ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜಿಣ್ಯೆಂತ್ ಕಿತೆಂ ಗಳ್ಸಿಲಾಂ ತೆಂ ಪ್ರಮುಖ್ ನ್ಹಯ್, ಬಗಾರ್ ಜ್ಯೇ ಕಿತೆಂ ಗಳ್ಸಿಲಾಂ ತಾಂತುಂ ಕಿತ್ಲೊ ಜೀವ್ ಭರ್ಲಾ ತೆಂ ಪ್ರಮುಖ್’
ಆಯ್ಚೊ ದೀಸ್ ಸುಭಾಗಿ ದೀಸ್
ವರಸ್ : 2005
ಅಂಕೊ : 16
ಮಯ್ನೊ : ಅಕ್ತೋಬರ್
ಸಂಪಾದಕೀಯ್ - 16.
ವಲ್ಲಿ ಕ್ವಾಡ್ರಸ್
ಕೊಂಕಣಿ ಥಂಯ್ ಮೊಗಾಚಾಂನೊ,
ಆಯ್ಚೊ ದೀಸ್ ಮ್ಹಜಾ ಜಿಣ್ಯೆಂತ್ ಎದೊಳ್ ಉದೆವ್ನ್ ಆಯಿಲ್ಲ್ಯಾ ಸುಭಾಗಿ ದಿಸಾಂಪಯ್ಕಿ ಏಕ್ ಮ್ಹಣ್ ಮ್ಹಜೆಂ ಕಾಳಿಜ್-ಕೊಶೆಡ್ದ್ ಒಪುನ್ ಘೆತಾ. ಭುರ್ಗ್ಯಾಪಣಾರ್ ಖಂಯ್ಚಾ ಕೊಂಕ್ಣಿ ಸುಪುತ್ರಾಂಚಾ ವೆವೆಗ್ಳ್ಯಾ ಪ್ರಕಾರಾಚೆಂ ಸಾಹಿತ್ಯ್ ವಾಚುನ್ ಹಾಂವ್ ವ್ಹಡ್ ಜಾಲ್ಲೊಂಗೀ, ಆಜ್ ತಾಂಚೆಸವೆಂ ವೆದಿಚೆರ್ ಉಭೊಂ ಆಸಾಂ, ತೇಂಯ್ ಏಕ್ ಬರವ್ಪಿ ಜಾವುನ್ ಮ್ಹಣ್ತಾನಾ ಮ್ಹಜಾ ಕಾಳ್ಜಾಚಾ ಉಡ್ಕೆಚೊ ಖರೋಖರ್ ಅಂದಾಜ್ ತುಮಿಂ ಕರ್ಯೆತಾ. ಆನಿ ತ್ಯಾ ಖಾತಿರ್ ಸರ್ವೆಸ್ಪರ್ ದೆವಾಚೊ ಉಪ್ಕಾರ್ ಹಾಂವ್ ಬಾವುಡ್ತಾಂ.
ಸಾಹಿತ್ಯ್ ಮ್ಹಳ್ಯಾರ್ ಕಿತೆಂ?
ಸಮಾಜೆಕ್ ಕಿತೆಂ ಜಾಯ್ ತೆಂಚ್ ದಿಂವ್ಚಾಕೀ, ಅಪ್ಲ್ಯಾ ಕೊಶೆಡ್ದಾಕ್ ಖಾಲ್ ಜಾಲ್ಲೆಂ ಪ್ರಾಮಾಣಿಕ್ ಬರಾಪ್ ಅಪುಣ್ ಕಿತ್ಲೆಂ ದೀಂವ್ಕ್ ಸಕ್ತಾಂ? ಆನಿಂ ಸಕ್ತಾಂ ತರ್ ಮ್ಹಜೆಪ್ರಕಾರ್ ತೆಂಚ್ ಖರೆಂ ಸಾಹಿತ್ಯ್. ಸಾಹಿತ್ಯ್ ಏಕ್ ಮಿಸಾಂವ್, ಸಾಹಿತ್ಯ್ ಏಕ್ ಜವಾಬ್ಧಾರಿ, ಸಾಹಿತ್ಯ್ ಏಕ್ ಪಯ್ಣ್. ಆನಿಂ ಹ್ಯಾ ಪಯ್ಣಾಂತ್ ಏಕ್ ಸಾಹಿತಿ ಜಾವ್ನ್ ಫಕತ್ತ್ ದೀಂವ್ಕ್ ಆಸ್ತೆಲೆಂ ಶಿವಾಯ್ ಘೆಂವ್ಕ್ ನ್ಹಯ್. ಫಕತ್ತ್ ಮುಖಾರ್ ಅಪ್ಲಿ ವಾಟ್ ಧರುನ್ ಚಲೊಂಕ್ ಆಸ್ತೆಲೆಂ ಶಿವಾಯ್ ಅಪ್ಣಾನ್ ಚಲ್ಲ್ಲಿ ವಾಟ್ ಪಾಟಿಂ ಪಳೆಂವ್ಚಿ ನ್ಹಯ್.
ಆಜ್ ಕೊಂಕ್ಣಿ ಸಾಹಿತ್ಯ್ ಮ್ಹಳ್ಯಾರ್ ಸಮಾಜೆಂತ್ ಅಥ್ವೊಚ್ ವರ್ಗ್ ಜಾವ್ನ್ ರುತಾಂ ಜಾಲಾ, ಸಾಹಿತ್ಯ್ ಫಕತ್ತ್ ಎಕಾಮೆಕಾ ಖೊಡಿ ಕಾಡ್ಚೆಂ ಮಾಧ್ಯಮ್ ಜಾಲಾಂ, ಪಯ್ಲೊಚ್ ಉಣೊ ಜಾವ್ನ್ ಯೆಂವ್ಚೊ ಎಕ್ವಟ್ ದಿಸಾನ್ದೀಸ್ ಬಿಗ್ಡೊನ್ ಗೆಲಾ, ಆಜ್ ಕೊಂಕ್ಣಿ ಕೊಣಾಕೊಣಾಚಾ ತುರುಪಾಚೊ ಎಕ್ಕೊ ಜಾಲಾ ಆನಿ ಕೊಣೆಂಯ್ ಕಶೆಂಯ್ ಖೆಳ್ಯೆತ್ ಮ್ಹಳ್ಳೆಪರಿಂ ಜಾಲ್ಲ್ಯಾ ವಗ್ತಾಂ ’ಬಿರುದೊ’ ’ಪುರಸ್ಕಾರ್’ ಫಕತ್ ಬಾಜಾರಿ ಜಾವ್ನ್ ಆಯಿಲ್ಲ್ಯಾ ಹ್ಯಾ ಕಾಳಾರ್ ಆಮ್ಚೆಭಿತರ್ ಪಯ್ಲೆಂ ಆಮಿಂಚ್ ನೀಜ್ ಕೊಂಕ್ಣಿ ಸ್ಪಿರಿತಾಕ್ ಸೊಧುಂಕ್ ದಿಸಾಕ್ ಚಾಚಾರ್ ದಿವೆ ಪೆಟವ್ನ್ ಸೊಧಿಜಾಯ್ ಪಡ್ಲಾಂ. ಬರವ್ಪ್ಯಾಂಚಿ ಎಕಾಮೆಕಾಮಧ್ಲಿ ಮನೋಗತ್ ಬದಲ್ಲ್ಯಾ, ಸ್ಪರ್ಧ್ಯಾಚೊ ಖರೊ ಮತ್ಲಬ್ ಬದ್ಲೊನ್ ಕೊಂಕ್ಣೆಚಾಕೀ ವೆಕ್ತಿ ಪ್ರಮುಖ್ ಜಾಂವ್ಕ್ ಲಾಗ್ಲಾ. ಲಿಪಿ, ಬೊಲಿಯಾಂನಿ ಬರವ್ಪ್ಯಾಂಕ್ ಕಟ್ಪುತ್ಳ್ಯೊ ಕೆಲ್ಯಾತ್ ಆನಿಂ ಆಮ್ಚೊಚ್ ತಮಾಸೊ ಆಮಿಂಚ್ ಪಳೆಂವ್ಕ್ ಪಡ್ಲಾಂ. ಕೊಂಕ್ಣೆಖಾತಿರ್ ವಾವ್ರ್ ಕರ್ಚಾ ಇರಾದ್ಯಾಚೆ ಸಂಘ್-ಸಂಸ್ಥೆ ಅಪಾಪ್ಲೆ ದೊರೆಚ್ ಉಭಾರ್ ಕರ್ಚಾರ್ ಪಡ್ಲ್ಯಾತ್. ಹೆರಾಂನಿ ಕರ್ಚಾ ಬರ್ಯಾ ಕಾಮಾಂಕ್ ವಳ್ಕೊಂವ್ಚಿ ದೀಶ್ಟ್ ಕುಡ್ಡಿ ಜಾಲ್ಯಾ.
ಮಾಫ್ ಕರಾ ಮ್ಹಜೊ ಇರಾದೊ ಕೊಣಾಯ್ಕ್ಯ್ ಪ್ರತ್ಯಕ್ಶ್ ರಿತಿನ್ ಜಾಂವ್ ವಾ ಪರೋಕ್ಶ್ ರಿತಿನ್ ಜಾಂವ್ ಖೊಂಕ್ಚೊ ವಾ ತೊಪ್ಚೊ ನ್ಹಯ್, ಹೆಂ ಮ್ಹಜಾ ಮತಿನ್ ಸಮ್ಜಾಲ್ಲಿಂ ಸತಾಂ. ಜಾಂವ್ಕ್ ಪುರೊ ಹಾಂವ್ ಸಭಾರ್ಕಡೆ ಫಟೊನ್ ಪಡ್ಲಾಂ. ಕೊಂಕ್ಣೆಖಾತಿರ್ ತಕ್ಲಿ ಬಾಗಾಂವ್ಕ್ ಕೊಣಾಕ್ಚ್ ನಾಕಾ ಜಾಲ್ಲ್ಯಾ ಹ್ಯಾ ಪರಿಗತೆಂತ್ ಕೊಂಕ್ಣೆಂತ್ ಸಾಹಿತ್ಯ್ ರಸ್ಚೆಂ ಧಯ್ರ್ ಯಾ ಪಿಸಾಯ್ ಆಸ್ಚಾಂಕ್ ’ಪಿಸೊ’ ನಾಸ್ತಾನಾ ಹೆರ್ ಖಂಯ್ಚೆಂ ನಾಂವ್ ಸೊಭತ್?
ತರ್ಯ್ ಆಮ್ಚಾ ಕೊಂಕ್ಣೆಂತ್ ಅಜೂನ್ ಝುಜಾರಿ ಆಸಾತ್ ತೆಂಚ್ ಸಮಧಾನ್! ತಿಂ ಝುಜಾರಿ ಅಜೂನ್ ಕೊಂಕ್ಣೆಖಾತಿರ್ ಜಿಯೆತಾತ್ ಆನಿಂ ಝುಜ್ ಮಾಂಡ್ತಾತ್. ಮ್ಹಜೆಮುಖಾರ್ ಲಿಸಾಂವಾಂ ಶಿಕೊಂಕ್ ಜಾಯ್ತಿಂ ಲಿಸಾಂವಾಂ ಆಸಾತ್, ಕೊಂಕ್ಣಿ ಸಾಹಿತ್ಯ್ ರಚುನ್ ಗತ್ ಆಧರ್ ನಾಸ್ತಾನಾ, ಅಪ್ಲ್ಯಾ ಬಾಯ್ಲೆ-ಬುರ್ಗ್ಯಾಂಕ್ ಪೊಸ್ಚಿ ಗತ್ ನಾಸ್ತಾನಾ, ವೀಕ್ ಘೆವ್ನ್ ಮೊರೊಂಕ್ ವೀಕ್ ಘೆಂವ್ಚಿ ತಾಂಕ್ಯ್ ನಾಸ್ತಾನಾ ದೀಸ್ ಲೊಟ್ಲ್ಲೆ ಸಾಹಿತಿ ಜಾಂವ್, ಬುಕಾಂಚಿ ಪರ್ಗಟ್ಣಿ ಕರುನ್ ಹಾತ್ ಮಾತ್ರ್ ನ್ಹಯ್ ಸಗ್ಳಿ ಜಿಣಿಂಚ್ ಹುಲ್ಪೊನ್ ಕಾಣ್ಗೆಲ್ಲೆ ಪರ್ಗಟ್ಣಾರ್ ಜಾಂವ್ ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಅಪ್ಲೆಂ ಆವ್ಕ್, ಸಮಧಾನ್, ಆಸ್ತ್ ಝರಯಿಲ್ಲೆ ಜಾಂವ್.
ಜಾಯ್ತ್ಯಾ ಮಾಲ್ಘಡ್ಯಾ ಸಾಹಿತಿಂನಿ ಮ್ಹಾಕಾ ಮೊಗಾನ್ ಹ್ಯಾವಿಶಿಂ ಸಮ್ಜಾಯ್ಲಾಂ, ಸಮ್ಜಾಯ್ತಾತ್ ತರ್ಯ್ ಮ್ಹಜಿ ಮತ್ ತೆಂ ಸತ್ ಒಪುನ್ ಘೆಂವ್ಕ್ ಕಬೂಲ್ ಆಸಾ ತರ್ಯೀ ಮ್ಹಜೆಂ ಕಾಳಿಜ್ ಕಿತ್ಯಾಕ್ಗೀ ಕಬೂಲ್ ನಾ. ತಾಚೆಮಧೆಂ ಆಧುರಿಂಚ್ ಉಭಿಂ ಆಸ್ಚಿಂ ಸವಾಲಾಂ. ಹ್ಯಾ ಅಧುರ್ಯಾ ಸವಾಲಾಂ ಮಧೆಂ ಸಯ್ತ್ ಭರ್ವಶ್ಯಾಚಾ ಪಾವ್ಲಾಂನಿ ಚಲ್ಚೆಂ ಕಾಮ್ ಆಮಿಂಚ್ ಕರುಂಕ್ ಆಸಾ. ಹೆಂ ಜರ್ ತುಮ್ಕಾಂ ನಿರಾಸ್ವಾದ್ ಮ್ಹಣ್ ಭೊಗ್ತಾ ತರ್ ಮ್ಹಾಫ್ ಕರಾ, ಕಿತ್ಯಾಕ್ ನಿರಾಸ್ವಾದ್ ಪಾಚಾರ್ಚೆಂ ಆಶಾವಾದಿ ಪ್ರಕಾಶನಾಕ್ ಏಕ್ ಗುನ್ಯಾಂವ್, ಕೊಂಕ್ಣೆಂತ್ ಎದೊಳ್ ನಾತ್ಲ್ಲೆಂ ಕಿತ್ಯಾಕ್ ನಾಂ ಮ್ಹಣ್ ಫಕತ್ತ್ ಸವಾಲ್ ಕರುಂಕ್ ಹಾಂವ್ ವಚಾನಾ, ಬಗಾರ್ ಅಪುಣ್ ಜಾವ್ನ್ ಕರುಂಕ್ ಪ್ರೇತನ್ ಕರ್ತಾಂ.
ಹಾಂವ್ ಕಿತೆಂ ಕರ್ತಾಂ? ಕಿತ್ಯಾಕ್ ಕರ್ತಾಂ? ಮ್ಹಳ್ಳೆಂ ಹಾವೆಂ ಸಂಸಾರಾಕ್ ರುಜು ಕರಿಜಾಯ್ ಮ್ಹಣ್ ನಾ, ಫಕತ್ ಅಪ್ಲ್ಯಾ ಅಂತಸ್ಕರ್ನಾಕ್ ಸರಿ ಜಾಲೆಂ ತರ್ ಜಾಲೆಂ. ಸಾಹಿತ್ಯ್ ಮ್ಹಜೆಪ್ರಕಾರ್ ಏಕ್ ಜವಾಬ್ಧಾರಿ ಶಿವಾಯ್ ಹೆರ್ ಕಿತೆಂಚ್ ನ್ಹಯ್. ಆನಿಂ ಹೆಂ ಮ್ಹಜೆಂ ಚಿಂತಾಪ್ ಹ್ಯಾ ದಿಶೆನ್ ವಾಳೊಂಕ್ ಜಾಯ್ತ್ಯಾ ಮ್ಹಜಾ ಸಾಹಿತಿಕ್ ಮಿತ್ರಾಂನಿ ಪ್ರತ್ಯಕ್ಶ್ ಯಾ ಪರೋಕ್ಶ್ ರಿತಿನ್ ಮ್ಹಜೆರ್ ಪ್ರಭಾವ್ ಘಾಲಾ ಆನಿಂ ತಾಂಚೊಯ್ ಹಾಂವ್ ಆಜ್ ಉಪ್ಕಾರ್ ಬಾವ್ಡುಂಕ್ ಫಾವೊ;
ಕಶೆಂ ವಿಸ್ರೊಂ ಕೆವಿನ್ ಡಿ’ಮೆಲ್ಲೊಸವೆಂ ದಿಸಾಂಗಟ್ಲ್ಯಾನ್ ಕೆಲ್ಲ್ಯಾ ಸಾಹಿತಿಕ್ ಸಂವಾದಾಕ್? ಕಶೆಂ ವಿಸ್ರೊಂ ಪಂಚು ಬಂಟ್ವಾಳಾಸವೆಂ, ಮೌರಿಸ್ ಶಾಂತಿಪುರಸವೆಂ ಖರ್ಚಿಲ್ಲ್ಯಾ ಜಾಯ್ತ್ಯಾ ಸಾಹಿತಿಕ್ ಘಡಿಯಾಂಕ್? ಕಶೆಂ ವಿಸ್ರೊಂ ಆಂಡ್ರು ಡಿ’ಕುನ್ಹಾಚಾ ಸಾಹಿತಿಕ್ ಜತ್ನೆಕ್? ಕಶೆಂ ವಿಸ್ರೊಂ ಎಚ್ಚೆಮಾಚಾ ವಿಚಾರಾಂಕ್? ಕಶೆಂ ವಿಸ್ರೊಂ ಡೊಲ್ಫಿ ಕಾಸ್ಸಿಯಾನ್ ದಿಲ್ಲ್ಯಾ ಉತ್ತೇಜನಾಕ್? ಕಶೆಂ ಅನುಪ್ಕಾರಿ ಜಾಂವ್ ಹಾಂವ್ ಅವಿಲ್ ರಸ್ಕೀನ್ಹಾಕ್?
ಇತ್ಲೆಂಚ್ ನ್ಹಯ್, ಕಶೆಂ ವಿಸ್ರೊಂ ’ತುಂ ಬರೊ ಜಾ’ ಮ್ಹಳ್ಳ್ಯಾ ಎಟ್ಯೆಲಾಕ್? ವಾ ’ಭಾಂಗಾರ್ ಮನಿಸ್ ಚಾ.ಫ್ರಾಕ್?’, ಕಶೆಂ ವಿಸ್ರೊಂ ಕೊಂಕ್ಣಿ ಸಾಹಿತ್ಯಾಚೊ ಚಕ್ರವರ್ತಿ ’ವಾಸು’ ಚಾ ಕಾಣ್ಯಾಂಕ್? ಕಶೆಂ ವಿಸ್ರೊಂ ವಿರೊಚಾ ’ರಗ್ತಾಚಾ ಬೊಬಾಟೆಕ್?’ ಕಶೆಂ ವಿಸ್ರೊಂ ಹೆರೊಲ್ಪಿಯುಸಾಕ್? ಸಿರಿವಂತಾಚಾ ಸಾಳ್ಕಾಕ್? ಡೊಲ್ಫಿ ಕಾಸ್ಸಿಯಾಚಾ ಪುನೊವೆಕ್? ಜೆರಿ ಕುಲ್ಶೇಕರಾಚಾ ’ಘರ್ಚಾ ದಿವ್ಯಾಕ್?’ ಕಶೆಂ ವಿಸ್ರೊಂ ವಿಲ್ಫಿಚಾ ತಾಳ್ಯಾಕ್ ಆನಿ ಪದಾಂಕ್?
ಹ್ಯಾ ಸರ್ವಾಂನಿ ಮ್ಹಜೆರ್, ಮ್ಹಜಾ ಚಿಂತ್ಪಾಚೆರ್, ಮ್ಹಜಾ ವಿಚಾರಾಂಚೆರ್ ಏಕ್ ನ್ಹಯ್ ಏಕ್ ರಿತಿನ್ ಪ್ರಭಾವ್ ಘಾಲಾ ಆನಿಂ ಮ್ಹಜಾ ಕಾಳ್ಜಾಂತ್ ಜರ್ ಕೊಂಕ್ಣೆಚೆಂ ಭಿಂ ವಾಡ್ತಾ ತರ್ ತೆಂ ಅಸಲ್ಯಾಚ್ ಪ್ರಭಾವಾಂತ್ ಮ್ಹಣ್ ಪರ್ಗಟ್ ಕರುಂಕ್ ಮ್ಹಕಾ ಅಭಿಮಾನ್ ಭೊಗ್ತಾ. ಹ್ಯಾ ಪ್ರಭಾವಾಂತ್ ವೆಳಾಕಾಳಾಚೊ ವಾಂಟೊಯ್ ವಿಶೇಸ್ ಆಸಾ. ವೆಳಾಕಾಳಾನ್ಯ್ ಮ್ಹಕಾ ಜಾಯ್ತೆಂ ಶಿಕಯ್ಲಾಂ.
ಕೊಂಕ್ಣೆಂತ್ ಜರ್ ಇತ್ಲೆಂ ಸರ್ವ್ ಹಾವೆಂ ಜೊಡ್ಲಾಂ ತರ್ ಕೊಂಕ್ಣೆಕ್ ತೆಚ್ಚ್ಪರಿಂ ದಿಂವ್ಚೆಂಯ್ ಕಾಮ್ ಮ್ಹಜೆಂ. ಮ್ಹಜೆಂ ಫಾಲೆಂ ಹಾಂವ್ ನೆಣಾಂ ದೆಕುನ್ ಆಯ್ಚಾ ದಿಸಾ ಮ್ಹಾಕಾ ಇಲ್ಲೆಂ ಕಾಮ್ ಕರುಂಕ್ ಆಸಾ, ಜೆಂ ಕೊಂಕ್ಣೆಕ್ ಉಪ್ಕಾರಾಕ್ ಪಡ್ಚೆಂ. ಹೆಂಚ್ ಮ್ಹಜೆಂ ಮಿಸಾಂವ್, ಜಿಣ್ಯೆಂತ್ ಹಾವೆಂ ಕಿತ್ಲೆಂ ಗಳ್ಸಿಲಾಂ ಮ್ಹಳ್ಳೆಂ ಮ್ಹಾಕಾ ಪ್ರಮುಖ್ ನ್ಹಯ್, ಬಗಾರ್ ಜ್ಯೆಂ ಕಿತೆಂಯ್ ಗಳ್ಸಿಲಾಂ ತಾಂತುಂ ಹಾವೆಂ ಕಿತ್ಲೊ ಜೀವ್ ಭರ್ಲಾ ತೆಂ ಮ್ಹಾಕಾ ಪ್ರಮುಖ್. ಜಿಣಿ ಏಕ್ ಶಿಕ್ಚಿ ಪ್ರಕ್ರಿಯಾ ಆನಿ ಮ್ಹಜೆಂ ಸಾಹಿತ್ಯ್ಯ್ ಮ್ಹಾಕಾ ಶಿಕ್ಚಿ ಪ್ರಕ್ರಿಯಾ, ಜಿ ಶಿಕೊನ್ಂಚ್ ಆಸಾಜಯ್, ಶಿಕೊನ್ಂಚ್ ಆಸಾಂ ಆನಿಂ ಫುಡೆಂಯ್ ಶಿಕೊನ್ಂಚ್ ಉರೊಂಕ್ ದೆವಾಲಾಗಿಂ ಮಾಗ್ತಾಂ.
ಖಾಲ್ತ್ಯಾ ನಮಾನಾಸವೆಂ,
- ವಲ್ಲಿ ಕ್ವಾಡ್ರಸ್
[ಸೆಪ್ತೆಂಬ್ರಾಚಾ 24 ವೆರ್ ಮಂಗ್ಳುರಾಂತ್ ಜಾಲ್ಲ್ಯಾ ಪಾಂಚ್ ಬುಕಾಂಚಾ ಮೊಕ್ಳೀಕ್ ಕಾರ್ಯಾವೆಳಾರ್ ಉಲಯಿಲ್ಲೆಂ ಉಲವ್ಪ್]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
