डिजिटल कोंकणी प्रसतूत आनी फुडार: परिसंवाद

डिजिटल कोंकणी प्रसतूत आनी फुडार: परिसंवाद

२५ ओकटोबर २०२६: ’डिजिटल कोंकणी प्रसतूत आनी फुडार’ विश्याचेर आयोजीत केल्लें डिजिटल परिसंवाद आशावादी प्रकाशनान आयतारा (२५ ओकटोबर) सांजेर ४ थावन ६ पऱ्यांत चलवन वेलें. प्रिंट पुसतक, ई-पुसतक, आ-पुसतक अश्या तीन प्रकाराचीं कोंकणी पुसतकां हांतूं लोकार्पण जालीं.

(Picture: AI generated)

डो.जयवंत नायक (प्रिन्सिपाल, युनिवर्सिटी कोलेज मंगळूर) हाणें काऱ्याचें उग्तावण करून, डिजिटल कोंकणी शेतांत पाटल्या सभार वर्सां थावन निरंतर जावन वावर करून आसच्या आशावादी प्रकाशनाची थोकणाय करून म्हणालो; ’डिजिटल आमचो फुडार, देकून कोंकणी साहित्य सयत डिजिटलीकरण करून फुडल्या जनांगाक एका ना एका रितीन सलीस जांवचेदिशेन आमी सर्वांनी एकवटीन मनोभवान काम कर्ची गर्ज आसा’

वल्ली क्वाड्रसान परिसंवादाची तशेंच सर्व सयऱ्यांची ओळोक करून, के.बी.एस. (कोंकणी बियोंड स्क्रिपट) मिसांवाविशीं माहेत दिवून म्हणालो; "जशें एक देश, एक भास’ म्हळ्ळें मूर्ख‌पण‌की तेच‌परीं कोंकणिंत ’एक लिपी, एक बोली’ चिंतप सयत ’पिशें चिंतप’. कित्याक म्हळ्यार कारणांतर आमी वेग-वेगळ्या प्रांत्यांनी जियेवन आसांव देकून प्रांतीय भास, लिपी व्हापार्न आमी कोंकणी बरयतांव, वाचतांव. अशें आसताना एकल्यान सर्व लिपी/बोली शिकचें असंभव. पूण कोंकणिंत ह्या सर्व लिपिंक तशेंच बोलिंक एक समान मान-सम्मान मेळुंक फावो. त्या दिशेन ’लिप्यंतरण’ एक भोव गर्जेचें पूण भोव संकषटाचें मिसांव. ह्या मिसांवांत धर्म/जात/लिपी/बोली/प्रांत्य वा कसलेच दोरे नासताना फकत लिप्यंतरणाचें काम आशावादी प्रकाशनान हातीं घेतलां. समान चिंत्पाचे हेर वेक्ती तशेंच संस्थे ह्या मिसांवांत जोडल्यात. आनी ह्या मिसांवा निमतीं एदोळ‌च पांच प्रिंट पुसतकां, दोन डिजिटल ई-पुसतकां, तीन आ-पुसतकां, एक वी-पुसतक लोकार्पण जालां. हें मिसांव अशेंच फुडें वतलें" अशें म्हणालो.

(Picture: AI generated)

लारेन्स वी. बरबोज म्यांचेसटर हाणें "गोलिमार‌च्यो कथा, अल्गोरिदमाच्या विश्वांत, मोनिका डेसा मथायसाच्यो कथा’ ह्या तीन पुसतकांची तशेंच बरवप्यांची; डो.एडवर्ड एल. नज्रेत, मोनिका डेसा मथायस हांची मोटव्यान ओळोक करून दिली. गोकूल‌दास प्रभून डो.एडवर्ड एल, नज्रेताचें नागरी लिपिंतलें दुस्रें प्रिंट पुसतक ’गोलिमार‌च्यो कथा’ कथासंग्रह लोकार्पण करून अपल्या प्रमूक उलवपांत "कोंकणी साहित्य डिजिटल माध्यमाचेर हाडुंक गोंयांत, कर्नाटकांत, महाराषट्रांत तशेंच केरळांत थोडीं वावर करून आसात. ही आयची गर्ज जावनासा. ह्या दिशेन आशावादी प्रकाशनान सभार वर्सांनी केल्ले प्रयोग खरेच जावन थोकणायेक फावो जाल्ले. ६२ डिजिटल ई-पुसतकां, १६ आ-पुसतकां, तशेंच पन्नासां वयर वेबिनारांनी कोंकणी साहित्य अध्ययन सयत चलंवचें मिसांव सोंपें न्हय. ह्या डिजिटल युगांत कृतीम भुध्वंत्काय, किंडेल, असल्या साहेत/माध्यमांचो तेंको घेवन कोंकणी साहित्याचें डिजिटलीकरण जालें तर, तें कोंकणीक भोव उपकाराक पडतेलें. आ-पुसतकाक लिपिचीच गर्ज ना, तशेंच वी-पुसतकांत आमी आयकोंक आनी पळेवंक सक्तांव जाल्ल्यान आमच्या मोबायलांनी सयत कोंकणी हाडुंक, एकामेका वांटुंक, समाजीक माध्यमांनी प्रचार करुंक मजत‌गार जातलें" अशें म्हणालो.

(Picture: AI generated)

डो.एडवर्ड एल. नज्रेत अपल्या संधेशांत म्हणालो; "कथाकार जावन हांव एक कथा बरयताना म्हज्या भंवतोणिचें परिसर, मनशां, भगणां मात्र विंचतां शिवाय, कसल्याच तात्वीक चिंत्पाक प्रतिनिधित्व कर्च्या दिशेन बरयनां, पूण म्हज्या ह्या कथेंनी आसची तात्विकता कथा अध्ययन कर्तेल्यांनी पळेल्या आनी पार्किल्या म्हळ्ळें तांचीं प्रपत्रां वाचताना गमता. एका कथाकाराक पयली आध्यता ताचो वाचपी. तो खंच्याय प्रांत्यांत आसोंदी वा खंच्याय लिपिंत आसोंदी. मूळ कन्नड लिइंतल्यो म्हज्यो कथा नागरी लिपिंत लिप्यंतरण केल्ल्या मित्र वल्ली क्वाड्रसाच्या मिनतेचो फळ जावन कन्नड लिपी वाचुंक कळीत नातल्यांक म्हज्यो कथा पावीत केल्लेवर्वीं लाभलली तृप्ती खंच्याय पुरसकाराच्याकी वर्तें. आज नागरी लिपिंतलें म्हजें दुस्रें पुसतक लोकार्पण जालें. ह्या पासत आशावादी प्रकाशनाक धिन्वास".

(Picture: AI generated)

डो.आसटीन डिसोज प्रभून ’मोनिका डेसा मथायसाच्यो कथा’ नांवाचें आशावादी प्रकाशनाचें १६वें आ-पुसतक लोकार्पण करून अपल्या संधेशांत म्हणालो; "मोनिका डेसा मथायस डबलिनांत काम कर्न आसा पूण पाटल्या कांय तेंपांनी कोंकणी साहित्यांत उंचलें नांव जोडलां. कोंकणी काणियांची ती राणी कशी सोभता. डिजिटल कोंकणिंत आशावादी प्रकाशन वेळाकाळानुसार वेवेगळे प्रयोग करून ताचो सगळो फायदो कोंकणीक लाभाशें कर्ता. ह्या मिसांवाक आमी सर्वांनी तेंको दिंवची गर्ज आसा. आमीं हें डिजीटल साहित्य एकामेका वांटुंक सक्तांव. देकून ह्या मिसांवांत चडीत आनी चडीत लोकांनी जोडची गर्ज आसा".

शरत‌चंद्र शेणय कोचीन (संपादक, दिशा डिजिटल नेमाळें) हाणें शैलेंद्र मेहताच्या कन्नड लिपिंतल्या ’अल्गोरिदमाच्या विश्वांत’ ई-पुसतकाचें लोकार्पण करून "डिजिटल कोंकणिंत केरळांत बाय अंजली किणी, बालकृषण मल्ल्य, आनी हेरां वेवेगळे प्रयोग करून आसात आनी अशेंच किंडेल, फ्लीप‌बूक, ई-पब अशें वेवेगळीं माध्यमां वापार्न आमी कोंकणी साहित्याक चडीत लोकाक पावीत जांवचेपरीं कर्चें सूक्त. डिजिटल कोंकणी शेतांत आशावादी प्रकाशन पाटल्या सभार वर्सांनी केल्लो वावर आमकां सर्वांक प्रेरीत जावनासा देकून हो वावर मोट्या प्रमाणांत जांव - अशें माग्तां" म्हणालो.

डो.नितीन बोर्कर हाणें अपल्या संधेशांत "डिजिटल शेतांत हांव पाटल्या वीस-पंचवीस वर्सांनी काम करून आसां, पूण कोंकणिंत सयत हाचो फायदो पावंवचे दिशेन पाटल्या थोड्या तेंपांत शेणय गोंय‌बाब, उदय भेंबरे, माधव बोर्कर, शंकर रमणी, लक्ष्मिदास कृष्ण बोरकार आनी हेरांचें सगळें साहित्य डिजिटल माध्यमाचेर येंवचें काम करून आसां. पूण आशावादी प्रकाशनाचें एद्या मोट्यापरमाणांत जाल्लें काम पळेवन म्हाकाच अज्याप जाता. डिजिटल कोंकणिंत कन्नड लिपिंत सयत असलो वावर जांवचो हांवें पळेंवचें पयलेपावटीं. म्हाका ह्या वेबिनारांत आपोवणें पाटवन म्हाका ही समजणी लाभाशें केल्ल्या आशावादी प्रकाशनाक धिन्वास. आमी सर्वांनी एकवटीत जावन एकामेकाचो हात धरून कोंकणीक डिजिटल माध्यमाचेर हाडचें काम भळान कर्ची गर्ज आसा" म्हणालो.

के.बी.एस. निर्देशन समितिची बाय अंजू साखर‌दांडेन अपल्या उलवपांत "जशें कोंकणिंत सांगणी आसा पेळा पर्माणे मात्याक कुर्पणे, तेच‌परीं डिजिटल आयची आनी फुडाराची गर्ज समजोन धेंपे कोलेजीन ह्या दिशेन कोलेजिच्या सिलेबसांत सयत विध्यार्थिंक वेवेगळ्या कृतीम भुध्वंत्कायेचीं माध्यमां आनी साहेतांचे तर्भेत दिंवचें काम येदोळ‌च सुरू केलां. बाब वल्ली क्वाड्रस सयत हांतूं वांटेली जावनासा. आमीं के. बी. एस. मिसांवां मुखांत्र कोंकणी साहित्याक डिजिटलीकरण कर्चें काम चालूच दवर्तांव. हें अशेंच मुकार वेची गर्ज आसा" म्हणाली.

के.बी.एस. निर्देशन समितिची डो.चंद्रलेख डिसोजान अपल्या उलवपांत "धेंपे कोलेजीन डिजिटल कोंकणीक शिकंवचाक घेतललें एक प्रगतिशील मेट जावनासा. हेर कोलेजिंनी सयत ह्या दिशेन वेची गर्ज आसा." म्हणाली.

गोविंद मोपकार हाणें "कोंकणीक डिजिटल माध्यमाचेर चडीत मापान तांत्रीक सक्तेचो तेंको लाभचेदिशेन जायती तर्नाटीं काम कर्न आसात, आशावादी प्रकाशनाच्या समग्र डिजिटल वावराची माहेत लाभली, ती खरीच कोंकणीक उपकाराक पडचेतसली." अशें म्हणालो.

शैलेंद्र मेहतान ’अल्गोरिदमाच्या विश्वांत’ पुसतक म्हजें तिस्रें कवितेचें पुसतक, तशेंच कन्नड लिपिंत लिप्यंतरण जांवचें तिस्रें पुसतक. म्हज्या आधल्या लिप्यंतरण पुसतकाक पुरसकार सयत लाभला. आमी लिपिचे दोरे मोडून कोंकणीक ’अपली भास’ कर्ची गर्ज आसा. डिजिटल माध्यम आनी तांत्रिकता आमकां तेंको लाभाशें कर्ता. आनी हाचो फायदो आमी जोडचो. कवितेचीं अल्गोरिदमांत कशें कविता बरवंक चिंत्पाचें प्रमाण आनी चिंत्पाचें अल्गोरिदम कित्याक गर्जेचें म्हळ्ळ्याचेर आसा. कन्नड लिपिंत सयत जायत्यो कविता हांवें वाचल्यात आयलेवार ’आंडऱ्यू ए; डिकुन्हाच्यो कविता’ सयत वाचून, कन्नड लिपिंत आसचें उत्कृषट साहित्य समजोंक सकलों. देकून सर्व लिपिंचें उंचलें साहित्य आमी आपणावंक जाय" अशें म्हणालो.

वल्ली क्वाड्रसान धिन्वास पाठयले.

आशावादी प्रकाशनाचीं डिजिटल पुसतकां: https://www.ashawadi.com/digital
आशावादी प्रकाशनाचीं डिजिटल ई-पुसतकां: https://www.ashawadi.com/digital/ebook
आशावादी प्रकाशनाचीं डिजिटल आ-पुसतकां: https://www.ashawadi.com/digital/abook
आशावादी प्रकाशनाचीं डिजिटल प्रिंट पुसतकां: https://www.ashawadi.com/digital/printed