ಉಲಯ್ಲೊ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ

ಕವಿತಾಪಾಠ್ - 23

ದೇವ್ ಉಲಯ್ಲೊ - ವಿಲ್ಸನ್ ಕಟೀಲ್

ವಿಲ್ಸನ್ ಕಟೀಲ್

ಮಿರ್ಣಿ ಹಾತಿಂ ದೊರಿ ಝೆಂಜ್ರೊನ್

ಧಲ್ಚಿ ಘಾಂಟ್ ಘಡ್ಗಡೆ ಝಡಯ್ತಾನಾ

ಕೊಯೆರಾಂತ್ಲ್ಯಾ ಕೊಗ್ಳೆಚೆಂ ರೆಬೆಕ್ ವ್ಹಾಜೊನ್

ಕಾವ್ಳ್ಯಾಂಚೆಂ ಭಕ್ತಿಪಣ್ ಜಾಗಯ್ತಾನಾ

ಶೆರ್ಮಾಂವಿ ಪಾದ್ರಿ ಗಳೊ ಪಾಜುನ್

ಆಯ್ಕೊವ್ಪ್ಯಾಂಚೆ ಕಾನ್ಪೆ ಉಸ್ತಿತಾನಾ

ಜಮ್‌ಲ್ಲೊ ಲೋಕ್ ತಾಳೊ ಪಿಂಜುನ್

ಜಿಬೆಚೆಂ ಆಗ್ರುಂ ಗಷ್ಟಿತಾನಾ

ಅಖ್ರೇಚ್ಯಾ ಬಾಂಕಾರ್ ಬಸ್‌ಲ್ಲ್ಯಾ

ಮೊನ್ಯಾಚ್ಯಾ ಕಾನಾಂತ್

ದೇವ್ ಗುಣ್ಗುಣ್ಲೊ..

"ಮ್ಹಾಕಾ ತುಜೆಂ ಮಾಗ್ಣೆಂ ಆಯ್ಕಾಲೆಂ"

ಕವಿತಾಪಾಠ್‌ಚೆರ್ ಕೆಲ್ಲಿಂ ಅಧ್ಯಯನ್ ಲೇಕನಾಂ ಬುಕಾರುಪಾರ್ ಪರ್ಗಟ್ ಜಾಲ್ಯಾಂತ್

ಆಧ್ಲ್ಯಾ ಕವಿತಾಪಾಠಾಂಚೊ ವಿವರ್

ಕುವೆಯ್ಟಾಂತ್ಲಿಂ ವೆವೆಗ್ಳಿಂ ಕಾಮಾಸಾಳಾಂ

ಸಂಸಾರಿ ಬಾಜಾರಾಂತ್ ಮನಿಸ್ ಆನಿ ಕವಿ

ಹ್ಯಾ ಸಂಸಾರಾಂತ್ ಖಂಚ್ಯಾಯ್ ಗುಪ್ತ್-ಸುಪ್ತ್ ಸಂಗ್ತಿವಿಶ್ಯಾಂತ್ ದೋನ್ ರಿತಿರ್ ಉಲಂವ್ಕ್, ತರ್ಕ್-ಸಂವಾದ್ ಕರುಂಕ್ ಸಾಧ್ಯ್, ವಿಚಾರ್-ಮಂಥನ್ ಚಲಂವ್ಕ್ ಸಾಧ್ಯ್. ಪಯ್ಲೆಂ ವಸ್ತುನಿಷ್ಟ್ (Objective) ರಿತಿರ್ ತರ್ ದುಸ್ರೆಂ ವೆಕ್ತಿನಿಷ್ಟ್ (Subjective) ರಿತಿರ್. ವಸ್ತುನಿಷ್ಟ್ ರಿತಿರ್ ಉಲಯ್ತಾನಾ ಭಗ್ಣಾಂ, ವೆಕ್ತಿ, ಉಮಾಳೆ, ಅತ್ರೆಗ್ ಖಂಚೆಚ್ ಆಸಾನಾಂತ್ ಬಗಾರ್ ದೊಳ್ಯಾಂಕ್ ದಿಸ್ಚೆಂ, ಕಾನಾಂಕ್ ಆಯ್ಕೊಂವ್ಚೆಂ, ಮತಿಕ್ ಝಳ್ಕೊಂಚೆಂ ಮಾತ್ರ್ ಆಸ್ಚೆಂ ಆಸಾ ತಶೆಂ ಕಸ್ಲಿಚ್ ಲಜ್-ಮುಲಾಜ್ ನಾಸ್ತಾಂ ಸಾಂಗೊನ್ ಸೊಡ್ಚೆಂ. ಪುಣ್ ವೆಕ್ತಿನಿಷ್ಟ್ ರಿತಿರ್ ಸಾಂಗ್ಚ್ಯಾಧಿಂ ಜಾಯ್ತೆಂ ಚಿಂತುಂಕ್ ಪಡ್ತಾ, ಹಾಂಗಾಸರ್ ಸತಾಚೆರ್ ಜಾಯ್ತೆ ಪರ್ದೆ ಘಾಲಿಜಾಯ್ ಪಡ್ತಾ. ಹಾಂಗಾಸರ್ ಭಗ್ಣಾಂ, ಉಮಾಳೆ ರಾಜ್ವಟ್ಕಿ ಚಲಯ್ತಾತ್.

ದೇವ್ ಏಕ್ ಸಂವೇದನ್‌ಶೀಲ್ ಸಬ್ಧ್. ಮನಿಸ್ ಜಲ್ಮೊಂಚ್ಯಾಧಿಂಚ್ ದೆವಾಚ್ಯಾ ಪದ್ವೆವಿಶಿಂ, ದೆವಾಚ್ಯಾ ಸಕ್ತೆವಿಶಿಂ ಆಯ್ಕೊನ್ ಯೆತಾ (ಭೋವ್ಶಾ ಆವಯ್ಚ್ಯಾ ಉದರಾಂತ್ ಆಸ್ತಾನಾಂಚ್). ದೆಖುನ್ ದೆವಾವಿಶಿಂ ಪರ್ಗಟ್ ರಿತಿರ್ ಉಲಂವ್ಕ್ ಎಕಾಥರಾಚಿ ಕಾವ್ಜೆಣ್ ಆಸ್ಚಾಂತ್ ನವಾಲ್ ನಾ. ಎಕಾಧಾವೆಳಾ ಉಲಯ್ಲ್ಯಾರ್ ಕಾಂಯ್ ಸಮಾಜ್ ಅಪ್ಣಾಕ್ ’ನಾಸ್ತಿಕ್’ ಮ್ಹಣ್ ವೊಲಾಯ್ತ್, ಆಪ್ಲಿಂ ಸಯ್ರಿಂ ಧಯ್ರಿಂ, ಇಸ್ಟಾಂ, ಮಂತ್ರಾಂ ಸಮಾಜೆಂತ್ ಅಪ್ಣಾಕ್ ಮಾನ್ ದಿಂವ್ಚಿಂನಾಂತ್ ಮ್ಹಳ್ಳಿ ಭಿರಾಂತ್ ಧೊಸ್ತಾ. ಕೊಣೆಂ ಹ್ಯಾ ಸಂಸಾರಾಂತ್ ದೆವಾಕ್ ’ಭಿರಾಂತ್ ಆನಿ ಅಗ್ಯಾನಾಚೆಂ ಫಳಿತಾಂಶ್’ ಮ್ಹಳಾಂ. ಪುಣ್ ಸರ್ವ್ ವಸ್ತುನಿಷ್ಟ್ ರಿತಿಚೆಂ ಉಲವ್ಪ್ ಹೆಂ.

ಪುಣ್ ಹಕೀಕತೆಂತ್ ಹ್ಯಾ ಮನ್ಶ್ಯಾ ಚಿಂತ್ಪಾಚ್ಯಾ ಅಸ್ಕತ್ಕಾಯೆಕ್ ಲಾಗೊನ್ ಮನ್ಶ್ಯಾಂನಿ ಸಭಾರ್ ದೇವ್ ರಚ್ಲ್ಯಾತ್ ಆನಿ ದೆವಾಂಚೊ ಧಂದೊ ಆಯ್ಚಾ ಸಂಸಾರಾಂತ್ ಯುಗಾಂ ಯುಗಾಂನಿ ಚಲೊನ್ ಆಯಿಲ್ಲೆಪರಿಂಚ್, ಬರ್‍ಯಾ ರಿತಿನ್ ಚಲೊನ್ ಆಸಾ ಆನಿ ಆಸ್ತಲೊ ಮ್ಹಳ್ಳೊ ಮ್ಹಜೊ ಭರ್ವಸೊ.

ಅಜೀಕ್ ತೀನ್ ವರ್ಸಾಧಿಂ ಹಾವೆಂ ಬರಯಿಲ್ಲೆ ಥೊಡೆ ಸಬ್ಧ್ ಹೆ;

"ಚರಿತ್ರೆಚಿಂ ಪಾನಾಂ ಉಸ್ತಿಲಿಂ

ಎಕಾ ಶೆಕ್ಡ್ಯಾಚಿಂ, ಧಾ ದಾಕ್ಡ್ಯಾಚಿಂ

ತೆ ದೀಸ್‌ಯೀ ಅಶೆಚ್ ಆಸ್ಲೆ

ಭುಕಿಂ ಥೊಡಿಂ ನಾಗ್ಡಿಂ

ದೇವ್ ಧರ್ಮಾಚೊ ಧಂದೊ ತೆದ್ನಾಂಯ್ ಚಲ್ತಾಲೊ

ಸಕ್ಕಡ್ ತಶೆಂಚ್ ಆಸಾ

ಪೊರ್ಚೆ ಕಾಲ್ಚೆಪರಿಂ

ಆಜ್!"

ಹೆಂ ಬರಯ್ತಚ್ ಮ್ಹಜೊ ಥೊಡೆ ವಿಮರ್ಶಕ್ ಮಿತ್ರಾಂನಿ ಮ್ಹಾಕಾ ವಿಚಾರ್ಲೆಲೆಂ ಸವಾಲ್ ಹೆಂ; ಹಾವೆಂ ಹೆ ಸಬ್ಧ್ ಬರಯ್ತಾನಾ ಮ್ಹಜಿ ಮತ್ ಖಂಚ್ಯಾ ವರ್ಗಾಚೆಂ ಚಿಂತಾಪ್ ಚಿಂತುನ್ ಆಸ್ಲಿ? ವಸ್ತುನಿಷ್ಟ್ ವಾ ವೆಕ್ತಿನಿಷ್ಟ್? ಸತ್ ಸಾಂಗ್ಚೆಂ ತರ್ ಹ್ಯಾ ಕವಿತೆಂತ್ ಖಂಯ್ಚರ್‌ಯೀ ವೆಕ್ತಿನಿಷ್ಟ್ ಚಿಂತಾಪ್ ನಾ. ಆಸ್ತೆಂ ತರ್ ಇತ್ಲ್ಯಾ ಕೊಡು ಉತ್ರಾಂನಿ ಹೊ ಸಂಸಾರ್ ಅಜೂನ್ ತಸೊಚ್ಚ್ ಆಸಾ ಮ್ಹಳ್ಳೆಂ ಫಯ್ಸಲ್ ದಿತೊಂನಾ. ತೇಂಯ್ ಪಾನಾಂನಿ ಆಸ್ಚಾ ಎಕಾ ಶೆಕ್ಡ್ಯಾಚಿ ಚರಿತ್ರಾ ಪಳೆವ್ನ್.

ಪುಣ್ ಕೊಣ್ ಒಪುನ್ ಘೆಂವ್ ಕೊಣ್ ಸೊಡುಂ, ಪುಣ್ ಸತ್ ಕಿತೆಂ ಮ್ಹಳ್ಳೆಂ ಆಮ್ಚ್ಯಾ ಹರ್ಯೆಕ್ಲ್ಯಾಂಚ್ಯಾ ಕೊಶೆಡ್ದಾಂತ್ ಆಸಾ, ಆಮ್ಚಾ ದೊಳ್ಯಾಂ ಮುಖಾರ್ ಚಲ್ಚೊ ದೆವಾ-ಧರ್ಮಾಚೊ ಧಂದೊ. ಹಾಂತುಂ ಆಮಿಂ ಪ್ರತ್ಯಕ್ಷ್ ರಿತಿನ್ ಭಾಗಿದಾರ್ ನ್ಹಂಯ್ ಆಸ್ಯೆತಾ, ಪುಣ್ ಪರೋಕ್ಷ್ ರಿತಿರ್ ಆಮಿಂಯೀ ತಾಂತುಂ ಸಮಾಸಮ್ ಭಾಗಿಧಾರ್. ದೆಖುನ್ ಆಮ್ಕಾಂ ದೆವಾಂಚ್ಯಾ ದಲಾಲ್ಯಾಂ ಥಾವ್ನ್ ತವಳ್ ತವಳ್ ದೇವ್ ಜಾಯ್, ದೆವಾಂಚಿ ಕುರ್ಪಾ ಜಾಯ್, ದೆವಾಚಿಂ ಬೆಸಾಂವಾಂ ಜಾಯ್. ತ್ಯಾ ಖಾತಿರ್ ಆಮಿಂ ಕಿತೆಂಯ್ ದೀಂವ್ಕ್ ತಯಾರ್, ಇಗರ್ಜೆಚಾ ಘಾಂಟಿ ಥಾವ್ನ್, ಹೋಲ್, ಆನಿ ಅಸಲೆ ದಲಾಲಿ ವೆವೆಗ್ಳ್ಯಾ ರಿತಿಚ್ಯಾ ಡೋಂಗಾಂತ್ ಅಜೂನ್ ಮನ್ಶ್ಯಾಪಣಾಕ್ ಬಲಿ ದಿತೇಚ್ ಆಸಾತ್.

ಹಾವೆಂ ದೆವಾಕ್ ಪಳೆಂವ್ಕ್ ನಾ ತರ್‌ಯೀ ಹಾಂವ್ ದೆವಾಕ್ ಪಾತ್ಯೆತಾಂ, ಹಾಚಿಂ ಮೂಳ್ ಕಾರಣಾಂ ಸಂಪಿಂ; ಹಾಂವೆಂ ದೂಕ್‌ಯೀ ಪಳೆಂವ್ಕ್ ನಾ. ಪುಣ್ ವಯ್ರ್ ಥಾವ್ನ್ ಪಡ್ಲ್ಯಾರ್ ದುಖ್ತಾ ಮ್ಹಳ್ಳೆಂ ಹಾಂವ್ ಸಮ್ಜತಾಂ. ಹೆಂ ಖಂಚೊ ಬೆಪ್ಪೊಯೀ ಸಮ್ಜತಾ. ತಶೆಂ ಮ್ಹಣೊನ್ ದೆವಾಚೆರ್ ಮ್ಹಾಕಾ ಆಸ್ಚಿ ಪಾತ್ಯೆಣೀ ಕಿತ್ಲಿ ಆನಿ ಕಿತ್ಯಾಕ್ ಮ್ಹಳ್ಳೆಂ ಬರಂವ್ಕ್ ಗೆಲ್ಯಾರ್ ಅನ್ಯೇಕ್ ಅವಸ್ವರ್ ಜಾಯ್ತ್. ಹಾಂಗಾಸರ್ ತೆಂ ಪ್ರಮುಖ್ ನ್ಹಂಯ್. ಹಾಂಗಾ ಕವಿತಾಪಾಠ್ ಅಧ್ಯಯನ್ ಶಿವಾಯ್ ಮ್ಹಜ್ಯಾ ದೈವಿಕ್ ಪಾತ್ಯೆಣೆಚೆರ್ ಅಧ್ಯಯನ್ ನ್ಹಂಯ್.

ದೇವ್ ಖಂಯ್ ಆಸಾ? ಕೊಣ್ ಮ್ಹಣ್ತಾ ವಯ್ರ್ ಆಸಾ, ಕೊಣ್ ಮ್ಹಣ್ತಾ ಆಮ್ಚೆಭಿತರ್ ಆಸಾ, ಕೊಣ್ ಮ್ಹಣ್ತಾ ಆಮ್ಚೆ ಭಂವ್ತೊಣಿ ಆಸಾ, ಆನಿ ದಲಾಲಿ ಮ್ಹಣ್ತಾತ್ ದೇವ್ ಆಮಿಂ ಭಾಂದ್‌ಲ್ಲ್ಯಾ ಭಾಂದ್ಪಾಂನಿ ಆಸಾ. ಜಿತ್ಲೆಂ ಚಡ್ ಹೆ ಹ್ಯಾ ಚಿಂತ್ಪಾಕ್ ಪುಷ್ಟಿ ದಿತಾತ್, ತಿತ್ಲೊ ಬರೊ ಬಾಜಾರ್ ಹಾಂಚೊ. ಮಿರ್ಜಾ ಘಾಲಿಬಾನ್ ಸಾಂಗ್‌ಲ್ಲೆಪರಿಂ ’ಹ್ಯಾ ಸಂಸಾರಾಂತ್ ಬೇಕೂಫಾಂಕ್ ಕಾಂಯ್ ಉಣೆಂ ನಾ, ಎಕ್ಲ್ಯಾಕ್ ಸೊಧುಂಕ್ ಗೆಲ್ಯಾರ್ ಹಜಾರ್ ಮೆಳ್ತಿತ್’. ಆನಿ ಹ್ಯಾ ಪರಿಗತೆಂತ್ ಖರೆಂಪಣಿ ಥೊಡಿಂ ಮುಳಾವಿಂ ಸತಾಂ ಆಮ್ಚಾ ದೊಳ್ಯಾಂಕ್ ಧಾಖಂವ್ಕ್ ಆರ್ಸೊ ಧರ್ಚೆಂ ಕವಿತಾ ’ದೇವ್ ಉಲಯ್ಲೊ’ ಜಾವ್ನಾಸಾ;

ಹ್ಯಾ ಕವಿತೆಚ್ಯಾ ಎಕೆಕಾ ಪಂಗ್ತೆಕ್ ಮಾತ್ಶೆಂ ಗುಂಡಾಯೆನ್ ಪಳೆಯಾಂ;

’ಮಿರ್ಣಿ ಹಾತಿಂ ದೊರಿ ಝೆಂಜ್ರೊನ್

ಧಲ್ಚಿ ಘಾಂಟ್ ಘಡ್ಗಡೆ ಝಡಯ್ತಾನಾ

ಕೊಯೆರಾಂತ್ಲ್ಯಾ ಕೊಗ್ಳೆಚೆಂ ರೆಬೆಕ್ ವ್ಹಾಜೊನ್

ಕಾವ್ಳ್ಯಾಂಚೆಂ ಭಕ್ತಿಪಣ್ ಜಾಗಯ್ತಾನಾ’

ಹಾಂಗಾಸರ್ ವ್ಹಾಪಾರ್‌ಲ್ಲ್ಯೊ ಇಮಾಜ್ಯೊ ಪಳೆಯಾ; ಇಗರ್ಜ್ (ಗುಪ್ತ್ ಇಮಾಜ್), ಮಿರಣ್, ದೊರಿ, ಘಾಂಟ್, ಕೊಯರ್...... ಆನಿ ಹಾಂಚೆಪಯ್ಕಿ ಕಾವ್ಳೆ; ಮ್ಹಣ್ಜೆ ಭಕ್ತಿಕ್ ವಾ ದೇವ್ ಪರ್ಜಾ.

’ಶೆರ್ಮಾಂವಿ ಪಾದ್ರಿ ಗಳೊ ಪಾಜುನ್

ಆಯ್ಕೊವ್ಪ್ಯಾಂಚೆ ಕಾನ್ಪೆ ಉಸ್ತಿತಾನಾ

ಜಮ್‌ಲ್ಲೊ ಲೋಕ್ ತಾಳೊ ಪಿಂಜುನ್

ಜಿಬೆಚೆಂ ಆಗ್ರುಂ ಗಷ್ಟಿತಾನಾ’

ಹ್ಯಾ ಪಂಗ್ತೆಚೆರ್ ಕವಿಚಿಂ ಉತ್ರಾಂ ಉತ್ರಾಂನಿ ರಾಗಾಚಿಂ ಕಿಠಾಳಾಂ ಉಸಳ್ಚಿಂ ದಿಸ್ತಾತ್. ಆಮ್ಕಾಂ ಶೆರ್ಮಾಂವ್ ಸದಾಂಚೆ, ಬಾಪ್ತಿಜ್ಮಾ ಥಾವ್ನ್ ಮೊರ್ನಾಕ್ ಪಾವಯ್ತಾ ಮ್ಹಣಾಸರ್ ಶೆರ್ಮಾಂವ್ಂಚ್ ಶೆರ್ಮಾಂವ್. ಬಾವ್ಡೊ ಶೆರ್ಮಾಂವ್ ಆಯ್ಕೊನ್ ಮೊರೊನ್ ಗೆಲಾ ತರ್‌ಯೀ, ತಾಣೆಂ ಮೆಲ್ಲ್ಯಾ ಉಪ್ರಾಂತ್‌ಯೀ ತಾಚೆವಿಶಿಂ ಶೆರ್ಮಾಂವ್. ಆನಿ ಹ್ಯಾ ಶೆರ್ಮಾಂವಾಂನಿ ಆಮ್ಚಾ ದೇವ್ ಪ್ರಜೆಚೊ ಕಾನ್ಪೊ ಮಾತ್ರ್ ಉಸ್ತಿಲಾ ಶಿವಾಯ್ ಹೆರ್ ಕಿತೆಂಯ್ ಜಾಲಾಂ? ನಿಮಾಣ್ಯಾ ಬ್ರೇಸ್ತಾರಾ ಪಾಂಯ್ ಧುವ್ನ್ ಕಾಂಯ್ ಥೊಡ್ಯಾಂಚಾ ಪಾಂಯಾಂಚಾ ಬೊಟಾಂಚಾ ನಾಕ್ಶೆಭಿತರ್ಲೊ ಚಿಕೊಲ್ ಗೆಲಾಸ್ತಲೊ. ದುಸ್ರೆಂ ಕಾಂಯ್ ಗೊಂಯ್ಟಾ ಜಾಲ್ಯಾಂತ್? ಎಕಾಮೆಕಾಚೊ ಮೋಗ್ ಕರಾ ಮ್ಹಣ್ ಭಿತರ್ ತಾಳೊ ಪಿಂಜುನ್ ಆರಬ್ಬಾಯೊ ದಿಲ್ಲೆಂಚ್ ಆಯ್ಲೆಂ. ಭಾಯ್ರ್ ಯೆತಾನಾ ಭಾವಾಕ್ ಭಾವ್ ನಾ, ಬಾಯ್ಲೆಕ್ ಘೊವ್ ನಾ. ಅಪ್ಲಿಂ ಪೆಲಿಂ ಗೆಲಿಂ ಖಣಿಂತ್. ಸಿಂಜಿಚ್ಯಾ ಭುಧ್ವಾರಾ ಆನಿ ನಿಮಾಣ್ಯಾ ಸುಕ್ರಾರಾ ಉಪ್ವಾಸ್ ಕರ್ತಾಂವ್ ಆನಿ ದುಸ್ರೆ ದೀಸ್ ಪೋಟ್ ಫುಟ್ಟಾಸರ್ ಗಿಳ್ತಾಂವ್ ಸೊಡ್ಲ್ಯಾರ್ ಎಕಾ ದಿಸಾಚೆಂ ಖಾಣ್ ಪುಣಿಂ ಖಾಣ್ ನಾಸ್ಚಾಂತ್ ದಿತಾಂವ್ ವಾ ದಿಲಾಂ? ದೆಕುನ್ ಆಮ್ಚಾ ಫೆಸ್ತಾ ಪರ್ಬೆಕ್ ಆಮ್ಕಾಂ ಸುಭೇದಾರ್, ತುಂಡುರಾಯ್ ಜಾಯ್ಜಯ್ ಶಿವಾಯ್ ರಸ್ತ್ಯಾ ದೆಗೆಂತ್ಲೆ ಭಿಕಾರಿ ನ್ಹಂಯ್. ಹಾಂ!. ಫೆಸ್ತಾಕ್ ರಾಂದ್‌ಲ್ಲೆಂ ಕಾಂಯ್ ಚಡ್ ಜಾವ್ನ್ ಬೆಳ್ಶೆಲಾಂ, ಭುಕ್ಟೆಲಾಂ ವಾ ಫುಂರ್ಗೆಲಾಂ ತರ್ ತೆಂ ದೀಂವ್ಕ್ ಆಮ್ಕಾಂ ಭಿಕಾರಿ ಖಂಡಿತ್ ಜಾಯ್. ತವಳ್ ಮಾತ್ರ್ ಆಮ್ಕಾಂ ದಾನ್ ಧರ್ಮಾಚೊ ಉಡಾಸ್, ದೆಕುನ್ ಆಮ್ಚಿಂ ಪರ್ನಿಂ/ಪಿಂಜ್ಕರ್ ವಸ್ತುರಾಂ ನೆಸೊಂಕ್ ಆಮ್ಚಾ ಘರಾಂನಿ ಕೊಣ್‌ಯೀ ನಾಂತ್ ತರ್ ತಿಂ ದುಬ್ಳ್ಯಾಂಕ್ ದಾನ್ ದಿತಾಂವ್ - ಆಸೊಂದಿ!

ಫುಡ್ಲಿಂ ಪಂಗತ್ ಪಳೆಯಾಂ;

’ಅಖ್ರೇಚ್ಯಾ ಬಾಂಕಾರ್ ಬಸ್‌ಲ್ಲ್ಯಾ

ಮೊನ್ಯಾಚ್ಯಾ ಕಾನಾಂತ್

ದೇವ್ ಗುಣ್ಗುಣ್ಲೊ..

"ಮ್ಹಾಕಾ ತುಜೆಂ ಮಾಗ್ಣೆಂ ಆಯ್ಕಾಲೆಂ"

ಕಿತ್ಲೆಂ ವಿಪರ್ಯಾಸ್ ನ್ಹಂಯ್‌ಗಿ? ಹಾಂಗಾ, ಹ್ಯಾ ಸಂಸಾರಾಂತ್ ಸಗ್ಳೆ ಉಲವ್ಪಿ, ಹ್ಯಾ ದೇವ್ ಧರ್ಮಾಂಚ್ಯಾ ಬಾಜಾರಾಂತ್ ಸಲೀಸಾಯೆನ್, ಧಾರಾಳ್ ಮಾಪಾನ್ ವಿಖೊನ್ ವೆಚೆಂ ಜಾವ್ನಾಸಾ ರೂಪ್ (ಭಾಯ್ಲೆಂ ರೂಪ್), ಆಯ್ಕತಾ ತರ್ ಉತ್ರಾಂ (ಮಧುರ್ ತಾಳೊ). ಪುಣ್ ಹ್ಯಾ ಪರಿಗತೆಂತ್ ಏಕ್ ಮೊನೊ, ಜೊ ತೋಂಡ್ ಯೇನಾತ್ಲೊ ದೆವಾಲಾಗಿಂ ಕಸೊ ಉಲಯ್ತಾ? ತೇಂಯ್ ಅಖ್ರೇಚ್ಯಾ ಬಾಂಕಾರ್ ಬಸ್‌ಲ್ಲ್ಯಾ ಮೊನ್ಯಾಕ್ ದೇವ್ ಭುಲ್ತಾ?

ಹೆಂ ಕವಿತಾ ಎಕಾ ನ್ಹಂಯ್ ಸಭಾರ್ ಸತಾಂಕ್ ಉಗ್ಡಾಪೆಂ ಕರ್ತಾ. ಏಕ್; ಖರೊ ದೇವ್ ಖಂಯ್ಚರ್‌ಯೀ ಆಸೊಂದಿ, ಪುಣ್ ತಾಕಾ ಫಟಂವ್ಕ್ ಕೊಣಾಚ್ಯಾಂನಿ ಸಾಧ್ಯ್ ನಾ ದೆಕುನ್ ಮನ್ಶಾಚೊ ಖಂಚೋಯ್ ಡೋಂಗ್ ತಾಚೆಮುಖಾರ್ ಚಲಾನಾ. ದೋನ್: ದೆವಾಲಾಗಿಂ ಉಲಂವ್ಕ್ ಸಬ್ಧ್, ತಾಳೊ, ರೂಪ್ ಗರ್ಜೆಚೆಂ ನ್ಹಂಯ್ ಕಾಳಿಜ್ ಗರ್ಜೆಚೆಂ.

ವಾಸ್ತವಿಕ್ ಸಂಸಾರಾಂತ್ ಚಲ್ಚೊ ಬಾಜಾರ್‌ಯೀ ಸಮ್ಜೊಂಕ್ ಗೆಲ್ಯಾರ್ ಸಂಪೊ: ದೆಖುನ್ ಹಾಂಗಾಸರ್ ದೈವಿಕ್ ಮುಖಾಂ ಧಾಖಂವ್ನ್ ಕೊಣಾಕೊಣಾಕ್ ಅಪ್ಲ್ಯಾ ಫಾಯ್ದ್ಯಾಕ್ ಗಳ್ಸಿತೆಲೆ (Exploitation ), ಅಪ್ಲೆಂ ಬೊಳ್ಕೆಂ ಭರುಂಕ್ ಕೊಣಾ ಕೊಣಾಕ್ ಕಟ್‌ಪುತ್ಳಿ ಕರ್ನ್ ರಾಜ್ವಟ್ಕಿ ಚಲಯ್ತೆಲೆ ಧಾರಾಳ್ ಮಾಪಾನ್ ಆಸಾತ್. ಥೊಡ್ಯಾಂಕ್ ಕಳ್ತಾ ದೆಕುನ್ ಪಯ್ಲೆಂಚ್ ಮಯ್ಲಾಂ ಪಯ್ಸ್ ರಾವ್ತಾತ್ ತರ್ ಥೊಡ್ಯಾಂಕ್ ತಾಂಚ್ಯಾ ಕಾನಾಂಕ್ ವ್ಹಾರೆಂ ಭರ್ಲ್ಯಾರ್ ಜಾಲೆಂ. ಕಿತೆಂಯ್ ಕರುಂಕ್ ತಯಾರ್. ಜಶೆಂ ಪೆಟ್ಯಾಕ್ ಚಿಂವೊಂಕ್ ಏಕ್ ಉಸ್ಟೆಂ ಹಾಡ್ ಉಡಯ್ಲ್ಯಾರ್ ಜಾತಾ ತಶೆಂ.

ಕವಿ ವಿಲ್ಸನ್ ಕಟೀಲ್ ಆಯ್ಲೆವಾರ್ ಕೊಂಕ್ಣೆಂತ್ ಉದೆಲ್ಲ್ಯಾ ಕವಿಂ ಪಯ್ಕಿ ಭರ್ವಶ್ಯಾಚೊ ಕವಿ ಮ್ಹಣ್ಯೆತ್. ಚಿಂತ್ಪಾಚಿ ಗುಂಡಾಯ್ ಆಸಾ, ಪ್ರಭುದ್ದತಾ ಆಸಾ. ಹ್ಯಾ ಸಂಸಾರಾಚೊ ಬಾಜಾರ್ ಆನಿ ಕಶೆಂ ಅಪ್ಣಾಕ್ ಕಳಾನಾಸ್ತಾಂಚ್ ಪರಿಗತೆಚಿ ವಾ ಕೊಣಾಕೊಣಾಚಿ ಕಟ್‌ಪುತ್ಳಿ ಜಾವ್ನ್ ಜಿಯೆಜೆ ಪಡ್ತಾ ಮ್ಹಳ್ಳೆಂ ಸಂಸಾರಾಂತ್ ಬರೆಂ-ವಾಯ್ಟ್ ಬರ್‍ಯಾ ರಿತಿನ್ ಸಮ್ಜೊಂಕ್ ಭೋವ್ಶಾ ಅಜೂನ್ ಲ್ಹಾನ್ ದೆಖುನ್, ಪ್ರಾಯ್ ಭರ್ತಾನಾ ಹಿ ಸಮ್ಜಣಿ ತಾಚ್ಯಾ ಮತಿಕ್ ತರ್‌ಯೀ ಝಳ್ಕತೆಲಿ ಮ್ಹಳ್ಳೊ ಭರ್ವಸೊ ಮ್ಹಜೊ.

- ವಲ್ಲಿ ಕ್ವಾಡ್ರಸ್

ಕವಿಚ್ಯಾ ಉತ್ರಾಂನಿ - ದೇವ್ ಉಲಯ್ಲೊ’ಕವಿತೆವಿಶಿಂ ............ 

ಆಮ್ಕಾಂ ಕ್ರೀಸ್ತಾವಾಂಕ್ ಆಧ್ಯಾತ್ಮಿಕ್ ವಳೊಕ್ ಉಣಿಂ. ಪುಣ್ ಭಕ್ತ್ ಚಡ್. ಮಾಗ್ಣಿಂ, ಕಾಂತಾರಾಂ, ಶೆರ್ಮಾಂವ್, ಘಾಂಟಿ - ಅಶೆಂ ಫಕತ್ ಭಾಯ್ಲೊ ಆವಾಜ್ ಆಯ್ಕೊನ್ಂಚ್ ಆಮಿ ಆಮ್ಚಿ ಭಕ್ತ್ ನಿಯಾಳ್ತಾಂವ್. ಪುಣ್, ಆಧ್ಯಾತ್ಮಿಕತಾ ಮ್ಹಳ್ಯಾರ್ ಮೌನ್ ರಾಂವ್ಚೆಂ.. ಆನಿ ಹ್ಯಾ ಮೌನಾಂತ್ ಆಮಿ ಆಮ್ಕಾಂಂಚ್ ವಾ ಆಮ್ಚೆ ಭಿತರ್ಲ್ಯಾಕ್ ಆಯ್ಕೊಂವ್ಚೆಂ. ಹ್ಯಾ ಥಳಾರ್ ಹಿ ಕವಿತಾ ರಚ್ಲ್ಯಾ.

ಫಕತ್ತ್ ವ್ಹಡಾ ತಾಳ್ಯಾನ್ ಮಾಗ್ಣಿ, ಕಾಂತಾರಾಂ ವಾ ರೆತಿರೆಂನಿ ಬೊಬೊ ಘಾಲ್ಯಾರ್ ಮಾತ್ರ್ ದೇವ್ ಮೆಚ್ವತ್ ಜಾಲ್ಯಾರ್ ತೋಂಡ್ ಯೇನಾತ್ಲ್ಯಾಚಿ ಮ್ಹಣ್ಜೆ ಮೊನ್ಯಾಚಿ ಗತ್ ಕಿತೆಂ? ಭಕ್ತಿಪಣಾನ್ ನಾವಾಚ್ಯಾ ಭಾಯ್ಲ್ಯಾ ಆವಾಜಾಂಚಾ ಆಡಂಬರಾಚೆರ್ ಆಧ್ಯಾತ್ಮಿಕ್ ಸದ್ಯ ಮೌನ್‌ಪಣ್ ಜೀಕ್ ಅಪ್ಣಾಂವ್ಚಿ ಕವಿತಾ ಹಿ.

- ವಿಲ್ಸನ್ ಕಟೀಲ್

[ಹಿ ಕವಿತಾ ಆಶಾವಾದಿ ಪ್ರಕಾಶನಾ ತರ್ಫೆನ್ ವೆಗಿಂಚ್ ಪರ್ಗಟೊನ್ ಯೆಂವ್ಚ್ಯಾ ’ಶಿಂಪಡ್ಲೆಲಿಂ ಮೊತಿಯಾಂ’ ಕವಿತಾಜಮ್ಯಾಂತ್ ಪರ್ಗಟೊನ್ ಯೆತೆಲೆಂ]

ಕವಿತಾಪಾಠ್ ಪಾನಾಕ್ 

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications