ವಡ್ಲೊ?

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕೊಣಾಚೊ ಆವಾಜ್ ವಡ್ಲೊ?

ವರಸ್ : 2004

ಅಂಕೊ : 3

ಮಯ್ನೊ : ಸಪ್ತೆಂಬರ್

ಸಂಪಾದಕೀಯ್ - 3 .

ವಲ್ಲಿ ಕ್ವಾಡ್ರಸ್

’ವಡ್ಲಿಂ ಸತಾಂ ಕೆನ್ನಾಂಯ್ ಸಂಪಿಂ ಜಾವ್ನಾಸ್ತಾತ್’ ಮ್ಹಳ್ಳಿ ಇಂಗ್ಲಿಶಾಂತ್ ಏಕ್ ಸಾಂಗ್ಣಿಂ ಆಸಾ (The greatest truths are simple). ಹಿ ಸಾಂಗ್ಣಿ ಸಾರ್ಕೆ ರಿತಿನ್ ವೊರಾವ್ನ್ ಪಳೆಲ್ಯಾರ್ ಆಮ್ಚಾ ಜಿಣ್ಯೆಕ್ ಏಕ್ ನ್ಹಯ್ ಏಕ್ ರಿತಿನ್ ಲಘು ಜಾತಾಚ್.

ಪುಣ್ ಹಕೀಗತೆಂತ್ ಏಕ್ ಸತ್ ಮಾತ್ ಆಮಿಂ ವೊಪುನ್ ಘೆಜೈ ಆನಿಂ ತೆಂ ಖಂಯ್ಚೆಂಗೀ ಮ್ಹಳ್ಯಾರ್ ಆಮ್ಚಿ ನದರ್ ಚಡಾವತ್ ಜಾವ್ನ್ ವಡ್ಲ್ಯಾ ಸಂಗ್ತ್ಯಾಂವಿಶಿಂ ಮಾತ್ರ್ ಆಸ್ತಾನಾ ಅಸಲ್ಯೊ ಪ್ರಮುಖ್ ತರ್‌ಯ್ ಚಿಲ್ಲರ್ ಸಂಗ್ತ್ಯೊ ಸಭಾರ್ ಪಾವ್ಟಿಂ ಆಮ್ಚಾ ಗುಮಾನಾಕ್ ಯೇಚ್ಚ್‌ನಾಂತ್.

ಏಕ್ ಮಹರ್ಶಿನ್ ರಾನಾಂತ್ ಆಸ್ಚಾ ಆಪ್ಲ್ಯಾ ಗುಡ್ಸುಲಾಂತ್ ಆಧ್ಯಾತ್ಮಿಕ್ ಶಿಕಾಪ್ ಶಿಕೊಂಕ್ ಆಯಿಲ್ಲ್ಯಾ ಥೊಡ್ಯಾಂಕ್ ’ರಾನ್ ಮ್ಹಳ್ಯಾರ್ ಕಿತೆಂ?’ ಮ್ಹಳ್ಳ್ಯಾ ವಿಶ್ಯಾಚೆರ್ ಏಕ್ ಲೇಖನ್ ಬರಂವ್ಕ್ ಸಾಂಗ್ಲೆಂ ಖೈಂ.

ಥೊಡ್ಯಾ ದಿಸಾಂ ಉಪ್ರಾಂತ್ ಎಕೆಕ್ಯಾನ್ ಎಕೆಕಾ ರಿತಿನ್ ಲೇಕನ್ ಬರವ್ನ್ ಮಹರ್ಶಿಕ್ ದಿಲೆಂ.

ಎಕ್ಲ್ಯಾನ್ ಬರಯ್ಲೆಂ ರಾನಾಂತ್ ಜಿಯೆಂವ್ಚಾ ಕ್ರೂರ್ ಮನ್ಜಾತಿಂ ವಿಶ್ಯಾಂತ್, ತಾಂಚಾ ಗರ್ಜೊಣ್ಯಾಂ ವಿಶ್ಯಾಂತ್, ವಾಗ್, ಬೊಲ್ಪೆ, ಹಸ್ತ್ಯೊ ಆನಿ ಹೆರ್ ಮನ್ಜಾತ್ಯಾಂ ವಿಶ್ಯಾಂತ್.

ಮಹರ್ಶಿನ್ ದುಸ್ರೆಂ ಲೇಖನ್ ವಾಚ್ಲೆಂ ತಾಂತುಂ ರಾನಾಂತ್ ಆಸ್ಚಾ ಸುಕ್ಣ್ಯಾಂ ಸಾವ್ಜಾಂ ವಿಶ್ಯಾಂತ್ ಆಸ್‌ಲ್ಲೆಂ. ಘುಗಿ, ಗೀದ್, ಮೋರ್, ಆನಿಂ ಹೆರ್ ಸುಕ್ಣಿಂ.

ಮಹರ್ಶಿ ವಾಚುನ್ಂಚ್ ಗೆಲೊ ಮುಖ್ಲೆಂ ಲೇಖನ್, ತಾಂತುಂ ಎಕ್ಲ್ಯಾನ್ ರಾನಾಂತ್ ಜಿಯೆಂವ್ಚಾ ಜಿವ್ದಾಳಿಂ ವಿಶ್ಯಾಂತ್ ಬರಯಿಲ್ಲೆಂ, ಪೆರ್ಮಾರಿ, ಸೊರೊಪ್, ಆಗ್ಗ್ಯೊ ಅಶೆಂ ಥರಾವಳ್ ಜಿವ್ದಾಳಿಂ ವಿಶ್ಯಾಂತ್ ಬರಯಿಲ್ಲೆಂ.

ವಿಧ್ಯಾರ್ಥಿಂನಿ ಇತ್ಲಿ ಮಿನತ್ ಕರುನ್ ಇತ್ಲಿಂ ಅಪುರ್ಭಾಯೆಚಿಂ ಲೇಕನಾಂ ತಯಾರ್ ಕೆಲ್ಲಿಂ ತರ್‌ಯ್ ಮಹರ್ಶಿಚಾ ತೊಂಡಾರ್ ಸುರ್‍ಯೊ ಉದೆಲೊಚ್ಚ್ ನಾ. ತೊ ಅನ್ಯೇಕ್ಲ್ಯಾಚೆಂ ಲೇಕನ್ ವಾಚುಂಕ್ ಲಾಗ್ಲೊ, ತಾಣೆಂ ರಾನಾಂತ್ ಆಸ್ಚಾ ರುಕಾಂ ಝಡಾಂವಿಶ್ಯಾಂತ್, ವಾಲಿ ಕಾಂಟ್ಯಾಂ ವಿಶ್ಯಾಂತ್ ಬರಯಿಲ್ಲೆಂ.

ಅಖ್ರೇಕ್ ಮಹರ್ಶಿನ್ ನಿರಾಶೆಚೊ ಸುಸ್ಕಾರ್ ಸೊಡ್ಲೊ. ಬುರ್ಗ್ಯಾಂಕ್ ಉದ್ದೇಶುನ್ ಸಾಂಗ್ಲೆಂ

’ಬುರ್ಗ್ಯಾಂನೊ, ಆಧ್ಯಾತ್ಮಿಕ್ ಜಾಣ್ವಾಯ್ ಜೊಡುಂಕ್ ಪಯ್ಲೆಂ ಏಕ್ ಭಿತರ್ಲಿ ದೀಶ್ಟ್ ಗರ್ಜೆಚಿ, ದೆಕುನ್ ತುಮಿಂ ಅನಿಕೀ ಪ್ರೇತನ್ ಕರಾ ಆನಿಂ ತುಮ್ಚಾನ್ ಸಾಧ್ಯ್ ನಾಂ ತರ್ ಉಪ್ರಾಂತ್ ಹಾಂವ್ಂಚ್ ತುಮ್ಕಾಂ ಸಾಂಗ್ತಾಂ’ ಮ್ಹಣಾಲೊ.

ಪರತ್ ಥೊಡೆ ದೀಸ್ ಪಾಶಾರ್ ಜಾಲೆ ಆನಿಂ ಹಿಂ ವಿಧ್ಯಾರ್ಥಿಂ ಪರತ್ ಥೊಡ್ಯಾ ದಿಸಾಂನಿ ಪರತ್ ಥೊಡಿಂ ಅಪುರ್ಭಾಯೆಚಿಂ ಲೇಖನಾಂ ಬರವ್ನ್ ಮಹರ್ಶಿಕ್ ಹಾಡ್ನ್ ದೀಲಾಗ್ಲಿಂ.

ಮಹರ್ಶಿನ್ ಎಕೆಕ್‌ಚ್ ವಾಚ್ಲಿಂ, ಹರ್‍ಯೆಕ್ ಲೇಕನಾಂ ಆಧ್ಲೆ ಪಾವ್ಟಿಂ ತಾಣಿಂ ಬರಯಿಲ್ಲ್ಯಾ ಲೇಕನಾಂಚಾಕೀ ಬರಿಂ ಆಸ್‌ಲ್ಲಿಂ. ಪುಣ್ ಮಹರ್ಶಿಚಾ ತೊಂಡಾಚಿ ಆಮಾಸ್ ಅಜೂನ್ ಉತರ್‌ಲ್ಲಿ ನಾ. ಅಖ್ರೇಕ್ ತಾಣೆಂ ವಿಧ್ಯಾರ್ಥಿಂಕ್ ಸಾಂಗ್ಲೆಂ;

"ಭುರ್ಗ್ಯಾಂನೊ, ದೊಳ್ಯಾಂ ಮುಖಾರ್ ಆಸ್ಚೆಂ ಪಳೆಂವ್ಕ್ ಕೊಣಾಯ್ಚಾನ್ಂಯ್ ಸಾಧ್ಯ್, ಪುಣ್ ತುಮಿಂ ದೊಳ್ಯಾಂ ಭಾಯ್ಲೆಂ ರೂಪ್ ಪಳೆಜಾಯ್, ರಾನಾಂತ್ ತುಮಿಂ ಕೊಣೆಂಚ್ ಪಳೆನಾತ್‌ಲ್ಲೆಂ ಏಕ್ ಆಸಾ - ತೆಂ ’ಮೌನ್’.

ತುಮಿಂ ಪಾರ್ಕಿಲಾಂ? ಆನಿಂ ಹೆಂಚ್ ಮೌನ್ ತುಮಿಂ ತುಮ್ಚಾ ಲೇಕನಾಂನಿ ಪಿಂತ್ರಾಯಿಲ್ಲ್ಯಾ ಆವಾಜಾಂ ಆವಾಜಾಚಾಕೀ ವಡ್ಲ್ಯಾನ್ ಉಲಯ್ತಾ"

ಸಂಸಾರ್ ಇತ್ಲೊ ಮತ್ಲಬಿ ಜಾಲಾಕೀ ಹಾಂಗಾಸರ್ ಜಿಯೆಂವ್ಚಾ ಹರ್ ಮನ್ಶಾಂಚೆಂ ಚಿಂತಾಪ್ ಇತ್ಲೆಂಚ್, ಸಗ್ಳೆಂ ಆಪ್ಣಾಚೆಂ ಕರ್ನ್ ಘೆಜಾಯ್, ಸಗ್ಳ್ಯಾನ್ ಅಪ್ಣಾನ್ಂಚ್ ಆಸಾಜಯ್, ಸರ್ವಾಂನಿ ಆಪ್ಣಾಚೆಂ ಆಯ್ಕೊಂಕ್ ಜಾಯ್, ಸಗ್ಳ್ಯಾಂನಿ ಆಪುಣ್! ಹ್ಯಾ ಪರಿಗತೆಂತ್ ಆಮಿಂ ಜಿಯೆವ್ನ್ ಗೆಲ್ಯಾಂವ್ ತರ್ ತ್ಯಾ ವಿಧ್ಯಾರ್ಥಿಂಕ್ ಆನಿಂ ಆಮ್ಕಾಂ ಕಾಂಯ್ ತಫ಼ಾವತ್ ಆಸಾ? ಆಮಿಂ ಆಮ್ಚಾ ಆಂತರಿಕ್ ದೊಳ್ಯಾಂನಿ ದೊಳ್ಯಾಂಕ್ ಆಡ್ ಆಸ್ಚೆಂ ಪಳೆಂವ್ಚಿ ಗರ್ಜ್ ಆಸಾ.

ಪುಣ್ ತಾಚಾಕೀ ಆಧಿಂ ತೆ ಆಮ್ಚೆ ಆಂತರಿಕ್ ದೊಳೆ ಸೊಡ್ಚಿ ಭೋವ್ ಗರ್ಜ್ ಆಸಾ.

- ವಲ್ಲಿ ಕ್ವಾಡ್ರಸ್, ಅಜೆಕಾರ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

ಮುಕ್ತ್ ಉಲವ್ಪ್ ವಾ ಸವಾಯೆಚೆಂ (ಚೀಪ್) ಉಲವ್ಪ್?

ಬಿಜಿ ಆಸಾಯ್‌ಗೀ?

ಕಸ್ಟ್