ ದುರ್ಸುಭಾಣಾಚೊ ತೀರ್ ವೊಡುನ್ ಜೊಕುನ್ ದರ್ಲೆಲ್ಯಾ ಭಾಶೆನ್!
ತಿತ್ಲೆಂಚ್!
ಮಿಶೆಲಾನ್ ಆಪ್ಲಿ ನದರ್ ಪಾಟಿಂ ಕಾಡ್ಲಿ.
"........." ತ್ಯಾ ಕುಶಿನ್ ಅಜೂನ್ ಉಲೊಣೆಚಲ್ತಾಲೆಂ ಆನಿ ರಾಯನ್ ಆಯ್ಕಾತಾಲೊ.
"ಬರೆಂ ಜಾಲೆಂ! ....ಆಶೆಂಚ್ಚ್ ಜಾತೆಲೆಂ ಮ್ಹಣೊನ್ ಮ್ಹಾಕಾ ಕಳಿತ್ ಆಸ್ಲ್ಲೆಂ! ತರ್.... ನಿರ್ಮಲ್ ವಾಂಚ್ಲೊ!"
".........."
"ತಾಕಾ ಮಸ್ತ್ ಲುಕ್ಸಾಣ್ ಜಾತೆಂ ಆಸ್ಲ್ಲೆಂ. .......ಹಾಂವೆಂ ತಾಕಾ ಪಯ್ಲೆಂಚ್ ಸಮ್ಜಾಯಿಲ್ಲೆಂ!"
".........."
"ಎಕ್ಟುವಲೀ ಹಾಂವ್ಯ್ ಆಜ್ಚ್ ವಿಶು ಸಾಂಗಾತಾ ಮುಂಬಯಿ ಪಾಟಿಂ ಯೆಂವ್ಚ್ಯಾರ್ ಆಸ್ಲ್ಲೊಂ. ದಿಸ್ ಇಸ್ ಎ ಸೆಕೆಂಡ್ ಗುಡ್ ನಿವ್ಸ್ ಫಾರ್ ಮಿ!"
".........."
"ನಾ ನಾ....! ಸಗ್ಳಿಂ ಆಜ್ ಮುಂಬಯಿ ಪಾವ್ತೆಲಿಂ! ಆತಾಂ ವೊರಾಂ ಕಿತ್ಲಿಂ ಜಾಲಿಂ? ಸಾಡೆ ಇಕ್ರಾ ವೊರಾಂಚೆಂ ಫ್ಲೈಟ್!" ಉಲಯ್ತಾಂ ಉಲಯ್ತಾಂ ರಾಯನನ್ ಆಪ್ಲ್ಯಾ ರಿಸ್ಟ್ ವಾಚಾಚೆರ್ ನದರ್ ಮಾರ್ಲಿ.
"ಪುಣ್...! ಹೆಂ ನಿಜಾಯ್ಕ್ಯ್ ಸರ್ಪ್ರೈಸ್! ಹೆಂ ಜಾಲೆಂ ತರ್ಯ್ ಕಶೆಂ....?" ಆಪ್ಲ್ಯಾ ವೊಂಟಕ್ ದಾಂತಾನ್ ಚಾಬೀತ್ ರಾಯನಾನ್ ವಿಚಾರ್ಲೆಂ.
"........."
"ಯೆತಾಂ! ಫಕತ್ತ್... ಚಾರ್ ದೀಸ್!"
"........"
"ಓ.ಕೆ. ದೆನ್!"
ಪೋನ್ ಡಿಸ್ಕನೆಕ್ಟ್ ಕೆಲ್ಲ್ಯಾ ರಾಯನಾಚಾ ತೊಂಡಾರ್ ಸೊಭಿತ್ ಹಾಸೊ ಉಟೊನ್ ರಾವ್ಲ್ಯೊ.
"ಮ್ಯಾಂಗಲೋರ್ ಇಸ್ ಕ್ವಾಯ್ಟ್ ಲಕ್ಕೀ ಫಾರ್ ಮಿ...!"
ಮಿಶೇಲಾಕ್ಚ್ ಪಳೆಲ್ಲ್ಯಾ ರಾಯನಾನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ. ಪುಣ್ ಮಿಶೇಲಾಕ್ ಮಾತ್ರ್ ಕಿತ್ಯಾಕ್ಗೀ ರಾಯನಾಚೊ ಹೊ ಹಿಶಾರೊ ಆಪ್ಣಾ ತೆವ್ಶಿಂ ಆಸಾ ಮ್ಹಳ್ಳ್ಯಾಪರಿಂ ಭಗ್ಲೆಂ. ತೆಂ ಕಾಂಯ್ ಉಲಯ್ಲೆಂ ನಾ.
"ಮುಂಬಯಿ ಥಾವ್ನ್ ಪೋನ್!" ರಾಯನ್ಚ್ ಪರ್ತ್ಯಾಕ್ ಉಲಯ್ಲೊ.
ತೆಂ ಪೋನ್ ಕೊಣಾಚೆಂ? ಕಿತ್ಯಾಕ್? ಮ್ಹಳ್ಳ್ಯಾ ವಿಶಿ ವಿಚಾರ್ಚೆಂ ನೆಣಾರ್ಪಣ್ ಮಿಶೇಲಾನ್ ಕೆಲೆಂ ನಾ. ತಾಕಾ ತಾಚಿ ಗರ್ಜ್ಯ್ ನಾತ್ಲೆಲಿ. ತೆಂ ತರ್ಯ್ ರಾಯನಾಚಾ ಪೊನಾ ವಯ್ಲ್ಯಾ ಉಲವ್ಣ್ಯಾಂತ್ ಆನಿ ರಾಯನಾಚಾ ಬದ್ಲುಂಚಾ ವರ್ತನಾಂತ್ ಖಂಡಿತ್ ಜಾಣಾಂ ಜಾಲ್ಲೆಂ ಕೀ ಖಂಯ್ಚರ್ಯ್ ರಾಯನಾಚಾ ಬಿಜ್ನೆಸಾಚಿ ವಾಟ್ ತಾಣೆಂ ಚಿಂತ್ಲ್ಲ್ಯಾ ತೆವ್ಶಿಂಚ್ ಅಚಾನಕ್ ಘುಂವ್ಲ್ಲಿ. ರಾಯನ್ ಆಪ್ಣಾ ಮುಕಾರ್ ಆಸ್ಲೆಲ್ಯಾ ಥೊಡ್ಯಾಚ್ ಘಡಿಯಾಂನಿ ತೊ ನಿಜಾಯ್ಕ್ಯ್ ಏಕ್ ಬಿಜ್ನೆಸ್ಮ್ಯಾನ್ ಮ್ಹಳ್ಳೆಂ ಮಾತ್ರ್ ಮಿಶೇಲಾಕ್ ಕಳಾನಾಸ್ತಾನಾ ಗೆಲೆಂ ನಾ.
"ಕಿತೆಂ ಚಿಂತಾಯ್ ಮಿಶೇಲ್?"
ಮಿಶೇಲ್ ಕಿತೆಂಗೀ ಚಿಂತುನ್ ಆಸ್ಲ್ಲೆಂ ಪಳಯಿಲ್ಲೊ ರಾಯನ್ ವೊಗೊ ರಾವ್ಲೊ ನಾ.
"ಮ್ಹಜ್ಯಾ ಬಿಜ್ನೆಸಾ ವಿಶಿಂ.....?" ರಾಯನಾಕ್ ಮಿಶೇಲಾಚಾ ಚಿಂತ್ಪಾ ವಯ್ರ್ ದುಬಾವ್ ಜಾಲ್ಲೊ.
ರಾಯನಾಚಾ ಸವಾಲಾಕ್ ಆಯ್ಕಾಲ್ಲೆಂ ಮಿಶೇಲ್ ಎಕ್ಚ್ ಪಾವ್ಟಿಂ ಉಡೊನ್ ಪಡ್ಲೆಂ. "ಮೈ ಗಾಡ್! ಹೊ ರಾಯನ್ ಆಪ್ಣಾಚಾ ಮತಿಕ್ಯ್ ವಾಚುಂಕ್ ಸಕ್ತಾ!" ತೆಂ ಮತಿಂತ್ಚ್ ಉಲಯ್ಲೆಂ. ಪುಣ್ ಭಾಯ್ಲ್ಯಾನ್ ತಾಣೆ ಕಾಂಯ್ಚ್ ದಾಖಂವ್ಚೆಂ ಪ್ರಯತ್ನ್ ಕೆಲೆಂ ನಾ.
ತಿತ್ಲ್ಯಾರ್!
ಘರಾ ಮುಖ್ಲ್ಯಾ ಕಂಪೌಂಡಾಚಿ ಗೇಟ್ ಉಗ್ತಿ ಜಾಲ್ಲೊ ಆವಾಜ್ ಆಯ್ಕೊನ್ ಮಿಶೇಲಾನ್ ಗೇಟಿ ತೆವ್ಶಿಂ ಆಪ್ಲಿ ನದರ್ ಮಾರ್ಲಿ.
ಗೇಟಿಚೆರ್ ಜಿಮ್ಮಿ ಉಭೊ ಜಾಲ್ಲೊ!
ತಿತ್ಲೆಂಚ್! ಜಿಮ್ಮಿಕ್ ಗೇಟಿಚೆರ್ ಉಭೊ ಜಾಲ್ಲೊ ಪಳಯಿಲ್ಲೆಂ ಮಿಶೇಲ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟೊನ್ ಭಿತರ್ ಗೆಲೆಂ.
"ಬೋವ್ಶಾ ಜಿಮ್ಮಿ ಆಯಿಲ್ಲಿ ಖಬಾರ್ ಮಾಂಯ್ಕ್ ದೀಂವ್ಕ್ ಭಿತರ್ ಗೆಲೆಂ ಆಸ್ತೆಲೆಂ!" ರಾಯನಾನ್ ಚಿಂತ್ಲೆಂ.
ತಶೆಂಚ್ ಜಾಲ್ಲೆಂ.
ಮಿಶೇಲಾನ್ ದಿಲ್ಲ್ಯಾ ಖಬ್ರೆಕ್ ಪಾಳೊ ದೀವ್ನ್ ಕುಜ್ನಾಂತ್ ಆಸ್ಲ್ಲಿ ಎಸ್ತೆಲ್ ಭಾಯ್ರ್ ಆಯ್ಲಿ.
"ಜಿಮ್ಮಿ......?" ಭಾಯ್ಲ್ಯಾ ಆಪ್ಲ್ಯಾ ರುಮಾ ತೆವ್ಶಿಂ ವೆಚ್ಯಾ ಜಿಮ್ಮಿ ಪಳವ್ನ್ ತಿಣೆಂ ಉಲೊ ದಿಲೊ.
"ಆಯ್ಕ್ ರೆ ಜಿಮ್ಮಿ!" ಎಸ್ತೆಲಾಚೊ ತಾಳೊ ಆಯ್ಕೊನ್ ಜಿಮ್ಮಿ ಥಂಯ್ಚ್ ಜಾಲಾಂತ್ ಉಭೊ ಜಾಲೊ.
"ಆಸ್ಪತ್ರೆಕ್ ವೆತಾಯ್....?"
"ವ್ಹಯ್!"
"ಹಾಂವ್ ಯೇಂವ್....?"
"ನಾಕಾ ಮಾಂಯ್. ತುಂ ಆತಾಂ ಯೇನಾಕಾ. ಆತಾಂ ಆಸ್ಪತ್ರೆಕ್ ವಚೊನ್ಯ್ ತುವೆಂ ಬೆಶ್ಟೆಂ ಬಸೊಂಕ್ ಜಾಯ್ ಶಿವಾಯ್... ಹಾಂವ್ ಗೆಲ್ಯಾರ್ ಪುರೊ! ಬಾಬಾಕ್ ವಕ್ತಾಂ ಹಾಡುಂಕ್ ಪಡ್ಲ್ಯಾರ್.....!?"
"ಹಾವೆಂ ನಾಸ್ಟೊ ಕೆಲಾ! ಯೇ....!"
"ವ್ಹಡ್ ನಾ ಮಾಂಯ್.....! ಹಾಂವ್ ಹೊಟೆಲಾಂತ್ ಕರ್ತಾಂ!"
"ಹಾವೆಂ ಕರುನ್ ಜಾಲಾರೆ!"
"ಬರೆಂ! .......ಯೆತಾಂ!"
ಜಿಮ್ಮಿಚಿ ಜಾಪ್ ಆಯ್ಕೊನ್ ಎಸ್ತೆಲ್ ಆತಾಂ ರಾಯನಾ ತೆವ್ಶಿಂ ಘುಂವ್ಲಿ.
"ರಾಯನ್! ನಾಸ್ಟೊ ತಯಾರ್ ಕೆಲಾ ಬಾ. ತುಮ್ಚೆಂ ಮುಂಬಯಿಚೆಂ ಖಾಣ್ ಕಸಲೆಂ ತೆಂ ಕೋಣ್ ಜಾಣಾಂ. ಆಮ್ಚೆಂ ಗಾಂವ್ಚೆಂ ಹೆಂ ಸದಾಂಚೆಂ. ಬೆಜಾರ್ ಕರಿನಾಕಾ!" ಎಸ್ತೆಲಾನ್ ರಾಯನಾಕ್ ನಾಸ್ಟ್ಯಾಕ್ ಆಪಯ್ಲೆಂ.
"ಮುಂಬಯಿಚೆಂ ಖಾಣ್......!? ಆನಿ ಬೆಜಾರಾಯ್....? ನಾ ಆಂಟಿ!" ರಾಯನ್ ಹಾಸ್ಲೊ.
"ತುವೆಂ ಬೆಶ್ಟೆಂ ತ್ರಾಸ್ ಘೆತ್ಲೆಯ್ ಆಂಟಿ!"ಭಿತರ್ ಸಾಲಾಕ್ ವೆತಾನಾ ತೊಚ್ ಉಲಯ್ಲೊ.
"ಹಾಂತುಂ ತ್ರಾಸ್ ಕಿತೆಂ? ಪಯ್ಲ್ಯಾ ಪಾವ್ಟಿಂ ಆಜ್ ತುಂ ಆಮ್ಗೆರ್ ಆಯ್ಲಾಯ್! ತೆಂಯ್ ಕಿತ್ಲ್ಯಾ ವರ್ಸಾಂ ಆದ್ಲಿ ವಳಕ್ ಧರುನ್! ಆಜ್ ಕಾಲ್ ಸಂಸಾರ್ ಆಸೊ ಜಾಲಾ ಕೀ ಕಾಲ್ ವಳ್ಕಾಲ್ಲ್ಯಾಕ್ ಆಜ್ ಮನಿಸ್ ಉಡಾಸ್ ದವರಿನಾ. ತಶೆಂ ಆಸ್ತಾಂ...... ಮನ್ಶ್ಯಾಕ್ ಮನ್ಶ್ಯಾಪಣ್ ಆಸೊಂಕ್ ಜಾಯ್. ಹೆಂಚ್ ಸಗ್ಳ್ಯಾ ವರ್ನಿಂ ವರ್ತೆಂ!" ಎಸ್ತೆಲ್ ಕುಜ್ನಾಕ್ ಪರ್ತಾಲಿ.
ಮಿಶೇಲ್ ಡೈನಿಂಗ್ ಟೇಬಲಾಕ್ ತಯಾರ್ ಕರ್ತಾಲೆಂ. ಕುಜ್ನಾಂ ಥಾವ್ನ್ ನಾಸ್ಟ್ಯಾಕ್ ಜಾಯ್ ಜಾಲ್ಲೆಂ ಸಗ್ಳೆಂ ಡೈನಿಂಗ್ ಟೇಬಲಾ ವಯ್ರ್ ದವರುನ್ ಜಾತಾನಾ, ಸಗ್ಳಿಂ ನಾಸ್ಟೊ ಕರುಂಕ್ ಬಸ್ಲಿಂ. ತಾಂಚೆ ಸಾಂಗಾತಾ ಜಿಮ್ಮಿಯ್ ಬಸ್ಲೊ.
"ತುಮ್ಚಿಂ ಹಾಂಗಾ ಗಾವಾಂತ್ ಕೊಣ್ಯ್ ನಾಂತ್ ಬಾ ರಾಯನ್...?" ಡೈನಿಂಗ್ ಟೇಬಲಾ ವಯ್ರ್ ಎಸ್ತೆಲಾನ್ ಉಲೊಣ್ಯಾಕ್ ಬುನ್ಯಾದ್ ಘಾಲಿ.
"ಹಾಂಗಾ...! ಮಂಗ್ಳುರಾಂತ್?" ಎಸ್ತೆಲಾಕ್ ಪಳಯಿತ್ತ್ ವಿಚಾರ್ಲ್ಲ್ಯಾ ರಾಯನಾನ್, "ಮಂಗ್ಳುರಾಂತ್ ಕೊಣ್ಯ್ ನಾಂತ್!" ತಾಚಿ ಶಾಂತ್ ಜವಾಬ್.
"ಇನ್ಫ್ಯಾಕ್ಟ್..... ಮ್ಹಜ್ಯಾ ಡ್ಯಾಡಿಚೊ ಗಾಂವ್ ಉಡುಪಿ!" ರಾಯನ್ಚ್ ಪರ್ತ್ಯಾಕ್ ಉಲಯ್ಲೊ. "ಪುಣ್ ತೊಚ್ ಜಲ್ಮಾಲ್ಲೊ ಮುಂಬಯಿಂತ್! ಮ್ಹಜೊ ಆಜೊ ಉಡುಪಿಂತ್ ಸಗ್ಳೆಂ ಸೊಡುನ್ ಮುಂಬಯಿ ಗೆಲ್ಲೊ. ಮ್ಹಾಕಾ ಲಾಗ್ಶಿಲಿಂ ಮ್ಹಳ್ಳಿಂ ಆತಾಂ ಹಾಂಗಾ ಕೊಣ್ಯ್ ನಾಂತ್! ಆಸ್ಚಿಂ ಸಗ್ಳಿಂ ಮುಂಬಯಿಚ್ ಸೆಟಲ್ ಜಾಲ್ಯಾಂತ್!"
"ತರ್.... ಮಾಧವಚಿ ಕಶಿ ವಳಕ್ ತುಮ್ಕಾಂ?"
"ತಾಕಾ ಡ್ಯಾಡಿಚಿ ವಳಕ್! ಹಾಂವ್ ಜಲ್ಮೊಂಚಾ ಪಯ್ಲೆಂಚ್ ಥಾವ್ನ್! ಬಿಜ್ನೆಸ್ ಮ್ಹಣ್ತಾನಾ ಆಸ್ತಾ ಆಂಟಿ.... ಕೊಣಾಚಿ ಕಶಿ ಕೆದ್ನಾಂ ವಳಕ್ ಜಾತಾ ತಿ ಸಾಂಗೊಂಕ್ ಜಾಯ್ನಾ!"
"ತೆಂ ವ್ಹಯ್! ಪುಣ್ ತುಕಾ ಕಾಲ್ ಸಾಂಜೆರ್ ಆಮ್ಚಿ ವಳಕ್ ಅಚಾನಕ್ ಕಶಿ.....?" ಎಸ್ತೆಲಾನ್ ಆಪ್ಲಿಂ ಉತ್ರಾಂ ಆರ್ಧ್ಯಾರ್ಚ್ ರಾವಯ್ಲಿ. ತಿಚ್ಯಾ ಮತಿಂತ್ ಜಾಲ್ಯಾರ್ಯ್ ಕಾಲ್ಚ್ಯಾ ತ್ಯಾ ಸಾಂಜೆಚಾ ಶೀತಲಾಚಾ ಕಾಜಾರಾ ಪಾರ್ಟೆ ವೆಳಾರ್ ಪಳೆಲ್ಲ್ಯಾ ರಾಯನಾಚಾ ವರ್ತನಾಂತ್ ದುಬಾವ್ ಆಸ್ಲ್ಲೊ. ಆಪ್ಣೆಂ ವಳ್ಕಾನಾಸ್ಲಲೊ ಎಕ್ಲೊ ಅಚಾನಕ್ ಜಾವ್ನ್ ಆಪ್ಣಾ ಮುಕಾರ್ ಇತ್ಲೊ ಪರಿಚಿತ್ ಮ್ಹಳ್ಳ್ಯಾ ಭಾಶೆನ್.....?
"ಮಾಧವ ಅಂಕಲ್ ಮುಂಬಯಿ ಆಯ್ಲ್ಯಾರ್ ಆಮ್ಗೆರ್ ಯೇನಾಸ್ತಾನಾ ವಚಾನಾ. ತೊ ಆಯ್ಲ್ಯಾರ್ ಹಾಂಗಾಚಿ ಖಬಾರ್ ಆಸ್ತಾಚ್! ತಶೆಂ ತುಮ್ಚಿ ಖಬಾರ್ಯ್ ಉಲಯ್ತಾ. ಕೆದಾಳಾಯ್ ತುಮ್ಚೆಂ ಬರೆಂಚ್ ಉಲಯ್ತಾ. ತಶೆಂ ಕೆದಾಳಾಯ್ ಹಾಂವ್ ಚಿಕ್ಮಂಗ್ಳುರ್ ಗೆಲ್ಯಾರ್ ಮ್ಹಾಕಾ ತುಮ್ಚೊ ಉಡಾಸ್ ಯೆತಾ!"
"ಚಿಕ್ಮಂಗ್ಳುರ್ ತುಂ ವೆತಾಯ್?"
"ಗರ್ಜ್ ಆಸ್ತಾನಾ ಮಾತ್ರ್! ತೋಟ್ ಪಳಂವ್ಕ್ ಅಮಿತ್ ವೆತಾ. ತೊಚ್ ತೊಟಾಚೆಂ ಸಗ್ಳೆಂ ಕಾಮ್ ಪಳಯ್ತಾ!"
"ತೋಟ್ ಕಶೆಂ ಆಸಾ ಆತಾಂ?"
ಎಕಾ ಥೆಂಪಾರ್ ಆಪ್ಣಾಚಿ ಜಾವ್ನ್ ಆಸ್ಲ್ಲ್ಯಾ ಆಸ್ತೆ ವಯ್ರ್ ಆಪಾಪಿಂಚ್ ತೆಂ ಆಪ್ಲೆಂ ತೋಟ್ ಮ್ಹಳ್ಳೊ ಅಭಿಮಾನ್ ಎಸ್ತೆಲಾಕ್ ಉದೆಲೊ. ತ್ಯಾ ತೊಟಾಕ್ ತಿಚ್ಯಾ ಘೊವಾನ್ ಬರೆಂಚ್ ಸಾಂಬಾಳ್ಲ್ಲೆಂ. ತೊಟಾಚಾ ಚಿಂತ್ನಾಂ ಥಾವ್ನ್ ತ್ಯಾ ಆದ್ಲ್ಯಾ ಉಡಾಸಾಂತ್ಲೊ ಸಂಭಂಧ್ ಜಾಗೊ ಜಾತಾನಾ ಆತಾಂಯ್ ಎಸ್ತೆಲಾಚಾ ಕಾಳ್ಜಾಂತ್ ತೆಂ ಆಪ್ಣಾಚೆಂಚ್ ಮ್ಹಳ್ಳೊ ಮಾಯ್ಪಾಸ್ ಉದೆವ್ನ್ ಆಯ್ಲೊ. ತಿ ಆತಾಂ ತ್ಯಾ ತೊಟಾ ವಿಶಿಂ ಜಾಣಾಂ ಜಾಂವ್ಕ್ ಉತ್ಸಾಹಿಕ್ ಜಾಲಿ.
"ಆತಾಂ ಹಾಂವ್ ಕಸೊಯ್ ಹಾಂಗಾ ಆಸಾಂ. ಪಾವ್ಟ್ ಮೆಳ್ಳ್ಯಾರ್ ತುಮ್ಕಾಂ ಆಪವ್ನ್ ವರ್ತಾಂ!" ಎಸ್ತೆಲಾಚಾ ಭಾವನಾಂಕ್ ರಾಯನ್ ಸಮ್ಜೊಂಕ್ ಸಕ್ಲೊ.
"ನಾ ಬಾ! ಆಮ್ಚ್ಯಾಚಿ ಪರಿಸ್ಥಿತಿ ಆಶಿ ಆಸ್ತಾನಾ....!?" ಆಪ್ಲ್ಯಾ ಘೊವಾಚೆಂ ಚಿಂತುನ್ ಖಿಣಾ ಭಿತರ್ ಖಂತಿಶ್ಟ್ ಜಾಲಿ ತಿ. ಹೆಂ ಪಳೆಲ್ಲೊ ರಾಯನ್,
"ನಾಸ್ಟೊ ಬರೊ ಜಾಲಾ!" ತಾಣೆಂ ವಿಶಯ್ ಬದ್ಲಿಲೊ.
"ಅಂಕಲಾಚೆಂ ಚಿಂತುನ್ ತುಮಿಂ ಟೆನ್ಶನ್ ಕರಿನಾಕಾತ್ ಆಂಟಿ...." ರಾಯನ್ಚ್ ಉಲಯ್ಲೊ. "......ದಾಕ್ತೆರಾನ್ ಸಾಂಗ್ಲ್ಲೆಂ ತುಮಿಂಚ್ ಆಯ್ಕಾಲಾಂ. ಥೊಡೆ ದೀಸ್ ಆಸ್ಪತ್ರೆಂತ್ ತಾಕಾ ರಾವೊಂಕ್ ಪಡ್ತೆಲೆಂ. ಆತಾಂ ಆಮ್ಚಿ ಇತ್ಲಿ ವಳಕ್ ಜಾಲ್ಯಾ.... ತಾಕಾ ಹಾಂಗಾ ನ್ಹಯ್ ತರ್ ಮುಂಬಯಿ ಬರ್ಯಾ ಆಸ್ಪತ್ರೆಕ್ ವರಿಯಾಂ. ಆಜ್ ಸಾಂಜೆ ಭಿತರ್ ದಾಕ್ತೆರಾನ್ ರಿಪೋರ್ಟ್ ದಿತಾಂ ಮ್ಹಣೊನ್ ಸಾಂಗ್ಲಾ. ಪಳೆಯಾಂ....!" ರಾಯನಾನ್ ಎಸ್ತೆಲಾಕ್ ಸಮಾಧಾನ್ ಕರ್ಚೆಂ ಪ್ರಯತ್ನ್ ಕೆಲೆಂ. ತಿ ಆಪ್ಲ್ಯಾ ಘೊವಾಚಾ ಭಲಾಯ್ಕೆಕ್ ನಿಯಾಳುನ್ ಸಿಂತಿಮೆಂತಾಳ್ ಜಾಲ್ಲಿ.
"ಹೆಂ ಪಯ್ಲೆ ಪಾವ್ಟಿಂ ಆಶೆಂ ಜಾಂವ್ಚೆಂ ಬಾ ತಾಕಾ! ಹಾಚ್ಯಾ ಪಯ್ಲೆಂ ಕೆದ್ನಾಂಚ್ ಕಾಂಯ್ಚ್ ಆಶೆಂಕಶ್ಟ್ ಜಾಂವ್ಕ್ ನಾಂತ್!" ಎಸ್ತೆಲ್ ಆಪ್ಲ್ಯಾ ಘೊವಾಕ್ಚ್ ನಿಯಾಳ್ತಾಲಿ.
"ಪ್ರಾಯ್ ಉತ್ರೊನ್ ಯೆತಾನಾ ಸಗ್ಳ್ಯಾಂಕ್ಯ್ ಆಶೆಂಚ್ ಆಂಟಿ. ಪುಣ್ ಚತ್ರಾಯ್ ಕರ್ಚಿ ಚಡ್ ಗರ್ಜೆಚಿ!"
ರಾಯನ್ ಆನಿ ಎಸ್ತೆಲ್ ಉಲಯ್ತಾಂ ಉಲಯ್ತಾಂ ಆಪ್ಲೊ ನಾಸ್ಟೊ ಸಂಪಯಿಲ್ಲೊ ಜಿಮ್ಮಿನಾಸ್ಟ್ಯಾಚಾ ಮೆಜಾರ್ ಥಾವ್ನ್ ಉಟ್ಲೊ.
"ಬರೆಂ ಮಾಂಯ್ ಹಾಂವ್ ವೆತಾಂ!" ಡೈನಿಂಗ್ ಟೇಬಲಾ ವಯ್ಲೊ ಉಟ್ಲ್ಲೊ ಜಿಮ್ಮಿ ಕೊಣಾಯ್ಚಾ ಜವಾಬೆಕ್ ಕಾಂಯ್ಚ್ ರಾಕಾನಾಸ್ತಾನಾ ಭಾಯ್ರ್ ಚಲ್ಲೊ. ರಾಯನ್ ತಸೊಚ್ ಜಿಮ್ಮಿಕ್ ಪಳಂವ್ಕ್ ಲಾಗ್ಲೊ. ಜಿಮ್ಮಿಚೊ ಭರ್ತಾವ್ ತಾಕಾ ಕಾಂಯ್ಚ್ ಸಮ್ಜಾಲೊ ನಾ. ಜಿಮ್ಮಿ ಹ್ಯಾ ಘರಾಚೊ ನವ್ಕರ್ ಮ್ಹಳ್ಳ್ಯಾ ಭಾಶೆನ್ ತಾಕಾ ದಿಸ್ಲೊ ನಾ. ನವ್ಕರ್ ಜಾಲ್ಲ್ಯಾ ವ್ಯಕ್ತಿಕ್ ಇತ್ಲೆಂ ದ್ರಡ್ಪಣ್ ರಾಯನಾನ್ ಹಾಚ್ಯಾ ಆದಿಂ ಪಳಂವ್ಕ್ ನಾತ್ಲ್ಲೆಂ.
"ಏಕ್ ಮಿನಿಟ್ ಬಾ...!" ರಾಯನಾಕ್ ಪಳವ್ನ್ ಸಾಂಗ್ಲೆಲಿ ಎಸ್ತೆಲ್ ಭಾಯ್ರ್ ಗೆಲ್ಲಿ ತಿ ಜಿಪಾರ್ ಬಸೊಂಕ್ ವೆಚ್ಯಾ ಜಿಮ್ಮಿಕ್ ಪಳವ್ನ್, " ಜಿಮ್ಮಿ....? ರಾವ್ರೆ ಚಿಕ್ಕೆ!" ಸಾಂಗೊನ್ ಪರ್ತ್ಯಾಕ್ ಭಿತರ್ ಆಯಿಲ್ಲಿ, ಆಪ್ಲ್ಯಾ ಕುಡಾಕ್ ವಚೊನ್ ಥೊಡೆ ಪಯ್ಶೆ ಕಾಡುನ್ ತೆ ವರುನ್ ಜಿಮ್ಮಿಚಾ ಹಾತಾಕ್ ದೀವ್ನ್, "ವಕ್ತಾಂಕ್ ಜಾಯ್ ಪಡ್ತಿತ್ರೆ ಆಸೊಂದಿತ್!" ತಿಣೆಂ ಸಾಂಗ್ಲೆಂ.
ಎಸ್ತೆಲಾನ್ ದಿಲ್ಲೆ ಪಯ್ಶೆ ಕಾಡುನ್ ಆಪ್ಲ್ಯಾ ಬೊಲ್ಸಾಂತ್ ಗಳಯಿಲ್ಲೊ ಜಿಮ್ಮಿ,
"ಆಸ್ಪತ್ರೆ ಥಾವ್ನ್ ಹಾಂವ್ ಪೋನ್ ಕರ್ತಾಂ ಮಾಂಯ್!" ಜಿಪಾಚೆಂ ದಾರ್ ಉಗ್ತೆಂ ಕರುನ್ ತೊ ಜಿಪಾರ್ ಬಸ್ಲೊ. ಜಿಮ್ಮಿಕ್ ದಾಡುನ್ ದೀವ್ನ್ ಎಸ್ತೆಲ್ ಪರ್ತ್ಯಾಕ್ ಡೈನಿಂಗ್ ಹಾಲಾಕ್ ಆಯ್ಲಿ.
"ಹೊ ಚೆಡೊ ಆಸ್ಲ್ಲ್ಯಾನ್ ಮಾತ್ರ್ ಆಮ್ಕಾಂ ಕಾಂಯ್ ಕಳಾನಾ!" ತಿ ಆಪ್ಲ್ಯಾ ಪಯ್ಲೆಂಚಾ ಬಸ್ಕೆಚೆರ್ ಬಸ್ಲಿ.
"ಘೆ ಬಾ.....! ರಾಯನ್ ಘೆ!" ಎಸ್ತೆಲಾನ್ ರಾಯನಾಚಾ ಮುಕಾರ್ ನಾಸ್ಟೊ ಲೊಟ್ಲೊ.
"ಪುರೊ ಆಂಟಿ! ಚಡ್ ಜಾಲೆಂ! " ಎಸ್ತೆಲಾನ್ ಆಪ್ಣಾ ಮುಕಾರ್ ಲೊಟ್ಲೆಲ್ಯಾ ನಾಸ್ಟ್ಯಾಕ್ ರಾಯನಾನ್ ಪಾಟಿಂ ಎಸ್ತೆಲಾಚಾ ಕುಶಿಕ್ ಲೊಟ್ಲೆಂ. "ಮುಂಬಯಿ ಬ್ರೆಡ್ ಆನಿ ಬಟರ್ ಖಾವ್ನ್ ಸವಯ್.!"
"ಸಾಂಗ್ಲ್ಲ್ಯಾ ಪರಿಂ ಮುಂಬಯಿ ತುಮ್ಚೆಂ ಕಸಲೆಂ ಬಿಜ್ನೆಸ್....? ಹಾವೆಂ ವಿಚಾರ್ಲೆಂ ಮ್ಹಣೊನ್ ತುಂ ಬೆಜಾರ್ ಕರಿನಾಕಾ!" ಆಪ್ಲ್ಯಾ ಮತಿಂತ್ಲ್ಯಾ ಚಡ್ ಮುಖ್ಯ್ ಸವಾಲಾಕ್ ಎಸ್ತೆಲಾನ್ ಮುಕಾರ್ ದವರ್ಲೆಂ.
"ನಾ ಆಂಟಿ! ಹಾಂತುಂ ಬೆಜಾರ್ ಕಸಲೆಂ? ಲ್ಹಾನ್ ವ್ಹಡ್ ಬಿಜ್ನೆಸ್ ಸುಮಾರ್ ಆಸಾ. ಪುಣ್ ಚಡ್ ಜಾವ್ನ್ ಬಾಲಿವುಡಾಚಾ ಫಿಲ್ಮಾಂಕ್ ಫೈನಾನ್ಸ್ ಕರ್ಚೆಂ ಮ್ಹಜೆಂ ಬಿಜ್ನೆಸ್!"
ರಾಯನಾನ್ ಸಾಂಗ್ತಾನಾ ಸವ್ಕಾಸ್ ಆಪಾಪಿಂಚ್ ಮಿಶೇಲಾಚಿ ತಕ್ಲಿ ರಾಯನಾ ತೆವ್ಶಿಂ ಘುಂವ್ಲಿ.
ಬಾಲಿವುಡಾಚಿಂ ಫಿಲ್ಮಾಂ......? ಮಿಶೇಲಾಚಿ ಮತ್ ಆಶ್ಚರ್ಯಾನ್ ಭರ್ಲಿ.
*************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: ಅವಸ್ವರ್ 1, ಅವಸ್ವರ್ 2, ಅವಸ್ವರ್ 3, ಅವಸ್ವರ್ 4, ಅವಸ್ವರ್ 5, ಅವಸ್ವರ್ 6
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
