ಯೆಯಾ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಉತ್ರಾಂತ್ ಸೂತ್ರಾಂ

ಮಯ್ನ್ಯಾಚೊ ಕವಿ - 7

ಸೂತ್ರ್ 7: ಯೆಯಾ ಕುಂಪಾರ್ ಕರುಯಾಂ

ಮೆಲ್ವಿನ್ ಜೆ. ವಾಸ್, ಕೆಲರಾಯ್

ಕುಂಪಾರ್ ಆನಿ ಕವಿ!?

"ಕಾಲೇ ಗೋರೆ ಕಾ ಭೇದ್ ನ್ಹಹೀಂ

ಹರ್ ದಿಲ್‌ಸೆ ಹಮಾರಾ ನಾತಾ ಹೈ

ಕುಚ್ ಔರ್ ನ ಆತಾ ಹೊ ಹಮ್ಕೊ

ಹಮೇ ಪ್ಯಾರ್ ನಿಭಾನಾ ಆತಾ ಹೈ"

[ಕಾಳೆ ಗೊರೆ ಮ್ಹಳ್ಳೊ ಭೋದ್ ನಾ, ಹರ್ಯೆಕಾ ಕಾಳ್ಜಾಸವೆಂ ಆಮ್ಚೊ ಭಾಂದ್. ಹೆರ್ ಕಿತೆಂಚ್ ಆಮ್ಕಾಂ ಸಮ್ಜಾನಾ ಜಾವ್ಯೆತಾ ಪುಣ್ ಆಮ್ಕಾಂ ಮೋಗ್ ಕರುಂಕ್ ಕಳ್ತಾ].

ಅಜೀಕ್ ಪಾಂತೀಸ್-ಚಾಳೀಸ್ ವರ್ಸಾಧಿಂ ಘರಾಂ ಘರಾಂನಿ ಆಯ್ಕಾಲ್ಲ್ಯಾ ಎಕಾ ಪದಾಚೊ ಉಡಾಸ್ ಯೆತಾ ಮ್ಹಾಕಾ. ಹ್ಯಾ ಸಂಸಾರಾಂತ್ ಆಮಿಂ ಜಿಯೆಂವ್ಚಿ ಜಿಣಿ ಸಭಾರ್ ಪಾವ್ಟಿಂ ಹೆರಾಂಕ್ ಪಸಂದ್ ಜಾಯ್ನಾ ಮ್ಹಳ್ಳ್ಯಾ ಭಿರಾಂತೆನ್ ಜಾಯ್ತಿಂ ಆಮಿಂ, ರಾಜಿ ಜಾತಾಂವ್ (Compromise)/ಕರ್ತಾಂವ್. ಹೆರಾಂಕ್ ಸಮಧಾನ್ ಕರ್ಚಾಕ್ ಅಪ್ಲೆಂ ಸ್ವತಂತ್ರ್, ಸಮಧಾನ್ ಮಾತ್ರ್ ನ್ಹಂಯ್, ಅಪ್ಲೆ ಅಸ್ಥಿತ್ವ್ ಸಯ್ತ್ ಹೊಗ್ಡಾವ್ನ್ ಜಿಯೆತಾಂವ್. ದೆಕುನ್ ಆಯ್ಚಾ ಪರಿಗತೆಂತ್ ಜೊ ಬಾಗ್ವತಾ, ತಾಕಾಚ್ ಆಯ್ಕೊಂಕ್ ಸೊಸುಂಕ್ ಮೆಳ್ತಾ. ಜೊ ನೀಟ್ ರಾವ್ತಾ, ತಾಕಾಚ್ಚ್ ಫುಲಾಂ ಝೆಲೆ ಆನಿ ಫುಲಾಂ ಫಳಾಂ. ಜೆದ್ನಾಂ ಕೊಣಾ ಕೊಣಾಕ್ ಸ್ಥಾನ್-ಮಾನ್ ಲಾಭ್ತಾನಾ, ಆಮ್ಚ್ಯಾನ್ ಸೊಸಾನಾ ದೆಖುನ್ ಕೊಣಾ ಕೊಣಾಕ್ ಕುಂಪಾರ್ ಕರ್ನ್ ಕಶೆಂ ತರ್‌ಯೀ ಪ್ರಶಸ್ಥ್ಯೊ ಪುರಸ್ಕಾರ್ ಆಮ್ಕಾಂ ಜಾಯ್. ಹ್ಯಾ ಖಾತಿರ್ ಆಮಿ ಕೊಣಾಯ್ಕ್‌ಯೀ ಬಲಿ ದೀಂವ್ಕ್ ತಯಾರ್. ಕಿತ್ಯಾಕ್ ಆಮಿಂ ವಯ್ರ್ ಆನಿ ಹೆರಾಂ ಸಕ್ಕಡ್ ಕೋಯ್ರ್!.

ಹ್ಯಾ ಪರಿಗತೆಚೆರ್ ಅಪುರ್ಭಾಯೆಚೊ ಅರ್ಸೊ ಧರುಂಕ್ ಆಯ್ಲಾ ಅಪ್ರೂಪ್ ಕವಿ ಬಾಬ್ ಅನಿಲ್ ಪೆರ್ನಾಲ್, ಪಳೆಯಾ ತಾಚ್ಯಾ ಕವಿತೆಚಿ ಸಕತ್. ಜಿ ಸಮ್ಜೊಂಚ್ಯಾಂಕ್ ಎದೊಳ್‌ಚ್ಚ್ ಸಮ್ಜಾಲ್ಯಾ ಆನಿ ತಾಚೆರ್ ಕೇದ್ ಉಡಂವ್ಕ್ ಕುಂಪಾರ್ ಸೊಧ್ಚಾರ್ ಪಡ್ಲ್ಯಾತ್ ಆಸ್ಯೆತಾ, ಸಮ್ಜಾನಾಸ್ಚಾಂಕ್ ತಶೆಂಚ್ ನಿದೊಂಕ್ ಸೊಡ್ಯಾಂ, ತಿ ಇಂಫೆರ್ನಾಕ್ ವೆಚಿ ನೀದ್, ಸುಟ್ಚೆ ತಸಲಿ ನ್ಹಂಯ್.

ಕವಯತ್ರಿ ಬಾಯ್ ವಾಯ್ಲೆಟ್ ಪಿರೇರಾಚಿಂ ಕವಿತಾ ಕಾಂಯ್ ರಬೀಂದ್ರನಾಥ್ ಟಾಗೋರಾಚ್ಯಾ ಕವಿತಾಂಪರಿಂ ಮ್ಹಣ್ ಹಾಂವ್ ಸಾಂಗಾನಾ, ಪುಣ್ ತಶೆಂ ಚಿಂತೆಲ್ಯಾಂಕ್ ಕಾಂಯ್ ಹಿಚಿ ಕವಿತಾಚಿ ವ್ಹಾಡಾವಳ್ ದಿಸಾನಾ ವಾ ಪಳೆವ್ನ್ ಪಳೆನಾಯೆ ರಾಂವ್ಚಿ ಘುಟ್ಮಳ್ ಕೆಲ್ಯಾ ಜಾವ್ಯೆತಾ, ಪುಣ್ ಸತ್ ಗಜಾಲ್ ಕಿತೆಂ ಮ್ಹಣ್ ಕವಿತಾರಸಿಕಾಂಕ್ ತಿಚೆಂ ಕವಿತಾ ವಾಚ್ತಾಂ ಅಪ್ಶೆಂಚ್ ಕಳ್ತೆಲೆಂ. ಕವಿತಾ ವಿಶೇಷ್ ಇಮಾಜಿಂನಿ ನಾ ಜಾವ್ಯೆತಾ, ಪುಣ್ ಸಾದ್ಯಾ ಭಾಸೆಂತ್‌ಯೀ ಹಿಣೆಂ ಪಾಚಾರ್ಚೆ ವಿಚಾರ್ ಪಳೆಯಾ. ಖರಿಚ್ಚ್ ಜಾವ್ನ್ ತಿಕಾ ಹೊಗ್ಳಿಕ್ ಫಾವೊ.

ಕವಿ ಬಾಬ್ ಸ್ಟ್ಯಾನ್ಲಿ ಮೆಂಡೊನ್ಸಾ ಕವಿತಾಶೆತಾಂತ್ ಆಯ್ಲೆವಾರ್ ಉದೆವ್ನ್ ಆಯಿಲ್ಲೊ ತರ್‌ಯೀ, ತಾಣೆಂ ಸಮಾಜೆಕ್ ದೆಖ್ಚಿ, ಪಾರ್ಕುಂಚಿ ರೀತ್ ವಿಶಿಷ್ಟ್. ಕೊಣಾಕ್ ಅಡ್ಹೂಕ್ ಲಾಗೊಂಕ್ ಪುರೊ ಪುಣ್ ಕವಿ ಕಸಲಿಚ್ಚ್ ಮುಲಾಜ್ ನಾಸ್ತಾಂ ಸತ್ ಉಚಾರ್ತಾ. ಎಕಾ ಖರ್‍ಯಾ ಕವಿಕ್ ಆಸಾಜಯ್ ಜಾಲ್ಲಿ ಅರ್‍ಹತಾಯೀ ತಿಚ್ಚ್ ನ್ಹಂಯ್‌ಗೀ?.

ಆಮ್ಚಿ ಸಂಸ್ಕೃತೆಚೆರ್ ವೆವೆಗ್ಳ್ಯಾ ರಿತಿರ್ ವಿಣ್ಗೆಂ ಕರುನ್ ಕರ್ಚಾ ಸಂಭೋಗಾಚೆರ್ ಕವಿ ಬಾಬ್ ಆಂಟನಿ ಬಾರ್ಕುರ್ ಸೊಭಿತ್ ರಿತಿನ್ ಅರ್ಸೊ ಧರ್ತಾ. ಕೊಣಾಕ್ ಪಡೊನ್ ಗೆಲಾಂ ಹ್ಯೇವಿಶಿಂ ಚಿಂತುಂಕ್? ಆಮ್ಚಿ ಚಿಂತ್ಚಿ ಮತ್ ಎದೊಳ್‌ಚ್ಚ್ ಫುಲಾಂ ಫಳಾಂನಿ, ಶಾಲಾಂ ಬಿರುದಾಂನಿ, ಪ್ರಶಸ್ಥಿ ಪುರಸ್ಕಾರಾಂಚ್ಯಾ ಪಾಟಿಕ್ ಲಾಗ್ಲ್ಯಾ. ದೆಕುನ್ ಆಮ್ಕಾಂ ದೋನ್ ತೊಂಡಾಂ, ಏಕ್ ಸಂಸ್ರಾಕ್ ಧಾಖಂವ್ಕ್ (ಭೋವ್ ಆದರ್ಶ್ ಆನಿ ಖಾಲ್ತೆಂ) ಅನ್ಯೇಕ್ ಭಿತರ್ಲೆಂ (ಆಣ್ವೆಂ, ಪೊಕೊಳ್ ಆನಿ ಕುಸಾಟ್ಟ್, ಆಲ್ಬೆಂ).

ಕವಿ ಬಾಬ್ ಪ್ರಸನ್ನ್ ನಿಡ್ಡೋಡಿಕ್ ಕುಂಪಾರ್ ಮ್ಹಳ್ಯಾರ್ ಬೊಲ್ತೆಂಚ್ ಪಿಂತುರ್ ಉಭೆಂ ಕರ್ತಾ ಆನಿ ಗಾಂವ್ಚೆಂ ಗಡಂಗ್ ಆನಿ ಸೊರೊ ನಿಯಾಳ್ ಕರ್ತಾ.

ಕವಿ ಬಾಬ್ ಕ್ಲೆರೆನ್ಸ್ ಕೈಕಂಬಚೆಂ ಸಾಹಿತ್ಯ್ ಉದೆಂವ್ಚೆಂ ಕಾಳ್ಜಾಂತ್ಲೆಂ ಮ್ಹಣ್ಚ್ಯಾಕ್ ತಾಚೆ ಅಪಾರ್ ವಾಚ್ಪಿ ಅಭಿಮಾನಿ ರುಜ್ವಾತ್, ತಾಂತ್ಲೊ ಎಕ್ಲೊ ಜಾವ್ನ್ ಹಾಂವ್ ಜಾಯ್ತೆಂ ರಡ್ಲಾಂ ತಾಚ್ಯೊ ಎಕೇಕ್ ಮಟ್ವ್ಯೊ ಕಾಣ್ಯೊ ವಾಚುನ್. ತಿತ್ಲಿ ತಾಂಕ್ ತಾಚ್ಯಾ ಸಾಹಿತ್ಯಾಚಿ. ತಾಚೆಂ ಹೆಂ ಕವಿತಾ ಅಸ್ಪಷ್ಟ್ ರಿತಿಚ್ಯೊ ಇಮಾಜ್ಯೊ ಉಭ್ಯೊ ಕರ್ತಾ ತರ್‌ಯೀ, ಕವಿಚ್ಯಾ ಕಾಳ್ಜಾಚೆಂ ರುದಾನ್ ಆಯ್ಕಾನಾಯೆ ವಚಾನಾ. ಹ್ಯಾ ಸಂಸಾರಾಂತ್ ಜಿಯೆಂವ್ಚಾ ಹರ್ಯೆಕಾ ಗರೀಬಾಕ್ ಜರ್ ಏಕ್ ಕುಂಪಾದ್ರ್ ಆಸ್ತೊತ್ ತರ್ ಹ್ಯಾ ಸಂಸಾರಾಂತ್ ಕೊಣ್ಂಚ್ ಭುಕೆತೊನಾ, ತಾನೆತೊನಾ.

ಕವಿ ಬಾಬ್ ಆಸ್ಟಿನ್ ಪ್ರಭು ಸೆಜಾರಿ ಮಿಂಗೆಲಿಕ್ ಕುಂಪಾರ್ ಕರುಯಾಂ ಮ್ಹಳ್ಳೆಂ ಏಕ್ ಉತಾರ್ ಸಾಂಗ್ಚಾಕ್ ಏಕ್ ಕಾಣಿಂಚ್ ಸಾಂಗೊನ್ ವೆತಾ.

ಆಮಿ ಏಕ್ ಸೊಲ್ಲೊ ಕೆಲ್ಲೊ, ದಾಯ್ಜ್ ಪಂಗ್ಡಾಚ್ಯಾಂಕ್ ಮಯ್ನ್ಯಾಚೊ ಕವಿ ಕರ್ಚೊ ನಾಕಾ ಮ್ಹಣ್. ಹ್ಯಾ ನಿಚೆವಾಕ್ ಧರ್ನ್ ಹಾಲಂವ್ಚ್ಯಾಕ್ ಎದೊಳ್ ಸಭಾರ್ ಪಾವ್ಟಿಂ ಕವಿ ಬಾಬ್ ಮೆಲ್ವಿನ್ ವಾಸ್,  ಕವಿ ಬಾಬ್ ವಲ್ಲಿ ಕ್ವಾಡ್ರಸ್, ಕವಿ ಬಾಬ್ ಜೊಮೆಲ್, ಕವಯತ್ರಿ ಬಾಯ್ ಪ್ರಿಯಾ ಸಿಕ್ವೇರಾ ಹಾಂಚಿಂ ಕವಿತಾ ಸಕ್‌ಲ್ಲಿಂ ತರ್‌ಯೀ, ವಿಕ್ರಮ್-ಬೇತಾಳಾಚ್ಯಾ ಕಾಣ್ಯೆಚ್ಯಾ ವಿಕ್ರಮಾಧಿತ್ಯಚ್ಯಾ ಹಠಾಪರಿಂ ಹಠಾನ್ ರಾವ್‌ಲ್ಲ್ಯಾಂವ್ ತರ್‌ಯೀ ಹ್ಯೇ ಪಾವ್ಟಿಂ ಉಪಾವ್ ನಾಂ, ಇತ್ಲೆಂ ಅಪುರ್ಭಾಯೆಚೆಂ ಕವಿತಾ ಬರಯಿಲ್ಲ್ಯಾ ಕವಿ ಬಾಬ್ ಮೆಲ್ವಿನ್ ವಾಸಾಕ್ ಖರೆಂಪಣಿಂ ’ಮಯ್ನ್ಯಾಚೊ ಕವಿ’ ಮ್ಹಣ್ ವೊಲಾಂವ್ಕ್ ಕಸಲಿಚ್ಚ್ ಮುಲಾಜ್ ಆಮ್ಕಾಂ ನಾ. ಬಾಬ್ ಮೆಲ್ವಿನ್ ಜೆ. ವಾಸ್ ಕವಿತಾಶೆತಾಂತ್ ಅಪ್ಶೆಂಚ್ ಖಿರ್ಲೊನ್, ಆಪ್ಲ್ಯಾ ಪ್ರಾಮಾಣಿಕ್ ಪ್ರೇತನಾಂತ್ ಆನಿ ಮಿನತೆಂತ್ ವಯ್ರ್ ಆಯಿಲ್ಲೊ ಕವಿ. ಉಲ್ಲಾಸ್ ತುಕಾ ಬಾಬ್ ಮೆಲ್ವಿನ್ ಜೆ. ವಾಸ್.

ಉತ್ರಾಂತ್ ಸೂತ್ರಾಂ - 7: ಯೆಯಾ ಕುಂಪಾರ್ ಕರುಯಾಂ!

[ವಾಂಟೆಲಿ ಜಾಲ್ಲಿಂ]

1. ಮೆಲ್ವಿನ್ ಜೆ. ವಾಸ್, ಕೆಲರಾಯ್.

2. ಆಂಟನಿ, ಬಾರ್ಕುರ್.

3. ವಾಯ್ಲೆಟ್ ಜೆ. ಪಿರೇರಾ.

4. ಸ್ಟ್ಯಾನಿ ಮೆಂಡೊನ್ಸಾ, ಯು.ಕೆ.

5. ಪ್ರಸನ್ನ್, ನಿಡ್ಡೋಡಿ.

6. ಆಸ್ಟಿನ್ ಡಿ’ಸೋಜ್ ಪ್ರಭು, ನಂತೂರ್.

7. ಅನಿಲ್, ಪೆರ್ನಾಲ್.

8. ಕ್ಲೆರೆನ್ಸ್ ಕೈಕಂಬ.

D¥ÀªÉÚA? [ಮಯ್ನಾಚೆಂ ಕವಿತಾ]-

ಮೆಲ್ವಿನ್ ಜೆ. ವಾಸ್, ಕೆಲರಾಯ್

ದೀಸ್ಪೊಡ್ತ್ಯಾ ಗ್ರಾಸಾಕ್ ಆಯ್ತೆಂ ರಾವ್ಲೆಲ್ಯಾಂಚಾ ಪಾಂಯಾ ಪಂದಾ

ಫುಟ್ಲೆಲಿ ಘಾಮಾ ಶೆಳ್

ಜಿಣ್ಯೆ ಸ್ವಪ್ಣಾಂತ್ ಅವ್ಚಿತ್ ನಿಸ್ರಾವ್ನ್ ಶೆವ್ಟಾಯ್ತಾನಾ

ಕೆದ್ನಾಂ ನೈತಿಕ್ ಮೊಲಾಂ ವಿಣ್ಗಿಂ ಜಾವ್ನ್

ಜಾತಿಕ್ ಜಾತ್ ಕಾತಿಕ್ ಕಾತ್ ಪಾಪ್ಸುನ್

ಗಾಂವಾಕ್ ಗಾಂವ್‌ಚ್ ರಾನ್ ಜಾತಾನಾ

ಶಾಂತಿ ಭಾಸಾಂವ್ಕ್ ಜಾಯ್ ಆಸ್‌ಲ್ಲೆ ಹಾತ್ ಹಗ್ಯಾನ್ ಭರೊನ್

ಜಿವಿತ್ ಆವ್ಕಾಚಾ ಕಾಪ್ಸಾಳ್ಯಾ ಪಾನಾಂಕ್

ಸುಕ್ಯಾ ಖೊಲಿಯಾಂ ಬರಿ ಉಭಂವ್ಕ್ ಧರ್ತಾನಾ

ಖಂಯ್ಚರ್ ಮೋಗ್ ಆನಿ ಮಾಯ್ಪಾಸ್ ಆಪ್ಲೆಂ ವ್ಯಕ್ತಿತ್ವ್ ಸಾಂಡುನ್

ಲಜೆಕ್ ಲಕ್ ಆನಿ ಮಾನಾಕ್ ಮಾನ್ ಭೊಖಾವ್ನ್

ಮನ್ಶ್ಯಾಕ್ ಮನಿಸ್‌ಚ್ಚ್ ಮನ್ಜಾತ್ ಜಾತಾನಾ

ಜೆದ್ನಾಂ ಜಾಣ್ವಾಯ್ ಅಪ್ಲಿ ಸಮ್ಜಣಿ ಸಾಂಡುನ್

ಘರಾಕ್ ಘರ್ ಆನಿ ದಾರಾಕ್ ದಾರ್ ಹುಲ್ಪಾವ್ನ್

ನೆಣ್ತ್ಯಾ ನಿಸ್ಕಳ್ ಹಾಸ್ಯಾಂಕ್ ಜಳಂವ್ಕ್ ಆಯ್ತಿಂ ಜಾಂವ್ಚಾ ವಗ್ತಾಂ

ಹ್ಯಾ ಸೊಭಿತ್ ಸಂಸಾರಾಕ್ ಸಾಲ್ವಾರ್ ಕರುಂಕ್

ಮನಿಸ್ ಆನಿಂ ಮನ್ಜಾತ್ ಮಧ್ಲೊ ಫರಕ್ ಧಾಖಂವ್ಕ್

ಆಮ್ಚಾ ಸೃಷ್ಟೆಕ್ ಕಾಳೊಕಾ ಥಾವ್ನ್ ಉಜ್ವಾಡಾಕ್ ಹಾಡಂವ್ಕ್

ಯೆಯಾ| ಆಮ್ಕಾಂ ಆಮಿಂ ಕುಂಪಾರ್ ಕರುಯಾಂ!!

ಪಿಂತುರ್

ವಿಂಚ್ಣಾರ್ ಕವಿತಾ

ಕುಂಪಾರ್ ಕರ್ಯಾಂ [ - ಆಂಟನಿ, ಬಾರ್ಕುರ್]

ಕುಂಪಾರ್ ಕರ್‍ಯಾಂ ಫಿಂರ್ಗಿ ಭಾಶೆಕ್,

ಮೊರ್‍ಯಾಂ ವರ್ತೆ ಜಾಂವ್ಚೆ ಆಶೆಕ್.

ಹರ್ಬೊಸ್ ಹಿರ್ವೊಂ,

ಖೊರ್ಜೊಣ್ ಕರ್ವೊಂ,

ಜೀವ್ ತುಟ್ಚ್ಯಾ ವೆಳಾರ್ ತರೀ,

ಮಾಂಯ್ ಭಾಸ್ ತೊಂಡಾರ್ ಯೆಂವೊಂ.

ಕುಂಪಾರ್ ಕರ್‍ಯಾಂ ಉಗ್ತ್ಯಾ ವೆಸಾಕ್,

ವಾರ್‍ಯಾಕ್ ಘಾಲುನ್ ಜಿವಾ ಮಾಸಾಕ್.

ದಿಷ್ಟಿ ನಾಗೊವ್ನ್,

ಆಶಾ ಭಾಂಗೊಂ,

ಭಾವಾ ದೊಳೆ ಭಯ್ಣಿರ್ ಖೆಳ್ತಾಂ,

ಮಾಣ್ಸುಗೆ ಮೋಲ್ ಮತಿಕ್ ಯೆಂವೊಂ.

ಕುಂಪಾರ್ ಕರ್‍ಯಾಂ, ಕುರ್ವಾರ್ ಕರ್ಯಾಂ,

ಸೆವೆ ನಾಂವಾರ್ ಲುಟ್ತಾತ್ ಚೊರ್ಯಾಂ.

ನಾಂವ್ ಗಾಜೊಂ,

ಮಾನ್ ಮೆಳೊಂ,

ಕಾಳಿಜ್ ಥಾಂಬ್ಚ್ಯಾ ಖಿಣಾ ತರೀ,

ಪುನಾ ಮೋಲ್ ಅತ್ಮ್ಯಾಕ್ ಕಳೊಂ.

ಕುಂಪಾರ್ ಕರ್‍ಯಾಂ, ಕುಪಾರ್ ದವರ್‍ಯಾಂ,

ಸಗ್ಳೆಂ ಪರ್ಕಿ, ಪರ್ಜಳ್ಚೆಂ, ಝಳ್ಝಳ್ಚೆಂ.

ವಾರ್‍ಯಾಕ್ ಧರ್‍ಯಾಂ,

ಗಾಳುನ್ ಪಿಳ್ಯಾಂ,

ಗಿಲೀಟ್ ಝರೊನ್ ಪಡ್ತಾನಾ ತರೀ,

ಆಮ್ಚೆಂ ಮೋಲ್ ಆಮ್ಕಾಂ ಕಳೊಂ.

ಕೊಣ್ ಕೊಣಾಚೊ ಕುಂಪಾರ್? [- ವಾಯ್ಲೆಟ್ ಜೆ. ಪಿರೇರಾ]

ಆಯ್ಚ್ಯಾ ಹ್ಯಾ ಸಮಾಜೆಂತ್

ಜಿಣಿಂ ಜಾಲ್ಯಾ ಕಷ್ಟಾಂಚಿ ಸರ್ವಾಂತ್

ಕಿತೆಂಯ್ ಕಾಮಾ ತುಜಿ ಜಾಯ್ಜೆ ತರ್

ಹರ್‍ಯೇಕಾಂತ್ ಜಾಯ್ ಕುಂಪಾರ್

ಫುಡಾರಿ ಜಾಂವ್ಕ್ ಯೆವ್ಜಿಲಾಂಯ್ ತರ್

ತಲಾಸ್ ಕರ್ ಗಾಂವ್ಚ್ಯಾ ಗುಂಡಾಮಾವಾಲ್ಯಾಂಕ್

ಭರ್ ತಾಂಚಿಂ ಖಲ್ಸಾಂವಾಂ ಭಾಂಗಾರ್ ದುಡ್ವಾನ್

ಖಂಡಿತ್ ಜೀಕ್ ತುಜಿಚ್ಚ್ ನಾ ಕಾಂಯ್ ದುಬಾವ್

ಜಾಂವ್ಕ್ ಆಶೆತಾಯ್ ಜರ್ ಏಕ್ ದೊತೊರ್

ಪಯ್ಲೆ ಪಳೆ ತುಜ್ಯಾ ವ್ಹಡಿಲಾಂಚೆ ಖಲ್ಸಾಂವ್

ಲ್ಹಾಕಾಂನಿ ಡಿಮಾಂಡ್ ತುಜ್ಯಾ ಶಿಕ್ಪಾ ಪಾಟ್ಲ್ಯಾನ್

ಕುಂಪಾರ್ ಜರ್ ಆಸತ್ ನಾ ಕಿತೆಂಚ್ ಫಿಕಿರ್

ನಾಂವ್ ಆಶೆತಾಯ್ ಕೊಂಕ್ಣಿ ಮಾಂಚಿಯೆರ್

ಘಾಲ್ ಫುಲಾಂ, ಕರ್ ತಾರಿಫೊ ಕೊಂಕ್ಣೆಚ್ಯಾ ಮುಖೆಲ್ಯಾಂಕ್

ಜರ್ ತೊ ದಾಧೊಸ್ ತರ್ ತುಂ ಊಂಚ್

ತುಜೆ ಥಾವ್ನ್ ಕರಯ್ತೊಲೊ ಕಾಮಾಂ ಹಜಾರ್

ಜರ್ ಸಾದೊ ಮನಿಸ್ ಜಾವ್ನ್ ಜಿಯೆಂವ್ಕ್ ಆಶೆತಾಯ್

ತರ್ ಸೊಡ್ ತುಂ ಹೆ ಸರ್ವ್ ಅಬ್ಲೆಸ್

ಮನ್ಶ್ಯಾಪಣ್ಂಚ್ ಜಾಂವ್ ತುಜೆಂ ಸರ್ವಸ್ವ್

ಕುಂಪಾರ್ ನಾಕಾ ತುಂಚ್ಚ್ ಜಾತೊಲೊಯ್ ಊಂಚ್..!

ಪಿಂತುರ್

ವಿಂಚ್ಣಾರ್ ಕವಿತಾ

ಕುಂಪಾರ್ ಕರುಯಾಂ [- ಸ್ಟ್ಯಾನಿ ಮೆಂಡೊನ್ಸಾ, ಯು.ಕೆ.]

ಕುಂಪಾರಿಚೊ ಬಿಲ್ಲೊ ಘೆವುನ್

ಗಾಂವಾರ್ ಸಗ್ಳ್ಯಾ ಭಂವ್ತಾಯ್

ಗರ್ಜೆ ವೆಳಾರ್ ನಂಪಂಯ್ಚ್ ಖಂಯ್‌ಗಾ

ಗಾಂವ್ ಸೊಡುನ್ ಧಾಂವ್ತಾಯ್

ಕುಮಾದ್ರಿಚಾ ಮೊಗಾನ್‌ಗೀ ಗಾ

ಭುರ್ಗ್ಯಾ ಪಿಲ್ಯಾದ್ ಜೊಡ್ತಾಯ್

ಕುಂಪಾದ್ರಿಕ್ ನಾಕ್‌ಭರ್ ಘೊಟುಂಕ್ ದೀವ್ನ್

ಪಾಲ್ವಾ ಭಿತರ್ ರಿಗ್ತಾಯ್?

ಹುಂಕ್ತಾತ್ ಕೋಣ್‌ಗಾ ನಾ ತರ್ ದುಮ್ಡಿ

ಕೆದಿಂಚ್ ತುಕಾ ಸ್ಥಾನ್ ನಾ ಮುಕಾರ್

ಫಕತ್ ತುಜೆರ್ ರಾಗ್ ಝಗ್ಡಿಂ ಗಾ

ಸರ್ವಾಂಕೀ ತುಂ ಕಾಂಪಾರ್

ವಳಕ್ ತುಜಿ ಖಂಯ್‌ಗಾ ತುಕಾ

ಕುಂಪಾರ್ ಕರ್‍ತೆಲ್ಯಾಂಕ್

ತಾಂಕಾಂ ಉಗ್ಡಾಸ್ ಫಕತ್ತ್

ತಾಂಚಾ ಗರ್ಜೆಕ್ ಪಡ್ತಾನಾ

ಆಸ್ಲ್ಯಾರ್ ತುಜಾ ಬೊಲ್ಸಾಂತ್ ಗುಲೆ

ಕರ್‍ತಾತ್ ತುಕಾಚ್ಚ್ ಕುಂಪಾರ್

ಗಂಧಾ ಝೆಲೊ ರಸ್ಮಾ ಶೆಲೊ

ಘಾಲುನ್ ಕರ್‍ತಾತ್ ಸತ್ಕಾರ್

ಕೊರೊಡಾಚಿಂ ಕಾಮಾಂ ಬಾಕಿ ಆಸಾತ್

ಸೆವಾ ಧರ್ಮಾಂಚಾ ನಾಂವಾರ್

ಬೊಕ್ರೊ ಕೋಣ್ ದೆಂವ್ತಾ ಗಾಂವಾರ್

ರಾಕ್ತಾತ್ ಕರುಂಕ್ ಕುಂಪಾರ್

ಕುಂಪಾರ್ ಕರುಂಕ್ ಚಿಂತಾಯ್? [- ಪ್ರಸನ್ನ್, ನಿಡ್ಡೋಡಿ]

ಗಾಂವಾರ್ ಬರೊ ’ಕುಂಪಾದ್ರ್’ ಮ್ಹಣೊಂಕ್

ಚ್ಯಾರ್ ಜಣಾಂಚೆ ಸಲಾಮ್ ಅಪ್ಣಾಂವ್ನ್

ಧಾ ಜಣಾಂಕ್ ಯೆಕ್ಟಾಂವ್ನ್ ಬಾಟ್ಲಿ ಪೊಂವೊನ್

ಗ್ಲಾಸ್ ವೊಮ್ತೊತಾನಾ ’ಸಂಸಾರ್’ ಮ್ಹಾಕಾಚ್ ಕೆಲೊ...!

ಗಾಂವಾಂತ್ಲೆಂ ಚೆನ್ನಿ ಕೊಣಾಚ್ಯಾಕೀ ಕರ್ತುಬಾಂನಿ

ಪೋಟ್ ವಾಡೊನ್ ಹಾತ್ ಉದಾರೆ ಕರ್ತಾನಾ

’ಕುಂಪಾದ್ರ್’ ಜಾವುನ್ ಉದ್ದಾರ್ ಕರುಂಕ್ ಚಿಂತಾನಾ

ಲೊಕಾ ತಿರಸ್ಕಾರಾನ್ ಪೊಲಿಸಾಂಚೊ ’ಕುಂಪಾರ್’ ಜಾಲೊಂ..!

ಗಾಂವ್ಚೊ ಶೆಟ್ ವೋಟ್ ಮಾಗೊಂಕ್ ಆಸ್ರೊ ಮ್ಹಜೊ ಘೆತಾನಾ

ಮಿಶಿಯೊ ವೊಳಾವ್ನ್ ಲೊಕಾಕ್ ಭೊಳಾವ್ನ್ ಹಾತ್ ಜೊಡುನ್

ಶೆಟಿಕ್ ಜಿಕವ್ನ್ ಗಾಂವ್ ವೃದ್ದಿ ಕರುಂಕ್ ವದ್ದಾಟ್ತಾನಾ

ಶೆಟಿನ್ಂಚ್ ಮ್ಹಾಕಾ ’ಕುಂಪಾರ್’ ಕೆಲೊ..!

ಕಾಹಾರಾ ಉಪ್ರಾಂತ್ ಪಯ್ಲೆಂ ’ಭಿಂ’ ಯೆತಾನಾ

ದೇಸ್‌ಭರ್ ಘೊಳೊನ್ ಸಾಂಜೆರ್ ಗಡಂಗಾಕ್ ಪಾವೊನ್

ಗಡಂಗ್ ಹೆರಾಂಕ್ ’ಕುಂಪಾದ್ರ್’ ಕರುಂಕ್ ಚಿಂತಾನಾ

ಬಾಟ್ಲಿ ಪಳೆವ್ನ್ ಲಾಳ್ ಗಳವ್ನ್ ಹಾಂವ್ಂಚ್ ’ಕುಂಪಾರ್’ ಜಾಲೊಂ..!

ಪಿಂತುರ್

ವಿಂಚ್ಣಾರ್ ಕವಿತಾ

ಕುಂಪಾರ್ ಕರುಯಾಂ [- ಆಸ್ಟಿನ್ ಪ್ರಭು, ನಂತೂರ್]

ಮಾತ್ಯಾವಯ್ಲೆ ಕೇಸ್ ಆನಿ ಪೆಂಕ್ಟಾಂತ್ಲೆಂ ತೆಂ ಬಳ್ ಸಗ್ಳೆಂ

ಮಾಯಾಗ್ ಜಾಲ್ಲ್ಯಾ ದಾದ್ಲ್ಯಾಂನೊ

ಭುರ್ಗ್ಯಾಂಪಣಾಲೊ ಆಂಗ್ಗಾಲಾಪ್ ತೊ ಆಜೂನ್ ಸುಟೊಂಕ್ ನಾ?

ಜಿಬ್ಲಿ ಖೆಳ್ತಾನಾ ಲಾಗಿಂ ಯೇವುನ್ ವಯ್ರ್ ತಿಳುನ್ ರಾವ್ತಾಲ್ಯಾತ್

ಪಯ್ಸ್ ವಚೊನ್ ಮಿತ್ರಾಂಲಾಗಿಂ ಚಾಡ್ಡೆ ಕಾಲೊರ್ ಸಾಂಗ್ತಾಲ್ಯಾತ್

ಲಜ್ ಆಜೂನ್ ಸುಟೊಂಕ್ ನಾ?

ಕಬಡ್ಡಿ ಖೆಳ್ತಾನಾ ಪಾಂಯಾ ಬದ್ಲಾಕ್ ಘಾಗ್ರೊ ಧರುನ್ ವೊಡ್ತಾಲ್ಯಾತ್

ಲಿಪೊನ್ ರಾಂವ್ಚೊ ಖೆಳ್ ಮ್ಹಣೊನ್ ಆಂಗಾರ್ ಉಡೊನ್ ಪಡ್ತಾಲ್ಯಾತ್

ಮರ್ಯಾದ್ ಆಜೂನ್ ವಚೊಂಕ್ ನಾ?

ರಾಕ್ಕೊಸಾಂಚೆ ದೊಳೆ ತುಮ್ಚೆ ಆಮ್ಚ್ಯಾ ಆಂಗಾರ್ ಉಡ್ತಾಲೆ

ತೋಂಡಾ ಬದ್ಲಾಕ್ ಹರ್ಧ್ಯಾರ್ ಪಳೆವ್ನ್ ಪೆಂಕ್ಟಾಂತ್ ಜರ್ಲೆ ಖೆಳ್ತಾಲೆ

ಮಾಣ್ಸುಗಿ ಆಜೂನ್ ಉದೆಂವ್ಕ್ ನಾ?

ಮೆಳ್ಳೆಲ್ಯಾ ಚೆಡ್ವಾಂಕ್ ಪತ್ರಾಂ ಬರವ್ನ್ ಹಾಂವ್ಂಚ್ ತುಜೊ ಪ್ರೇಮಿ ಮ್ಹಣೊನ್

ಪೊಟ್ಲುನ್ ಧರುನ್ ಉಮೊ ದಿವುನ್ ಉಪ್ರಾಂತ್ ತಾಂಕಾಂ ರಸ್ತ್ಯಾರ್ ಸೊಡುನ್

ಕಿತ್ಲ್ಯಾ ಚೆಡ್ವಾಂಕ್ ಭಾನಾಂವ್ಕ್ ನಾ?

ಕುಮ್ಗಾರಾವೆಳಿಂ ಪಾಟ್ಲ್ಯಾನ್ ರಾವೊನ್ ಕೂಲ್ಯಾರ್ ಆಮ್ಚ್ಯಾ ಹಾತ್ ಚರವ್ನ್

ಮಿರ್ನ್ಯಾಮಾಚ್ಯೊ ಕುಟಿ ಖಾವುನ್ ಉಪ್ರಾಂತ್ ಆಮ್ಕಾಂ ಸೋರ್ರಿ ಮ್ಹಣೊನ್

ಮರ್ಯಾದ್ ತುಮಿಂ ಸಾಂಡುಂಕ್ ನಾ?

ಆಲ್ತಾರ್ ಭುರ್ಗೆ ಮ್ಹಳ್ಳ್ಯಾ ನೀಬಾನ್ ಕುಮ್ಗಾರಾವೆಳಿಂ ತಿ ಪ್ಲೇಟ್ ತುಮಿಂ

ಥೊಡೆ ಪಾವ್ಟಿ ಗೊಮ್ಟೆಕ್ ಆನಿ ಥೊಡೆ ಪಾವ್ಟಿ ಹರ್ಧ್ಯಾಕ್ ಲಾಗವ್ನ್

ಆಂಗ್ಗಾಲಾಪ್ ತುಮಿಂ ಸುಟಂವ್ಕ್ ನಾ?

ಕಾಕ್ಸಾಂತ್ ಆಸ್ತಾಂ ಪಾಟ್ಲ್ಯಾನ್ ವಚೊನ್ ವ್ಹಳೂ ಜನೆಲಾಂತ್ಲ್ಯಾನ್ ತಿಳುನ್

ಸಾಬಾಚೆಂ ಉದಾಕ್ ದೊಳ್ಯಾಂಕ್ ಪಡ್ತಾನಾ ಹಾತ್ ನಿಸ್ರೊನ್ ಸಕ್ಲಾ ಪಡೊನ್

ಪಾಂಯ್ ತುಮಿಂ ಮೊಡುಂಕ್ ನಾ?

ಉಗ್ಡಾಸ್ ಯೆತಾ ಆದ್ಲೊ ತುಮ್ಕಾಂ ಪೆಂಕ್ಟಾಂತ್ ತುಮ್ಚ್ಯಾ ಬಳ್ ನಾ

ಬೊಂಡ್ಯಾಪರಿಂ ತಕ್ಲಿ ಜಾಲ್ಯಾ ಮಾಂಡ್ಡ್ಯಾರ್ ಏಕೀ ಕೇಸ್ ನಾ

ತೋಂಡ್ ಉಗ್ತೆಂ ಕೆಲೆಂ ತರ್ ದಾಂತ್ ಮೆಜುಂಕ್ ಮೆಳ್ಚೆ ನಾಂತ್

ಪೋಟ್ ವಾಡ್ಲಾಂ ಗುರ್ವಾರಿಪರಿಂ ಪ್ಯಾಂಟ್ ಬೊಂಬ್ಲೆರ್ ರಾವಾನಾ

ಚೆಡ್ವಾಂ ವಿಶ್ಯಾಂತ್ ಚಿಂತಾತ್ ತುಮಿಂ ಲಜ್ ತುಮ್ಕಾಂ ದಿಸಾನಾ?

ತುಮ್ಚ್ಯೆ ಮುಖಾರ್ ವಿಣ್ಗೆ ರಾವ್ಲ್ಯಾರ್ ದೊಳ್ಯಾಂಕ್ ತುಮ್ಚ್ಯಾ ದಿಸಾನಾ

ವಯಾಗ್ರ ತುಮಿಂ ಘೆತ್ಲೆಂ ತರೀ ಭಿಲ್ಕುಲ್ ತಾಚೊ ಫಾಯ್ದೊ ನಾ

ಸ್ವಪ್ಣಾಂತ್ ತುಮಿಂ ಕೆಳಿಂ ಖಾಯಾ ಆಮ್ಕಾಂ ಕಾಂಯ್ ಪರ್ವಾ ನಾ

ಭಿಕಾಣ್ ಉಕ್ಲುಂಕ್ ತಾಂಕಾನಾಸ್ಚೆ ಪೊಣ್ಸಾ ರುಕಾಕ್ ಚಡಾನಾಕಾತ್

ಆತಾಂಚೆಂ ವಿಸ್ರೊನ್ ಆದ್ಲೆಂ ಚಿಂತುನ್ ಲಾಳ್ ಗಳವ್ನ್ ಬಸಾನಾಕಾತ್

ಚೆಡ್ವಾಂ ವಿಶ್ಯಾಂತ್ ಚಿಂತ್ಚ್ಯಾ ಬದ್ಲಾಕ್ ಪಾತ್ಕಾಂಚೆಂ ಭೊಗ್ಸಾಣೆ ಮಾಗಾ

ಕೋಂತ್ ಹಾತಿಂ ಧರುನ್ ಸದಾಂ ಸರ್ಗಾಕ್ ವಚೊಂಕ್ ಲಾಗಾ

ಶಿಮ್ಟಿ ಉಕ್ಲುಂಕ್ ಜಾಯ್ನಾಸ್ಚ್ಯಾಂನಿ ಶೆಣ್ ಘಾಲ್ಚೆಂ ಸಾರ್ಕೆಂ ನಹಿಂ

ಖೆಲ್ಲೆಂ ಸಗ್ಳೆಂ ಜಿರ್ತಾ ಮ್ಹಣೊನ್ ಫಾತೊರ್ ಖಾಂವ್ಚೊ ಸಾರ್ಕೊ ನಹಿಂ

ಬಾಯ್ಲ್ ತುಮ್ಚಿ ಘೊರೆತಾ ಜಾಲ್ಯಾರ್ ಕಾನಾಂಕ್ ಗುಡ್ದ್ಯೊ ಘಾಲಾ

ರಾತಿಕ್ ನೀದ್ ಪಡಾನಾ ಜಾಲ್ಯಾರ್ ದೊಳ್ಯಾಂಕ್ ಪಿಂತಾಂ ಬಾಂದಾ

ಸೊರೊ ಶೆಖುನ್ ಸಿಗ್ರೆಟ್ ಫುಂಕುನ್ ಪೊಪ್ಸಾಂಕ್ ಬುರಾಕ್ ಜಾಲ್ಯಾತ್

ಚಂದ್ರೆಮಾಚ್ಯಾ ಧರ್ಣೆಪರಿಂ ತೋಂಡಾರ್ ಪೊಣ್ಕುಲ್ ಪಡ್ಲ್ಯಾತ್

ನ್ಹಾಣ್ಯೆಂತ್ಲ್ಯಾ ಚಿಮ್ಣೆಪರಿಂ ಪಾಂಯ್ ಕಾಳೆ ಜಾಲ್ಯಾತ್

ಉಂದ್ರಾಂಚ್ಯಾ ದಾಂತಾಪರಿಂ ನಾಕ್ಶ್ಯೊ ಉಬ್ಯೊ ಜಾಲ್ಯಾತ್

ಚೆಡ್ವಾಂಕ್ ಚಿಂತ್ಚ್ಯಾ ಪಯ್ಲೆಂ ತುಮಿಂ ತುಮ್ಚೆಂಚ್ ವಸ್ತುರ್ ಕಾಡಾ

ಆರ್ಶ್ಯಾ ಸಮೊರ್ ಉಭೆ ರಾವೊನ್ ತಕ್ಲೆ ಥಾವುನ್ ಪಾಂಯಾಂ ಪರ್ಯಾಂತ್

ಸರ್ವ್ ವಸ್ತು ತಿಳುನ್ ಪಳೆವ್ನ್ ಲಜ್ ತುಮ್ಕಾಂ ದಿಸಾನಾ ಜಾಲ್ಯಾರ್

ಉಪ್ರಾಂತ್ ತುಮಿಂ ಆಮ್ಕಾಂ ಆಪವ್ನ್ ಆದ್ಲಿಂ ತಿಂ ಪೊಕ್ರಿಪೊಣಾಂ

ಪರತ್ ಪರತ್ ಉಸ್ತುನ್ ಮಸ್ತುನ್ ಕಾಜ್ಚ್ಯೆ ಪಾಡಿಂತ್ ಮೋಗ್ ಕರ್ಚ್ಯಾ

ತ್ಯಾ ತರ್ನ್ಯಾಂ ತರ್ನ್ಯಾಂ ಭುರ್ಗ್ಯಾಪರಿಂ ಹಾಸೊನ್ ಖೆಳೊನ್ ನಾಚೊನ್ ಆಮಿಂ

ಭುಮಿವೈಂಕುಂಟಾಂತ್ಲ್ಯಾ ಆದಾಂವ್‌ಪರಿಂ ವ ಏಪ್ಪಲ್ ದಿಲ್ಲ್ಯಾ ಏವೆಪರಿಂ

ಪಾತಾಕ್ ಆಧಾರ್ನ್ ಸಂತೊಸ್ ಭೊಗುನ್

ಸೆಜಾರ್ಚ್ಯಾ ತ್ಯಾ ಮಿಂಗೆಲಿಕ್ ಕುಂಪಾರ್ ಕರುಂಯಾಂ!

ಕುಂಪಾರ್ ಜಾಯ್ ಪಡ್ಲಾ [- ಅನಿಲ್ ಪೆರ್ನಾಲ್]

ತೊಡಾಚ್ಯಾ ಉದ್ಕಾಂತ್ ಖೆಳೊನ್ ಆಸ್ತಾಂ

ಕೊಂಪೊರ್ ಭೊರ್ ಉದಾಕ್ ಆಸ್ಲೆಂ

ವ್ಹಾಳಾಚ್ಯಾ ಲೊಟಾಂತ್ ಆತಾಂ ಬುಡ್ಲಾ ದೊಂಪೊರ್

ವಯ್ರ್ ವೊಡ್ಚಿ ಗತ್ ನಾ, ಜಾಯ್ ಪಡ್ಲಾ ಕುಂಪಾರ್

ಕೊಣಾಕ್ ಜಾಯ್ ಧುಂಪಂವ್ಕ್

ಕೊಣಾಕ್ ಜಾಯ್ ಚಾಕಾಂವ್ಕ್

ಕೊಂಕ್ಣೆಚೊ ಮನಿಸ್ ಹಾಂವ್, ಗರ್ಜೊ ಸಭಾರ್

ತಲಾಸ್ ಕರುನ್ ದಿಯಾ ಮ್ಹಾಕಾ, ಜಾಯ್ ಪಡ್ಲಾ ಕುಂಪಾರ್

ಸಾಂಗಾ ಬಾಬಾ, ಸಾಂಗಾ ಬಾಯೆ

ವಯ್ರ್ ಉಕ್ಲುಂಕ್ ಆಸಾ ಕೋಣೀ ತಯಾರ್?

ಕೊಂಕ್ಣೆಚ್ಯಾ ಸೆವೆಂತ್ ಜಾಲಾಂ ಪುರಾ ಲಾಚಾರ್

ಆಸ್ಲ್ಯಾರ್ ಸಾಂಗಾ, ಜಾಯ್ ಪಡ್ಲಾ ಕುಂಪಾರ್

ಗಾಂವ್ಕಾರ್ ಯಾ ಗಲ್ಫಾಗಾರ್ ಕೋಣ್ ತರ್‌ಯ್ ಭುಲ್ತಾ!?

ದುಡು ಆಸ್ಲೊ ಯಾ ನಾಂವ್ ಆಶೆಂವ್ಚೊ ಕೋಣಿ ಚಲ್ತಾ

ತಾಚಿಂ ಗಾಣಾಂ ಗಾಂವ್ಕ್ ಹಾಂವ್ ತಯಾರ್

ಆಸ್ಲ್ಯಾರ್ ಸಾಂಗಾ ವೆಗ್ಗಿಂಚ್ಚ್ ಜಾಯ್ ಪಡ್ಲಾ ಕುಂಪಾರ್

ತೊಡಾ ಉದ್ಕಾಂತ್ ಕೊಂಪೊರ್‌ಭೊರ್ ಚೆಂಬು ಬುಡವ್ನ್ ಖುಶಿ ಆಸ್ತೊಂ

ಬಾಂಯ್ತ್‌ಲ್ಯಾ ಮಾಣ್ಕ್ಯಾ ಬರಿ ಹಾಕಾಯ್ ಜಿಣಿ ಮ್ಹಣ್ತಾತ್!?

ಯಾ ವ್ಹಾಳಾಕ್ ಆಯಿಲ್ಲಿ ಮ್ಹಜಿಚ್ಚ್ ಚೂಕ್ ಮ್ಹಣ್ತಾತ್!?

ವಾದ್ ವಿವಾದ್ ಸದ್ದ್ಯಾಕ್ ಕುಶಿಕ್ ಲೊಟಾ

ಆವ್ರಾ ಲೊಟಾಕ್ ವ್ಹಾಳೊನ್ ವೆಚ್ಯಾ ಆಧಿಂ ವೆಗ್ಗಿಂ ಮ್ಹಾಕಾ ವಯ್ರ್ ಕಾಡಾ

ಕೊಂಕ್ಣೆಚೊ ಮನಿಸ್ ಹಾಂವ್ ಜೀಣ್‌ಭರ್ ’ಸೆವಾ’ ಕೆಲ್ಲೊಂ

ಉರ್‍ಲೊಂ ತರ್ ಮುಕಾರಿಕೀ ಕರ್‍ತಲೊಂ

ಸಾಲ್ವಾರ್ ಕರುಂಕ್ ಮಾತ್ರ್ ವೆಗ್ಗಿಂಚ್ ಏಕ್ ಕುಂಪಾರ್ ಹಾಡಾ....

ಪಿಂತುರ್

ವಿಂಚ್ಣಾರ್ ಕವಿತಾ

ಕುಂಪಾರ್ ಜಾಯ್ ಆಸ್ಲೊ [- ಕ್ಲೆರೆನ್ಸ್ ಕೈಕಂಬ]

ಕೊಣೆಂಗೀ ಅವ್ಯಕ್ತ್ ಸಕ್ತೆನ್

ಕಶೆಂಗೀ ದಾನ್ ದಿಲ್ಲ್ಯಾ

ಹ್ಯಾ ಭುಂಯ್‌ಚೆರ್

ಅವಿಸ್ವಾಸ್‌ಪಣಾಚೆಂ ಭಿಂ ಜಾವ್ನ್

ಆಚಾನಕ್ ಜಲ್ಮೊನ್

ಹ್ಯಾ ಜಾಗ್ಯಾಂತ್ ಜಿಯೆಂವ್ಕ್

ಲಾಗ್‌ಲ್ಲ್ಯಾ ಮ್ಹಜ್ಯಾ ಜಿವಾಕ್

ಹ್ಯಾ ಆತ್ಮ್ಯಾ ಸಕ್ತೆಕ್

ಮೊರ್ನಾ ಪಯ್ಲೆಂ ಪರತ್ ಜಿಯೆಂವ್ಕ್

ಜಾಯ್ ಆಸ್‌ಲ್ಲೆಂ

ಹ್ಯಾ ಖೊಟ್ಯಾ ಸಕ್ತೆಂಕ್ ಖೊಟಾವ್ನ್

ಭರ್‍ವಸ್ಯಾಚ್ಯಾ ಭಾಟಿಯಾಂನಿ

ಅಸ್ತಿರ್ ಭಾವಾಡ್ತಾಚಿಂ ಧಸ್ಮಿ ಪುಲಾಂ

ಖುಂಟುನ್ ಆರಾವ್ನ್

ಸ್ವಪ್ಣಾಂಕ್ ಮ್ಹೊಂವಾಂತ್

ಘಾಲುನ್ ಚಾಕೊನ್ ಪಳಂವ್ಕ್

ದುಸ್ರ್ಯಾಂಚ್ಯಾ ಭಗ್ಣಾಂಕ್

ವಿಕ್ತ್ಯಾ ಬಾಜಾರಾಂತ್

ಮೊಲಾಕ್ ಘೆವ್ನ್

ಸುಖಾಚ್ಯಾ ವಾರ್‍ಯಾರ್ ವೆಂಗುನ್

ಮೊಳ್ಬಾ ವಯ್ಲ್ಯಾ

ನಿಳ್ಶ್ಯಾ ಮೊಡಾಂಕ್ ಪಳೆವ್ನ್

ದರ್ಯಾ ರಾಶಿಂತ್

ಜೀವ್ ಉಪ್ಯೆವ್ನ್

ಸುಖಾಳ್ ಚಿಂತ್ನಾಂಕ್ ಭಗುನ್

ಜಿವಿತಾಕ್ ಆರಾವ್ನ್

ಧರ್ತೆನ್ ಮಾಂಡ್‌ಲ್ಲ್ಯಾ

ಜುಂತಾಕ್ ಉತ್ರಾಂ

ವಾಂಟ್ಯಾಂನಿ ಜವಾಬ್ ದೀವ್ನ್

ರಚ್ನಾರಾಚ್ಯಾ ಝಡ್ತೆಕ್

ಉಭೊ ರಾವೊಂಕ್ ಜಾಯ್ ಆಸ್‌ಲ್ಲೆಂ....

ಪುಣ್, ಇತ್ಲ್ಯಾಕ್‌ಯೀ

ಖಂಚಾಕ್‌ಯೀ

ಹ್ಯಾ ಸಂಸ್ರಾಂತ್

ಎಕ್ಲೊ ಕುಂಪಾದ್ರ್ ಜಾಯ್ ಆಸ್‌ಲ್ಲೊ

ಮ್ಹಣ್ ಆಖ್ರೇಚೊ ಉಸ್ವಾಸ್

ಸೊಡ್ತಾಂ ವರೇಗ್

ಹಾಂವ್ ನೆಣಾಸ್‌ಲ್ಲೊಂ...

ಕವಿತಾ ಪಾನಾಕ್

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications