ಕವಿತಾकविताPoem
"ಸಿರಿವಂತ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಸಿರಿವಂತ್ ಹಾಚಾ ಮೊರ್ನಾಚಾ ದುಖಿನ್ ಲಿಖ್ಲೆಲೆಂ ಕವಿತಾ ಹೆಂ ಜಾವ್ನಾಸಾ"
ಕಾವ್ಯಾದಾಸ್
ಅಧೇವ್ಸ್ ತುಕಾ ಸಿರಿವಂತ್
ಕೊಂಕ್ಣಿ ಮಾತಾ ದುಬ್ಳಿ ಜಾಲ್ಯಾ, ದುಬ್ಳಿ ಕೊಂಕ್ಣಿ ಸಮಾಜ್
ಸಿರಿವಂತಾನ್ ದುಬ್ಳಿಕಾಯೆಂತ್ ಆಧೇವ್ಸ್ ಮಾಗ್ಲಾ’ಮ್ಕಾಂ ಆಜ್
ವಿಶೆವ್ ನಾಸ್ಚೆಂ ಜೀವನ್ ತಾಚೆಂ - ಉದ್ದೇಶ್ ಭರಿತ್ ಸಾಧನ್
ವಾವ್ರಾಕ್ ತಾಚ್ಯಾ ಆಡ್ ಆಯ್ಲಿಂ ನಾಂತ್ ಬೆಸೊರ್, ಮ್ಹಿನತ್, ವೇಳ್, ಧನ್
ಕೊಂಕ್ಣಿ ಸಾಹಿತ್ ಗಿರೇಸ್ತ್ ಕರುಂಕ್ ವಾವುರ್ಲೊ ತೊ ಸದಾಂ
ತಾಚೆ ಉರ್ಭೆನ್, ದೆಕಿನ್ ಫುಲ್ಲಿಂ ಸಾಹಿತ್ಯಾಚಿಂ ಶೆತಾಂ
ದೇವ್ಚ್ ಮ್ಹಜಿ ಸಕತ್ - ಘೆವುನ್ ಆಪ್ಲಿ ಸುರಕ್ಷಾ ಧಾಳ್
ಸಗ್ಳೊ ಕೊಂಕಣ್ ಪ್ರದೇಶ್ ಜಾಲೊ ತಾಚ್ಯಾ ವಾವ್ರಾಚೆಂ ಜಾಲ್
ಉಣ್ಯಾ ಮೊಲಾಕ್ ನಿತಳ್ ವಾಚಪ್ - ಸಾಳಕ್ ಪ್ರಕಾಶನಾನ್
ಕೆಲ್ಲೆಂ ನವಾಲ್ ಕೊಂಕಣ್ ಮಾನ್ತಾ ಮೊಗಾನ್, ಅಭಿಮಾನಾನ್
ಸರ್ದಾರ್ ಮಟ್ವ್ಯಾ ಕಾಣಿಯಾಂಚೊ ತೊ - ಖಂಯ್ಚರ್ ತಾಚೆ ಬರಿ?
ತಾಚೆ ಉರ್ಭೆಕ್, ಸಾಧನ್, ಸೆವೆಕ್ ನಾ ಕೋಣ್ ಮೆಳಾತ್ ಸರಿ!
ಕೊಂಕಣ್ ಪ್ರಜಾ, ಸಿರಿವಂತಾ, ಸದಾಂ ತುಕಾ ಋಣಿ
ದೇವ್ ದೀಂವ್ ತುಕಾ ಇನಾಮ್ ತುಜೆಂ - ಅನಂತ್ ಅಮರ್ ಜಿಣಿ
ಸಿರಿವಂತ್
"ಸಿರಿವಂತ್ ಹಾಚಾ ಮೊರ್ನಾಚಾ ದುಖಿನ್ ಲಿಖ್ಲೆಲೆಂ ಕವಿತಾ ಹೆಂ ಜಾವ್ನಾಸಾ"
ವಾಯ್ಲೆಟ್ ಪಿರೇರಾ
ಅಧೇವ್ಸ್ ತುಕಾ ಸಿರಿವಂತ್
ಅಂಕಲ್
ಕೊಂಕ್ಣಿ ಶೆತಾಂತ್ ಆಸ್ಲ್ಲೊಯ್ ತುಂ ಫಾಮಾದ್
ದೆವಾಸ್ಪಣಾನ್ ಭರ್ಲೆಲಿ ತಿ ಖಾಲ್ತಿ ಇಮಾಜ್
ಸಾಂಡುನ್ ತುಂ ಗೆಲೊಯ್ ನಾಸ್ತಾ ಅವಾಜ್
ಆಜ್ ತುವೆಂ ಆಪ್ಣಾಯ್ಲೆಂಯ್ ಸರ್ಗಾರಾಜ್
"ಸಿರಿವಂತ್" ಲಿಖ್ಣೆಂ ನಾಂವ್ ತುಜೆಂ
ಗ್ರೇಸ್ತ್ಕಾಯೆನ್ ಭರ್ಲೆಲೆಂ ಸಾಹಿತ್ಯಾಚೆಂ ದೆಣೆಂ
ವಾವ್ರ್ ಕೆಲೊಯ್ ಕೊಂಕ್ಣೆಚೊ ಫಾಯ್ದ್ಯಾವಿಣೆಂ
ಖಬ್ರೆವಿಣೆಂ ಸಾರುನ್ ಆಸ್ಲ್ಲೊಯ್ ತುಜೆಂ ಜಿಣೆಂ
ಸಾಸ್ಣಾಕ್ ಸುಖ್ ಭಗುಂಕ್ ಗೆಲೊಯ್ ರಾತ್ಚ್ಯಾ ನಿದೆ ವೆಳಾ
ತರೀ ದೀವ್ನ್ ಗೆಲೊಯ್ ಸಾಹಿತ್ಯಾಚಿ ವಿಂಚ್ಣಾರ್ ಫಳಾಂ
ಸ್ವಪ್ಣೆಲ್ಲೊಯ್ ಪರ್ಗಟ್ ಕರುಂಕ್ ತಿ "ವೇಳ್ ಘಡಿ"
ಪುಣ್ ತಾಚ್ಯಾ ಆಧಿಂ ತುಂ ಪಾವ್ಲೊಯ್ "ಮೊರ್ನಾ ತಡಿ"
ಆದೇವ್ಸ್ ತುಕಾ ಆಂಕಲ್ "ಸಿರಿವಂತ್"
ತುಜಿ ಸ್ವಪ್ಣಾ ಜ್ಯಾರಿ ಜಾಂವ್ಕ್ ಕರ್ತಾಂವ್ ಪ್ರಯತ್ನ್
ತುಜೆಂ ತೆಂ ಸ್ವಪಾಣ್ ಜಾಂವ್ಚೆ ನಾ ನಿರ್ಫಳ್.
ಮಾಗೊನ್ ದಾಡ್, ಮಿಸಾಂವ್ ಜಾಂವ್ಕ್ ಸುಫಳ್
ಸಿರಿವಂತ್
"ಸಿರಿವಂತ್ ಹಾಚಾ ಮೊರ್ನಾಚಾ ದುಖಿನ್ ಲಿಖ್ಲೆಲೆಂ ಕವಿತಾ ಹೆಂ ಜಾವ್ನಾಸಾ"
ವಿನ್ಸೆಂಟ್ ಫೆರ್ನಾಂಡಿಸ್
ಅಧುರೆಂ ಸ್ವಪಾಣ್
ಸ್ವಪ್ಣಾಂತ್ಯೀ ಸ್ವಪ್ಣಾಂ ಅಧುರಿಂ ಚಮ್ಕಾಲಿಂ
ರಚ್ನಾರಾ ಸವೆಂ ಸರ್ವ್ ಸಲ್ವಾಲ್ಲಿಂ
ನಿತಿದಾರಾ ಮುಖಾರ್ ಸರ್ವ್ ಪಾಲ್ವಾಲಿಂ
ಆಂತ್ಯ್ ಘಡ್ಯೆಕ್ ಖಾಲ್ತಿಮಾನ್ ಘಾಲಿಂ
ಜಿವಾನ್ ಚಿಂತಾಪ್ ಸೊಭಯ್ಲೆಂ ಪಾಂವ್ಡಾರ್
ಅಮರ್ ಉರ್ಲೊಯ್ ಕೊಂಕ್ಣಿ ಪಾನಾರ್
ಕೊಂಕ್ಣಿ ಮಾಯೆಚಿ ಗಂಭೀರ್ ಆಶಾ
ಉಗ್ಡಾಸ್ ಕಾಡ್ತಾಂ ಹ್ಯಾ ದಿಸಾ
’ಸಾಳಕ್’ಧ್ವಾರಿಂ ಕೆಲೆಂಯ್ ಸಾಧನ್
ಕೊಂಕ್ಣಿ ಕಲೆಂತ್ ತುಜೆಂ ರುದಾನ್
ಕೊಂಕ್ಣಿ ಸಾಹಿತ್ಯಾಚೆಂ ಜೆವಾಣ್ ವಾಂಟ್ಲೆಯ್ ಸರ್ವಾಂಕ್
ಫರ್ಮಾಣ್ ಘೆನಾಸ್ತಾಂ ಸಾಂಡ್ಲೆಯ್ ತುಜ್ಯಾ ಮೊಗಾಚ್ಯಾಂಕ್
ಕೊಂಕ್ಣೆಚೊ ಅಲಂಕಾರ್ ಕೆಲೊಯ್ ಪ್ರಫುಲ್ಲಿತ್
ನ್ಹಂಯ್ ಲಿಖ್ಣೆಂತ್ ಬಗಾರ್ ಸದಾಂ ಜಿವಿತಾಂತ್
ಸರಳ್ ಜಿಣ್ಯೆಧ್ವಾರಿಂ ಮೋಗ್ ಘರಾಂತ್
ಕೊಂಕ್ಣಿ ಮೊಗಿಂಕ್ ಆಜ್ ಜಾಲಾ ವ್ಹಡ್ ಆಕಾಂತ್
ಕಷ್ಟಿ ಜಿಣಿಂ ಜಿಯೆಲೊಯ್ ಮಂಗ್ಳುರಾಂತ್
ಪ್ರಕಾಸ್ ದಿಲೊಯ್ ಸೆಜಾರ್ಚಾ ಮೈಸೂರಾಂತ್
ಜಿವಿತ್ ಅರ್ಪಿಲೆಂಯ್ ಕೊಂಕ್ಣಿ ಭಾಸೆಕ್
ಅಮರ್ ಉರ್ತೊಲೊಯ್ ಮ್ಹಜೆ ನದ್ರೆಂತ್
ಸಿರಿವಂತ್
"ಸಿರಿವಂತ್ ಹಾಚಾ ಮೊರ್ನಾಚಾ ದುಖಿನ್ ಲಿಖ್ಲೆಲೆಂ ಕವಿತಾ ಹೆಂ ಜಾವ್ನಾಸಾ"
ಆಸ್ಟಿನ್ ಪ್ರಭು, ಚಿಕಾಗೊ
ಕೊಂಕ್ಣೆಕ್ ಕೆಲೆಂ ಸಿರಿವಂತ್!
ಆಪ್ಲೆಂ ಸಗ್ಳೆಂ ಸರ್ವಸ್ವ್ ತಾಣೆಂ ಕೊಂಕ್ಣಿ ಖಾತಿರ್ ದಿಲೆಂ
ಪುಸ್ತಕಾಧ್ವಾರಿಂ ಕೊಂಕ್ಣಿ ಭಾಸೆಕ್ ಗ್ರೇಸ್ತ್ ತಾಣೆಂ ಕೆಲೆಂ
ಕೊಂಕ್ಣೆಂತ್ಲೊ ಫಾಮಾದ್ ಲೇಖಕ್ ನಾಂವ್ ತಾಣೆಂ ವ್ಹೆಲೆಂ
ನಾಂವ್ ಮಾತ್ರ್ ತೊ ಸಿರಿವಂತ್, ಪಯ್ಶಾಂ ಖಜಾನ್ ತಾಚೆಂ ಗೆಲೆಂ
89 ಪುಸ್ತಕಾಂ ತಾಣೆಂ ಛಾಪುನ್ ಭರಾನ್ ಪರ್ಗಟ್ ಕೆಲಿಂ
ಬರ್ಯಾಂತ್ಲಿಂ ಬರಿಂ ಮ್ಹಣೊನ್ ನಾಂವ್ ಹಾಡುಂಕ್ ಸಕ್ಲಿಂ
ಹಾಚೆಂ ಜಯ್ತ್ ಪಳೆವ್ನ್ ಸಭಾರ್ ಪ್ರಕಾಶನಾಂ ಪಿಕ್ಲಿಂ
ಸಿರಿವಂತಾಕ್ ಸರಿಸಮಾನ್ ಕೋಣ್ಂಚ್ ನಾ ಜಾಲಿಂ
ಭಾರಿಚ್ಚ್ ಏಕಾ ಶಿಸ್ತೆಚೊ ಆಮ್ಚೊ ಜೆ. ಸಿ. ವೇಗಸ್
ಸದಾಂಚ್ ಸೊಭಿತ್ ಸುಂದರ್ ಪುಸ್ತಕಾಂ ಛಾಪ್ಚೊ ಹವ್ಯಾಸ್
ಕೊಂಕ್ಣಿ ಮಾತಾ ರಡ್ತಾ ಆಜ್ ಗಳವ್ನ್ ದೊಳ್ಯಾಂ ದು:ಖಾಂ
ಭರ್ತಿ ಕರುಂಕ್ ಜಾಗೊ, ಖಂಯ್ಸರ್ ಉಸ್ತುಂ ಪಾಳಾಂ?
ಸಾಹಿತ್ ಖಜಾನ್ ಸೊಡುನ್ ಗೆಲಾ ಆಮ್ಕಾಂ ಸಿರಿವಂತ್
ಕರ್ಯಾಂ ಆಮಿಂ ಕೊಂಕಣ್ ಮಾಯೆಕ್ ಸದಾಂ ಸಿರಿವಂತ್
ತಾಣೆ ಸುರ್ವಾತಿಲ್ಲೊ ವಾವ್ರ್ ಆಮಿಂ ಮುಖಾರ್ ವ್ಹರುಂಯಾಂ
ಆಮ್ಕಾಂ ಏಕ್ ದೇಕ್ ದಿಲ್ಲ್ಯಾಕ್ ತಾಕಾ ಸದಾಂ ಹರ್ಸುಯಾಂ.
ಸಿರಿವಂತ್
ಜೋನಿ ಸುರತ್ಕಲ್ ಹಾಚೆರ್ ಆಸ್ಟಿಬ್ ಪ್ರಭುಚೆಂ ಕವಿತಾ
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.