ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಏಕ್ ಸಾಂಖೊವ್ ಭಾಂದುಂಕ್ ಖಾಂಬೆ ಗರ್ಜೆಚೆ, ಪುಣ್ ಫಕತ್ತ್ ಖಾಂಬ್ಯಾಂನಿ ಸಾಂಖೊವ್ ಜಾಯ್ನಾ, ತಾಕಾ ಆಡ್ ಖಾಂಬೆಯೀ ಗರ್ಜೆಚೆ’
ಉಭೆ ಆನಿ ಆಡ್ ಖಾಂಬೆ
ವರಸ್ : 2007
ಅಂಕೊ : 35
ಮಯ್ನೊ : ಮಾಯ್
ಸಂಪಾದಕೀಯ್ - 35.
ವಲ್ಲಿ ಕ್ವಾಡ್ರಸ್
ಹರ್ಯೆಕಾ ಭಾಸೆಂತ್ಲ್ಯಾ ಸಾಹಿತ್ಯಾಕ್ ’ಜನರೇಶನ್ ಗ್ಯಾಪ್’ (ಪಿಳ್ಗೆ ಮಧ್ಲೊ ಅಂತರ್) ಏಕ್ ಸಮಸ್ಸೊ. ಹರ್ಯೆಕಾ ಭಾಸಾಂನಿ ಆಸ್ಚೆ ಸಾಹಿತಿ ವೆವೆಗ್ಳ್ಯಾ ಕಾಳಾಚೆ, ವೆವೆಗ್ಳ್ಯಾ ಕಾಲೆತಿಚೆ, ವೆವೆಗ್ಳ್ಯಾ ಚಿಂತ್ಪಾಚೆ ಮ್ಹಣ್ತಚ್ ಕೊಂಕ್ಣಿ ಭಾಸೆಚೆಂ ಸಾಹಿತ್ಯ್ ಕಾಂಯ್ ಅಥ್ವೆಂಚ್ ನ್ಹಂಯ್. ಆಮ್ಚಾ ಕೊಂಕ್ಣೆಂತ್ ಹೆಂ ಜನರೇಶನ್ ಗ್ಯಾಪ್ ಆಸಾ ಮ್ಹಳ್ಳೆಂ ಸತ್ ಕೊಣಾಕ್ ದಿಸೊನ್ಯೀ ದಿಸಾನಾತ್ಲೆಪರಿಂ ಕೆಲಾಂ ಜಾವ್ಯೆತ್ ವಾ ಕೊಣಾಕ್ ದಿಸೊನ್ಯೀ ಅಪ್ಣಾಕ್ ಕಿತೆಂ ಪಡೊನ್ ಗೆಲಾಂ ಮ್ಹಳ್ಳ್ಯಾ ಚಿಂತ್ಪಾನ್ ತ್ಯೇಶಿಂ ಚಡಿತ್ ಗುಮಾನ್ ದೀಂವ್ಕ್ ನಾ ತರ್ಯೀ ಹೊ ಸಮಸ್ಸೊ ಪರಿಹಾರ್ ಕರ್ಚೊ ಭೋವ್ ಗರ್ಜೆಚೊ.
ಹೊ ಸಮಸ್ಸೊ ಕಸ್ಲೊ?
ಖಂಚ್ಯಾಯ್ ಭಾಸೆಂತ್ ಜರ್ ಭಾಸ್ ಉರ್ಲ್ಯಾ ತರ್ ತಾಚೊ ವ್ಹಾಪಾರ್ ಜಾಲ್ಲೆನಿಮ್ತಿಂ. ಆನಿ ಹೊ ವ್ಹಾಪಾರ್ ಜಾಂವ್ಚ್ಯೊ ವಾಟೊ ರುತಾಂ ಕರ್ಚೆ ಸಾಹಿತಿ ಜಾವ್ನಾಸಾತ್. ಗಾವ್ಪಿ ಗಾಯ್ತಿತ್, ನಟ್ ನಟನ್ ಕರ್ತಿತ್ ಪುಣ್ ತಾಂಕಾಂ ಮುಳಾಚೆಂ ಪಾಠ್ಥಳ್ ಗರ್ಜೆಚೆಂ ಜಾವ್ನಾಸಾ ಸಾಹಿತ್ಯ್. ಪದಾಂ-ಗಿತಾಂ ನಾಸ್ತಾಂ ಗಾವ್ಪ್ಯಾನ್ ಗಾಂವ್ಚೆಂ ತರ್ಯೀ ಕಿತೆಂ? ನಟನ್ ಕರುಂಕ್ಯೀ ಜೊಕ್ತೆಂ ಸಂಭಾಶಣ್ ಗರ್ಜೆಚೆಂ ನ್ಹಂಯ್ಗಿ? ಅಶೆಂ ಮ್ಹಣ್ತಚ್ ಸಾಹಿತ್ ಖರೆಂಚ್ ಜಾವ್ನ್ ಎಕಾ ಭಾಸೆಚಾ ವ್ಹಾಡಾವಳೆಕ್ ಭೋವ್ ಮಹತ್ವಾಚೊ ಪಾತ್ರ್ ಘೆತಾ ಮ್ಹಳ್ಳೆಂ ಸತ್.
ಸಂಸಾರಾಚಿ ಪರಿಗತ್ ಜಶಿ ದಿಸಾನ್ದೀಸ್ ಬದ್ಲೊನ್ ಯೆತಾ, ತೆಚ್ಚ್ಪರಿಂ ಹರ್ಯೆಕಾ ಭಾಸಾಚೆ ಸಾಹಿತಿ ತ್ಯಾ ತೆಕಿದ್ ಅಪ್ಲ್ಯಾ ಚಿಂತ್ಪಾಚಿ ಧಾರ್, ದಿಶಾ ಬದ್ಲಿತಾತ್. ಥೊಡೆ ಶಿಕ್ಪಾನ್, ಥೊಡೆ ಜಾಣ್ವಾಯೆನ್, ಥೊಡೆ ಸಮ್ಜಣೆಂತ್, ಥೊಡೆ ಜೊಕ್ತ್ಯಾ ವಾಚ್ಪಾಂತ್ ಅಪ್ಲಿ ಚಿಂತ್ಪಾ ಸಕತ್ ಚಡಯ್ತಾತ್. ಸಾಹಿತ್ ರಚುನ್ ಅನ್ಭೋಗ್ ಜೊಡ್ತಾತ್ ಆನಿ ಅಶೆಂ ಅನ್ಭೋಗ್ ಜೊಡ್ಲ್ಲೆಪರಿಂಚ್ ಥೊಡಿಂ ಅಪ್ಲ್ಯಾ ಮತಿಚಿಂ ದಾರಾಂ ಉಗ್ತಿಂಚ್ ದವರ್ತಾತ್ ಆನಿ ಥೊಡಿಂ ಧಾಂಪ್ತಾತ್ - ಹೆಂ ತ್ಯಾ ತ್ಯಾ ಸಾಹಿತಿಚ್ಯಾ ಮನೋಗತೆಚೆರ್ ಆಸಾ. ಖಂಚ್ಯಾಯ್ ಭಾಸೆಂತ್ ಖಂಚ್ಯಾಯ್ ಸಾಹಿತಿಕ್ ಹ್ಯಾ ಸಂಸಾರಾಂತ್ ಅಪ್ಣಾಚೆಂ ಶಿಕೊನ್ ಜಾಲೆಂ ಮ್ಹಣ್ ನಾ. ಮೊರ್ತಾಸರ್ ಶಿಕೊಂಕ್ ಆಸ್ತಾಚ್. ಜೊ ಕೋಣ್ ಸಾಹಿತಿ (ಅರ್ಧೊ ಕೊಳ್ಸೊ) ಅಪ್ಣಾಕ್ ಲಾಭ್ಲ್ಲಿ ಜಾಣ್ವಾಯ್ ವರ್ತಿ ದೆಖುನ್ ಅಪ್ಲ್ಯಾ ಮತಿಚೆಂ ದಾರ್ ಧಾಂಪ್ತಾ, ತಸಲೊ ಹೆರಾಂ ಥಾವ್ನ್ ಶಿಕೊಂಕ್ ವಚಾನಾ, ಬಗಾರ್ ಅಪ್ಣಾ ಥಾವ್ನ್ ಹೆರಾಂನಿ ಶಿಕಾಜಯ್ ಮ್ಹಣ್ ಆಂವ್ಡೆತಾ - ಹೆಂ ಚಿಂತ್ಪಾಚೆಂ ಅಶೀರ್ಪಣ್.
ಆತಾಂ ಫಕತ್ತ್ ಆಮ್ಚಾ ಕೊಂಕ್ಣೆವಿಶಿಂ ಉಲಂವ್ಚೆಂ ತರ್ - ಆಮ್ಚಾ ಕೊಂಕ್ಣೆಂತ್ಯ್ ಅಸಲೆ ಸಾಹಿತಿ ದರಬಸ್ತ್ ಆಸಾತ್. ಕಾಂಯ್ ಏಕ್ ದೋನ್ ಪ್ರಶಸ್ಥಿ ಲಾಭ್ಲ್ಯೊ ತರ್ ಜಾಲೆಂ - ತೆ ಜಿವೆ ಸಾಂತ್. ಕೊಂಕ್ಣೆಂತ್ ತಾಂಚೆಂ ನಾಂವ್ ಅಮರ್. ಆನಿ ತಾಂಚಾ ಮತಿಚಿಂ ದಾರಾಂ ಬಂಧ್. ಪುಣ್ ಖರೆಂಪಣಿಂ ಎಕಾ ಸಾಹಿತಿಕ್ ಖಂಚ್ಯಾಯ್ ಪ್ರಶಸ್ಥೆಂತ್ ಮೆಜುಂಕ್ ಸಾಧ್ಯ್ ಆಸಾ? ಧಾಖ್ಲೊ: ಕೊಂಕ್ಣಿ ಕಾದಂಬರಿಚೊ ಬಾಪುಯ್ ಮ್ಹಣ್ ನಾಂವಾಡ್ದಿಕ್ ಜಾಲ್ಲ್ಯಾ ಜೊ.ಸಾ.ಅಲ್ವಾರಿಸಾಚಾಯಾ ಎಕಾ ಕಾದಂಬರೆಕ್ಯೀ ಅಕಾಡೆಮಿ ಪ್ರಶಸ್ಥಿ ಲಾಭೊಂಕ್ ನಾ. ತರ್ ಅಕಾಡೆಮೆಚಿ ಪ್ರಶಸ್ಥಿ ಲಾಭ್ಲ್ಲ್ಯಾ ಕಾದಂಬರಿಕಾರಾಂಚ್ಯೊ ಕಾದಂಬರಿಯೊ ಜೊ.ಸಾ.ಅಲ್ವಾರಿಸಾಚ್ಯಾ ಕಾದಂಬರೆಂಚ್ಯಾಕೀ ಉಂಚ್ಲ್ಯೊ ಮ್ಹಣ್ ಜಾಲೆಂ? ದೆ|ಲುವಿಸ್ ಮಸ್ಕರೇಞ್ ತಸಲೊ ಕವಿ ಕೊಂಕ್ಣೆಂತ್ ಅಜೂನ್ ಉದೆಂವ್ಕ್ ನಾ ಮ್ಹಣ್ತಾತ್ - ಹಾಕಾ ಕಸಲಿಚ್ ಪ್ರಶಸ್ಥಿ ಮೆಳೊಂಕ್ ನಾ. ತಶೆಂ ಆಸ್ತಾಂ ಖಂಚೀಯ್ ಪ್ರಶಸ್ಥಿ ಖಂಚ್ಯಾಯ್ ಸಾಹಿತಿಕ್ ಮಹಾನ್ ಕರುಂಕ್ ಸಕಾನಾ. ಅಶೆಂ ಚಿಂತ್ಚೆ ಆಸ್ತಿತ್ ತರ್ ತೆ ಖರೆಂಚ್ ಆಳ್ಮ್ಯಾಚಾ ಚಿಂತ್ಪಾಚೆ. ತಾಚೆ ಪಂದಾ ಕಿತೆಂಚ್ ಕಿರ್ಲಾನಾ.
ಅಶೆಂ ಮ್ಹಣೊನ್ ಮ್ಹಜೊ ಇರಾದೊ ಕೊಣಾಕ್ಯ್ ಕುಪಾಂಚೆರ್ ಚಡಂವ್ಚೊ ವಾ ಕೊಣಾಯ್ಕೀ ಕುಪಾಂಚೆರ್ ಥಾವ್ನ್ ವೊಡ್ನ್ ಘಾಲ್ಚೊ ನ್ಹಂಯ್. ಹ್ಯಾ ಸಮಸ್ಸ್ಯಾಚೆರ್ ಇಲ್ಲೊ ಉಜ್ವಾಡ್ ಫಾಂಕಂವ್ಚೊ. ಆಮ್ಚಾ ಕೊಂಕ್ಣೆಂತ್ ಜಾಯ್ತೆ ಅಸಲೆ ಉಭೆ ಖಾಂಬೆ ಆಸಾತ್, ಅಪ್ಲೇಸ್ತಕಿಂ ಮಹಾನ್ ಸಾಹಿತಿ ಜಾವ್ನ್ ವ್ಹಾಡೊನ್ ಉರ್ಲ್ಯಾತ್. ತಾಣಿಂ ರಚ್ಲ್ಲ್ಯಾ ಸಾಹಿತ್ಯಾಂತ್, ತಾಂಕಾಂ ಮೆಳ್ಲ್ಲ್ಯಾ ಪ್ರಶಸ್ಥ್ಯಾಂನಿ ತಾಂಕಾಂ ಉಭೊ ಖಾಂಬೊ ಕೆಲಾ - ಖರೆಂ. ಪುಣ್ ಕೊಣಾಯ್ಕ್ಯೀ ಆಡ್ ಖಾಂಬೆ ಜಾಂವ್ಕ್ ನಾಕಾ. ಕಿತ್ಯಾಕ್? ಕಸ್ಲೆ ತೆ ಆಡ್ ಖಾಂಬೆ?
ಜಶೆಂ ಹೆರ್ ಭಾಸಾಂನಿ ಆಸ್ಚೆಪರಿಂ ಆಮ್ಚಾ ಕೊಂಕ್ಣೆಂತ್ಯೀ ಜಾಯ್ತೆ ಉದೆವ್ನ್ ಯೆಂವ್ಚೆ ಸಾಹಿತಿ ಆಸಾತ್. ಅಸಲ್ಯಾಂಕ್ ಕಿತ್ಲೆಶ್ಯಾಂಕ್ ಆಮ್ಚೆ ಮಹಾನ್ ಸಾಹಿತಿಕ್ ವಳ್ಕತಾತ್ ಆನಿ ತಾಂಚಾ ಸಾಹಿತ್ಯಾಚೆರ್ ಅರ್ಸೊ ಧರ್ತಾತ್? ಅಪ್ಣಾನ್ ವೀಸ್, ತೀಸ್, ಚಾಳಿಸ್, ಪನ್ನಾಸ್ ವರ್ಸಾಂ ಕೊಂಕ್ಣಿ ಸಾಹಿತಿಕ್ ಸೆವಾ ಕೆಲ್ಯಾ ಮ್ಹಣ್ಚಾ ಕಿತ್ಲೆಶ್ಯಾ ಸಾಹಿತಿಂನಿ ಉದೆವ್ನ್ ಯೆಂವ್ಚಾ ಸಾಹಿತಿಂಚಾ ಬುಕಾಂಚೆರ್ ಕಾಂಯ್ ವಿಮರ್ಸೊ ವಾ ಸಮೀಕ್ಶಾ ಕೆಲ್ಯಾ? ತರ್ ಹಾಣಿಂ ಹ್ಯಾ ವೀಸ್, ತೀಸ್, ಚಾಳಿಸ್ ವರ್ಸಾಂನಿ ಪಿಕಯಿಲ್ಲೆ ಗಡಾಯ್ ವಾ ಗೊಂಯ್ಟಾಂ ಕೊಣಾಖಾತಿರ್? ಹಿ ಮನೋಗತ್ ಖರೆಂಚ್ ಜಾವ್ನ್ ಭಾಸೆಚೆರ್ ಪ್ರಭಾವ್ ಘಾಲ್ತಾ ಕಶೆಂ ಪಳೆಯಾಂ - ಜೆದ್ನಾಂ ಪರ್ಯಾಂತ್ ಅಸಲಿ ಮನೋಗತೆಂತ್ ಆಮ್ಚೆ ಉಭೆ ಖಾಂಬೆ ಆಸ್ತಿತ್, ತೆದೊಳ್ ಪರ್ಯಾಂತ್ ಉದೆವ್ನ್ ಯೆಂವ್ಚೆ ಸಾಹಿತಿ ತಸಲ್ಯಾಂಕ್ ಖಾಯ್ಸ್ ಕರ್ಚೆಂ ಸೊಡ್ - ವಾಚುಂಕ್ಯೀ ವಚಾನಾಂತ್. ಅಶೆಂ ಉಭ್ಜತಾ ಖೊಡ್ - ’ಆಮ್ಚೆಂ ಸಾಹಿತ್ಯ್ ಬೂಸ - ಕುಂಡೊ’ (ಮಾಫ್ ಕರ್ ಬಾಬ್ ಸ್ಟೀಫನ್ ಕ್ವಾಡ್ರಸ್ ತುಜೊ ಸಬ್ಧ್ ವ್ಹಾಪಾರ್ಲ್ಲ್ಯಾಕ್).
ಹಾಂಗಾಸರ್ ಮ್ಹಜೊ ಇರಾದೊ ಮಾಲ್ಘಡ್ಯಾಂಕ್ ವಾ ಉದೆವ್ನ್ ಯೆಂವ್ಚಾ ಸಾಹಿತಿಂಚಾ ಕುಲ್ಯಾಂಕ್ ಚಿಮ್ಟೊ ಕಾಡ್ಚೊ ಭಿಲ್ಕುಲ್ ನ್ಹಂಯ್. ಹೊ ಅಂತರ್ ಕಿತ್ಯಾಕ್?
ಆಮ್ಚಾ ಸಾಹಿತ್ಯಾಕ್ ಆಡ್ ಖಾಂಬೆ ಜಾಯ್. ಆಮಿಂ ಖಾಂಬೆ ಭಾಂದುಂಕ್ ಸಕ್ತಾಂವ್ ಪುಣ್ ಫಕತ್ತ್ ಉಭ್ಯಾ ಖಾಂಬ್ಯಾಂನಿ ಸಾಂಖೊವ್ ಜಾಯ್ನಾ, ಸಾಂಖೊವ್ ಜಾಂವ್ಕ್ ಆಡ್ ಖಾಂಬೆ ಗರ್ಜೆಚೆ - ಆನಿ ಏಕ್ ಸಾಂಖೊವ್ ಮಾತ್ರ್ ಎಕಾ ಗಾಂವಾ ಥಾವ್ನ್ ಅನ್ಯೇಕಾ ಗಾಂವಾಕ್ ಪಾವಂವ್ಕ್ ಸಕ್ತಾ. (ಮಧೆಂ ಜನರೇಶನ್ ಗ್ಯಾಪ್ ಮ್ಹಳ್ಳಿ ನಂಯ್ ಆಸಾ).
ಆಡ್ ಖಾಂಬೆ ಜಾಂವ್ಚೆಂ ಕೊಣೆ?: ಹೆಂ ಸವಾಲ್ ಭೋವ್ ಗರ್ಜೆಚೆಂ. ಆಡ್ ಖಾಂಬೊ ಜಾಲ್ಲ್ಯಾಂಕ್ ಖಡ್ಪಾಚೆಂ ಕಾಳಿಜ್ ಆಸ್ಚೆಂ ಗರ್ಜ್ ಆಸಾ, ಘುಗಿಚಿ ದೀಶ್ಟ್ ಆಸ್ಚಿ ಗರ್ಜೆಚಿ ಜಾವ್ನಾಸಾ. ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ಆಡ್ ಖಾಂಬ್ಯಾಂಚೆರ್ ಲೋಕ್ ಚಲೊನ್ ವೆತಾಸ್ತಾಂ, ತ್ಯಾ ಆಡ್ ಖಾಂಬ್ಯಾಂಚೆರ್ ಪಾಂಯ್ ದವರ್ತಾ, ಗುಡ್ಡಾಯ್ತಾ, ಶಿಂಪಿ ಉಡಯ್ತಾ, ವೆವೆಗ್ಳ್ಯೊ ಖೆಬ್ಡಾಯೊ ಕರ್ತಾ. ಕೊಂಕ್ಣೆಚ್ಯಾ ಮಟ್ಟಾಕ್ ಸಾಂಗ್ಚೆಂ ತರ್ ವೆವೆಗ್ಳ್ಯಾ ರಿತಿರ್ ಸಸಾರ್ ಜಾಂವ್ಕ್ ಪಡ್ತಾ, ಲಜ್-ನಾಲಿಸಾಯ್-ಅಣ್ಕೊಣೆಂ ಭೊಗುಂಕ್ ಪಡ್ತಾ. ತರ್ಯೀ ಘುಗಿಚಿ ದೀಶ್ಟ್ ಕಿತ್ಯಾಕ್ ಮ್ಹಳೆಂ ಹಾವೆಂ? ಘುಗ್ ದಿಸಾಕ್ ಪಳೆಂವ್ಕ್ ಸಕಾನಾ. ಫಾತ್ರಾಚೆಂ ಕಾಳಿಜ್ ಕಿತ್ಯಾಕ್ ಮ್ಹಳೆಂ ಹಾವೆಂ? ತಾಂತುಂ ದೂಕ್ ನಾ.
ಜೆದ್ನಾಂ ಪರ್ಯಾಂತ್ ಅಸಲೆ ಆಡ್ ಖಾಂಬೆ ಆಮ್ಚಾ ಕೊಂಕ್ಣೆಂತ್ ನಾಂತ್ ವಾ ಉದೆನಾಂತ್, ತೆದೊಳ್ ಪರ್ಯಾಂತ್ ಆಮ್ಚಾ ಕೊಂಕ್ಣಿ ಸಾಹಿತ್ಯಾಂತ್ ಎಕೇಕ್ ಉಭೆ ಖಾಂಬೆ ಮಾತ್ರ್ ಉದೆತೆಲೆ. ತಾಂಚ್ಯೊ ಕೃತಿಯೊ, ಪ್ರಶಸ್ಥ್ಯೊ ಮಾತ್ರ್ ತಾಂಕಾಂ ಅನಿಕ್ಯೀ ಉಂಚಾಯೆಕ್ ಪಾಯ್ತೆಲಿಂ ತರ್ಯೀ ಎಕಾ ಭಾಸೆಚಾ ಪರಿಪೂರ್ಣ್ ವಿಕಾಸಾಕ್ ಹೆಂ ಉಪ್ಕಾರಾಕ್ ಪಡ್ಚೆಂ ನಾ. ಜೆದ್ನಾಂ ಹೊ ಸಾಂಖೊವ್ ಜಾತಾ, ತೆದ್ನಾಂ ಆಮ್ಚೆ ಮಧೆಂ ಕೊಣ್ಂಚ್ ಊಂಚ್ ವಾ ಕೊಣ್ಂಚ್ ಲ್ಹಾನ್ ಮ್ಹಳ್ಳೊ ಭೇಧ್ ಆಸ್ಚೊನಾ. ಕಿತ್ಯಾಕ್ ಕೊಣ್ಯ್ ಊಂಚ್ ಸಾಹಿತಿ ಪಯ್ಲೊ ಖಾಲ್ತೊ ಆಸ್ತಾಚ್ ಆನಿ ಆಸಾಜಯ್ಚ್.
ಆತಾಂ ಉದೆಂವ್ಚೆಂ ಸವಾಲ್ ಫಕತ್ತ್ ಏಕ್ - ಹಾಂವ್ ಆನಿ ತುಂ ಖಂಚ್ಯಾ ಖಾಂಬ್ಯಾಕ್ ಸೆರ್ವತಾಂವ್?
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
