ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ದೋನ್
ತುಜೆಂ ಜಿವಿತ್ ತುಜಿ ವಿಂಚವ್ಣ್
ನ್ಹಂಯ್
ಆವಸ್ವರ್ ಚೊವ್ದಾ: ಮಿಶೇಲ್ ರಾಯನ್ ಆಲಿಯಾ
ಪ್ರಿನ್ಸೆಸ್ ಬ್ಯೂಟಿ ಪಾರ್ಲರ್!
ವೊರಾಂ ಸಾಕಾಳಿಂಚಿಂ ಭರ್ತಿ ಧಾ ಜಾತಾನಾ ಕಾಲ್ಚ್ಯಾ ಸಾಂಜೆರ್ ಆಪ್ಣೆ ಅಪಾಂಯ್ಟ್ಮೆಂಟ್ ಘೆತ್ಲೆಲ್ಯಾಪರಿಂ ಆಲಿಯಾ ಆಜ್ ಬ್ಯೂಟಿ ಪಾರ್ಲರಾಚಾ ದಾರಾರ್ ಉಭೆಂ ಜಾಲ್ಲೆಂ. ಕಾಲ್ಚ್ಯಾ ಸಾಂಜೆರ್ ಶಾಪಿಂಗ್ ಕರುನ್ ಹೊಟೇಲಾಂತ್ ಜೆವಾಣ್ ಕರುನ್ ಘರ್ಚ್ಯಾ ವಾಟೆರ್ ಆಸ್ತಾನಾ ನಮಿತಾನ್ ಕಿತ್ಲಿಂ ಸವಾಲಾಂ ವಿಚಾರ್ಲ್ಯಾರ್ಯ್ ಆಲಿಯಾನ್ ತಾಕಾ ಕಾಂಯ್ಚ್ ಜವಾಬ್ ದಿಲ್ಲಿ ನಾ. ತ್ಯಾ ಭಾಯ್ರ್ ನಮಿತಾನ್ ಆಲಿಯಾಚ್ಯಾ ಟರ್ಮಿನೇಶನ್ ಆರ್ಡರಾ ವಿಶ್ಯಾಂತ್ ಇನ್ಕ್ವಾಯರಿ ಅಪ್ಲಿಕೇಶನ್ ಫೈಲ್ ಕರ್ಚ್ಯಾ ವಿಶ್ಯಾಂತ್ ಆಲಿಯಾಚಾ ಮುಕಾರ್ ವಿಚಾರ್ ದವರ್ಲೊ ಜಾಲ್ಯಾರ್ಯ್ ಆಲಿಯಾನ್ ನಮಿತಾಚಾ ಖಂಯ್ಚ್ಯಾಯ್ ಉತ್ರಾಂಕ್ ಕಾನ್ ಹಾಲಯ್ಲೆ ನಾಂತ್. ತಾಚ್ಯಾ ಆತಾಂಚಾ ಹ್ಯಾ ಸ್ವಭಾವಾಂತ್ ತೆಂ ಕಸಲ್ಯಾಗೀ ತಾಚ್ಯಾಚ್ ನಿರ್ಧಾರಾಂತ್ ದ್ರಡ್ ಆಸಾ ಮ್ಹಳ್ಳ್ಯಾಪರಿಂ ದಿಸ್ತಾಲೆಂ.
ಲ್ಹಾನ್ಪಣಾರ್ ಥಾವ್ನ್ ವ್ಹಾಡವ್ನ್ ಆಯಿಲ್ಲ್ಯಾ ಆಪ್ಲ್ಯಾ ಮತಿಂತ್ಲ್ಯಾ ಆಶೆಕ್ ಆನಿ ಸಪ್ಣಾಕ್ ಪಯ್ಲೆಂ ಕ್ಯಾಪ್ಟನ್ ರಾಣಾನ್ ತ್ಯಾ ಏವಿಯೇಶನ್ ಕ್ಯಾಂಪಸಾಂತ್ ವಾರ್ಯಾರ್ ಉಭಯಿಲ್ಲೆಂ ಜಾಲ್ಯಾರ್ಯ್ ಆಪ್ಲ್ಯಾ ಮತಿಂತ್ಲ್ಯಾ ಸಪ್ಣಾಕ್ ತಶೆಂಚ್ ವಾರ್ಯಾರ್ ವ್ಹಾಳೊನ್ ವಚೊಂಕ್ ಸೊಡಿನಾಸ್ತಾನಾ ಥಿರಾಸಾಣ್ ಸಾಂಬಾಳುನ್ ಆಲಿಯಾ ಏರ್ಹೊಸ್ಟೆಸ್ ಜಾಲ್ಲೆಂ.
ಹ್ಯಾ ತಾಚ್ಯಾ ಥಿರಾಸಣೆಕ್ ತಾಚ್ಯಾ ಘೊವಾನ್ ನಾಸಿರಾನ್ ಆನಿ ತಾಚ್ಯಾ ಕುಟ್ಮಾನ್ ದಂಡಳಾಂವ್ಕ್ ಮಸ್ತ್ ಪ್ರಯತ್ನ್ ಕೆಲ್ಲೆಂ ಆಸ್ತಾಂ ತ್ಯಾ ಪ್ರಯತ್ನಾಂತ್ ಆಲಿಯಾ ಆಪ್ಲ್ಯಾ ವಯ್ಲ್ಯಾ ಭರ್ವಸ್ಯಾನ್ ಮಾತ್ರ್ ಆಪ್ಲ್ಯಾ ವಿಚಾರಾಂತ್ ದ್ರಡತ್ವ್ ಸಾಂಬಾಳುಂಕ್ ಸಕ್ಲ್ಲೆಂ.
ತಾಣೆಂ ಸಾಂಬಾಳ್ಲ್ಲ್ಯಾ ತಾಚ್ಯಾ ಆಶೆಕ್ ಅನಿ ಸಪ್ಣಾಕ್ ಪಯ್ಲೆಂ ಇಕ್ಬಾಲಾಚಾ ಭಾವಾನ್ ರಾಶಿದಾನ್ ಮೊಡುನ್ ಉಡಂವ್ಕ್ ಮಸ್ತ್ ಪ್ರಯತ್ನ್ ಕೆಲ್ಲೆಂ ಆಸ್ತಾಂ ತ್ಯಾ ಪ್ರಯತ್ನಾಂತ್ ಆಲಿಯಾ ಆಪ್ಣಾ ವಯ್ಲ್ಯಾ ವಿಶ್ವಾಸಾನ್ ಮಾತ್ರ್ ಜಿಕೊಂಕ್ ಪಾವ್ಲ್ಲೆಂ.
ಹ್ಯಾ ವಿಶ್ವಾಸಾನ್ ಆಜ್ ಆಚಾನಕ್ ಆಲಿಯಾಚೊ ಸಾಂಗಾತ್ ಸೊಡ್ಲ್ಲೊ. ತೆಂಯ್ ಎಕಾ ಅಪರಿಚಿತ್ ಆಪುಣ್ ವಳ್ಕೊನ್ಚ್ ನೆಣಾಂ ಜಾಲ್ಲ್ಯಾ ವ್ಯಕ್ತಿನ್ ಆಪ್ಲ್ಯಾ ಜಯ್ತಾಕ್ ಮುಳಾ ಥಾವ್ನ್ ಹುಮ್ಟುನ್ ಕಾಡುನ್ ಉಡಯಿಲ್ಲೆಂ. ಕಾಂಯ್ಚ್ ಸಂಭಂಧ್ ನಾಸ್ತಾಂ! ಕಾಂಯ್ಚ್ ಗುನ್ಯಾಂವ್ ನಾಸ್ತಾಂ!
ಹ್ಯಾ ಆಪ್ಣೆ ಕರಿನಾತ್ಲ್ಲ್ಯಾ ಗುನ್ಯಾಂವಾಕ್ ತ್ಯಾ ಮನೋಜ್ ಕುಮಾರಾನ್ ಮಾಮ್ದುನ್ ಘೆತ್ಲ್ಲೊ! ಆಪ್ಣಾಚೊ ಕಾಂಯ್ಚ್ ವಿಚಾರ್ ಕರಿನಾಸ್ತಾನಾ!
ಆನಿ ಆಲಿಯಾನ್.....!
ಆಲಿಯಾನ್ ತ್ಯಾ ಟರ್ಮಿನೇಶನ್ ಪೇಪರಾಂಕ್ ದಸ್ಕತ್ ಕೆಲ್ಲಿ. ಚಲ್ಯಾ ಜಾತಿ ಮುಕಾರ್ ದಿಂಬಿಯೆರ್ ಪಡಾನಾಸ್ತಾನಾ!
ಚಲ್ಯಾ ಜಾತಿನ್ ಆಲಿಯಾಚಾ ಜಿವಿತಾಕ್ ತಶೆಂ ತಾಚ್ಯಾ ಸಪ್ಣಾಂಕ್ ಧರ್ಣಿಕ್ ಶೆವ್ಟಾಯಿಲ್ಲೆಂ.
ಆಲಿಯಾ ಏರ್ವೇಸಾ ಥಾವ್ನ್ ಟರ್ಮಿನೇಟ್ ಜಾಲೆಂ ಜಾಲ್ಯಾರ್ಯ್, ತಾಚಿ ಆಶಾ ಆನಿ ಸಪ್ಣಾಂ ಸಗ್ಳಿಂ ತುಟೊನ್ ಗೆಲಿಂ ಜಾಲ್ಯಾರ್ಯ್ ಆಲಿಯಾ ಮಾತ್ರ್ ಕಸಲ್ಯಾಗೀ ಎಕಾ ವಿಚಿತ್ರ್ ಧಯ್ರಾನ್ ಘಡ್ಲೆಲೆಂ ಸಗ್ಳೆಂ ಘಡೊಂಕ್ಚ್ ನಾ ಮ್ಹಳ್ಳ್ಯಾಪರಿಂ ಜಾಲ್ಲೆಂ.
"ಹಾಯ್ ಆಲಿಯಾ! ಕಿತೆಂ ಆಜ್ ಅಚಾನಕ್ ಅಪಾಂಯ್ಟ್ಮೆಂಟ್ ಘೆತ್ಲೆಂಯ್?" ಆಲಿಯಾ ಬ್ಯೂಟಿ ಪಾರ್ಲರಾಚಾ ಭಿತರ್ ಪಾಂಯ್ ದವರ್ತಾನಾ ನವನೀತ ಉಲಯ್ಲೆಂ. "ಆಜ್ ಡ್ಯೂಟಿ ನಾ?" ತಾಣೆಂ ವಿಚಾರ್ಲೆಂ.
"ತುಂ ಜಾಣಾಂಯ್?" ಆಲಿಯಾಚಾ ತೊಂಡಾರ್ ಎಕಾ ಥರಾಚೊ ವಿಚಿತ್ರ್ ಪ್ರಕಾಸ್ ಫಾಂಕ್ತಾಲೊ. ".... ಆದಿಂ ಮಾಗಾಂತ್ ಎಜಿಪ್ತಾಚ್ಯಾ ಫೆರಾವ್ಯಾ ರಾಯಾಕ್ ಜಾಂವ್ಚ್ಯಾ ಹೊಕ್ಲೆಕ್ ತಾಚ್ಯಾ ಕಾಜಾರಾ ಪಯ್ಲೆಂ ತಾಕಾ ಕಶೆಂ ತಯಾರ್ ಕರ್ತಾಲೆ ತೆಂ.....?"
ಆಪ್ಣೆಂ ಬ್ಯೂಟಿ ಪಾರ್ಲರಾಚ್ಯಾ ಭಿತರ್ ಯೆತಾನಾ ಆಪ್ಣಾಕ್ ಪಳವ್ನ್ ನವನೀತಾನ್ ಆಪ್ಣಾಕ್ ವಿಚಾರ್ಲೆಲ್ಯಾ ಸವಾಲಾ ವಿಶಿಂ ಆಪ್ಲೆಂ ಗುಮಾನ್ ವರಿನಾಸ್ತಾನಾ ಆಲಿಯಾ ಆಪುಣ್ ಬ್ಯೂಟ್ ಪಾರ್ಲರಾಕ್ ಆಯಿಲ್ಲ್ಯಾ ಕಾಮಾ ವಿಶಿಂ ಉಲಯ್ಲೆಂ.
"ಮ್ಹಳ್ಯಾರ್...?" ನವನೀತಾಕ್ ಕಾಂಯ್ಚ್ ಸಮ್ಜಾನಾ ಜಾಲೆಂ. ಆಲಿಯಾ ಪಯ್ಲೆಂಚ್ ಕಾಜಾರ್ ಜಾವ್ನ್ ಡೈವರ್ಸ್ ಜಾಲ್ಲೆಂ ಚಲಿ ಮ್ಹಣೊನ್ ತೆಂ ಜಾಣಾಂ. ತ್ಯಾ ಭಾಯ್ರ್ ಆಲಿಯಾ ಹ್ಯಾ ವಗ್ತಾರ್ ಅಚಾನಕ್ ತ್ಯಾ ಎಜಿಪ್ತಾಚಾ ಫೆರಾವ್ಯಾ ರಾಯಾಚ್ಯಾ ಬಾಯ್ಲೆ ವಿಶಿಂ ಉಲಂವ್ಕ್ ಲಾಗ್ತಾನಾ ನವನೀತಾಕ್ ಆಲಿಯಾಚಿಂ ಉತ್ರಾಂ ಏಕ್ ಮಿಸ್ತೆರ್ ಮ್ಹಳ್ಳ್ಯಾ ಪರಿಂ ಜಾವ್ನ್ ತಾಕಾ ಕಾಂಯ್ಚ್ ಸಮ್ಜಾನಾ ಜಾಲೆಂ.
"ತುಂ ಕಾಜಾರಾಕ್ ತಯಾರಾಯ್ ಕರ್ಚ್ಯಾ ವಿಶಿಂ ಉಲಯ್ತಾಯ್.....?" ನವನೀತಾನ್ ದುಬಾವ್ ಜಾಲೊ.
"ನಾಟ್ ಎ ಇಂಡಿಯನ್ ಬ್ರೈಡ್!" ಆಲಿಯಾಚಾ ತಾಳ್ಯಾಂತ್ ದ್ರಡತಾ ಆಸ್ಲ್ಲಿ.
"ಆನಿ.....?"
"ಎ ಇಜಿಪ್ಶಿಯನ್ ಬ್ರೈಡ್! ತೆಂಯ್ ಏನ್ಶಿಯಂಟ್ ಇಜಿಪ್ಶಿಯನ್ ಬ್ರೈಡ್!"
"ಬಟ್ ವೈ....?" ನವನೀತ ಹೆಂ ಸಾರ್ಕೆಂ ಜಾಣಾಂ ಕೀ ಕಾಜಾರಾಕ್ ಆಯ್ತೆಂ ಜಾಂವ್ಚ್ಯಾ ಹೊಕ್ಲೆಕ್ ಜಿತ್ಲೆಂ ಇಜಿಪ್ತ್ಗಾರ್ ತಾಕಾ ಕಾಜಾರಾಕ್ ತಯಾರ್ ಕರ್ತಾತ್ ತಿತ್ಲೆಂ ಹ್ಯಾ ಸಂಸಾರಾಂತ್ ದುಸ್ರೊ ಕೋಣ್ಯ್ ತಾಚ್ಯಾ ಹೊಕ್ಲೆಕ್ ತಶೆಂ ತಯಾರ್ ಕರಿನಾ! ಪುಣ್ ಆಲಿಯಾ ಆಜ್ ಕಿತ್ಯಾಕ್....?
"ಡೂ ಇಟ್ ಫಾರ್ ಮಿ!" ಆಲಿಯಾಚಾ ತಾಳ್ಯಾಂತ್ ತಿಚ್ ದ್ರಡತಾ.
"ತುಂ ಕಾಜಾರ್ ಜಾಂವ್ಚ್ಯಾರ್ ಆಸಾಯ್.....?" ನವನೀತಾಕ್ ದುಬಾವ್ ಮಾರ್ಲೊ.
"ತೆಂ ಸಗ್ಳೆಂ ತುವೆಂ ಕರ್ಚ್ಯಾ ಶ್ರಂಗಾರಾಚೆರ್ ಹೊಂದೊನ್ ಆಸಾ!"
"ಮ್ಹಳ್ಯಾರ್.....?"
"ತುಜಿ ಸಮರ್ಥಿ ಕಿತ್ಲಿ ಆಸಾ ಮ್ಹಳ್ಳಿ ತಿ ಆತಾಂ ತುಜ್ಯಾ ಮುಕಾರ್ ಚಾಲೆಂಜ್ ಜಾವ್ನ್ ಉಭಿ ಜಾಲ್ಯಾ ನವನೀತಾ!"
"ಓ.ಕೆ.! ಕಮಿನ್!" ನವನೀತಾಕ್ ಆಲಿಯಾ ಆಜ್ ಮಿಸ್ತೆರ್ಚ್ ಜಾವ್ನ್ ಉರ್ಲೆಂ.
ಸುಮಾರ್ ತೀನ್ ವೊರಾಂ ಆಲಿಯಾನ್ ಬ್ಯೂಟಿ ಪಾರ್ಲರಾಂತ್ ನವನೀತಾ ಸಂಗಿಂ ಖರ್ಚಿಲಿಂ.
ತಕ್ಲೆಚೆ ಕೇಸ್ ಕಟ್ಟಿಂಗ್ ಕರುನ್ ತ್ಯಾ ಕೆಸಾಂಕ್ ಲೈಟ್ ಗೋಲ್ಡನ್ ಬ್ರೌನ್ ಕಲಾರಾರ್ ಸೊಭಯ್ಲೆಂ. ಐ ಬ್ರೋ ಸೊಭಿತ್ ಕಟ್ ಕರುನ್ ತಾಕಾ ಬಾರೀಕ್ ಶೇಪ್ ದಿಲಿ. ಫೇಶಿಯಲ್ ಕರುನ್ ತೊಂಡಾಕ್ ತ್ಯಾ ಆರ್ಶ್ಯಾಚೊ ಉಜ್ವಳ್ ಹಾಡ್ಲೊ. ಸಗ್ಳ್ಯಾ ಆಂಗಾಕ್ ತೇಲ್ ಪೊಶೆವ್ನ್ ಮಸಾಜ್ ಕರುನ್ ಗೊರ್ಯಾ ಕಾತಿಕ್ ರಸ್ಮಾಚೆಂ ನಾಜೂಕ್ಪಣ್ ಹಾಡ್ಲೆಂ. ನಾಕ್ಶ್ಯಾಂಕ್ ಸೊಭಿತ್ ಕಟ್ಟಿಂಗ್ ಕರುನ್ ತಾಂಕಾ ಪಾಲಿಶ್ ಕೆಲೆಂ. ಪಾಂಯಾಂಕ್ ಹಾಂತಾಂಕ್ ವ್ಯಾಕ್ಸ್ ಕರುನ್ ಬಾರೀಕ್ ಲೋಂವ್ ಸಗ್ಳಿ ಕಾಡುನ್ ತ್ಯಾ ಹಾತಾ ಪಾಂಯಾಂಕ್ ಮೊಗ್ರೆ ಕಳ್ಯಾಂಚಿ ಸೊಭಾಯ್ ದಿಲಿ. ಆಂಗಾಕ್ ಕ್ರೀಮ್ ಸಾರವ್ನ್ ಉಜ್ವಳ್ ಹಾಡ್ಲೊ. ಆಲಿಯಾಚಾ ಆಂಗಾಚೊ ಏಕೇಕ್ ಇಂಚ್ ಸೊಡಿನಾಸ್ತಾನಾ ನವನೀತಾನ್ ಆಲಿಯಾಕ್ ಸಗ್ಳೆಂಚ್ ತಯಾರ್ ಕೆಲೆಂ.
ನಿಜಾಯ್ಕ್ಯ್ ಆಲಿಯಾ ಆಜ್ ತ್ಯಾ ಎಜಿಪ್ತಾಚಾ ರಾಣಿಯೆ ಕ್ಲಿಯೊಪಾತ್ರ ಪರಿಂ ಸೊಭೊಂಕ್ ಲಾಗ್ಲೆಂ. ಜಲ್ಮಾ ಸುಟಾರ್ ಆಪ್ಣಾಕ್ಚ್ ಆಪ್ಣೆ ಬ್ಯೂಟಿ ಪಾರ್ಲರಾಚಾ ಆರ್ಶ್ಯಾಂತ್ ತ್ಯಾ ಲೈಟಾಚಾ ಉಜ್ವಾಡಾಂತ್ ಉಜ್ವಳ್ಚೆಂ ಪಳವ್ನ್ ತಾಚ್ಯಾ ತೊಂಡಾರ್ ತೃಪ್ತಿ ಉಪ್ಯೆವ್ನ್ ಆಯ್ಲಿ.
ಮತಿಕ್ ಸಂತೊಸ್ ಆನಿ ಸಮಾಧಾನ್ ಜಾತಾನಾ ನವನೀತಾಚೆಂ ಫೀಸ್ ಫಾರಿಕ್ ಕರುನ್ ಟ್ಯಾಕ್ಸಿ ಧರ್ಲ್ಲೆಂ ಆಲಿಯಾ ಘರಾ ಆಯ್ಲೆಂ.
ಘರಾ ಆಯಿಲ್ಲೆಂಚ್ ಸಗ್ಳ್ಯಾ ಆಪ್ಲ್ಯಾ ಆಂಗಾಚೆಂ ವಸ್ತುರ್ ನಿಕ್ಳಾವ್ನ್ ತಾಣೆಂ ಕಾಲ್ ಸಾಂಜೆರ್ ಬಜಾರಾ ಥಾವ್ನ್ ಹಾಡ್ಲೆಲೆಂ ಶ್ರೀಗಂಧಾಚೆಂ ತೇಲ್ ಕಾಡುನ್ ತ್ಯಾ ತೆಲಾಕ್ ಆಪ್ಲ್ಯಾ ಕೆಸಾಂಕ್ ಆನಿ ಆಪ್ಲ್ಯಾ ಸಗ್ಳ್ಯಾ ಕುಡಿಕ್ ವ್ಹಳೂ ಸಾರವ್ನ್ ಮಾಲಿಶ್ ಕೆಲೆಂ.
ತ್ಯಾ ತೆಲಾಚೊ ಪರ್ಮಳ್ ಆಪ್ಲ್ಯಾ ಶಿರಾಂ ಶಿರಾಂನಿ ವೊಡ್ತಾ ವರೇಗ್ ತ್ಯಾ ತೆಲಾಕ್ ಆಪ್ಲ್ಯಾ ಆಂಗಾರ್ ಸುಕಯ್ಲೆಂ.
ಆತಾಂ ತೆಂ ನ್ಹಾಂವ್ಕ್ ದೆಂವ್ಲೆಂ!
ನ್ಹಾಂವ್ನ್ ಜಾವ್ನ್ ತಶೆಂಚ್ ವಾರ್ಯಾಕ್ ಆಪ್ಲೆಂ ಆಂಗ್ ಸುಕಯ್ಲೆಂ. ಆಜ್ ತಾಣೆಂ ತಾಚೊ ಬಾತ್ಟವಲ್ ಉಪಯೋಗ್ ಕೆಲೊ ನಾ. ಕೆಸಾಂಕ್ ತ್ಯಾ ವಯ್ಲ್ಯಾ ಸೀಲಿಂಗಾರ್ ಘುಂವ್ಚ್ಯಾ ಪ್ಯಾನಾಚಾ ವಾರ್ಯಾಂತ್ ಸುಕಯ್ಲೆ.
ಫ್ರಿಜ್ಜಾಂತ್ಲೆಂ, ನಮಿತಾನ್ ಕಾಲ್ ರಾಂದ್ಲ್ಲೆಂ ರಾಂದಾಪ್ ಭಾಯ್ರ್ ಕಾಡುನ್ ತೆಂ ಹುನ್ ಕರುನ್ ತೆಂ ಥೊಡೆಂಚ್ ಜೆವ್ಲೆಂ.
ಜೆವಾಣ್ ಜಾವ್ನ್ ತೆಂ ಆತಾಂ ಬಾಯ್ಲ್ಯಾ ಮೆಜಾರ್ ಯೇವ್ನ್ ಬಸ್ಲೆಂ. ಆಪ್ಲೆ ವ್ಯಾನಿಟಿ ಬ್ಯಾಗ್ ಉಗ್ತೆಂ ಕರುನ್ ತಾಂತ್ಲೆ ಏಕ್ ಪೇಪರ್ ಕಾಡುನ್ ಏಕ್ ನೋಟ್ ಬರಯ್ಲೊ.
ಮೊಗಾಚ್ಯಾ ನಮಿತಾ,
ತುವೆಂ ಮ್ಹಾಕಾ ದಿಲ್ಲ್ಯಾ ಸಾಂಗಾತಾಕ್ ತುಕಾ ಕಶೆಂ ಥ್ಯಾಂಕ್ಸ್ ಮ್ಹಣ್ಚೆಂ
ತೆಂ ಮ್ಹಾಕಾ ಕಳಾನಾ. ಜಾಲ್ಯಾರ್ಯ್ ಥ್ಯಾಂಕ್ ಯು ವೆರಿ ಮಚ್. ಆಜ್ ಥಾವ್ನ್ ಮ್ಹಜ್ಯಾ
ಜಿವಿತಾಚೊ ನವೊ ಅಧ್ಯಾಯ್ ಆರಂಭ್ ಜಾತಾ. ಹ್ಯಾ ಅಧ್ಯಾಯಕ್ ಹಾವೆಂ ಕೆದ್ನಾಂಚ್ ಆಶೆಂವ್ಕ್
ನಾತ್ಲ್ಲೊ! ಚಲಿ ಜಾವ್ನ್ ಜಲ್ಮೊಂಚೆಂ ಕೆದ್ನಾಂಚ್ ಅಭಲ್ ನ್ಹಯ್! ಚಲಿ ಚಡ್ ಭಳಾಧೀಕ್ ಆನಿ
ಪ್ರಭಲ್ ದೆಕುನ್ ಹೊ ಚಲೊ ಹ್ಯಾ ಚಲಿಯೆಕ್ ಸದಾಂಚ್ ದಾಂಬುನ್ ದವರುಂಕ್ ಪಳೆತಾ! ಹೆಂ
ಚಲಿಯೆಚೆಂ ದುರ್ಭಾಗ್ಯ್ಪಣ್ ಜಾವ್ಯೆತ್ ಪುಣ್ ಲ್ಹಾನ್ಪಣ್ ನ್ಹಯ್! ಹೆಂ ಚಲ್ಯಾಚೆಂಚ್ ಲಾಚಾರ್ಪಣ್!
ಕಿತೆಂಯ್ ಜಾಂವ್ ಥ್ಯಾಂಕ್ಸ್ ತುಕಾ.... ತುವೆಂ ಮ್ಹಾಕಾ ದಿಲ್ಲ್ಯಾ ಸಹಕಾರಾಕ್. ಜಿವಿತಾಂತ್
ಮುಕಾರ್ ಕೆದ್ನಾಂಯ್ ಭೆಟ್ಲ್ಯಾಂವ್ ಜಾಲ್ಯಾರ್ ಮ್ಹಾಕಾ ವರ್ತಿ ಖುಶಿ ಜಾತೆಲಿ ಕೀ ತುಂ ಮ್ಹಜೆಂ
ಇಶ್ಟಿಣ್ ಮ್ಹಣೊನ್ ಸಾಂಗೊಂಕ್. ಅಭಿಲಾಶಾಕ್ ಮ್ಹಜೆ ರಿಗಾರ್ಡ್ಸ್ ದೀ. ಆಪ್ಲಿ ಚತ್ರಾಯ್ ಕರ್ ಆನಿ
ಭಲಾಯ್ಕಿ ಸಾಂಬಾಳ್! ಫುಡಾರಾಕ್ ತುಕಾ ಸರ್ವ್ ಬರೆಂ ಮಾಗ್ತಾಂ! ಬಾಯ್!
ತುಜೆಂ ಇಶ್ಟಿಣ್, ಆಲಿಯಾ.
ಆಪ್ಣೆ ಬರಯಿಲ್ಲೊ ನೋಟ್ ತ್ಯಾ ಜೆವ್ಣಾ ಮೆಜಾರ್ ದವರುನ್ ಆಲಿಯಾ ಆತಾಂ ಭಿತರ್ ಗೆಲೆಂ.
ಕಾಲ್ಚ್ಯಾ ಸಾಂಜೆರ್ ಆಪ್ಣೆ ಆನಿ ನಮಿತಾನ್ ಕ್ರಾಪಾರ್ಡ್ ಮಾರ್ಕೆಟಿಕ್ ವಚೊನ್ ಹಾಡ್ಲಲ್ಯೊ ಸಗ್ಳ್ಯೊ ವಸ್ತು ಪ್ಯಾಕ್ ಕೆಲ್ಯೊ.
ನಮಿತಾ ಡ್ಯೂಟೆಚೆಂ ಯೆತಾನಾ ಸಾಂಜೆಚಿಂ ಪಾಂಚ್ ವಾಜ್ತಾತ್. ಸಾಂಜೆಚಾ ಪಾಂಚಾಂಕ್ ಆನಿಕ್ಯ್ ದೋನ್ ವೊರಾ ಬಾಕಿ ಆಸಾತ್. ಚಿಂತ್ಲ್ಲೆಂ ಆಲಿಯಾ ಆಪ್ಲ್ಯಾ ಬೆಡ್ರೂಮಾಕ್ ಗೆಲೆಂ. ತಶೆಂಚ್ ಆಪ್ಲ್ಯಾ ಖಾಟಿಯೆರ್ ಆಡ್ ಪಡ್ಲೆಂ.
ಎಕ್ಚ್ ವೋರ್!
ಎಕಾ ವೊರಾನ್ ಉಟ್ಲ್ಲೆಂ ಆಲಿಯಾ ನ್ಹೆಸೊಂಕ್ ಲಾಗ್ಲೆಂ.
ನ್ಹೆಸೊನ್ ಜಾವ್ನ್ ಆಪ್ಣೆ ಪ್ಯಾಕ್ ಕರುನ್ ದವರ್ಲ್ಲೆಂ ಸಗ್ಳೆಂ ಘೆವ್ನ್ ತೆಂ ನಮಿತಾಚಾ ಪ್ಲ್ಯಾಟಾ ಥಾವ್ನ್ ಭಾಯ್ರ್ ವಚೊಂಕ್ ತಯಾರ್ ಜಾಲೆಂ.
ಏಕ್ ಪಾವ್ಟಿಂಚ್ಯಾಕ್ ತಾಕಾ ಹೆಂ ಪ್ಲ್ಯಾಟ್ ಸೊಡುನ್ ವಚೊಂಕ್ ಮನ್ ಆಯಿಲ್ನಾ. ಪುಣ್ ಮುಕ್ಲ್ಯಾ ಆಪ್ಲ್ಯಾ ಜಿವಿತಾಚಾ ಮಿಸಾಂವಾ ಖಾತಿರ್ ತಾಣೆಂ ತಾಚೆಂ ಮನ್ ಧಾರುಣ್ ಕೆಲೆಂ.
ಪ್ಲ್ಯಾಟಾಕ್ ಲಾಕ್ ಕರುನ್ ಥಂಯ್ ಥಾವ್ನ್ ತೆಂ ಭಾಯ್ರ್ ಪಡ್ಲೆಂ!
ಲಿಫ್ಟ್ ದರುನ್ ಶೀದಾ ಸಕಯ್ಲ್ ಆಯಿಲ್ಲ್ಯಾ ಆಲಿಯಾನ್ ಆಪಾರ್ಟ್ಮೆಂಟಾ ಭಾಯ್ರ್ ಯೇವ್ನ್ ಟ್ಯಾಕ್ಸಿ ಥಾಂಬಯ್ಲಿ.
"ಹಾಲಿಡೇ ಇನ್!" ಟ್ಯಾಕ್ಸಿ ಡ್ರೈವರಾಕ್ ತಾಣೆಂ ಸಾಂಗ್ತಾನಾ ಮೀಟರಾಕ್ ಡೌನ್ ಕೆಲ್ಲ್ಯಾ ಟ್ಯಾಕ್ಸಿ ಡ್ರೈವರಾನ್ ಟ್ಯಾಕ್ಸಿ ಮುಕಾರ್ ಧಾಂವ್ಡಾಯ್ಲಿ.
ಟ್ಯಾಕ್ಸಿ ಭಿತರ್ ಬಸ್ಲೆಲ್ಯಾ ಆಲಿಯಾಕ್ ಸಮಾಧಾನ್ ಜಾತಾನಾ ತೆಂ ವ್ಹಳೂ ಟ್ಯಾಕ್ಸಿಚಾ ಬಸ್ಕೆಕ್ ವೊಣ್ಕಾಲೆಂ. ತಾಕಾ ಆತಾಂ ತಾಚೆಂ ಭವಿಶ್ಯ್ ತಾಚ್ಯಾ ದೊಳ್ಯಾಂ ಮುಕಾರ್ ದಿಸಾಲಾಗ್ಲೆಂ.
*****************
’ಹೊಟೇಲ್ ತಾಜ್ ಇಂಟರ್ ನ್ಯಾಶನಲ್!’
ವೊರಾಂ ಸಾಂಜೆಚಿಂ ಚಾರ್ ಜಾವ್ನ್ ವೀಸ್ ಮಿನುಟಾಂ!
ಸಾಂಜೆಚೊ ಥಕ್ಲಲೊ ಸುರ್ಯೊ ಲಾಗ್ಶಿಲ್ಯಾ ದರ್ಯಾಂತ್ ವಿಶೆವಾಕ್ ಆಶೆವ್ನ್ ವೇಳಾಕ್ ಭರಾನ್ ಲೊಟ್ತಾಲೊ.
ತಿತ್ಲ್ಯಾರ್!
ಸವ್ಕಾಸ್ ಆಯಿಲ್ಲಿ ಏಕ್ ಟ್ಯಾಕ್ಸಿ ಹೊಟೆಲಾಚಾ ದಾರಾ ಮುಕಾರ್ ರಾವ್ಲಿ.
ಥೊಡಿಂ ಕ್ಷಣಾಂ ಕೊಣ್ಯ್ ಟ್ಯಾಕ್ಸಿರ್ ಥಾವ್ನ್ ದೆಂವ್ಲಿಂ ನಾಂತ್.
ಹೊಟೆಲಾಚಾ ದಾರಾರ್ ಉಭೊ ಆಸ್ಲ್ಲೊ ಹೊಟೆಲಾಚೆಂ ಯೂನಿಫಾರಮ್ ನ್ಹೆಸ್ಲಲೊ ಡೋರ್ಮ್ಯಾನ್ ಆಪ್ಣಾ ಮುಕಾರ್ ಏಕ್ ಆರ್ಡಿನರಿ ಟ್ಯಾಕ್ಸಿ ಯೇವ್ನ್ ರಾವ್ಲ್ಲಿ ಪಳವ್ನ್ ತೊ ಜಾಲ್ಯಾರ್ಯ್ ಆಪ್ಲೊ ಜಾಗೊ ಸೊಡುನ್ ಹಾಲ್ಲೊ ನಾ. ಉಭೊ ಆಸ್ಲೆಲ್ಯಾ ಕಡೆನ್ ಥಾವ್ನ್ಚ್ ತೊ ತ್ಯಾ ಟ್ಯಾಕ್ಸಿಕ್ ಪಳೆಂವ್ಚ್ಯಾರ್ ಪಡ್ಲೊ.
ಹೆಣೆ ಟ್ಯಾಕ್ಸಿರ್ ಥಾವ್ನ್ಯ್ ಕೊಣೀ ದೆಂವ್ಲೆಂ ನಾ!
ಆನಿಂ ಕಿತೆಂ ತೊ ಡೋರ್ಮ್ಯಾನ್ ದಾರಾಕ್ ಸೊಡುನ್ ಟ್ಯಾಕ್ಸಿ ತೆವ್ಶಿಂ ಮೆಟಾಂ ಕಾಡ್ತಾ ಮ್ಹಣ್ತಾನಾ,
ಉಭಿ ಜಾಲ್ಲ್ಯಾ ಟ್ಯಾಕ್ಸಿಚಾ ಪಾಟ್ಲ್ಯಾನ್ ಧವ್ಯಾ ರಂಗಾಚೆಂ ಏಕ್ ಹುಂದಾಯ್ ಕಾರ್ ಯೇವ್ನ್ ರಾವ್ಲೆಂ.
ಹೆಂ ಪಳೆಲ್ಲ್ಯಾ ತ್ಯಾ ಡೋರ್ಮ್ಯಾನಾನ್ ಆಪ್ಲ್ಯಾ ಹಾತಾನ್ ತ್ಯಾ ಟ್ಯಾಕ್ಸಿಕ್ ಮುಕಾರ್ ವಚೊಂಕ್ ಹಿಶಾರೊ ಕೆಲೊ. ತಾಚ್ಯಾ ಹಿಶಾರ್ಯಾಕ್ ಸಾಂಗಾತ್ ದೀವ್ನ್ ಪಾಟ್ಲ್ಯಾ ಹುಂದಾಯ್ ಕಾರಾನ್ ಆಪ್ಲೆಂ ಹಾರನ್ ಮಾರ್ಲೆಂ!
ತಿತ್ಲೆಂಚ್!
ಟ್ಯಾಕ್ಸಿ ಡ್ರೈವರಾನ್ ಆಪ್ಲೆಂ ದಾರ್ ಉಗ್ತೆಂ ಕೆಲೆಂ ಆನಿ ತೊ ಸಕಯ್ಲ್ ದೆಂವ್ಲೊ.
ಪಾಟಾಪಾಟ್ ತಾಣೆಂ ಆತಾಂ ಆಪ್ಲ್ಯಾ ಟ್ಯಾಕ್ಸಿಚೆಂ ಪಾಟ್ಲೆಂ ದಾರ್ ಉಗ್ತೆಂ ಕೆಲೆಂ.
ಆನಿ ಆಬ್ಳೆ!
ಉಗ್ತೆಂ ಜಾಲ್ಲ್ಯಾ ದಾರಾ ಮುಕಾಂತ್ರ್ ಸಕಯ್ಲ್ ದೆಂವ್ಲೊ ಏಕ್ ನಾಜೂಕ್, ಬಾರೀಕ್, ಧವೊ ಧವೊ ಗೊರ್ಸಾಣೆಂತ್ ಉಜ್ವಳ್ಚೊ ಪಾಂಯ್! ಹೈ ಹೀಲ್ಡ್ ಬ್ರೌನ್ ರಂಗಾಚಾ ವ್ಹಾಣಾ ಸವೆಂ!
ತಾಚ್ಯೆ ಪಾಟ್ಲ್ಯಾನ್ ದುಸ್ರೊ ಪಾಂಯ್!
ಆನಿ ಆತಾಂ!
ಪಾಂಯಾಂ ವಯ್ರ್ ಆಸ್ಲ್ಲಿ ತ್ಯಾ ಡೋರ್ಮ್ಯಾನಾಚಿ ನದರ್ ತ್ಯಾ ಪಾಂಯಾಂ ಥಾವ್ನ್ ಸವ್ಕಾಸ್ ವಯ್ರ್ ವಯ್ರ್ ಚಡ್ತಾನಾ ಟ್ಯಾಕ್ಸಿರ್ ಥಾವ್ನ್ ದೆಂವ್ಲೆಂ ಏಕ್ ಸೊಭಿತ್ ಚಲಿ! ಜ್ಯಾ ಚಲಿಯೆಕ್ ಪಳವ್ನ್ ಎಕಾ ಖಿಣಾಕ್ ಸಂಸಾರ್ ವಿಸ್ರಾಲ್ಲೊ ತೊ ದಾರಾ ವಯ್ಲೊ ವ್ಯಕ್ತಿ ತಶೆಂಚ್ ತ್ಯಾ ಟ್ಯಾಕ್ಸೆರ್ ಥಾವ್ನ್ ದೆಂವ್ಲ್ಲ್ಯಾ ಚಲಿಯೆಕ್ ಪಳವ್ನ್ ರಾವ್ತಾನಾ, ಟ್ಯಾಕ್ಸಿ ಡ್ರೈವರಾನ್ ಟ್ಯಾಕ್ಸಿಚಿ ಡಿಕ್ಕಿ ಉಗ್ತಿ ಕರುನ್ ತ್ಯಾ ಡಿಕ್ಕಿ ಭಿತರ್ ಥಾವ್ನ್ ಏಕ್ ವ್ಹಡ್ಲಿ ಸೂಟ್ಕೇಸ್ ಆನಿ ಏಕ್ ಹ್ಯಾಂಡ್ ಬ್ಯಾಗ್ ಟ್ಯಾಕ್ಸೆರ್ ಥಾವ್ನ್ ಸಕಯ್ಲ್ ದೆಂವಯ್ಲೆಂ.
ಸೂಟ್ಕೇಸ್ ಆನಿ ತೆಂ ಹ್ಯಾಂಡ್ ಬ್ಯಾಗ್ ಪಳವ್ನ್ ಆತಾಂ ತೊ ಹೊಟೆಲಾಚೊ ಡೋರ್ ಮ್ಯಾನ್ ಟ್ಯಾಕ್ಸಿ ತೆವ್ಶಿಂ ಆಯ್ಲೊ.
ಸೂಟ್ಕೇಸ್ ಆನಿ ತ್ಯಾ ಹ್ಯಾಂಡ್ ಬ್ಯಾಗಾಕ್ ಏರ್ಪೋರ್ಟಾಂತ್ ಸೆಕ್ಯೂರಿಟಿ ಚೆಕ್ ಕರಯಿಲ್ಲೆ ಟ್ಯಾಗ್ ಉಮ್ಕಾಳ್ತಾಲೆ!
ಟ್ಯಾಕ್ಸಿಚಾ ಪಾಟ್ಲ್ಯಾನ್ ರಾವೊನ್ ಪಯ್ಲೆಂ ಹಾರನ್ ಮಾರ್ಲ್ಲೆಂ ತೆಂ ಹುಂದಾಯ್ ಕಾರ್ ಆಪ್ಣಾಚಾ ತಾಳ್ಯಾಕ್ ಆರ್ ಮಾರ್ಲೆಲ್ಯಾ ಪರಿಂ ಮೌನ್ ಜಾವ್ನ್ ಆಪ್ಣಾ ಮುಕಾರ್ ಉಭೆಂ ಆಸ್ಲ್ಲ್ಯಾ ಸರ್ಗಾ ಥಾವ್ನ್ ದೆಂವೊನ್ ಆಯ್ಲೆಲ್ಯಾ ಪರಿಂ ದಿಸ್ಚ್ಯಾ ತ್ಯಾ ಅಪ್ಸರಾಕ್ ಪಳವ್ನ್ ಥಂಡ್ ಜಾಲ್ಲೆಂ.
ಆಪ್ಣಾ ಸರ್ಶಿನ್ ಚಲೊನ್ ಆಯಿಲ್ಲ್ಯಾ ಹೊಟೆಲಾಚಾ ಡೋರ್ ಮ್ಯಾನಾಕ್ ಪಳವ್ನ್ಯ್ ಪಳಯ್ನಾತ್ಲ್ಲ್ಯಾ ಪರಿಂ ಕೆಲ್ಲ್ಯಾ ತ್ಯಾ ಟ್ಯಾಕ್ಸೆರ್ ಥಾವ್ನ್ ದೆಂವ್ಲೆಲ್ಯಾ ಚಲಿಯೆನ್ ಮುಕಾರ್ ಮೆಟಾಂ ಕಾಡ್ಲಿಂ.
ತಿತ್ಲ್ಯಾರ್!
ಸೂಟ್ಕೇಸ್ ಆನಿ ಹಾಂಡ್ ಬ್ಯಾಗ್ ದೆಂವಯಿಲ್ಲಿ ಟ್ಯಾಕ್ಸಿ ಮುಕಾರ್ ಚಲ್ಲಿ.
"ಗುಡ್ ಈವ್ನಿಂಗ್ ಮ್ಯಾಡಮ್!"
ಡೋರ್ ಮ್ಯಾನಾನ್ ನಮಾನ್ ಕೆಲೊ.
ತಿತ್ಲೆಂಚ್!
ದೊಳ್ಯಾಂಕ್ ಚಡಯ್ಲೆಲೆಂ ಗಾಗಲ್ ತಶೆಂಚ್ ದೊಳ್ಯಾಂಕ್ ದಾಂಬುನ್ ಖಾಂದಾರ್ ಹೆವ್ಶಿಂ ಗಳೊನ್ ರಾವ್ಲ್ಲ್ಯಾ ಆಪ್ಲ್ಯಾ ಕೆಸಾಂಕ್ ಪಾಟಿಂ ಕೆಲ್ಲ್ಯಾ ತ್ಯಾ ಚಲಿಯೆನ್ ತ್ಯಾ ಡೋರ್ ಮ್ಯಾನಾಚಾ ವಂದನಾಕ್ ಗುಮಾನ್ ಕೆಲೆಂ ನಾ. ತಿಣೆ ಆಪ್ಣಾಚಿ ಸೂಟ್ಕೇಸ್ ಉಕ್ಲೊಂಕ್ ಪ್ರಯತ್ನ್ ಕೆಲೆಂ.
"ತುಮಿಂ ಭಿತರ್ ವಚಾ ಮ್ಯಾಡಮ್..... ಲಗ್ಗೇಜ್ ಹಾಂವ್ ಘೆವ್ನ್ ಯೆತಾಂ!" ಡೋರ್ ಮ್ಯಾನ್ ಆತಾಂ ನಮ್ರತಾಯೆನ್ ಮ್ಹಳ್ಳ್ಯಾಪರಿಂ ಉಲಯ್ಲೊ.
"ತುಜೆಂ ಕಾಮ್ ತುವೆಂ ತುಜ್ಯಾ ಕಾಳ್ಜಾಕ್ ಮಾನ್ವೊಂಚಾ ಪರಿಂ ಕರುಂಕ್ ಜಾಯ್! ಸಮ್ಜಾಲೆಂ....? ತುಂ ಹ್ಯಾ ಹೊಟೆಲಾಕ್ ಸಂಸಾರಾ ಮುಕಾರ್ ರೆಪ್ರೆಸೆಂಟ್ ಕರ್ತಾಯ್! ಮ್ಹಳ್ಯಾರ್ ತುಂ ಇಂಡಿಯಾಕ್ ರೆಪ್ರೆಸೆಂಟ್ ಕರ್ತಾಯ್! ಆನಿ ಸಂಸಾರಾ ಮುಕಾರ್ ಇಂಡಿಯಾಚಾ ಹಾಸ್ಪಿಟಾಲಿಟಿಕ್ ಮಾನ್ ಆಸಾ!" ತ್ಯಾ ಚಲಿಯೆಚ್ಯಾ ತೊಂಡಾ ಥಾವ್ನ್ ತೀಕ್ಶ್ಣ್ ಉತ್ರಾಂ ಉಸಾಳ್ಳಿಂ.
ಡೋರ್ ಮ್ಯಾನಾಕ್ ಆಪ್ಲಿ ಚೂಕ್ ಸಮ್ಜಾಲಿ.
"ಸಾರ್ರಿ ಮ್ಯಾಡಮ್!" ಆಪ್ಲಿ ನದರ್ ತಾಣೆಂ ಭಾಗಾಯ್ಲಿ.
ತೆಂ ಚಲಿ ಆತಾಂ ಸವ್ಕಾಸ್ ಹೊಟೆಲಾಚಿಂ ಮೆಟಾಂ ಚಡೊಂಕ್ ಲಾಗ್ಲೆಂ!
ತಿತ್ಲ್ಯಾರ್ ಪಾಟ್ಲ್ಯಾನ್ ಥಾವ್ನ್ ವೆವೆಗ್ಗಿ ಆಯಿಲ್ಲ್ಯಾ ತ್ಯಾ ಡೋರ್ ಮ್ಯಾನಾನ್ ದಾರ್ ಉಗ್ತೆಂ ಕರ್ತಾನಾ ತೆಂ ಚಲಿ ಹೊಟೆಲಾ ಭಿತರ್ ರಿಗ್ಲೆಂ.
ಮುಕಾರ್ ಆಸ್ಲ್ಲೊ ರಿಸೆಪ್ಶನ್ ಕೌಂಟರ್. ತಿ ಆತಾಂ ರಿಸೆಪ್ಶನಾ ತೆವ್ಶಿ ಚಲೊಂಕ್ ಲಾಗ್ಲಿ.
ತ್ಯಾ ಚಲಿಯೆನ್ ಚಲ್ತಾನಾ ಜಾಂವ್ಚ್ಯಾ ತ್ಯಾ ಹೈ ಹೀಲ್ಡ್ ವ್ಹಾಣಾಂಚಾ ’ಟಕ್ ಟಕ್’ ಆವಾಜಾಂತ್ಚ್ ಇತ್ಲೆಂ ಆಮಾಲ್ ಆಸ್ಲ್ಲೆಂ ಕೀ ತೊ ಆವಾಜ್ ಸವ್ಕಾಸ್ ಉಗ್ತೆಂ ಜಾಂವ್ಚ್ಯಾ ಸರ್ಗಾಚ್ಯಾ ದಾರಾಚಿ ನಿಶಾನಿ ಮ್ಹಳ್ಳ್ಯಾ ಪರಿಂ!
ತಿಣೆಂ ಚಲ್ತಾನಾ ಆಯ್ಕೊನ್ ಯೆಂವ್ಚ್ಯಾ ತಿಚ್ಯಾ ವ್ಹಾಣಾಂಚಾ ಮಾದಕ್ ಆವಾಜಾಕ್ ಭುಲೊನ್, ತ್ಯಾ ರಿಸೆಪ್ಶನಾ ಮುಕ್ಲ್ಯಾ ಸೊಫಾಂಚಾ ವಯ್ರ್ ಬಸ್ಲೆಲ್ಯಾ ಹರ್ಯೆಕ್ಲ್ಯಾಂಚಿ ನದರ್ ಉಟೊನ್ ತ್ಯಾ ಚಲಿಯೆ ವಯ್ರ್ ವಚಾನಾಸ್ತಾನಾ ರಾವ್ಲಿ ನಾ.
ತ್ಯಾ ಚಲಿಯೆಚೆಂ ಚಲಾಪ್ಚ್ ತಶೆಂ ಆಸ್ಲ್ಲೆಂ ಕೀ ಚಾರ್ ವೊಂಟಾಂ ಮಧ್ಲ್ಯಾ ಎಕಾ ವಾಯ್ನಾಚಾ ಗ್ಲಾಸಾಂತ್ಲೊ ವಾಯ್ನ್ ಹಳ್ಟಾರ್ ತ್ಯಾ ವೊಂಟಾಂಚಾ ಉಭೆಕ್ ಚಡಯ್ತಾ ತಶೆಂ.
"ಗುಡ್ ಈವ್ನಿಂಗ್ ಮ್ಯಾಡಮ್!"
ರಿಸೆಪ್ಶನಾಂತ್ಲೆಂ ಚಲಿ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡವ್ನ್ ವಂದನ್ ಕರಿಲಾಗ್ಲೆಂ. ತ್ಯಾ ಹಾಸ್ಯಾಂನಿ ಅರ್ಥ್ ದಿಸಾನಾತ್ಲ್ಲೊ. ಫಕತ್ತ್ ಆಪ್ಲಿ ಡ್ಯೂಟಿ ಆಪ್ಣೆ ಕರ್ಚಿ ಮ್ಹಳ್ಳ್ಯಾ ರಿತಿಚ್ಯೊ ಕೃತಕ್ ಹಾಸೊ.
"ಮ್ಹಾಕಾ ಏಕ್ ವಿ.ಐ.ಪಿ. ಸೂಟ್ ಜಾಯ್!" ಹೊಟೆಲಾ ಭಿತರ್ ಆಯಿಲ್ಲೆಂ ಚಲಿ ಉಲಯ್ಲೆಂ.
"ಖಂಡಿತ್ ಮ್ಯಾಡಮ್! ತುಕಾ ಖಂಯ್ಚೆಂ ಪಸಂದ್ ಆಸಾ?"
ದೊಗಾಂಯ್ ಮಧೆಂ ಆತಾಂ ಉಲೊಣೆಂ ಆರಂಭ್ ಜಾವ್ನ್ ತೆಂ ಚಲಿ ಎಕಾ ನಿರ್ಧಾರಾಕ್ ಪಾವ್ತಾನಾ,
"ತುಜೆಂ ನಾಂವ್ ಆನಿ ಎಡ್ರೆಸ್ ಮ್ಯಾಡಮ್....?" ರಿಸೆಪ್ಶನಿಶ್ಟಾನ್ ತ್ಯಾ ಚಲಿಯೆಚಾ ತೊಂಡಾಕ್ ಪಳೆಲೆಂ.
"ನಾಂವ್.....?" ತ್ಯಾ ಚಲಿಯೆನ್ ಥೊಡೆಂ ಚಿಂತ್ಲೆಂ. ಉಪ್ರಾಂತ್....,
"ಆಲಿಯಾ!" ಉದ್ಗಾರ್ಲೆಂ ತೆಂ.
"ಸೆಕೆಂಡ್ ನೇಮ್ ಯಾ ಸರ್ ನೇಮ್....?" ಪರ್ತ್ಯಾಕ್ ತ್ಯಾ ರಿಸೆಪ್ಶನಿಶ್ಟಾನ್ ಆಲಿಯಾಕ್ ಪಳೆಲೆಂ.
"ಊಂ..... ಆಲಿಯಾ ಖಾನ್! ದೆಟ್ಸಾಲ್!"
"ಎಡ್ರೆಸ್......?"
"ವಂದನಾ ಅಪಾರ್ಟ್ಮೆಂಟ್ಸ್, ಸೆಕೆಂಡ್ ಲೇನ್, ಎಸ್.ಪಿ ರೋಡ್, ಗಾಂಧಿ ಚೌಕ್, ನ್ಯೂ ಡೆಲ್ಲಿ!"
"ಥ್ಯಾಂಕ್ ಯು ಮ್ಯಾಡಮ್!" ರಿಸೆಪ್ಶನಿಶ್ಟ್ ಹಾಸ್ಲೆಂ.
ರಿಸೆಪ್ಶನಾಂತ್ ಜಾಂವ್ಕ್ ಜಾಯ್ ಆಸ್ಲ್ಲ್ಯಾ ಫಾರ್ಮಾಲಿಟಿಸಾಂಕ್ ರಿಸೆಪ್ಶನಿಶ್ಟಾನ್ ಪೂರ್ಣ್ ಕರ್ತಚ್ ತಾಣೆಂ ಎಕಾ ರೂಮ್ ಬಾಯಾಕ್ ಆಪವ್ನ್ ತಾಕಾ ಕಿತೆಂ ಸಾಂಗೊಂಕ್ ಜಾಯ್ ಆಸ್ಲ್ಲೆಂ ತೆಂ ಸಾಂಗೊನ್ ಏಕ್ ಚಾವಿ ಕಾಡುನ್ ತಾಣೆಂ ರೂಮ್ ಬಾಯಾಚಾ ಹಾತಿಂ ದಿಲಿ.
ರೂಮ್ ಬಾಯಾನ್ ಆಲಿಯಾಚಿ ಸೂಟ್ ಕೇಸ್ ಆನಿ ಹ್ಯಾಂಡ್ ಬ್ಯಾಗ್ ಹಾತಿಂ ಘೆತ್ಲೆಂ ಆನಿ ತಿಂ ಲಿಫ್ಟಾ ತೆವ್ಶಿಂ ಚಮ್ಕಾಲಿಂ.
ಸೊಭಿತ್ ಡೆಕೊರೇಟ್ ಕೆಲ್ಲೆಂ ಲಿಫ್ಟ್ ದೊಗಾಂಯ್ಕ್ಯ್ ಘೆವ್ನ್ ವಯ್ರ್ ಚಲ್ಲೆಂ.
ಲಿಫ್ಟಾ ಥಾವ್ನ್ ಭಾಯ್ರ್ ಯೇವ್ನ್ ಮುಕ್ಲ್ಯಾ ಲಾಂಬ್ ಕಾರಿಡಾರಾಚೆರ್ ಚಲೊನ್ ವಚೊನ್ ತ್ಯಾ ನಿಮಾಣ್ಯಾ ರುಮಾಚಾ ದಾರಾ ಫುಡೆಂ ಉಭೊ ಜಾಲೊ ರೂಮ್ ಬಾಯ್.
ಆಲಿಯಾ ತಶೆಂಚ್ ತ್ಯಾ ಕಾರಿಡಾರಾಚಾ ಸೊಭಾಯೆಕ್ ಪಳಂವ್ಕ್ ಲಾಗ್ಲೆಂ.
ರೂಮ್ ಬಾಯ್ ದಾರ್ ಉಗ್ತೆಂ ಕರುನ್ ದಿತಾನಾ ಪಯ್ಲೆಂ ಆಲಿಯಾ ರುಮಾ ಭಿತರ್ ರಿಗ್ಲೆಂ. ತಾಚ್ಯೆ ಸವೆಂ ರೂಮ್ ಬಾಯಾನ್ ವೀಜ್ ದಿವೆ ಜಳಯ್ತಾನಾ ಆಲಿಯಾ ಕಿತೆಂ ಪಳಯ್ತೆಲೆಂ?
"ಸೂಪರ್ಬ್!"
"ಮ್ಯಾಡಮ್..., ತುಕಾ ಕಿತೆಂಯ್ ಆತಾಂ ಜಾಯ್ ಆಸ್ಲ್ಲೆಂ?" ಆಲಿಯಾಚಿ ಸೂಟ್ ಕೇಸ್ ಆನಿ ಹ್ಯಾಂಡ್ ಬ್ಯಾಗ್ ರುಮಾ ಭಿತರ್ ದವರುನ್ ರೂಮ್ ಬಾಯಾನ್ ವಿಚಾರ್ಲೆಂ.
"ವೊರಾಂ ಸಾಡೆ ಸ ಜಾತಾ ವರೇಗ್ ಮ್ಹಾಕಾ ಡಿಸ್ಟರ್ಬ್ ಕರಿನಾಕಾ. ಹಾಂವ್ ಪಯ್ಣಾ ಥಾವ್ನ್ ಮಸ್ತ್ ಥಕ್ಲ್ಯಾಂ. ಆತಾಂ ಮ್ಹಾಕಾ ರೆಸ್ಟ್ ಕರುಂಕ್ ಜಾಯ್. ಮ್ಹಾಕಾ ಕಾಂಯ್ ಗರ್ಜ್ ಪಡಾತ್ ಜಾಲ್ಯಾರ್ ಹಾಂವ್ ತುಕಾ ಆಪಯ್ತಾಂ!"
"ಎಸ್ ಮ್ಯಾಡಮ್! ತುಕಾ ಕೊಣ್ಚ್ ಹಾಂಗಾ ಮ್ಹಜ್ಯಾ ವಿಣೆ ಡಿಸ್ಟರ್ಬ್ ಕರಿಸೊ ನಾ. ತುವೆಂ ರೆಸ್ಟ್ ಘೆವ್ಯೆತ್! ತುಕಾ ಕಿತೆಂಯ್ ಗರ್ಜ್ ಪಡಾತ್ ಜಾಲ್ಯಾರ್ ಮ್ಹಾಕಾ ಆಪವ್ಣೆ ದೀ. ಇಂಟರ್ಕಾಮಾಚ್ಯಾ ನಂಬರಾಂಚೆಂ ಇನ್ಫಾರ್ಮೇಶನ್ ಪೊನಾಲಾಗಿಂ ಆಸಾ!" ರೂಮ್ ಬಾಯ್ ಭಾಯ್ರ್ ಚಲ್ಲೊ.
ಆಲಿಯಾನ್ ರುಮಾಚೆಂ ದಾರ್ ದಾಂಪ್ಲೆಂ.
ಹೊಟೆಲಾಚಾ ಸೊಭಾಯೆ ಮುಕಾರ್ ತಾಕಾ ಆತಾಂ ಏಕ್ ಚಾಲೆಂಜ್ ಆಸ್ಲ್ಲೆಂ.
"ಹೆಂ ಚಾಲೆಂಜ್ ಆಪ್ಣಾಕ್ ಜಿಕಯ್ತ್.....?" ಆಲಿಯಾಚಾ ಮತಿಂತ್ ದುಬಾವ್ ಉದೆಲೊ.
ಪುಣ್, ತೊ ದುಬಾವ್ ಉದೆಲ್ಲ್ಯಾ ಪರಿಂಚ್ ಮಾಯಾಗ್ ಜಾಲೊ. ಆಲಿಯಾಕ್ ಆಪ್ಣಾ ವಯ್ರ್ ಅಪರಿಮಿತ್ ವಿಶ್ವಾಸ್! ಆಪ್ಲ್ಯಾ ವಯ್ರ್ ದವರ್ಲ್ಲೊ ವಿಶ್ವಾಸ್ ಆಪ್ಣಾಕ್ ಕೆದಿಂಚ್ ಸಲ್ವಾಯ್ನಾ ಮ್ಹಳ್ಳ್ಯಾಕ್ ಆಲಿಯಾನ್ ತಾಚ್ಯಾ ಜಿವಿತಾಂತ್ ಹಾಚ್ಯಾ ಆದಿಂ ಸಭಾರ್ ಪಾವ್ಟಿಂ ರುಜು ಕರುನ್ ದಾಕಯಿಲ್ಲೆಂ. ತಶೆಂಚ್ ಆಜ್ ತಾಕಾ ರುಜು ಕರುನ್ ದಾಕಂವ್ಕ್ ಆಸ್ಲ್ಲೆಂ. ಆಪ್ಲ್ಯಾ ವಿಶ್ವಾಸಾಕ್ ಆಪ್ಲ್ಯಾ ಫುಡಾರಾಚಾ ಜಯ್ತಾ ದಿಶಿಂ ಪಾವಂವ್ಕ್ ಆಸ್ಲ್ಲೆಂ. ಹ್ಯಾ ಖಾತಿರ್ ತೆಂ ಆತಾಂ ತಯಾರ್ ಜಾಲೆಂ. ತಾಚಿ ನದರ್ ಆಪ್ಣೆ ಹಾಡ್ಲೆಲ್ಯಾ ಆಪ್ಲ್ಯಾ ಸೂಟ್ ಕೇಸಿಚ್ಯಾ ವಯ್ರ್ ಗೆಲಿ.
ಹಾತಾಂತ್ಲೆಂ ವ್ಯಾನಿಟಿ ಬ್ಯಾಗ್ ಮುಕ್ಲ್ಯಾ ಟೀಪಾಯಿಚೆರ್ ಉಡವ್ನ್ ತಾಣೆಂ ಸೂಟ್ಕೇಸ್ ಉಗ್ತಿ ಕೆಲಿ. ತಾಂತುಂ ತಾಣೆಂ ಕ್ರಾಪರ್ಡ್ ಮಾರ್ಕೆಟಿ ಥಾವ್ನ್ ಘೆತ್ಲೆಲ್ಯೊ ತ್ಯೊ ಸಗ್ಳ್ಯೊ ವಸ್ತು ಆಸ್ಲ್ಲ್ಯೊ.
ಉಗ್ತಿ ಕೆಲ್ಲ್ಯಾ ಸೂಟ್ ಕೇಸಿಂತ್ಲೊ ಬಾತ್ ಟವೆಲ್ ವಿಂಚುನ್ ಸಗ್ಳ್ಯಾಂ ಪ್ರಾಸ್ ಪಯ್ಲೆಂ ತೆಂ ನಾಂವ್ಕ್ ದೆಂವ್ಲೆಂ.
*************
ಕ್ಯಾನರಿ ಐಲ್ಯಾಂಡ್ಸಾಂ ಥಾವ್ನ್ ಮಾಲಾಗಾ! ಮಾಲಾಗ್ ಥಾವ್ನ್ ಇಬಿಜ಼ಾ! ಇಬಿಜ಼ಾ ಥಾವ್ನ್ ವಲೆನ್ಸಿಯಾ ಜಾವ್ನ್ ಮ್ಯಾಡ್ರಿಡ್!
ಹನಿಮೂನಾಚಾ ಪಂಚ್ವೀಸ್ ದಿಸಾಂನಿ ಮಿಶೆಲ್ ಕಾಂಯ್ ಥಕೊಂಕ್ ನಾತ್ಲ್ಲೆಂ. ತಾಚ್ಯಾ ಜಿವಾಂತ್ ಏಕ್ ನವೊ ಉಲ್ಲಾಸ್ ಆಸ್ಲ್ಲೊ. ತಾಚಿ ಮತ್ ಶಾಂತ್ ಆಸ್ಲ್ಲಿ. ಕುಡಿಂತ್ ತೃಪ್ತಿ ಭರೊನ್ ವೊಮ್ತಾತಾಲಿ. ಕಾಳ್ಜಾಕ್ ದಾದೊಸ್ಕಾಯ್ ಲಾಬ್ಲ್ಲಿ. ಆತ್ಮ್ಯಾಕ್ ಸುಶೆಗ್ ಮೆಳ್ಲ್ಲೊ!
ಕೂಡ್, ಮತ್ ಆನಿ ಆತ್ಮೊ... ಹ್ಯೊ ತೀನ್ಯ್ ಸಂಗ್ತಿ ರಾಯನಾಚಾ ತ್ಯಾ ಉಭಾಳ್ ವೆಂಗೆಂತ್ ಎಕಾಚ್ ಹಂತಾಚಾ ಸಮಾಸಮ್ ಸುಖಾಚಾ ಪಾಂವ್ಡ್ಯಾಕ್ ಪಾವ್ತಾನಾ ಮಿಶೇಲ್ ಸಂಸಾರಾಕ್ ವಿಸ್ರಾಲ್ಲೆಂ! ಎಕ್ಚ್ ಘಡಿ ತಿ!
ತ್ಯಾ ಘಡಿಯೆ, ಕೂಡ್, ಮತ್, ಆನಿ ಆತ್ಮೊ ತಾಂಚಾ ಶಾಂತೆಚ್ಯಾ ಸಮಾಸಮ್ ಹಂತಾಕ್ ಪಾವ್ತಾನಾ....!
ಮಿಶೇಲಾಕ್ ಆಪ್ಲ್ಯಾ ಭಿತರ್ ಕಸಲೆಂಗೀ ಸುಖಾಚೆಂ ಅಮ್ರತ್ ಉಮಾಳ್ಲ್ಲ್ಯಾ ಪರಿಂ ಜಾವ್ನ್ ತಾಕಾ ತ್ಯಾ ವಾರ್ಯಾರ್ ಆಪುಣ್ ಉಪ್ಯೆತಾಂ ತಶೆಂ ಭೊಗ್ತಾಲೆಂ.
ಕೆದ್ನಾಂಚ್ ತಾಚ್ಯಾ ಜಿವಿತಾಂತ್ ಆಶೆಂ ತೆಂ ವಾರ್ಯಾರ್ ಉಭ್ಲ್ಲೆಂ ಭೊಗುಂಕ್ ನಾ.
ಪುಣ್!
ರಾಯನಾಚಾ ವೆಂಗೆಂತ್ ತೆಂ ಸಗ್ಳೆಂ ಸಾದ್ಯ್ ಜಾಲ್ಲೆಂ!
ಸ್ಪೇಯ್ನಾಂತ್ಲೆ ಹನಿಮೂನಾಚೆ ದೀಸ್ ತಾಣೆಂ ವಾರ್ಯಾರ್ ಉಬ್ಚ್ಯಾ ಅಸಲ್ಯಾಚ್ ಸುಖಾನ್ ಸಾರ್ಲ್ಲೆ ತರ್ಯ್ ಸ್ಪೇಯ್ನಾ ಥಾವ್ನ್ ಮುಂಬಯಿ ಪಾಂವ್ಚ್ಯಾ ಹ್ಯಾ ದೋನ್ ದಿಸಾಂಚಾ ಪಯ್ಣಾಂತ್ ತೆಂ ಥಕೊನ್ ಗೆಲ್ಲೆಂ.
ಎಕಾ ವಾಟೆನ್ ಇತ್ಲ್ಯಾಸೊಭಿತ್ ಗಾಂವಾಕ್ ಪಾಟಿಂ ಸೊಡುನ್ ವೆಚಿ ಖಂತ್ ಜಾಲ್ಯಾರ್ ದುಸ್ರ್ಯಾ ವಾಟೆನ್ ಆಪ್ಲ್ಯಾ ಗಾಂವಾಕ್ ಪಾಟಿಂ ವಚೊಂಕ್ ಜಾಯ್ ಮ್ಹಳ್ಳಿ ಆಶಾ!
ಹ್ಯಾ ಖಂತ್ ಆನಿ ಆಶೆ ಮಧೆಂ ಮಿಶೇಲಾಚಿ ಮತ್ಯ್ ಸಮತೋಲನ್ ನಾಸ್ತಾಂ ವದ್ದಾಡ್ತಾಲಿ.
ಕುಡಿಚ್ಯಾ ಸ್ಪಿರಿತಾಕ್ ಜಾಲ್ಯಾರ್ ಆಪ್ಣಾಕ್ ದಾಂಬುನ್ ದವರ್ಚಿ ಶಾಥಿ ಆಸಾ. ಪುಣ್ ಮತಿಚ್ಯಾ ಆನಿ ಕಾಳ್ಜಾಚ್ಯಾ ಸ್ಪಿರಿತಾಕ್ ದಾಂಬುನ್ ದವರ್ಚಿ ಶಾಥಿ ಆಪ್ಣಾಕ್ ನಾ ಮ್ಹಣೊನ್ ಮಿಶೇಲ್ ಖಂಡಿತ್ ಜಾಣಾಂ ಆಸ್ಲ್ಲೆಂ.
ಕುಡಿಚ್ಯಾ ವಿಶಿಂ ತಾಣೆಂ ತಾಚ್ಯಾ ಆಜ್ಯಾ ಆನಿಂ ಆಜಿಯೆಚ್ಯಾ ಗುಸ್ತಾರ್ಯ್ ಚಿಂತ್ಲ್ಲೆಂ ನಾ. ಪುಣ್ ತ್ಯಾ ವೆಳಾರ್ ತೆದ್ನಾಂ ತೆದ್ನಾಂ ಭಿಯೆಂವ್ಚ್ಯಾ ಮತಿಕ್ ಆನಿ ಆಕ್ಲಾಸ್ಚಾ ಕಾಳ್ಜಾಕ್ ಧಯ್ರ್ ಆನಿ ಭುಜಾವಣ್ ದೀಂವ್ಕ್ ಜಿಮ್ಮಿ ಆಸ್ಲ್ಲೊ.
ಹ್ಯಾ ವೆಳಾರ್ ಮಿಶೇಲಾಕ್ ತಾಚಿಂ ಮ್ಹಳ್ಳಿಂ ಸಗ್ಳಿಂ ಮುಂಬಯಿ ಥಾವ್ನ್ ಪಯ್ಸ್ ತ್ಯಾ ಮಂಗ್ಳುರಾಂತ್ ಆಸ್ಲ್ಲಿಂ. ಜಿಮ್ಮಿಯ್ ನಾತ್ಲ್ಲೊ. ಶೀತಲ್ಯ್ ನಾತ್ಲ್ಲೆಂ. ಆತಾಂ ತಾಕಾ ಸಾಂಗಾತ್ ದೀಂವ್ಕ್ ಸಕ್ಚೊ ಮ್ಹಳ್ಯಾರ್ ಫಕತ್ತ್ ರಾಯನ್ ಮಾತ್ರ್!
ರಾಯನಾಕ್ ಮಿಶೇಲಾ ಶಿವಾಯ್ ತಾಚೆಂ ಮ್ಹಳ್ಳೆಂ ಹ್ಯಾ ಮುಂಬಯಿಂತ್ ಕೊಣ್ಯ್ ನಾತ್ಲ್ಲೆಂ.
ತಾಣೆಂಚ್ ಆತಾಂ ಮಿಶೇಲಾಕ್ ಮತಿಚೆಂ ಧಯ್ರ್ ಆನಿ ಕಾಳ್ಜಾಕ್ ಭುಜಾವಣ್ ಜಾವ್ನ್ ರಾವೊಂಕ್ ಆಸ್ಲ್ಲೆಂ.
ರಾಯನಾಕ್ ಆಪ್ಲ್ಯಾ ವಿಂಚವ್ಣೆ ವಯ್ರ್ ಕಿತ್ಲೊ ಭರ್ವಸೊ ಆಸ್ಲ್ಲೊ ತಿತ್ಲೊಚ್ ತಾಚ್ಯಾಕ್ಯ್ ಚಡ್ ಮಾಫಾನ್ ಮಿಶೇಲಾಕ್ ಆಪ್ಣೆ ಆಪ್ಲೊ ಫುಡಾರ್ ಸಾರುಂಕ್ ಆಪ್ಣಾಕ್ಚ್ ಆಧೀನ್ ಕೆಲ್ಲ್ಯಾ ರಾಯನಾ ವಯ್ರ್ ಆಸ್ಲ್ಲೊ.
ಹ್ಯಾ ಭರ್ವಶ್ಯಾಕ್ ರಾಯನಾನ್ ಕೆದಿಂಚ್ ಮಿಶೇಲಾಚಾ ನದ್ರೆ ಮುಕಾರ್ ಉಣ್ಯಾಪಣಾಕ್ ಪಾವಯಿಲ್ಲೆಂ ನಾ.
ಹನಿಮೂನಾ ಥಾವ್ನ್ ಪಾಟಿಂ ಮುಂಬಯಿ ತಿಂ ಪಾವ್ತಾನಾ ಧನ್ಫಾರ್ ಜಾಲ್ಲೆಂ.
ಘರಾ ಪಾವ್ಲ್ಲ್ಯಾಫರಾ ದೊಗಾಂಯ್ ಥಂಡ್ ಉದ್ಕಾಂತ್ ನ್ಹಾಂವ್ನ್ ಭುಕೆಕ್ ಥೊಡೆಂ ಪೊಟಾಕ್ ಘಾಲುನ್ ನಿದೊಂಕ್ ಗೆಲಿಂ.
ಖಟ್ಲ್ಯಾರ್ ಕಶೆಂ ತಿಂ ಆಡ್ ಪಡ್ಲ್ಲಿಂ ತೆಂ ತಿಂಚ್ ನೆಣಾಂತ್! ದೋನ್ ದಿಸಾಂಚಾ ಪಯ್ಣಾ ಥಾವ್ನ್ ಥಕ್ಲ್ಲ್ಯಾ ಮತಿನ್ ಸಗ್ಳೆಂ ಚಿಂತ್ಚೆಂ ಸೊಡುನ್ ಆಪ್ಲೆ ದೊಳೆ ದಾಂಪ್ಲ್ಲೆ.
ಸಾಂಜ್ ಜಾತಾನಾ ರಾಯನ್ ನಿದೆ ಥಾವ್ನ್ ಪಯ್ಲೆಂ ಉಟ್ಲೊ. ಮಿಶೇಲ್ ಅಜೂನ್ ನಿದೆಂತ್ ಆಸ್ಲ್ಲೆಂ.
ಜಾಗ್ ಜಾಲ್ಲ್ಯಾ ರಾಯನಾಕ್ ಬೆಡ್ಡಾರ್ ಥಾವ್ನ್ ದೆಂವೊಂಕ್ ಮನ್ ಜಾಲೆಂ ನಾ.
ಉದಾರೊಚ್ ನಿದೊನ್ ವಯ್ಲ್ಯಾ ಸೀಲಿಂಗಾಕ್ ಪಳಂವ್ಚ್ಯಾ ತಾಚ್ಯಾ ದಿಶ್ಟೆಂತ್ ಸವ್ಕಾಸ್ ಶೂನ್ಯತಾ ಉದೆಲಿ. ತ್ಯಾ ಶೂನ್ಯತಾ ಭಾಯ್ರ್ ಏಕ್ ಸಂಸಾರ್ ಆಸಾ ಮ್ಹಳ್ಳ್ಯಾ ಪರಿಂ ರಾಯನಾಕ್ ಭೊಗ್ಲೆಂ.
ಆಪ್ಲ್ಯಾ ಹನಿ ಮೂನಾಚೊ ಸಂಸಾರ್!
ಆಪ್ಲ್ಯಾಚ್ ಹನಿಮೂನಾಚ್ಯೊ ಏಕೇಕ್ಚ್ ಘಡಿ, ಸವ್ಕಾಸ್ ವ್ಹಾಳೊನ್ ಯೆಂವ್ಚ್ಯಾ ವಾರ್ಯಾ ಪರಿಂ ತಾಚ್ಯಾ ಮತಿಚ್ಯಾ ಪಡ್ದ್ಯಾರ್ ವ್ಹಾಳೊನ್ ಯೇಂವ್ಕ್ ಲಾಗ್ಲ್ಯೊ.
ಕಿತ್ಲ್ಯೊ ಸೊಭಿತ್ ತ್ಯೊ ಘಡಿಯೊ!
ತ್ಯಾಚ್ ಘಡಿಯಾಂಚಾ ಘಡಿತಾಂನಿ ತಾಚಿ ಮತ್ ಆಪಾಲಿಪಾ ಖೆಳೊಂಕ್ ಲಾಗ್ಲಿ.
ಕಿತ್ಲೊ ಸೊಭಿತ್ ಖೆಳ್!
ಹಾಂವ್ ಆನಿ ಮಿಶೇಲ್!
ಫಕತ್ತ್ ದೊಗಾಂ!
ಸಗ್ಳ್ಯಾ ಸಂಸಾರಾರ್ಚ್ ದೊಗಾಂ ಮ್ಹಳ್ಳ್ಯಾ ಪರಿಂ!
ಆಪ್ಲ್ಯಾ ಹನಿಮೂನಾಚೊ ಗೋಡ್ ಉಡಾಸ್ ಅಪ್ಲ್ಯಾ ಮತಿ ಪಡ್ದ್ಯಾರ್ ನಾಚ್ತಾ ತಶೆಂ ರಾಯನಾಕ್ ದಿಸ್ತಾನಾ ತಾಚ್ಯಾ ಕಾಳ್ಜಾಂತ್ ಕಸಲಿಗೀ ಏಕ್ ಅವ್ಯಕ್ತ್ ಆಶಾ ಜಾಗಿ ಜಾಲಿ.
ತಿತ್ಲೆಂಚ್!
ವ್ಹಳೂ ತಾಣೆಂ ಹೆವ್ಶಿಂ ಘುಂವ್ ಮಾರ್ಲಿ.
ಹೆವ್ಶಿಂ ಮಿಶೇಲ್ ನಿದೆಚಾ ಸಂಸಾರಾಂತ್ ಸುಶೆಗಾತ್ ವಿಶೆವ್ ಘೆತಾಲೆಂ. ಆಪ್ಣಾಕ್ ಆನಿ ಹ್ಯಾ ಸಂಸಾರಾಕ್ ಕಾಂಯ್ಚ್ ಸಂಭಂಧ್ ನಾ ಮ್ಹಳ್ಳ್ಯಾಪರಿಂ!
ನಿದೆಂತ್ಲ್ಯಾ ಆಪ್ಲ್ಯಾ ಬಾಯ್ಲೆಕ್ ಪಳಯಿಲ್ಲ್ಯಾ ರಾಯನಾಕ್ ಹ್ಯಾ ವಗ್ತಾರ್ ತೆಂ ತಾಕಾ ಮಸ್ತ್ ಸೊಭಿತ್ ದಿಸ್ಲೆಂ. ಮಿಶೇಲಾಚಾ ಸೊಭಾಯೆಕ್ ತಶೆಂಚ್ ತೊ ಪಳವ್ನ್ ರಾವ್ಲೊ. ವ್ಹಳೂ ತಾಚ್ಯಾ ವೊಂಟಾನಿ ಹಾಸೊ ಉದೆಲ್ಯೊ. ತಾಕಾ ತೆಂ ಮಸ್ತ್ ಪಸಂದ್ ಜಾಲೆಂ.
ಆಪ್ಲ್ಯಾ ಬೊಟಾಂಕ್ ತಾಣೆ ಮಿಶೇಲಾಚಾ ಹಾತಾರ್ ಚರಯ್ಲಿಂ. ಮಿಶೇಲ್ ಬರೆಂಚ್ ನಿದೆಂತ್ ಆಸ್ಲ್ಲೆಂ. ತಾಕಾ ಜಾಗ್ ಜಾಲಿ ನಾ. ಭಿಲ್ಕುಲ್ ನೆಣ್ತ್ಯಾ ಭುರ್ಗ್ಯಾಪರಿಂ! ತೆಂಚ್ ನೆಣ್ತೆಂಪಣ್ ಹ್ಯಾ ವಗ್ತಾರ್ ಮಿಶೇಲಾಚಾ ತೊಂಡಾರ್ ಝಳ್ಕಾತಾಲೆಂ. ತಶೆಂಚ್ ತೆಂ ತಾಕಾ ಮಸ್ತ್ ಸೊಭಿತ್ ಮ್ಹಳ್ಳ್ಯಾ ಪರಿಂ ದಿಸ್ಲೆಂ. ತೊ ಮಿಶೇಲಾ ಸವೆಂ ತಶೆಂಚ್ ಖೆಳೊಂಕ್ ಆಶೆಲೊ.
ಮಿಶೇಲಾಚ್ಯಾ ಬೊಟಾಂಕ್ ತಾಣೆಂ ಮೆಜ್ಲೆಂ. ಮೆಜ್ತಾಂ ಮೆಜ್ತಾಂ ತ್ಯಾ ಬೊಟಾಂಕ್ ದೊಡ್ಲೆಂ.
ತಾಚ್ಯಾ ನಾಕ್ಶೆಕ್ ಆಪ್ಲ್ಯಾ ನಾಕ್ಶೆಂತ್ ಶಿರ್ಕಾವ್ನ್ ’ಟಕ್ ಟಕ್’ ಆವಾಜ್ ಕರುನ್ ತೊ ಖೆಳ್ಳೊ.
ತಳತಾ ವಯ್ಲ್ಯಾ ತಾಂಬ್ಶ್ಯಾ ರಗ್ತಾಳ್ಯಾ ಮೋವ್ ಮೋವ್ ಖಾತಿಕ್ ಚಿಮ್ಟ್ಯಾನಿ ಧರ್ಲೆಂ.
ಆಪ್ಲ್ಯಾ ಹಾತಾಚಿ ರುಂದಾಯ್ ಆನಿ ಮಿಶೇಲಾಚ್ಯಾ ಹಾತಾಚಿ ರುಂದಾಯ್ ಮೆಜ್ಲಿ.
ತಿತ್ಲ್ಯಾರ್!
ಆಪ್ಲೊ ಹಾತ್ ಹಾಲಯಿಲ್ಲ್ಯಾ ಮಿಶೇಲಾನ್ ಸವ್ಕಾಸ್ ಆಪ್ಲೆ ದೊಳೆ ಸೊಡ್ಲೆ.
ದೊಳೆ ಉಗ್ತೆ ಕೆಲ್ಲ್ಯಾ ಮಿಶೇಲಾಕ್ ರಾಯನ್ ಜಾಗೊ ಆಸಾ ತೆಂ ಕಳೊನ್ ಪರ್ತ್ಯಾಕ್ ತಾಣೆಂ ದೊಳೆ ದಾಂಪ್ಲೆ.
"ಡಾರ್ಲಿಂಗ್!"
ರಾಯನಾಚ್ಯಾ ಆಪವ್ಣೆಕ್ ಮಿಶೇಲಾನ್ ದೊಳೆ ಸೊಡ್ಚೆಂ ಪ್ರಯತ್ನ್ ಕೆಲೆಂ ನಾ.
ಆಪ್ಲ್ಯಾ ಬೊಟಾಂಕ್ ಚಿಮ್ಟೊ ಕರುನ್ ಸವ್ಕಾಸ್ ಮಿಶೇಲಾಚೆ ದೊಳೆ ಉಗ್ತೆ ಕರುಂಕ್ ತಾಣೆಂ ಪ್ರಯತ್ನ್ ಕೆಲೆಂ.
"ಊಂ.....!" ಮಿಶೇಲ್ ಪಿಂರ್ಗಾಲೆಂ ಮಾತ್ರ್.
"ಡಾರ್ಲಿಂಗ್....?" ಮಿಶೇಲಾಚಾ ವೊಂಟಾರ್ ರಾಯನಾನ್ ಆಪ್ಲೆಂ ಬೋಟ್ ಚರಯ್ಲೆಂ.
ಮಿಶೇಲ್ ಉಟ್ಲೆಂ ನಾ.
ಸವ್ಕಾಸ್ ರಾಯನಾಚೊ ಹಾತ್ ಆತಾಂ ಮಿಶೇಲಾಚಾ ಪೊಟಾರ್ ಚರ್ಲೊ.
ತ್ಯಾ ಸೊಭಿತ್ ಬೊಂಬ್ಲೆ ಭೊಂವಾರಿ ತಾಚಿಂ ಬೊಟಾಂ ಖೆಳೊಂಕ್ ಲಾಗ್ಲಿಂ.
ತಿತ್ಲ್ಯಾರ್!
ಎಕಾಚ್ಚ್ಫರಾ ದೊಳೆ ಸೊಡ್ಲ್ಲ್ಯಾ ಮಿಶೇಲಾನ್ ರಾಯನಾಚಾ ಆಪ್ಲ್ಯಾ ಪೊಟಾ ವಯ್ಲ್ಯಾ ಹಾತಾಕ್ ಧರ್ಲೆಂ.
ತಿತ್ಲೆಂಚ್!
ರಾಯನ್ ಆತಾಂ ಹೆವ್ಶಿಂ ಲೊಳ್ಳೊ.
ಸವ್ಕಾಸ್ ರಾಯನಾಚೆ ವೋಂಟ್ ಮಿಶೇಲಾಚಾ ಪೊಲ್ಯಾಕ್ ಉಮೊ ದೀವ್ನ್ ತಾಚ್ಯಾ ಗೊಮ್ಟೆರ್ ಬಸ್ಲೆ.
ಆಪ್ಲೆ ದೊನ್ಯ್ ಹಾತ್ ಮಿಶೇಲಾಚಾ ಪಾಟಿ ಪಂದಾ ರಿಗವ್ನ್ ತಾಚ್ಯಾ ದೊನ್ಯ್ ಖಾಂದಾಂಕ್ ಘಟ್ ಧರ್ಲೆಂ.
ಆತಾಂ ಮಿಶೇಲಾನ್ ಆಪ್ಲ್ಯಾ ಹಾತಾಂನಿ ರಾಯನಾಕ್ ವೆಡೊ ಮಾರ್ಲೊ. ತಾಕಾ ಆಪ್ಣಾ ತೆವ್ಶಿಂ ದಾಂಬುನ್ ಧರ್ಲೊ.
ತಿತ್ಲೆಂಚ್!
ಪರ್ತ್ಯಾಕ್ ದೋನ್ ಕುಡಿ, ದೋನ್ ಮತಿ, ಆನಿ ದೋನ್ ಆತ್ಮೆ ಏಕ್ ಜಾಂವ್ಕ್ ಆಯ್ತೆ ಜಾಲೆ.
ಮೊಗಾಚ್ಯಾ ಶಿಖರಾಕ್ ಚಡೊಂಕ್ ತಯಾರ್ ಜಾಲೆ.
ಶಿಖರಾ ಥಾವ್ನ್ ಉಡಿ ಮಾರುಂಕ್ ಆನಿ ವಾರ್ಯಾರ್ ಉಭೊಂಕ್!
ಸಂಸಾರಾಕ್ ವಿಸ್ರೊಂಕ್!
************
"ಡಾರ್ಲಿಂಗ್!"
ಏರ್ಕಂಡೀಶನಾಚ್ಯಾ ಥಂಡ್ ಹವ್ಯಾಂತ್ ಉಜ್ಯಾಚಾ ಧಾವೆಕ್ ಚಡ್ಲೆಲಿ ಮರ್ಕ್ಯುರಿ ಸವ್ಕಾಸ್ ಥಂಡ್ಸಾಣ್ ಘೆವ್ನ್ ದೆಂವೊನ್ ಯೆಂವ್ಚ್ಯಾ ಪರಿಂ ಆಪ್ಣೆ ಪಾವ್ಲೆಲ್ಯಾ ಸುಖಾಚಾ ಸಂಸಾರಾ ಥಾವ್ನ್ ಪಾಟಿಂ ಆಪ್ಲ್ಯಾ ವಾಸ್ತವೀಕ್ ಸಂಸಾರಾಕ್ ಪಾಟಿಂ ಯೆಂವ್ಚ್ಯಾ ಮಿಶೇಲಾಕ್ ರಾಯನಾಚೊ ತಾಳೊ ಆಯ್ಕಾಲೊ.
"ಡಾರ್ಲಿಂಗ್....?"
"ಊಂ........!"
ಖಾಟಿಯೆರ್ಚ್ ಲೊಳ್ಲ್ಲೆಂ ಮಿಶೇಲ್ ಥೊಡೆಂ ಪಿಂರ್ಗಾಲ್ಲೆಂ ತೆಂ ಆಪ್ಲೆ ದೊಳೆ ಉಗ್ತೆ ಕರ್ಚೆಂ ಪ್ರಯತ್ನ್ ಕರ್ತಾಲೆಂ. ಹನಿಮೂನಾ ಥಾವ್ನ್ ಆಯಿಲ್ಲ್ಯಾ ಥಕವ್ಣೆಕ್ ತಾಣೆಂ ಪಯ್ಲೆಂಚಾ ನಿದೆಂತ್ ಧಾಂವ್ಡಾಯಿಲ್ಲೆಂ ಜಾಲ್ಯಾರ್ಯ್ ತ್ಯಾ ಉಪ್ರಾಂತ್ಲ್ಯಾ ಮೊಗಾಚಾ ಖೆಳಾಚಾ ಥಕವ್ಣೆಂತ್ ತೆಂ ಸಂಪೂರ್ಣ್ ಥಕ್ಲ್ಲೆಂ.
"ಡಾರ್ಲಿಂಗ್?"
ಮಿಶೇಲ್ ಉಟೊಂಕ್ ನಾತ್ಲ್ಲೆಂ ಪಳವ್ನ್ ಖಾಟಿಯೆಚಾ ಲಾಗಿಂ ಆಯಿಲ್ಲ್ಯಾ ರಾಯನಾನ್ ಖಾಟಿಯೆರ್ ನಿದ್ಲೆಲ್ಯಾ ಮಿಶೇಲಾಚಾ ತೊಂಡಾಕ್ ಧರುನ್ ಹಾಲಯ್ಲೆಂ.
"ಮಿಶೇಲ್.....? ಹಾಂವ್ ಭಾಯ್ರ್ ವಚೊನ್ ಯೆತಾ!"
"ಖಂಯ್.....?" ಮಿಶೇಲಾನ್ ದೊಳೆ ಉಗಡ್ಲೆ.
"ಸಾವಂತಾಕ್ ಮೆಳೊಂಕ್ ಆಸಾ. ತಶೆಂಚ್ ಏಕ್ ನವೆಂ ಅಪಾಂಯ್ಟ್ಮೆಂಟ್ ಆಸಾ!"
"ಆಜ್ಚ್ ವಚೊಂಕ್ ಜಾಯ್...?" ರಾಯನಾನ್ ಆಪ್ಣಾಕ್ ಸೊಡುನ್ ವೆಚಿ ಮಿಶೇಲಾಕ್ ಖುಶಿ ನಾತ್ಲ್ಲಿ.
"ಮಿಶೇಲ್.......?" ರಾಯನ್ ಮಿಶೇಲಾಚಾ ಬಗ್ಲೆಕ್ ಖಾಟಿಯೆರ್ ಬಸ್ಲೊ. "ಪಂಚ್ವೀಸ್ ದೀಸ್ ಜಾಲೆ. ಹಾಂವ್ ಮುಂಬಯಿ ಥಾವ್ನ್ ಭಾಯ್ರ್ ಆಸೊನ್!" ರಾಯನಾನ್ ಮಿಶೇಲಾಚೊ ಹಾತ್ ಧರ್ಲೊ.
"ಕೆದಾಳಾ ಪಾಟಿಂ ಯೆತಾಯ್..?" ತೆಂ ತಶೆಂಚ್ ಪಿಂರ್ಗಾಲೆಂ.
"ವೆಗ್ಗಿಂ ಯೆತಾಂ ಸ್ವೀಟ್ ಹಾರ್ಟ್! ತುಕಾ ಸೊಡುನ್ ಹಾಂವ್ ಭಾಯ್ರ್ ರಾವ್ತಾಂ?" ತೊ ಮಿಶೇಲಾಚಾ ಹಾತಾ ತಾಳುವೆಕ್ ಪೊಶೆತಾಲೊ.
"ಓ.ಕೆ. ವೆಗ್ಗಿಂ ಯೇ ಮಾತ್ರ್!"
"ಶೂವರ್!" ತಾಣೆಂ ಮಿಶೇಲಾಚಾ ಹಾತಾಚೊ ಉಮೊ ಘೆತ್ಲೊ.
ತೊ ಆತಾಂ ಖಾಟಿಯೆರ್ ಥಾವ್ನ್ ಉಟ್ಲೊ.
ಬೆಡ್ರೂಮಾ ಭಾಯ್ರ್ ವಚೊಂಕ್ ತಾಣೆಂ ದೋನ್ ಮೆಟಾಂ ಕಾಡ್ಲ್ಯಾಂತ್ ಮಾತ್ರ್!
ತಿತ್ಲ್ಯಾರ್!
ಕಿತೆಂಗೀ ಉಡಾಸ್ ಆಯಿಲ್ಲ್ಯಾ ಪರಿಂ ಜಾವ್ನ್,
"ಮಿಶೇಲ್....?"
"ಊಂ......!"
"ಖಂಯ್ಚೆಂ ಕಾರ್ ವರುಂ....?"
"ಚವರ್ಲೆಟ್ ಜೀಪ್ ವ್ಹರ್! ತುಕಾ ತೆಂ ಬರೆಂ ದಿಸ್ತಾ!" ಮಿಶೇಲ್ ತಶೆಂಚ್ ಖಾಟಿಯೆರ್ ನಿದ್ಲ್ಲ್ಯಾ ಕಡೆನ್ ಹಾಸ್ಲೆಂ.
"ಬ್ಲ್ಯಾಕ್....?"
ರಾಯನ್ ಕಿತೆಂಗೀ ಸಾಂಗೊಂಕ್ ಆಶೆಲೊ ಜಾಲ್ಯಾರ್ಯ್ ತಾಚ್ಯಾ ಮತಿಕ್ ಕಸಲೊಗೀ ಭರ್ವಸೊ ಉದೆಲೊ. ಆಪ್ಲ್ಯಾ ಬಾಯ್ಲೆಚಾ ಉತ್ರಾ ವಯ್ರ್ ತಾಕಾ ಧಯ್ರ್ ಮೆಳ್ಳೆಂ. ಬ್ಲ್ಯಾಕ್ ಚವರ್ಲೆಟ್ ಜೀಪ್ ಘೆವ್ನ್ ರಾಯನ್ ಘರಾ ಥಾವ್ನ್ ಭಾಯ್ರ್ ಪಡ್ಲೊ.
ಚವರ್ಲೆಟಾಕ್ ಗ್ಯಾರೇಜಿ ಥಾವ್ನ್ ಭಾಯ್ರ್ ಕಾಡ್ತಾನಾ ಆಪ್ಣಾಚೆಂ ಚಡ್ ಮೊಗಾಚೆಂ ಟೊಯೊಟಾ ಲ್ಯಾಂಡ್ಕ್ರೂಸರ್ ಜೀಪ್ ಆಜ್ ಆಪ್ಣಾಕ್ ಪಳವ್ನ್ ರಡ್ತಾ ತಶೆಂ ರಾಯನಾಕ್ ಭೊಗ್ಲೆಂ.
"ಸಾರ್ರಿ ಡಾರ್ಲಿಂಗ್!" ಲ್ಯಾಂಡ್ಕ್ರೂಸರಾಕ್ ಪಳವ್ನ್ ರಾಯನಾಚಾ ವೊಂಟಾರ್ ಹಾಸೊ ಉದೆಲ್ಯೊ.
ಚವರ್ಲೆಟಾಕ್ ಗ್ಯಾರೇಜಿ ಥಾವ್ನ್ ಭಾಯ್ರ್ ಕಾಡುನ್ ತಾಕಾ ರಸ್ತ್ಯಾಕ್ ದೆಂವಯ್ತಾನಾ ಆಪ್ಲ್ಯಾ ವೊಚಾ ವಯ್ರ್ ತಾಣೆಂ ನದರ್ ಮಾರ್ಲಿ. ಎದೊಳ್ ಆಪ್ಣೆ ಆಪ್ಲ್ಯಾ ಆಫೀಸಾಕ್ ಪಾವೊಂಕ್ ಜಾಯ್ ಆಸ್ಲ್ಲೆಂ. ಸಾವಂತ್ ಬೋವ್ಶಾ ಆಪ್ಣಾಕ್ ರಾಕ್ತಾ ಆಸ್ತಲೊ! ತಾಚ್ಯಾ ಮತಿಂತ್ ಚಿಂತ್ನಾಂ ಉದೆಲಿಂ.
ರಾಯನಾನ್ ಫಕತ್ತ್ ಪಂದ್ರಾ ಮಿನುಟಾಂಚೆಂ ಡ್ರೈವಿಂಗ್ ಕೆಲಾಂ ಮಾತ್ರ್!
ತಿತ್ಲ್ಯಾರ್!
ತಾಚೆಂ ಸೆಲ್ಪೋನ್ ಆವಾಜುಂಕ್ ಲಾಗ್ಲೆಂ.
"ಹಾಂ ಸಾವಂತ್!" ರಾಯನಾನ್ ಪೋನ್ ಆನ್ ಕೆಲೆಂ. "ಕಿತೆಂ ನಿವ್ಸ್....?" ರಾಯನಾಚಾ ತಾಳ್ಯಾಂತ್ ಆತುರಾಯ್ ಆಸ್ಲ್ಲಿ.
"ಬರೆಂ ಕಾಂಯ್ ದಿಸಾನಾ!" ಸಾವಂತಾಚೊ ತಾಳೊ ತಗ್ಸಾಲ್ಲೊ.
"ಕಿತ್ಯಾಕ್? ಕಿತೆಂ ಜಾಲೆಂ...?"
"ತೆಂ ತಯಾರ್ ಜಾಯ್ನಾಂ ರಾಯನ್!"
"ಕಿತ್ಯಾಕ್ ಖಾತಿರ್......?"
"ತಾಚಿ ಭಲಾಯ್ಕಿ ಬರಿ ನಾ ಮ್ಹಣ್ತಾ ತೆಂ.... ದೆಕುನ್ ಸ ಮಯ್ನೆ....!"
"ಸ ಮಯ್ನೆ?" ರಾಯನ್ ಆಶ್ಚರ್ಯಾನ್ ಉದ್ಗಾರ್ಲೊ.
"ಮ್ಹಾಕಾ ದಿಸ್ತಾ ತುವೆಂಚ್ ತಾಚ್ಯೆ ಲಾಗಿಂ ಉಲವ್ನ್ ಪಳೆಲ್ಯಾರ್ ಬರೆಂ!"
"ತೆಂ ತುಜೆಂ ಕಾಮ್ ಸಾವಂತ್! ಆಪ್ಟರಾಲ್ ತೆಂ ಏಕ್ ಆಕ್ಟ್ರೆಸ್! ತೆಂ ಖಂಯ್? ಹಾಂವ್ ಖಂಯ್? ಹ್ಯಾ ಇಂಡಸ್ಟ್ರಿಂತ್ ತೆಂ ಹ್ಯಾ ವಗ್ತಾರ್ ಚಲ್ತಾ ಮ್ಹಣೊನ್ ಮಾತ್ರ್ ಹಾವೆಂ ತಾಕಾ ಮರ್ಯಾದ್ ದಿಂವ್ಚಿ. ಹಾವೆಂ ಮನ್ ಕೆಲ್ಯಾರ್ ತಾಚೆ ತಸಲ್ಯಾ ಧಾ ಹಿರೊಯಿನಾಂಕ್ ಹಾಂವ್ ಫಾಲ್ಯಾಂ ತುಜ್ಯಾ ಸಾಮ್ಕಾರ್ ಉಭೆಂ ಕರುಂಕ್ ಸಕ್ತಾಂ! ಪುಣ್ ಎದೊಳ್ ತುವೆಂ ಥೊಡೆಂ ಕಾಮ್ ಕೆಲಾಂಯ್ ಮ್ಹಣ್ತಾನಾ.....!"
"ತಾಕಾ ಹಾವೆಂ ಜಾತಾ ತಿತ್ಲೆಂ ಸಮ್ಜಾಯ್ಲೆಂ! ತೆಂ ತಯಾರ್ ನಾ ಜಾಲ್ಯಾರ್ ಹಾವೆಂ.....!"
"ದುಬಾಯ್ ಥಾವ್ನ್ ಏಕ್ ಪೋನ್ ಯೇತ್ ಜಾಲ್ಯಾರ್ ಆತಾಂಚ್ ತೆಂ ಧಾವೊಂಕ್ ಆಸಾ! ಎನಿ ಹೌ...."
"ಇಕ್ಬಾಲ್ ಭಾಯಿನ್ ಪೋನ್ ಕೆಲ್ಲೆಂ! ತೊ ಜಾಯ್ ಜಾಲ್ಯಾರ್ ಹೆಲ್ಪ್ ಕರ್ತಾ ಖಂಯ್!"
"ಮ್ಹಜ್ಯಾ ಬಿಜ್ನೆಸಾಂತ್ ಹಾಂವ್ ಅಂಡರ್ವರ್ಲ್ಡಾಕ್ ಮಧೆಂ ಹಾಡಿನಾ ಸಾವಂತ್! ಹೆಂ ತುಂ ಜಾಣಾಂಯ್!"
"ಪುಣ್ ಆತಾಂ ಆಮ್ಕಾಂ ಗರ್ಜ್ ಆಸಾ ರಾಯನ್.....!"
"ಹಿ ತ್ಯಾ ಇಕ್ಬಾಲಾಚಿಚ್ ಚಾಲ್ ಆಸ್ತೆಲಿ! ತೊ ಮ್ಹಾಕಾ ತಾಚ್ಯಾ ಹಾತಿಂ ಘೆಂವ್ಕ್ ಸೊಧ್ತಾ!"
"ಆತಾಂ ಕಿತೆಂ ಕರ್ಯಾಂ......?’ ಸಾವಂತಾಕ್ ಕಾಂಯ್ ಸಮ್ಜಾಲೆಂ ನಾ.
"ಮ್ಹಾಕಾ ಥೊಡೊ ವೇಳ್ ದೀ. ಆತಾಂ ಕಾಂಯ್ ತರ್ಯ್ ಹಾವೆಂಚ್ ಕರುಂಕ್ ಜಾಯ್! ಪಯ್ಶೆ ಮ್ಹಜೆ ಆಡವ್ ಪಡ್ಲ್ಯಾತ್! ತುಂ ಏಕ್ ಕಾಮ್ ಕರ್....! ಫಾಲ್ಯಾಂ ಸಾಕಾಳಿಂ ಮ್ಹಾಕಾ ಪೋನ್ ಕರ್!"
ರಾಯನಾನ್ ಪೊನ್ ಭಂಧ್ ಕೆಲೆಂ.
ಮತಿಕ್ ಕಾಂಯ್ಚ್ ಸಮ್ಜಾನಾಸ್ತಾನಾ ವೆತಾನಾ ಪೊನಾಕ್ ಲಾಗ್ಶಿಲ್ಯಾ ಸಿಟಾರ್ ಉಡವ್ನ್ ಜಿಪಾಚಾ ಸ್ಟೇರಿಂಗಾಕ್ ತಾಣೆಂ ಆಪ್ಲೆ ಹಾತ್ ದಾಡಾಯ್ಲೆ.
"ಸ ಮಯ್ನೆ ಆಪ್ಲೊ ಪ್ರಾಜೆಕ್ಟ್ ಭಂದ್ ಕರ್ಚೊ ಮ್ಹಳ್ಯಾರ್.....?" ಲುಕ್ಸಾಣ್ ಚಿಂತಾನಾ ರಾಯನಾನ್ ಏಕ್ ಪಾವ್ಟಿಂ ಮುಕ್ಲ್ಯಾ ರಸ್ತ್ಯಾಕ್ ಆನಿ ಏಕ್ ಪಾವ್ಟಿಂ ತ್ಯಾ ಆಪ್ಣೆ ಆತ್ತಾಂ ಉಲವ್ನ್ ಸಿಟಾಚೆರ್ ಉಡಯಿಲ್ಲ್ಯಾ ಪೊನಾಕ್ ಪಳೆಲೆಂ.
ಪೊನ್ ಜಾಲ್ಯಾರ್ಯ್ ಕಿತೆಂ ಕರುಂಕ್ ಸಕ್ತಾ?
ಕಾಜಾರ್ ಜಾಲ್ಯಾ ಉಪ್ರಾಂತ್ ರಾಯನಾಕ್ ಹೊ ಪಯ್ಲೊ ಧಖೊ!
ಮಿಶೇಲ್ ತಾಚ್ಯಾ ಜಿವಿತಾಂತ್ ಆಯಿಲ್ಲ್ಯಾ ದಿಸಾ ಥಾವ್ನ್ ರಾಯನಾಕ್ ಸರ್ವ್ ಬರೆಂಚ್ ಲಾಭ್ಲ್ಲೆಂ. ತಾಕಾ ಸಭಾರ್ ವಾಟೆನಿಂ ಫಾಯ್ದೊ ಜಾಲ್ಲೊ. ಪುಣ್ ಆಜ್!
ಆಜ್ ತಾಚೊ ಏಕ್ ಪ್ರಾಜೆಕ್ಟ್ ಭಂಧ್ ಪಡ್ಲ್ಲೊ!
"ಹ್ಯಾ ಕಾಳ್ಯಾ ಚವರ್ಲೆಟ್ ಜಿಪಾ ಥಾವ್ನ್....?"
ಬಿಜ್ನೆಸಾಚ್ಯಾ ಹರ್ಯೆಕಾ ಕಾಮಾಂತ್ ರಾಯನ್ ಟೊಯೊಟಾ ಲ್ಯಾಂಡ್ಕ್ರೂಸರ್ ವರ್ತಾಲೊ. ತೆಂ ಜೀಪ್ ತಾಕಾ ಚಡ್ ಮೊಗಾಚೆಂ. ತ್ಯಾ ಜಿಪಾರ್ ಥಾವ್ನ್ ಕೆಲ್ಲ್ಯಾ ಬಿಜ್ನೆಸ್ ವಹಿವಾಟಾಂತ್ ತೊ ಕೆದ್ನಾಂಚ್ ಸಲ್ವಾಲ್ಲೊ ನಾ!
ಪುಣ್ ಆಜ್!
ಆಜ್ ಮಿಶೇಲಾಚಾ ಉತ್ರಾಚೆರ್ ಭರ್ವಸೊ ದವರುನ್ ತೊ ಭಾಯ್ರ್ ಸರ್ಲ್ಲೊ!
ತಿತ್ಲೆಂಚ್!
ಲಾಗ್ಶಿಲ್ಯಾ ಸಿಟಾರ್ ಉಡಯಿಲ್ಲೆಂ ಪೋನ್ ಪರ್ತ್ಯಾಕ್ ವ್ಹಾಜ್ತಾನಾ ರಾಯನಾಚಿಂ ಚಿಂತ್ನಾಂ ತುಟ್ಲಿಂ.
"ಹಲೋ....!" ರಾಯನಾನ್ ಪೋನ್ ಆನ್ ಕೆಲೆಂ.
"ಹಾಯ್!" ಆಯ್ಕೊನ್ ಆಯಿಲ್ಲ್ಯಾ ತಾಳ್ಯಾಕ್ ತೊ ವಳ್ಕಾಲೊ.
ಕಸಲ್ಯಾಗೀ ಗೂಂಡಾಯೆ ಥಾವ್ನ್ ಉಟೊನ್ ಉತ್ತುಂಗ್ ಶಿಖರಾಕ್ ಚಡೊನ್ ವೆಚಾ ಸ್ಪಂದನಾಚೊ ತಾಳೊ! ತ್ಯಾ ತಾಳ್ಯಾಕ್ ಆಯ್ಕಾಲ್ಲೊ ರಾಯನ್ ಆಪ್ಣಾಕ್ಚ್ ವಿಸ್ರಾಲೊ. ತ್ಯಾ ತಾಳ್ಯಾಂತ್ ವಿಚಿತ್ರ್ ಎಕಾ ಥರಾಚಿ ಸಕತ್ ಆಸಾ ಮ್ಹಳ್ಳ್ಯಾ ಪರಿಂ ಭೊಗ್ಲೆಂ ತಾಕಾ. ತೊ ಕಾಂಯ್ ಉಲಯ್ಲೊ ನಾ.
"ರಾಯನ್...! ತುಂ ಯೆತಾಯ್?"
"ವ್ಹಯ್! ಪಂದ್ರಾ ಮಿನುಟಾಂನಿ ಪಾವ್ತಾಂ!"
ತ್ಯಾಕುಶಿನ್ ಪೋನ್ ಭಂಧ್ ಜಾಲೆಂ. ಸವ್ಕಾಸ್ ಆಪ್ಲ್ಯಾ ಪೊನಾಕ್ ಕಾನಾ ಥಾವ್ನ್ ಸಕಯ್ಲ್ ಗಳಯಿಲ್ಲ್ಯಾ ರಾಯನಾನ್ ತ್ಯಾ ಪೊನಾಕ್ ಪರ್ತ್ಯಾಕ್ ತ್ಯಾಚ್ ಬಸ್ಕೆರ್ ಉಡಯ್ಲೆಂ. ತಾಚ್ಯೆ ಸವೆಂ ತಾಣೆಂ ಆಪ್ಲ್ಯಾ ಜೀಪಾಚೊ ವೇಗ್ ಆರಾಯ್ಲೊ.
ಪಂದ್ರಾ ಮಿನುಟಾಂ ಮ್ಹಳ್ಳ್ಯಾ ಕಡೆನ್ ಬಾರಾ ಮಿನುಟಾಂನಿಚ್ ರಾಯನಾಚೆಂ ಜೀಪ್ ತಾಜ್ ಹೊಟೆಲಾ ಮುಕಾರ್ ಯೇವ್ನ್ ರಾವ್ಲೆಂ.
ಹೊಟೆಲಾಂತ್ ಚಡಾವತ್ ಸಗ್ಳಿಂ ಜಣಾಂ ರಾಯನಾಕ್ ವಳ್ಕಾತಾತ್! ತ್ಯಾ ರಿಸೆಪ್ಶನಿಸ್ಟಾ ಥಾವ್ನ್ ಧರ್ಲೆಲೆಂ ಹೊಟೆಲಾಚಾ ರೂಮ್ ಬಾಯಾ ಪಾಸೊನ್ ತಾಕಾ ಹಾಂಗಾ ವಳ್ಕಾನಾತ್ಲ್ಲಿಂ ಕೋಣೀ ನಾಂತ್. ಹ್ಯಾ ಹೊಟೆಲಾಕ್ ತೊ ಕಾಂಯ್ ನವೊ ನ್ಹಯ್! ಸಭಾರ್ ಪಾರ್ಟೆಚಾ ವೆಳಾರ್, ಸಭಾರ್ ಬಿಜ್ನೆಸ್ ಮೀಟಿಂಗಾಂ ವೆಳಾರ್ ತೊ ಹಾಂಗಾಸರ್ ಹಾಜರ್ ಜಾತಾಲೊ.
ಆಲಿಯಾನ್ ಸಾಂಗ್ಲೆಲೆಂ ಪೋನ್ ನಂಬರ್ ರಾಯನಾಕ್ ಉಡಾಸ್ ಆಸಾ.
ಲಿಫ್ಟ್ ಧರುನ್ ತೊ ವಯ್ರ್ ಆಯಿಲ್ಲೊ ಮುಕ್ಲ್ಯಾ ಕಾರಿಡಾರಾಚೆರ್ ಚಲೊನ್ ತ್ಯಾ ಅಖೇರಿಚ್ಯಾ ರುಮಾ ಮುಕಾರ್ ರಾವ್ಲೊ.
ಆನಿ ಕಿತೆಂ ರಾಯನ್ ದಾರಾರ್ ಮಾರ್ತಾ ಮ್ಹಣ್ತಾನಾ ಮುಕ್ಲೆಂ ದಾರ್ ಉಗ್ತೆಂ ಜಾಲೆಂ. ಜಶೆಂ ಭಿತರ್ ಕೋಣ್ಗೀ ಆಪ್ಣಾಕ್ಚ್ ಸಭಾರ್ ವೆಳಾ ಥಾವ್ನ್ ಅತ್ರೆಗಾನ್ ರಾಕೊನ್ ಆಸಾ ಮ್ಹಳ್ಳ್ಯಾಪರಿಂ! ರಾಯನಾಕ್ ಆಶ್ಚರ್ಯ್ ಜಾಯ್ನಾಸ್ತಾನಾ ಗೆಲೆಂ ನಾ.
ಉಗ್ತೆಂ ಜಾಲ್ಲ್ಯಾ ದಾರಾ ಮುಖಾಂತ್ರ್ ಭಿತರ್ ಪಳೆತಾನಾ ಆಪ್ಲ್ಯಾ ದೊಳ್ಯಾಂಕ್ ತೊಚ್ ಪಾತ್ಯೆಲೊ ನಾ.
ಕಿತೆಂಗೀ ಚಿಂತುನ್ ಆಯಿಲ್ಲ್ಯಾ ರಾಯನಾಕ್ ಕಿತೆಂಗೀ ದಿಸ್ಲೆಂ! ಜಶೆಂ ಝಳ್ಜಳ್ಚ್ಯಾ ಆರ್ಶ್ಯಾ ಪಿಟ್ಯಾ ಮಧೆಂ ಉಜ್ವಳ್ಚೆಂ ವಜ್ರ್!
"ಆಲಿಯಾ!" ರಾಯನ್ ಉದ್ಗಾರ್ಲೊ.
"ಭಿತರ್ ಯೇ!" ಆಲಿಯಾನ್ ಸಾಂಗ್ತಾನಾ ಆಪಾಪಿಂಚ್ ರಾಯನ್ ಭಿತರ್ ಗೆಲೊ. ತಾಚಿ ಮತ್ ತ್ಯಾ ತೀನ್ ವರ್ಸಾಂ ಪಯ್ಲೆಂ ಪಳೆಲ್ಲ್ಯಾ ಆಲಿಯಾಕ್ ತಾಚ್ಯಾ ಉಡಾಸಾಂತ್ ಸೊಧುಂಕ್ ಲಾಗ್ಲಿ. ತ್ಯಾ ಆಲಿಯಾಕ್ ಆನಿ ಹ್ಯಾ ಆಲಿಯಾಕ್ ರಾತ್ ಆನಿ ದಿಸಾಚೊ ಫರಕ್ ಆಸ್ಲ್ಲೊ!
ರಾಯನ್ ಭಿತರ್ ಯೆತಾನಾ ಆಲಿಯಾನ್ ರುಮಾಚೆಂ ದಾರ್ ಭಂಧ್ ಕೆಲೆಂ.
"ಬಸ್!" ಮುಕ್ಲ್ಯಾ ಸೊಫಾಕ್ ದಾಕವ್ನ್ ಆಲಿಯಾನ್ ಸಾಂಗ್ಲೆಂ.
"ಬ್ಯೂಟಿಫುಲ್!" ಆಲಿಯಾಚಾ ಸೊಭಾಯೆಕ್ ಪಳೆವ್ನ್ ರಾಯನ್ ಮತಿಂತ್ಚ್ ಉದ್ಗಾರ್ಲೊ. ತ್ಯಾ ದಿಸಾ ಮಹಬಲೇಶ್ವರಾಂತ್ ಆಲಿಯಾಚಾ ಸೊಭಾಯೆಕ್ ತಾಚ್ಯಾ ಮುಕಾರ್ಚ್ ವರ್ಣಿಲ್ಲ್ಯಾ ರಾಯನಾಕ್ ಹ್ಯಾ ವಗ್ತಾರ್ ಆಲಿಯಾಚಿ ತಿಚ್ಚ್ ಸೊಭಾಯ್ ಪಳವ್ನ್ ತೊಂಡಾ ಥಾವ್ನ್ ಉತ್ರಾಂ ಸುಟ್ಲಿಂ ನಾಂತ್.
"ಕಿತೆಂ ಪಿಯೆತಾಯ್......?"
ಆಲಿಯಾನ್ ದೋನ್ ಆರೆಂಜ್ ಜ್ಯೂಸಾಕ್ ಆರ್ಡರ್ ಕೆಲೆಂ.
"ಕಶೆಂ ಚಲ್ತಾ ಬಾಲಿವುಡ್?"
ಆಪ್ಣಾ ಮುಕಾರ್ ರಾವ್ಲ್ಲ್ಯಾ ಆಲಿಯಾ ವಯ್ರ್ ರಾಯನಾನ್ ಆಪ್ಲಿ ದೀಶ್ಟ್ ಧಾಂವ್ಡಾಯ್ಲಿ. ವಯ್ರ್ ಥಾವ್ನ್ ಸಕಯ್ಲ್ ಪಾಸೊನ್ ತಾಣೆಂ ಆಲಿಯಾಕ್ ಪಳೆಲೆಂ. ರಸ್ಟ್ ಬ್ರೌನ್ ರಂಗಾಚೆ ಕೇಸ್ ಗೋಲ್ಡನ್ಯ್ ನ್ಹಯ್ ಬ್ರೌನ್ಯ್ ನ್ಹಯ್ ಮ್ಹಳ್ಳ್ಯಾಪರಿಂ! ರೂಂದ್ ಕಪಲಾರ್ ದೆಂವ್ಲ್ಲೆ ಚಾರ್ ಪಾತಳ್ ಕೇಸ್! ದೊನ್ಯ್ ಕುಶಿಚ್ಯಾ ಪೊಲ್ಯಾಂರ್ ದೆಂವ್ಲ್ಲೆ ತೆ ಮುಂಗ್ರುಳ್! ಭಾರೀಕ್ ಐಬ್ರೋ. ರೂಂದ್ ದೊಳೆ. ಉಜ್ವಳ್ಚೆ ಪೊಲೆ. ಲಾಂಬ್ ಗೊಮ್ಟಿ. ಉಭಾರ್ ಹರ್ಧೆಂ. ತ್ಯಾ ಹರ್ಧ್ಯಾರ್ ನ್ಹೆಸ್ಲ್ಲ್ಯಾ ಬ್ಲೌಸಾ ಭಿತರ್ ಥಾವ್ನ್ ಸುಟ್ಕಾ ಆಶೆವ್ನ್ ಭಾಯ್ರ್ ಯೇಂವ್ಕ್ ಅತ್ರೆಗಾನ್ ರಾಕೊನ್ ರಾವ್ಲ್ಲ್ಯಾ ತ್ಯಾ ಸ್ತನಾಂಚೊ ಆಕಾರ್. ಭಾರೀಕ್ ಪಾತಳ್ ಪೋಟ್. ಹಳ್ತಾಚೆಂ ಪೆಂಕಾಡ್. ತ್ಯಾ ಪೆಂಕ್ಡಾರ್ ರಾವೊಂಕ್ ಕಶ್ಟೊಂಚಾ ಪರಿಂ ದಿಸ್ಚೆಂ ಲೋ ವೇಸ್ಟ್ ಜೀನ್ಸ್ ಪ್ಯಾಂಟ್. ತಾಚೆ ತೆ ಮೊಟೆ ಜಾಂಗೆ. ತ್ಯಾ ದೋನ್ ಜಾಂಗ್ಯಾ ಮಧೆಂ ಆನಿ ಪೆಂಟಾಚಾ ಜಿಪ್ಪಾ ಮಧೆಂ ಏಕ್ ಲ್ಹಾನ್ ಖಾಲಿ ಸುವಾತ್. ಜ್ಯಾ ಸುವಾತೆ ಥಾವ್ನ್ ಪಾಟ್ಲೊ ಉಜ್ವಾಡ್ ಮುಕ್ಲ್ಯಾನ್ ದಿಸ್ತಾಲೊ. ತೆ ಬಾರೀಕ್ ದೊಂಪ್ರಾ ಸಕಯ್ಲೆ ಪಾಂಯ್. ತ್ಯಾ ಹೈ ಹೀಲ್ಡ್ ವ್ಹಾಣಾಂಚೆರ್.....!
"ಉಫ್....!" ರಾಯನಾನ್ ಕಾಳ್ಜಾಂತ್ಚ್ ಉದ್ಗಾರ್ ಸೊಡ್ಲೊ.
ಆಲಿಯಾಕ್ ಪಳೆಲ್ಲ್ಯಾ ರಾಯಾನಾಕ್ ತೆಂ ಸರ್ಗಾ ವಯ್ಲ್ಯಾ ಅಪ್ಸರಾ ಪರಿಂ ದಿಸ್ಲೆಂ.
ತಿತ್ಲ್ಯಾರ್ ಜ್ಯೂಸ್ ಘೆವ್ನ್ ರೂಮ್ ಬಾಯ್ ಭಾಯ್ರ್ ಹಾಜರ್ ಜಾಲೊ.
"ತರ್ ತುಂ ಆತಾಂ ದಾಕ್ತೆರ್ ಜಾಲಾಂಯ್......!" ರಾಯನ್ ಉಲಯ್ಲೊ.
ರೂಮ್ ಬಾಯ್ ಆಪ್ಣೆ ಹಾಡ್ಲ್ಲ್ಯಾ ಜ್ಯೂಸಾಕ್ ಮುಕ್ಲ್ಯಾ ಟೀಪಾಯಿಚೆರ್ ದವರುನ್ ತೊ ಭಾಯ್ರ್ ಗೆಲೊ.
ಆಲಿಯಾನ್ ಆತಾಂ ಏಕ್ ಗ್ಲಾಸ್ ಜ್ಯೂಸ್ ಆಪ್ಲ್ಯಾ ಹಾತಿಂ ಘೆತ್ಲೊ ಆನಿ ತೊ ಗ್ಲಾಸ್ ಘೆವ್ನ್ ತೆಂ ರಾಯನಾಚಾ ಲಾಗಿಂ ಆಯ್ಲೆಂ.
ತಿತ್ಲೆಂಚ್!
ಎಕಾ ಕ್ಷಣಾಕ್ ಆಲಿಯಾಚಾ ಆಂಗಾ ಥಾವ್ನ್ ಆಯಿಲ್ಲ್ಯಾ ಪರ್ಮಾಳಾಕ್ ರಾಯನಾಚಿಂ ಸಗ್ಳಿಂ ಪಂಚೇಂದ್ರಿಯಾಂ ತ್ಯಾ ಸುವಾಧಾಂತ್ ನ್ಹಾವ್ನ್ ಆಯಿಲ್ಲ್ಯಾ ಪರಿಂ ಜಾಲೆಂ. ಆಪುಣ್ ಕಸಲ್ಯಾಗೀ ಸುವಾಧಾಚ್ಯಾ ಸಂಸಾರಾಕ್ ಆಯಿಲ್ಲ್ಯಾ ಪರಿಂ ತಾಕಾ ಜಾಲೆಂ.
"ನಾಂ! ಹಾಂವ್ ದಾಕ್ತೆರ್ ಜಾಂವ್ಕ್ ನಾ!" ಆಲಿಯಾಚಾ ವೊಂಟಾಂನಿ ಮಂದ್ ಹಾಸೊ ಉಟೊನ್ ಆಯ್ಲ್ಯೊ.
"ಮಾಗಿರ್......? ತುಂ ಮ್ಹಾಕಾ ಮಹಬಲೇಶ್ವರಾಂತ್ ಮೆಳ್ಲ್ಲ್ಯಾ ವೆಳಾರ್ ತುಂ ಮೆಡಿಕಲ್ ಶಿಕ್ತಾಲೆಂಯ್! ಯಾಮ್ ಐ ರೈಟ್....?" ರಾಯನಾಕ್ ಆಪ್ಲ್ಯಾ ಉಡಾಸಾ ವಯ್ರ್ ದುಬಾವ್ ಜಾಲೊ.
"ತೆಂ ಸೊಡ್ಲೆಂ ಹಾವೆಂ!"
"ಕಿತ್ಯಾಕ್?"
"ದಾಕ್ತೆರ್ ಜಾವ್ನ್ ತ್ಯಾ ಆಸ್ಪತ್ರೆಂತ್....! ಮ್ಹಾಕಾ ಜಾಂವ್ಚೆಂ ನಾ!"
"ಆತಾಂ......?"
"ಆತಾಂ ತುಜ್ಯಾ ಮುಕಾರ್ ಆಸಾ!" ಆಲಿಯಾ ಹಾಸ್ಲೆಂ. ಹಾಸ್ತಾನಾ ದಿಸ್ಲ್ಲ್ಯಾ ತಾಚ್ಯಾ ತ್ಯಾ ಸೊಭಿತ್ ಧವ್ಯಾ ಉಜ್ವಳ್ಚ್ಯಾ ದಾಂತಾಂಕ್ ಪಳೆತಾನಾ ತೆ ದಾಂತ್ ಮೊತಿಂಯಾನಿ ವಿಣ್ಲೆಲ್ಯಾ ನೆಕ್ಲೆಸಾ ಪರಿಂ ದಿಸ್ಲೆ.
ಆಲಿಯಾ ಆತಾಂ ರಾಯನಾಕ್ಚ್ ತದೇಕ್ ನದ್ರೆನ್ ಪಳಂವ್ಕ್ ಲಾಗ್ಲೆಂ. ತೆಂ ತಶೆಂ ಪಳೆತಾನಾ ತ್ಯಾ ತಾಚ್ಯಾ ನದ್ರೆಂತ್ ಆಪ್ಣಾಕ್ಚ್ ಕರ್ಗವ್ನ್ ಸೊಡ್ಚಿ ಸಕತ್ ಆಸಾ ಮ್ಹಳ್ಳ್ಯಾ ಪರಿಂ ರಾಯನಾಕ್ ಜಾಲೆಂ.
"ತುಂ ಕಿತೆಂ ತರ್ಯ್ ಖಂತಿನ್ ಆಸ್ಲ್ಲ್ಯಾ ಪರಿಂ ದಿಸ್ತಾಯ್!" ರಾಯನಾಚಾ ದೊಳ್ಯಾಂಕ್ಚ್ ತೀಕ್ಷ್ಣತಾಯೆನ್ ಪಳೆಲ್ಲೆಂ ಆಲಿಯಾ, "ಹಾವೆಂ ತುಕಾ ಆಪವ್ನ್.... ತುಜೆಂ ಕಾಂಯ್....! ನೋ ಪ್ರಾಬ್ಲೆಮ್ ರಾಯನ್! ತುಜ್ಯಾ ವೆಳಾ ಪರ್ಮಾಣೆಂ ಆಮಿಂ ಅನ್ಯೇಕ್ ಪಾವ್ಟಿಂ ಮೆಳ್ಯಾಂ!"
ರಾಯನಾಕ್ ಹೊ ದುಸ್ರೊ ಧಖೊ!
ಪಯ್ಲೊ ಧಖೊ ತಾಕಾ ಹ್ಯಾ ಹೊಟೆಲಾಚಾ ರುಮಾ ಭಿತರ್ ತೊ ಯೆತಾನಾ ಆಲಿಯಾಚಾ ಸೊಭಾಯೆಕ್ ಪಳವ್ನ್ ಜಾಲ್ಲೊ!
ದುಸ್ರೊ ಧಖೊ ಹೆಂ ಆಲಿಯಾ ಆಪ್ಣಾಚಾ ಮತಿಕ್ ಕಶೆಂ ವಾಚುಂಕ್ ಸಕ್ತಾ ಮ್ಹಳ್ಳೆಂ ಚಿಂತುನ್ ಜಾಲ್ಲೊ!
"ನೋ! ನಥಿಂಗ್! ತಶೆಂ ಕಾಂಯ್ ನಾ!" ರಾಯನಾನ್ ಹಾಸೊನ್ ಸಾಂಗ್ಲೆಂ ತರ್ಯ್ ಆಪ್ಣೆಂ ಮಾರ್ಲ್ಲೊ ಮಾರ್ ಸಾರ್ಕೊ ಪಡ್ಲೊ ಮ್ಹಣೊನ್ ಆಲಿಯಾಕ್ ಕಳಾನಾಸ್ತಾನಾ ಗೆಲೆಂ ನಾ.
"ಕಾಂಯ್ ತರ್ಯ್ ಆಸಾ! ರಾಯನ್ ಮ್ಹಜ್ಯಾ ಥಾವ್ನ್ ಲಿಪಂವ್ಕ್ ಪ್ರಯತ್ನ್ ಕರ್ತಾ. ತೆಂ ಹಾವೆಂ ಜಾಣಾಂ ಜಾಂವ್ಕ್ ಜಾಯ್! ಹೆಂಚ್ ಮ್ಹಾಕಾ ಮ್ಹಜ್ಯಾ ವಾಟೆಕ್....!" ಆಲಿಯಾ ಚಿಂತಾಲೆಂ.
ರಾಯನ್ಯ್ ಪಕ್ಕಾ ಬಿಜ್ನೆಸ್ ಮ್ಯಾನ್!
ಬಿಜ್ನೆಸಾಚೆ ಸಗ್ಳೆ ಟ್ರಿಕ್ಸ್ ತೊ ತಾಚ್ಯಾ ಬಾಪಾಯ್ ಥಾವ್ನ್ ಶಿಕ್ಲ್ಲೊ!
ಖಂಯ್ಚಾ ವೆಳಾರ್ ಖಂಯ್ ಕಿತೆಂ ಕಶೆಂ ಚಲೊಂಕ್ ಜಾಯ್ ತೆಂ ತೊ ಜಾಣಾಂ ಆಸ್ಲ್ಲೊ.
ಮುಕಾರ್ ಆಸ್ಲ್ಲ್ಯಾ ವ್ಯಕ್ತಿಕ್ ಜರ್ ಆಪ್ಣಾಚೆಂ ಲಾಚಾರ್ಪಣ್ ಕಳ್ಳೆಂ ತರ್, ಆಪ್ಣೆಂ ತಾಚ್ಯಾ ಹಾತಿಂ ಸಾಂಪಡ್ಲ್ಲ್ಯಾ ಪರಿಂಚ್!
ರಾಯನ್ ತಾಚ್ಯಾ ಬಿಜ್ನೆಸಾಂತ್ ಹೆಳ್ಲ್ಲೊ!
ಪುಣ್ ಆಲಿಯಾ!
ಆಪ್ಣೆ ತಾಚ್ಯಾ ಮುಕಾರ್ ಖಂಯ್ಚಾಯ್ ರುಪಾನ್ ಆಪ್ಲ್ಯಾ ಮತಿಂತ್ಲ್ಯಾ ಚಿಂತ್ನಾಕ್ ತಾಕಾ ದಾಖಂವ್ಚೆಂ ಪ್ರಯತ್ನ್ ಕೆಲ್ಲೆಂ ನಾ. ತ್ಯಾ ಭಾಯ್ರ್ ಆಪುಣ್ ಹ್ಯಾ ವಿಶಯಾಂನಿ ಚಡ್ ಚತ್ರಾಯ್ ಘೆತಾಂ. ತರ್ ಆಲಿಯಾನ್ ಕಶೆಂ.....?
ಆಲಿಯಾ!
ಆಲಿಯಾ ಸ್ವಾಭಾವಿಕ್ ಚಲಿ ನ್ಹಯ್! ತಾಚೆ ಥಂಯ್ ಕಾಂಯ್ ತರ್ಯ್ ವಿಶೇಸ್ ಆಸಾ! ರಾಯನ್ ಚಿಂತಾಲೊ.
ಆಲಿಯಾ ಬೋಲ್ಡ್ ಕಾನ್ಪಿಡೆಂಟ್ ವುಮನ್!
ಆಪ್ಣಾ ವಯ್ರ್ ಆನಿ ಆಪ್ಲ್ಯಾ ಚಿಂತ್ಪಾ ವಯ್ರ್ ಭರ್ವಸೊ ದವರ್ಚೊ ಗೂಣ್ ತಾಣೆಂ ಜಲ್ಮಾ ಥಾವ್ನ್ ಆಪ್ಣಾಯಿಲ್ಲೊ!
ಖಂಯ್ಚಾ ಘಡಿಯೆ ಆನಿ ಖಂಯ್ಚಾ ವಗ್ತಾರ್ ಆಪ್ಲ್ಯಾ ಭರ್ವಸ್ಯಾಕ್ ಮುಕಾರ್ ಕಾಡುಂಕ್ ಜಾಯ್ ತೆಂ ಆಲಿಯಾ ಜಾಣಾಂ ಆಸ್ಲ್ಲೆಂ.
ಆಪ್ಣಾ ಮುಕ್ಲ್ಯಾ ವ್ಯಕ್ತಿಕ್ ಆಪುಣ್ ಕಾನ್ಫಿಡೆನ್ಶಿಯಲ್ಲೀ ಕಿತ್ಲೆಂ ಸ್ಟ್ರಾಂಗ್ ಆಸಾಂ ತೆಂ ದಾಕಯ್ತಾನಾ ಮುಕ್ಲೊ ವ್ಯಕ್ತಿ ಆಪಾಪಿಂಚ್ ಸಲ್ವೊನ್ ಗೆಲ್ಲ್ಯಾ ಪರಿಂಚ್!
ಹೆಂ ಆಲಿಯಾ ಜಾಣಾಂ!
ತರ್ ರಾಯನ್?
ಆಪ್ಣೆಂ ಆಪ್ಣಾ ವಯ್ರ್ ದವರ್ಲ್ಲೊ ಭರ್ವಸೊ ಜಿಕ್ಲೊ ಮ್ಹಳ್ಳೆಂ ಆಲಿಯಾಕ್ ಕಳ್ಳೆಂ.
ಆಲಿಯಾನ್ ಆಪ್ಲ್ಯಾ ಮನಾಂತ್ಚ್ ಆಪ್ಲಿ ಜೀಕ್ ಪಾರ್ಕಿಲಿ.
ಪಯ್ಲಿ ಜೀಕ್......! ರಾಯನಾನ್ ಆಪ್ಣಾಕ್ ಪಳೆಲ್ಲ್ಯಾ ನದ್ರೆಚಿ! ಆಪ್ಣಾಕ್ ಪಳೆಲ್ಲ್ಯಾ ಪಯ್ಲ್ಯಾ ನದ್ರೆಂತ್ ರಾಯನ್ ಸಲ್ವಾಲ್ಲೊ.
ದುಸ್ರಿ ಜೀಕ್......! ರಾಯನಾಚಿ ಮತ್ ತಾಚ್ಯಾ ನದ್ರೆಂತ್ಚ್ ಪಾರ್ಕಿಲ್ಲ್ಯಾಚಿ! ರಾಯನಾಚಾ ಮತಿಕ್ ವಾಚುನ್ ತಾಕಾ ಸಲ್ವಯಿಲ್ಲ್ಯಾಚಿ!
ತಿಸ್ರಿ ಜೀಕ್!
ಹಾವೆಂ ಆಪ್ಣಾಂವ್ಕ್ ಆಸಾ.
ರಾಯನಾಚಾ ದಿಶ್ಟಿಕ್ ಆನಿ ಮತಿಕ್ ಸಲ್ವಾಯ್ಲ್ಯಾ ಉಪ್ರಾಂತ್....,
ಆತಾಂ ಉರ್ಲಾಂ ಫಕತ್ತ್ ರಾಯನಾಚೆಂ ಕಾಳಿಜ್!
"ತಾಕಾ ಜರ್ ತುಂ ಜಿಕ್ಲೆಂಯ್....? ತುಂ ತುಜೆಂ ಝುಜ್ ಜಿಕ್ಲ್ಲ್ಯಾ ಪರಿಂಚ್ ಆಲಿಯಾ!" ಆಲಿಯಾಚಾ ಭಿತರ್ಲ್ಯಾ ಆಲಿಯಾನ್ ಸಾಂಗ್ಲೆಂ.
"ಜ್ಯೂಸ್ ಪಿಯೆ ರಾಯನ್!" ಮತಿಂತ್ಲ್ಯಾ ಚಿಂತ್ನಾಂಕ್ ಆಲಿಯಾನ್ ಬಗ್ಲೆಕ್ ಲೊಟ್ಲೆಂ.
"ಏಕ್ಟುವಲ್ಲೀ ರಾಯನ್.....! ತುಂ ಬೆಜಾರ್ ಕರಿನಾಕಾ....." ಆಪ್ಲ್ಯಾ ಕಾನ್ಫಿಡೆನ್ಸಾಚೊ ತಿಸ್ರೊ ಫಾತರ್ ಆಪ್ಲ್ಯಾ ಹಾತಿಂತ್ ಧರುನ್ ತೊ ಉಡಂವ್ಕ್ ಆಲಿಯಾ ತಯಾರ್ ಜಾಲೆಂ. "ಐ ಲೋಸ್ಟ್ ಎವ್ರಿ ಥಿಂಗ್!" ಆಲಿಯಾ ಖಂತಿಕ್ ಆಯ್ಲೆಂ. "ಜಿವಿತಾಂತ್ ಕಿತೆಂಗೀ ಚಿಂತ್ಲ್ಲೆಂ! ಕಿತೆಂಗೀ ಜಾಲೆಂ! ಪುಣ್ ಹಾಂವ್ ಜಾಣಾಂ.... ಇತ್ಲ್ಯಾರ್ ಸಂಸಾರ್ ಖಾಬಾರ್ ಜಾಯ್ನಾಂ. ಹ್ಯಾ ಮುಂಬಯಿ ಶ್ಹೆರಾಂತ್ ಆಪ್ಣಾಚೊ ಕ್ಯಾರಿಯರ್ ಬಾಂದುಂಕ್ ಕಶ್ಟೊಂಚಿ ಕಿತ್ಲಿಂ ಜಣಾಂ ನಾಂತ್? ಥೊಡ್ಯಾಂಕ್ ನಶೀಬ್ ಸೊಧುನ್ ಯೆತಾ! ಥೊಡ್ಯಾಂಕ್ ವಾಟೊ ಮೆಳ್ತಾತ್! ಥೊಡಿಂ ಹ್ಯಾ ದೊನಾಂಯ್ಕ್ಯ್ ಸೊಧ್ತಾತ್!"
ಆಲಿಯಾ ಭಾವುಕಾಯೆನ್ ಉಲಯ್ತಾನಾ ಆಲಿಯಾ ವಯ್ರ್ ಕಸಲೊಗೀ ಏಕ್ ಧಖೊ ಬಸ್ಲಾ ಮ್ಹಳ್ಳೆಂ ತೆಂ ರಾಯನ್ ಜಾಣಾಂ ಜಾಲೊ. ತೊ ಆಲಿಯಾಕ್ಚ್ ಪಳೆತಾಲೊ.
"ಹ್ಯಾ ಸೊಧ್ನೆಂತ್ ಕೊಣಾಕ್ ಕಿತೆಂ ಮೆಳ್ತಾ.... ಕೋಣ್ ಕಿತೆಂ ಹೊಗ್ಡಾಯ್ತಾ.... ಬೋವ್ಶಾ ಹೆಂ ಸಾಂಗೊಂಕ್ ಗೆಲ್ಯಾರ್ ಜಾಂವ್ಚೆಂ ನ್ಹಯ್. ಹಾಂವ್ ಚಿಂತಾಂ ಹಾಕಾಚ್ಚ್ ಮುಂಬಯಿ ಮ್ಹಣ್ತಾತ್!" ಆಲಿಯಾನ್ ಮುಖಾರ್ಸಿಲೆಂ. ತಾಕಾ ಫಕತ್ತ್ ರಾಯನಾಚಾ ಕಾಳ್ಜಾಕ್ ಜಾಗಂವ್ಕ್ ಜಾಯ್ ಆಸ್ಲ್ಲೆಂ! ಆನಿ ರಾಯನಾನ್ ಉಲಂವ್ಚ್ಯಾ ಪಯ್ಲ್ಯಾ ಉತ್ರಾಂತ್ಚ್ ತಾಕಾ ಜಾಣಾಂ ಜಾಂವ್ಕ್ ಜಾಯ್ ಆಸ್ಲ್ಲೆಂ ಕೀ ಆಪ್ಣಾಚೊ ನಿಮಾಣೊ ಫಾತರ್ ಕೆದ್ನಾಂ ಉಡಂವ್ಚೊ?
"ಸತ್ ಸಾಂಗ್ಚೆಂ ತರ್ ತ್ಯಾ ದೀಸ್ ತುಂ ಮೆಳ್ಲ್ಲ್ಯಾನ್ ಹಾಂವ್ ಹ್ಯಾ ಸೊಧ್ನೆಕ್ ದೆಂವ್ಚ್ಯಾತ್ ಸಾಲ್ವಾರ್ ಜಾಲಿಂ!"
ಆಲಿಯಾನ್ ಆಪ್ಲ್ಯಾ ಹಾತಾಂತ್ಲ್ಯಾ ಫಾತ್ರಾಕ್ ನಿಟ್ಟ್ ರಾಯನಾಚಾ ಕಾಳ್ಜಾ ಗುಡಾಂತ್ ವಿಶೆವ್ ಘೆವ್ನ್ ಆಸ್ಲ್ಲ್ಯಾ ಸಿಂತಿಮೆಂತಾಂಚಾ ದಾರಾಕ್ಚ್ ಮಾರ್ಲೊ!
"ಕಿತೆಂ ಜಾಲೆಂ ಆಲಿಯಾ?"
ರಾಯನಾನ್ ಆಪ್ಣಾ ಥಂಯ್ ಆತುರಾಯ್ ದಾಖಯಿಲ್ಲಿ ಪಳವ್ನ್ ಆಪ್ಣೆಂ ಉಡಯಿಲ್ಲೊ ಫಾತರ್ ರಾಯನಾಚಾ ಕಾಳ್ಜಾಕ್ ಲಾಗೊನ್ ಆಲಿಯಾಕ್ ಆಪ್ಣೆಂ ಜಿಕ್ಲಲೊ ಆನ್ಭೋಗ್ ಜಾಲೊ.
ಹೊಚ್ಚ್ ವೇಳ್!
ಆಪ್ಣೆ ರಾಯನಾಕ್ ಆತಾಂ ಆಪ್ಲ್ಯಾ ತಾಬೆಂತ್ ಕರುನ್ ಘೆಂವ್ಕ್ ಜಾಯ್!
ವ್ಹಯ್! ತೊ ಆಪ್ಣಾಕ್ ಆಯ್ಕೊಂಕ್ ತಯಾರ್ ಜಾಲಾ!
ತೊ ಆಯ್ಕಾತಲೊ......! ತ್ಯಾ ಉಪ್ರಾಂತ್.....?
"ತುಕಾ ಹಾಂವ್ ಸತ್ ಸಾಂಗ್ತಾಂ ರಾಯನ್! ಮ್ಹಾಕಾ ಮಾಡೆಲಿಂಗಾಂತ್ ಕಾಂಯ್ ಮನ್ ನಾತ್ಲ್ಲೆಂ! ಪುಣ್ ಆತಾಂ ಕ್ಯಾರಿಯರಾಚೆಂ ಸವಾಲ್! ಮ್ಹಜ್ಯಾ ಜಿವಿತಾಚೆಂ ಸವಾಲ್!"
ರಾಯನಾಚಾ ತೊಂಡಾರ್ ಆಶ್ಚರ್ಯಾಚೊ ಛಾರೊ ಉದೆಲೊ. ಎಕಾಚ್ಚ್ಫರಾ ಅಚಾನಕ್ ಮ್ಹಳ್ಳ್ಯಾಪರಿಂ ಆಲಿಯಾನ್ ಮಾಡೆಲಿಂಗಾಚೊ ವಿಶಯ್ ಕಾಡ್ಲ್ಲೊ!
"ಮ್ಹಾಕಾಯ್ ಮನ್ ನಾ. ಪುಣ್ ಮ್ಹಾಕಾ ಪಳೆಲ್ಲಿಂ.... ಮ್ಹಜ್ಯಾ ಸೊಭಾಯೆಕ್ ವಿಜ್ಮಿತ್ ಜಾವ್ನ್ ಮಾಡೆಲಿಂಗಾಚೆ ವಿಚಾರ್ ಮುಕಾರ್ ದವರ್ತಾತ್. ಹ್ಯಾ ವಿಶಿಂ ತುಜ್ಯೆಲಾಗಿಂ ಉಲಂವ್ಕ್ ಆಸ್ಲ್ಲೆಂ! ತಿತ್ಲೆಂಚ್!" ಆಲಿಯಾ ಆತಾಂ ಮೌನ್ ಜಾಲೆಂ.
"ಮಾಡೆಲಿಂಗ್....?" ರಾಯನ್ ವ್ಹಳೂ ಹಾಸ್ಲೊ.
ರಾಯನಾಚಾ ಹಾಸ್ಯಾಂನಿ ಕಿತೆಂ ಲಿಪೊನ್ ಆಸಾ ತೆಂ ಆಲಿಯಾನ್ ಪಾರ್ಕುಂಕ್ ಪ್ರಯತ್ನ್ ಕೆಲೆಂ.
"ಕಿತ್ಯಾಕ್ ಮ್ಹಾಕಾ ಸಾದ್ಯ್ ನಾ?" ತಾಣೆಂ ವಿಚಾರ್ಲೆಂ.
ಆಲಿಯಾಕ್ ಹೆಂ ಸಾದ್ಯ್ ಆಸಾ ಮ್ಹಳ್ಳೆಂ ರಾಯನಾಕ್ ನಖ್ಖಿ ಜಾಲೆಂ. ಆಲಿಯಾಚಾ ಆಯ್ಚಾ ಸೊಭಾಯೆನ್ ರಾಯನಾಕ್ ಹೊ ಭರ್ವಸೊ ದಿಲ್ಲೊ. ಪುಣ್ ರಾಯನ್ಯ್ ಪಕ್ಕಾ ಬಿಜ್ನೆಸ್ ಮ್ಯಾನ್! ತೊ ಜಾಣಾಂ ಜಾಂವ್ಕ್ ಆಶೆಲೊ ಕೀ ಆಲಿಯಾನ್ ಆಪ್ಣಾಕ್ಚ್ ಕಿತ್ಯಾಕ್ ವಿಂಚ್ಲೊ?
"ತುಕಾ ಸಾದ್ಯ್ ಆಸಾ ಆಲಿಯಾ! ಪುಣ್ ಹಾಚ್ಯಾ ಪಯ್ಲೆಂ ತುವೆಂ ಕಾಂಯ್ ಹ್ಯಾ ವಿಶಿಂ ಟ್ರೈ ಕೆಲಾಂಯ್? ಫೊಟೊಗ್ರಾಫಿ ಯಾ ಫಂಕ್ಷನಾಂತ್....?"
ರಾಯನಾಚಿಂ ಉತ್ರಾಂ ಆಯ್ಕಾಲ್ಲೆಂ ಆಲಿಯಾ ಮತಿಂತ್ಚ್ ಖುಶ್ ಜಾಲೆಂ. ಪುಣ್ ಹ್ಯಾ ಖುಶಿಯೆಕ್ ತಾಣೆಂ ರಾಯನಾ ಮುಕಾರ್ ದವರ್ಚೆಂ ಪಿಶೆಂಪಣ್ ಮಾತ್ರ್ ಕೆಲೆಂ ನಾ. ಸವ್ಕಾಸ್ ರಾಯನ್ ಆಪ್ಣಾಚ್ಯಾ ವಾಟೆರ್ ಯೆತಾ ತೆಂ ಕಳ್ಳೆಂ ತಾಕಾ. ತಾಕಾ ಜಾಲ್ಯಾರ್ಯ್ ಹೆಂಚ್ ಜಾಯ್ ಆಸ್ಲ್ಲೆಂ. ರಾಯನಾನ್ ತಾಚ್ಯಾ ವಾಟೆರ್ ಯೇಂವ್ಕ್ ತೆಂ ರಾಕ್ತಾಲೆಂ.
"ಹ್ಯಾಚ್ ಖಾತಿರ್ ಹಾವೆಂ ಪಯ್ಲೆಂ ತುಕಾ ವಿಂಚ್ಲೊ!"
ರಾಯನಾಚೆಂ ತೋಂಡ್ ಪಳೆತಾನಾ ಆಲಿಯಾನ್ ಮಾರ್ಲ್ಲೊ ಫಾತರ್ ರಾಯನಾಚಾ ಕಾಳ್ಜಾ ಗುಡಾಚಾ ಭಿತರ್ ವಿಶೆವ್ ಘೆಂವ್ಚ್ಯಾ ಸಿಂತಿಮೆಂತಾಂಕ್ ಜ್ಯೋರಾನ್ ಆದ್ಳೊನ್ ’ಡಣ್’ ’ಡಣ್’ ಆವಾಜ್ ಕರೀತ್ತ್ ಸಕಯ್ಲ್ ಪಡ್ಲೊ ಮ್ಹಳ್ಳ್ಯಾಪರಿಂ ಆಲಿಯಾಕ್ ದಿಸ್ಲೆಂ.
"ಆಲಿಯಾಕ್ ಮ್ಹಜ್ಯಾ ವಯ್ರ್ ಇತ್ಲೆಂ ಕಾನ್ಫಿಡೆನ್ಸ್? ತೆಂಯ್ ಆಮಿ ಮೆಳ್ಲ್ಲ್ಯಾ ಎಕಾಚ್ ಎಕಾ ಭೆಟೆ ಥಾವ್ನ್?"
ರಾಯನ್ ಬಿಜ್ನೆಸ್ ಮ್ಯಾನಾಚಾ ನದ್ರೆನ್ಚ್ ಪಳೆತಾಲೊ.
"ಪುಣ್...... ಕಿತ್ಯಾಕ್?" ರಾಯನಾಚಾ ಮತಿಂತ್ ದುಬಾವ್ ಉಟ್ಲ್ಲೊ.
"ಮಾಡೆಲಿಂಗಾಚಾ ಸಂಸಾರಾಕ್ ಸಂಭಂಧ್ ಆಸ್ಚ್ಯಾಂತ್ ಮ್ಹಾಕಾ ಮೆಳ್ಲ್ಲೊ ಮ್ಹಳ್ಯಾರ್ ತುಂ ಮಾತ್ರ್! ದೆಕುನ್ ತುಜ್ಯಾ ವಯ್ರ್ ಭರ್ವಸೊ!" ರಾಯನಾಚಾ ಮತಿಂತ್ಲ್ಯಾ ಸವಾಲಾಕ್ ಆಲಿಯಾನ್ ಸಮ್ಜಾಣೆನ್ ಜವಾಬ್ ದಿಲ್ಲಿ.
"ಆತ್ತಾಂ ತುವೆಂಚ್ ಸಾಂಗ್ಲೆಂಯ್ ಆಲಿಯಾ.....! ಹ್ಯಾ ಸೊಧ್ನೆಂತ್ ಕೊಣಾಕ್ ಕಿತೆಂ ಮೆಳ್ತಾ ತರ್ ಕೋಣ್ ಕಿತೆಂ ಹೊಗ್ಡಾಂವ್ಕ್ ಪಾವ್ತಾ!" ಎಕಾ ಬಿಜ್ನೆಸ್ ಮ್ಯಾನಾಚಾ ತರ್ಫೆನ್ಚ್ ರಾಯನಾನ್ ಆಲಿಯಾಚಿ ಪರಿಕ್ಷಾ ಕೆಲಿ.
"ಹಾವೆಂ ಸಾಂಗ್ಲೆಂ ದೆಕುನ್ಚ್ ಮ್ಹಾಕಾ ತುಜ್ಯೆರ್ ಭರ್ವಸೊ!" ರಾಯ್ನಾಕ್ ಆಪ್ಣಾ ತೆವ್ಶಿಂ ವೊಡ್ಚೆಂ ಪ್ರಯತ್ನ್ ಆಲಿಯಾನ್ ಥೊಡೆಂ ಭಳ್ ಕೆಲೆಂ.
"ತಶೆಂ ವತ್ತಾಯ್ ಕಾಂಯ್ ನಾ ರಾಯನ್! ಮ್ಹಾಕಾ ಮ್ಹಜ್ಯೆರ್ಚ್ ವಿಶ್ವಾಸ್ ಆಸಾ! ಖಂಯ್ಚಾಯ್ ಪೊಟೊಗ್ರಾಫರಾಕ್ ಹಾಂವ್ ಏಕ್ ಪೋಜ಼್ ದೀಂವ್ ಜಾಲ್ಯಾರ್......! ಪುಣ್ ತುವೆಂ ಮ್ಹಾಕಾ ಪಯ್ಲೆಂ ವಿಚಾರ್ಲಾಂಯ್ ಮ್ಹಣ್ತಾನಾ ನಿಜಾಯ್ಕ್ಯ್ ಹೊ ಪಯ್ಲೊ ಪೊಟೊಗ್ರಾಫರ್ ತುಂಚ್ ಜಾಂವ್ಕ್ ಜಾಯ್!" ಆಲಿಯಾ ನಿಮಾಣೊ ಫಾತರ್ ಉಡಂವ್ಕ್ ಆಯ್ತೆಂ ಜಾಲೆಂ.
"ಪೊಟೋಗ್ರಾಫರ್? ಹಾಂವ್ ಪೊಟೋಗ್ರಾಫರ್ ನ್ಹಯ್ ಆಲಿಯಾ!"
"ಹಾಂವ್ ಜಾಣಾಂ! ಪುಣ್ ತುಜ್ಯಾ ದೊಳ್ಯಾಂನಿ ಮ್ಹಾಕಾ ಕ್ಯಾಮರಾ ದಿಸ್ತಾ. ತುಜ್ಯಾ ಹಾತಾಂನಿ ಮ್ಹಾಕಾ ಸಭಾರಾಂಚೆಂ ಕ್ಯಾರಿಯರ್ ದಿಸ್ತಾ!"
"ತುವೆಂ ಕಿತ್ಲೆಶ್ಯಾಗೀ ಮಾಡೆಲಾಂಕ್ ಪಳೆಲಾಂಯ್ ಆಸ್ತೆಲೆಂ!" ಆಲಿಯಾನ್ ವಿಶಯ್ ಬದ್ಲಿಲೊ. "ಇಫ್ ಯು ಡೋಂಟ್ ಮೈಂಡ್.... ಜಸ್ಟ್ ಹ್ಯಾವ್ ಎ ಲುಕ್ ಆನ್ ವನ್ ಪೋಜ಼್!"
ರಾಯನಾಚಾ ಮುಕ್ಲೆಂ ಉಟ್ಲ್ಲೆಂ ಆಲಿಯಾ ರಾಯನಾಚಾ ’ಹಾಂ’ ಯಾ ’ನಾ’ ಕ್ ರಾಕಾನಾಸ್ತಾನಾ ನಿಟ್ಟ್ ಬೆಡ್ರೂಮಾ ಭಿತರ್ ಚಲ್ಲೆಂ. ರಾಯನಾಕ್ ತಾಣೆಂ ಕಾಂಯ್ಚ್ ಉಲಂವ್ಕ್ ಆವ್ಕಾಸ್ ಕರುನ್ ದಿಲೊ ನಾ. ಕಿತೆಂಗೀ ಉಲಂವ್ಕ್ ತೋಂಡ್ ಉಗಡ್ಲ್ಲ್ಯಾ ರಾಯನಾಕ್ ಉಲಂವ್ಕ್ ಜಾಲೆಂ ನಾ. ಆಲಿಯಾ ತಿತ್ಲ್ಯಾ ಭಿತರ್ ಬೆಡ್ರೂಮಾಕ್ ಪಾವ್ಲ್ಲೆಂ. ಆಪ್ಣೆಂ ಕಾಂಯ್ ಉಲವ್ನ್ ಫಾಯ್ದೊ ನಾ ತೆಂ ಸಮ್ಜೊನ್ ತೊ ಮೌನ್ ಜಾಲೊ.
ಆಲಿಯಾ ಕಿತ್ಯಾಕ್ಗೀ ಆಸಕ್ತೆಚೆಂ ಮ್ಹಳ್ಳ್ಯಾಪರಿಂ ರಾಯನಾಕ್ ದಿಸ್ಲೆಂ. ತಾಚೆಲಾಗಿಂ ಸೊಭಾಯ್ ಆಸಾ. ಮಾಡೆಲಿಂಗಾಚಿ ಕೂಡ್ ಆಸಾ. ಸಗ್ಳ್ಯಾ ವರ್ನಿಂ ಚಡ್ ಜಾವ್ನ್ ವಿಶ್ವಾಸ್ ಆಸಾ. ಆಪ್ಣೆಂ ತೀನ್ ವರ್ಸಾಂ ಆದಿಂ ದಿಲ್ಲ್ಯಾ ಭಾಶೆಕ್ ಪಾಳುಂಕ್ ಆಲಿಯಾಕ್ ತಾಚ್ಯಾ ಕ್ಯಾರಿಯರಾಕ್ ವಾಡಂವ್ಕ್ ಕುಮಕ್ ಕರಿಯಾಂ. ರಾಯನಾನ್ ಮತಿಂತ್ಚ್ ಚಿಂತ್ಲೆಂ.
ತಿತ್ಲ್ಯಾರ್!
"ರಾಯನ್!"
ಆಲಿಯಾನ್ ಆಪ್ಣಾಕ್ ಆಪಯಿಲ್ಲೆಂ ಆಯ್ಕೊನ್ ತಾಳೊ ಆಯ್ಕೊನ್ ಆಯಿಲ್ಲ್ಯಾ ಕುಶಿಂನ್ ರಾಯನ್ ಘುಂವ್ಲೊ.
ತಿತ್ಲೆಂಚ್!
ತಾಚ್ಯಾ ದೊಳ್ಯಾಂಕ್ ತೊಚ್ಚ್ ಪಾತ್ಯೆಲೊ ನಾ.
ಕಸಲೊಗೀ ಉಜ್ವಳ್ಚೊ ಪ್ರಕಾಸ್ ತಾಚ್ಯಾ ದೊಳ್ಯಾಂಕ್ ತೊಪ್ತಾ ತಸೊ ಜಾಲೊ.
ತಾಚ್ಯೆ ಸವೆಂ....
"ಆಲಿಯಾ!" ತೊ ಉದ್ಗಾರ್ಲೊ.
ಶಿಫಾನಾಚ್ಯಾ ಲಾಂಭ್ ದಗ್ಲ್ಯಾರ್ ಆಪ್ಣಾ ಮುಕಾರ್ ಪ್ರತ್ಯಕ್ಶ್ ಜಾಲ್ಲೆಂ ಆಲಿಯಾ ರಾಯನಾಕ್ ಸಂಪೂರ್ಣ್ ದುಸ್ರೆಂಚ್ ದಿಸ್ಲೆಂ. ಮಾತ್ಯಾ ವಯ್ಲ್ಯಾ ಕೆಸಾಂಕ್ ತಕ್ಲೆರ್ ಬಾಂದುನ್ ತಾಂಕಾಂ ಸಕಯ್ಲ್ ದೆಂವಯಿಲ್ಲೆಂ. ಆಂಗಾ ವಯ್ರ್ ತ್ಯಾ ದಗ್ಲ್ಯಾ ಶಿವಾಯ್ ದುಸ್ರೆಂ ಕಾಂಯ್ಚ್ ನಾ. ತ್ಯಾ ಪಾತಳ್ ಲೈಟ್ ಪಿಂಕ್ ಶಿಫಾನಾಚ್ಯಾ ದಗ್ಲ್ಯಾ ಭಿತರ್ ಸಗ್ಳಿ ಆಲಿಯಾಚಿ ಕೂಡ್ ಉಗ್ತಿ ಭಾಯ್ರ್ ದಿಸ್ತಾಲಿ. ಸಗ್ಳೆ ತಾಚೆ ಏಕ್ ಏಕ್ ಅಂಗ್ ಅಂಗ್ ಭಾಯ್ರ್ ದಿಸ್ತಾಲೆ ಜಾಲ್ಯಾರ್ಯ್ ಖಂಯ್ಚರ್ಗೀ ತ್ಯಾ ತಾಚಾ ಹರ್ಧ್ಯಾ ವಯ್ಲ್ಯಾ ಸೊಭಾಯೆಕ್ ಆನಿ ತಾಚ್ಯಾ ತ್ಯಾ ಚಲಿಯೆಪಣಾಕ್ ಲಿಪಯಿಲ್ಲೆಂ.
ತೊ ದಗ್ಲೊ ಆನಿ ಗೊಮ್ಟ್ಯಾಕ್ ಆಂರ್ದಾಲ್ಲೆಂ ನೆಕ್ಲೆಸ್ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ಚ್ ಆಭರಣ್ ಆಲಿಯಾಚಾ ಆಂಗಾರ್ ನಾ.
ಆತಾಂ ಹೆವ್ಶಿಂ ಆಯಿಲ್ಲ್ಯಾ ಆಲಿಯಾನ್ ಸಾಲಾಂತ್ಲ್ಯಾ ವೀಜ್ ದಿವ್ಯಾಂಕ್ ಭಂಧ್ ಕೆಲೆಂ. ಆನಿ ಮುಕ್ಲೊ ತೊ ಟೇಬಲ್ ಲ್ಯಾಂಪ್ ಜಳಯ್ಲೊ.
ತ್ಯಾ ಟೇಬಲ್ ಲ್ಯಾಂಪಾಚಾ ಮಂದ್ ಹಳ್ದುವ್ಯಾ ಉಜ್ವಾಡಾಂತ್......!
"ಮೈ ಗಾಡ್!"
ಆಲಿಯಾ ಆಪ್ಣಾ ಮುಕಾರ್ ಆತ್ತಾಂ ಸರ್ಗಾರ್ ಥಾವ್ನ್ ದೆಂವೊನ್ ಆಯ್ಲೆಂ ಮಾತ್ರ್ ಮ್ಹಳ್ಳ್ಯಾ ಪರಿಂ ರಾಯನಾಕ್ ದಿಸ್ಲೆಂ. ತ್ಯಾ ಟೇಬಲ್ ಲ್ಯಾಂಪಾಚೊ ಉಜ್ವಾಡ್ ಆಲಿಯಾಚಾ ಎಕಾ ಎಕಾ ಕೆಸಾಂ ಮಧ್ಲ್ಯಾನ್ ವ್ಹಾಳೊನ್ ಯೆತಾನಾ ತೆ ಕೇಸ್ ಭಾಂಗಾರ್ ಉಜ್ವಳ್ಚ್ಯಾ ಪರಿಂ ದಿಸ್ತಾಲೆ. ಆಲಿಯಾಚಾ ಪಾಟ್ಲ್ಯಾನ್ ಥಾವ್ನ್ ಯೆಂವ್ಚೊ ತೊ ಉಜ್ವಾಡ್ ತಾಚ್ಯಾ ಕುಡಿಚ್ಯಾ ಆಕಾರಾಕ್ ತ್ಯಾ ಶಿಫಾನಾಚಾ ದಗ್ಲ್ಯಾ ಭಿತರ್ಲ್ಯಾನ್ ಥಾವ್ನ್ ದಾಖಯ್ತಾನಾ ಆಲಿಯಾಚಿ ಕೂಡ್ ತ್ಯಾ ದಗ್ಲ್ಯಾ ಭಿತರ್ ಉಜ್ಯಾಂತ್ ಪೆಟ್ತಾ ಮ್ಹಳ್ಳ್ಯಾ ಪರಿಂ ದಿಸ್ತಾಲೆಂ. ತ್ಯಾ ಭಾಯ್ರ್.....
ತಾಚ್ಯಾ ತ್ಯಾ ದೋನ್ ಜಾಂಗ್ಯಾಂಚಾ ಮಧ್ಲ್ಯಾನ್ ಥಾವ್ನ್ ಯೆಂವ್ಚೊ ತೊ ಪಾಟ್ಲೊ ಉಜ್ವಾಡ್! ತ್ಯಾ ಲ್ಹಾನ್ಶ್ಯಾ ತ್ರಿಕೋನ್ ಜಾಗ್ಯಾ ಥಾವ್ನ್! ದರ್ಯಾಂತ್ ಬುಡ್ಚೊ ಸಾಂಜೆಚೊ ತಾಂಬ್ಡ್ಯಾ ಕಿರ್ಣಾಂಚೊ ಸುರ್ಯೊ ಜಸೊ!
"ಉಫ್!" ರಾಯನ್ ಸೋಫಾಕ್ ವೊಣ್ಕಾಲೊ
ರಾಯನಾನ್ ಪಯ್ಲ್ಯಾ ಪಾವ್ಟಿಂ ಆಪ್ಲ್ಯಾ ಜಿವಿತಾಂತ್ ಅಸಲಿ ಸೊಭಾಯ್ ಪಳೆಲ್ಲಿ!
ತೊ ಆಲಿಯಾಕ್ಚ್ ಪಳಂವ್ಕ್ ಪಡ್ಲೊ.
ಆಪುಣ್ ಖಂಯ್ಚರ್ಗೀ ಹ್ಯಾ ಸಂಸಾರಾ ಥಾವ್ನ್ ಪಯ್ಸ್ ಆಸಾಂ ಮ್ಹಳ್ಳ್ಯಾ ಪರಿಂ ತಾಕಾ ಜಾತಾನಾ.....
"ಕಿತೆಂ ಮ್ಹಣ್ತಾಯ್ ರಾಯನ್? ಹಾಂವ್ ಮಾಡೆಲಾ ಪರಿಂ ದಿಸ್ತಾಂ?"
"ಮಾಡೆಲ್....?" ಆಲಿಯಾಕ್ ಹೊ ಸಬ್ದ್ ಮಸ್ತ್ ಲ್ಹಾನ್ ಕರ್ತಾ ತಶೆಂ ರಾಯನಾಕ್ ದಿಸ್ಲೆಂ. ತಾಕಾ ಆಲಿಯಾಚಾ ಸವಾಲಾಕ್ ಕಿತೆಂ ಜವಾಬ್ ದಿಂವ್ಚಿ ತಿ ಕಳ್ಳಿನಾ.
ಆತಾಂ ಆಲಿಯಾ ಸವ್ಕಾಸ್ ರಾಯನಾಚಾ ಲಾಗಿಂ ಆಯ್ಲೆಂ.
ಭೋವ್ ಲಾಗಿಂ!
ತಿತ್ಲೆಂಚ್!
ತೊ ಆತಾಂ ಆಪ್ಣಾಕ್ ಕಳಿತ್ ನಾತ್ಲೆಲ್ಯಾ ಪರಿಂಚ್ ಆಲಿಯಾಕ್ ಮುಕಾರ್ ಬಾಗ್ವಾಲೊ!
ರಾಯನಾಚೊ ಉಸ್ವಾಸ್ ಬಾಂದ್ಲ್ಲ್ಯಾ ಪರಿಂ ಜಾವ್ನ್ ತಾಚ್ಯಾ ಕಾಳ್ಜಾಚಿ ಉಡಿ ಜ್ಯೋರಾನ್ ಉಡೊಂಕ್ ಲಾಗ್ಲಿ.
ಆಪ್ಣಾ ಮುಕಾರ್ ಯೇವ್ನ್ ರಾವ್ಲ್ಲ್ಯಾ ಆಲಿಯಾಚಾ ತೊಂಡಾಕ್ ರಾಯನಾನ್ ಆಪ್ಲಿ ತಕ್ಲಿ ಉಭಾರುನ್ ಪಳೆಲೆಂ. ಥಂಯ್ ಥಾವ್ನ್ ಸವ್ಕಾಸ್ ತಾಚಿ ನದರ್ ಆಲಿಯಾಚಾ ಗೊಮ್ಟೆರ್ ಚರ್ಲಿ. ಗೊಮ್ಟೆರ್ ಥಾವ್ನ್ ತಾಚ್ಯಾ ಹರ್ಧ್ಯಾರ್. ಹರ್ಧೆಂ ಸಗ್ಳೆಂಚ್ ವಿಣ್ಗೆಂ ತರ್ಯ್ ತ್ಯಾ ಹರ್ಧ್ಯಾಕ್ ದಾಂಪ್ಲ್ಲ್ಯಾ ಪರಿಂ!
ರಾಯನಾಚೆ ದೊಳೆ ತ್ಯಾ ಹರ್ಧ್ಯಾ ವಯ್ಲ್ಯಾ ಸೊಭಾಯೆಕ್ ಸೊಧುಂಕ್ ಲಾಗ್ಲೆ.
ತೊ ತ್ಯಾ ಸೊಭಾಯೆಕ್ ಸೊಧುಂಕ್ ಸಕ್ಲೊ ನಾ. ತೊ ಸೊಧುನ್ ಸೊಧುನ್ ಥಕ್ಲೊ.
ಥಂಯ್ ಥಾವ್ನ್ ತಾಚಿ ನದರ್ ಸಕಯ್ಲ್ ದೆಂವ್ಲಿ.
ತ್ಯಾ ಆಲಿಯಾಚಾ ಪೊಟಾರ್!
ತ್ಯಾ ಪೊಟಾರ್ ಏಕ್ ಸರ್ಗಾ ವಯ್ಲ್ಯಾ ಅಮೃತಾಚಿ ಬಾಂಯ್ ಆಸಾ ಮ್ಹಳ್ಳ್ಯಾಪರಿಂ! ತ್ಯಾ ಬಾಂಯ್ಚಿ ಗೂಂಡಾಯ್ ಮೆಜುಂಕ್ ತೊ ಆಶೆಲೊ. ಸಾದ್ಯ್ ಜಾಲೆಂ ನಾ.
ಉಪ್ರಾಂತ್!
ಸವ್ಕಾಸ್ ಸಕಯ್ಲ್ ದೆಂವ್ಲ್ಲಿ ತಾಚಿ ನದರ್ ದುಸ್ರೆಂ ಕಿತೆಂಗೀ ಸೊಧುಂಕ್ ಲಾಗ್ಲಿ.
ಪುಣ್ ನಾ!
ತಾಣೆಂ ಸೊಧ್ಚೆಂ ತೆಂ ತಾಕಾ ದಿಸ್ಲೆಂ ನಾ!
ತ್ಯಾ ಜಾಂಗ್ಯಾಂ ಮಧ್ಲ್ಯಾ ಲ್ಹಾನ್ ಜಾಗ್ಯಾ ಥಾವ್ನ್ ಪಾಟ್ಲೊ ಟೇಬಲ್ ಲ್ಯಾಂಪಾಚೊ ಉಜ್ವಾಡ್ ತಾಚ್ಯಾ ದೊಳ್ಯಾಂಕ್ ತೊಪ್ತಾಲೊ ಶಿವಾಯ್ ತ್ಯಾ ಉಜ್ವಾಡಾ ವಯ್ರ್ ಕಿತೆಂಚ್ ತಾಕಾ ದಿಸ್ಲೆಂ ನಾ!
ಆಲಿಯಾ ಆಪ್ಣಾಚ್ಯಾ ಇತ್ಲ್ಯಾ ಲಾಗಿಂ ಆಸೊನ್ಯ್ ಆಲಿಯಾನ್ ಆಪ್ಲ್ಯಾ ಚಲಿಯೆಪಣಾಚಾ ಸೊಭಾಯೆಕ್ ಕಶೆಂ ಆನಿ ಖಂಯ್ ಲಿಪಯ್ಲಾಂ ತೆಂ ರಾಯನಾಕ್ ಕಳ್ಳೆಂ ನಾ.
ತರ್ಯ್ ತಾಣೆಂ ಆಪ್ಲಿಂ ಸೊಧ್ನಾಂ ರಾವಯ್ಲಿಂ ನಾಂ. ತ್ಯಾ ಭಾಂಗ್ರಾಳ್ಯಾ ಉಜ್ವಾಡಾಂತ್ ತಾಣೆಂ ಸೊಧ್ಲೆಂ ಆನಿ ಸೊಧ್ಲೆಂ. ಪುಣ್....! ನಾ! ತಾಣೆಂ ಸೊಧ್ಚೆಂ ತಾಕಾ ಲಾಬ್ಲೆಂ ನಾ.
ಆತಾಂ ರಾಯನಾನ್ ಆಪ್ಲಿ ನದರ್ ಸಕಯ್ಲ್ ದೆಂವಯ್ಲಿ.
ತಾಚ್ಯಾ ಸಕಯ್ಲ್!
ಸೊಭಿತ್ ತೆ ಉಜ್ವಳ್ಚೆ ಪಾಂಯ್!
"ಉಫ್!" ಉಸ್ವಾಸ್ ಸೊಡ್ಲ್ಲೊ ರಾಯನ್ ಪರ್ತ್ಯಾಕ್ ಪಾಟಿಂ ಸೊಫಾಕ್ ವೊಣ್ಕಾಲೊ.
ತಿತ್ಲೆಂಚ್!
ಆಲಿಯಾ ಆತಾಂ ಥಂಯ್ ಥಾವ್ನ್ ಭಿತರ್ ಚಲ್ಲೆಂ.
ಥೊಡ್ಯಾಚ್ ವೆಳಾನ್ ತೆಂ ಬೆಡ್ರೂಮಾ ಥಾವ್ನ್ ನ್ಹೆಸೊನ್ ಭಾಯ್ರ್ ಆಯ್ಲೆಂ. ಸಾಲಾಂತ್ಲೆ ವೀಜ಼್ ದಿವೆ ತಾಣೆಂ ಜಳಯ್ಲೆ.
"ಹಾಂ ರಾಯನ್!" ಆಲಿಯಾ ಆತಾಂ ರಾಯನಾಚಾ ಬಗ್ಲೆಕ್ ಯೇವ್ನ್ ಬಸ್ಲೆಂ. ತಾಚೊ ಹಾತ್ ಉಟೊನ್ ಸವ್ಕಾಸ್ ರಾಯನಾಚಾ ಪಾಂಯಾರ್ ಬಸ್ಲೊ.
ತಿತ್ಲೆಂಚ್!
ರಾಯನ್ ಸವ್ಕಾಸ್ ಮುಕಾರ್ ಬಾಗ್ವಲೊ.
"ಆತಾಂ ಸಾಂಗ್ ಆಲಿಯಾ.... ತುಕಾ ಕಿತೆಂ ಜಾಯ್?"
ರಾಯನಾಚಾ ತೊಂಡಾ ಥಾವ್ನ್ ಆಲಿಯಾ ಹೆಂಚ್ ಆಯ್ಕೊಂಕ್ ಆಶೆತಾಲೆಂ. ತಾಣೆಂ ಉಡಯಿಲ್ಲೊ ಫಾತರ್ ಸಾರ್ಕ್ಯಾ ಜಾಗ್ಯಾರ್ ಪಡ್ಲ್ಲೊ!
"ತುಕಾ ಮ್ಹಜ್ಯಾ ವಯ್ರ್ ಭರ್ವಸೊ ಆಸಾ?" ಆಲಿಯಾನ್ ವಿಚಾರ್ಲೆಂ.
"ಪಳೆ ಆಲಿಯಾ!" ರಾಯನಾನ್ ಆಲಿಯಾಚಾ ದೊಳ್ಯಾಂಕ್ಚ್ ಪಳೆಲೆಂ. "ಹಾಂವ್ ಏಕ್ ಬಿಜ್ನೆಸ್ಮ್ಯಾನ್! ತಶೆಂ.....!" ಮುಕಾರ್ ಕಿತೆಂಗೀ ಉಲಂವ್ಕ್ ವೆಚ್ಯಾ ರಾಯನಾಚೆಂ ತೋಂಡ್ ಭಂಧ್ ಜಾಲೆಂ.
ತಾಚೆಂ ಸೆಲ್ಪೋನ್ ವಾಜೊಂಕ್ ಲಾಗ್ಲ್ಲೆಂ.
"ಏಕ್ ಮಿನಿಟ್!"
ರಾಯನಾನ್ ಪೋನಾ ವಯ್ಲೆಂ ನಂಬರ್ ಪಳೆವ್ನ್ ಪೋನ್ ಆನ್ ಕೆಲೆಂ.
"ಹಾಂ ಸಾವಂತ್..... ಸಾಂಗ್!"
"ರಾಯನ್.... ಮ್ಹಾಕಾ ಖಬಾರ್ ಮೆಳ್ಳ್ಯಾ ಕೀ ಅಮೃತಾ ಇಕ್ಬಾಲಾಚಾ ಭಿಯಾಂನ್ ತುಕಾ ಮಧೆಂಚ್ ಡ್ರಾಪ್ ಕರುನ್ ಸಿಂಘಾನಿಯಾಚಾ ಫಿಲ್ಮಾಕ್ ಸೈನ್ ಕರ್ಚ್ಯಾರ್ ಆಸಾ! ಇಕ್ಬಾಲಾನ್ ತಾಕಾ ಭೆಶ್ಟಾಯ್ಲಾಂ ಆಸ್ತೆಲೆಂ!" ಸಾವಂತ್ ಉಲಯ್ಲೊ.
"ಕೋಣ್? ಕುಲ್ದೀಪ್......?"
"ಹಾಂ!"
"ಮ್ಹಾಕಾ ಪಯ್ಲೆಂಚ್ ದುಬಾವ್ ಆಸ್ಲ್ಲೊ.... ಆಶೆಂಚ್ ಕಾಂಯ್ ತರ್ಯ್ ಆಸ್ತೆಲೆಂ ಮ್ಹಣ್!"
"ಇಕ್ಬಾಲಾನ್ ಕುಲ್ದೀಪಾಚಾ ಪ್ರಾಜೆಕ್ಟಾಂತ್ ಆಪ್ಲೆ ಪಯ್ಶೆ ಘಾಲುಂಕ್ ಚಿಂತ್ಲಾಂ ಆಸ್ತೆಲೆಂ!"
"ಇಕ್ಬಾಲ್.....!"
"ಆತಾಂ ಕಿತೆಂ ಕರ್ಯಾಂ.....?"
ಸಾವಂತಾಚಾ ಸವಾಲಾಕ್ ಸವ್ಕಾಸ್ ಲೋವ್ ತಾಳ್ಯಾನ್ ರಾಯನ್ ಹಾಸ್ಲೊ.
ತಿತ್ಲ್ಯಾರ್!
ರಾಯನಾಚಾ ಲಾಗಿಂ ಬಸ್ಲೆಲೆಂ ಆಲಿಯಾ ರಾಯನಾಕ್ ಆನಿಕ್ಯ್ ಲಾಗಿಂ ಆಯ್ಲೆಂ. ತಾಚ್ಯೆ ಬಾವ್ಳೆ ರಾಯನಾಕ್ ಉಮೆ ದೀಂವ್ಕ್ ಲಾಗ್ಲೆ.
"ಹಾಂವ್ ಬಿಜ್ನೆಸ್ ಮ್ಯಾನ್ ಸಾವಂತ್! ಎ ಪ್ಯೂರ್ ಬಿಜ್ನೆಸ್ ಮ್ಯಾನ್! ಮ್ಹಜ್ಯಾ ಬಿಜ್ನೆಸಾಂತ್ ಹಾಂವ್ ಕಶೆಂ ಫಾಯ್ದೊ ಜೊಡುಂಕ್ ಜಾಯ್ ಮ್ಹಳ್ಳ್ಯಾ ವಿಶಯಾಂತ್ ಪಯ್ಲೆಂ ಚಿಂತಾ. ಮ್ಹಜ್ಯಾ ವಾಟೆರ್ ಆಡ್ ಆಯಿಲ್ಲ್ಯಾಂಕ್ ಹಾವೆಂ ಎದೊಳ್ ಬೊಗ್ಸುಂಕ್ ನಾ!" ಮ್ಹಳ್ಳೊ ರಾಯನ್ ಥೊಡೊ ಚಿಂತ್ಲ್ಲೊ "ತುಂ ಏಕ್ ಕಾಮ್ ಕರ್!"
"ಕಿತೆಂ.....?"
"ಆತಾಂಚ್ ವಚ್ ಆನಿ ಅಮೃತಾಚೆಂ ಕಾಂಟ್ರ್ಯಾಕ್ಟ್ ಕ್ಯಾನ್ಸಲ್ ಕರ್! ತಾಚೆಂ ಪೇಮೆಂಟ್ ತಾಕಾ ಕಿತ್ಲೆಂ ದೀಂವ್ಕ್ ಪಡ್ತಾ ತೆಂ ದೀ ಆನಿ ಹೊ ಚಾಪ್ಟರ್ ಕ್ಲೋಸ್ ಕರ್!"
"ಹಾಂತುಂ ತುಕಾ ಮಸ್ತ್ ಲುಕ್ಸಾಣ್ ಜಾತಾ ರಾಯನ್.....!"
"ಹೊ ರಾಯನ್ ಜಲ್ಮಾಲ್ಲೊ ಫಕತ್ತ್ ಜಿಕ್ಚ್ಯಾ ಖಾತಿರ್! ತುಂ ಹಾವೆಂ ಸಾಗ್ಲ್ಲ್ಯಾ ಪರಿಂ ಕರ್!"
ರಾಯನಾನ್ ಆಪ್ಲೆಂ ಪೋನ್ ಭಂಧ್ ಕೆಲೆಂ.
ತೊ ಆತಾಂ ಆಲಿಯಾಚಾ ಕುಶಿನ್ ಘುಂವ್ಲೊ.
"ಆಲಿಯಾ!" ತಾಣೆಂ ಆಲಿಯಾಚೊ ಹಾತ್ ಆಪ್ಲ್ಯಾ ಹಾತಾಂತ್ ಘೆತ್ಲೊ. "ತುಕಾ ತುಜೆಂ ಕ್ಯಾರಿಯರ್ ಬಾಂದುಂಕ್ ಜಾಯ್?" ರಾಯನಾನ್ ಆಲಿಯಾಕ್ಚ್ ಆಪ್ಲೆ ದೊಳೆ ಜೊಕುನ್ ಆಪ್ಲ್ಯಾ ವೊಂಟಾರ್ ಮಂದ್ ಹಾಸೊ ಹಾಡ್ಲ್ಯೊ.
ರಾಯನಾಚಾ ಸವಾಲಾಕ್ ಆಲಿಯಾನ್ ಕಾಂಯ್ ಜವಾಬ್ ದಿಲಿ ನಾ. ತೆಂ ತಶೆಂಚ್ ರಾಯನಾಕ್ ಪಳೆತಾಲೆಂ.
"ಮ್ಹಜ್ಯಾ ಫಿಲ್ಮಾಂತ್ ಆಕ್ಟಿಂಗ್ ಕರ್ತಾಯ್?"
ಆಲಿಯಾಚಾ ತ್ಯಾ ಸೊಭಿತ್ತ್ ದೊಳ್ಯಾಂಕ್ ರಾಯನಾನ್ ಆಪ್ಲಿ ದೀಶ್ಟ್ ಜೊಕುನ್ ವಿಚಾರ್ತಾನಾ ಆಲಿಯಾನ್ ತಶೆಂಚ್ ಆಪ್ಲಿ ತಕ್ಲಿ ರಾಯನಾ ತೆವ್ಶಿಂ ಬಾಗಾಯ್ಲಿ.
*****************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9, 10, 11, 12, 13
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
