ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ಏಕ್
ಜಿವಿತ್ ತುಕಾ ಆಪಯ್ತಾ
ಆವಸ್ವರ್ ಚ್ಯಾರ್: ಆಲಿಯಾ
ಮೆಡಿಕಲ್ ಕಾಲೇಜಿಚೆಂ ಶಿಕಾಪ್ ಅರ್ಧ್ಯಾರ್ಚ್ ಸೊಡ್ಲ್ಲೆಂ ಆಲಿಯಾ, ಆಪ್ಲ್ಯಾ ಕಾಳ್ಜಾಂತ್ಲ್ಯಾ ಆಶೆಕ್ ಮಾತ್ರ್ ಸಾಂಗಾತ್ ದೀವ್ನ್ ಉಭೆಂ ಜಾತಾನಾ, ಆಪ್ಲ್ಯಾ ಧುವೆಕ್ ಹಾರ್ಟ್ ಸ್ಪೆಶಲಿಸ್ಟ್ ಸರ್ಜನ್ ಕರುಂಕ್ ಜಾಯ್ ಮ್ಹಳ್ಳಿ ಶಬೀರಾಚಿ ಆಶಾ, ತ್ಯಾ ವಾರ್ಯಾ ವೆಂಗೆಂತ್ ವಿಲೀನ್ ಜಾಲಿ. ಆಲಿಯಾಚಾ ವಾರ್ಯಾರ್ ಉಬ್ಚ್ಯಾ ತಾಚ್ಯಾ ಆಶೆ ಪರ್ಮಾಣೆಂ ಶಬೀರಾನ್ ತಾಕಾ ಪೈಲಟ್ ಕರುಂಕ್ ಚಿಂತ್ಲೆಂ.
ಪುಣ್ ತಾಕಾ ತಾಚ್ಯಾ ಧುವೆಚೆರ್ ದುಬಾವ್ ಆಸ್ಲ್ಲೊ.
"ತೆಂ ತುಕಾ ಜಾಂವ್ಚೆಂ ನಾ ಬೇಟಾ..... ತಾಚ್ಯೆ ವಯ್ಲ್ಯಾನ್ ತೆಂ ಇತ್ಲೆಂ ರಿಸ್ಕೀ... ತುಜ್ಯಾ ಮುಕ್ಲ್ಯಾ ಜಿವಿತಾಕ್ ತೆಂ ಉಪ್ಕಾರಾಕ್ ಪಡ್ಚೆಂ ನ್ಹಯ್. ತುಂ ಏಕ್ ಚೆಡುಂ, ತುವೆಂ ತುಜೆಂ ಮ್ಹಳ್ಳೆಂ ಕುಟಾಮ್ ಬಾಂದುಂಕ್ ಆಸಾ. ಕುಟ್ಮಾಂತ್ ಮೋಗ್ ವ್ಹಾಳಂವ್ಕ್ ಆಸಾ. ತುಜ್ಯಾ ಅಮ್ಮೀಕ್ ತುವೆಂ ಪಳಯ್ಲಾಂಯ್.....!" ಆಲಿಯಾಚಾ ನವ್ಯಾ ವಿಂಚವ್ಣೆಂತ್ ಆಪ್ಲೊ ಸಹಕಾರ್ ಶಬೀರಾನ್ ದೀಂವ್ಕ್ ಚಿಂತ್ಲ್ಲೊ ಜಾಲ್ಯಾರ್ಯ್ ಧುವೆಕ್ ಬೂದ್ ಸಾಂಗೊಂಕ್ ತೊ ವಿಸ್ರಾಲೊ ನಾ.
"ಅಮ್ಮಿಚೊ ವಿಶಯ್ ದುಸ್ರೊ ಅಬ್ಬೂ.......! ಪುಣ್ ಮ್ಹಾಕಾ ಘರಾ ಭಿತರ್ ರಾವೊನ್ ಜೀವನ್ ಕಾಡುಂಕ್ ನಾಕಾ, ಮ್ಹಾಕಾ ಸಕ್ಡಾಂ ಪರಿಂ ಮ್ಹಜೆಂ ಮ್ಹಳ್ಳೆಂ ಆಸ್ಥಿತ್ವ್ ರಚುಂಕ್ ಜಾಯ್....!" ಆಲಿಯಾನ್ ಆಪ್ಲ್ಯಾ ಬಾಪಾಯ್ಚ್ಯಾ ಉತ್ರಾಂಚೊ ದುಸ್ರೊಚ್ ಅರ್ಥ್ ಸಮ್ಜೊನ್ ಘೆತ್ಲೊ.
ಹೆಂ ಕಳಿತ್ ಜಾಲ್ಲೊ ಶಬೀರ್, "ಹಾವೆಂ ಸಾಂಗ್ಲ್ಲ್ಯಾಚೊ ಮತ್ಲಾಬ್ ತೊ ನ್ಹಯ್ ಬೇಟಾ....! ತುಂ ಸಮ್ಜೊಂಕ್ ನಾಂಯ್. ತುಂ ಫಾಲ್ಯಾಂ ಎಕ್ಲ್ಯಾಚಿ ಬಾಯ್ಲ್ ಜಾತಾಯ್, ಎಕ್ಲ್ಯಾಚಿ ಆವಯ್ ಜಾತಾಯ್. ತೆದಾಳಾ ತುಜೆಂ ಜೀವನ್ ಸುಖಾ ಸಂತೊಸಾನ್ ವಚೊಂಕ್....."
"ಕಾಂಯ್ ಜಾಯ್ನಾಂ ಅಬ್ಬೂ!" ಬಾಪಾಯ್ಚ್ಯಾ ಉತ್ರಾಂಕ್ ತುಟವ್ನ್ ಆಲಿಯಾ ಮಧೆಂಚ್ ಉಲಯ್ಲೆಂ. ".....ತೆಂ ಆಮ್ಚೆಂ ಚಿಂತಾಪ್ ಮಾತ್ರ್. ಏಕ್ ಚಲಿ ಎಕ್ಲ್ಯಾಚಿ ಬಾಯ್ಲ್ ಎಕ್ಲ್ಯಾಚಿ ಆವಯ್ ಜಾತಾನಾ, ತಾಂಚೆ ಖಾತಿರ್ ತಿಣೆಂ ಆಪ್ಲೆಂ ಜಿವಿತ್ ಸಾಕ್ರಿಫಿಸ್ ಜಾವ್ನ್ ಬೆಟಂವ್ಕ್ ಜಾಯ್ ಮ್ಹಣೊನ್ ಚಿಂತ್ಚೆಂ ಚಿಂತಾಪ್, ತೆಂ ಏಕ ಪ್ರಕಾರಾಚೆಂ.........., ನ್ಯಾರೋ ಮೈಂಡೆಡ್ಚಿಂತಾಪ್. ಕುಟಾಮ್ ಮ್ಹಣ್ತಾನಾ ಹಾಂತುಂ ಸಗ್ಳಿಂ ಬರಾಬರ್.......!"
ಆಲಿಯಾಚಾ ಜಾಣ್ವಾಯೆಚ್ಯಾ ಉತ್ರಾಂನಿ ಜಾಣ್ವಾಯೆನ್ ಭರ್ಲಲೊ ವಿಚಾರ್ ಆಸ್ಲ್ಲೊ. ತ್ಯಾ ವಿಚಾರಾಕ್ ತೆಂ ಆಪ್ಲ್ಯಾ ಜಿವಿತಾಂತ್ ಲಾಗು ಕರುಂಕ್ ಚಿಂತಾಲೆಂ.
ಆಪ್ಲ್ಯಾ ಧುವೆಚೆಂ ಚಿಂತಾಪ್ ಆನಿ ತ್ಯಾ ಚಿಂತ್ಪಾ ಪಾಟ್ಲೊ ವಿಚಾರ್ ಶಬೀರಾಕ್ ಸಾರ್ಕೊ ಮ್ಹಣೊನ್ ದಿಸ್ಲೊ. ಪುಣ್ ಆಪ್ಣೆಂ ಜಿಯೆಂವ್ಚ್ಯಾ ಸಮಾಜೆಕ್ ಮಧೆಂ ಹಾಡ್ತಾನಾ, ಆಲಿಯಾಚೆಂ ಹೆಂ ಚಿಂತಾಪ್ ಕಿತ್ಲೆಂ ಸಾರ್ಕೆಂ ಮ್ಹಳ್ಳೆಂ ತಾಕಾ ಸಮ್ಜಾಲೆಂ ನಾ.
"ಆಜ್ ಪಾಸೊನ್ ಮ್ಹಜ್ಯಾ ಕುಟ್ಮಾಕ್ ಹಾವೆಂಯ್ ತಶೆಂಚ್ ಚಲಯ್ಲಾಂ ಆಲಿಯಾ. ಪುಣ್, ದೀಸ್ ಆನಿ ವೇಳ್ ಮ್ಹಳ್ಳೊ ತೊ, ಮನ್ಶ್ಯಾ ಸಾಂಗಾತಾ ಕಾಳಾ ಥಾವ್ನ್ ಕಾಳಾಕ್ ಎಕಾಚ್ಚ್ ಮಾಫಾನ್ ರಾವಾನಾ. ......ಕಿತೆಂಯ್ ಜಾಂವ್ದಿ. ಮ್ಹಜ್ಯಾ ಉರ್ಲೆಲ್ಯಾ ಭುರ್ಗ್ಯಾಂ ಪರಿಂ ತುವೆಂಯ್ ಸಮಾಜೆಂತ್ ಏಕ್ ವ್ಯಕ್ತಿ ಜಾವ್ನ್ ಜಿಯೆಂವ್ಕ್ ಜಾಯ್ ಮ್ಹಳ್ಳೊಚ್ ಮ್ಹಜೊ ಉದ್ದೇಶ್ ಶಿವಾಯ್, ತುಂ ಚೆಡುಂ ಮ್ಹಣೊನ್ ತುಕಾ ಪಾಟಿಂ ದವರ್ಚೊ ಖಂಡಿತ್ ನ್ಹಯ್. ಚೆಡುಂ ಆನಿ ಚೆಡ್ಯಾ ಮಧೆಂ ಹಾಂವ್ ಬರಾಬರ್ ಅಂತಸ್ತ್ ದೆಖ್ತಾಂ. ಪಳೆಯಾಂ....... ಖಂಡಿತ್ ಏಕ್ ದೀಸ್ ತುಂ ಪೈಲೆಟ್ ಜಾತೆಲೆಂಯ್!"
ಶಬೀರಾನ್ ಆಪ್ಲ್ಯಾ ಧುವೆಕ್ ಲಾಗೊನ್ ಆಜ್ ತಾಚ್ಯಾಚ್ ಆಶೆಕ್ ಬದ್ಲಿಲ್ಲೆಂ. ತಾಚ್ಯ್ ತಾಚ್ಯಾ ಧುವೆಚಾ ಆಶೆ ಪರ್ಮಾಣೆಂ ತಾಚ್ಯಾ ಮತಿಂತ್ಲಿ, ಆಲಿಯಾನ್ ಸರ್ಜನ್ ಜಾಂವ್ಚಿ ಆಶಾ ಕಾಡುನ್ ಉಡವ್ನ್, ತಾಂತುಂ, ತಾಚ್ಯಾಚ್ ಧುವೆಚಿ, ತಾಣೆಂ ಪೈಲೆಟ್ ಜಾಂವ್ಚಿ ಆಶಾ ತಾಣೆಂ ಭರ್ಲಿ.
ಆವಯ್ ಬಾಪಾಯ್ಚಾ ಮತಿಂತ್, ಭುರ್ಗ್ಯಾಂ ವಿಶಿಂ ಖಂತ್ ಹುಸ್ಕೊ, ತಾಂಚಾ ಫುಡಾರಾಚಿಂ ಚಿಂತ್ನಾಂ ಖಂಡಿತ್ ಆಸ್ತಾತ್. ಥೊಡ್ಯಾ ವಿಶಯಾನಿಂ ಆವಯ್ ಬಾಪಾಯ್ನ್ ಸಾಂಗ್ಲೆಲ್ಯಾ ಪರಿಂ ಭುರ್ಗ್ಯಾಂನಿಂ ಆಯ್ಕೊಂಕ್ ಪಡ್ತಾ ತರ್ ಥೊಡ್ಯಾ ವಿಶಯಾನಿಂ ಭುರ್ಗ್ಯಾಂನಿಂ ಸಾಂಗ್ಲೆಲ್ಯಾ ಪರಿಂ ಆವಯ್ ಬಾಪಾಯ್ನ್ ಆಯ್ಕೊಂಕ್ ಪಡ್ತಾ. ಹೆಂ ಆಪ್ಲೆಂ ದುರ್ಬಾಗ್ಯ್ಪಣ್ ಮ್ಹಣೊನ್ ಖರ್ಗೊಂಚೆಂ ನಿಜಾಯ್ಕ್ಯ್ ನೆಣಾರ್ಪಣ್. ಜಿವಿತ್ ಹರ್ಯೆಕ್ಲ್ಯಾಕ್ ಸಾರುಂಕ್ ಆಸಾಚ್ಚ್. ಹಾಂತುಂ ಕೊಣಾಯ್ಕ್ಯ್ ಕಾಂಯ್ ರಿಯಾಯಿತಿ ನಾ. ಆಶೆಂ ಆಸ್ತಾನಾ ಎಕ್ಲ್ಯಾಚಾ ಜಿವಿತಾ ವಯ್ರ್ ದುಸ್ರ್ಯಾನ್ ಹಕ್ಕ್ ದಾಖಂವ್ಚೆಂ ತಾಚ್ಯಾ ಜಿವಿತಾ ವಾಟೆರ್ ಪಾತರ್ ಜಾಂವ್ಚೆಂ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ ನಾ. ಹರ್ಯೆಕ್ ಜೀವಿ ತಾಚೆಂ ತಾಚೆಂ ಕುಟಾಮ್ ಖುದ್ದ್ ಜಾವ್ನ್ ಬಾಂದುಂಕ್ಯ್ ಜಾಣಾಂ ಮೊಡುಂಕ್ಯ್ ಜಾಣಾಂ. ಆಶೆಂ ಆಸ್ತಾನಾ ಹ್ಯಾ ಬಾಂದ್ಚಾ ಆನಿ ಮೊಡ್ಚಾ ವಾವ್ರಾಂತ್ ಕೋಣ್ ಕಿತ್ಲೊ ವಯ್ರ್ ಆನಿ ಕೋಣ್ ಕಿತ್ಲೊ ಸಕಯ್ಲ್ ಯಾ ಕೋಣ್ ಕಿತ್ಲೊ ಊಂಚ್ ಆನಿ ಕೋಣ್ ಕಿತ್ಲೊ ನೀಚ್ ಮ್ಹಳ್ಳೆಂ ಚಿಂತಾಪ್ಚ್ ಉದೆನಾಂ. ಜರ್ತರ್ ಕೋಣ್ಯ್ ಹೆಂ ಚಿಂತಾಪ್ ಚಿಂತಾ ಜಾಲ್ಯಾರ್ ಭೋವ್ಶ್ಯಾ ತೊಚ್ಚ್ ಆಪ್ಣೆ ಜಿಯೆಂವ್ಚ್ಯಾ ಸಮಾಜೆಂತ್ ಸಕ್ಡಾಂಚಾ ಪಾಯಾಂಕ್ ಆದಾಳ್ಚೊ ವಾಟೆ ವಯ್ಲೊ ಫಾತರ್!
ಪುಣ್ ಆಜ್......?
ಆಜ್ ಕೋಣ್ ಕೊಣಾಚಾ ವಾಟೆರ್ ಫಾತರ್ ಜಾಲ್ಲೊ.....?
ಪೈಲೆಟ್ ಜಾಂವ್ಚೆಂ ಸಪಾಣ್ ವಾ ಇಚ್ಚಾ ಆಲಿಯಾಕ್ ತಾಚ್ಯಾ ಜಲ್ಮಾ ಥಾವ್ನ್ ನಾತ್ಲೆಲಿ. ತೆಂ ಫಕತ್ತ್ ತ್ಯಾ ವಾರ್ಯಾರ್ ಉಬೊಂಕ್ ಆಶೆತಾಲೆಂ.
ವ್ಹಯ್!ತ್ಯಾ ಮೊಳಾಬಾ ಪಂದಾ, ..........ತ್ಯಾ ಸುಕ್ಣ್ಯಾಂ ಪರಿಂ ಸ್ವತಂತ್ರ್, ಕೊಣಾಯ್ಚಿಯ್ ಕಾಂಯ್ ಫಿಕಿರ್ ನಾಸ್ತಾಂ.....! ಹ್ಯಾಚ್ ಆಶೆಕ್ ಲಾಗೊನ್ ತಾಕಾ ಆತಾಂ ಪೈಲೆಟ್ ಜಾಂವ್ಚಿ ಉರ್ಭಾ ಆಯಿಲ್ಲಿ.
ಆಲಿಯಾ ಬೆಷ್ಟೆಂ ಆಶೆಂಚ್ ಆಪ್ಲ್ಯಾ ಕುಡಾಚೆಂ ಜನೆಲ್ ಉಗ್ತೆಂ ಕರುನ್, ತ್ಯಾ ಜನೆಲಾ ಥಾವ್ನ್ ಆಪ್ಲಿ ದೀಶ್ಟ್ ಭಾಯ್ರ್ ಧಾಂವ್ಡಾವ್ನ್, ತೆಂ ವೊರಾಂ ವೊರಾಂ ಪಾಶಾರ್ ಕರ್ತಾಲೆಂ. ತ್ಯಾ ಉಗ್ತೆಂ ಕೆಲ್ಲ್ಯಾ ಜನೆಲಾ ಥಾವ್ನ್ ’ಜಪ್ಪ್’ ಕರುನ್ ತಾಚ್ಯಾ ಕುಡಾ ಭಿತರ್ ಮಾರ್ಚೆಂ ವಾರೆಂ ತಾಚ್ಯಾ ಮತಿಕ್ ಚಡ್ ಪ್ರಶಾಂತ್ ಆನಿ ಪ್ರಫುಲ್ಲ್ ಕರ್ತಾಲೆಂ. ಧರ್ಣಿ ಥಾವ್ನ್ ಚವ್ತ್ಯಾ ಮಾಳಿಯೆಚಾ ಉಭಾರಾಯೆರ್ ವ್ಹಾಳೊನ್ ಯೆಂವ್ಚೆಂ ತೆಂ ಥಂಡ್ ಥಂಡ್ ವಾರೆಂ, ತಾಚ್ಯಾ ತ್ಯಾ ರಸ್ಮಾ ಸಾರ್ಕ್ಯಾ ಕೆಸಾಂಕ್ ಉಭವ್ನ್, ತಾಂಬ್ಶೆಂವ್ಚಾ ತ್ಯಾ ತಾಚಾ ಪೊಲ್ಯಾಂ ಮುಳಾಂತ್ ಸಪ್ಣಾಂ ರಂಗಯ್ತಾಲೆಂ. ಮುಂಬಯ್ಚಾ ಹ್ಯಾ ಸಂಸಾರಾಚಿ ನಕ್ಶಾಚ್ ದುಸ್ರಿ.ಕಿತ್ಲೆಂ ತುಂ ವಯ್ರ್ ವಚೊನ್ ಮುಂಬಯಿಕ್ ತಿಳ್ತಾಯ್, ತಿತ್ಲೆಂ ಹ್ಯಾ ಮುಂಬಯಿಚೆಂ ನೀಜ್ ಸ್ವರೂಪ್ ದೊಳ್ಯಾಂಕ್ ಜಳ್ಕಾತಾ.
ಆಲಿಯಾ ಆಜ್ ಹೆಂಚ್ ಪಳೆತಾಲೆಂ. ಮುಂಬಯಿಚೆಂ ನೀಜ್ ಸ್ವರೂಪ್!
ಸದಾಂಚೆಂ...!
ಸಗ್ಳೆಂ ಸದಾಂಚೆಂ......!
ತಿಂಚ್ಚ್ ದ್ರಶ್ಯಾಂ...., ತಿಚ್ಚ್ ವಾಟ್....., ತೊಚ್ಚ್ ಲೋಕ್...., ತಿಚ್ಚ್ ಫುಟ್ಪಾತ್......, ಆನಿ..., ಆನಿ ತೆಂಚ್ ಜಿವಿತ್! ಸಗ್ಳೆಂ ಸದಾಂಚೆಂ!
ಕಾಂಯ್ಚ್ ಬದ್ಲಾವಣ್ ನಾತ್ಲೆಲಿ!
ಜಶೆಂ ತೊ ಉದೆಂವ್ಚೊ ಸದಾಂಚೊ ಸುರ್ಯೊ, ತಾಚ್ಯಾ ಸುರ್ಪಾಯೆಂತ್ ಕಾಂಯ್ಚ್ ಬದ್ಲಾವಣ್ ಹಾಡಿನಾ ತಶೆಂ, ಹೆಂ ಮುಂಬಯಿಂತ್ಲೆಂ ಜಿವಿತ್!
ತ್ಯಾ ಜೊಪ್ಡ್ಯಾನಿಂ ಜಿಯೆಂವ್ಚಿಂಯ್ ತಿಂಚ್ಚ್ ಮನ್ಶ್ಯಾಂ.... ತ್ಯಾ ರಾವ್ಳೆರಾಂನಿಂ ಜಿಯೆಂವ್ಚಿಂಯ್ ತಿಂಚ್ಚ್ ಮನ್ಶ್ಯಾಂ....!
ಮನ್ಶ್ಯಾಂಚಾ ರಚ್ನೆಂತ್ ಕಾಂಯ್ ಫರಕ್ ನಾತ್ಲಲೊ. ಪುಣ್ ಮನ್ಶ್ಯಾಂ ಆನಿ ಮನ್ಶ್ಯಾಂ ಮಧ್ಲ್ಯಾ ಜಿಣಿಯೆಂತ್ ಫರಕ್ ಆಸ್ಲಲೊ.
ಜಶೆಂ ಬಾಪಾಯ್ಚಾ ಕಾರಾ ಭಿತರ್ ಬಸೊನ್ ಇಸ್ಕೊಲಾಕ್ ವೆಚೆಂ ಹಾಂವ್ ಆನಿ ತ್ಯಾ ಇಸ್ಕೊಲಾಚಾ ಗೆಟಿ ಸಾಮ್ಕಾರ್ ಬಸೊನ್ ಮ್ಹಜ್ಯಾ ಪಾಂಯಾಂಚಾ ಮೊಚ್ಯಾಂಕ್ ಪಾಲಿಶ್ ಮಾರ್ಚೊ ತೊ....!
ಜಶೆಂ ಸೂಟ್ ಬುಟಾರ್ ಆಫಿಸಾ ಥಾವ್ನ್ ಏರ್ ಕಂಡಿಶನಾಚಾ ಕಾರಾರ್ ಬಸೊನ್ ಘರಾ ಯೆಂವ್ಚೊ ಆಪ್ಲೊ ಬಾಪಯ್ ಆನಿ ತ್ಯಾ ಧನ್ಪರಾಂ ಭರಾಚಾ ವೊತಾಕ್, ಪಿಂಜ್ಕರ್ ವ್ಹಾಣಾಂಕ್ ನ್ಹೆಸೊನ್ ಉಜೊ ವೊಂಕ್ಚಾ ರಸ್ತ್ಯಾರ್ ಹಾತ್ ಗಾಡಿ ವೊಡ್ಚೊ ತಾಚೊ ಬಾಪಯ್......!
ಜಶೆಂ ಮಾರ್ಬಲ್ ಫ್ಲೋರಿಂಗಾಚಾ ಹ್ಯಾ ಘರಾಂತ್ ಆಪ್ಲ್ಯಾ ಕುಟ್ಮಾಚಿ ಆಪುರ್ಬಾಯ್ ಕರ್ಚಿ ಮ್ಹಜಿ ಆವಯ್ ಆನಿ ತ್ಯಾ ರಸ್ತ್ಯಾಕ್ ಡಾಮರ್ ಬಸಂವ್ಚಾ ರೋಡ್ ರೋಲರಾಚಾ ರೋಲಾರಾಕ್ ಡಾಮರ್ ಧರಿನತ್ಲೆಲ್ಯಾ ಪರಿಂ ತಾಕಾ ಉದ್ಕಾನ್ ಭಿಜಂವ್ಚಿ ತಾಚಿ ಆವಯ್.....!
ಆಲಿಯಾಚೆಂ ಚಿಂತಾಪ್ಚ್ ವೆಗ್ಳೆಂ. ಜಿವಿತಾಂತ್ ತಾಚ್ಯಾ ದೊಳ್ಯಾಂಕ್ ದಿಸೊನ್ ಅಯಿಲ್ಲಿಂ ಘಡಿತಾಂ ತೆಂ ಆಶೆಂಚ್ ಪಾಶಾರ್ ಜಾವ್ನ್ ವಚೊಂಕ್ ದೀನಾತ್ಲ್ಲೆಂ. ತಾಚ್ಯಾ ಜಲ್ಮಾಗೂಣಾನ್ ತಾಕಾ ತಾಚ್ಯಾ ಘರಾಂತ್ ಎಕ್ಸುರೆಂ ಕೆಲ್ಲೆಂ ವ್ಹಯ್. ಹ್ಯಾ ಎಕ್ಸುರ್ಪಣಾಚಾ ಕಾರಾಣಾಕ್ ಲಾಗೊನ್ ಆಲಿಯಾ ಆಸಲ್ಯಾ ಘಟನಾಂಕ್ ಮತಿಂತ್ ಆಟಯ್ತಾಲೆಂ. ತಾಕಾ ಹಿಂ ಘಟನಾಂ ಆನಿ ಹಿಂ ದ್ರಶ್ಯಾಂ ಚಿಂತುಂಕ್ ಮಜ್ಬೂರ್ ಕರ್ತಾಲಿಂ. ಆಪ್ಲ್ಯಾ ಮತಿಕ್ ದುಸ್ರೆ ವಾಟೆನ್ ಧಾಂವ್ಡಾಂವ್ಕ್ ತಾಚ್ಯೆ ಲಾಗಿಂ ದುಸ್ರೊ ಉಪಾಯ್ ನಾತ್ಲಲೊ. ಹ್ಯಾ ಚಿಂತ್ನಾಂಕ್ ತಾಣೆಂ ಚಿಂತುಂಕ್ ಆರಂಭ್ ಕರುಂಕ್ ಕಾರಾಣ್ ತಾಚೆಂಚ್ ಘರ್! ಆಪ್ಲೆಂ ಘರ್ ಕಿತ್ಯಾಕ್ ಆಶೆಂ? ತಾಚೆಂ ಘರ್ ಕಿತ್ಯಾಕ್ ತಶೆಂ? ಆಪ್ಲೊ ಬಾಪಯ್ ಕಿತ್ಯಾಕ್ ಆಸೊ? ತಾಚೊ ಬಾಪಯ್ ಕಿತ್ಲೊ ಬರೊ? ಮ್ಹಜಿ ಆವಯ್ ಕಿತ್ಯಾಕ್ ಮ್ಹಜೆರ್ ರಾಗ್ ಕರ್ತಾ? ತಾಚಿ ಆವಯ್ ತಾಚೊ ಕಿತ್ಲೊ ಮೋಗ್ ಕರ್ತಾ? ಮ್ಹಜ್ಯಾ ಭಾಂವ್ಡಾಂಕ್ ಹಾಂವ್ ಕಿತ್ಯಾಕ್ ಬರೆಂ ಲಾಗಾನಾ? ತಾಚಿಂ ಭಾಂವ್ಡಾಂ ತಾಕಾ ಕಿತ್ಲಿಂ ಬರಿಂ ಆಸಾತ್? ಅಸಲ್ಯಾ ಸವಾಲಾನಿಂ ಆಲಿಯಾಕ್ ತಾಚಿ ಪ್ರಾಯ್ ಸಾರ್ಕಿ ಬರ್ಚಾ ಪಯ್ಲೆಂಚ್ ಚಿಂತುಂಕ್ ಶಿಕಯಿಲ್ಲೆಂ.
ಆಲಿಯಾ ಬೆಜಾರಾಯೆಂತ್ ಎಕ್ಸುರೆಂ ಜಾತಾನಾ ತೆಂ ಘರಾಂತ್ ಕೊಣಾಯ್ಲಾಗಿಂ ಉಲಯ್ನಾತ್ಲ್ಲೆಂ. ಆಪ್ಲಿ ಟಿ.ವಿ. ಭಂಧ್ ಕರುನ್, ಭಿತರ್ಲ್ಯಾ ಕುಡಾಚೆಂ ಜನೆಲ್ ಉಗ್ತೆಂ ಕರುನ್, ತೆಂ ತ್ಯಾ ತಾಚ್ಯಾ ಘರಾ ಭಾಯ್ಲ್ಯಾ ಸಂಸಾರಾಕ್ ಪಳೆತಾಲೆಂ. ಹ್ಯಾ ನಿಶ್ಯಬ್ದ್ ವಾತಾವರಣಾಂತ್, ತಾಚ್ಯಾ ಮತಿಂತ್ ಚಿಂತ್ನಾಂ ಉದೆತಾಲಿಂ. ತೆಂ ಆಪ್ಣಾ ಇತ್ಲ್ಯಾಕ್ಚ್ ಉಲಯ್ತಾಲೆಂ, ತೆಂಚ್ ಸವಾಲಾಂ ಕರ್ತಾಲೆಂ ಆನಿ ತೆಂಚ್ ಜವಾಬ್ ಸೊಧ್ತಾಲೆಂ. ಸವಾಲಾಂ ಆನಿ ಜಾಪಿ ಸೊಧ್ಚ್ಯಾ ವಾಟೆರ್, ಆಲಿಯಾ, ತಾಚ್ಯಾ ತರ್ನ್ಯಾ ಪ್ರಾಯೆರ್ಚ್, ಹ್ಯಾ ಸಂಸಾರಾಂತ್ಲ್ಯಾ ಮನ್ಶ್ಯಾನ್ ದುಸ್ರ್ಯಾ ಮನ್ಶ್ಯಾ ಸಾಂಗಾತಾ ರಚ್ಲೆಲ್ಯಾ ಅಂತರಾ ವಿಶಿಂ ಜಾಣಾಂ ಜಾಲೆಂ. ಮತಿಂತ್ ಉದೆಲ್ಲಿಂ ಸವಾಲಾಂ ಎಕೇಕ್ ಪಾವ್ಟಿಂ ಸಾರ್ಕಿ ಜವಾಬ್ ದೀಂವ್ಕ್ ಕಷ್ಟಾತಾನಾ.....
ವ್ಹಯ್.....!
ಆಲಿಯಾ ತ್ಯಾ ಮುಂಬಯಿಚಾ ಸಂಸಾರಾಕ್ ಸೊಡುನ್ ವಯ್ಲ್ಯಾ ತ್ಯಾ ಮೊಳಾಬಾಕ್ ಪಳೆತಾಲೆಂ.
ಮೊಳಾಬಾ ವಯ್ಲೊ ತೊ ಸೊಭಿತ್ ನಿಳ್ಸೊ ರಂಗ್! ತ್ಯಾ ರಂಗಾ ಮಧೆಂ ಉಪ್ಯೆಂವ್ಚಿಂ ತಿಂ ಧವಿಂ ಧವಿಂ ಕುಪಾಂ! ತ್ಯಾ ಕುಪಾಂಚಾ ಸೊಭಾಯೆಕ್ ಪಿಶಿಂ ಜಾವ್ನ್ ತಿಂ ಕುಪಾಂ ಧರುಂಕ್ ಉಬ್ಚಿಂ ಸುಕ್ಣಿಂ!
ಸ್ವತಂತ್ರ್!
ಸಗ್ಳೆಂಚ್ ಸ್ವತಂತ್ರ್!
ವಯ್ಲ್ಯಾ ಮೊಳಾಬಾ ಆನಿ ಸಕಯ್ಲ್ಯಾ ಧರ್ತೆ ಮಧೆಂ ಕಿತ್ಲೊ ಫರಕ್....!
ವಯ್ರ್ ಆಸ್ಲ್ಲೆಂ ಸಕಯ್ಲ್ ನಾ. ಸಕಯ್ಲ್ ಆಸ್ಲೆಲೆಂ ವಯ್ರ್ ನಾ.
"ಆಪ್ಣಾಕ್ ಕಿತೆಂ ಜಾಯ್?" ಸಭಾರ್ ಪಾವ್ಟಿಂ ಆಲಿಯಾನ್ ಆಪ್ಣಾಕ್ಚ್ಚ್ ಹೆಂ ಸವಾಲ್ ಕೆಲೆಂ.
"ತಿ ವಯ್ಲಿ ಸೊಭಾಯ್....!? ವಾ ತಿ ಸಕಯ್ಲಿ......!?" ಆಲಿಯಾಚಾ ಮತಿಂತ್ ತ್ಯಾ ಸಕಯ್ಲ್ಯಾ ದಿಸವ್ಣೆಕ್ ಜೊಕ್ತೊ ಸಬ್ದ್ ಮೆಳ್ಳೊ ನಾ.
ಎಕಾ ಕುಶಿಂನ್ ತಾಚಾ ವಾಡಾವಳಿಚೆಂ ನೆಣ್ತೆಂಪಣ್! ಎಕಾ ಕುಶಿಂನ್ ತಾಚ್ಯಾ ಚಿಂತ್ಪಾಚೆಂ ಜಾಣ್ತೆಂಪಣ್!
ಆಲಿಯಾಚಿಂ ಚಿಂತ್ನಾ ತಾಚ್ಯಾ ವಾಡಾವಳಿ ಪ್ರಾಸ್ ಚಡ್ ಜಾಣ್ತಿಂ ಜಾಲ್ಲಿಂ. ಪುಣ್, ತಾಚ್ಯಾ ಮತಿ ಭಿತರ್ಲಿಂ ಸಪ್ಣಾಂ ಮಾತ್ರ್ ಅಜೂನ್ ವಾಡವಳಿಕ್ ಪಾವೊಂಕ್ ನಾತ್ಲೆಲಿಂ. ಫುಡಾರಾಚಾ ಸಪ್ಣಾಂ ವಯ್ರ್ ತಾಚ್ಯಾ ಚಿಂತ್ನಾನಿಂ ರಾಜ್ವಟ್ಕಾಯ್ ಚಲಂವ್ಕ್ ಲಾಗ್ತಾನಾ, ನೆಣ್ತೆಂ ಆಲಿಯಾ, ತ್ಯಾ ವಯ್ಲ್ಯಾ ಮೊಳಾಬಾಕ್ಚ್ ಚಡ್ ಆಶೆಂವ್ಕ್ ಲಾಗ್ಲೆಂ.
ಹಾಂಗಾ ಥಾವ್ನ್ ಆರಂಭ್ ಜಾಲಿಂ ತಾಚಿಂ ತಿಂ ಮೊಳಾಬಾ ವಯ್ಲಿಂ ಸಪ್ಣಾಂ.
ಆತ್ತಾಂ ಮಾಗಿರ್ ಮ್ಹಳ್ಳ್ಯಾ ಪರಿಂ ತಾಚ್ಯಾ ಅಪಾರ್ಟ್ಮೆಂಟಾಚಾ ವಯ್ಲ್ಯಾನ್ ಉಭೊನ್ ವೆಚಾ ವಿಮಾನಾಂಕ್ ಪಳೆತಾನಾ ಆಲಿಯಾಕ್ ತ್ಯಾ ಮೊಳಾಬಾ ವಯ್ಲ್ಯಾ ಸುಕ್ಣ್ಯಾಂಕ್ ಪಳೆಲ್ಲ್ಯಾ ಪರಿಂಚ್ ಜಾತಾಲೆಂ.
ಸಂಸಾರಾಂತ್ಲೊ ಮನಿಸ್ ಫಕತ್ತ್ ತ್ಯಾ ವಿಮಾನಾಚಾ ಆಧಾರಾನ್ ಮಾತ್ರ್ ಸುಕ್ಣ್ಯಾ ಪರಿಂ ತ್ಯಾ ವಯ್ಲ್ಯಾ ಮೊಳಾಬಾರ್ ಉಭೊಂಕ್ ಸಕ್ತಾ ಮ್ಹಣೊನ್ ತೆಂ ಮಸ್ತ್ ಪಯ್ಲೆಂ ಆಪ್ಲ್ಯಾ ಬಾಪಯ್ ಥಾವ್ನ್ ಜಾಣಾಂ ಜಾಲ್ಲೆಂ.
ಹಾಚ್ಯೆ ಥಾವ್ನ್ಚ್ ಆಲಿಯಾಚಾ ಮತಿಂತ್ ತ್ಯಾ ಮೊಳಾಬಾರ್ ಸದಾಂ ಉಬ್ಚಿ ಆಶಾ ಕಿರ್ಲಾಲಿ. ಹಿ ಆಶಾ ಫಕತ್ತ್ ಆಶಾ ಜಾವ್ನ್ ಉರಾನಾಸ್ತಾನಾ ತಾಚ್ಯಾ ಜಿವಿತಾಚೆಂ ಸಪಾಣ್ ಜಾವ್ನ್ ವೆತಾನಾ, ಆಲಿಯಾ, ತ್ಯಾ ವಾರ್ಯಾರ್ ಉಬ್ಚೆಂ ಸೊಡುನ್ ದುಸ್ರೆಂ ಕಿತೆಂಚ್ ಚಿಂತುಂಕ್ ಸಕ್ಲೆಂ ನಾ.
ಹ್ಯಾಚ್ ತಾಚಾ ಸಪ್ಣಾ ಖಾತಿರ್, ಆಲಿಯಾನ್ ಆಪ್ಲ್ಯಾ ಬಾಪಾಯ್ಚಾ ಆಶೆಕ್ ಚಿಡ್ಡುನ್ ಉಡಯ್ಲೆಂ ಆನಿ ತೆಂ ಏಕ್ ಪೈಲೆಟ್ ಜಾವ್ನ್ ತ್ಯಾ ವಿಮಾನಾರ್ ಉಭೊಂಕ್ ಆತ್ರೆಗಾನ್ ರಾಕೊನ್ ರಾವ್ಲೆಂ.
*************
ಆಲಿಯಾನ್ ಪಯ್ಲ್ಯಾ ಪಾವ್ಟಿಂ ಏವಿಯೇಶನ್ ಏರ್ಬೇಸಾ ಭಿತರ್ ಆಪ್ಲೆ ಪಾಂಯ್ ದವರ್ತಾನಾ ತಾಚೊ ಸಂತೊಸ್ ಸಾಂಗ್ಚೊ ನ್ಹಯ್. ತಾಚ್ಯಾಚ್ ಆಶೆ ಆನಿ ಖುಶೆ ಪರ್ಮಾಣೆಂ ಆಲಿಯಾನ್ ತಾಚ್ಯಾ ಜಿವಿತಾಂತ್ ಏಕ್ ವಿಂಚವ್ಣ್ ಕೆಲಿ. ಮೆಡಿಕಲ್ ಕಾಲೇಜಿಂತ್ ಆಪುಣ್ ಕೆದ್ನಾಂಯ್ ಶಿಕ್ತಾಲಿಂ ಮ್ಹಳ್ಳ್ಯಾಚೊಯ್ ತಾಕಾ ವಿಸರ್ ಪಡ್ಲೊ. ತಾಕಾ ತಾಚೆಂ ಆದ್ಲೆಂ ಕಾಂಯ್ ಉಡಾಸ್ ಆಯ್ಲೆಂ ನಾ. ಆಪ್ಣಾಚೆಂ ಬರೆಂ ಆಶೆಲ್ಲೊ ಸಮೀರ್ಯ್......!
ಧುವೆಚಾ ಖುಶಿಯೆಂತ್ ಆನಿ ಆಶೆಂತ್ ಶಬೀರಾನ್ ’ಹಾಂ’ ಕೆಲ್ಯಾ ಉಪ್ರಾಂತ್ ಧುವೆಚಾ ಜಿವಿತಾಂತ್, ಪ್ರತ್ಯೇಕ್ ಜಾವ್ನ್ ತಾಚ್ಯಾ ನಡ್ತ್ಯಾಂತ್ ಜಾಲ್ಲಿ ಬದ್ಲಾವಣ್ ಪಳೆವ್ನ್ ಶಬೀರ್ ಮಸ್ತ್ ಖುಶಿ ಜಾಲೊ.
ಹ್ಯಾ ಉಪ್ರಾಂತ್ ಜಾಲ್ಯಾರ್ಯ್, ಆಲಿಯಾ, ಆಪ್ಲ್ಯಾ ಜಿವಿತಾ ವಿಶಿಂ ಸೀರಿಯಸ್ ಜಾವ್ನ್ ಚಿಂತ್ಲ್ಯಾರ್ ಪುರೊ ಮ್ಹಣೊನ್ ತೊ ಆಶೆಲೊ.
ಮನ್ಶ್ಯಾ ಜಾತಿಚಿ ಮತ್ಯ್ ಏಕ್ ವಿಚಿತ್ರ್ ಸಕ್ತೆಚಿ ಆಸ್ತ್. ಹ್ಯಾ ಮತಿಂತ್ ಮನಿಸ್ ಕಿತೆಂ ಚಿಂತಾ, ಕಿತೆಂ ಆಶೆತಾ, ಕಸಲಿಂ ಸಪ್ಣಾಂ ಘುಂತಾ, ತೆಂ ಕೊಣಾಯ್ಕ್ಯ್ ಸಾಂಗೊಂಕ್ ಜಾಯ್ನಾಂ. ಕೆದ್ನಾಂಯ್ ಹಿ ಮತ್ ಧವ್ಯಾ ದುದಾ ಪರಿಂ ನಿತಳ್ ಆಸ್ತಾ ತರ್ ಕೆದ್ನಾಂಯ್ ಕಾಜಾಳಾಂತ್ ನ್ಹಾವ್ನ್ ಆಯ್ಲೆಲ್ಯಾ ಪರಿಂ ಕಾಳಿ ಜಾತಾ ಆನಿ ಕಾಂಯ್ಚ್ ತಾಂತುಂ ದಿಸೊನ್ ಯೇನಾ.
ಆಶೆಂಚ್ ಆಲಿಯಾ!
ಮತಿಕ್ಚ್ ರಂಗೀನ್ ಪರ್ದೊ ಕರುನ್, ತ್ಯಾ ಪರ್ದ್ಯಾ ವಯ್ರ್, ಆಪ್ಲೆಂ ಜಿವಿತ್ ಆಪ್ಣಾಕ್ ಜಾಯ್ ಜಾಲ್ಲ್ಯಾ ಪರಿಂ ಸೊಭಂವ್ಕ್ ತೆಂ ಆಶೆತಾಲೆಂ.
ಸಪ್ಣಾಂತ್ಲೆಂ ರಾವ್ಳೆರ್ ದೊಳ್ಯಾಂ ಫುಡೆಂ ಉಭೆಂ ಜಾಲೆಂ ಆಸ್ತಾಂ, ತ್ಯಾ ರಾವ್ಳೆರಾಚಿಂ ಮೆಟಾಂ ಚಡೊನ್, ತ್ಯಾ ರಾವ್ಳೆರಾ ಭಿತರ್ ಪಾಂಯ್ ದವರುಂಕ್ ಆಶೆಂವ್ಚೆಂ......, ಮನ್ಶ್ಯಾ ಸೈಂಬಾಚಿ ಆಸ್ಕತ್ಕಾಯ್ ಮ್ಹಳ್ಳ್ಯಾ ಪರಿಂ ಆಲಿಯಾ ವಿಮಾನಾರ್ ಜಾತಾ ತಿತ್ಲೆ ವೆಗ್ಗಿಂ ಉಭೊಂಕ್ ಆಶೆಲೆಂ.
ಆಲಿಯಾ ಏವಿಯೇಶನಾಕ್ ಭರ್ತಿ ಜಾಲ್ಲೆಂ ಖರೆಂ. ಪುಣ್ ಆಲಿಯಾನ್ ಚಿಂತ್ಲ್ಲ್ಯಾ ತಿತ್ಲೆಂ ಸಗ್ಳೆಂ ಸುಲಭ್ ನಾತ್ಲೆಲೆಂ.
"ಕ್ಯಾಪ್ಟನ್ ರಾಣಾ!" ಏವಿಯೇಶನ್ ಏರ್ ಬೇಸಾಂತ್ಲೊ ಚೀಫ್ ಫ್ಲೈಯಿಂಗ್ ಕಮಾಂಡರ್. ಇಂಡಿಯನ್ ಏರ್ ಫೋರ್ಸಾ ಥಾವ್ನ್ ರಿಟಾಯರ್ಡ್ ಜಾಲ್ಯಾ ಉಪ್ರಾಂತ್ ರಾಣಾ ಏವಿಯೇಶನಾಂತ್ ಚೀಫ್ ಪೈಲೆಟ್ ಜಾಲ್ಲೊ. ತೊ ಹೆರಾಂ ಪರಿಂ ನ್ಹಯ್. ತಾಚೆಂ ತೆಂಚ್ ಏರ್ ಫೋರ್ಸಾಚೆಂಚ್ ಕಾನೂನ್! ತೆಂಚ್ ಸ್ಟ್ರಿಕ್ಟ್! ತೆಂಚ್ ಡಿಸಿಪ್ಲೀನ್!
"ಯು ನೋ ಆಲಿಯಾ...! ಓಹ್ ಸಾರ್ರಿ....!, ಮಿಸ್ ಆಲಿಯಾ......, ತುಂ ಹಾಂಗಾ ಆಸಾಯ್....., ವಿಮಾನಾಕ್ ವಾರ್ಯಾರ್ ಉಭೊಂಕ್ ಶಿಕ್ಚಾ ಖಾತಿರ್! ತೆಂ ವಿಮಾನ್ ಮನ್ಶಾಂನಿ ಪಯ್ಣ್ ಕರ್ಚೆಂ....., ತುವೆಂ ಖೆಳ್ಚೆಂ ಟಾಯ್ ಪ್ಲೇನ್ ನ್ಹಯ್!" ಕ್ಲಾಸಿಂತ್ ಸಗ್ಳ್ಯಾಂ ಮುಕಾರ್ಕ್ಯಾಪ್ಟನ್ ರಾಣಾನ್ ಆಲಿಯಾಕ್ ಸಾಂಗ್ತಾನಾ ಆಲಿಯಾಕ್ ಲಜೆನ್ ಸಂಸಾರ್ ಮುದೊ ಜಾಲ್ಲ್ಯಾ ಪರಿಂ ಜಾಲೆಂ.
ಕ್ಲಾಸಿಂತ್ ಆಲಿಯಾ ಕಾಂಯ್ ಉಲಯ್ಲೆಂ ನಾ. ತೆಂ ಜಾಣಾಂ ಆಜ್ ತಾಚಿಚ್ಚ್ ಚೂಕ್ ಆಸ್ಲ್ಲಿ. ಕ್ಯಾಪ್ಟನಾಚೆಂ ಲೆಕ್ಚರ್ ಆರಂಭ್ ಜಾಂವ್ಚಾ ಪಯ್ಲೆಂಚ್ ತಾಣೆಂ ಆಪ್ಲ್ಯಾ ಮೊಬಾಯ್ಲ್ ಫೊನಾಕ್ ಬಂದ್ ಕರುಂಕ್ ಜಾಯ್ ಆಸ್ಲ್ಲೆಂ. ಹ್ಯಾ ತಾಚ್ಯಾ ವಿಸ್ರೊಣೆಕ್ ಸಾಕ್ಸ್ ಮ್ಹಳ್ಳ್ಯಾ ಪರಿಂ ತಾಚೆಂ ಫೋನ್ ವಾಜ್ಲ್ಲೆಂ.
ಆಲಿಯಾಕ್ ಆಜ್ ಜಾಲ್ಲ್ಯಾ ಮಾನ್ನಷ್ಟಾಕ್ ತಾಚ್ಯಾನ್ ವಿಸ್ರೊಂಕ್ ಜಾಲೆಂ ನಾಂ. ಪೂಣ್ ದೀಸಾಂ ವಯ್ರ್ ದೀಸ್ ಧಾಂವ್ತಾನಾ ಸಗ್ಳೆಂ ಸವ್ಕಾಸ್ ಮಾಜ್ವೊನ್ ಯೆತಾ ತಶೆಂ, ಆಲಿಯಾಚಾ ಮತಿ ಥಾವ್ನ್, ಕ್ಯಾಪ್ಟನ್ ರಾಣಾನ್ ಸಗ್ಳ್ಯಾ ಸ್ಟೂಡೆಂಟಾ ಫುಡೆಂ ಆಪ್ಣಾಕ್ ಕೆಲ್ಲೆಂ ಇನ್ಸಲ್ಟ್ ಸವ್ಕಾಸ್ ಮಾಜ್ವೊನ್ ಆಯ್ಲೆಂ.
ಚಾಲ್ತ್ಯಾ ದಿಸಾಂಕ್ ಆನಿ ಮನ್ಶ್ಯಾಕ್ ಕಾಂಯ್ ಸಂಬಂಧ್ ನಾ. ತೆ ದೀಸ್ ಉದೆತಾತ್ ಬುಡ್ತಾತ್ ಆನಿ ನವ್ಯಾನ್ ಉದೆತಾತ್. ಪುಣ್ ಮನ್ಶ್ಯಾ ಜಿಣಿ ತಶಿ ನ್ಹಯ್. ಹಾಂಗಾ ಸದಾಂಚೊ ಉದೆವ್ ಆನಿ ಆಸ್ತಮ್ ನಾ. ಹಾಂಗಾ ಎಕ್ಚ್ ಏಕ್ ಉದೆವ್ ಆನಿ ಎಕ್ಚ್ ಏಕ್ ಆಸ್ತಮ್! ಹ್ಯಾ ಉದೆವಾಕ್ ಆನಿ ಆಸ್ತಮೆಕ್ ಮನಿಸ್ ಫಕತ್ತ್ ಆಪ್ಲ್ಯಾ ಇಮಾಜಿನೇಶನಾನ್ ಇಮಾಜಿನ್ ಕರುಂಕ್ ಮಾತ್ರ್ ಸಕ್ತಾ ಶಿವಾಯ್ ತೊ ತ್ಯಾ ಉದೆವಾಕ್ ಆನಿ ಆಸ್ತಮೆಕ್ ಪಳಂವ್ಕ್ ಸಕಾನಾ. ತಶೆಂಚ್ ಆಲಿಯಾ!
ತಾಚ್ಯಾ ಮತಿಂತ್ ಆಶಾ ಆಸ್ಲ್ಲಿ ಖರಿ. ಪುಣ್ ತ್ಯಾ ಆಶೆಕ್ ತಾಚ್ಯಾ ಜಿವಿತಾ ಸಂಗಿಂ ಮೆಳಂವ್ಕ್ ತಾಕಾ ತಿತ್ಲೆಂ ಸುಲಭ್ ನಾತ್ಲ್ಲೆಂ.
ಕ್ಯಾಪ್ಟನ್ ರಾಣಾ ಮುಕಾರ್ ಆಪ್ಲಿ ನದರ್ ಉಕ್ಲುಂಕ್ಯ್ ಏವಿಯೇಶನ್ ಕ್ಯಾಂಪಸಾ ಭಿತರ್ ಕೊಣಾಯ್ಕ್ಯ್ ಧಯ್ರ್ ನಾತ್ಲೆಲೆಂ. ಹೆಂಚ್ ಆಪ್ಲ್ಯಾ ಜಯ್ತಾಚೆಂ ಕಾರಾಣ್ ಮ್ಹಣೊನ್ ಕ್ಯಾಪ್ಟನ್ ಜಾಣಾಂ ಆಸ್ಲ್ಲೊ.
"ಕ್ಯಾಪ್ಟನ್ ರಾಣಾ ಮ್ಹಜೊ ಟೀಚರ್ ಮಾತ್ರ್! ಹಾಂವ್ ತಾಚೆಂ ಏಕ್ ಸ್ಟೂಡೆಂಟ್.....! ಹೊ ಆಮ್ಚೊ ಸಂಭಂಧ್ ಗೌರವಾಚೊ ವ್ಹಯ್ ಪುಣ್ ಭ್ಯೆಂ ಭಿರಾಂತೆಚೊ ನ್ಹಯ್! ಮ್ಹಜ್ಯಾ ವ್ಹಡಿಲಾಂಕ್ ಗೌರವಾನ್ ಹಾವೆಂ ಮಾನ್ ಬಾಗಾಂವ್ಕ್ ಯೆತಾ ವ್ಹಯ್, ತಾಂಚಾ ಬೆಷ್ಟಾವ್ಣೆಕ್ ಲಾಗೊನ್ ಹಾಂವ್ ತಾಂಕಾಂ ಮಾನ್ ದೀಂವ್ಕ್ ಸಕ್ತಾಂ?" ಆಲಿಯಾಚಾ ಮತಿಂತ್ ಚಿಂತಾಪ್ ಉದೆತಾಲೆಂ. "ಹ್ಯಾ ಕ್ಯಾಂಪಸಾ ಭಿತರ್ ಕ್ಯಾಪ್ಟನ್ ರಾಣಾಕ್ ಪಳವ್ನ್ ಹಾವೆಂ ಕಿತ್ಯಾಕ್ ಭಿಯೆಂವ್ಕ್ ಜಾಯ್?"
ಜಶೆಂ ಆಲಿಯಾಚಾ ಮತಿಂತ್ ಚಿಂತ್ನಾಂ ಉಟ್ತಾಲಿಂ ತಶೆಂ ತೆಂ ತ್ಯಾ ಚಿಂತ್ನಾಂ ವಿಶಿಂ ಆಟವ್ ಕರ್ತಾಲೆಂ. ತಾಚ್ಯಾ ಮತಿಂತ್ ಉದೆವ್ನ್ ಆಯಿಲ್ಲ್ಯಾ ಚಿಂತ್ಪಾಕ್ ಏಕ್ ಸಾರ್ಕಿ ಜವಾಬ್ ದಾಖಯ್ನಾಸ್ತಾನಾ ತೆಂ ತಶೆಂಚ್ ತಾಂಕಾಂ ವ್ಹಾಳೊನ್ ವಚೊಂಕ್ ದೀನಾತ್ಲ್ಲೆಂ. ಸಮಾಜೆಂತ್ ರುತಾ ಕೆಲ್ಲ್ಯಾ ಅಂತಸ್ಥೆಕ್ ಲಾಗೊನ್, ಮನ್ಶಾನ್ ಮನ್ಶಾ ಮಧೆಂ ಅಂತರ್ ರಚ್ಲಾ ಜಾವ್ಯೆತ್. ಹೊ ಅಂತರ್, ಮನ್ಶಾನ್ ಆಪ್ಲ್ಯಾ ಸ್ವಾರ್ಥಾ ಖಾತಿರ್, ಆಪ್ಣಾಚಾ ಖುಶಾಲ್ಕಾಯೆ ಖಾತಿರ್ ರಚ್ಲಾ. ಜಾಂವ್ಕ್ ಪುರೊ ಹ್ಯಾ ಅಂತಸ್ಥೆಚಿಂ ರುಪಾಂ ಸಬಾರ್, ಪುಣ್ ಹಾಂಗಾ ಮನಿಸ್ ಮಾತ್ರ್ ತೊಚ್ಚ್! ತಾಚೆ ಆನಿ ಮ್ಹಜೆ ಮಧೆಂ ಕಾಂಯ್ ವ್ಯತ್ಯಾಸ್ ನಾ. ಮನ್ಶ್ಯಾನ್ ಆಪ್ಲ್ಯಾ ಮನ್ಶ್ಯಾಪಣಾ ಥಾವ್ನ್ ಎಕ್ಲ್ಯಾಕ್ ದಿಂವ್ಚೊ ಗೌರವ್ ಮಾತ್ರ್ ಸಗ್ಳ್ಯಾಂ ಪ್ರಾಸ್ ವರ್ತೊ! ಆಶೆಂ ಆಸ್ತಾನಾ....
ಕ್ಯಾಪ್ಟನ್ ರಾಣಾನ್ ತಾಣೆಂ ಜಿಯೆಂವ್ಚಾ ಸಮಾಜೆಂತ್ ತಾಚೆಂ ಮ್ಹಳ್ಳೆಂ ಏಕ್ ಅಂತಸ್ಥ್ ರಚ್ಲಾಂ ವ್ಹಯ್, ಹ್ಯಾ ತಾಚ್ಯಾ ಅಂತಸ್ಥೆಕ್ ಹಾವೆಂ ಮಾನ್ ದೀಂವ್ಕ್ ಜಾಯ್! ಪುಣ್ ಹೊ ಮಾನ್ ತಾಣೆಂ ಆಪ್ಣಾ ವಯ್ಲ್ಯಾ ಗೌರವಾನ್ಹೆರಾಂ ಥಾವ್ನ್ ಜೊಡುನ್ ಘೆಂವ್ಕ್ ಜಾಯ್ ಶಿವಾಯ್ ಆಪ್ಲ್ಯಾ ತ್ಯಾ ಮಿಲಿಟರಿ ವ್ಯಕ್ತಿತ್ವಾ ಥಾವ್ನ್ ನ್ಹಯ್! ಏವಿಯೇಶನಾಂತ್ ತಾಕಾ ಸಗ್ಳಿಂ ಭಿಯೆತಾತ್ ಶಿವಾಯ್ ತಾಕಾ ಗೌರವಾನ್ ಮಾನ್ ದೀನಾಂತ್. ಹ್ಯಾ ಮಾನಾಕ್ಚ್ ಆಪ್ಣಾಚೊ ಗೌರವ್ ಜಾವ್ನ್ ವಳ್ಕೊನ್ ಘೆತ್ಲೆಲ್ಯಾ ಕ್ಯಾಪ್ಟನ್ ರಾಣಾ ಮುಕಾರ್ ಹೆರಾಂಪರಿಂ ಹಾಂವ್ಯ್ ಭಿರಾಂತೆನ್ ಆಪ್ಲಿ ತಕ್ಲಿ ಬಾಗಾಂವ್? ಆನಿ ಆಪ್ಲಿ ತಕ್ಲಿ ಬಾಗಾವ್ನ್ ತಾಕಾ ಮಾನ್ ದೀಂವ್? ಹೆಂ ಆಲಿಯಾ ಜಿವಿತಾಂತ್ ಸತಾ ಖಾತಿರ್ ಕೊಣಾಯ್ ಮುಕಾರ್ ತಕ್ಲಿ ಬಾಗಾಯ್ನಾತ್ಲೆಲೆಂ ಹ್ಯಾ ಕ್ಯಾಪ್ಟನ್ ರಾಣಾ ಮುಕಾರ್ ಆಪ್ಲಿ ತಕ್ಲಿ ಬಾಗಾಂವ್ಕ್ ಸಕ್ತೆಲೆಂ? ನಾ....! ಕೆದಿಂಚ್ ನಾ! ಆಲಿಯಾಚಾ ಮತಿನ್ ನಿರ್ಧಾರ್ ಕೆಲ್ಲೊ.
ಆಲಿಯಾ ಆತಾಂ ಆಪ್ಲ್ಯಾ ಮತಿಕ್ ಮಾತ್ರ್ ಆಯ್ಕೊಂಕ್ ಲಾಗ್ಲೆಂ. ತಾಚ್ಯಾ ಮತಿಕ್ ಕಿತೆಂ ಬರೆಂ ದಿಸ್ತಾ ತೆಂ ಮಾತ್ರ್ ತೆಂ ಕರ್ತಾಲೆಂ. ಮತಿಚಾ ಜವಾಬೆಕ್ ಮಾತ್ರ್ ತೆಂ ಆಪ್ಲ್ಯಾ ಜಿವಿತಾಂತ್ ಗಳ್ಸುಂಕ್ ಲಾಗ್ಲೆಂ. ಹ್ಯಾಚ್ ಕಾರಾಣಾಕ್ ಲಾಗೊನ್ ಕ್ಯಾಪ್ಟನ್ ರಾಣಾಕ್ ಆಲಿಯಾ ಏಕ್ ಗರ್ವಿ ಚೆಡುಂ ಮ್ಹಳ್ಳ್ಯಾ ಪರಿಂ ದಿಸ್ತಾಲೆಂ.
ಕ್ಯಾಪ್ಟನ್ ರಾಣಾ ಜಾಲ್ಯಾರ್ಯ್ ಚಿಂತ್ಪಾನ್ ತಸೊಚ್ ಆಸ್ಲ್ಲೊ. ಆಪ್ಲೆ ವ್ಹಡ್ಲೆ ಅಧಿಕಾರಿ ಪಾಸೊನ್ ಆಪ್ಣಾಕ್ ಮರ್ಯಾದ್ ದಿತಾತ್ ಆಸ್ತಾಂ, ಹೆಂ ಆಲಿಯಾ... ತೆಂಯ್ ಕಾಲ್ಚೆಂ ಚೆಡುಂ, ಅಜೂನ್ಯ್ ಸಾರ್ಕೊ ಸಂಸಾರ್ ಪಳೆನಾತ್ಲೆಲೆಂ ಆಪ್ಣಾ ಹುಜಿರ್ ಗರ್ವಾನ್ ರಾವ್ತಾ ಮ್ಹಳ್ಯಾರ್....! ಹಾಚ್ಯಾ ವರ್ತೆಂ ಇನ್ಸಲ್ಟ್ ಆಪ್ಣಾಕ್ ಆನಿ ಕಿತೆಂ ಜಾಯ್? ಆಪುಣ್ ಕ್ಯಾಪ್ಟನ್....! ಧಯ್ರಾಧೀಕ್ ಕ್ಯಾಪ್ಟನ್! ತ್ಯಾ ಬಾಂಗ್ಲಾ ದೇಶಾಕ್ ಉಭೊನ್ ಯೇಂವ್ಕ್ ಆಶೆಂವ್ಚಾ ಪಾಕಿಸ್ತಾನಾಚ್ಯಾ ಫೈಟರ್ ಪ್ಲೇನಾಂಕ್ ಆಪ್ಲ್ಯಾ ಮಾಂಯ್ ಗಾಂವಾಚಾ ವಾರ್ಯಾ ವಯ್ಲ್ಯಾನ್ ಉಭೊನ್ ಯೇನಾಶೆಂ ಆಡಾಯ್ಲೆಲೊ.... ದೋನ್ ಪಾವ್ಟಿಂ ಮರ್ಣಾಚೆ ರಿಸ್ಕೆರ್ ಥಾವ್ನ್ ಬಾಚಾವ್ ಜಾಲ್ಲೊ.....
ನಿಮಾಣೆ ಆಪ್ಲೆಂ ಮಿಗ್ ಕ್ರ್ಯಾಶ್ ಜಾಂವ್ಚಾ ವಗ್ತಾರ್ಯ್, ಫೈಟರಾ ಥಾವ್ನ್ ಉಡ್ಕಿ ಮಾರುನ್ ಆಪ್ನಾಕ್ಚ್ ಬಚಾವ್ ಕೆಲ್ಲೊಲೊ..... ತ್ಯಾ ಪಾಕಿಸ್ತಾನಾಚಾ ಏರ್ಫೋರ್ಸಾಕ್ ಭಿಯೆನಾತ್ಲಲೊ ಹೊ ಕ್ಯಾಪ್ಟನ್, ಹ್ಯಾ ಆಲಿಯಾಕ್ ತೆಂಯ್ ಎಕಾ ಚಲಿಯೆಕ್ ಆನಿ ತಾಚ್ಯಾ ಗರ್ವಾಕ್ ಸೊಸುನ್ ವರ್ತಲೊ? ಕೆದಿಂಚ್ ನಾ! ಮ್ಹಾಕಾ ಡಿಸಿಪ್ಲೀನ್ ಜಾಯ್.....! ಏವಿಯೇಶನಾಂತ್ ಮ್ಹಾಕಾ ರೂಲ್ಸ್ ಎಂಡ್ ರೆಗ್ಯುಲೇಶನ್ಸ್ ಸ್ಟ್ರಿಕ್ಟ್ಲೀ ಪಾಳ್ಲ್ಲೆಂ ಜಾಯ್!ಹೆಂ ಪಾಳಿನಾತ್ಲೆಲಿಂ......
ವ್ಹಯ್, ಕ್ಯಾಪ್ಟನ್ ರಾಣಾಕ್, ಆಲಿಯಾ ವಯ್ರ್, ಆಲಿಯಾಚಾ ಸ್ವಭಾವಾಕ್ ಲಾಗೊನ್ ಅಭಿಮಾನ್ ಆಯ್ಲೊ ನಾ. ಆಲಿಯಾಕ್, ಕ್ಯಾಪ್ಟನಾಚಾ ಚಿಂತ್ಪಾಕ್ ಲಾಗೊನ್,ಕ್ಯಾಪ್ಟನಾ ವಯ್ರ್ ತಾಕಾ ಮಾನ್ ದಿಂವ್ಚೊ ಗೌರವ್ ಉದೆಲೊ ನಾ. ಕ್ಯಾಪ್ಟನ್ ಆಪ್ಲ್ಯಾ ವ್ಯಕ್ತಿತ್ವಾಚಾ ಜಯ್ತಾ ವಿಶಿಂ ಚಿಂತಾಲೊ. ಆಲಿಯಾ ವ್ಯಕ್ತಿತ್ವಾಕ್ ರುತಾ ಕರ್ಚಾ ಮನ್ಶ್ಯಾಪಣಾ ವಿಶಿಂ ಚಿಂತಾಲೆಂ.
ಆಶೆಂ ಆಲಿಯಾಚೆಂ ಗರ್ವ್ ಮೊಡುಂಕ್ ಕ್ಯಾಪ್ಟನ್ ಹರ್ಯೇಕಾ ವೆಳಾರ್ ಪ್ರಯತ್ನ್ ಕರ್ತಲೊ. ಕ್ಯಾಪ್ಟನಾ ಮುಕಾರ್ ಸಲ್ವೊಂಕ್ ತಯಾರ್ ನಾತ್ಲೆಲೆಂ ಆಲಿಯಾ ಕ್ಯಾಪ್ಟನಾಚಾ ಮುಕಾರ್ ಗರ್ವಾನ್ ರಾವ್ತಾಲೆಂ. ಕ್ಯಾಪ್ಟನಾಚಾ ಉಣ್ಯಾಪಣಾಚಾ ಚಿಂತ್ಪಾಚಾ ಜಯ್ತಾಕ್ ಧರ್ಣಿಕ್ ಶೆವ್ಟಾಂವ್ಚೆಂ ಚಿಂತಾಪ್ ಫಕತ್ತ್ ಆಲಿಯಾಚಾ ಮತಿಂತ್ ಮಾತ್ರ್ ಉದೆತಾಲೆಂ. ಆಲಿಯಾ ಖಂಯ್ಚಾಕ್ಯ್ ಕೆದ್ನಾಂಯ್ ಭಿಯೆಲ್ಲೆಂ ಚೆಡುಂ ನ್ಹಯ್. ಕ್ಯಾಪ್ಟನಾಕ್ ಪಳವ್ನ್ ಆಪುಣ್ ಕಿತ್ಲೆಂ ತಕ್ಲಿ ಬಾಗಾಯ್ತಾಂ ತಿತ್ಲೆಂ ಚಡ್ ಕ್ಯಾಪ್ಟನಾಕ್ ಗೌರವ್ ಮೆಳ್ತಾ ಮ್ಹಳ್ಳೆಂ ತೆಂ ಆಲಿಯಾ ಜಾಣಾಂ. ಹ್ಯಾಚ್ ಖಾತಿರ್, ಸಗ್ಳ್ಯಾ ಕ್ಯಾಂಪಸಾಂತ್ ಕ್ಯಾಪ್ಟನಾಕ್ ದೊಳ್ಯಾಂಕ್ ದೊಳೆ ಮೆಳವ್ನ್ ಉಲಂವ್ಚೆಂ ಎಕ್ಲೆಂ ಮಾತ್ರ್ ಸ್ಟೂಡೆಂಟ್ ಮ್ಹಳ್ಯಾರ್ ಫಕತ್ತ್ ಆಲಿಯಾ! ಕ್ಯಾಪ್ಟನಾಚಾ ಗರ್ವಾಕ್ ತೆಂ ದೆಂವೊಂಕ್ ಸೊಧ್ತಾಲೆಂ. ಹ್ಯಾ ತಾಚ್ಯಾ ಪ್ರಯತ್ನಾಂತ್ ಆಪುಣ್ಯ್ ಗರ್ವಾಕ್ ಪಡ್ಲ್ಯಾಂ ಮ್ಹಳ್ಳೆಂ ಮಾತ್ರ್ ತೆಂ ವಿಸ್ರಾಲೆಂ.
ಏರ್ಬೇಸಾಂತ್, ಆಲಿಯಾಚೆಂ ಪೈಲೆಟ್ ಜಾಂವ್ಚೆಂ ಶಿಕಾಪ್ ಆಶೆಂಚ್ ಚಲ್ತಾಲೆಂ.
ಆಶೆಂ ಆಸ್ತಾಂ
ಆಜ್ ಆನಿ ಫಾಲ್ಯಾಂ ದೋನ್ ದೀಸ್ ಆಲಿಯಾಕ್ ಏರ್ ಬೇಸಾಕ್ ವಚೊಂಕ್ ನಾತ್ಲ್ಲೆಂ. ತಾಕಾ ಸುಟಿ ಆಸ್ಲ್ಲಿ. ಹ್ಯಾ ಕಾರಾಣಾ ಖಾತಿರ್ ಘರಾ ಪರ್ತಾಲ್ಲೆಂ ಆಲಿಯಾ, ಕೆದ್ನಾಂಯ್ ಆಪ್ಣೆಂ ಶಾಪಿಂಗಾಕ್ ವೆಚ್ಯಾಪರಿಂ ತೆಂ ಆಜ್ಯ್ ಶಾಪಿಂಗಾಕ್ ಭಾಯ್ರ್ ಸರ್ಲ್ಲೆಂ. ಆಪ್ಲ್ಯಾ ಮತಿಂತ್ಲ್ಯಾ ಸದಾಂಚಾ ಚಿಂತ್ನಾಂ ಸವೆಂ ತೆಂ ವಿಚಾರ್ ವಿಮರ್ಶಾ ಕರುನ್ ಆಸ್ತಾನಾ ಆಲಿಯಾನ್ ಪಯ್ಣ್ ಕರ್ಚಿ ಟ್ಯಾಕ್ಸಿ ಆಪ್ಲ್ಯಾ ಸದಾಂಚಾ ವಾಟೆರ್ ತ್ಯಾ ಸಿಗ್ನಲಾರ್ ಥಾಂಬ್ಲಿ.
ಸಿಗ್ನಲಾರ್ ಥಾಂಬ್ಲೆಲ್ಯಾ ಟ್ಯಾಕ್ಸೆಚೊ ಡ್ರೈವರ್, ಆಪ್ಲ್ಯಾ ಕಾರ್ ಸ್ಟೀರಿಯೊಕ್ ಹಾತ್ ಮಾರುನ್, ತಾಂತ್ಲಿ ಎದೊಳ್ ವಾಜೊನ್ ಆಸ್ಲ್ಲಿ ಕ್ಯಾಸೆಟ್ ಕಾಡುನ್, ದುಸ್ರಿ ಕ್ಯಾಸೆಟ್ ರಿಗಂವ್ಕ್ ಲಾಗ್ಲೊ. ಹೆಂ ಪಳೆಲ್ಲ್ಯಾ ಆಲಿಯಾನ್, ಆಪ್ಲಿ ದೀಶ್ಟ್ ತ್ಯಾ ಸಿಗ್ನಲಾ ತೆವ್ಶಿಂ ಧಾಂವ್ಡಾಯ್ಲಿ. ಹೆಂ ತಾಚೆಂ ಸದಾಂಚೆಂ ಸಿಗ್ನಲ್. ಎಕಾಕ್ ಏಕ್ ಲಾಗೊನ್ ಮ್ಹಳ್ಳ್ಯಾಪರಿಂ, ತ್ಯಾ ಸಿಗ್ನಲಾನ್ ಥಾಂಬಯಿಲ್ಲಿಂ ವಾಹನಾಂ, ಸಿಗ್ನಲಾ ಮುಕಾರ್ ಅಸಹಾಯಕ್ ಜಾವ್ನ್ ಸಿಗ್ನಲ್ ಉಗ್ತೆಂ ಜಾಂವ್ಕ್ ಉಭಿಂ ಜಾಲ್ಲಿಂ.
ತಿತ್ಲ್ಯಾರ್!
ಸಿಗ್ನಲಾಕ್ ಉಭಿಂ ಜಾಲ್ಲ್ಯಾ ವಾಹನಾಂ ಮಧೆಂ ಎಕ್ಲೊ ಲ್ಹಾನ್ ಪ್ರಾಯೆಚೊ ಚೆಡೊ ಆಪ್ಲ್ಯಾ ಹಾತಾಂತ್ಲ್ಯಾ ದಿಸಾಳ್ಯಾ ಪತ್ರಾಂಕ್ ವಿಕ್ಚ್ಯಾ ಖಾತಿರ್, ಹೆವ್ಶಿಂ ತೆವ್ಶಿಂ ಆಪ್ಲಿ ದೀಶ್ಟ್ ಭೊಂವ್ಡಾವ್ನ್, ಕೊಣಾಕ್ ದಿಸಾಳೆಂ ಪತ್ರ್ ಜಾಯ್ ಮ್ಹಳ್ಳ್ಯಾ ಆಶೆನ್ ತ್ಯಾ ವಾಹನಾಂ ಮಧೆಂ ಘುಸ್ಲೊ. ಕೊಣಾಕ್ ದಿಸಾಳ್ಯಾ ಪತ್ರಾಚಿ ಗರ್ಜ್ ಆಸ್ಲ್ಲಿ ತಾಣಿಂ ತಾಚ್ಯಾ ಹಾತಾಂ ಥಾವ್ನ್ ತಿಂ ಪತ್ರಾಂ ಘೆಂವ್ಕ್ ಆರಂಭ್ ಕೆಲಿಂ.
ಫಕತ್ತ್ ಪಾಂಚ್ ಮಿನುಟಾಂ! ತಿತ್ಲ್ಯಾ ಭಿತರ್ ಕಿತ್ಲಿಂ ವಿಕುನ್ ವೆತಾತ್ ತಿತ್ಲಿಂ ತ್ಯಾ ಚೆಡ್ಯಾನ್ ವಿಕುಂಕ್ ಜಾಯ್ ಆಸ್ಲ್ಲೆಂ. ಹೊ ತಾಚೊ ದಿಸ್ಪೊಡ್ತೊ ಗ್ರಾಸ್!
ಆಲಿಯಾನ್ ಆತಾಂ ಆಪ್ಲಿ ನದರ್ ತ್ಯಾ ಚೆಡ್ಯಾ ವಯ್ಲಿ ಕಾಡುನ್ ಫುಟ್ಪಾತಿ ತೆವ್ಶಿಂನ್ ಪಳೆಲೆಂ.
ಫುಟ್ ಪಾತಿರ್ ಖೆಳ್ಚಿಂ ಭುರ್ಗಿಂ ಆಪ್ಲ್ಯಾ ಖೆಳಾಕ್ ಸೊಡುನ್ ಹೆವ್ಶಿ ಧಾಂವೊನ್ ಆಯ್ಲಿಂ. ಎದೊಳ್ ತಾಂಚೆಂ ಗುಮಾನ್ ತಾಂಚಾ ಖೆಳಾಂತ್ ಆಸ್ಲ್ಲೆಂ. ಪುಣ್ ಆತಾಂ ತಾಂಚಾ ಮುಕಾರ್ ರಾವ್ಲೆಲ್ಯಾ ವಾಹನಾಂಚಾ ಸಂಖ್ಯಾಂಕ್ ಪಳವ್ನ್ ಎಕಾ ಸಾದಾರ್ಣ್ ಪ್ರಾಯೆಚಾ ಚೆಡ್ವಾನ್ ಫುಟ್ಪಾತಿರ್ ವಿಣ್ಗೆಂ ಬಸ್ಲೆಲ್ಯಾ ಎಕಾ ಲ್ಹಾನ್ ಚೆಡ್ವಾಕ್ ಆಪ್ಲ್ಯಾ ಹಾಂಡಿಯೆಕ್ ಮಾರ್ಲೆಂ ಆನಿ ತೆಂ ವೆವೆಗ್ಗಿಂ ತ್ಯಾ ಸಿಗ್ನಲಾಚಾ ಮುಕಾರ್ ರಾವ್ಲೆಲ್ಯಾ ವಾಹನಾ ತೆವ್ಶಿಂ ಚಲೊನ್ ಆಯ್ಲೆಂ.
ಆಪ್ಣಾ ಮುಕಾರ್ ಆಯಿಲ್ಲ್ಯಾ ಕಾರಾಂಚಾ ಆರ್ಶ್ಯಾಂಕ್ ತಾಣೆಂ ಧಾಡಾಯ್ಲೆಂ. ರಿಕ್ಷಾ ಭಿತರ್ ತಿಳುನ್ ಪಳೆಲೆಂ. ಸ್ಕೂಟರ್ ಬೈಕ್ ವಾಲ್ಯಾಂಕ್ ಹಾತ್ ವೊಡ್ಡಾಯ್ಲೆ. ಸಭಾರಾಂನಿ ಗಾಳಿ ದಿಲ್ಯೊ. ಥೊಡ್ಯಾಂನಿ ತಾಚ್ಯಾ ಹಾತಾರ್ ಕಿತೆಂ ಘಾಲೆಂ. ಥೊಡ್ಯಾಂನಿ ಹೆವ್ಶಿಂ ಪಳೆಲೆಂ. ಥೊಡ್ಯಾಂನಿ ಆಪ್ಲ್ಯಾ ತಕ್ಲೆಕ್ ಘುಂವ್ಡಾಯ್ಲೆಂ.
ಆಪ್ಣಾಕ್ ಪಳವ್ನ್ ತಕ್ಲಿ ಘುಂವ್ಡಾಯಿಲ್ಲ್ಯಾ ಎಕಾ ಬೈಕ್ವಾಲ್ಯಾಕ್ ತಾಣೆಂ ಆಪ್ಲ್ಯಾ ಹಾತಾನಿಂ ಆಪಡ್ಲೆಂ.
ತ್ಯಾ ತಾಣೆಂ ಆಪಡ್ಲೆಲ್ಯಾ ಕರ್ಮಾಕ್ ತ್ಯಾ ಬೈಕ್ವಾಲ್ಯಾ ಥಾವ್ನ್ ತೋಂಡ್ಭರ್ ಗಾಳಿ ಖಾವ್ನ್ ತೆಂ ಹೆವ್ಶಿಂ ಆಯ್ಲೆಂ. ಹೆಂ ತಾಕಾ ಸದಾಂಚೆಂ. ಭಿಕ್ ಜಾವ್ನ್ ಆಪ್ಣಾಕ್ ಕಿತೆಂ ಮೆಳ್ತಾ ತೆಂ ಸರ್ವ್ ತಾಣೆಂ ಸ್ವೀಕಾರ್ ಕರುಂಕ್ ಜಾಯ್ ಆಸ್ಲ್ಲೆಂ. ಕಿತ್ಯಾಕ್, ತಾಚ್ಯಾ ಪೊಟಾಕ್ ಭುಕ್ ಮ್ಹಳ್ಳಿ ತಿ ಆಸ್ಲ್ಲಿ!
ಟ್ಯಾಕ್ಸೆಚಾ ಭಿತರ್ ಬಸ್ಲೆಲೆಂ ಆಲಿಯಾ ತ್ಯಾ ಚೆಡ್ವಾಕ್ಚ್ ಪಳೆತಾಲೆಂ.
ತಿತ್ಲ್ಯಾರ್!
ತ್ಯಾಚ್ ಚೆಡ್ವಾನ್ ಆಲಿಯಾಚಾ ಟ್ಯಾಕ್ಸೆ ಮುಕಾರ್ ರಾವ್ಲೆಲ್ಯಾ ಧವ್ಯಾ ರಂಗಾಚ್ಯಾ ಕಾರಾಚಾ ಆರ್ಶ್ಯಾರ್ ಆಪ್ಲೆ ಹಾತ್ ಧಾಡಾಯ್ಲೆ. ಹ್ಯುಂದಾಯ್ ಕಾರ್ ತೆಂ! ಕಾರಾಕ್ ಸಂಫೂರ್ಣ್ ಕಾಳೆ ಆರ್ಶೆ ಆಸ್ಲ್ಲ್ಯಾನ್ ಆಲಿಯಾಕ್ ತ್ಯಾ ಕಾರಾ ಭಿತರ್ ಕೋಣ್ ಆಸಾ ಕಿತೆಂ ಆಸಾ ತೆಂ ಕಾಂಯ್ಚ್ ದಿಸಾನಾತ್ಲ್ಲೆಂ.
ತಿತ್ಲ್ಯಾರ್!
ಎಕಾಚ್ಚ್ಫರಾ ತ್ಯಾ ಕಾರಾಚೆಂ ದಾರ್ ಉಗ್ತೆಂ ಜಾಲೆಂ.
’ಸಟ್ಟ್’ ಕರುನ್ ತ್ಯಾ ಕಾರಾ ಥಾವ್ನ್ ದೆಂವ್ಲ್ಲೊ ಏಕ್ ವ್ಯಕ್ತಿ ಹೆವ್ಶಿಂ ಆಯಿಲ್ಲೊ ತೊ ತ್ಯಾ ಚೆಡ್ವಾ ತೆವ್ಶಿಂ ಚಮ್ಕಾಲ್ಲೊಚ್ ’ಚಟ್’ ’ಚಟ್’ ಕರುನ್ ತ್ಯಾ ಚೆಡ್ವಾಚ್ಯಾ ಕಾನ್ಸುಲಾರ್ ದೋನ್ ಚ್ಯಾರ್ ಥಾಪ್ಡಾಂ ವಾಜವ್ನ್ "ಬೆಹೆ.......ಚೋ.....!""ಮದ.... ಚೋ.....!" "......." ಆಪ್ಲ್ಯಾ ತೊಂಡಾ ಥಾವ್ನ್ ಗಾಳಿಯಾಂಚೊ ಶಿರಾಪ್ ವೊತುಂಕ್ ಲಾಗ್ಲೊ.
"ತುಜ್ಯಾ ಬಾಪಾಯ್ಚಿ ಗಾಡಿ? ತೆರಿ ಮಾಂ ಕೀ......!" ಬೊಬಾಟ್ಲೊ ತೊ.
ತಿತ್ಲೆಂಚ್!
ಟ್ಯಾಕ್ಸೆ ಭಿತರ್ ಬಸ್ಲೆಲ್ಯಾ ಆಲಿಯಾಕ್ಬಸೊಂಕ್ ಜಾಲೆಂ ನಾ. ’ಚಟ್’ ’ಚಟ್’ ಕರುನ್ ಕೊಣೆಗೀ ತಾಚ್ಯಾಚ್ ಕಾನ್ಸುಲಾರ್ ವ್ಹಾಜಯಿಲ್ಲ್ಯಾ ಪರಿಂ ತಾಕಾ ಜಾಲೆಂ.
ತಿತ್ಲೆಂಚ್!
ಕಸಲ್ಯಾಗೀ ಆಕ್ರೋಶಾನ್ ಮ್ಹಳ್ಳ್ಯಾಪರಿಂ ತಾಣೆಂ ಆಪ್ಣೆಂ ಬಸ್ಲೆಲ್ಯಾ ಟ್ಯಾಕ್ಸೆಚೆಂ ದಾರ್ ಉಗ್ತೆಂ ಕೆಲೆಂ.
"ಹೇಯ್ ಯು ಮಿಸ್ಟರ್! ತುಕಾ ಲಜ್ ದಿಸಾನಾ ಎಕಾ ಭುರ್ಗ್ಯಾ ವಯ್ರ್ ಹಾತ್ ಉಕೊಲ್ತಾಯ್?" ಆಲಿಯಾ ಬೊಬಾಟ್ಲೆಂ.
ಟ್ಯಾಕ್ಸಿ ಡ್ರೈವರಾಕ್ ಕಿತೆಂ ಜಾತಾ ತೆಂ ಕಾಂಯ್ಚ್ ಸಮ್ಜಾಲೆಂ ನಾ. ಮುಂಬಯಿಂತ್ ಹೆಂ ಸದಾಂಚೆಂ! ಪಂದ್ರಾ ವೀಸ್ ಲಾಖಾಂಚಾ ಹ್ಯಾ ಕಾರಾಂಕ್ ಇತ್ಲೆಂ ನಿತಳಾಯೆನ್ ದವರುನ್ ಆಸ್ತಾನಾ ಹ್ಯಾ ರಸ್ತ್ಯಾ ವಯ್ಲ್ಯಾ ಭಿಕಾರ್ಯಾಂನಿ ಆಪ್ಲೆ ಹಾತ್ ತ್ಯಾ ನಿತಳ್ ಕಾರಾರ್ ಮಾರುನ್ ತ್ಯಾ ಕಾರಾರ್ ಆಪ್ಲ್ಯಾ ಹಾತಾಚೆಂ ಬ್ಲೂ ಪ್ರಿಂಟ್ ಛಾಪ್ಚೆಂ?
"ತುಂ ಹಾಚಿ ಆವಯ್ ಕಿತೆಂ?" ತೊ ವ್ಯಕ್ತಿ ಆತಾಂ ಆಲಿಯಾ ವಯ್ರ್ ಘುಂವ್ಲೊ.
ಹಾಂವ್ ಹಾಚಿ ಆವಯ್? ತರ್ ಹಾಣೆಂ ಹ್ಯಾ ಉಗ್ತ್ಯಾ ರಸ್ತ್ಯಾರ್ ಹ್ಯಾ ಸರ್ವಾಂ ಹುಜಿರ್ ಎದೊಳ್ ದಿಲ್ಲ್ಯೊ ತ್ಯೊ ಗಾಳಿ ಮ್ಹಾಕಾ? ಆಲಿಯಾಚೆಂ ರಗಾತ್ ಸಳ್ಸಳೊನ್ ತೆಂ ವಾಗಿಣ್ ಜಾಲೆಂ.
"ಹಾಂ! ಕಿತೆಂ ಜಾಲೆಂ?" ಆಲಿಯಾ ಬೊಬಾಟ್ಲೆಂ. ಜಶೆಂ ತೆಂ ತ್ಯಾ ಭಿಕಾರಿ ಚೆಡ್ವಾಚೆಂ ಖರೆಂ ಆವಯ್ ಮ್ಹಳ್ಳ್ಯಾಪರಿಂ "......ಆತಾಂ ತುಂ ತಾಚ್ಯೆರ್ ಹಾತ್ ಉಕಲ್. ತುಜ್ಯಾ ಬಾಪಾಯ್ಚೊ ತುಂ ಪೂತ್ ಜಾಲ್ಯಾರ್ ಆತಾಂ ತಾಚ್ಯೆ ವಯ್ರ್ ಹಾತ್ ಉಕೊಲ್! ಹಲ್ಕಟ್....! ಹ್ಯಾ ಭುರ್ಗ್ಯಾಂ ವಯ್ರ್ ಹಾತ್ ಉಕೊಲ್ತಾ!" ಆಲಿಯಾ ರಾಗಾನ್ ಕಾಂಪ್ತಾಲೆಂ.
"ಯೇ...? ಚಲ್ ಚಲ್...! ತುಜ್ಯೆಂ ಕಾಮ್ ಪಳೆ!" ತ್ಯಾ ವ್ಯಕ್ತಿನ್ ತಶೆಂಚ್ ಆಲಿಯಾಕ್ ಪಳೆಲೆಂ.
"ಮ್ಯಾಡಮ್ ಸಿಗ್ನಲ್ ಉಗ್ತೆಂ ಜಾತಾ......!" ಟ್ಯಾಕ್ಸಿ ಡ್ರೈವರ್ ಬೊಬಾಟ್ಲೊ.
"ಭುರ್ಗ್ಯಾಂ ವಯ್ರ್ ಹಾತ್ ಉಕೊಲ್ತಾ! ಶಿಖಂಡಿ ಖಂಯ್ಚೊ!" ಆಲಿಯಾಚೊ ರಾಗ್ ದೆಂವ್ಲೊ ನಾ.
"ಕಿತೆಂ ಮ್ಹಳೆಂಯ್ ತುವೆಂ...?" ತೊ ವ್ಯಕ್ತಿ ಮುಕಾರ್ ಆಯ್ಲೊ.
"ಏ.... ಚಲ್ ಚಲ್ ತುಜ್ಯಾ ಘರಾ ತುಜ್ಯಾ ಬಾಪಾಯ್ಚೆರ್ ಹೆಂ ಚಲಯ್!"
ರಸ್ತ್ಯಾ ವಯ್ಲ್ಯಾ ಸಿಗ್ನಲಾರ್ ಏಕ್ ಸೊಭಿತ್ತ್ ತರ್ನಾಟೆಂ ಚಲಿ ವಾಟೆ ವಯ್ಲ್ಯಾ ಮಾಗ್ತೆಲ್ಯಾ ಭಿಕಾರ್ಯಾಚಾ ಪಾಡ್ತೆನ್ ಝಗ್ಡೊಂಕ್ ಲಾಗ್ತಾನಾ ಹೆವ್ಶಿಂ ತೆವ್ಶಿಂಲ್ಯಾಂಕ್ ಅಜಾಪ್ ಜಾಲೆಂ. ಟ್ಯಾಕ್ಸಿ ಡ್ರೈವರ್ ಭಾಯ್ರ್ ಆಯ್ಲೊ. ಪೇಪರ್ ವಿಕ್ಚೊ ಚೆಡೊ ಆಲಿಯಾಚಾ ಬಗ್ಲೆಕ್ ಯೇವ್ನ್ ರಾವ್ಲೊ.
"ಸೊಡ್ ಮ್ಯಾಡಮ್.... ಸಿಗ್ನಲ್ ಉಗ್ತೆಂ ಜಾಲೆಂ!" ಟ್ಯಾಕ್ಸಿ ಡ್ರೈವರಾನ್ ಜಾಗಯ್ಲೆಂ.
ಟ್ಯಾಕ್ಸಿ ಡ್ರೈವರಾಚಾ ತಾಳ್ಯಾ ಸಾಂಗಾತಾ ಹೆವ್ಶಿಂ ತೆವ್ಶಿಂಲ್ಯಾಂಚೊ ತಾಳೊ ಭಳ್ ಜಾತಾನಾ ಪಾಟ್ಲ್ಯಾನ್ ಥಾವ್ನ್ ವಾಹನಾಂಚೆಂ ಹಾರನ್ ವ್ಹಾಜೊಂಕ್ ಲಾಗ್ಲೆಂ.
"ಆಪ್ಣಾಕ್ ಕಿತೆಂ ಸಮ್ಜಾತಾ ಹೊ?" ಆಲಿಯಾಚೊ ತಾಳೊ ರಾಗಾನ್ ಕಾಂಪ್ತಾಲೊ. ತೆಂ ಅಜೂನ್ ಥಂಡ್ ಜಾಂವ್ಕ್ ನಾತ್ಲ್ಲೆಂ.
ಹ್ಯುಂದಾಯ್ ಕಾರಾಚಾ ವ್ಯಕ್ತಿಕ್ ಮಾತ್ರ್ ನಿಜಾಯ್ಕ್ಯ್ ಆಘಾತ್ ಜಾಲ್ಲೊ. ತಾಣೆಂ ಚಿಂತುಂಕ್ ನಾತ್ಲೆಲೆಂಚ್ ಘಡ್ಲ್ಲೆಂ. ಉಗ್ತ್ಯಾ ರಸ್ತ್ಯಾರ್ ಹ್ಯಾ ಚಲಿಯೆಲಾಗಿಂ ತಾಣೆಂ ಝಗಡ್ಚ್ಯಾಪರಿಂ ನಾತ್ಲ್ಲೆಂ.
ತಿತ್ಲ್ಯಾರ್ ಲೊಕಾಚಾ ವತ್ತಾಯೆಕ್ ಆಲಿಯಾ ಟ್ಯಾಕ್ಸೆರ್ ಬಸ್ತಾನಾ ಹ್ಯುಂದಾಯ್ ಕಾರಾಚಾ ವ್ಯಕ್ತಿನ್ ಆಪ್ಲೆಂ ಕಾರ್ ಮುಕಾರ್ ಧಾಂವ್ಡಾಯ್ಲೆಂ.
ಭುರ್ಗ್ಯಾಕ್ ಹಾಂಡಿಯೆರ್ ಘೆವ್ನ್, ಆಪ್ಲ್ಯಾ ಕಾನ್ಸುಲಾರ್ ಮಾರ್ ಕೆಲ್ಲೆಂ ಚೆಡುಂ, ಥಂಯ್ಚ್ ಬಗ್ಲೆಕ್ ರಾವೊನ್ ಆಲಿಯಾಕ್ಚ್ ಪಳೆತಾಲೆಂ.
ಆಲಿಯಾ ಆತಾಂ ಟ್ಯಾಕ್ಸೆರ್ ಬಸ್ಲೆಂ. ಟ್ಯಾಕ್ಸೆರ್ ಬಸೊನ್ ತೆಂ ಭಾಯ್ರ್ ಪಳೆತಾನಾ, ತೆಂ, ಆಪ್ಲ್ಯಾ ಕಾನ್ಸುಲಾರ್ ಮಾರ್ ಕೆಲ್ಲೆಂ ನೆಣ್ತೆಂ ಚೆಡುಂ ಭಿಯಾನ್ ಆಪ್ಣಾಕ್ಚ್ ಪಳೆತಾ ತೆಂ ಆಲಿಯಾಕ್ ದಿಸ್ಲೆಂ. ತ್ಯಾ ಭಾಯ್ರ್ ತಾಣೆಂ ಬಸ್ಲೆಲ್ಯಾ ಟ್ಯಾಕ್ಸಿಚಾ ದಾರಾ ಲಾಗಿಂಚ್ ಉಭೊ ಆಸ್ಲಲೊ ತೊ ದಿಸಾಳಿಂ ಪತ್ರಾಂ ವಿಕ್ಚೊ ನೆಣ್ತೊ ಭುರ್ಗೊ ಆಲಿಯಾಕ್ ಪಳವ್ನ್ ಹಾಸ್ಚೊ ದಿಸ್ಲೊ.
ಕೃತಜ್ಞಾತಾಯೆಕ್ ಭಾಸಾಂವ್ಚ್ಯೊ ಹಾಸೊ!
ಆಲಿಯಾನ್ ಉಭೆಂ ಕೆಲ್ಲ್ಯಾ ಝುಜಾಚ್ಯಾ ಜಯ್ತಾಚ್ಯೊ ಹಾಸೊ!
ಜಿವಿತಾಚಾ ಝುಜಾಂತ್ ಆಲಿಯಾ ಹ್ಯಾಚ್ ಹಾಸ್ಯಾಂಕ್ ಪಳಂವ್ಕ್ ಆಶೆತಾಲೆಂ. ತೆಂ ತ್ಯಾ ಭಿಕಾರಿ ಚೆಡ್ವಾಚ್ಯಾ ದೊಳ್ಯಾಂನಿ ಉದೆಲ್ಯಾ ದುಖಾಂಕ್ ಕೆದ್ನಾಂಚ್ ಪಳೆಂವ್ಕ್ ಆಶೆನಾತ್ಲ್ಲೆಂ.
ಉಗ್ತೆಂ ಆಸ್ಲ್ಲ್ಯಾ ಸಿಗ್ನಲಾ ಮುಕಾಂತ್ರ್ ಆಲಿಯಾನ್ ಬಸ್ಲೆಲಿ ಟ್ಯಾಕ್ಸಿ ಮುಕಾರ್ ಧಾಂವ್ಲಿ.
"ಕಿತ್ಯಾಕ್ ಮ್ಯಾಡಮ್ ಹ್ಯಾ ಲಪ್ಡ್ಯಾಂನಿಂ ಪಡೊಂಕ್ ಜಾಯ್? ಹೆಂ ಹಾಂಗಾ ಸದಾಂಚೆಂ!" ಟ್ಯಾಕ್ಸಿ ಡ್ರೈವರ್ ಉಲಯ್ಲೊ.
"ಹ್ಯಾ ವಿರೋಧ್ ಎದೊಳ್ ಕೊಣ್ಯ್ ಉಟೊಂಕ್ ನಾ ದೆಕುನ್ ಹೆಂ ಸದಾಂಚೆಂ. ತ್ಯಾ ಭುರ್ಗ್ಯಾಕ್ ಹ್ಯಾ ಸಮಾಜೆಂತ್ ಜಿಯೆಂವ್ಚೆಂ ಹಕ್ಕ್ ನಾ? ತಾಕಾ ಭಿಕಾರಿ ಜಾವ್ನ್ ಕೊಣೆ ಕೆಲಾಂ? ಹ್ಯಾಚ್ ಸಮಾಜೆನ್ ಕೆಲಾಂ! ಹ್ಯಾಚ್ ದಳ್ದಿರ್ ಸಮಾಜೆನ್!" ಆಲಿಯಾ ಟ್ಯಾಕ್ಸಿ ಭಿತರ್ ಜಿಡೆಂ ಫುಲಯಿಲ್ಲ್ಯಾ ಸರೊಪಾ ಪರಿಂ ಫುಸ್ ಫುಸ್ತಾಲೆಂ.
ಹಿ ಸಮಾಜ್ಯ್ ತಸಲಿಚ್ಚ್! ಹಾಂಗಾಸರ್ ಕೋಣ್ ಎಕ್ಲೆಂ ಯಾ ಕೋಣ್ ಎಕ್ಲೊ ಅಭಲ್ ಮ್ಹಣೊನ್ ಕಳಿತ್ ಜಾಲೆಂ ಜಾಲ್ಯಾರ್, ಉಪ್ರಾಂತ್ ತಾಣೆಂ ಹ್ಯಾ ಸಮಾಜೆಂತ್ ಜಿಯೆಲ್ಲ್ಯಾಪರಿಂ ನಾ. ತಾಕಾ ತಕ್ಲಿ ಉಕ್ಲುನ್ ಜಿಯೆಂವ್ಕ್ ಸಾದ್ಯ್ ನಾ. ಚೆಡ್ವಾ ಭುರ್ಗ್ಯಾ ವಯ್ರ್ ಹಾತ್ ಉಕ್ಲುನ್ ಆಪ್ಣಾಕ್ ಆಪುಣ್ ವ್ಹಡ್ಲೊ ದಾದ್ಲೊ ಮ್ಹಣೊನ್ ಸಮ್ಜಾತಾ! ಆಲಿಯಾ ಟ್ಯಾಕ್ಸೆ ಭಿತರ್ ತ್ಯಾಚ್ ಘಡಿತಾಕ್ ಚಿಂತುಂಕ್ ಲಾಗ್ಲೆಂ.
ಆಲಿಯಾ ಆಜ್ ಕೊಣಾ ಖಾತಿರ್ ಝುಜಾಕ್ ದೆಂವ್ಲ್ಲೆಂ? ಆಜ್ ತೆಂ ಕೊಣಾ ವಿರೋಧ್ ಝುಜಾಕ್ ಆಯ್ತೆಂ ಜಾಲ್ಲೆಂ?
ಆಪ್ಲ್ಯಾಚ್ ಸಮಾಜೆ ವಯ್ರ್? ಆಪ್ಲ್ಯಾಚ್ ಸಮಾಜೆನ್ ರಚ್ಲೆಲ್ಯಾ ವರ್ಗಾಂ ವಿರೋಧ್? ಆಪ್ಲ್ಯಾಚ್ ಸಮಾಜೆನ್ ರಚ್ಲೆಲ್ಯಾ ಹ್ಯಾ ಭಿಕಾರಿ ಆನಿ ಸವ್ಕಾರಾ ವಿರೋಧ್? ಆಲಿಯಾಚೆಂ ಝುಜ್ ತಾಚ್ಯಾ ವಿಚಾರಾಂ ಪರ್ಮಾಣೆಂ ನಿಜಾಯ್ಕ್ಯ್ ಸಾರ್ಕೆಂ ಆಸ್ಲ್ಲೆಂ. ಪುಣ್ ಆಲಿಯಾ ಜಾಲ್ಯಾರ್ಯ್ ಹ್ಯಾಚ್ ಸಮಾಜೆಚೊ ಏಕ್ ವಾಂಟೊ ಜಾವ್ನ್ ಆಸ್ಲ್ಲೆಂ. ಹ್ಯಾ ಸಮಾಜೆ ಶಿವಾಯ್ ತೆಂ ಕಾಂಯ್ಚ್ ಕರುಂಕ್ ಸಕಾನಾತ್ಲ್ಲೆಂ. ಆಶೆಂ ಆಸ್ತಾನಾ ಆಪುಣ್ ಆಪ್ಣಾ ವಿರೋಧ್ಚ್ ಝುಜ್ತಾಂ ಮ್ಹಳ್ಳೆಂ ತೆಂ ಆಲಿಯಾ ವಿಸ್ರೊನ್ ಗೆಲ್ಲೆಂ.
ಆಲಿಯಾಚಾ ಹ್ಯಾ ವಿಸ್ರೊಣೆಚಾ ಪರಿಣಾಮಾನ್ ತಾಚೆರ್ ದಾಡ್ ಮಾರುಂಕ್ ಚಡ್ ವೇಳ್ ಕಾಡ್ಲೊ ನಾ.
ದೋನ್ ದಿಸಾಂ ಉಪ್ರಾಂತ್ ಪರ್ತ್ಯಾಕ್ ಏವಿಯೇಶನ್ ಕ್ಯಾಂಪಸಾಕ್ ಆಲಿಯಾ ಪಾಟಿಂ ಪರ್ತಾಲೆಂ. ಪರ್ತ್ಯಾಕ್ ತಾಚೆಂ ತೆಂ ಟ್ರೇಯ್ನಿಂಗ್ ಆರಂಭ್ ಜಾಲೆಂ. ದೋನ್ ದಿಸಾಂ ಪಯ್ಲೆಂ ಅಚಾನಕ್ ಆಪ್ಲ್ಯಾ ದೊಳ್ಯಾಂ ಮುಕಾರ್ ಘಡ್ಲೆಲ್ಯಾ ಘಡಿತಾ ಥಾವ್ನ್ ಆಲಿಯಾ ಭಾಯ್ರ್ ಯೇಂವ್ಕ್ ಸಕ್ಲೆಂ ನಾ.
"ಆಲಿಯಾ....! ಯು ಆರ್ ರಿಕ್ವೆಸ್ಟಡ್ ಟು ಕಮ್ ಟು ದಿ ಆಫೀಸ್....!" ಏವಿಯೇಶನಾಕ್ ಪಾವ್ಲೆಲ್ಯಾ ಆಲಿಯಾಕ್ ಆಫೀಸ್ರುಮಾ ಥಾವ್ನ್ ಉಲೊ ಆಯ್ಲೊ.
ರಸ್ತ್ಯಾರ್ ಜಾಲ್ಯಾ ತ್ಯಾ ಅವ್ಚಿತ್ತ್ ಘಡಿತಾಕ್ ಆಪ್ಲ್ಯಾ ಮತಿಂತ್ ಉಡಾಸ್ ಕಾಡುನ್ ತ್ಯಾ ರಸ್ತ್ಯಾ ವಯ್ಲ್ಯಾ ಸಿಗ್ನಲಾರ್ ಮಾರ್ ಕೆಲ್ಲ್ಯಾ ತ್ಯಾ ಚೆಡ್ವಾಚೆಂ ರುಪ್ಣೆಂ ತಾಚ್ಯಾ ಮತಿಂತ್ ಆಪಾಲಿಪಾ ಖೆಳೊನ್ ಆಸ್ತಾನಾ ಆನಿ ತ್ಯಾ ನೆಣ್ತ್ಯಾ ಚೆಡ್ಯಾಚಾ ತೊಂಡಾ ವಯ್ಲ್ಯಾ ಹಾಸ್ಯಾಂನಿ ತಾಕಾ ಧಯ್ರಾನ್ ಭರ್ತಾನಾ ಆಫೀಸ್ ರೂಮಾ ಥಾವ್ನ್ ಆಯ್ಲೆಲ್ಯಾ ಆಪವ್ಣೆಕ್ ಪಾಳೊ ದೀವ್ನ್ ಆಲಿಯಾ ಆಫೀಸ್ ರೂಮಾಚಾ ದಾರಾರ್ ಉಭೆಂ ಜಾಲೆಂ.
"ಮೇ ಐ ಕಮಿನ್ ಸಾರ್?" ಜನರಲಾಚಾ ಆಫೀಸಾ ದಾರಾರ್ ರಾವೊನ್ ಆಲಿಯಾನ್ ವಿನತಿ ಕೆಲಿ.
"ಕಮ್ ಇನ್.....!" ಭಿತರ್ ಥಾವ್ನ್ ಜನರಲ್ ಕಮಾಂಡರಾಚೊ ತಾಳೊ.
ಆಲಿಯಾ ಆತಾಂ ದಾರಾ ಭಿತರ್ ಸರ್ಲೆಂ. ತಾಕಾ ಜನರಲಾನ್ ಆಪಯಿಲ್ಲ್ಯಾಚೊ ಮತ್ಲಾಬ್ ಕಳಿತ್ ನಾತ್ಲ್ಲೊ. ತರ್ಯ್ ತಾಚ್ಯಾ ದೊಳ್ಯಾಂನಿ ಭಿರಾಂತೆಚಿ ಛಾಯಾ ಪಾಸೊನ್ ಜಳ್ಕಾಲಿ ನಾ. ತೆಂ ಜಲ್ಮಾ ಥಾವ್ನ್ ಧಯ್ರಾಧೀಕ್ ಚೆಡುಂ.ವೆಳಾಚಾ ವೆಳಾ......, ಖಂಯ್ ಆನಿ ಕಸಲೊ ನಿರ್ಧಾರ್ ಘೆಂವ್ಕ್ ಜಾಯ್, ಮ್ಹಳ್ಳ್ಯಾ ವಿಶಿಂ ಆಲಿಯಾಕ್ ಚಿಂತ್ಚಿ ಗರ್ಜ್ಚ್ ನಾತ್ಲ್ಲಿ. ಆಪ್ಲ್ಯಾ ಕಾಳ್ಜಾಕ್ ಕಿತೆಂ ಬರೆಂ ದಿಸ್ತಾ ತೆಂಚ್ ಆಲಿಯಾ ಕರ್ತಾಲೆಂ.
ಜನರಲಾಚಿ ಪರ್ವಣ್ಗಿ ಘೆವ್ನ್ ಆಲಿಯಾನ್ ತಾಚ್ಯಾ ಆಫೀಸಾ ಭಿತರ್ ಮೆಟಾಂ ಕಾಡ್ಲಿಂ.
ಭಿತರ್ ಆಯ್ಲೆಲ್ಯಾ ಆಲಿಯಾಕ್, ಜನರಲಾಚಾ ಮುಕಾರ್ ಬಸ್ಲಲೊ ಕ್ಯಾಪ್ಟನ್ ರಾಣಾ, ಆಪ್ಣಾ ತೆವ್ಶಿಂ ಪಳವ್ನ್, ಉಪ್ರಾಂತ್ ಸವ್ಕಾಸ್ ತಾಚ್ಯಾ ಬಸ್ಕೆಚೆರ್ ರಿಲ್ಯಾಕ್ಸ್ ಜಾಲ್ಲೊ ತೊ ದಿಸ್ಲೊ. ಜನರಲಾಚಾ ಮುಕಾರ್ ಕ್ಯಾಪ್ಟನ್ ರಾಣಾಕ್ ಪಳವ್ನ್, ಆಲಿಯಾಕ್ ಪಯ್ಲ್ಯಾ ಪಾವ್ಟಿಂ, ಆಪ್ಣಾಕ್ ಜನರಲಾಚಾ ಆಫೀಸಾಕ್ ಆಪಯಿಲ್ಲ್ಯಾಚೊ ದುಬಾವ್ ಜಾಲೊ.
"ಎಸ್ ಸಾರ್.......!?"
ಆಲಿಯಾಕ್ ಪಳವ್ನ್ ಜನರಲ್ ಆಪ್ಲ್ಯಾ ಬಸ್ಕೆಕ್ ವೊಣ್ಕಾಲೊ. ತಶೆಂಚ್ ವೊಣ್ಕೊನ್ ತಾಣೆಂ ಆಲಿಯಾಕ್ಚ್ ತದೇಕ್ ದ್ರಷ್ಟೆನ್ ಪಳೆಲೆಂ.
ಥೊಡಿಂಚ್ ಖಿಣಾಂ...!
ತೊ ಆತಾಂ ಪರ್ತ್ಯಾಕ್ ಆಪ್ಲ್ಯಾ ಬಸ್ಕೆರ್ ಮುಕಾರ್ ಬಾಗ್ವಾಲೊ.
"ಸೊ..... ಯು ಆರ್ ಆಲಿಯಾ...! ಆಲಿಯಾ ಶಬೀರ್ ಖಾನ್!"ಜನರಲಾನ್ ಉತ್ರಾಂ ವಿಂಚ್ಲಿಂ.
"ಎಸ್ ಸಾರ್!"
"ತುಂ ಜಣಾಂಯ್ ಹ್ಯಾ ಏವಿಯೇಶನ್ ಏರ್ಬೇಸಾ ಭಿತರ್ ಖಂಯ್ಚಾ ಕಾರಾಣಾ ಖಾತಿರ್ ತುಂ ಆಸಾಯ್?"
"ವ್ಹಯ್ ಸಾರ್!"
"ದೆನ್ ವೈ ಯು ಆರ್ ಬಿಹೇವಿಂಗ್ ಲೈಕ್ ದೇಟ್?"
"ಹಾವೆಂ ಕಿತೆಂ ಕೆಲೆಂ ಸಾರ್.....?"
"ತುಂ ಮ್ಹಾಕಾ ವಿಚಾರ್ತಾಯ್.... ತುವೆಂ ಕಿತೆಂ ಕೆಲಾಂ?"
"...........!" ಜನರಲಾಚೆಂ ಸವಾಲ್ ಆಯ್ಕಾಲ್ಲ್ಯಾ ಆಲಿಯಾಕ್ ವಿಚಿತ್ರ್ ದಿಸ್ಲೆಂ. ತೆಂ ಕಾಂಯ್ ಉಲಯ್ಲೆಂ ನಾ. ಕ್ಯಾಪ್ಟನ್ ರಾಣಾಕ್ ಜನರಲಾಚಾ ಮುಕಾರ್ ಪಳವ್ನ್ ಮಾತ್ರ್, ಹಾಂಗಾಚಾ ವಾತಾವರಾಣಾಚ್ಯಾ ವಿಶಿಂ ತಾಕಾ ದುಬಾವ್ ಉದೆಲ್ಲೊ. ಜನರಲಾಚಾ ಸವಾಲಾ ಥಾವ್ನ್ ತೊ ದುಬಾವ್ ಆತಾಂ ಖರ್ಯಾ ರುಪಾಕ್ ಪರ್ತಾತಾಲೊ. ತರ್ಯ್,ತೆಂ ಜನರಲಾನ್ ವಿಚಾರ್ಲೆಲ್ಯಾ ಸವಾಲಾಕ್ ಮಾತ್ರ್ ಜವಾಬ್ ದಿಂವ್ಚಾಕ್ ರಾವ್ಲೆಂ ಶಿವಾಯ್ ದುಸ್ರೆಂ ಕಾಂಯ್ ಉಲಯ್ಲೆಂ ನಾ.
ಆಲಿಯಾ ಮೌನ್ ಜಾಲ್ಲೆಂ ಪಳೆಲ್ಲೊ ಜನರಲ್, ಆಪ್ಣಾ ಮುಕ್ಲ್ಯಾ ಮೆಜಾ ವಯ್ಲೆಂ ಆಪ್ಣಾಚೆಂ ಪೆನ್ನ್ ಹಾತಿಂ ಘೆವ್ನ್ ಆಪ್ಲ್ಯಾ ಬಸ್ಕೆಕ್ ವೊಣ್ಕಾಲೊ. ತಾಚಿ ದೀಷ್ಟ್ ತಶಿಚ್ಚ್ ಪಯ್ಲೆಂಚಾ ಪರಿಂ ಆಲಿಯಾಕ್ಚ್ ಜೊಕುನ್ ಮ್ಹಳ್ಳ್ಯಾ ಪರಿಂ ಪಳೆತಾಲಿ.
"ತುಕಾ ಕಾಂಯ್ ಪುಣಿಂ ಮಿಸ್ ಅಂಡರ್ಸ್ಟ್ಯಾಂಡಿಂಗ್ ಆಸಾ?"
"ಖಂಯ್ಚಾ ವಿಶಯಾಂತ್ ಸಾರ್?"
"ತುಂ ಕ್ಯಾಪ್ಟನ್ ರಾಣಾಚಾ ವಿಶಿಂ ಕಿತೆಂ ಚಿಂತಾಯ್?"
"ತೊ ಮ್ಹಜೊ ಪ್ಲೈಯಿಂಗ್ ಕಮಾಂಡರ್ ಆನಿ ಹಾಂವ್ ತಾಚೊ ರೆಸ್ಪೆಕ್ಟ್ ಕರ್ತಾಂ!"
"ಶೂವರ್......?"
"ಎಸ್ ಸಾರ್!"
"ಪುಣ್.... ಕ್ಯಾಪ್ಟನ್ ಸಾಂಗ್ತಾ ಕೀ.....?" ಜನರಲಾನ್ ಆಪ್ಲಿಂ ಉತ್ರಾಂ ಅರ್ಧ್ಯಾರ್ಚ್ ರಾವೊನ್ ಕ್ಯಾಪ್ಟನ್ ರಾಣಾಕ್ ಏಕ್ ಪಾವ್ಟಿಂ ಪಳೆಲೆಂ.
ಕ್ಯಾಪ್ಟನ್ ರಾಣಾ ಕಾಂಯ್ಚ್ ಉಲಯ್ಲೊ ನಾ. ತೊ ಮೌನ್ ಆಸ್ಲ್ಲೊ. ತಾಣೆಂ ಜೆಂ ಕಿತೆಂ ಆಪ್ಲ್ಯಾ ವಿಶಿಂ ಜನರಲಾಕ್ ಸಾಂಗೊಂಕ್ ಜಾಯ್ ತೆಂ ಸಗ್ಳೆಂ ಮ್ಹಾಕಾ ಹಾಂಗಾ ಆಪಂವ್ಚಾ ಪಯ್ಲೆಂಚ್ ತಾಣೆಂ ಜನರಲಾಕ್ ಸಾಂಗೊನ್ ಜಾಲಾಂ ತೆಂ ಆಲಿಯಾಕ್ ಕಳ್ಳೆಂ.
"ತುಂ ಏವಿಯೇಶನಾಕ್ ಜಾಯ್ನ್ ಜಾಂವ್ಚಾ ಪಯ್ಲೆಂ ಕಿತೆಂ ಕರ್ತಾಲೆಂಯ್ ಮಿಸ್ ಆಲಿಯಾ?"
"ಮೆಡಿಕಲ್ ಕರ್ತಾಲಿಂ ಸಾರ್!"
"ಸೋ ಯು ಆರ್ ಎ ಡಾಕ್ಟರ್? .... ಐ ಮೀನ್ ಎಮ್.ಬಿ.ಬಿ.ಎಸ್. ಡಾಕ್ಟರ್?"
"ನೋ ಸಾರ್!"
"ತರ್....?"
ಜನರಲ್ ಆಪ್ಣಾಕ್ ಕಿತೆಂಗೀ ಸಾಂಗೊಂಕ್ ಸೊಧ್ತಾ ಮ್ಹಳ್ಳೆಂ ಆಲಿಯಾಕ್ ಕಳಿತ್ ಜಾಂವ್ಕ್ ಚಡ್ ವೇಳ್ ಲಾಗ್ಲೊ ನಾ. ಪುಣ್ ತಾಚಿಂ ಸವಾಲಾಂ ಮಾತ್ರ್ ತಾಕಾ ಸಮ್ಜಾಲಿಂ ನಾಂತ್.
"ಹಾವೆಂ ಮೆಡಿಕಲ್ ಶಿಕಾಪ್ ಡಿಸ್ಕಂಟಿನ್ಯೂ ಕೆಲೆಂ!"
ಆಲಿಯಾ ಆತಾಂ ಧಯ್ರಾನ್ ಉಲಯ್ಲೆಂ.
"ಕಿತ್ಯಾಕ್ ಮ್ಹಣೊನ್ ಹಾವೆಂ ಜಾಣಾಂ ಜಾವ್ಯೆತ್?"
"ಮ್ಹಾಕಾ ತ್ಯಾ ಶಿಕ್ಪಾಂತ್ ಇಂಟ್ರೆಸ್ಟ್ ನಾತ್ಲ್ಲೆಂ!"
"ದೆಕುನ್ ತುವೆಂ ತೆಂ ಶಿಕಾಪ್ ಸೊಡ್ಲೆಂಯ್....! ಫೈನ್! ......ಆನಿ ಏವಿಯೇಶನ್? ಹಾಂತುಂ ತುಕಾ ಇಂಟ್ರೆಸ್ಟ್ ಆಸಾ?"
"..........."
"ಕಮಾನ್ ಸ್ಪೀಕ್ ಅಪ್ ಮಿಸ್ ಆಲಿಯಾ..... ಹಾಂತುಂ ತುಕಾ ಇಂಟ್ರೆಸ್ಟ್ ಆಸಾ?" ಆಲಿಯಾಚೆಂ ಮೌನ್ ಪಳವ್ನ್ ತಿಕ್ಕೆ ಜ್ಯೊರಾನ್ ಮ್ಹಳ್ಳ್ಯಾ ಪರಿಂ ಜನರಲ್ ಉಲಯ್ಲೊ.
"ಎಕಾ ಸ್ಟೂಡೆಂಟಾಕ್ ಆಸೊಂಕ್ ಜಾಯ್ ಜಾಲ್ಲೆ ಕ್ಯಾರೆಕ್ಟರ್ ತುಜೆ ಲಾಗಿಂ ನಾಂತ್. ಯು ಡೋಂಟ್ ನೋ ಹೌ ಟು ಬಿಹೇವ್.... ತುಕಾ ಸಾಂಗಾತ್ಯಾಂ ಲಾಗಿಂ ಕಶೆಂ ರಾವೊಂಕ್ ಜಾಯ್ ಮ್ಹಳ್ಳ್ಯಾ ವಿಶಿಂ ಕಳಿತ್ ನಾ.........., ತುಜ್ಯಾ ಕಮಾಂಡರಾಕ್ ಕಶೆಂ ರೆಸ್ಪೆಕ್ಟ್ ದೀಂವ್ಕ್ ಜಾಯ್ ಮ್ಹಳ್ಳ್ಯಾ ವಿಶಿಂ ತುಕಾ ಖಬಾರ್ ನಾ.... ಕ್ಯಾಪ್ಟನ್ ರಾಣಾ! ........ತುಂ ಜಾಣಾಂಯ್ ತಾಕಾ?ಹಿ ಇಸ್ ಎ ವಾರ್ ಲೋರ್ಡ್! ಇಂಡಿಯಾಚಾ ಪ್ರೆಸಿಡೆಂಟಾ ಥಾವ್ನ್ ತಾಣೆಂ ಮೆಡಲ್ ಘೆತ್ಲಾಂ. ಕಿತ್ಲಿಂಗೀ ಸ್ಟೂಡೆಂಟಾಂ ತಾಚ್ಯಾ ಹಾತಾಖಾಲ್ ಫ್ಲೈ ಕರುಂಕ್ ಶಿಕೊಂಕ್ ಆಶೆತಾತ್....! ತಶೆಂ ಆಸ್ತಾನಾ..... ಯು ಆರ್ ಟ್ರೀಟಿಂಗ್ ಹಿಮ್ ಲೈಕ್ ಎ ಆರ್ಡಿನರಿ ಮ್ಯಾನ್....? ವಾಟ್ ಡು ಯು ನೋ ಎಬೌಟ್ ಹಿಮ್? ತುಂ ತಾಚ್ಯಾ ವಿಶಿಂ ಕಿತೆಂ ಜಾಣಾಂಯ್?"
ಜನಾರಲಾಚಾ ಲಾಂಭ್ ಪ್ರಸಂಗಾಕ್ ಆಯ್ಕೊನ್ ಆಲಿಯಾನ್ ವೊಗೆಂಚ್ ರಾವೊನ್ ಆಪ್ಲೆಂ ಮೌನ್ ಸಾಂಬಾಳ್ಳೆಂ.
"ತುಂ ಜಣಾಂಯ್ ಆಲಿಯಾ?" ಜನರಲ್ಚ್ಚ್ ಉಲಯ್ಲೊ ".....ಫ್ಲೈ ಕರ್ಚೆಂ ಮ್ಹಳ್ಯಾರ್ ಘರಾ ಭಿತರ್ ಜಾಡು ಮಾರ್ಚೆಂ ನ್ಹಯ್! ತ್ಯಾ ಭಾಯ್ರ್ ತುಂ ಏಕ್ ಚಲಿ!ಚಲಿ ಜಾವ್ನ್ ತುಜೆಂ ಆಶೆಂ ಬಿಹೇವಿಯರ್? ........ಮ್ಹಾಕಾ ಹೆಂ ಪಾತ್ಯೆಂವ್ಕ್ಚ್ ಜಾಯ್ನಾಂ. ತುವೆಂ ತುಜ್ಯಾ ಚಿಂತ್ಪಾಕ್ ಪಯ್ಲೆಂ ಎಕ್ಸ್ಪಾಂಡ್ ಕರುಂಕ್ ಜಾಯ್. ತುವೆಂ ತುಜ್ಯಾಚ್ ವಿಶಯಾಂತ್ ಪಯ್ಲೆಂ ಚಿಂತುಂಕ್ ಜಾಯ್. ಆಶೆಂ ಕರಿನಾಂಯ್ ಜಾಲ್ಯಾರ್ ಮ್ಹಾಕಾ ದಿಸಾನಾ ಕೀ ತುಂ ಜಿವಿತಾಂತ್ ಕಿತೇಂಯ್ ಕರುಂಕ್ ಪಾವ್ತೆಲೆಂಯ್!"
"ತುಮಿಂ ಮ್ಹಜ್ಯಾ ಜಿವಿತಾಚೆಂ ಭವಿಶ್ಯ್ ಉಚಾರ್ತಾತ್?ಹೌ ಡು ಯು ಡೂ ದೇಟ್?" ಜನರಲಾಚಿಂ ಉತ್ರಾಂ ಆಯ್ಕಾಲ್ಲೆಂ ಆಲಿಯಾ ರಾಗಾನ್ ಭರ್ಲೆಂ.
"ತುಮಿಂ ಜಾಣಾಂತ್ ಕ್ಯಾಪ್ಟನ್ ರಾಣಾಚಿ ಆಸ್ಕತ್ಕಾಯ್ ಕಿತೆಂ ಮ್ಹಳ್ಳಿ ತಿ?" ತೆಂಚ್ ಉಲಯ್ಲೆಂ "ತಾಕಾ ತಾಚೊ ಇಗೋ ಸೊಡಿನಾ. ಜಾಂವ್ಕ್ ಪುರೊ ತಾಣೆಂ ಇಂಡಿಯಾಚಾ ಪ್ರೆಸಿಡೆಂಟಾ ಥಾವ್ನ್ ಮೆಡಲ್ ಘೆತ್ಲಾಂ. ಜಾಂವ್ಕ್ ಪುರೊ ತೊ ಏರ್ ಫೋರ್ಸಾಚೊ ಕ್ಯಾಪ್ಟನ್.... ಪುಣ್ ಕಶೆಂ ಹಾಂವ್ ಹ್ಯಾ ಕ್ಯಾಂಪಸಾ ಭಿತರ್ ತಾಕಾ ತಾಚೆಂ ಸ್ಟೂಡೆಂಟ್ಗೀ ತಶೆಂಚ್ ಹ್ಯಾ ಕ್ಯಾಂಪಸಾ ಭಿತರ್ ತೊ ಮ್ಹಜೊ ಟೀಚರ್ ಮಾತ್ರ್. ದೇಟ್ಸ್ ಆಲ್...! ತ್ಯಾ ಭಾಯ್ರ್......., ಹೆಂ ಕಾಂಯ್ ಗುರುಕುಲ್ ನ್ಹಯ್ ಜ್ಯಾ ಕುಟೀರಾಂತ್ ಹೊ ಕ್ಯಾಪ್ಟನ್ ರಾಣಾ ಆಪ್ಲಿ ಬುದ್ವಂತ್ ಕಾಯ್ ಮ್ಹಾಕಾ ದಾನ್ ಕರ್ತಾ ಆನಿ ಹ್ಯಾ ತಾಚ್ಯಾ ದಾನಾ ಖಾತಿರ್ ಹಾವೆಂ ತಾಕಾ ದಕ್ಷಿಣಾ ದೀಂವ್ಕ್ ಜಾಯ್...! ನೋ..... ನಾಟ್ ಎಟ್ ಆಲ್! ಹಾಂ....., ಹೆಂ ಆಶೆಂ ಜಾಂವ್ಕ್ಯ್ ಸಕ್ತಾ! ಜರ್ ತರ್ ಹೆಂ ಗುರುಕುಲ್ ಜಾಲ್ಲೆಂ ಜಾಲ್ಯಾರ್...... ಆನಿ ಹೊ ಕ್ಯಾಪ್ಟನ್ ಹ್ಯಾ ಗುರುಕುಲಾಚೊ ಶಿಕ್ಷಕ್ ಜಾಲ್ಲೊ ಜಾಲ್ಯಾರ್ ತಾಚ್ಯಾ ಉದಾರ್ಮನಾಚಿ ದಕ್ಶಿಣಾ ಜಾವ್ನ್ ಹಾಂವ್ ತಾಚೆಂ ಸೇವಕಿ ಪಾಸೊನ್ ಜಾತಿಂ! ಪುಣ್ ಹಾಂಗಾಸರ್ ಕಿತೆಂ ಚಲ್ತಾ? ಫಕತ್ತ್ ಬಿಜ್ನೆಸ್....! ಶಿಕ್ಪಾಚಾ ನಾಂವಾರ್ ಫಕತ್ತ್ ಬಿಜ್ನೆಸ್!"
ಎಕಾಚ್ಚ್ ಉತ್ರಾನ್ ಸಾಂಗ್ಲೆಲೆಂ ಆಲಿಯಾ ಭಿಯೆಲ್ಲ್ಯಾ ಪರಿಂ ದಿಸ್ಲೆಂ ನಾ. ತೆಂ ಖರ್ಶೆತಾಲೆಂ.
"ತುಂ ಜಾಣಾಂಯ್ ಮಿಸ್ ಆಲಿಯಾ, ತುಂ ಕಿತೆಂ ಉಲಯ್ತಾಯ್.....?"
ಎದೊಳ್ ಪಾಸೊನ್ ಮೌನ್ ಬಸ್ಲಲೊ ಕ್ಯಾಪ್ಟನ್ ರಾಣಾ ರಾಗಾನ್ ತಾಂಬ್ಡೊ ಜಾಲೊ. ತಾಕಾ ಜನರಲಾಚಾ ಮುಕಾರ್ ಆಪ್ಣಾಕ್ ಆಲಿಯಾನ್ ಇನ್ಸಲ್ಟ್ ಕೆಲೆಂ ಮ್ಹಳ್ಳ್ಯಾಚೊ ರಾಗ್ ಆಯ್ಲೊ.
"ಹಾಂವ್ ತುಕಾ ರಿಮೈಂಡ್ ಕರ್ತಾಂ ಆಲಿಯಾ.... ಕಿತೆಂಯ್ ಉಲಂವ್ಚಾ ಪಯ್ಲೆಂ ಚಿಂತುನ್ ಉಲಯ್! ತುವೆಂಚ್ ಉಲಯಿಲ್ಲ್ಯಾ ಉತ್ರಾಂಕ್ಲಾಗೊನ್ ತುಕಾ ಉಪ್ರಾಂತ್ ಮಾಫಿ ಮಾಗೊಂಕ್ ಪಡ್ತೆಲೆಂ!" ಜನರಲ್ ವೊಗೊ ರಾವ್ಲೊ ನಾ. ಆಲಿಯಾನ್ ಸಗ್ಳ್ಯಾ ಶಿಕ್ಪಾಚ್ಯಾ ಇನ್ಸ್ಟಿಟ್ಯೂಶನಾಕ್ಚ್ ಪಳಯಿಲ್ಲ್ಯಾ ನದ್ರೆಂತ್ ಚೂಕ್ ಆಸಾ ಮ್ಹಳ್ಳೆಂ ಜನರಲಾಕ್ ಕಳ್ಳೆಂ.
"ಮಾಫಿ...! ಆನಿ ಆಲಿಯಾ.....! ನೊ ನೆವರ್! ಹಾಂವ್ ಜಾಣಾಂ ಹಾಂವ್ ಕಿತೆಂ ಉಲಯ್ತಾಂ ತೆಂ. ಭೋವ್ಶ್ಯಾ ಹೆಂ ಸಮ್ಜೊನ್ ಘೆಂವ್ಚೆ ತಿತ್ಲಿ ಸಮ್ಜಣಿ ತುಮ್ಕಾಂ ನಾ!"
"ವಾಟ್ ಡು ಯು ಮೀನ್ ?" ಕ್ಯಾಪ್ಟನ್ ರಾಣಾ ಆತಾಂ ರಾಗಾಚಾ ಆವೇಶಚೆರ್ ಉಟೊನ್ ಉಭೊ ಜಾಲೊ.
"ಪ್ಲೀಸ್ ಸಿಟ್ ಡೌನ್ ಕ್ಯಾಪ್ಟನ್...!" ಕ್ಯಾಪ್ಟನಾಕ್ ಜಾಣಾಂ ಆಸ್ಲಲೊ ಜನರಲ್ ಕ್ಯಾಪ್ಟನಾಕ್ ಬಸೊಂಕ್ ವಿನತಿ ಕರುನ್,"ಹಾಂವ್ ತುಕಾ ಪರ್ತ್ಯಾನ್...."
"ಪರ್ತ್ಯಾನ್ ಕಿತೆಂ? .......ತುಮಿಂ ಸತಾಕ್ ವಾರ್ನಿಂಗ್ ದೀಂವ್ಕ್ ಸಕ್ತಾತ್. ಬಟ್ ಐ ನೊ ವಾಟ್ ಐ ಯಾಮ್ ಟಾಕಿಂಗ್! ಕಾಲ್ ತುಮಿಂ ಆಟ್ ವೊರಾಂಚೊ ನಿವ್ಸ್ ಪಳೆಲೊ? ಏಯ್ಡ್ಸಾಚಾ ಪಿಡೆಕ್ ವಳಗ್ ಜಾಲ್ಲಿ ಏಕ್ ವಿಧವ್ ಅವಯ್ ಮೊರ್ನಾಚಾ ಚಡ್ ಲಾಗಿಂ ಆಸ್ತಾನಾ ತೊ ನಿವ್ಸ್ ರಿಪೋರ್ಟರ್ ತ್ಯಾ ತಿಚಾ ದೊಗಾಂ ಭುರ್ಗ್ಯಾಂಕ್ ಸವಾಲ್ ಕರ್ತಾ, ವ್ಹಡ್ ಜಾವ್ನ್ ತುಮಿಂ ಕಿತೆಂ ಜಾಂವ್ಕ್ ಆಶೆತಾತ್? ತುಮಿಂ ಜಾಣಾಂತ್ ತ್ಯಾ ಭುರ್ಗ್ಯಾನಿಂ ಕಸಲಿ ಜವಾಬ್ ದಿಲಿ ? ತೊ ನೋವ್ ವರ್ಸಾಂಚೊ ನೆಣ್ತೊ ಭುರ್ಗೊ ಮ್ಹಣೊಂಕ್ ಲಾಗ್ಲೊ ಹಾಂವ್ ಏರ್ ಫೋರ್ಸಾಚೊ ಕ್ಯಾಪ್ಟನ್ ಜಾತಾಂ. ತಾಚೆಂ ಆಟ್ ವರ್ಸಾಂಚೆಂ ಭಯ್ಣ್ ಮ್ಹಣೊಂಕ್ ಲಾಗ್ಲೆಂ ಹಾಂವ್ ಏಕ್ ಡಾಕ್ಟರ್ ಜಾತಾಂ ಆನಿ ಲೊಕಾಚಿ ಸೆವಾ ಕರ್ತಾಂ. ಎಕ್ಲೊ ದೇಶಾಚಿ ಸೆವಾ ಕರುಂಕ್ ಆನಿ ಎಕ್ಲೆಂ ಲೊಕಾಚಿ ಸೆವಾ ಕರುಂಕ್ ತಾಂಚಿಂ ಸಪ್ಣಾಂ ಬಾಂದ್ತಾತ್. ತುಮಿಂ ಜಾಣಾಂತ್....? ಚ್ಯಾರ್ ಪಾಂಚ್ ವರ್ಸಾಂನಿ ತಾಂಚಿ ಆವಯ್ ಸಂಸಾರಾಕ್ ಆದೇವ್ಸ್ ಭಾಸಾಯ್ಲ್ಯಾ ಉಪ್ರಾಂತ್ ಹ್ಯಾ ಅನಾಥ್ ಭುರ್ಗ್ಯಾಂಚೆಂ ಸಪಾಣ್ ಕಿತೆಂ ಜಾತೆಲೆಂ? ಅಸಲ್ಯಾ ಲ್ಹಾನ್ ಲ್ಹಾನ್ ಭುರ್ಗ್ಯಾಂಚಿಂ ಸಪ್ಣಾಂ ದಿಸಾಂದೀಸ್ ಹ್ಯಾ ಸಂಸಾರಾಂತ್ ಚಿಡ್ಡುನ್ ಮುಡ್ಡುನ್ ಉಡಯ್ತಾತ್. ಮ್ಹಜೊ ವಿಚಾರ್ ಕರ್ಚಾ ಆಮ್ಚ್ಯಾ ಕ್ಯಾಪ್ಟನ್ ರಾಣಾಕ್ ಹೆಂ ಧಯ್ರ್ ಆಸಾ? ಅಸಲ್ಯಾ ಭುರ್ಗ್ಯಾಂ ಖಾತಿರ್ ಏಕ್ ಗುರುಕುಲ್ ರಚುಂಕ್....? ತ್ಯಾ ಕಾಲ್ಚ್ಯಾ ಟಿ.ವಿ. ನಿವ್ಸಾಚೆರ್ ದಾಖಯ್ಲೆಲ್ಯಾ ಭುರ್ಗ್ಯಾಕ್, ಫುಡಾರಾಚೊ ಏರ್ಫೋರ್ಸಾಚೊ ಕ್ಯಾಪ್ಟನ್ ಜಾವ್ನ್ ರಚುಂಕ್ ಹ್ಯಾ ಕ್ಯಾಪ್ಟನ್ ರಾಣಾಕ್ ಸಕತ್ ಆಸಾ? ನಾ! ಕ್ಯಾಪ್ಟನ್ ರಾಣಾಕ್ ತಾಚ್ಯಾ ಕಾಮಾಚೊ ತಾಕಾ ಪ್ರತಿಫಳ್ ಜಾಯ್! ಹೊ ಪ್ರತಿಫಳ್ ತ್ಯಾ ನೆಣ್ತ್ಯಾ ಭುರ್ಗ್ಯಾ ಥಾವ್ನ್ ಮೆಳ್ತಾ? ನಾ! ಹೊ ಪ್ರತಿಫಳ್ ಹಾಂಗಾ ಹಾವೆಂ ಭರ್ಚಾ ಪಯ್ಶಾಂ ಥಾವ್ನ್ ಕ್ಯಾಪ್ಟನಾಕ್ ಮೆಳ್ತಾ! ತಶೆಂ ಆಸ್ತಾನಾ...."
"ವಿಲ್ ಯು ಶಟ್ ಯುವರ್ ಮೌತ್?" ಕ್ಯಾಪ್ಟನ್ ಬೊಬಾಟ್ಲೊ.
ಕಾಲ್ಚೆಂ ಟಿ.ವಿ. ನಿವ್ಸ್ ತಾಣೆಂಯ್ ಪಳೆಲ್ಲೆಂ. ಕಾಲ್ಚೊ ದೀಸ್ ಸಂಸಾರ್ ಭರ್ ಏಡ್ಸ್ ಪಿಡೆಚೊ ದೀಸ್ ಜಾವ್ನ್ ನೇಮ್ಯಾರ್ಲೊಲೊ.
ಆಲಿಯಾನ್ ಉಲಯಿಲ್ಲ್ಯಾ ಉತ್ರಾಂನಿಂ ಕಿತ್ಲೆಂ ಕೊಡು ಸತ್ ಆಸಾ ಮ್ಹಳ್ಳೆಂ ತೆಂ ಜನರಲಾಕ್ ಕಳ್ಳೆಂ. ಆಲಿಯಾ ಏಕ್ ಚಲಿ ಜಾವ್ನ್ ಇತ್ಲ್ಯಾ ಧಯ್ರಾನ್, ತೆಂಯ್ ಆಪ್ಣಾ ಸಾಮ್ಕಾರ್ ಇತ್ಲೆಂ ಲಾಂಭ್ ತರ್ಕ್...? ಭಿತರ್ಲ್ಯಾ ಭಿತರ್ ಜನರಲ್ ಆಲಿಯಾಚಾ ಚಲಿಯೆಪಣಾಚಾ ಧಯ್ರಾ ವಯ್ರ್ ಲ್ಹಾನ್ ಜಾಲೊ. ಕಾಲ್ಚೊ ಟಿ.ವಿ. ನಿವ್ಸ್ ತಾಣೆಂಯ್ ಪಳೆಲ್ಲೊ. ಜಾಲ್ಯಾರ್ಯ್ ಆಲಿಯಾಚಾ ಚಿಂತ್ಪಾಕ್ ಕಬೂಲ್ ಕರುಂಕ್ ತೊ ತಯಾರ್ ನಾಸ್ಲಲೊ. ಆಲಿಯಾಚೆಂ ಚಿಂತಾಪ್ ರೆವೆಲ್ಯೂಶನರಿ ಚಿಂತಾಪ್. ಹ್ಯಾ ಚಿಂತ್ಪಾಚಾ ಮುಳಾಂತ್ ಆಕ್ರೋಶಾಸಾ ತೆಂ ತೊ ಜಾಣಾಂ ಜಾಲೊ. ಹೊ ಆಕ್ರೋಶ್ ಪುಡಾರಾಕ್ ತಾಕಾ ಖಂಯ್ ಪಾವಯ್ತಲೊ ಮ್ಹಳ್ಳೆಂ ಜನರಲಾಕ್ ಅಸ್ಪಷ್ಟ್ ದಿಸೊಂಕ್ ಲಾಗ್ಲೆಂ.
"ಸೋ.......?" ಜನರಲಾನ್ ಆಲಿಯಾಕ್ಚ್ ಪಳೆಲೆಂ.
"ಸೋ ವಾಟ್....? ಕ್ಯಾಪ್ಟನ್ ರಾಣಾ ನಾಸ್ತಾನಾ ಹಾಂವ್ ಪೈಲೆಟ್ ಜಾಯ್ನಾಂ? ವಾ ತೊ ಎಕ್ಲೊಚ್ ಫ್ಲೈಯಿಂಗ್ ಕಮಾಂಡರ್? ಆಪಾಪ್ಲ್ಯಾ ಜಾಗ್ಯಾರ್ ಖಂಯ್ಚಾಯ್ಕ್ಯ್ ಏಕ್ ರೀತ್ ನೀತ್ ಆಸ್ತಾ. ತೊ ಹಾಚೆ ಪ್ರಾಸ್ ಚಡ್ಚ್ ಆಶೆತಾ. ಹಾಂವ್ ಕಿತೆಂ ಹಾಂಗಾ ಜೊಡ್ತಾಂ ತಾಕಾ ಹಾಂವ್ ಪೇ ಕರ್ತಾಂ. ಕ್ಯಾಪ್ಟನ್ ಹಾಂಗಾ ತಾಚೆಂ ಕಾಮ್ ಕರ್ತಾ. ಹ್ಯಾ ತಾಚಾ ಕಾಮಾ ಖಾತಿರ್ ತೊ ಸಾಂಬಾಳ್ ಘೆತಾ.....! ಮ್ಹಜೊ ಶಿಕ್ಷಕ್ ಮ್ಹಳ್ಳ್ಯಾ ಇರಾದ್ಯಾನ್ ಹಾಂವ್ ಕ್ಯಾಪ್ಟನಾಕ್ ಮರ್ಯಾದ್ ದಿತಾಂ. ತಿ ಮರ್ಯಾದ್ ಘೆಂವ್ಕ್ಯ್ ತಾಕಾ ಕಳಿತ್ ಆಸೊಂಕ್ ಜಾಯ್!" ಆಲಿಯಾ ಖಡಾ ಖಂಡಿತ್ ಉಲಯ್ಲೆಂ. ತಾಚೊ ಸ್ವಭಾವ್ಚ್ ತೊ.
"ದಿಸ್ ಇಸ್ ಟೂ ಮಚ್.....!"
ಕ್ಯಾಪ್ಟನ್ ರಾಣಾನ್ ಆತಾಂ ರಾಗಾನ್ ಭರೊನ್ ಆಪ್ಲ್ಯಾ ಹಾತಾಂಕ್ ಆಪುಣ್ ಬಸ್ಲೆಲ್ಯಾ ಆರ್ಮ್ ಚೇರಾಚಾ ಆರ್ಮಾಂಕ್ ದಾಡಾಯ್ಲೆ. ತಾಚೆ ಸವೆಂ ತೊ ಉಟೊನ್ ಉಭೊ ಜಾಲೊ.
ಉಟೊನ್ ಉಭೊ ಜಾಲ್ಲ್ಯಾ ಕ್ಯಾಪ್ಟನಾಕ್ ಪಳವ್ನ್ ಜನರಲಾನ್ ತಾಕಾ ಬಸೊಂಕ್ ಹಿಶಾರೊ ಕೆಲೊ. ಆಲಿಯಾಚೊ ಭರ್ತಾವ್ ಪಳವ್ನ್ ಹೆಂ ಕೆದ್ನಾಂಚ್ ಸೊಡುನ್ ದಿಂವ್ಚೆಂ ಚೆಡುಂ ನ್ಹಯ್ ಮ್ಹಳ್ಳೆಂ ತೆಂ ಜನರಲಾಕ್ ಕಳ್ಳೆಂ. ಆಲಿಯಾಚಾ ತೊಂಡಾರ್, ಇತ್ಲ್ಯಾ ತರ್ಕಾ ಉಪ್ರಾಂತ್ಯ್ ಕಾಂಯ್ಚ್ ಬದ್ಲಾವಣ್ ಮ್ಹಳ್ಳಿ ತಿ ತಾಕಾ ದಿಸ್ಲಿ ನಾ.
"ತುಂ ಜಾಣಾಂಯ್ ಆಲಿಯಾ ತುಂ ಕಿತೆಂ ಉಲಯ್ತಾಯ್?ತುವೆಂ ಸಗ್ಳ್ಯಾ ಟೀಚರಿಂಚಾ ಜಾತಿಕ್ಚ್ ಇನ್ಸಲ್ಟ್ ಕೆಲೆಂಯ್....!"
"ಆನಿಂ ತುಮಿಂ ಮ್ಹಾಕಾ ಇನ್ಸಲ್ಟ್ ಕೆಲ್ಲೆಂ ತೆಂ....? .........ಹಾಂವೆಂ ಖಾಯ್ಚಾಯ್ ಟಿಚರಿಕ್ ಇನ್ಸಲ್ಟ್ ಕರುಂಕ್ ನಾ. ತಾಂಚಾ ಚಿಂತ್ಪಾಕ್ ಮಾತ್ರ್ ಇನ್ಸಲ್ಟ್ ಕೆಲಾಂ. ಆಜ್ ಕಾಲ್ ಶಿಕ್ಷಣ್ ಫಕತ್ತ್ ಏಕ್ ಬಿಜ್ನೆಸ್ ಜಾಲಾಂ ಶಿವಾಯ್ ಜಾಣ್ವಾಯ್ ದಿಂವ್ಚೆಂ ಬ್ಲೆಸ್ಸಿಂಗ್ಸ್ ಜಾವ್ನ್ ಉರೊಂಕ್ ನಾ!"
"ಯು ಆರ್ ಎ ಸ್ಟೂಡೆಂಟ್ ಹಿಯರ್ ! ಮೈಂಡ್ ಇಟ್....... !" ಜನರಲಾಕ್ ಉಲಂವ್ಕ್ ದೀನಾಸ್ತಾನಾ ಕ್ಯಾಪ್ಟನ್ ಘರ್ಜಾಲೊ.
"ಎಂಡ್ ಐ ಪೇ ಫಾರ್ ದೇಟ್!"
ಆಲಿಯಾನ್ ಆಪ್ಲೆಂ ಹಟ್ ಸೊಡ್ಲೆಂ ನಾ. ತೆಂ ಆಪ್ಲಿ ತಕ್ಲಿ ಬಾಗಾಂವ್ಕ್ ಭಿಲ್ಕುಲ್ ತಯಾರ್ ನಾಸ್ಲೆಂ.
"ಓ.... ರಿಯಲ್ಲೀ.....?" ಆತಾಂ ಕ್ಯಾಪ್ಟನ್ ರಾಣಾ ಪರ್ತ್ಯಾಕ್ ಆಪ್ಲ್ಯಾ ಬಸ್ಕೆ ವಯ್ಲೊ ಉಟೊನ್ ಉಭೊ ಜಾಲೊ.
"ದೆನ್ ಲೆಟ್ ಮಿ ರಿಸೈನ್ ಫ್ರಮ್ ಮೈ ಜಾಬ್!" ರಾಗಾನ್ ಪೆಟ್ಲಲೊ ಕ್ಯಾಪ್ಟನ್ ರಾಣಾ ಆಪ್ಲ್ಯಾ ಬಸ್ಕೆಕ್ ಪಾಟಿಂ ಲೊಟುನ್ "ಐ ಯಾಮ್ ಸಾರ್ರಿ ಸಾರ್! ಐ ವಿಲ್ ಸೆಂಡ್ ಯು ಮೈ ರಿಸಿಗ್ನೇಶನ್ ಲೆಟರ್. ಹ್ಯಾ ಕ್ಯಾಂಪಸಾ ಭಿತರ್ ಆಸಲಿಂ ನಾಲಾಯಕ್ ಸ್ಟೂಡೆಂಟಾಂ ಆಸ್ತಾ ಪಾಸೊನ್ ಮ್ಹಾಕಾ ಹೆಂ ಮ್ಹಜೆಂ ಕಾಮ್ ಮುಖಾರ್ಸುನ್ ವ್ಹರುಂಕ್ ಜಾಂವ್ಚೆ ನಾ!".
ಮುಕಾರ್ ಕಾಂಯ್ಚ್ ಉಲಯ್ನಾಸ್ತಾನಾ ಕ್ಯಾಪ್ಟನ್ ರಾಣಾ ಆಫಿಸ್ರೂಮಾ ಥಾವ್ನ್ ಭಾಯ್ರ್ ಆಯ್ಲೊ. ಜನರಲಾಚಾ ಜವಾಬೆಕ್ ಪಾಸೊನ್ ತೊ ರಾಕೊನ್ ರಾವ್ಲೊ ನಾ.
"ತುಂ ಆತಾಂ ಕಿತೆಂ ಮ್ಹಣ್ತಾಯ್ ಆಲಿಯಾ?" ಆಲಿಯಾಕ್ಚ್ ಪಳವ್ನ್ ರಾವ್ಲ್ಲೊ ಜನರಲ್ ಥೊಡೊ ವೇಳ್ ಮೌನ್ ಜಾವ್ನ್ ರಾವ್ಲೊ. ಉಪ್ರಾಂತ್ ತೊಚ್ಚ್ ಉಲಯ್ಲೊ.
"ಎಟ್ ಎನೀ ಕಾಸ್ಟ್ ವಿ ಡೋಂಟ್ ವಾಂಟ್ ಟು ಲೂಸ್ ಅವರ್ ಕ್ಯಾಪ್ಟನ್.... ನೌ ದಿ ಡಿಸಿಶನ್ ಇಸ್ ಯುವರ್ಸ್! ತುಂ ಕ್ಯಾಪ್ಟನಾ ಲಾಗಿಂ ಜಸ್ಟ್ ಅಪೊಲೊಜೈಸ್ ಕರ್. ತೊ ತುಜೊ ಟಿಚರ್! ಪ್ರಾಯೆಂತ್ಯ್ ತುಜ್ಯಾ ಬಾಪಯ್ಚಾ ಪ್ರಾಯೆಚೊ. ತಾಚ್ಯೆ ಲಾಗಿಂ ತುಜಿ ಚೂಕ್ ವಳ್ಕಾಲ್ಯಾರ್ ತುಂ ಕಾಂಯ್ ಲ್ಹಾನ್ ಜಾಂವ್ಚೆಂ ನಾಂಯ್. ತುಕಾ ಎಕಾ ಬರ್ಯಾ ಭುರ್ಗ್ಯಾಕ್ ಸಾಂಗ್ಚಾ ಪರಿಂ ಸಾಂಗ್ತಾಂ, ........ತುಜೆಂ ಕ್ಯಾರಿಯರ್ ಬರೆಂ ಜಾತೆಲೆಂ. ತಶೆಂಯ್ ತುವೆಂ ಲ್ಹಾನ್ ಜಾಲ್ಲ್ಯಾಂತ್ ತುಂ ಕಾಂಯ್ ಲ್ಹಾನ್ ಜಾಯ್ನಾಂಯ್....!"
ಜನರಲಾಚಿಂ ಉತ್ರಾಂ ಆಲಿಯಾ ಆಯ್ಕಾತಾಲೆಂ.
"ಹಾವೆಂ ಉಲಯಿಲ್ಲ್ಯಾಂತ್ ಕಾಂಯ್ ಚೂಕ್ ಆಸಾ ಮ್ಹಣೊನ್ ಮ್ಹಾಕಾ ಭೊಗಾನಾ ಸರ್! ಕ್ಯಾಪ್ಟನಾನ್ ಮ್ಹಜ್ಯೆರ್ ಮಾಂಡ್ಲ್ಲ್ಯಾ ಆಪ್ರಾದಾಕ್ ಹಾವೆಂ ಮ್ಹಜೆಂ ಡಿಫೆನ್ಸ್ ಮಾತ್ರ್ ಕೆಲಾಂ. ಆಶೆಂ ಆಸ್ತಾನಾ ಮ್ಹಾಕಾ ಭೊಗಾನಾ ಕೀ ಹಾವೆಂ ಅಪೊಲಾಜೈಸ್ ಕರುಂಕ್ ಜಾಯ್ ಮ್ಹಣೊನ್....!"
"ಆನಿ ತುಂ ಜಾಣಾಂಯ್! ಮ್ಹಾಕಾ ಕ್ಯಾಪ್ಟನಾಕ್ ಹೊಗ್ಡಾಂವ್ಕ್ ನಾಕಾ!"
"ಅಫ್ ಕೋರ್ಸ್! ....ಮ್ಹಜ್ಯಾ ದೇಶಾಂತ್ ಆದಿಂ ಥಾವ್ನ್ ಹೆಂಚ್ ಘಡೊನ್ ಅಯ್ಲಾಂ! ಹ್ಯಾ ದೇಶಾಂತ್ ಫುಲ್ಚಾ ನೆಣ್ತ್ಯಾ ಸಪ್ಣಾಂಕ್ ಆಧಾರ್ ದಿಂವ್ಚೊ ಕೊಣ್ಯ್ ನಾ. ಹಾಂವ್ ತ್ಯಾ ಸಪ್ಣಾಂಕ್ ಸಾಂಗಾತ್ ದೀಂವ್ಕ್ ಸಕ್ತಾಂ ಶಿವಾಯ್..... !" ಆಲಿಯಾ ಆತಾಂ ಮೌನ್ ಜಾಲೆಂ. ತೆಂ ಮುಕಾರ್ ಕಾಂಯ್ಚ್ ಉಲಯ್ಲೆಂ ನಾ.
"ಯು ಮೆ ಗೋ ನೌ.....! ತುಕಾ ಹಾಂವ್ ಥೊಡೊ ವೇಳ್ ದಿತಾಂ. ಬರೆಂ ಕರುನ್ ಚಿಂತುನ್ ಪಳೆ. ತುಂ ಏಕ್ ಧಯ್ರಾಧೀಕ್ ಚೆಡುಂ. ತುಜ್ಯಾ ಧಯ್ರಾಕ್ ತುವೆಂ ತುಜ್ಯಾ ಬರ್ಯಾ ಖಾತಿರ್ ಗಳ್ಸುಂಕ್ ಶಿಕೊಂಕ್ ಜಾಯ್!"
ಜನರಲಾಚಾ ಹ್ಯಾ ಉತ್ರಾಂನಿಂ ಆಲಿಯಾ ಪ್ರಭಾವಿತ್ ಜಾಲೆಂ. ಆಪ್ಣಾಕ್ ಥೊಡೊ ತರ್ಯ್ ತೊ ಸಮ್ಜೊಂಕ್ ಸಕ್ಲಾ ಮ್ಹಳ್ಳೆಂ ತಾಕಾ ಕಳ್ಳೆಂ.
"ಡೆಫೆನೆಟ್ಲೀ.....! ಪುಣ್ ಹಾಂವ್ ಜಾಣಾಂ ಹ್ಯಾ ವಿಶಯಾಂತ್ ಮ್ಹಜಿ ಕಾಂಯ್ ಚೂಕ್ ನಾ. ಆಶೆಂ ಆಸ್ತಾನಾ ಹಾವೆಂ ಅಪೊಲೊಜೈಸ್ ಕರ್ಚೆಂ ಸವಾಲ್ಚ್ ಉದೆನಾ!"
"ತುಂ ಚಿಂತುನ್ ಪಳೆ! ಖಂಯ್ಚೆಂ ಬರೆಂ ಆನಿ ಖಂಯ್ಚೆಂ ವಾಯ್ಟ್ ತೆಂ ತುಕಾಚ್ ಕಳ್ತೆಲೆಂ. ತುಂ ಆನಿ ವಚೊಂಕ್ ಸಕ್ತಾಯ್!"
ನಿಮಾಣಿಂ ಉತ್ರಾಂ ಉಲವ್ನ್ ಜನರಲ್ ಆಪ್ಲ್ಯಾ ಬಸ್ಕೆಕ್ ವೊಣ್ಕಾಲೊ.
"ಥ್ಯಾಂಕ್ ಯು ಸರ್!" ಆಲಿಯಾ ಜನರಲಾಚಾ ಆಫೀಸಾ ಥಾವ್ನ್ ಭಾಯ್ರ್ ಆಯ್ಲೆಂ.
ಆಲಿಯಾ ಆನಿ ಕ್ಯಾಪ್ಟನಾ ಮಧೆಂ ಕಿತೆಂ ಜಾಲಾಂ ತೆಂ ಸಗ್ಳ್ಯಾ ಏವಿಯೇಶನಾಕ್ಚ್ ಕಳಿತ್ ಜಾಲೆಂ. ತಾಣೆಂ ಹ್ಯಾ ವಿಶಯಾಂತ್ ಚಡ್ ಕಾಂಯ್ ಚಿಂತ್ಲೆಂ ನಾ. ಆಪ್ಲ್ಯಾ ಸತಾಕ್ ತೆಂ ಕ್ಯಾಪ್ಟನಾ ಮುಕಾರ್ ಬಾಗಾಂವ್ಕ್ ತಯಾರ್ ಜಾಲೆಂ ನಾ.
ಸಲ್ವೊಣಿ ಮಾಂದುನ್ ಘೆಂವ್ಕ್ ತೆಂ ಕೆದ್ನಾಂಚ್ ತಯಾರ್ ನಾತ್ಲೆಲೆಂ. ತೆಂಯ್...., ಕ್ಯಾಪ್ಟನ್ ರಾಣಾಚಾ ಹಟ್ಟಾ ಮುಕಾರ್!? ಕೆದ್ನಾಂಚ್ ನಾ!
ಪುಣ್ ಆಜ್....?
ಆಜ್ ಕ್ಯಾಪ್ಟನ್ ರಾಣಾ ಆನಿ ಆಲಿಯಾ ಮಧೆಂ ಕೊಣೆಂ ಎಕ್ಲ್ಯಾನ್ ತರ್ಯ್ ಎಕ್ಲ್ಯಾ ಮುಕಾರ್ ಲ್ಹಾನ್ ಜಾಂವ್ಕ್ ಜಾಯ್ ಆಸ್ಲ್ಲೆಂ. ನಾ ತರ್ ಕೊಣೆ ಎಕ್ಲ್ಯಾನ್ ಹ್ಯಾ ಏವಿಯೇಶನಾ ಥಾವ್ನ್ ಹಾತ್ ಧುಂವ್ಕ್ ಜಾಯ್ ಆಸ್ಲ್ಲೆ.
*************
ಪರ್ದ್ಯಾ ವಯ್ಲಿ ಕಲಾ, ಕಲಾಕಾರಾಚಾ ಹಾತಾ ಥಾವ್ನ್ ಮಾತ್ರ್ ಪರ್ಜಾಳ್ತಾ ಶಿವಾಯ್ ತ್ಯಾ ಪರ್ದ್ಯಾರ್ ಬಣಾಚಿ ಕಿತ್ಲಿ ರಾಸ್ ವೊತ್ಲ್ಯಾರ್ಯ್ ತಿ ಕಲಾ ಕಲಾ ಜಾಯ್ನಾ. ಆಶೆಂಚ್ ಆಲಿಯಾಚೆಂ ಜಿವಿತ್. ಆಲಿಯಾಚಾ ಜಿವಿತಾಂತ್ಯ್ ನಮುನ್ಯಾವಾರ್ ಬಣ್ ಆಸ್ಲ್ಲೆ. ಪುಣ್ ಹ್ಯಾ ಬಣಾಂಕ್ ಸಾರ್ಕೆಂ ನೆಟಂವ್ಕ್ ಆಲಿಯಾ ನೆಣಾಂ ಆಸ್ಲ್ಲೆಂ. ಕಿತ್ಯಾಕ್, ತೆಂ ಖುದ್ದ್ ಏಕ್ ಕಲಾಕಾರ್ ನ್ಹಯ್ ಆಸ್ಲ್ಲೆಂ ಆನಿ ತಾಚ್ಯಾ ಬಾಪಾಯ್ಕ್ ಜಾಂವ್ ಯಾ ತಾಚ್ಯಾ ಆವಯ್ಕ್ ಜಾಂವ್ ಯಾ ಆಪ್ಣಾಚಾ ಭಾಂವ್ಡಾಂಕ್ ಜಾಂವ್ ತಾಣೆಂ ಆಪ್ಲ್ಯಾ ಜಿವಿತಾಚೊ ಕಲಾಕಾರ್ ಜಾವ್ನ್ ಯೆಂವ್ಚೊ ಆವ್ಕಾಸ್ ಕೊಣಾಯ್ಕ್ಯ್ ದಿಲ್ಲೊ ನಾ.
ಹಿ ತಾಚಿ ಚೂಕ್ ವಾ ತಾಚ್ಯಾ ಜಿವಿತಾಚಾ ರಚ್ನಾರಾಚಿ ಮಾಂಡಾವಳ್.......!?
ಆಲಿಯಾ ಮಾತ್ರ್ ಹ್ಯಾ ಮಾಂಡಾವಳಿ ಥಾವ್ನ್ ಮಸ್ತ್ ಪಯ್ಸ್ ಆಸ್ಲ್ಲೆಂ. ಹ್ಯಾಚ್ಚ್ ಖಾತಿರ್, ಆಜ್, ತಾಣೆಂ ಆಪ್ಲ್ಯಾಚ್ ಖುಶಿಯೆನ್ ವಿಂಚ್ಲ್ಲ್ಯಾ ತಾಚ್ಯಾ ಜಿವಿತಾಚಾ ವಾಟೆ ವಯ್ಲ್ಯಾ ಪಯ್ಲ್ಯಾ ಸಪ್ಣಾಕ್ ಪಯ್ಸ್ ಖಂಯ್ಸರ್ಗೀ ಸಾಂಡುನ್ ಆಯಿಲ್ಲ್ಯಾ ಪರಿಂ ತೆಂ ಆಯಿಲ್ಲೆಂ.
ಆಲಿಯಾನ್ ಪೈಲೆಟ್ ಜಾಂವ್ಚೆಂ ಆನಿ ವಾರ್ಯಾರ್ ಉಬ್ಚೆಂ ದರ್ಶನ್ ತಾಚ್ಯಾ ದೊಳ್ಯಾಂ ಥಾವ್ನ್ ತುಟೊನ್ ವಚೊಂಕ್ ನಾ. ಪುಣ್ ಆಲಿಯಾಚೆಂ ನಡ್ತೆಂ ಆನಿ ತಾಚ್ಯಾ ಸ್ವಭಾವಾನ್ ಮಾತ್ರ್ ತಾಚ್ಯಾ ಜಿವಿತಾಚೆರ್ ಪ್ರಭಾವ್ ಘಾಲ್ಲೊ.
ಆಲಿಯಾಚಾ ಮೀತ್ ಮಿರ್ವಾಲ್ಲ್ಯಾ ಗರ್ವಿ ಸ್ವಭಾವಾ ವರ್ವಿಂ ತಾಣೆಂ ಪರ್ತ್ಯಾನ್ ಕ್ಯಾಪ್ಟನ್ ರಾಣಾ ಸಾಮ್ಕಾರ್ ಉಭೆಂ ಜಾಂವ್ಚಾ ಪರಿಂ ನಾತ್ಲ್ಲೆಂ. ಆಲಿಯಾ ಹೆಂಯ್ ಜಾಣಾಂ ಕೀ, ಏವಿಯೇಶನ್ ಏರ್ಬೇಸಾಂತ್, ಆಪ್ಣಾ ಪ್ರಾಸ್ ಚಡ್ ಜಾವ್ನ್ ಕ್ಯಾಪ್ಟನಾಕ್ಚ್ ಸಗ್ಳ್ಯಾಂಚೊ ಸಹಕಾರ್ ಖಂಡಿತ್ ಮೆಳ್ತಲೊ. ಹೆಂ ಜನರಲಾನ್ ಆಪ್ಲ್ಯಾ ತೊಂಡಾ ಥಾವ್ನ್ಚ್ ಉಚಾರ್ಲಾಂ ಮ್ಹಣ್ತಾನಾ, ಆಪ್ಣೆಂಚ್ ಕ್ಯಾಪ್ಟನಾ ಮುಕಾರ್ ಮಾಫಿಯೆಚೆಂ ಭಿಕ್ ಮಾಗ್ಚೆಂ ಪಡ್ತೆಲೆಂ. ಆಪುಣ್ ಆಲಿಯಾ....! ಫುಡಾರಾಚಾ ಚಿಂತ್ನಾಕ್ ಆಪ್ಣಾಚೊ ಮಾನ್ ಬಲಿ ಭೆಟಂವ್? ಕೆದಿಂಚ್ ನಾ!
ಆಲಿಯಾಚಾ ಮತಿಚೆಂ ಸ್ಥೈರ್ಯ್ ಆನಿ ಕಾಳ್ಜಾಚೆಂ ಧಯ್ರ್ ಮಾತ್ರ್ ಅಖಂಡ್. ಕಿತೆಂ ಜಾಲ್ಯಾರ್ಯ್ ಪಾಟಿಂ ಘುಂವೊನ್ ಪಳೆಂವ್ಚೆಂ ಚಲಿ ತೆಂ ನ್ಹಯ್.
ಧುವೆಚೊ ವಿಶಯ್ ಆಯ್ಕೊನ್ ಶಬೀರ್ ಮಾತ್ರ್ ಉಚಾಂಭಳ್ ಜಾಲೊ. ಮೀತ್ ಮಿರ್ವೊನ್ ಮ್ಹಳ್ಳ್ಯಾಪರಿಂ, ತಾಣೆಂ ಆಪ್ಲ್ಯಾ ಧುವೆಕ್, ಸಗ್ಳ್ಯಾ ತಾಚ್ಯಾ ಚೂಕಿಂ ಥಾವ್ನ್ ಸಾಂಬಾಳುನ್ ವೆಲ್ಲೆಂ. ಹಾಚೊ ಪ್ರತಿಫಳ್ ಜಾವ್ನ್, ಆಲಿಯಾನ್, ಶಬೀರಾಚೆಂ ಏಕ್ ಸಪಾಣ್ ಪಯ್ಲೆಂಚ್ ತುಟವ್ನ್ ಉಡಯಿಲ್ಲೆಂ. ಆಪ್ಣಾಚೆಂ ಸಪಾಣ್ ತುಟವ್ನ್ ಉಡಯಿಲ್ಯಾಚಿ ತಾಕಾ ಕಾಂಯ್ಚ್ ಪರ್ವಾ ನಾತ್ಲ್ಲಿ. ಬಾಪಾಯ್ಚಾ ಸಿಂತಿಮೆಂತಾಂ ವಿಶಿಂ ತಾಣೆಂ ಕೆದ್ನಾಂಚ್ ಚಿಂತ್ಲ್ಲೆಂ ನಾ. ಪುಣ್ ಆಜ್.....?
ಆಜ್ ಜೆಂ ಕಿತೆಂ ಆಲಿಯಾನ್ ಕೆಲಾಂ, ತೆಂ ಖುದ್ದ್ ತಾಚ್ಯಾಚ್ ಖುಶಿಯೆ ವಿರೋಧ್! ಆಶೆಂ ಕಿತ್ಯಾಕ್?
"ಅಬ್ಬೂ...., ಸಂಸಾರಾಂತ್ ಕ್ಯಾಪ್ಟನ್ ರಾಣಾ ಎಕ್ಲೊಚ್ ನ್ಹಯ್.....!"
"ತೊ ಎಕ್ಲೊ ನ್ಹಯ್! ಪುಣ್ ತುಂ ಎಕ್ಲೆಂ....! ಮ್ಹಾಕಾ ತುಂ ಎಕ್ಲೆಂ! ಡು ಯೂ ಅಂಡರ್ಸ್ಟಾಂಡ್?"
ಸಭಾರ್ ತೆಂಪಾ ಉಪ್ರಾಂತ್ ಪಯ್ಲೆ ಪಾವ್ಟಿಂ ಶಬೀರ್ ಧುವೆಚಾ ವಯ್ರ್ ರಾಗಾರ್ ಜಾವ್ನ್ ಬೊಬಾಟ್ಲೊ.
"ಕಿತ್ಯಾಕ್ ತುಂ ಆಶೆಂ ಕರ್ತಾಯ್....? ಹಾಂ....?" ಧುವೆಕ್ಚ್ ಪಳವ್ನ್ ವಿಚಾರ್ಲ್ಲೊ ತೊ, ".........." ಕಿತೆಂಗೀ ಸಾಂಗೊಂಕ್ ತೋಂಡ್ ಉಘಡ್ಲ್ಲೊ ಕಾಂಯ್ಚ್ ಉಲಯ್ನಾಸ್ತಾನಾ ಮೌನ್ ಜಾವ್ನ್ ಸೋಫಾಚೆರ್ ಬಸ್ಲೊ. ತಾಚಾ ಮತಿಕ್ ಕಾಂಯ್ಚ್ ಸಮ್ಜಾನಾತ್ಲ್ಲೆಂ.
ಪಯ್ಸ್ ಥಾವ್ನ್ ಆಪ್ಲ್ಯಾ ಘೊವಾಕ್ ಪಳವ್ನ್ ಆಸ್ಲ್ಲಿ ಸಾರಾ, ಆತಾಂ ಸವ್ಕಾಸ್ ಯೇವ್ನ್ ಶಬೀರಾಚಾ ಲಾಗಿಂ ಬಸ್ಲಿ. ತಿಕಾ ಕಿತೆಂ ಉಲಂವ್ಚೆಂ ತೆಂ ಕಾಂಯ್ ಕಳ್ಳೆಂ ನಾ. ಧುವೆ ಮುಕಾರ್ ಘೊವಾಕ್ ಸಮಾಧಾನ್ ಕರ್ಚಾ ಪರಿಂಯ್ ನಾತ್ಲೆಲೆಂ. ಆಲಿಯಾನ್ ಕಿತೆಂ ಕೆಲಾಂ ತೆಂ ತಿ ಜಾಣಾಂ. ತೆಂ ತಿಚೆಂ ಧುವ್ ಜಾವ್ಯೆತ್. ಪುಣ್ ತ್ಯಾ ರಗ್ತಾ ಸಂಭಂಧಾಕ್ ಲಾಗೊನ್ ಆಲಿಯಾಚಾ ಹರ್ಯೇಕ್ ಕರ್ತುಬಾಂ ವಯ್ರ್ ಪರ್ದೊ ವೊಡುಂಕ್ ತಿ ಕಶಿ ಸಕ್ತೆಲಿ. ತಶೆಂಯ್ ಆಲಿಯಾಚಾ ಹ್ಯಾ ಸ್ವಭಾವಾಕ್ ತೊ ತಾಚೊ ಬಾಪಯ್ಚ್ ಕಾರಾಣ್ ಮ್ಹಣೊನ್ ತಿ ಮಾಂದ್ತಾಲಿ. ಲ್ಹಾನ್ ಥಾವ್ನ್ ಬಾಪಾಯ್ನ್ ಧುವೆಕ್ದಿಲ್ಲಿ ಸಳ್ಗಿಚ್ ಆತಾಂ ಆಲಿಯಾಚಾ ಹ್ಯಾ ವರ್ತನಾಕ್ ಕಾರಾಣ್ ಮ್ಹಣೊನ್ ತಿ ಆಪ್ಲ್ಯಾ ಘೊವಾಕ್ಚ್ ಗುನ್ಯಾಂವ್ಕಾರ್ ಕರ್ತಾಲಿ. ಪುಣ್ ಹ್ಯಾ ವೆಳಾರ್ ಆಪ್ಣೆಂ ಘೊವಾ ವಯ್ರ್ ಆಪ್ರಾದ್ ಮಾಂಡ್ಚೊ ಸಾರ್ಕೊ ನ್ಹಯ್ ಮ್ಹಣೊನ್ ಜಾಣಾಂ ಜಾವ್ನ್ ತಿ ಮೌನ್ ಆಸ್ಲ್ಲಿ.
"ತುಜೆಂಚ್ ಕ್ಯಾರಿಯರ್ ತುಕಾ ಬಾಂದುಕ್ ಜಾಯ್ನಾ ಜಾಲ್ಯಾರ್......" ಆಲಿಯಾ ಮೌನ್ ಬಸ್ಲೆಲೆಂ ಪಳವ್ನ್ ಶಬೀರ್ಚ್ ಉಲಯ್ಲೊ ".......ತುಂ ಆನಿ ಕಿತೆಂ ಕರ್ತೆಲೆಂಯ್? ತುಜಿ ಹಿ ಎಕ್ ಮಿಸ್ಟೇಕ್ ತುಜ್ಯಾ ಸಗ್ಳ್ಯಾ ಕ್ಯಾರಿಯರಾಕ್ ಪಾಡ್ ಕರುಂಕ್ ಸಕ್ತಾ. ತುಜ್ಯಾ ಕ್ಯಾರೆಕ್ಟರಾಕ್ ಲಾಗೊನ್ ಫಾಲ್ಯಾಂ ತುಕಾ ಖಂಯ್ಸರ್ಯ್...."
"ಅಬ್ಬೂ.....!." ಬಾಪಾಯ್ಚಿಂ ಉತ್ರಾಂ ಆಖೇರ್ ಜಾಂವ್ಚಾ ಪಯ್ಲೆಂಚ್ ಆಲಿಯಾ ಉಲಯ್ಲೆಂ ".....ಸುಕ್ಣೆಂ ವಾರ್ಯಾರ್ ಉಬ್ಚ್ಯಾ ಪಯ್ಲೆಂ ಆಪ್ಲ್ಯಾ ಪಾಕಾಟ್ಯಾಂ ಭಳಾಕ್ ಪಾರ್ಕುನ್ ಉಭಾನಾ. ವಾರ್ಯಾರ್ ಉಬ್ಲ್ಯಾ ಉಪ್ರಾಂತ್ ಆಪ್ಲ್ಯಾ ಭಳಾಕ್ ಪಾರ್ಕಿತಾ! ಆಜ್ ನಾ ಜಾಲ್ಯಾರ್ ಫಾಲ್ಯಾಂ.....! ಹಾಂವ್ ಉಬ್ತೆಲಿಂ ತೆಂ ಖಂಡಿತ್!" ಆಲಿಯಾಚಾ ಉಲೊಣ್ಯಾಂತ್ ಕಸಲ್ಯಾಗೀ ಭಳಾಧೀಕ್ ಧಯ್ರಾಚೆಂ ಭಳ್ ಆಸ್ಲ್ಲೆಂ.
ಆಪ್ಲೆಂ ಧುವ್ ಜಿವಿತಾಚಾ ಹರ್ಯೇಕಾ ಪಾಂವ್ಡ್ಯಾರ್ ಪಾಸಿಟಿವ್ ಮಾತ್ರ್ ಚಿಂತಾ ಶಿವಾಯ್ ನೆಗೆಟಿವ್ ಚಿಂತಾಪ್ ತೆಂ ಭಿಲ್ಕುಲ್ ಚಿಂತಿನಾ ತೆಂ ಶಬೀರ್ ಆಲಿಯಾಚಾ ಭುರ್ಗ್ಯಾಪಣಾರ್ ಥಾವ್ನ್ ತಾಕಾ ಸಮ್ಜೊನ್ ಆಯ್ಲಾ. ಕಸಲ್ಯಾಯ್ ಸಂದಿಗ್ದ್ ಪರಿಸ್ಥಿತೆಂತ್ಯ್ ಆಲಿಯಾ ನಿರಾಶಿ ಜಾಯ್ನಾತ್ಲ್ಲೆಂ. ಆಪ್ಣಾಕ್ ನಾಕಾ ಜಾಲ್ಲ್ಯಾಚಾ ವಿಶಿಂ ತೆಂ ಕೆದ್ನಾಂಚ್ ಚಿಂತಿನಾತ್ಲ್ಲೆಂ.
"ಅಬ್ಬೂಚಾ ಉತ್ರಾಂಚೊ ತೊ ಮತ್ಲಾಬ್ ನ್ಹಯ್ ಆಲಿಯಾ......!, ತೊ ತುಜ್ಯಾ ವಿಶಿಂ ಚಿಂತಾ. ತಾಕಾ ತುಜೆ ವಿಶಿಂ ಖಂತ್ ಆಸಾ. ತುಂ ಜಾಣಾಂಯ್ ಅಕ್ಬರ್ ಆನಿ ಸಲೀಮಾಚೊ ಮೋಗ್ ಕರ್ಚಾ ಪ್ರಾಸ್ ಚಡ್ ಜಾವ್ನ್ ತುಜೊ ಅಬ್ಬಾ ತುಜೊ ಚಡ್ ಮೋಗ್ ಕರ್ತಾ!" ಎದೊಳ್ ವೊಗಿ ಬಸ್ಲೆಲಿ ಸಾರಾ, ಧುವೆ ಬಾಪಾಯ್ಚೆಂ ಉಲೊಣೆಂ ಆಯ್ಕೊಂವ್ಚಿ ತಿ ಆತಾಂ ಉಲಯ್ಲಿ.
"ತರ್, ಮ್ಹಜ್ಯಾ ವಿಶಿಂ ಅಬ್ಬೂಕ್ ಭಿರಾಂತ್ ಕಿತ್ಯಾಕ್ ಅಮ್ಮಿ...? ಹಾಂವ್...., ಹಾಂವ್ ಕಾಂಯ್ ಲ್ಹಾನ್ ಭುರ್ಗೆಂ ನ್ಹಯ್. ಮ್ಹಜ್ಯಾ ಜೀವನಾ ಖಾತಿರ್ ಹಾಂವ್ ಕಿತೆಂ ತರ್ಯ್ ಕರ್ತೆಲಿಂ!"
ಉಲಯಿಲ್ಲೆಂ ಆಲಿಯಾ ಉಟೊನ್ ಉಭೆಂ ಜಾಲೆಂ. ಸವ್ಕಾಸ್ ಚಲೊನ್, ತೆಂ, ತಿಂ ಬಸೊನ್ ಆಸ್ಲ್ಲ್ಯಾ ತ್ಯಾ ಸಾಲಾಚಾ ಜನೆಲಾ ಲಾಗಿಂ ಪಾವ್ಲೆಂ. ಜನೆಲಾಚೆಂ ಕರ್ಟನ್ ದೆಗೆನ್ ವೊಡುನ್ ತಾಣೆಂ ಆಪ್ಲಿ ದೀಷ್ಟ್ ಭಾಯ್ರ್ ವೆಲಿ. ಎಕಾ ಖಿಣಾಕ್ ತಾಚ್ಯಾ ಮತಿಂತ್ ಏಕ್ ಕುರ್ಡೆಂ ಝುಜ್ ಚಲ್ಲೆಂ. ಆಪುಣ್ ಪಯ್ಲೆಂ ಖಂಯ್ಚರ್ ಪಳೆಂವ್? ಮ್ಹಜ್ಯಾ ತ್ಯಾ ಮೊಳಾಬಾ ವಯ್ಲ್ಯಾ ಸಪ್ಣಾಂಕ್? ವಾ ತ್ಯಾ ಸಪ್ಣಾಂ ಪಂದ್ಲ್ಯಾ ನೀಜ್ ಮನ್ಶ್ಯಾ ಅಸ್ಥಿತ್ವಾಕ್? ಆಪ್ಲಿ ನದರ್ ಹಾಂವ್ ಖಂಯ್ ಪಯ್ಲಿ ಧಾಂವ್ಡಾಂವ್......? ಹ್ಯಾ ನದ್ರೆಕ್ ಹಾಮ್ವ್ ಖಂಯ್ ಧಾಂವ್ಡಾಂವ್?
ಆಲಿಯಾಚಾ ಮುಕಾರ್ ವಿಂಚವ್ಣ್ ನಾತ್ಲೆಲಿ. ತೆಂ ತಶೆಂಚ್ ಪಾಟಿಂ ಘುಂವೊನ್ ಜನೆಲಾಕ್ ಪಾಟ್ ಕರುನ್ ರಾವ್ಲೆಂ. ಹ್ಯಾ ಸಂಸಾರಾಂತ್ ಹೆಂ ಭಾಯ್ರ್ ಆನಿ ಭಿತರ್ ಮ್ಹಳ್ಳೆಂ ತೆಂ ಫಕತ್ತ್ ಮನ್ಶ್ಯಾಕ್ ಮಾತ್ರ್ ಕಿತ್ಯಾಕ್? ಸವಾಲಾ ವಯ್ರ್ ಸವಾಲ್ ತಾಚ್ಯಾ ಮತಿಚಾ ಪರ್ದ್ಯಾರ್ ದಾಟ್ ಅಕ್ಷರಾನಿಂ ಉದೆವ್ನ್ ಯೆತಾ ತಶೆಂ ಜಾವ್ನ್, ಪರ್ತ್ಯಾಕ್ ಹೆವ್ಶಿಂ ಬಾಪಾಯ್ಚಾ ಲಾಗಿಂ ಆಯಿಲ್ಲೆಂ ತೆಂ ಬಾಪಾಯ್ಕ್ ತೆಂಕೊನ್ ಬಸ್ಲೆಂ. ಶಬೀರಾಚೆ ದೊಳೆ ಶೂನ್ಯ್ ದ್ರಷ್ಟೆನ್ ಮುಕ್ಲ್ಯಾ ದಾರಾಕ್ಚ್ ಪಳೆತಾಲೆ.
ಆಲಿಯಾ ಯೇವ್ನ್ ಆಪ್ಲ್ಯಾ ಲಾಗಿಂ ಬಸ್ಲೆಲೆಂತೆಂ ಪಳವ್ನ್ ಶಬೀರಾನ್ ಆಪ್ಲಿ ದೀಷ್ಟ್ ಆಪ್ಲ್ಯಾ ಧುವೆಚೆರ್ ವೆಲಿ.
ದೋನ್ ಕ್ಷಣಾಂಕ್ ಆಪ್ಲ್ಯಾ ಬಾಪಾಯ್ಚಾ ದೊಳ್ಯಾಂಕ್ಚ್ ಪಳೆಲ್ಲೆಂ ಆಲಿಯಾ,
"ಐ ಯಾಮ್ ಸಾರ್ರಿ ಅಬ್ಬೂ! ಹಾಂವ್ ಜಾಣಾಂ ತುಂ ಸದಾಂಚ್ ಮ್ಹಜ್ಯೆ ವಿಶಿಂ ಚಿಂತಾಯ್. ಮ್ಹಜ್ಯಾ ಬರ್ಯಾ ವಿಶಿಂ ಚಿಂತಾಯ್. ತುಜಿ ಆಶಾ, ತುಜೆಂ ಸಪಾಣ್, ಹಾವೆಂ ಜ್ಯಾರಿ ಕರುಂಕ್ ನಾ ಮ್ಹಳ್ಳೆಂ ಹಾಂವ್ ಸದಾಂ ಮ್ಹಜ್ಯಾ ಮತಿಂತ್ ಉಡಾಸ್ ದವರ್ತೆಲಿಂ. ಪುಣ್, ತ್ಯಾ ಖಾತಿರ್ ಹಾಂವ್ ಖಂಡಿತ್ ರಡ್ಚಿಂ ನಾ. ಕಿತ್ಯಾಕ್ ಮ್ಹಳ್ಯಾರ್, ತುವೆಂ ಪಳೆಲ್ಲ್ಯಾ ತ್ಯಾ ಸಪ್ಣಾಕ್, ತುಜ್ಯಾ ಮತಿಂತ್ಲ್ಯಾ ಆಶೆಕ್ ಆನಿ ಮ್ಹಾಕಾ ಕಸಲೊ ಸಂಭಂಧ್? ತಾಂಕಾಂ ಆನಿ ಮ್ಹಾಕಾ ಕಾಂಯ್ ಸಂಭಂಧ್ ನಾ!"
ಆಲಿಯಾಚೆ ದೊಳೆ ಆತಾಂ ತ್ಯಾ ಮೊಳಾಬಾ ಪಂದ್ಲ್ಯಾ ಕುಪಾಂಕ್ ಸೊಧ್ತಾಲೆ.
"ಮ್ಹಾಕಾ ಸಂಭಂಧ್ ನಾತ್ಲೆಲ್ಯಾ ಜಾಗ್ಯಾರ್ ಹಾಂವ್ ಕಶೆಂ ಸಂಭಂಧ್ ಜೊಡುಂ?"
ಬಾಪಾಯ್ ಲಾಗಿಂ ಉಲಂವ್ಚ್ಯಾ ಆಲಿಯಾಕ್ ಪಳಂವ್ಚ್ಯಾ ಸಾರಾಕ್, ಆಪ್ಲಿ ಧುವ್ ಖಂಯ್ಚಾಗೀ ದುಸ್ರ್ಯಾಚ್ ಸಂಸಾರಾಂತ್ ಆಸಾ ಮ್ಹಳ್ಳ್ಯಾ ಪರಿಂ ದಿಸ್ಲೆಂ. ಧುವೆಚೊ ಹೊ ಭರ್ತಾವ್, ಧುವೆ ಥಂಯ್ ಕಸೊ ಯೆತಾ ಮ್ಹಳ್ಳೆಂಚ್ ತಿಕಾ ವ್ಹಡ್ಲೆಂ ಸವಾಲ್ ಜಾಲ್ಲೆಂ. ಆದಿಂ ಥಾವ್ನ್ ಆಲಿಯಾಚೊ ಹೊಚ್ಚ್ ಸ್ವಭಾವ್! ಉಲವ್ನ್ ಉಲವ್ನ್ ಆಸ್ಲೆಲ್ಯಾ ಪರಿಂಚ್ ಆಲಿಯಾ ಎಕಾನ್ ಏಕ್ ದುಸ್ರ್ಯಾಚ್ ಸಂಸಾರಾಕ್ ಪಾವ್ತಾಲೆಂ. ತೆಂ ಕಿತ್ಯಾಕ್ ಹ್ಯಾ ಸಂಸಾರಾಕ್ ಸೊಡುನ್ ಆಪ್ಲ್ಯಾಚ್ ಆಪ್ಣೆ ರಚ್ಲೆಲ್ಯಾ ಸಂಸಾರಾಕ್ ವೆತಾ ಮ್ಹಳ್ಳೆ ತೆಂ ಅಜೂನ್ಯ್ ಸಾರಾಕ್ ಸಮ್ಜಾಲ್ಲೆಂ ನಾ. ಆಮಿಂ ಸರ್ವಾಂ ಚಿಂತ್ಚಾ ಪರಿಂ ಆಲಿಯಾ ಕಿತ್ಯಾಕ್ ಚಿಂತಿನಾ?
ಆಲಿಯಾಚಾ ಭರ್ತಾವಾನ್ಸಾರಾಕ್ ಚಿಂತುಂಕ್ ಲಾಯಿಲ್ಲೆಂ.
"ಬರೆಂ...!" ಉಲಯ್ಲೊ ಶಬೀರ್ ".....ಮ್ಹಜ್ಯಾ ಸಪ್ಣಾಂ ಸವೆಂ ತುಕಾ ಸಂಭಂಧ್ ನಾತ್ಲಲೊ. ಹಾಕಾ ಹಾಂವ್ ಒಪ್ತಾಂ. ಪುಣ್ ತುವೆಂ ಏವಿಯೇಶಾಕ್ ಭರ್ತಿ ಜಾಲ್ಲ್ಯಾಂತ್ ತುಜ್ಯಾ ಸಪ್ಣಾಂಚೊ ಸಂಭಂಧ್ ಆಸ್ಲಲೊ. ಹ್ಯಾ ಸಪ್ಣಾಂ ಸಾಂಗಾತಾ ತುವೆಂ ಆತಾಂ ಕಿತೆಂ ಕೆಲೆಂಯ್?"
"ತುಂ ಸಾಂಗ್ತಾಯ್.... ಹಾವೆಂ ಮ್ಹಜ್ಯಾ ಸಪ್ಣಾಂ ಖಾತಿರ್ ತ್ಯಾ ಕ್ಯಾಪ್ಟನಾಚಾ ಮುಕಾರ್ ತಕ್ಲಿ ಬಾಗಾಂವ್ಕ್ ಜಾಯ್ ಆಸ್ಲ್ಲೆಂ? ತಾಣೆಂ ತಾಚ್ಯಾ ಗರ್ವಾಕ್ ವೊಂಪ್ಲ್ಲೆಂ ಆಸ್ತಾಂ, ಹ್ಯಾಚ್ ಗರ್ವಾ ಬದ್ಲಾಕ್ ತಾಕಾ ಪಾಟಿಂ ಮೋಗ್ ಲುವೊಂಕ್ ಮೆಳೊಂಕ್ ಜಾಯ್ ಆಸ್ಲ್ಲೊ ಮ್ಹಣೊನ್ ತುವೆಂ ಸಾಂಗ್ಚೆಂ?"
"ಹಾಂಗಾ ತುಜ್ಯಾ ಆನಿ ತಾಚ್ಯಾ ಮಧೆಂ ಮಸ್ತ್ ಅಂತರ್ ಆಸಾ ಆಲಿಯಾ! ತುಕಾ ಹೆಂ ಕಿತ್ಯಾಕ್ ಸಮ್ಜಾನಾ?"
"ಕಸಲ್ಯಾ ಅಂತರಾ ವಿಶಿಂ ಉಲಯ್ತಾಯ್ ಅಬ್ಬೂ ತುಂ...?" ಥೊಡೊ ವೇಳ್ ಮೌನ್ ಜಾಲ್ಲೆಂ ಆಲಿಯಾ, "ತೊ ಮ್ಹಜೊ ಟಿಚರ್ ಮ್ಹಳ್ಳ್ಯಾ ವಿಶಿಂ? ವಾ ತೊ ರಿಟಾಯರ್ಡ್ ಏರ್ ಫೋರ್ಸ್ ಕ್ಯಾಪ್ಟನ್ ಆನಿ ಹಾಂವ್ ಏಕ್ ಆರ್ಡಿನರಿ ತಾಚೆಂ ಸ್ಟೂಡೆಂಟ್ ಮ್ಹಳ್ಳ್ಯಾ ಅಂತರಾನ್? ಹ್ಯಾ ಅಂತರಾನ್ ಫಕತ್ತ್ ಹಾವೆಂ ತಾಚೆ ಮುಕಾರ್ ಭಿಯೆಂವ್ಕ್ ಮಾತ್ರ್ ಸಾದ್ಯ್ ಶಿವಾಯ್ ತಾಕಾ ಗೌರವಾನ್ ಮಾನ್ ದೀಂವ್ಕ್ ಸಾದ್ಯ್ ಆಸಾ? ಮನ್ಶ್ಯಾಂಚಿಂ ಕಾಳ್ಜಾಂ ಜಿಕೊನ್ ಮಾತ್ರ್ ಗೌರವ್ ಆನಿ ಮಾನ್ ಮೆಳ್ತಾ ಶಿವಾಯ್....."
ಆಲಿಯಾಚಾ ಜವಾಬೆ ಫುಡ್ಯಾನ್ ಶಬೀರ್ ಆನಿ ಸಾರಾ ಲಾಗಿಂ ಉಲಂವ್ಕ್ ಕಾಯ್ಚ್ ಜಳ್ಕಾಲೆಂ ನಾ. ಆವಯ್ ಬಾಪಾಯ್ನ್ ಆಪ್ಲ್ಯಾ ಖಾಸ್ಗಿ ಆಶೆ ಖಾತಿರ್ ಭುರ್ಗ್ಯಾಂಚೆಂ ಜಿವಿತ್, ತಾಂಚಾ ಮತಿಂತ್ಲ್ಯಾ ಆಶೆಕ್ ವ್ಹಾರಾವ್ನ್ ಪಳಯ್ನಾಸ್ತಾನಾ ಪಿಡ್ಡ್ಯಾರ್ ಕರ್ಚೆಂ ಖಂಡಿತ್ ಚೂಕ್ ಮ್ಹಣೊನ್ ಸಮ್ಜಾಲೊ ಶಬೀರ್. ತಾಚ್ಯಾ ಧುವೆಚಾ ಸವಾಲಾಂಕ್ ಜಾಂವ್ ಯಾ ತಾಚ್ಯಾ ಚಿಂತ್ಪಾಕ್ ಜಾಂವ್ ಜವಾಬ್ ಸೊಧುಂಕ್ ವೆಚೆಂ ಪ್ರಯತ್ನ್ ತಾಣೆಂ ಕೆಲೆಂ ಜಾಲ್ಯಾರ್ಯ್ ಶಬೀರಾಕ್ ತೆಂ ಸಾದ್ಯ್ ಜಾಲೆಂ ನಾ. ಹ್ಯಾ ಖಾತಿರ್ ಜಾವ್ನ್ ಗೆಲ್ಲ್ಯಾ ವಿಶಿಂ ಚಡ್ ತಕರಾರ್ ಕರುಂಕ್ ತೊ ಗೆಲೊ ನಾ.
"ಬರೆಂ ತರ್, ಆತಾಂ ತುಂ ಕಿತೆಂ ಕರುಂಕ್ ಚಿಂತಾಯ್?"
"ಹಾಂವ್....!?" ಆಲಿಯಾನ್ ಬಾಪಾಯ್ಕ್ ವಿಜ್ಮಿತ್ಕಾಯೆನ್ ಪಳೆಲೆಂ.
ಆಪ್ಲೊ ಬಾಪಯ್ ಆಪ್ಣಾಕ್ ಇತ್ಲ್ಯಾ ವೆಗ್ಗಿಂ ಸಮ್ಜೊಂಕ್ ಸಕ್ಚೊ ನಾ ಮ್ಹಣೊನ್ ತಾಣೆಂ ಚಿಂತ್ಲ್ಲೆಂ ಜಾಯ್ಚಯ್.
"ಹಾಂ...! ತುಜಿ ಖುಶಿ ಕಿತೆಂ ತಿ ಸಾಂಗ್!"
"ಹಾವೆಂ....., ಹಾವೆಂ ಎದೊಳ್ ಹ್ಯಾ ವಿಶಿಂ ಕಾಂಯ್ ಚಿಂತುಂಕ್ ನಾ!"
"ಬರೆಂ, .....ತುಕಾ ಬಿಜ್ನೆಸ್ ಕರ್ಚೆಂ ಮನ್ ಆಸಾ?"
"ಬಿಜ್ನೆಸ್....?"
"ವ್ಹಯ್ ! ತುಂ ಬೂಟಿಕ್ ಚಲಯ್ತೆಲೆಂಯ್?"
".........." ಆಲಿಯಾ ಆತಾಂ ಚಿಂತುಂಕ್ ಪಡ್ಲೆಂ.
ತಾಣೆಂ ಆತಾಂ ಕಾಂಯ್ ತರ್ಯ್ ಕರುಂಕ್ ಜಾಯ್ ಆಸ್ಲ್ಲೆಂ. ಬೆಷ್ಟೆಂ ವೊಗೆಂ ಘರಾ ಬಸ್ಚಾ ಪರಿಂಯ್ ನಾತ್ಲ್ಲೆಂ. ಬಾಪಾಯ್ನ್ ತಾಕಾ ಏಕ್ ವಿಂಚವ್ಣ್ ದಿಲ್ಲಿ ವ್ಹಯ್. ತ್ಯಾ ವಿಂಚವ್ಣೆಂತ್ ಆಪ್ಣಾಕ್ ಕಿತ್ಲೆಂ ಸಮಾಧಾನ್ ಆಸಾ ಮ್ಹಳ್ಳೆಂ ತಾಣೆಂ ಆತಾಂ ಚಿಂತುನ್ ಪಳಂವ್ಕ್ ಜಾಯ್ ಆಸ್ಲ್ಲೆಂ.
"ತುಂ ಹ್ಯಾ ವಿಶಿಂ ಚಿಂತುನ್ ಪಳೆ!"
ಶಬೀರ್ ಆತಾಂ ಸೊಫಾ ವಯ್ಲೊ ಉಟ್ಲೊ. ತಿತ್ಲ್ಯಾರ್ ಕಿತೆಂಗೀ ಉಡಾಸ್ ಆಯ್ಲೆಲ್ಯಾ ಪರಿಂ ಜಾವ್ನ್,
"ಸಾಂಗ್ಲ್ಲ್ಯಾ ಪರಿಂ....., ತುಕಾ ಏಕ್ ಸವಾಲ್ ವಿಚಾರುಂ?" ಶಬೀರ್ ಆಪ್ಲ್ಯಾ ಧುವೆಚಾ ಕುಶಿಂನ್ ಘುಂವ್ಲೊ.
ಆಪ್ಲೊ ಬಾಪಯ್ ಆಪ್ಣಾಕ್ ಕಿತೆಂಗೀ ವಿಚಾರುಂಕ್ ಆಶೆತಾ ತೆಂ ಕಳೊನ್,
"ವಿಚಾರ್ ಅಬ್ಬೂ, ತುಂ ಕಿತೆಂ ವಿಚಾರುಂಕ್ ಸೊಧ್ತಾಯ್?" ಆಲಿಯಾನ್ ಆಪ್ಲ್ಯಾ ಬಾಪಾಯ್ಕ್ಚ್ ಪಳೆಲೆಂ.
"ಹೊ ಸಮೀರ್ ಮ್ಹಳ್ಯಾರ್ ಕೋಣ್?"
ಬಾಪಾಯ್ಚಾ ತೊಂಡಾ ಥಾವ್ನ್ ಆಲಿಯಾನ್ ಚಿಂತುಂಕ್ಚ್ ನಾತ್ಲೆಲೆಂ ಸವಾಲ್ ತಾಚ್ಯಾ ಮುಕಾರ್ ಉಭೆಂ ಜಾತಾನಾ ಎಕಾ ಕ್ಷಣಾಕ್ ತೆಂ ಘುಸ್ಪಡ್ಲೆಂ ಜಾಲ್ಯಾರ್ಯ್ ತಾಚ್ಯಾ ತೊಂಡಾರ್ ಶಬೀರಾಕ್ ಕಾಂಯ್ಚ್ ವಿಶೇಷ್ ಬದ್ಲಾವಣ್ ದಿಸೊನ್ ಆಯ್ಲಿ ನಾ.
"ಸಮೀರ್ ತುಕಾ ಉಲಂವ್ಕ್ ಮೆಳ್ಳೊ?" ಆಲಿಯಾನ್ ಬಾಪಾಯ್ಚಾ ದಿಷ್ಟೆಕ್ ದೀಷ್ಟ್ ಜೊಕುನ್ ಧರ್ಲಿ.
"ನಾ!"
"ಮಾಗಿರ್.....?"
"ನ್ಹಯ್.....!, ತುಂ ತಾಚ್ಯೆ ಲಾಗಿಂ ಫೊನಾರ್ ಉಲಯ್ತಾನಾ......,"
"ಓಹ್ ಅಬ್ಬೂ....! ತೊ ಆನಿ ಹಾಂವ್ ಮೆಡಿಕಲ್ ಕಾಲೇಜಿಂತ್ ಸಾಂಗಾತಾ ಶಿಕ್ತಾಲ್ಯಾಂವ್! ತಿತ್ಲೆಂಚ್. ತೊ ಮ್ಹಾಕಾ ಪಸಂದ್ ಕರ್ತಾಲೊ ಆಶೆಂ ಕೆದ್ನಾಂಯ್ ಘರಾ ಕಡೆನ್ ಫೋನ್ ಕರ್ತಾಲೊ. ಆತಾಂ ಖಂಯ್? ಸುಮಾರ್ ದೀಸ್ ಜಾಲೆ. ತೊ ಮೆಳೊಂಕ್ಯ್ ನಾ. ತಾಚೆಂ ಫೋನ್ಯ್ ನಾ. ಭೋವ್ಶ್ಯಾ ತೊ ಆತಾಂ ಮ್ಹಾಕಾ ವಿಸ್ರಾಲಾ ಆಸ್ತಲೊ. ಪುಣ್ ತುವೆಂ ಆಜ್ ತಾಚೆ ವಿಶಿಂ.....?" ಆಪ್ಲ್ಯಾ ಬಾಪಾಯ್ನ್ ಆಜ್ ಸಮೀರಾಚಾ ವಿಶಿಂ ಆಪ್ಣಾಲಾಗಿಂ ವಿಚಾರ್ಲೆಲ್ಯಾ ಮತ್ಲಾಬಾಕ್ ಆಲಿಯಾ ಸಮ್ಜೊಂಕ್ ಸಕ್ಲೆಂ ನಾ.
"ತಶೆಂ ನ್ಹಯ್ ಆಲಿಯಾ! ತುಮ್ಚೆ ಮಧೆಂ ಕಾಂಯ್ ಸಂಭಂಧ್ ಆಸಾ ವಾ ನಾ ತೆಂ ಪಳಂವ್ಕ್ ಹಾವೆಂ ವಿಚಾರ್ ಕೆಲೊ. ಸೊಡ್ಯಾಂ ತೆಂ..... ಆಮ್ಚೊ ನಾಸಿರ್ ಆತಾಂ ಬಾಪಾಯ್ಚೆಂ ಸಗ್ಳೆಂ ಬಿಜ್ನೆಸ್ ಸಾಂಬಾಳ್ತಾ. ತೊ.....!"
"ಕೋಣ್ ನಾಸಿರ್? ಸುಲೇಮಾನ್ ಅಂಕಲಾಚೊ ಪೂತ್?"
"ವ್ಹಯ್! ತುಂ ಜಾಣಾಂಯ್ ತುಮ್ಚಾ ಕಾಜಾರಾ ವಿಶಿಂ ಆಮಿಂ ಪಯ್ಲೆಂಚ್ ಉಲವ್ನ್ ಜಾಲಾಂ. ತಶೆಂ ತೊ ಚೆಡೊ ಜಾಲ್ಯಾರ್ಯ್ ಕಾಂಯ್ ವಾಯ್ಟ್ ನಾ. ಬಾಪಾಯ್ಚೆಂ ಬಿಜ್ನೆಸ್ ತಾಣೆಂ ಬರೆಂ ವಾಡಯ್ಲಾಂ. ಪೋರ್ ಮ್ಹಾಕಾ ಅಫಿಸಾಂತ್ ಸುಲೇಮಾನಾನ್ ಫೋನ್ ಕೆಲ್ಲ್ಯಾ ವೆಳಾರ್ ತೊ ಆಪ್ಲ್ಯಾ ನಾಸಿರಾಚಾ ನಿಖಾ ವಿಶಿಂ ಉಲಯ್ತಾಲೊ. ಹ್ಯಾ ವಿಶಿಂ ಹಾಂವ್ ತುಕಾ ಕಾಂಯ್ ವತ್ತಾಯ್ ಕರಿನಾ. ತುಕಾ ಖುಶಿ ಆಸ್ಲ್ಯಾರ್ ಮಾತ್ರ್. ದೆಕುನ್ಚ್ ಹಾವೆಂ ಪಯ್ಲೆಂಚ್ ಸಮೀರಾಚಾ ವಿಶಿಂ ವಿಚಾರ್ಲೆಲೆಂ!"
"ಹಾಂವ್ ಜಾಣಾಂ ಅಬ್ಬೂ!"
ಆಲಿಯಾ ಆತಾಂ ಬಸ್ಲೆಲ್ಯಾ ಕಡೆನ್ ಥಾವ್ನ್ ಉಟ್ಲೆಂ.
"ತುಂ ವಚೊನ್ ಕರುನ್ ಆಸ್ಚೆಂ ಘರ್ ತೆಂ. ತಾಂಚಾ ಸಗ್ಳ್ಯಾಂಕ್ ತುಂ ವಳ್ಕಾತಾಯ್ ಆನಿ ತಿಂ ತುಕಾ ವಳ್ಕಾತಾತ್. ಕಿತ್ಲೆಂ ಮ್ಹಳ್ಯಾರ್ಯ್ ತುಜ್ಯಾ ಆವಯ್ಚೆಂಚ್ ಕುಟಾಮ್!"
"ಸವಾಲ್ ಕುಟ್ಮಾಚೆಂ ನ್ಹಯ್ ಅಬ್ಬೂ....!"
ಶಬೀರಾಕ್, ಆಲಿಯಾ ಕಿತ್ಯಾಕ್ಗೀ ಆತಾಂ ತಿಕ್ಕೆ ಹಾಲ್ಲ್ಲ್ಯಾ ಪರಿಂ ದಿಸ್ಲೆಂ. ಆಪ್ಲ್ಯಾ ವಿಚಾರಾ ಥಾವ್ನ್ ತೆಂ ಖುಶ್ ಜಾಲ್ಲ್ಯಾ ಪರಿಂ ತಾಕಾ ದಿಸ್ಲೆಂ ನಾ.
"ಕಿತೆಂ ಬೇಟಾ.... ತುಂ ಖುಶ್ ನಾಂಯ್?" ಶಬೀರಾಕ್ ಆಪ್ಲ್ಯಾ ಧುವೆ ವಯ್ರ್ ದುಬಾವ್ ಜಾಲೊ.
".........." "ಮ್ಹಾಕಾ ಇತ್ಲ್ಯಾ ವೆಗ್ಗಿಂ ನಿಖಾ ಜಾಂವ್ಕ್ ನಾಕಾ."
ಬಾಪಾಯ್ಚಾ ಸವಾಲಾಕ್ ಆಲಿಯಾನ್ ಪಯ್ಲೆಂ ಕಾಂಯ್ ಜವಾಬ್ ದಿಲಿ ನಾ ತರ್ಯ್ ಥೊಡ್ಯಾಚ್ ಖಿಣಾಂನಿ ಥೊಡೆಂ ಚಿಂತ್ಲೆಲ್ಯಾ ಪರಿಂ ಜಾಲ್ಲ್ಯಾ ತಾಣೆಂ ಆಪ್ಲ್ಯಾ ಬಾಪಾಯ್ಕ್ ಆಪ್ಲ್ಯಾ ನಾ ಸಮಾಧಾನೆಚೆಂ ಕಾರಾಣ್ ಉಗ್ಡಾಪೆಂ ಕೆಲೆಂ.
"ಮ್ಹಜಿ ಕಾಂಯ್ ವತ್ತಾಯ್ ನಾ ಬೇಟಾ. ಹಾವೆಂ ತುಕಾ ಮ್ಹಜ್ಯಾ ಮತಿಂತ್ಲೆಂ ಸಾಂಗ್ಲೆಂ. ತುಂ ಕಶೆಂ ಸಾಂಗ್ತಾಯ್ ತಶೆಂ. ತುವೆಂ ಆತಾಂ ತುಜೆಂ ಜೀವನ್ ನವ್ಯಾನ್ ಆರಂಭ್ ಕರುಂಕ್ ಆಸಾ. ಕ್ಯಾಪ್ಟನ್ ರಾಣಾ ಆಸ್ತಾ ವರೇಗ್ ತುವೆಂ ಏವಿಯೇಶನಾಕ್ ಪರ್ತ್ಯಾಕ್ ರಿಗ್ಲೆಲ್ಯಾ ಪರಿಂ ನಾ. ದೆಕುನ್ ಕಿತೆಂ ಕರ್ತಾಯ್ ತೆಂ ಸಮಾ ಚಿಂತುನ್ ಮ್ಹಾಕಾ ಸಾಂಗ್. ಹೆಂ ತುಜೆಂ ಜಿವಿತ್. ಹ್ಯಾ ವಿಶಿಂ ತುಕಾ ಚಿಂತುಂಕ್ ಸಂಪೂರ್ಣ್ ಅಧಿಕಾರ್ ಆಸಾ!"
ಬಾಪಾಯ್ಚಿಂ ಉತ್ರಾಂ ಆಲಿಯಾಚಾ ಕಾನಾಂತ್ ಪಡ್ತಾಲಿಂ ಮಾತ್ರ್ ಶಿವಾಯ್ ಆಲಿಯಾ ಥಾವ್ನ್ ಕಾಂಯ್ ಜವಾಬ್ ಆಯ್ಲಿ ನಾ. ಬಾಪಾಯ್ನ್ ಸಾಂಗ್ಲ್ಲೆಂಯ್ ಸಗ್ಳೆಂ ಸಾರ್ಕೆಂ ಆಸ್ಲ್ಲೆಂ. ತೆಂ ಆತಾಂ ಚಿಂತ್ಚಾರ್ ಪಡ್ಲೆಂ. ವಯ್ಲ್ಯಾನ್ ಅಮೇರಿಕಾ ಗೆಲ್ಲ್ಯಾ ಅಕ್ಬರಾಚೆಂ ಶಿಕಾಪ್ ಸಂಪೊನ್ ತೊ ಥಂಯ್ಚ್ ಕಾಮಾಕ್ ಲಾಗ್ಲ್ಲೊ. ತಾಚಿ ಸೈರಿಕ್ಯ್ ಘಟ್ ಜಾಲ್ಲಿ. ಸೈರಿಕ್ ಘಟ್ ಜಾಂವ್ಚೊ ಕಾಂಯ್ ವ್ಹಡ್ಲೊ ವಿಶಯ್ ನ್ಹಯ್. ಭುರ್ಗಿಂ ತರ್ನಾಟಿಂ ಜಾವ್ನ್ ಯೆತಾನಾ ಆವಯ್ ಬಾಪಯ್ ಆಪ್ಲ್ಯಾ ಭುರ್ಗ್ಯಾಂಕ್ ಆಪ್ಲ್ಯಾಚ್ ಕುಟ್ಮಾ ಭಿತರ್ಲಿ, ತಿಂ ವಳ್ಕೊನ್ ಜಾಣಾಂ ಆಸ್ಚಿ ಸೈರಿಕ್ ಉಲವ್ನ್ ದವರ್ತಾಲಿಂ ಆನಿಂ ಭುರ್ಗ್ಯಾಂಚಾ ಪ್ರಾಯೆಕ್ ಉತ್ರೊನ್ ವಚೊಂಕ್ ಸೊಡಿನಾಸ್ತಾನಾ ಭುರ್ಗ್ಯಾಂಚೆಂ ಬರೆಂ ವಾಯ್ಟ್ ತಿಂ ವೆಗಿಂಚ್ ಕರ್ತಾಲಿಂ.
ಬಾಪಾಯ್ನ್ ಆತ್ತಾಂ ಥೊಡ್ಯಾ ವೆಳಾ ಪಯ್ಲೆಂ ಉಡಾಸ್ ಕೆಲ್ಲ್ಯಾ ಆಪ್ಲ್ಯಾ ನಿಖಾಚಾ ವಿಶಯಾ ವರ್ವಿಂ ಆಲಿಯಾಚೊ ಚಿಂತ್ಪಾಚೊ ವಿಶಯ್ ಆತಾಂ ಬದ್ಲಾಲೊ. ತೆಂ ಆತಾಂ ನಾಸಿರಾ, ಆಪ್ಲ್ಯಾ ಫುಡಾರಾಚಾ ಘೊವಾ ವಿಶಿಂ ಚಿಂತುಂಕ್ ಲಾಗ್ಲೆಂ.
ಚಿಂತಾ ಚಿಂತಾನಾ ಆಲಿಯಾಚಾ ಮತಿಂತ್ ಆಪುಣ್ ಖಂಯ್ಚರ್ಗೀ ಚುಕೊನ್ ಪಡ್ಲಲೊ ಆನ್ಭೋಗ್ ಜಾಲೊ. ಪಯ್ಲೆಂಚ್ ಆಪ್ಣೆಂ ಏಕ್ ಬರಿ ವಾಟ್ ದರ್ಲ್ಲಿ ತರ್ ಆಪ್ಲ್ಯಾ ಭಾಂವ್ಡಾಂ ಪರಿಂ ಆಪುಣ್ಯ್ ಎಕಾ ದಿಶೆಕ್ ಪಾವ್ತಿಂ ಆಸ್ಲ್ಲಿಂ. ಬಾಪಾಯ್ಚಾ ಖುಶೇಕ್ ಖಾಲ್ತಿಮಾನ್ ಗಾಲುನ್ ಮೆಡಿಕಲಾಚಾ ಶಿಕ್ಪಾಂತ್ಚ್ ಆಪ್ಲೆಂ ಧ್ಯಾನ್ ದಿಲ್ಲೆಂ ಜಾಲ್ಯಾರ್.....!
ಜಿವಿತಾಂತ್ ಪಯ್ಲ್ಯಾ ಪಾವ್ಟಿಂ ಆಲಿಯಾಕ್ ಆಪ್ಲಿಂ ಮೆಟಾಂ ಚುಕ್ಲ್ಲೊ ಆನ್ಭೋಗ್ ಜಾಲೊ.
***********
ಆಲಿಯಾಚಾ ಜಿವಿತಾಂತ್ ಹ್ಯಾ ದಿಸಾಂನಿಂ ಏಕ್ ನವಿ ಘುಂವ್ಡಿ ಆಯ್ಲಿ. ಆಪ್ಲ್ಯಾ ಜಿವಿತಾಕ್ ತಿತ್ಲೊ ಚಡ್ ಮಹತ್ವ್ ದೀಂವ್ಕ್ ನಾತ್ಲೆಲ್ಯಾ ಆಲಿಯಾಚಾ ಜಿವಿತಾಚೆ ದೀಸ್ ಧಾಂವ್ತಾಂ ಧಾಂವ್ತಾಂ ತಾಕಾ ಭರೊನ್ ಯೆಂವ್ಚಿ ಪ್ರಾಯ್ ತಾಚ್ಯಾ ಮುಕ್ಲ್ಯಾ ಜಿವಿತಾ ಥಂಯ್ ತಾಕಾ ಚಡ್ ಲಾಗಿಂ ಹಾಡಂವ್ಕ್ ಪ್ರಯತ್ನ್ ಕರ್ತಾಲಿ. ಆಲಿಯಾ ತರ್ಯ್ ಹೆಂ ಕೆದ್ನಾಂಚ್ ಸಮ್ಜೊಂಕ್ ಸಕೊಂಕ್ ನಾತ್ಲ್ಲೆಂ.
ಆವಯ್ ಬಾಪಾಯ್ನ್ ಆಲಿಯಾಕ್ ಕಿತ್ಲೆಂ ಸಮ್ಜಾಯಿಲ್ಲೆಂ ತರ್ಯ್, ಆಪ್ಲ್ಯಾ ಮತಿಂತ್ಲ್ಯಾ ಚಿಂತ್ನಾಂ ಶಿವಾಯ್ ದುಸ್ರ್ಯಾ ಖಂಯ್ಚಾಯ್ ಕುಶಿಂನ್ ಚಿಂತಿನಾತ್ಲೆಲ್ಯಾ ತಾಚ್ಯಾ ಜಲ್ಮಾ ಗೂಣಾಕ್ ಯಾ ತಾಚ್ಯಾ ಸ್ವಭಾವಾಕ್ ಲಾಗೊನ್, ತಾಚಿಂ ಭಾಂವ್ಡಾಂ ತರ್ಯ್ ತಾಂಚ್ಯಾ ಗರ್ಜೆ ಶಿವಾಯ್ ಆಲಿಯಾಚಾ ಲಾಗಿಂ ಯೇನಾತ್ಲ್ಲಿಂ. ಆಲಿಯಾ ಜಾಲ್ಯಾರ್ಯ್ ತಶೆಂಚ್. ಲ್ಹಾನ್ ಥಾವ್ನ್ ತಾಣಿಂ ಜಿವಿತಾಂತ್ ಪಾಳುನ್ ಆಯಿಲ್ಲಿ ರೀತ್ ಆಜ್ ತಿಂ ಪ್ರಾಯೆನ್ ವ್ಹಡ್ ಜಾಲ್ಯಾಂತ್ ಜಾಲ್ಯಾರ್ಯ್ ಬದ್ಲುಂಕ್ ಸಕ್ಲಿಂ ನಾಂತ್. ತಾಂಚೆ ಮಧೆಂ ತೊ ತಾಂಚೊ ರಗ್ತಾಚೊ ಸಂಭಂಧ್ ಫಕತ್ತ್ ನಾಂವಾಚೊ ಸಂಭಂಧ್ ಜಾವ್ನ್ ಮಾತ್ರ್ ಉರ್ಲೊ.
ಆಪ್ಲೆಂ ಪೈಲೆಟ್ ಜಾಂವ್ಚೆಂ ಸಪಾಣ್ ಆಪ್ಲ್ಯಾಚ್ ಹಾತಾಂನಿಂ ಮೊಡುನ್ ಉಡಯ್ಲ್ಯಾರ್ಯ್ ಆಲಿಯಾಕ್ ಹ್ಯಾ ವಿಶಿಂ ಕಾಂಯ್ಚ್ ಬೆಜಾರಾಯ್ ಯಾ ಚುರ್ಚುರೆ ನಾತ್ಲ್ಲೆ. ಹ್ಯಾ ಖಾತಿರ್ ತೆಂ ಕೆದ್ನಾಂಚ್ ರಡೊಂಕ್ ನಾ. ಬಗಾರ್ ಕ್ಯಾಪ್ಟನ್ ರಾಣಾಕ್ ಜನರಲಾ ಮುಕಾರ್ ಆಪ್ಣೆಂ ದಿಲ್ಲ್ಯಾ ಜವಾಬೆನ್ ತಾಚ್ಯಾ ಆಂಗಾರ್ ಖಡ್ಕಡೊ ಹಾಡಯಿಲ್ಲೊ ಆನಿ ತಾಚ್ಯಾ ತಾಳ್ಯಾಂತ್ ಉಮಾಳುನ್ ಆಯಿಲ್ಲಿ ತಿ ಕಾಂಪ್ ಪಳವ್ನ್, ಥೊಡ್ಯಾ ಕ್ಷಣಾಂಕ್ ಆಪುಣ್ ಕ್ಯಾಪ್ಟನಾ ಸಾಮ್ಕಾರ್ ತಕ್ಲಿ ಬಾಗಾಂವ್ಕ್ ನಾ ಮ್ಹಳ್ಳೆಂ ಗರ್ವ್ ಆನಿ ಆಪುಣ್ ಜಿಕ್ಲಿಂ ಮ್ಹಳ್ಳ್ಯಾ ಜಯ್ತಾಚಿ ತೃಪ್ತಿ ಆಲಿಯಾಕ್ ಮೆಳ್ಲ್ಲಿ.
ಹಿ ತೃಪ್ತಿ ಆಲಿಯಾಚಾ ಮತಿಂತ್ ಚಡ್ ತೇಂಪ್ ಉರ್ಲಿ ನಾ. ಧುವೆಚೊ ಸ್ವಭಾವ್ ಜಾಣಾಂ ಆಸ್ಲ್ಲ್ಯಾ ಶಬೀರಾನ್ ಆಲಿಯಾಚಾ ಪಾಡ್ತೆನ್ಚ್ ರಾವೊನ್ ಧುವೆಚಾ ಚಿಂತ್ಪಾಕ್ ಸೈ ಘಾಲಿ. ಹ್ಯಾ ಶಿವಾಯ್ ತಾಕಾ ದುಸ್ರಿ ವಾಟ್ ನಾತ್ಲ್ಲಿ. ಧುವೆಚಾ ವಿರುದ್ದ್ ವಚೊನ್ ತಾಣೆಂ ಹಾಚ್ಯಾ ಆದಿಂ ಪಳೆಲಾಂ. ಧುವೆಕ್ ಬೂದ್ ಬಾಳ್ ಸಾಂಗೊನ್ ಹಾಚ್ಯೆ ಆದಿಂ ತಾಣೆಂ ಪಾರ್ಕಿಲಾಂ. ಹಾಚ್ಯೆ ಥಾವ್ನ್ ಆಪ್ಲ್ಯಾಚ್ ಮತಿಚಿ ಶಾಂತಿ ಪಾಡ್ ಜಾತಾ ಶಿವಾಯ್ ಆಲಿಯಾ ಕಾಂಯ್ ತಾಚ್ಯಾ ಚಿಂತ್ಪಾಚೆರ್ ಬದ್ಲಾವಣ್ ಹಾಡ್ತಾ ಯಾ ಆಲಿಯಾ ಕಾಂಯ್ ದುಸ್ರ್ಯಾಂಚೆಂ ಆಯ್ಕಾತಾ ಮ್ಹಳ್ಳೊ ಭರ್ವಸೊ ತಾಕಾ ನಾತ್ಲ್ಲೊ. ಹ್ಯಾಚ್ ಖಾತಿರ್ ತಾಣೆಂ ಆತಾಂ ಸಂಪೂರ್ಣ್ ಆಪ್ಲಿ ಧುವ್ ಕಿತೆಂ ಸಾಂಗ್ತಾ ತೆಂ ಆಯ್ಕೊಂವ್ಚೆಂಚ್ ಬರೆಂ ಮ್ಹಣೊನ್ ನಿರ್ಧಾರ್ ಕೆಲ್ಲೊ.
ಆಲಿಯಾಚಾ ಜಿವಿತಾಂತ್ ಬರೆಂ ಆನಿ ವಾಯ್ಟ್ ದೋನ್ಯ್ ಆಯಿಲ್ಲೆಂ. ಪುಣ್ ಹ್ಯಾ ಬರ್ಯಾ ಆನಿ ವಾಯ್ಟಾ ಥಾವ್ನ್ ತೆಂ ಕಾಂಯ್ಚ್ ನವೆಂಸಾಂವ್ ಶಿಕೊಂಕ್ ಸಕೊಂಕ್ ನಾ. ಆಪ್ಲ್ಯಾ ಮತಿಕ್ ಸಾರ್ಕೆಂ ದಿಸ್ಲ್ಲೆಂ ತೆಂ ಕರ್ಚಾ ತಾಕಾ, ಆತಾಂ, ಶಬೀರಾನ್ ಬೂಟಿಕ್ ಘಾಲುನ್ ಬಿಜ್ನೆಸ್ ಕರ್ಚಾ ವಿಶಿಂ ಆನಿ ನಾಸಿರಾ ಸಂಗಿಂ ತಾಚ್ಯಾ ನಿಖಾ ವಿಶಿಂ ಚಿಂತ್ಚೆಂ ಚಿಂತಾಪ್ ಆಲಿಯಾಚಾ ಮತಿಂತ್ ವೊಂಪ್ಲ್ಲೆಂ.
ಆಲಿಯಾ ಜಾಲ್ಯಾರ್ಯ್ ಸಾರ್ಕೆಂ ಜಾಣಾಂ ಕೀ ಆಪ್ಲೊ ಬಾಪಯ್ ಕಸಲ್ಯಾಯ್ ವಿಶಯಾಂತ್ ಆಪ್ಣಾಕ್ ವತ್ತಾಯ್ ಕರ್ಚೊ ಮನಿಸ್ ನ್ಹಯ್. ಪುಣ್ ಆಲಿಯಾಕ್ ಆತಾಂ ತಾಚ್ಯಾ ಜಿವಿತಾಂತ್ ಕಾಂಯ್ ತರ್ಯ್ ಕರುಂಕ್ಚ್ ಜಾಯ್ ಆಸ್ಲ್ಲೆಂ.
ಆಪ್ಣೆಂ, ಆಪ್ಲ್ಯಾ ಬಾಪಾಯ್ ಲಾಗಿಂ ಬಿಜ್ನೆಸ್ ಕರ್ಚಾ ವಿಶಿಂ ಸಾಂಗ್ಲ್ಯಾರ್, ಫಾಲ್ಯಾಂಚ್ ಆಪ್ಲೊ ಬಾಪಯ್ ಆಪ್ಣಾಕ್ ಜಾಯ್ ಜಾಲ್ಲೆಂ ಬಿಜ್ನೆಸ್ ಉಗ್ತೆಂ ಕರುನ್ ದಿತಲೊ. ಪುಣ್ ಮ್ಹಜ್ಯಾ ಚಾಲ್ ಚಮ್ಕಾಣೆಂತ್ ಆನಿ ಮ್ಹಜ್ಯಾ ಉಲವ್ಣ್ಯಾಂತ್, ಆಪ್ಲ್ಯಾ ಬಿಜ್ನೆಸಾಂತ್ ಆಪುಣ್ ಲೊಕಾಕ್ ಕಿತ್ಲೆಂ ವೊಡುನ್ ಧರುಂಕ್ ಸಕ್ತೆಲಿಂ? ಮ್ಹಳ್ಳೆಂಚ್ ಚಿಂತಾಪ್ ಆಲಿಯಾಚಾ ಮತಿಂತ್ ಘುಂವ್ತಾಲೆಂ.
ಬಿಜ್ನೆಸ್ ವ್ರದ್ಧಿ ಕರುಂಕ್ ಆಪ್ಲ್ಯಾ ಮುಖಮಳಾರ್ ಕೃತಕ್ ರೂಪ್ ವಿಣುಂಕ್ ಜಾಯ್. ಜಿಬೆಕ್ ಜಾಯ್ ಜಾಲ್ಲ್ಯಾ ಪರಿಂ ಘುಂವ್ಡಾವ್ನ್ ಕೊಣಾಯ್ಕ್ಯ್ ದುಗ್ಗು ಸಲಾಮಾ ಮಾರ್ಚೆಂ ತೆಂ ಕಾಮ್, ಆಪ್ಣಾ ವರ್ವಿಂ ಖಂಡಿತ್ ಜಾಂವ್ಚೆಂ ನಾ ಮ್ಹಣೊನ್ ಆಲಿಯಾ ಜಾಣಾಂ. ಬಿಜ್ನೆಸ್ ಕರ್ಚೆಂಯ್ ತಿ ಏಕ್ ಕಲಾ. ತಿ ಕಲಾ ಸಗ್ಳ್ಯಾಂಕ್ ಆಪ್ಣಾಂವ್ಕ್ ಸಾದ್ಯ್ ನಾ. ಹಿ ಕಲಾ ಆಪ್ಣಾಂವ್ಕ್ ನೆಣಾಂ ಜಾಲ್ಲ್ಯಾ ಸಬಾರಾನಿಂ ಲಾಖಾಗಟ್ಲ್ಯಾನ್ ಬಿಜ್ನೆಸಾಂತ್ ಲುಕ್ಸಾಣ್ ಕೆಲ್ಲೆಂಯ್ ತೆಂ ಜಾಣಾಂ. ತ್ಯಾ ಫುಡೆಂ ಆಪ್ಲ್ಯಾ ಕುಟ್ಮಾಂತ್ ಕೊಣ್ಯ್ ಬಿಜ್ನೆಸ್ ಕರುಂಕ್ ನೆಣಾಂತ್ ಜಾಲ್ಲ್ಯಾನ್, ಆನಿ ಖುದ್ದ್ ಜಾವ್ನ್ ಆಪ್ಲ್ಯಾ ಘರಾ ಬಿಜ್ನೆಸಾಚೆಂ ವಾರೆಂ ಯೆದೊಳ್ ವರೇಗ್ ವ್ಹಾಳೊಂಕ್ ನಾತ್ಲೆಲ್ಯಾನ್ ತ್ಯಾ ವಿಶಿಂ ಆಲಿಯಾಕ್ ಕಾಂಯ್ಚ್ ಮಾಹೆತ್ ನಾತ್ಲ್ಲಿ. ಎಕಾಚ್ಚಾಣೆಂ ಹ್ಯಾ ಬಿಜ್ನೆಸ್ ಮ್ಹಳ್ಳ್ಯಾ ದರ್ಯಾಂತ್ ಉಡ್ಕಿ ಮಾರ್ಲ್ಯಾರ್, ಆಪುಣ್ ಹಾಚ್ಯೆ ಥಾವ್ನ್ ಉಪ್ಯೆವ್ನ್ ವಯ್ರ್ ಯೆಂವ್ಚೆಂ ಕಶೆಂ ಮ್ಹಳ್ಳೆಂ ಸವಾಲ್ ತಾಚ್ಯಾ ದೊಳ್ಯಾಂ ಮುಕಾರ್ ದಿಸ್ತಾಲೆಂ.
ಆಶೆಂ ಆಸ್ತಾನಾ ಬಿಜ್ನೆಸ್ ಸೊಡುನ್ ನಿಖಾಚಾ ವಿಶಿಂ ಚಿಂತ್ಲೆಂ ಜಾಲ್ಯಾರ್, ಘೊವಾ ಮುಕಾರ್ ಆನಿ ಮಾಂಯ್ ಮಾಂವಾ ಮುಕಾರ್ ಆಪುಣ್ ಘರ್ಚೆಂ ರಾಂದ್ಚಾ ಕುಡಾಂತ್ಲೆಂ ಬಾಯ್ಲ್ ಜಾವ್ನ್ ಉರೊಂಕ್ ಆಲಿಯಾಕ್ ಭಿಲ್ಕುಲ್ ಪಸಂದ್ ನಾತ್ಲ್ಲೆಂ.
"ಹಾಂವ್ ಏಕ್ ಸ್ವತಂತ್ರ್ ಜೀವಿ....! ಆನಿ ಹಾಂವ್ ಸ್ವತಂತ್ರ್ ಜಾವ್ನ್ ಜಿಯೆತೆಲಿಂ!" ಹೊ ಆಲಿಯಾಚೊ ಜಲ್ಮಾ ಸಿದ್ದಾಂತ್.
ನಿಖಾ ಜಾವ್ನ್ ಒಪ್ಸುನ್ ದಿಲ್ಲ್ಯಾ ಘರಾಂತ್ಯ್ ಆಪ್ಣಾಚೆಂ ಮ್ಹಳ್ಳೆಂ ಕಾಂಯ್ ತರ್ಯ್ ಆಸೊಂಕ್ ಜಾಯ್. ಆಪ್ಣೆಂ ಕೊಣಾಯ್ಚಾಯ್ ಹಂಗಾಕ್ ಪಡ್ಚೆಂ ನ್ಹಯ್. ತೆಂಯ್ ಆಯ್ಚಾ ಹ್ಯಾ ಪರಿಸ್ಥಿತೆಂತ್ ಆಪ್ಲ್ಯಾ ಪಾಂಯಾರ್ ಆಪುಣ್ ಉಭೆಂ ಜಾಯ್ನಾತ್ಲೆಲ್ಯಾ ಚಲಿಯೆಚೆಂ ಜೀವನ್ ಕಿತ್ಲೆಂ ಕಷ್ಟಾಂಚೆಂ ಜಾವ್ನಾಸಾ ಮ್ಹಣೊನ್ ಆಲಿಯಾನ್ ಪಳೆಲ್ಲೆಂ.
ಚಲಿ ಆದಿಂ ಥಾವ್ನ್ಯ್ ಆಪ್ಲ್ಯಾ ಜಿವಿತಾಚಾ ವಾಟೆರ್ ಕೆದ್ನಾಂಯ್ ಆಪ್ಲ್ಯಾ ಆವಯ್ ಬಾಪಾಯ್ಚಾ, ಕೆದ್ನಾಂಯ್ ಆಪ್ಲ್ಯಾ ಭಾವಾ ಘೊವಾಚಾ, ಕೆದ್ನಾಂಯ್ ಆಪ್ಲ್ಯಾ ಭುರ್ಗ್ಯಾಂಚಾ, ಕೆದ್ನಾಂಯ್ ಆಪ್ಲ್ಯಾ ಮಾಂಯ್ ಮಾಂವಾಚಾ, ಭಲತ್ಕಾರೆಕ್ ವಳಗ್ ಜಾವ್ನ್, ಅತ್ಯಾಚಾರ್ ಸೊಸುನ್ ಸೊಸುನ್ ಆಯಿಲ್ಲಿ ಆಸ್ತಾಂ, ಚಲಿಯೆನ್ ಹ್ಯಾ ಫುಡೆಂಯ್ ತ್ಯಾಚ್ ಆದ್ಲ್ಯಾ ದಿಸಾಂಚ್ಯಾ ಪ್ರಭಾವಕ್ ವಳಗ್ ಜಾವ್ನ್, ತಿ ತ್ಯಾ ಚಲ್ಯಾಂಚಾ ಪಾಂಯಾಂಚಿ ಧುಳ್ ಜಾವ್ನ್ ಉರ್ಚೆಂ ಕಿತ್ಲೆಂ ದುರ್ಭಾಗ್ಯ್....!?
ಚಲಿ ಖಂಯ್ಚಾ ವಿಶ್ಯಾಂತ್ ಉಣೆಂ ಆಸಾ? ಆಜ್ ತಿ ಅಬಲ್ ಕಿತ್ಯಾಕ್ ಆಸಾ? ಚಲಿಯೆನ್ ಕಾಳಾ ಥಾವ್ನ್ ಕಾಳಾಕ್ ಹ್ಯಾ ಚರಿತ್ರೆಂತ್ ದಾಖವ್ನ್ ದಿಲಾಂ ಕೀ ಕೆದ್ನಾಂ ಕೆದ್ನಾಂ ತಿಚಿ ಗರ್ಜ್ ಪಡ್ಲ್ಯಾ ತೆದ್ನಾಂ ತೆದ್ನಾಂ ತಿಣೆಂ ಆಪ್ಲಿ ಸಾಮರ್ಥಿ ದಾಖವ್ನ್, ಹ್ಯಾ ಸಮಾಜೆಕ್ ಆಪ್ಲೆಂ ಆಸ್ಥಿತ್ವ್ ದಾಖಾಯ್ಲಾಂ ಆಸ್ತಾಂ, ಅಜೂನ್ ತಿಕಾ ಅಬಲ್ ಮ್ಹಣೊನ್ ವೊಲಾಯ್ತೆಲ್ಯಾಂಚಾ ವಯ್ರ್ ಆಲಿಯಾಕ್ ತಿರಸ್ಕಾರ್ ಆಸ್ಲ್ಲೊ. ಹ್ಯಾಚ್ ಕಾರಾಣಾ ಖಾತಿರ್ ಕ್ಯಾಪ್ಟನ್ ರಾಣಾಕ್ ಜನರಲಾ ಹುಜಿರ್ ಆಪ್ಲ್ಯಾ ಉತ್ರಾಂಚಿ ತಾಣೆಂ ತಿಕ್ಸಾಣ್ ದಾಖಯಿಲ್ಲಿ.
ನಾಸಿರ್ ಆಪ್ಣಾಚೊ ಘೊವ್ ಜಾಂವ್ಕ್ ಆಸ್ಚೊ ತೊ, ಆಲಿಯಾ ತಾಕಾ ಬರ್ಯಾನ್ ವಳ್ಕಾತಾಲೆಂ. ಆಪ್ಲ್ಯಾ ಧರ್ಮಾಂತ್ ಚಡಾವತ್ ಜಾವ್ನ್ ನಿಖಾ ಸಂಭಂಧಾ ಭಿತರ್ಚ್ ಜಾತಾಲೆಂ ಶಿವಾಯ್ ಸಂಭಂಧಾ ಭಾಯ್ರ್ ವೆಚೆಂ ಭಾರಿಚ್ಚ್ ಅಪ್ರೂಪ್. ಆತಾಂ ಹೆಂ ಅಪ್ರೂಪ್ ಮ್ಹಣ್ಚೆಂ ಎಕೇಕ್ ಪಾವ್ಟಿಂ ಸದಾಂಚೆಂ ಜಾಲ್ಲೆಂ.
ಬರೆಂ ಶಿಕಾಪ್ ಜೊಡುನ್ ಬರೆಂ ಕಾಮ್ ಆಪ್ಣಾಯಿಲ್ಲಿಂ ಆಪ್ಣಾಚಾ ಚಿಂತ್ಪಾಕ್, ಆಪ್ಲ್ಯಾ ವ್ಯಕ್ತಿತ್ವಾಕ್ ವಳ್ಕೊಂಚಾ ಸಾಂಗಾತ್ಯಾಂಕ್ ಸೊಧುನ್ ನಿಖಾ ಜಾತಾಲಿಂ ಶಿವಾಯ್ ತ್ಯಾ ಅದ್ಲ್ಯಾ ರಿತಿ ರಿವಾಜೆಕ್ ಪಾಳುಂಕ್ ವಚಾನಾತ್ಲ್ಲಿಂ.
ಬಲತ್ಕಾರೆಚ್ಯೊ ರಿತಿ ರಿವಾಜ್ಯೊ ಮನ್ಶಾಚಾ ವ್ಯಕ್ತಿತ್ವಾಕ್ ಬಾಂದುನ್ ದವರ್ತಾತ್ ಶಿವಾಯ್ ತ್ಯಾ ವ್ಯಕ್ತಿತ್ವಾಚಾ ವಿಚಾರಾಂಕ್ ಉಗ್ಡಾಪೆಂ ಕರುಂಕ್ ಸಕಾನಾಂತ್.
ಆಶೆಂ ಆಸ್ತಾನಾ ಆಲಿಯಾನ್ಯ್ ಆತಾಂ ಏಕ್ ನಿರ್ಧಾರ್ ಘೆಂವ್ಕ್ ಆಸ್ಲ್ಲೊ. ನಾಸಿರಾಚಾ ವಿಶಿಂ ಜಾಂವ್ ಯಾ ತಾಚ್ಯಾ ಘರಾಣ್ಯಾ ವಿಶಿಂ ಜಾಂವ್ ಆಲಿಯಾ ಸಗ್ಳೆಂ ಜಾಣಾಂ ಅಸ್ಲ್ಲೆಂ.
ನಾಸಿರ್ ತಾಚ್ಯಾ ಆವಯ್ ಬಾಪಾಯ್ಕ್ ಮಾಲ್ಗಡೊ ಪೂತ್. ತಾಚ್ಯಾ ಪಾಟ್ಲ್ಯಾನ್ ದೋಗ್ ಭಾವ್ ಆನಿ ನಿಮಾಣೆಂ ಏಕ್ ಭಯ್ಣ್ ತಾಕಾ ಆಸ್ಲ್ಲೆಂ. ನಾಸಿರಾಚೊ ಬಾಪಯ್ ಸುಲೇಮಾನ್ ಆಲಿಯಾಚಾ ಆವಯ್ಚಾ ಕುಟ್ಮಾಂತ್ಲೊ ಜಾಲ್ಲ್ಯಾನ್, ಎಕಾ ವಾಟೆನ್ ತೊ ಆಲಿಯಾಕ್ ಸೈರೊ ಜಾವ್ನಾಸೊನ್ ತಿಂ ಹಾಂಗಾ ಆನಿ ಹಿಂ ಥಂಯ್ ಮ್ಹಣೊನ್ ಎಕಾ ಮೆಕಾ ವಳ್ಕೊನ್ ಯೇವ್ನ್ ವೆಚೆಂ ಆಸ್ಲ್ಲೆಂ.
ನಾಸಿರ್ ಪಳಂವ್ಕ್ ತಿಕ್ಕೆ ಭಾರೀಕ್ ಜಿವಾಚೊ ಜಾವ್ನ್ ಲಾಂಬ್ ಆಸ್ಲ್ಲೊ. ಗೊರ್ಶಿ ಕಾತ್, ದಾಟ್ ಕೇಸ್, ಕಾಳ್ಶೆ ದೊಳೆ, ಪಳಂವ್ಕ್ ತೊ ಹ್ಯಾಂಡ್ಸಮ್ ದಿಸ್ತಾಲೊ. ಹುಶಾರ್ ತಕ್ಲೆಚೊ ಜಾಲ್ಲ್ಯಾನ್ ಬಾಪಾಯ್ಕ್ ಚಡ್ ಮೊಗಾಚೊ. ಕೊಣಾಯ್ ಲಾಗಿಂ ಚಡ್ ಉಲಯ್ ನಾತ್ಲ್ಲೊ. ಕಿತೆಂ ಮ್ಹಳ್ಯಾರ್ ಬರೆಂ ಮ್ಹಣೊನ್ ಹಾಸ್ತಾಲೊ ಮಾತ್ರ್ ಶಿವಾಯ್ ವಿಪರೀತ್ ಉಲವ್ಣ್ಯಾಚಿ ಸವಯ್ ತಾಕಾ ನಾತ್ಲ್ಲಿ. ತಶೆಂ ಮ್ಹಣೊನ್ ತೊ ಲಜಿಶ್ಟ್ ಭಿಲ್ಕುಲ್ ನ್ಹಯ್. ಖಂಯ್ಚಾಯ್ ಕಾಮಾಂತ್ ಜಾಂವ್, ಕಿತೆಂಯ್ ಕರ್ಚಾಂತ್ ಜಾಂವ್ ಆಪ್ಲ್ಯಾ ಆವಯ್ ಬಾಪಾಯ್ಕ್ ವಿಚಾರಿನಾಸ್ತಾನಾ ತೊ ಕಾಂಯ್ಚ್ ಕರಿನಾತ್ಲ್ಲೊ. ಆವಯ್ ಬಾಪಯ್ಚೆಂ ಪಸಂದೆಚೆಂ ಮಾತ್ರ್ ತೊ ಗಿನ್ಯಾನಾಕ್ ಘೆತಾಲೊ.
ಹ್ಯಾಚ್ ಗೂಣಾಂಕ್ ಲಾಗೊನ್ ಬಾಪಾಯ್ಚೆಂ ಇಂಪೋರ್ಟ್ ಎಂಡ್ ಎಕ್ಸ್ಪೋರ್ಟ್ಬಿಜ್ನೆಸ್ ಬಾಪಾಯ್ ಸಾಂಗಾತಾ ಮೆಳೊನ್ ತಾಣೆಂ ವ್ರದ್ದಿ ಕೆಲ್ಲೆಂ. ಪಯ್ಲೆಂ ಬಾಪಾಯ್ಕ್ ಕುಮಕ್ ಕರ್ಚಾ ತಾಚಿ, ಬಿಜ್ನೆಸ್ ಸಾಂಬಾಳ್ಚಾಂತ್ ಆಸ್ಚಿ ಶಾಥಿ ಪಳವ್ನ್, ಬಾಪಯ್ ಸುಲೇಮಾನಾನ್, ಆತಾಂ ಸಗ್ಳ್ಯಾ ಬಿಜ್ನೆಸಾಕ್ ನಾಸಿರಾಚಾ ಖಾಂದ್ಯಾರ್ ದೀವ್ನ್ ಆಪ್ಣೆ ಘರಾಲಾಗಿಂ ಜಿವಿತಾಚಾ ಉತರ್ ಪ್ರಾಯೆರ್ ಆರಾಮ್ ಕರುಂಕ್ ಚಿಂತ್ಲೆಲೆಂ.
ನಾಸಿರಾಕ್ ಉಣೆಂಪಣ್ ಮ್ಹಳ್ಳೆಂ ಕಾಂಯ್ಚ್ ನಾತ್ಲೆಲೆಂ. ತಾಚ್ಯಾಲ್ಹಾನ್ಪಣಾರ್ ಥಾವ್ನ್ ತೊ ಬಿಜ್ನೆಸ್ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ಜಾಣಾಂ ಆಸ್ಲ್ಲೊ. ಕುಟ್ಮಾಂತ್ ಪಾರಂಪರಿಕ್ ರೂಪಾಂತ್ ಮ್ಹಳ್ಳ್ಯಾ ಪರಿಂ ತಾಚ್ಯಾ ಮಾಲ್ಘಡ್ಯಾಂ ಥಾವ್ನ್ ಬಿಜ್ನೆಸ್ ಕರ್ಚಿ ಕಲಾ ಉದೆವ್ನ್ ಆಯಿಲ್ಲಿ. ಮಾಲ್ಗಡ್ಯಾಂನಿ ಕುಟ್ಮಾಕ್ ಸಾಂಬಾಳ್ಚಾ ಖಾತಿರ್ ಆರಂಭ್ ಕೆಲ್ಲೊ ವ್ಯಾಪಾರಾಚೊ ವ್ಯವಹಾರ್, ಪಿಳ್ಗೆ ಥಾವ್ನ್ ಪಿಳ್ಗೆಕ್ ಪಾವ್ತಾನಾ ವ್ರದ್ದಿ ಜಾಲ್ಲೊ ಶಿವಾಯ್ ಎಕ್ಚ್ ಪಾವ್ಟಿಂ ನಾಸಿರಾಚೊ ಬಾಪಯ್ ಸುಲೇಮಾನ್ ವ್ಯವಹಾರಾಂತ್ ಪಾಂಯ್ ದವರ್ಲ್ಲೊ ನ್ಹಯ್. ತಾಚ್ಯಾ ಮಾಲ್ಗಡ್ಯಾಂನಿ ಚಲವ್ನ್ ಆಯಿಲ್ಲೊ ವ್ಯಾಪಾರ್ ತಾಣೆಂ ವ್ರದ್ದಿ ಕೆಲ್ಲೊ. ಹ್ಯಾ ವ್ರದ್ದಿ ಕರ್ಚಾ ವಾವ್ರಾಂತ್ ತಾಣೆಂ ತರ್ಯ್ ಆಪ್ಲಿ ಮ್ಹಿನತ್ ರಿಸ್ಕೆರ್ ಘಾಲುನ್, ವ್ಯಾಪಾರಾಕ್ ಬಂಡವಾಳ್ ಚಡವ್ನ್, ಆಜ್, ಆಯ್ಚಾ ದಿಸಾ ತಾಣೆಂ ತ್ಯಾ ವಹಿವಾಟಾಕ್ ಏಕ್ ರೂಪ್ ದಿಲ್ಲೆಂ.
ಹ್ಯಾ ರೂಪಾಕ್ ಹಾಡಂವ್ಚಾಂತ್ ಆನಿ ದಿವಂವ್ಚಾಂತ್, ಸುಲೇಮಾನಾನ್, ತಾಚ್ಯಾ ಜಿವಿತಾಚ್ಯೊ ಕಿತ್ಲ್ಯೊ ರಾತಿ ನಿದೆವಿಣೆಂ ಖರ್ಚಿಲ್ಯಾತ್ ಆನಿ ದಿಸಾ ಉಜ್ವಾಡಾಕ್ ಕಿತ್ಲಿಂ ಚಿಂತ್ನಾ ಆಟವ್ನ್ ಆಪ್ಲ್ಯಾ ಮತಿಚಿ ಶಾಂತಿ ಪಿಡ್ಡ್ಯಾರ್ ಕೆಲ್ಯಾ ತಿ ಫಕತ್ತ್ ಸುಲೇಮಾನಾಕ್ ಮಾತ್ರ್ ಕಳಿತ್.
ಸುಲೇಮಾನ್ ಭುರ್ಗ್ಯಾಪಣಾರ್ ಥಾವ್ನ್ಚ್ ಮುಂಬಯ್ ವ್ಹಾಡ್ಲ್ಲೊ. ತಾಚ್ಯಾ ಬಾಪಾಯ್ಕ್ ಖಾದರಾಕ್ ಚೆಂಬೂರ್ ಜೀನ್ಸಾಚೆಂ ಲ್ಹಾನ್ ದುಕಾನ್ ಅಸ್ಲ್ಲೆಂ. ತಾಚ್ಯಾ ಕುಟ್ಮಾಚೆಂ ಮೂಳ್ ಶ್ಹೆರ್ ಕೊಲ್ಹಾಪುರ್ ತರ್ಯ್ ಗಾಂವ್ ಸೊಡುನ್ ಖಾದರ್ ಆಪ್ಲ್ಯಾ ಭುರ್ಗ್ಯಾಪಣಾರ್ಚ್ ಮುಂಬಯ್ ಧಾಂವೊನ್ ಆಯಿಲ್ಲೊ. ಮುಂಬಯ್ಚ್ಯಾ ಗಾಂವಾಕ್ ಅಸಲ್ಯಾಚ್ ಕಾಸ್ತಾಚೆ ಮನಿಸ್ ಯೆತಾತ್ ಮ್ಹಣೊನ್ ಸಾಂಗೊಂಕ್ ಕಷ್ಟ್. ಜರ್ ತರ್ ಕೊಣ್ಯ್ ಎಕ್ಲೊ ಯಾ ಎಕ್ಲೆಂ ಆಪ್ಲ್ಯಾ ಬಿಡಾರಾ ಥಾವ್ನ್ ಧಾಂವ್ ಮಾರ್ತಾ ಜಾಲ್ಯಾರ್ ತಾಣಿಂ ತಾಂಚಾ ಶೆವೊಟಾ ಖಾತಿರ್ ವಿಂಚ್ಚೆಂ ಶ್ಹೆರ್ ಮುಂಬಯ್!
ಗಾಂವಾಂತ್,ಸಗ್ಳ್ಯಾ ಗಾಂವಾಕ್ ಗಾಂವ್ಚ್ ವಳ್ಕಾತಾ. ಜರ್ತರ್ ಕೊಣ್ಯ್ ವಾಟ್ಸುರೊ ವಾಟ್ ಚುಕೊನ್ ಯಾ ಪಯ್ಣಾರಿ ಪಯ್ಣ್ ಕರುನ್ ಹ್ಯಾ ಗಾಂವಾಕ್ ಪಾವ್ಲೊ ಜಾಲ್ಯಾರ್ ಸಗ್ಳೊ ಗಾಂವ್ಚ್ ಜಾಣಾಂ ಜಾತಾ ಕೀ ಆಪ್ಲ್ಯಾ ಗಾಂವಾಂತ್ ಕೋಣ್ ಎಕ್ಲೊ ನವೊ ಆಯ್ಲಾ ಯಾ ನವೊ ಪಾಶಾರ್ ಜಾಲಾ ಮ್ಹಣೊನ್. ಪುಣ್, ಮುಂಬಯ್.....!?
ಮುಂಬಯಿಂತ್ ಆಪ್ಲ್ಯಾ ಪೆಲ್ಯಾ ಘರಾ ಕೋಣ್ ರಾವ್ತಾ, ಕಿತ್ಯಾಕ್ ರಾವ್ತಾ ಮ್ಹಳ್ಳ್ಯಾ ವಿಶಿ ಚಿಂತುಂಕ್ ಕೊಣಾಯ್ಕ್ಯ್ ಪುರ್ಸತ್ ನಾ. ಆಶೆಂ ಆಸ್ತಾನಾ ಗಾಂವಾಂತ್ ಆಪ್ಲ್ಯಾ ಪೆಲ್ಯಾಂಕ್ ಸಾಂಡುನ್ ಮುಂಬಯಿ ಧಾಂವೊನ್ ಆಯಿಲ್ಲೊ ಖಾದರ್ ಮುಂಬಯಿ ಆಯಿಲ್ಲ್ಯಾ ಪರಿಂಚ್ ಹೊಟೇಲಾಂತ್ ಕಾಮಾಕ್ ಲಾಗ್ಲೊ.
ಹೋಟೆಲಾಂತ್ ಕಾಮಾಕ್ ಲಾಗ್ಲ್ಲ್ಯಾನ್ ಸಾಂಬಾಳ್ ನ್ಹಯ್ ತರ್ಯ್ ಆಪ್ಲ್ಯಾ ಖಾಣಾ ಜೆವ್ಣಾಚೊ ಆನಿ ವಸ್ತೆಚೊ ಹಾರ್ಬಾರ್ ತಾಚ್ಯಾ ತಕ್ಲೆರ್ ನಾತ್ಲ್ಲೊ. ದೀಸ್ ವೆತಾಂ ವೆತಾಂ ಆಪ್ಲಿ ಪರಿಸ್ಥಿತಿ ಸಮ್ಜೊನ್ ಸಗ್ಳ್ಯಾಂ ಸಾಂಗಾತಾ ಬರೊ ಸಂಭಂಧ್ ರಚ್ಲ್ಲ್ಯಾ ಖಾದರಾನ್, ಆಪ್ಲ್ಯಾ ಕಾಮ್ ಕರ್ಚಾ ಹೋಟೆಲಾಕ್ ಚ್ಹಾ ಪಿಯೆಂವ್ಕ್ ಯೆಂವ್ಚಾ ರೂಕಾಟಾಚಾ ಮಿಲ್ಲಾಚಾ ರೈಟರಾಚಿ ಬರಿ ಚಂಗಾಯ್ ಕರುನ್, ಹೋಟೆಲಾಚಾ ಕಾಮಾ ಥಾವ್ನ್ ಹಾತ್ ಧುವ್ನ್, ಮಿಲ್ಲಾಂತ್ ರೂಕ್ ಲೊಳಂವ್ಚಾ ಕಾಮಾಕ್ ಸೈ ಘಾಲಿ.
ರೂಕಾಚಾ ಮಿಲ್ಲಾಂತ್ ರೂಕ್ ಲೊಳಯ್ತಾಂ ಲೊಳಯ್ತಾನಾ, ಮಿಲ್ಲಾ ಭಿತರ್ ರಾತಿಕ್ ಜಾಂವ್ಚಾ ಕಾಮಾ ವಿಶಿಂ ಮಾಹೆತ್ ಎಕ್ಟಾಂವ್ನ್, ಖಾದರ್ ಚೊರಿಯಾಂ ರೂಕ್ ಹಾಡವ್ನ್ ಚಿರಯ್ತೆಲ್ಯಾಂಚಾ ಪಂಗ್ಡಾಕ್ ಸೆರ್ವಾಲೊ.
ಜಿವಿತಾಂತ್ ಮೆಟಾಂ ವಯ್ರ್ ಮೇಟ್ ಚಡೊಂಕ್ ಜಾಯ್ ಜಾಲ್ಯಾರ್, ಆಪ್ಣೆಂ ಕಿತೆಂ ತರ್ಯ್ ಕರುಂಕ್ ಜಾಯ್ ಮ್ಹಣೊನ್ ತೊ ದ್ರಡ್ ಪಾತ್ಯೆಲ್ಲೊ. ಫಕತ್ತ್ ಹೊಟೇಲಾಚೆ ಗ್ಲಾಸ್ ಧುವ್ನ್, ಮೆಜಾಂ ಪುಶೆವ್ನ್, ಆಪುಣ್ ಹ್ಯಾ ಮುಂಬಯಿ ಶ್ಹೆರಾಂತ್ ಎಕ್ಲ್ಯಾ ಮನ್ಶ್ಯಾ ಸಾರ್ಕೊ ಮನಿಸ್ ಜಾತಲೊಂ ಮ್ಹಳ್ಳೊ ಭರ್ವಸೊ ತಾಕಾ ನಾತ್ಲ್ಲೊ. ಹ್ಯಾಚ್ ಖಾತಿರ್ ರುಕಾಚಾ ಮಿಲ್ಲಚಿ ತಾಣೆಂ ವಾಟ್ ಧರ್ಲ್ಲಿ. ರೂಕಾಚಾ ಮಿಲ್ಲಾಂತ್ ಭಾಯ್ರ್ ಭಿತರ್ ಆಂದ್ಕಾರಾಂತ್ ಕಿತೆಂ ಜಾತಾ ತೆಂ ತೊ ಸಾರ್ಕೊ ಜಾಣಾಂ ಆಸ್ಲ್ಲೊ.
ಚಿಂತಾಪ್ ಚಿಂತ್ಪಾಕ್ ಸೊಧ್ತಾ ಆನಿ ಪಯ್ಶ್ಯಾಕ್ ಪಯ್ಸೊ ಧರ್ತಾ. ಆಶೆಂ ಖಾದರಾಚಾ ಚಿಂತ್ಪಾನ್ಯ್ ಚಿಂತ್ಪಾಕ್ ಸೊಧ್ಲ್ಲೆಂ. ಪುಣ್ ತಾಕಾ ಆತಾಂ ಪಯ್ಶ್ಯಾಕ್ ಧರುಂಕ್ ಪಯ್ಸೊ ಜಾಯ್ ಆಸ್ಲ್ಲೊ.
ರೂಕಾಚಾ ಮಿಲ್ಲಾಂತ್ ಚಲ್ಚ್ಯಾ ಹ್ಯಾ ಕಾಮಾಂತ್ ಖಾದರ್ ಧಯ್ರಾನ್ ವಾವುರ್ಲೊ. ತಶೆಂಯ್ ಕಾಂಯ್ ರೂಕ್ ಹಾಡಾಯ್ತಾನಾ ಆನಿ ಸಾಗ್ಸಿತಾನಾ ಆಪ್ಣಾಕ್ ಕಾಂಯ್ ಜಾಯ್ತ್ ಜಾಲ್ಯಾರ್ ಯಾ ಪೊಲಿಸಾಂಚಾ ಹಾತಿಂ ಸಾಂಪ್ಡಾನ್ ಜಾಲ್ಯಾರ್ ಆಪ್ಣಾ ಪಾಟ್ಲ್ಯಾನ್ ಹ್ಯಾ ಮುಂಬಯಿಂತ್ ರಡ್ಚೊ ಮನಿಸ್ ಕೋಣ್ಯ್ ನಾತ್ಲೆಲ್ಯಾನ್ ತಾಕಾ ಜಿವಿತಾಂತ್ ವಯ್ರ್ ಯೆಂವ್ಚಾ ಪಾಸೊನ್ ಕಸಲೆಂಯ್ ಕಾಮ್ ಕರ್ಚಾಂತ್ ಕಾಂಯ್ ಭಿರಾಂತ್ ದಿಸೊಂಕ್ ನಾ.
ಸಿಂತಿಮೆಂತಾಂ ಮನ್ಶ್ಯಾಪಾಂಯಾಂಕ್ ಸದಾಂಚ್ ಅಡ್ಕಳ್. ಸಿಂತಿಮೆಂತಾಂ ನಾತ್ಲಲೊ ಮನಿಸ್ ಖಂಯ್ಚಾ ವಾಟೆನ್ ಜಾಲ್ಯಾರ್ಯ್ ಚಲೊಂಕ್ ಭಿಯೆನಾ. ಕಿತ್ಯಾಕ್ ಮ್ಹಳ್ಯಾರ್ ತಾಚ್ಯಾ ಭೊಂವಾರಿಂ ಕಸಲಿಯ್ ಭಂಧಡ್ ಆಸಾನಾ.
ಖಾದರಾಚಿ ಭಂಧಡ್ ಸಗ್ಳಿ ತಾಚ್ಯಾ ಗಾಂವಾಂತ್ ಕೊಲ್ಹಾಪುರಾಂತ್ ತಾಣೆಂ ಸಾಂಡ್ಲೆಲಿ. ಮುಂಬಯಿ ಶ್ಹೆರಾಂತ್ ತೊ ಪುರ್ತೊ ಎಕ್ಸುರೊ. ಗಾಂವಾಕ್ ಸಾಂಡುನ್ ಧಾಂವೊನ್ ಯೆತಾನಾ ತಾಣೆಂ ತಾಚ್ಯಾ ಸಿಂತಿಮೆಂತಾಂಕ್ಯ್ ತಾಚ್ಯಾ ಘರ್ಚಾ ಆಂಗ್ಣಾಂತ್ಚ್ ಸಾಂಡ್ಲ್ಲೆಂ. ಆತಾಂ ತಾಚ್ಯೆ ಸಾಂಗಾತಾ ಫಕತ್ತ್ ಧಯ್ರ್ ಮಾತ್ರ್ ಆಸ್ಲ್ಲೆಂ.
ಹ್ಯಾಚ್ ಧಯ್ರಾನ್ ಸಭಾರ್ ಪಾವ್ಟಿಂ ತೊ ಪೊಲಿಸಾಂಚಾ ಸಾಮ್ಕಾರ್ ಆಪ್ಲ್ಯಾ ಹಾತ್ ಪಾಂಯಾಂಕ್ ಕಾಂಪಯ್ನಾಸ್ತಾನಾ ಉಭೊ ಜಾಲ್ಲೊ. ಸಭಾರ್ ಪಾವ್ಟಿಂ ಪೊಲಿಸಾಂಚಾ ದೊಳ್ಯಾಂ ಥಾವ್ನ್ ಚುಕಾರಿ ಮಾರುನ್ ಗುಪಿತ್ ಲಿಪೊನ್ ಬಸ್ಲಲೊ.
ರೂಕಾಚಾ ಮಿಲ್ಲಾಂತ್ಲ್ಯಾ ಆಪ್ಲ್ಯಾ ವಾವ್ರಾನ್ ಪಯ್ಶ್ಯಾ ಥಾವ್ನ್ ಪಯ್ಸೊ ಕಸೊ ಪಾಗ್ಚೊ ಮ್ಹಳ್ಳೆಂ ತೊ ಜಾಣಾಂ ಜಾಲೊ.
ದರ್ಯಾ ವೆಳೆರ್ ಉಭೊ ಪಾಗಿ ಪಾಗೆರ್ ಉಡಂವ್ಚಾ ಪಯ್ಲೆಂ, ವಾಳ್ಚಾ ವಾರ್ಯಾಕ್ ಆನಿ ಉದ್ಕಾಚಾ ರಂಗಾಕ್ ಪಾರ್ಕುನ್, ಖಂಯ್? ಕಿತೆಂ? ಕಶೆಂ? ಪಾಗ್ಯೆತ್ ಮ್ಹಣೊನ್ ಜಾಣಾಂ ಜಾವ್ನ್ ಉಪ್ರಾಂತ್ ಉದ್ಕಾಂತ್ ದೆಂವ್ತಾ. ಖಾದರ್ಯ್ ಮುಂಬಯಿ ಶ್ಹೆರಾಂತ್ ಆಜ್ ಪಾಗುಂಕ್ ಶಿಕ್ಲ್ಲೊ. ಪಯ್ಶ್ಯಾನ್ ಪಯ್ಸೊ ಕಶೆಂ ಪಾಗ್ಚೆಂ ತೆಂ ತೊ ಜಾಣಾಂ ಜಾಲೊ.
ರೂಕಾಟಾಚಾ ಮಿಲ್ಲಾಂತ್ ಥೊಡೆ ಪಯ್ಶೆ ಎಕ್ಟಾಂಯ್ ಕರುನ್, ಆಪ್ಣೆಂ ರಾಂವ್ಚಾ ಚಾಲಿಂತ್ಲ್ಯಾ, ರತ್ನಗಿರಿಚಾ ಇಕ್ಬಾಲಾಚಾ ಧುವೆ ಅಂಜುಮಾನಾ ಲಾಗಿಂ ಖಾದರ್ ನಿಖಾ ಜಾಲೊ.
ಚಲ್ಯಾಚಾ ಜಿವಿತಾಂತ್ ಚಲಿ ಕೆದ್ನಾಂಯ್ ಏಕ್ ಮಹತ್ತರ್ ರೂಪಾಚೊ ಪಾತ್ರ್ ಖೆಳ್ತಾ. ಸಭಾರ್ ಚಲೆ ತ್ಯಾ ತಾಂಚಾ ಜಿವಿತಾಂತ್ ಯೆಂವ್ಚಾ ಚಲಿಯಾಂಕ್ ಹೊ ಪಾತ್ರ್ ಖೆಳೊಂಕ್ ಆವ್ಕಾಸ್ ದಿತಾತ್ ತರ್, ಕಾಂಯ್ ಥೊಡೆ ಚಲೆ, ಚಲಿಯಾಂಕ್ ಅಭಲ್ ಮ್ಹಣೊನ್ ಚಲಿ ಮ್ಹಳ್ಯಾರ್ ರಾಂದ್ಚಾ ಕುಡಾಂತ್ಲಿ ದಾಲಿ ಮ್ಹಳ್ಳ್ಯಾ ಆಪ್ಲ್ಯಾ ಉಣ್ಯಾಪಣಾಚಾ ಆನಿ ನೆಣಾರ್ಪಣಾಚಾ ಚಿಂತ್ಪಾಕ್ ಲಾಗೊನ್ ಚಲಿಯಾಂಕ್ ಕೊನ್ಶಾಕ್ ಯಾ ಫಕತ್ತ್ ಆಪ್ಣಾಚಿ ರಾತ್ ಸೊಭಂವ್ಕ್ ಮಾತ್ರ್ ಯೋಗ್ಯ್ ಮ್ಹಣೊನ್ ವಾಪಾರ್ತಾತ್.
ಚಲಿಯೆಕ್ ಕೊಣೆ ಕೊಣೆಂ ಸಮಾಜೆಂತ್ ಕೆದ್ನಾಂ ಕೆದ್ನಾಂ ಏಕ್ ಸ್ಥಾನ್ ದೀಂವ್ಕ್ ವಾವ್ರ್ ಕೆಲಾ ತಾಣಿಂ ಪಯ್ಲೆಂ ಚಲಿಯೆಕ್ ಎಕಾ ಮಹಾನ್ ಮ್ಹಳ್ಳ್ಯಾ ನದ್ರೆನ್ ದೆಖ್ಲಾಂ. ಆಶೆ ದೆಖ್ಲೆಲ್ಯಾಂಚಾ ನದ್ರೆಂತ್ ಸದಾಂಚ್ ಪುನವ್ ಫುಲ್ಲಾ ಶಿವಾಯ್ ಆಮಾಸ್ ಉದೆಂವ್ಕ್ ನಾ.
ಖಾದರಾಚಾ ಜಿವಿತಾಂತ್ ಅಂಜುಮಾನ್ ಆಯಿಲ್ಲೆಂಚ್ ತಾಣೆಂ ಆಪ್ಲ್ಯಾ ಘೊವಾಚೆಂ ಜಿವಿತ್ ಬದ್ಲಿಲೆಂ. ಥೊಡ್ಯಾಚ್ ದಿಸಾಂ ಭಿತರ್ ತೆಂ ಜಾಣಾಂ ಜಾಲೆಂ ಕೀ ತಾಚೊ ಘೊವ್ ಸಮಾಜೆಂತ್ ಆಫ್ರಾದ್ ಆಧಾರ್ತಾ. ಹ್ಯಾ ತಾಚ್ಯಾ ಆಫ್ರಾದಾಕ್ ದಾಖವ್ನ್ ದೀವ್ನ್ ಆಪ್ಲ್ಯಾ ಘೊವಾಕ್ ಹ್ಯಾ ವಾಟೆ ಥಾವ್ನ್ ಮುಕ್ತ್ ಕರುನ್ ನವ್ಯಾ ದಿಶೆಚಾ ವಾಟೆ ತೆವ್ಶಿಂ ಚಮ್ಕೊಂಕ್ ಆಪ್ಣೆಂ ಕುಮಕ್ ಕರುಂಕ್ ಜಾಯ್ ಮ್ಹಳ್ಳ್ಯಾ ಉದ್ದೇಶಾನ್ ಅಂಜುಮಾನಾನ್ ಘೊವಾಕ್ ಸಮ್ಜಾಯ್ಲೆಂ.
ಹ್ಯಾಚ್ ಸಮ್ಜಣೆ ಥಾವ್ನ್ ಖಾದರ್ ಬದ್ಲಾಲೊ. ರೂಕಾಚಾ ಮಿಲ್ಲಾಚೆಂ ಕಾಮ್ ಸೊಡುನ್, ಆಪ್ಣೆ ಎಕ್ಟಾಂಯ್ ಕೆಲ್ಲ್ಯಾ ಪಯ್ಶಾನಿಂ, ಲ್ಹಾನ್ ಏಕ್ ಬೀಡಾ ಬಿಡಿಯೆಚೆಂ ದುಕಾನ್ ತಾಣೆಂ ಉಗ್ತೆಂ ಕೆಲೆಂ. ಪಯ್ಶಾಕ್ ಪಯ್ಸೊ ಪಾಗುಂಕ್ ಸಕ್ತಾ ಮ್ಹಳ್ಳೊ ವಿಚಾರ್, ದೀಸ್ ವೆತಾಂ ವೆತಾಂ ತಾಣೆಂ ಸತ್ ಕರುನ್ ದಾಕಯ್ಲೊ. ದುಕಾನಾಂತ್ ಜಾಲ್ಲ್ಯಾ ಲಾಭಾಂತ್, ಆಯಿಲ್ಲ್ಯಾ ಪಯ್ಶಾನಿಂ, ದುಕಾನಾಂತ್ ತಾಣೆಂ ಚಡ್ತಿಕ್ ವಸ್ತು ಹಾಡುನ್ ವ್ಯಾರ್ ವಾಡಯ್ಲೊ.
ವ್ಯಾರ್ ವಾಡ್ತಾನಾ ಖಾದರಾಚೆಂ ಕುಟಾಮ್ಯ್ ವಾಡ್ಲೆಂ. ಭುರ್ಗಿಂ ಜಾಲಿಂ. ವಾಡ್ಲ್ಲ್ಯಾ ಭುರ್ಗ್ಯಾಂನಿಂ ತಾಂಚಿ ತಾಂಚಿ ವಾಟ್ ಧರ್ತಾನಾ ಸುಲೇಮಾನ್, ಖಾದರಾಚೊ ತಿಸ್ರೊ ಪೂತ್, ಹಾಣೆಂ ದುಕಾನಾಚಿ ಜವಾಬ್ದಾರಿ ಘೆತ್ಲಿ. ಸುಲೇಮಾನಾಚಾ ಬುದ್ವಂತ್ಕಾಯೆನ್, ವ್ಯಾರಾ ಸಾಂಗಾತಾ, ಮುಂಬಯಿಕ್ ರತ್ನಗಿರಿ ಥಾವ್ನ್ ಆಂಬೆ ಹಾಡವ್ನ್ ವಿಕ್ಚೆಂ ಆನಿ ರಾಂದ್ವಯ್ ಹಾಡವ್ನ್ ವಿಕ್ಚಾ ವ್ಯಾರಾ ಥಾವ್ನ್, ವಹಿವಾಟಾಚಾ ಹ್ಯಾ ವ್ಯಾರಾಂತ್ ಸುಲೇಮಾನಾಚೆಂ ನಾಂವ್ ಆಯ್ಕೊಂಕ್ ಲಾಗ್ಲೆಂ.
ಪಯ್ಲೆಂ ಪಯ್ಲೆಂ ರತ್ನಗಿರಿ ಥಾವ್ನ್ ಆಂಬೆ ಹಾಡವ್ನ್ ಮುಂಬಯಿಚಾ ಶ್ಹೆರಾಕ್ ಪಾವಂವ್ಚೊ ವಹಿವಾಟ್ ಕರ್ಚಾ ಸುಲೇಮಾನಾನ್, ಆತಾಂ ಬರ್ಯಾ ಬರ್ಯಾ ಜಾತಿಚಾ ಆಂಬ್ಯಾಚಾ ರೂಕಾಚಾ ಫಾರ್ಮಾಂಕ್ ಭೆಟ್ ದೀವ್ನ್, ಫಾರ್ಮಾಗಾರಾಂಕ್ ಬರೆ ಆಂಬೆ ಉತ್ಪತ್ತಿ ಕರ್ಚಾ ವಿಶಿಂ ಮಾಹೆತ್ ದೀವ್ನ್, ತಾಂಚೆ ಥಾವ್ನ್ ತೆ ಆಂಬೆ, ಸಂಪೂರ್ಣ್ ವ್ಯಾರಾಚಾ ನೀತಿ ಸಾರ್ಕೆಂ ತೆ ಆಂಬೆ ಮೊಲಾವ್ನ್, ಭಾಯ್ಲ್ಯಾ ಗಾಂವಾಂಕ್ ದಾಡ್ಚಾ ವ್ಯಾರಾಚಾ ವಹಿವಾಟಾಕ್ ಹಾತ್ ಘಾಲೊ.
ಆಂಬ್ಯಾಚಾ ವಹಿವಾಟಾಂತ್, ಆಂಬ್ಯಾಚಿ ರೂಚ್, ಆಂಬ್ಯಾಚಿ ಸೊಭಾಯ್, ಆನಿ ತ್ಯಾ ಆಂಬ್ಯಾಂಕ್ ದಾಡುನ್ ದಿಂವ್ಚೆಂ ಪ್ಯಾಕಿಂಗ್, ಚಡ್ ಮಹತ್ವಾಚೊ ಪಾತ್ರ್ ಘೆತಾ ತೆಂ ಸಮ್ಜೊನ್ ಹ್ಯಾ ತೀನ್ಯ್ ವಿಶಯಾಂತ್ ಚಡ್ಚ್ ಜವಾಬ್ದಾರಿ ಆಪ್ಣಾವ್ನ್, ಸುಲೇಮಾನಾನ್ ಆಂಬ್ಯಾಂಚಾ ವಹಿವಾಟಾಂತ್ ಆಪ್ಣಾಚೆಂ ನಾಂವ್ ಲಿಖ್ಲೆಂ.
ಆಂಬ್ಯಾಚಾ ವಹಿವಾಟಾಂತ್ ಮುನಾಪೊ ಬರೋ ಆಸ್ಲ್ಲೊ. ಪುಣ್ ಎಕೇಕ್ ಪಾವ್ಟಿಂ ಪೃಕೃತೆಚಾ ನಿಯಾಮಾಂಕ್ ಲಾಗೊನ್, ವಾತಾವರಣಾಂತ್ ಜಾಂವ್ಚಾ ಬದ್ಲಾವಣೆ ವರ್ವಿಂ ಆಂಬ್ಯಾಚಾ ಕೃಷಿಂತ್ ಲುಕ್ಸಾಣ್ಯ್ ಆಸ್ಲ್ಲೆಂ. ಪುಣ್, ಎಕಾ ವರ್ಸಾಚಾ ಲುಕ್ಸಾಣೆಕ್, ದುಸ್ರೆಂ ಯಾ ತಿಸ್ರೆಂ ವರಸ್ ಭರುನ್ ದಿತಾಲೆಂ. ಹ್ಯಾ ದುಸ್ರ್ಯಾ ಆನಿ ತಿಸ್ರ್ಯಾ ವರ್ಸಾ ಪಾಸೊನ್ ಸುಲೇಮಾನ್ ರಾಕೊಣ್ ಬಸಾನಾತ್ಲ್ಲೊ. ಹ್ಯಾ ವಾಟೆನ್ ಜಾಲ್ಲ್ಯಾ ಲುಕ್ಸಾಣೆಕ್ ತೊ ರಾಂದ್ವಯ್ತ್ ಯಾ ದಾಸ್ತಾನ್ ಕರುನ್ ದವರ್ಲೆಲ್ಯಾ ತಾಂದ್ಳಾಕ್ ಮೋಲ್ ಚಡ್ತಾನಾ, ತೊ ತಾಂದುಳ್ ಭಾಯ್ರ್ ಕಾಡುನ್ ಫಾಯ್ದೊ ಜೊಡ್ತಾಲೊ.
ಹ್ಯಾ ಮಧೆಂ ಸುಲೇಮಾನಾನ್ ಸುಂಕ್ಟಾಂಚಾ ವ್ಯಾರಾಂತ್ ಆಸ್ಚೊ ಮುನಾಪೊ ಪಳವ್ನ್, ಸುಂಕ್ಟಾಂ ಪೊಸ್ಚಾ ಆನಿ ತಿಂ ಭಾಯ್ಲ್ಯಾ ಗಾಂವಾಕ್ ದಾಡುನ್ ದಿಂವ್ಚಾ ವಹಿವಾಟಾಂತ್, ಆಪ್ಣೆಂ ಯೆದೊಳ್ ಜೊಡ್ಲ್ಲೊ ಸಗ್ಳೊ ಮುನಾಪೊ ಆಡವ್ ದವರ್ಲೊ. ಬಿಜ್ನೆಸ್ ಮ್ಹಳ್ಯಾ ಉಪ್ರಾಂತ್ ಸಗ್ಳ್ಯಾಂತ್ಯ್ ರಿಸ್ಕ್ ಆಸಾಚ್. ತಶೆಂಚ್ ಸುಂಕ್ಟಾ ಪೊಸ್ಚಾಂತ್ಯ್.ಸುಂಕ್ಟಾಂ ವಾಡಂವ್ಕ್ ಸೊಡ್ತಾನಾ ಸುಂಕ್ಟಾಂಚಾ ಆಕಾರಾಚೆರ್ ಚಡ್ ಧ್ಯಾನ್ ದೀಂವ್ಕ್ ಪಡ್ತಾ. ಲ್ಹಾನ್ ಸುಂಕ್ಟಾಂಕ್ ಭಾಯ್ಲ್ಯಾ ಮಾರ್ಕೆಟಿಂತ್ ಖಾಯ್ಸ್ ಉಣೆಂ. ಸುಂಕ್ಟಾಂ ವ್ಹಡ್ ಜಾಲ್ಯಾ ತಿತ್ಲೆಂ ಆನಿ ಪುಗ್ಲ್ಲ್ಯಾ ತಿತ್ಲೆಂ ಮೋಲ್ ಆನಿ ಖಾಯ್ಸ್ ಚಡ್. ಆಶೆಂ ಆಸ್ತಾನಾ ಎಕೇಕ್ ಪಾವ್ಟಿಂ ಪಾವ್ಸಾಂತ್ ಉದ್ಕಾಚಾ ಭಿಯಾನ್ ಪಯ್ಲೆಂಚ್ ಸುಂಕ್ಟಾಂಕ್ ಮಾರ್ಕೆಟಿಕ್ ದಾಡುಂಕ್ ಪಡ್ತಾ. ಕಿತ್ಲೆಶಾ ಪಾವ್ಟಿಂ ವ್ಹಾಳೊನ್ ಆಯಿಲ್ಲೆಂ ದರ್ಯಾ ಉದಾಕ್ ಸುಂಕ್ಟಾಂ ಪೊಸ್ಚಾ ತಳ್ಯಾಂಕ್ ಆನಿ ದರ್ಯಾಕ್ ಏಕ್ ಕರ್ತಾನಾ, ವ್ಹಡಾ ಮಾಫಾನ್ ಲುಕ್ಸಾಣ್ ಜಾಲ್ಲೆಂಯ್ ಆಸ್ತಾ. ಪುಣ್, ಬರ್ಯಾ ಗಾತ್ರಾಚಾ ಸುಂಕ್ಟಾಂಕ್, ಭಾಯ್ಲ್ಯಾ ಗಾಂವಾಚಾ ಮಾರ್ಕೆಟಿಂತ್ ಮೆಳ್ಚೊ ಮುನಾಫೊ ಮಾತ್ರ್ ಚಡ್ಚ್ ಆಸ್ಲ್ಲ್ಯಾ ವರ್ವಿಂ ಸುಲೇಮಾನಾಚೆಂ ಬಿಜ್ನೆಸ್ ಬರೆಂ ವಾಡ್ಲೆಂ.
ಹ್ಯಾಚ್ ಬಿಜ್ನೆಸಾಚಾ ವಾತಾವರಣಾಂತ್ ವಾಡ್ಲ್ಲೊ ನಾಸಿರ್, ಬಾಪಾಯ್ಚಾ ಪಯ್ಶಾಂ ಥಾವ್ನ್ ಬರೆಂ ಶಿಕಾಪ್ ಜೊಡುಂಕ್ ಪಾವ್ಲೊ. ವ್ಯಾರ್ ವಹಿವಾಟಾಚಾ ವಿಶಿಂ ತೊ ಬಾಪಯ್ ಸಂಗಿಂ ಮೆತೆರ್ ಜಾಲ್ಲ್ಯಾನ್, ತಾಕಾ ಬರಿ ಮಾಹೆತ್ಯ್ ಆಸ್ಲ್ಲಿ. ವಹಿವಾಟಾಚಾ ಮಾಹೆತೆಕ್ ಆಪ್ಣಾಯಿಲ್ಲೊ ಮನಿಸ್, ಜಿವಿತಾಚಾ ಹರ್ಯೇಕ್ ಮೆಟಾರ್ ಮುಖಾ ಮುಖಿ ಜಾಂವ್ಚಾ ಸಂದರ್ಭಾಕ್ ವಹಿವಾಟಾಚಾ ನದ್ರೆನ್ಚ್ ಪಳೆತಾ. ನಾಸಿರ್ ಆಪ್ಲ್ಯಾ ಘರಾಚಾ ವಾತಾವರಣಾಕ್ ಲಾಗೊನ್, ಅಸೊಚ್ಚ್ ವಾಗೊನ್ ಆಯಿಲ್ಲೊ. ವಹಿವಾಟ್ ಕರ್ಚೊ ಹರ್ಯೇಕಾ ವಾಟೆನ್ ಆಪ್ಲೊ ಫಾಯ್ದೊ ಮಾತ್ರ್ ಪಳೆತಾ ಶಿವಾಯ್ ಲುಕ್ಸಾಣೆಕ್ ನ್ಹಯ್. ಬಾಪಾಯ್ನ್ ವ್ರದ್ದಿ ಕೆಲ್ಲೆಂ ಬಿಜ್ನೆಸ್ ನಾಸಿರಾನ್ ಇಂಪೋರ್ಟ್ ಎಂಡ್ ಎಕ್ಸ್ಪೋರ್ಟ್ ಮ್ಹಳ್ಳ್ಯಾ ನಾಂವಾರ್, ತಾಂಚಾ ವಹಿವಾಟಾಚೆಂ ಮಟ್ಟ್ ಹಾನಿಕ್ಯ್ ಎಕಾ ಉಂಚ್ಲ್ಯಾ ಪಾಂವ್ಡ್ಯಾರ್ ಪಾವಯ್ಲೆಂ. ಹ್ಯಾ ಕಾಮಾಂತ್ ನಾಸಿರಾಕ್ ಸುಲೇಮಾನಾ ತಿತ್ಲೆ ಕಷ್ಟ್ ಜಾಂವ್ಕ್ ನಾಂತ್. ಸುಲೇಮಾನಾನ್ ತರ್ಯ್ ಲ್ಹಾನ್ ವ್ಯಾರಾಕ್ ವ್ಹಡ್ಲೊ ಕರುಂಕ್ ಬರೀ ಮ್ಹಿನತ್ ಕಾಡ್ಲೆಲಿ. ತ್ಯಾ ಶಿವಾಯ್ ನಾಸಿರಾ ತಿತ್ಲೆಂ ಶಿಕಾಪ್ ತಾಕಾ ನಾತ್ಲೆಲೆಂ. ಫಕತ್ತ್ ಆಪ್ಲ್ಯಾ ಬುದ್ವಂತ್ಕಾಯೆನ್ ಆನಿ ಮ್ಹಿನತೆನ್ ತೊ ವಯ್ರ್ ಆಯಿಲ್ಲೊ.
ನಾಸಿರಾಕ್ ತರ್ಯ್ ಸಗ್ಳೆಂ ತಯಾರ್ ಮೆಳ್ಲ್ಲೆಂ. ವಹಿವಾಟಾಚಾ ಸಂಸಾರಾಂತ್ ಲ್ಹಾನ್ಶೆಂ ತರ್ಯ್ ತಾಚ್ಯಾ ಬಾಪಾಯ್ನ್ ತಾಚೆಂ ನಾಂವ್ ದಾಖಲ್ ಕೆಲ್ಲೆಂ. ದಾಖಲ್ ಕೆಲ್ಲ್ಯಾ ನಾಂವಾಕ್ ವಯ್ರ್ ಕಾಡ್ಚೆಂ, ನಾಂವ್ ದಾಖಲ್ ಕರ್ಚಾ ತಿತ್ಲೆಂ ಕಷ್ಟಾಂಚೆಂ ನ್ಹಯ್. ನಾಸಿರಾಚಾ ಶಿಕ್ಪಾಕ್ ಪಯ್ಶಾಂಚೆಂ ಉಣೆಪಣ್ ನಾತ್ಲ್ಲೆಂ. ಬಿಜ್ನೆಸ್ ಮ್ಯಾನೆಜ್ಮೆಂಟಾಂತ್ ನಾಸಿರಾನ್ ಸನದ್ ಪದ್ವಿ ಜೊಡ್ತಾನಾ, ನಾಸಿರಾಚ್ಯಾಕ್ಯ್ ಸುಲೇಮಾನ್ ಚಡ್ ಖುಶ್ ಜಾಲ್ಲೊ. ಆಪ್ಣೆಂ ಬಾಂದ್ಲೆಲೆಂ ವಹಿವಾಟಾಚೆಂ ಸಾಮ್ರಾಜ್ಯ್ ಆಪ್ಲೊ ಪೂತ್ ವಾಡಯ್ತಲೊ ಮ್ಹಳ್ಳೊ ಭರ್ವಸೊ ತಾಕಾ ಆಸ್ಲ್ಲೊ. ತಶೆಂಚ್ ಪುತಾಚಾ ಜಿವಿತಾ ವಾಟೆರ್ ಏಕ್ ಬರ್ಯಾ ಚಲಿಯೆಕ್ ತಾಚೆಂ ಕುಟಾಮ್ ಬಾಂದುಂಕ್, ನಿಖಾ ಕರುನ್ ಹಾಡುಂಕ್ ಜಾಯ್ ಮ್ಹಳ್ಳೆಂ ಆಪ್ಲೆಂ ಕರ್ತವ್ಯ್ ತೊ ವಳ್ಕಾಲ್ಲೊ.
ಪುತಾಕ್ ಸಂಭಂದ್ ಜೊಡ್ಚಾ ಖಾತಿರ್ ತಾಣೆಂ ಶಬೀರ್ ಅಹ್ಮದಾಚಾ ಧುವೆಕ್ ವಿಂಚ್ಲೆಂ. ಶಬೀರ್ ಅಹ್ಮದ್ ಕಾಂಯ್ ಸುಲೇಮಾನಾಕ್ ಪರ್ಕಿ ನ್ಹಯ್. ಸುಲೇಮಾನಾಚಾ ಕುಟ್ಮಾಕ್ ಆನಿ ಶಬೀರಾಚಾ ಕುಟ್ಮಾಕ್ ಪಯ್ಲೊಚ್ ಸಂಭಂಧ್ ಆಸ್ಲ್ಲೊ. ಸುಲೇಮಾನಾಚಿ ಬಾಯ್ಲ್, ಶಬೀರಚಾ ಬಾಯ್ಲೆಚಾ ಸಾರಾಚಾ ಆಕಯ್ಚಾ ಘೊವಾಚೆಂ ಭಯ್ಣ್.
ಶಬೀರ್ ನಾಗ್ಪುರ್ ಸೊಡುನ್ ಮುಂಬಯಿ ಯೆತಾನಾ, ಮುಂಬಯಿಂತ್ ತಾಕಾ ಸ್ವಾಗತ್ ಕರುಂಕ್ ಆಸ್ಲ್ಲೆಂ ಮ್ಹಳ್ಯಾರ್ ಹೆಂಚ್ ಏಕ್ ಕುಟಾಮ್. ಸಾರಾಚಿ ಆಕಯ್ ನಾಗ್ಪುರ್ ಆಸ್ಲ್ಲಿ. ಶಬೀರ್ ಮುಂಬಯಿ ಯೇವ್ನ್ ಆಪ್ಲ್ಯಾ ಶಿಕ್ಪಾಚಾ ಭಳಾನ್ ಬರ್ಯಾ ಕಂಪೆನಿಂತ್ ಕಾಮಾರ್ ಪಡ್ಲ್ಲೊ. ಮುಂಬಯಿಂತ್ ದೊನ್ಯ್ ಕುಟ್ಮಾಂ ಮಧೆಂ ಬರೊ ಸಂಭಂಧ್ ಉರ್ಲೊ.
ಆಲಿಯಾ, ಶಬೀರಾಚಾ ಧುವೆಕ್ ಆಪ್ಲಿ ಸುನ್ ಕರುನ್ ಆಪ್ಲ್ಯಾ ಘರಾ ಹಾಡ್ಚೊ ಆಭಿಪ್ರಾಯ್ ಸುಲೇಮಾನಾಚೊಚ್. ಚಡ್ ಕಾಂಯ್ ಉಲಯ್ನಾಸ್ತಾನಾ ಆಪ್ಲೆಸ್ತಾಕಿಂ ಆಪ್ಲ್ಯಾ ಕಾಮಾಂತ್ ಮೆತೆರ್ ಜಾವ್ನ್ ಆಸ್ಚಾ ಆಲಿಯಾ ಥಂಯ್ ಸುಲೇಮಾನಾನ್ ಏಕ್ ಆಕರ್ಷಣ್ ದೆಖ್ಲೆಂ.
ತ್ಯಾ ಎಕಾ ಬಕ್ರೀದಾಚಾ ದಿಸಾ, ಶಬೀರಾಚಾ ಘರಾ ಸಾಂಜೆರ್ ಆಸಾ ಕೆಲ್ಲ್ಯಾ ಜೆವ್ಣಾರ್, ಸುಲೇಮಾನಾನ್ ಆಪ್ಲ್ಯಾ ಮತಿಂತ್ಲೊ ನಿರ್ಧಾರ್ ಶಬೀರಾಚಾ ಮುಕಾರ್ ದವರ್ಲೊ. ನಾಸಿರಾಚೊ ಕಸಲೊಯ್ ಆಕ್ಷೇಪ್ ಆತ್ಲ್ಲೊ. ಆಪ್ಲ್ಯಾ ಬಾಪಾಯ್ನ್ ಸಾಂಗ್ಚ್ಯಾ ಕಸಲ್ಯಾಯ್ ಕಾಮಾಕ್ ತೊ ನಾ ಮ್ಹಣೊನ್ ಸಾಂಗಾನಾತ್ಲ್ಲೊ. ತಶೆಂಚ್ ಆಪ್ಲ್ಯಾ ಬಾಪಾಯ್ನ್ ಆಪ್ಲ್ಯಾ ನಿಖಾ ವಿಶಿಂ ಚಿಂತುನ್, ತಾಚ್ಯೆ ಖಾತಿರ್ ಆಲಿಯಾಕ್ ತಾಣೆಂ ವಿಂಚ್ತಾನಾ, ನಾಸಿರಾನ್ ಕಾಂಯ್ ಆಕ್ಷೇಪ್ ಕಾಡ್ಲೊ ನಾ. ತಶೆಂ ಆಲಿಯಾಕ್ಯ್ ಆಕ್ಷೇಪ್ ಕಾಡುಂಕ್ ಕಾಂಯ್ಚ್ ಕಾರಾಣ್ ನಾತ್ಲ್ಲೆಂ. ಹ್ಯಾ ವಿಶಯಾಂತ್ ಚಡ್ ಕಾಂಯ್ ಉಮೆದ್ ದೊನೀ ಕುಟ್ಮಾನಿಂ ದಾಖಯಿಲ್ಲಿ ನಾ. ಕಿತ್ಯಾಕ್ ಮ್ಹಳ್ಯಾರ್ ಪಯ್ಲೆಂಚ್ ಹಿಂ ದೊನೀ ಕುಟ್ಮಾಂ ಭೋವ್ ಲಾಗಿಂ ಆಸ್ಲ್ಲಿಂ. ಆತಾಂ ತಾಂಚೆ ಮಧೆಂ ಸಂಭಂಧಾಚೆಂನವೆಂರೂಪ್ ಉಬ್ಜೊಂಕ್ ಆಸ್ಲ್ಲೆಂ ಶಿವಾಯ್ ಸಂಭಂಧ್ ಪಯ್ಲೊಚ್ ಆಸ್ಲ್ಲೊ. ತಶೆಂ ಜಾಲ್ಲ್ಯಾನ್ ಹೊ ವಿಶಯ್ ದೊನೀ ಕುಟ್ಮಾಂಕ್ ಚಡ್ ಕಾಂಯ್ ಮಹತ್ವಾಚೊ ಜಾಲೊ ನಾ.
ನಾಸಿರಾಚೆಂ ಶಿಕಾಪ್ ಜಾವ್ನ್ ತೊ ಆತಾಂ ಬಾಪಾಯ್ಚಾ ವಹಿವಾಟಾಂತ್ ಮೆತೆರ್ ಜಾಲಾ ಆಸ್ತಾಂ ಥೊಡ್ಯಾ ವರ್ಸಾಂ ಆದಿಂ ಶಬೀರಾನ್ ಆನಿ ಸುಲೇಮಾನಾನ್
ದಿಲ್ಲ್ಯಾ ಒಪ್ಪಿಗೆಕ್ ನೀಜ್ ಕರುಂಕ್ ಸುಲೇಮಾನಾನ್ ಚಿಂತ್ಲೆಂ.
ಹ್ಯಾಚ್ ವಿಶಯಾ ವಿಶ್ಯಾಂತ್ ತೊ ಶಬೀರಾಲಾಗಿಂ ಉಲಯ್ತಾನಾ ಶಬೀರಾನ್ ಕಾಂಯ್ ನಾಕಾ ಮ್ಹಣೊನ್ ಸಾಂಗ್ಲೆಂ ನಾ. ಪುಣ್ ಆಪ್ಲ್ಯಾ ಧುವೆಚೆ ಗೂಣ್ ಸುಲೆಮಾನ್ ಜಾಣಾಂ ಆಸ್ಚಾ ಪ್ರಾಸ್ ಚಡ್ ಶಬೀರ್ ಜಾಣಾಂ. ಹ್ಯಾಚ್ ಖಾತಿರ್ ತೊ ಧುವೆ ಕಡೆನ್ ಹ್ಯಾ ವಿಶಿಂ ಉಲಂವ್ಕ್ ಚಿಂತಾಲೊ. ತ್ಯಾ ಶಿವಾಯ್ ಸಮೀರ್ ಮ್ಹಳ್ಳೊ ಕೋಣ್ ಆಲಿಯಾ ಸಾಂಗಾತಾ ಬರ್ಯಾನ್ ಆಸಾ ಮ್ಹಣೊನ್ ತೊ ಆಲಿಯಾಕ್ ತಾಣೆಂ ಕರ್ಚ್ಯಾ ಪೊನಾಂ ಥಾವ್ನ್ ಜಾಣಾಂ ಜಾಲ್ಲೊ.
"ಹಾವೆಂ ಭಾಸ್ ದಿಲ್ಯಾ ಜಾಂವ್ಕ್ ಪುರೊ..... ಪುಣ್ ಮ್ಹಜ್ಯಾ ಜಿಬೆ ಉತ್ರಾಕ್ ಲಾಗೊನ್ ತುಜೆಂ ಜೀವನ್ ಪಿಡ್ಡ್ಯಾರ್ ಜಾಂವ್ಕ್ ನುಜೊ ಬೇಟಾ. ತಶೆಂಯ್ ಆತಾಂ ತೊ ಆದ್ಲೊ ಕಾಳ್ ಖಂಯ್ ಉರ್ಲಾ? ......ಖಂಯ್ ಮನಾಂ ಎಕ್ವಟ್ಲಿಂ ಥಂಯ್ಚ್ ಕಾಳ್ಜಾಂ ಎಕ್ವಟ್ತಾತ್. ನಾ ಜಾಲ್ಯಾರ್ ಹ್ಯಾ ಶ್ಹೆರಾಂನಿ ಜೀವನ್ ಕಾಡ್ಚೆಂ ಆತಾಂ ಪಯ್ಲೆಂಚಾ ತಿತ್ಲ್ಯಾ ಸುಲಾಭಾಯೆಚೆಂ ನ್ಹಯ್!"
ಶಬೀರಾನ್ ಆಪ್ಲ್ಯಾ ಧುವೆಚಾ ಇರಾದ್ಯಾ ವಯ್ರ್ಚ್ ಆಪ್ಲಿ ಕಬ್ಲಾತ್ ದೀಂವ್ಕ್ ಯೆವ್ಜಿಲ್ಲೆಂ. ಆಲಿಯಾ ಜಾಲ್ಯಾರ್ಯ್, ಆಪ್ಲೊ ಬಾಪಯ್ ಆಪ್ಲ್ಯಾ ಖುಶೆಕ್ ಕೆದ್ನಾಂಚ್ ಆಡ್ ವಚಾಚೊ ನಾ ಮ್ಹಳ್ಳೆಂ ಖಚಿತ್ ರಿತಿನ್ ಜಾಣಾಂ ಆಸ್ಲ್ಲೆಂ.
ನಾಸಿರಾ ಸಾಂಗಾತಾ ನಿಖಾ ಜಾಂವ್ಚಾಂತ್ ಆಲಿಯಾಕ್ ಕಾಂಯ್ಚ್ ಆಡ್ಕಳ್ ನಾತ್ಲ್ಲಿ. ದೆಕುನ್ಚ್ ವರ್ಸಾಂ ಪಯ್ಲೆಂ ಸುಲೇಮಾನಾಚಾ ಆನಿ ಆಪ್ಲ್ಯಾ ಕುಟ್ಮಾಚಾ ಮಧೆಂ ಜಾಲ್ಲ್ಯಾ ನಿರ್ಧಾರಾಕ್ ಆಲಿಯಾನ್ ಕೆದ್ನಾಂಚ್ ಏಕ್ ವಿಶಯ್ ಜಾವ್ನ್ ಉಲವ್ಣ್ಯಾಕ್ ದವರ್ಲೆಲೆಂ ನಾ.
ಆಯ್ಚಾ ಹ್ಯಾ ವೆಳಾರ್ ಜಾಲ್ಯಾರ್ಯ್ ಆಲಿಯಾಕ್ ನಾಸಿರಾ ಸವೆಂ ನಿಖಾ ಜಾಂವ್ಚಾಂತ್ ಕಾಂಯ್ಚ್ ಆಕ್ಷೇಪ್ ನಾತ್ಲಲೊ. ಪುಣ್ ತಾಚ್ಯಾ ಮತಿಂತ್ ಆಪುಣ್ ಫಕತ್ತ್ ಏಕ್ ಘರ್ಚಿ ಬಾಯ್ಲ್ ಜಾವ್ನ್ ಉರ್ಚೆಂ ಕಿತ್ಯಾಕ್ಗೀ ತಾಕಾಚ್ ಪಸಂದ್ ನಾತ್ಲೆಲೆಂ ವಾರೆಂ ವ್ಹಾಳೊನ್ ವೆಚಾ ಪರಿಂ ಜಾತಾಲೆಂ.
ಎದೊಳ್ ಪಾಸೊನ್ ಆಲಿಯಾಕ್, ಕೆದ್ನಾಂಚ್ ಆಪುಣ್ ಜಿವಿತಾಂತ್ ಚುಕ್ಲ್ಯಾಂ ವಾ ಸಲ್ವಾಲ್ಯಾ ಮ್ಹಳ್ಳೊ ಆನ್ಭೋಗ್ ಜಾಂವ್ಕ್ ನಾತ್ಲ್ಲೊ. ಹ್ಯಾ ವರೇಗ್ ತೆಂ ಆಪ್ಲೆಂ ಜಿವಿತ್ ಆಪ್ಲ್ಯಾಚ್ ಖುಶೆ ಪರ್ಮಾಣೆಂ ಜಿಯೆಲಾಂ. ಜಿವಿತಾಚಾ ವಾಟೆರ್ ಲ್ಹಾನ್ಪಣಾರ್ ಥಾವ್ನ್ ತಾಣೆಂ ಆಪ್ಣಾ ಖಾತಿರ್ ಕಿತೆಂ ನಿರ್ಧಾರ್ ಕೆಲಾ ತೊ ಸಗ್ಳೊ ಆಪ್ಲ್ಯಾ ಆಶೆ ಪರ್ಮಾಣೆಂ ಕೆಲಾ. ಕೊಣಾಚಾಚ್ ಮುಕಾರ್ ತಕ್ಲಿ ಬಾಗಾಂವ್ಚೆಂ ಜಾಂವ್ ಯಾ ಚಲಿ ಮ್ಹಳ್ಯಾರ್ ಚಲ್ಯಾ ಪ್ರಾಸ್ ಲ್ಹಾನ್ ಮ್ಹಣೊನ್ ದಾಖಂವ್ಕ್ ಕೆದ್ನಾಂಚ್ ತೆಂ ತಯಾರ್ ನಾತ್ಲ್ಲೆಂ. ಸಲ್ವಣೆಕ್ ಆಲಿಯಾನ್ ಹ್ಯಾ ವರೇಗ್ ಮಾಂದುನ್ ಘೆಂವ್ಕ್ ನಾ.
ಪುಣ್ ಆತಾಂ.....?
ಆತಾಂ ಆಪ್ಲ್ಯಾ ಬಾಪಾಯ್ನ್ ಆಪ್ಲ್ಯಾ ಮುಕಾರ್ ಆಪ್ಲ್ಯಾ ಜಿವಿತಾಚಾ ಮಹತ್ವಾಚಾ ಘಡಿಯೆಕ್ ಮುಕಾರ್ ಹಾಡ್ತಾನಾ, ಕಾಂಯ್ ಆಪ್ಣೆಂ ದರ್ಲೆಲಿ ವಾಟ್ ಚುಕ್ಲ್ಯಾಗಾಯ್? ಕಾಂಯ್ ಆಪ್ಲಿಂ ಚಿಂತ್ನಾ ಆಪ್ಣಾಕ್ಚ್ ದೆಸ್ವಾಟೆಚಾ ದರ್ಯಾಂತ್ ಶೆವ್ಟಾಯ್ತಾತ್ಗಾಯ್? ಮ್ಹಳ್ಳೆಂ ಚಿಂತಾಪ್ ಆಲಿಯಾಚಾ ದೊಳ್ಯಾಂ ಮುಕಾರ್ ಉಟೊನ್ ದಿಸ್ತಾಲೆಂ ತರ್ಯ್ " ನಾ. ಆಪುಣ್ ಸಲ್ವೊಂಕ್ ನಾ. ಆಪುಣ್ ಕೆದಿಂಚ್ ಸಲ್ವೊಂಚಿಂ ನಾ!" ಆಪ್ಲ್ಯಾ ಕಾಳ್ಜಾಕ್ ಆಪುಣ್ಚ್ ತೆಂ ಧಯ್ರ್ ದಿತಾಲೆಂ.
ಆಪ್ಲ್ಯಾ ಕಾಳ್ಜಾಕ್ ಆಪುಣ್ಚ್ ದಯ್ರ್ ದಿಲ್ಲೊ ಯಾ ದಯ್ರ್ ದಿಲ್ಲೆಂ ಕೆದ್ನಾಂಚ್ ತಾಚ್ಯಾ ಜಿವಿತಾ ವಾಟೆರ್ ಸಲ್ವಾನಾ. ಆಪ್ಣಾಕ್ಚ್ ಆಪ್ಣೆಂ ದಿಂವ್ಚೆಂ ತೆಂ ದಯ್ರ್ ಹಜಾರ್ ಮನ್ಶ್ಯಾಂನಿಂ ತುಕಾ ವೆಡೊ ಮಾರುನ್ ದಿಂವ್ಚಾ ದಯ್ರಾ ಪ್ರಾಸ್ ಚಡ್ ಸಕ್ತೆವಂತ್.
***************
ಪ್ರಿನ್ಸೆಸ್ ಬ್ಯೂಟಿಪಾರ್ಲರ್!
ವೊರಾಂ ಸಾಂಜೆಚಿಂ ಭರ್ತಿ ಸಾಡೆ ಚ್ಯಾರ್ ಜಾತಾನಾ ಆಲಿಯಾನ್ ಬ್ಯೂಟಿಪಾರ್ಲಾರಾಚಾ ಭಿತರ್ ಆಪ್ಲೆ ಪಾಂಯ್ ದವರ್ಲೆ.
ಸಾದಾರ್ನ್ ರೋಯಲ್ ಸೆಲೂನ್ ತೆಂ.
ಸೆಲೂನಾ ಭಿತರ್ ಪಾಂಯ್ ದವರ್ಲೆಲ್ಯಾ ತಾಕಾ, ಮುಕ್ಲ್ಯಾ ತ್ಯಾ ದಾಕ್ಟ್ಯಾ ಪಾರ್ಲರಾಂತ್ ನವನೀತಾ ಖಂಯ್ಚರ್ಯ್ ಜಳ್ಕಾಲೆಂ ನಾ. ಭೋವ್ಶ್ಯಾ ತೆಂ ಸೆಲೂನಾ ಭಿತರ್ಲ್ಯಾ ರುಮಾಂತ್ ಆಪ್ಲ್ಯಾ ಕಾಮಾರ್ ಮೆತೆರ್ ಆಸ್ತೆಲೆಂ ಮ್ಹಣೊನ್ ಚಿಂತ್ಲೆಲ್ಯಾ ಆಲಿಯಾನ್, ಪಾರ್ಲರಾಂತ್ ಸೊಭಿತ್ ಮಾಂಡುನ್ ದವರ್ಲೆಲ್ಯಾ ಸೊಫಾ ತೆಂವ್ಶಿಂ ಮೆಟಾಂ ಕಾಡ್ಲಿಂ.
ಸೆಲೂನಾಕ್ ಭಿತರ್ ಸರ್ತಾತ್ ಥಂಯ್ಚರ್, ದಾವ್ಯಾ ಕುಶಿಚಾ ವೊಣೊದಿಕ್ ತೆಂಕುನ್ ಆಸ್ಲ್ಲೆಂ ಏಕ್ ಗ್ಲಾಸ್ ಟೇಬಲ್. ತ್ಯಾ ಗ್ಲಾಸ್ ಟೇಬಲಾಕ್ ತೆಂಕೊನ್ ದವರ್ಲೆಲ್ಯಾ ಕುಶನ್ ಚೇರಾರ್, ಬ್ಯೂಟಿಪಾರ್ಲರಾಚಿ ಮಾಲ್ಕಿಣ್, ಫಾರ್ಸಿ ಬಾಯ್ಲ್ ಬಸೊನ್ ಆಸ್ಲೆಲಿ ತಿ, ತಿಚ್ಯಾ ಮುಕ್ಲ್ಯಾ ಮೆಜಾ ವಯ್ರ್ ದವರ್ಲೆಲ್ಯಾ ಮ್ಯಾಗಜೀನಾಕ್ ಆಪ್ಲ್ಯಾ ಹಾತಾಂನಿ ಪರ್ತಿತಾಲಿ. ಸೆಲೂನಾ ಭಿತರ್ ಪಾಂಯ್ ದವರ್ಲೆಲ್ಯಾ ಆಲಿಯಾಕ್, ಆಪ್ಲಿ ತಕ್ಲಿ ಉಕ್ಲುನ್ ಪಳೆಲ್ಲ್ಯಾ ತಿಣೆಂ, ದೊಳ್ಯಾಂಕ್ ದವರ್ಲೆಲೆಂ ಆಪ್ಲೆಂ ವೋಕ್ಲ್ ಕಾಡಿನಾಸ್ತಾನಾ, ತ್ಯಾ ವೊಕ್ಲಾ ಸವೆಂಚ್ ಆಸ್ಡ್ಯಾಂಚಾ ಆಧಾರಾನ್, ದೊಳೆ ಸಕ್ಲಾ ಕರುನ್ ಪಳೆಲ್ಲಿ ತಿ ಆಲಿಯಾಕ್ ಪಳವ್ನ್, ಆಪ್ಲ್ಯಾ ಮಿರಿಯೊ ಪಡ್ಲೆಲ್ಯಾ ಸಾದರ್ನ್ ಜೂನ್ ಜಾಲ್ಲ್ಯಾ ಕಾತಿಕ್ ಚಿಂವ್ಳಾವ್ನ್ ಮ್ಹಳ್ಳ್ಯಾ ಪರಿಂ ತಾಂಬ್ಡ್ಯಾ ಲಿಪ್ಸ್ಟಿಕಾನ್ ತಾಂಬ್ಡೆ ಕೆಲ್ಲ್ಯಾ ವೊಂಟಾಂಚೆರ್ ಹಾಸೊ ಪಾಟವ್ನ್, ಆಲಿಯಾಕ್ ಸೊಫಾರ್ ಬಸೊಂಕ್ ತಿಣೆಂ ಹಿಶಾರೊ ಕೆಲೊ.
ಸಂಪೂರ್ಣ್ ಕೃತಕ್ ಹಾಸೊ!
ಆಪ್ಲ್ಯಾ ಸೆಲೂನಾ ಭಿತರ್ ಆಯ್ಲೆಲ್ಯಾಂಕ್, ತಾಂಚಾ ಯೆವ್ಕಾರಾಚೆಂ ಇನಾಮ್ ಜಾವ್ನ್, ತ್ಯಾ ಪರ್ನ್ಯಾ ವೊಂಟಾರ್ ಲಾಯ್ಲೆಲ್ಯಾ ನವ್ಯಾ ತಾಜಾ ಬಣಾ ದ್ವಾರಿಂ ಹಾರ್ಧಿಕ್ ಸ್ವಾಗತ್!
ಜಶೆಂ ಕಸಾಯ್ಸಾಲಾಂತ್ ಬೊಕ್ರ್ಯಾಕ್ ಕಾತರ್ಚಾ ಪಯ್ಲೆಂ ತಾಕಾ ಖಾಂವ್ಕ್ ದಿಂವ್ಚಾ ತಾಜಾ ತಣಾ ಪರಿಂ!
ಕೃತಕ್......, ಸಗ್ಳೆಂಚ್ ಹಾಂಗಾ ಕೃತಕ್!
ತಿಚ್ಯಾ ಹಾಸ್ಯಾಂಕ್ ಪಾಟಿಂ ಹಾಸೊ ಪಾಟಯಿಲ್ಲೆಂ ಆಲಿಯಾ, ಮುಕ್ಲ್ಯಾ ಖಾಲಿಚ್ ಆಸ್ಲೆಲ್ಯಾ, ಆಪ್ಣಾಕ್ ಯೋ.... ಯೋ..... ಮ್ಹಣೊನ್ ಸ್ವಾಗತ್ ಕರ್ಚಾ ತ್ಯಾ ಮೊನ್ಯಾ ಸೊಫಾಚೆರ್ ಬಸ್ಲೆಂ.
ಜಿವಿತಾಂತ್ ಉದೆವ್ನ್ ಯೆಂವ್ಚಾ ಹರ್ಯೇಕ್ ಘಡಿಯೆಕ್ ಆಲಿಯಾ ವಾರಾವ್ನ್ ಪಳೆತಾಲೆಂ. ತಶೆಂಚ್ ಆಜ್!
"ಬಿಜ್ನೆಸ್ ಮ್ಹಳ್ಯಾರ್ ಹೆಂ ಆಲಿಯಾ!"
ತಾಚ್ಯಾ ಮನಾಂತ್ಲ್ಯಾ ಮನಾನ್ ಆಲಿಯಾಕ್ ಸಾಂಗ್ಲೆಂ.
"ಬಿಜ್ನೆಸಾಂತ್ ಕೊಣಾಲಾಗಿಂ ತುಕಾ ಸಂಭಂಧ್ ಆಸಾ ವಾ ನಾ ತೆಂ ಗರ್ಜೆಚೆಂ ನ್ಹಯ್. ಕೊಣಾ ಥಾವ್ನ್ ಕಶೆಂ ತುವೆಂ ಫಾಯ್ದೊ ಜೊಡ್ಯೆತ್ ಮ್ಹಳ್ಳೆಂ ಗರ್ಜೆಚೆಂ. ಹ್ಯಾ ಖಾತಿರ್ ತುಕಾ ಕಿತೆಂ ಸಗ್ಳೆಂ ಕರುಂಕ್ ಪಡ್ತಾ ತೆಂ ಸಗ್ಳೆಂ ತುವೆಂ ಕರುಂಕ್ ಜಾಯ್. ಜಶೆಂ ಆತ್ತಾಂ ಥೊಡ್ಯಾ ವೆಳಾ ಪಯ್ಲೆಂ ಹ್ಯಾ ಪಾರ್ಸಿ ಬಾಯ್ಲೆನ್ ತುಕಾ ಹಾಸೊ ಪಾಟಯಿಲ್ಲ್ಯಾ ಪರಿಂ. ಹ್ಯಾ ಸಂಸಾರಾಂತ್ ಸಗ್ಳೆಂ ಕೃತಕ್. ಸಗ್ಳೆಂ ಆಡಂಬರ್. ಹಾಂಗಾ ಭಾಯ್ಲ್ಯಾನ್ ಏಕ್ ಆನಿ ಭಿತರ್ಲ್ಯಾನ್ ಏಕ್. ಹೆಂ ತುಂ ಕರುಂಕ್ ಸಕ್ತಾಯ್?" ಮನಾಂತ್ಲ್ಯಾ ಮನಾಚಾ ಸವಾಲಾಕ್ ಆಲಿಯಾ ಲಾಗಿಂ ಜವಾಬ್ ನಾತ್ಲ್ಲಿ.
ತಾಣೆಂ ತಶೆಂಚ್ ಏಕ್ ಪಾವ್ಟಿಂ ತ್ಯಾ ಸೆಲೂನಾಚಾ ಮಾಲ್ಕಿಣೆಕ್ ಪಳೆಲೆಂ. ತಿ ಆತಾಂ ತಿಚ್ಯಾ ಪಯ್ಲೆಂಚಾ ಕಾಮಾರ್, ತಿಚ್ಯಾ ಮುಕ್ಲೆಂ ಮ್ಯಾಗಜೀನ್ ವಾಚ್ಚಾ ಕಾಮಾರ್ ಮೆತೆರ್ ಜಾಲ್ಲಿ. ತಿಚೆಂ ಗುಮಾನ್, ಆತಾಂ ಆಪ್ಣಾ ತೆವ್ಶಿಂ ನಾ ತೆಂ ಆಲಿಯಾಕ್ ಕಳ್ಳೆಂ.
ತಾಚ್ಯಾ ಮನಾಕ್ ತಾಣೆಂ ಜವಾಬ್ ದೀಂವ್ಕ್ ಜಾಯ್ ಆಸ್ಲ್ಲಿ.
ತಿತ್ಲ್ಯಾರ್!
ಭಿತರ್ಲೆಂ ದಾರ್ ಉಗ್ತೆಂ ಕರುನ್ ನವನೀತ ಭಾಯ್ರ್ ಆಯ್ಲೆಂ. ನವನೀತಾಕ್ ಪಳೆಲ್ಲೆಂಚ್, ಆಲಿಯಾಚೆಂ, ತಾಕಾ ಸವಾಲ್ ವಿಚಾರ್ಲೆಲೆಂ ತಾಚೆಂ ಮನ್, ತಾಕಾ ಸೊಡುನ್ ಖಂಯ್ಚರ್ಗೀ ಅನಂತಾಕ್ ಉಭೊನ್ ಗೆಲ್ಲ್ಯಾ ಪರಿಂ ಗೆಲೆಂ.
"ಹಾಯ್...!" ನವನೀತನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ.
"ಹಾಯ್ !" ಆಲಿಯಾನ್ ತಾಚ್ಯಾ ಹಾಸ್ಯಾಂಕ್ ಪಾಟಿಂ ಹಾಸೊ ಪಾಟಯ್ಲ್ಯೊ.
"ಸಾರ್ರಿ ಆಲಿಯಾ.... ಎಕ್ಲೆಂ ಕಸ್ಟಮರ್ ಲೇಟ್ ಆಯ್ಲೆಂ. ಚಡ್ ವೇಳ್ ಲಾಗ್ಚೊ ನಾ. ಫಕತ್ತ್ ಅರ್ಧೆಂ ವೋರ್....! ಬಸ್ತಾಯ್....? ವಾ ಅಶ್ವಿನಿ ಲಾಗಿಂ ಸಾಂಗೊಂ? ತುಕಾ ವೇಳ್ ಜಾತಾ ಜಾಲ್ಯಾರ್.... ತೆಂ ಫ್ರೀ ಆಸಾ!" ನವನೀತಾಚಾ ತಾಳ್ಯಾಂತ್ ತಶೆಂ ತಾಚ್ಯಾ ಹಾವಭಾವಾಂತ್ ಲ್ಹಾನ್ಪಣ್ ರೂಪ್ ರೂಪ್ ದಿಸ್ತಾಲೆಂ.
ಕೋಣ್ ಎಕ್ ಕಸ್ಟಮರ್ ಆಪ್ಣೆ ದಿಲ್ಲ್ಯಾ ವೆಳಾ ಪ್ರಾಸ್ ಚಡ್ ವೇಳ್ ಕರುನ್ ಆಯ್ಲಾಂ ಮ್ಹಳ್ಳ್ಯಾ ಖಾತಿರ್..... ತ್ಯಾ ಕಸ್ಟಮರಾಚಾ ತರ್ಫೆನ್ ನವನೀತಾ ಆಪ್ಣಾ ಮುಕಾರ್ ಲ್ಹಾನ್ ಜಾಲಾಂ! ಆಪ್ಣೆಂ ಕರಿನಾತ್ಲೆಲ್ಯಾ ಚೂಕಿಕ್ ತೆಂ ಆಪ್ಣಾಲಾಗಿಂ ವಿನತಿ ಕರ್ತಾ!
"ತುಂ ಆಶೆಂ ಕರುಂಕ್ ಸಕ್ತಾಯ್ ಆಲಿಯಾ?" ಥೊಡ್ಯಾ ವೆಳಾ ಪಯ್ಲೆಂ ಉಭೊನ್ ಗೆಲ್ಲೆಂ ಮನಾಂತ್ಲೆಂ ಮನ್ ಅಚಾನಕ್ ಉಭೊನ್ ಯೇವ್ನ್ ಆಲಿಯಾಚಾ ಖಾಂದಾರ್ ಬಸ್ಲೆಂ. ವ್ಹಳೂ ಉಲಯಿಲ್ಲ್ಯಾ ತಾಚ್ಯಾ ಉತ್ರಾಂಕ್ ಫಕತ್ತ್ ಆಲಿಯಾ ಮಾತ್ರ್ ಆಯ್ಕೊಂಕ್ ಸಕ್ತಾಲೆಂ.
"ಊಂ....ಂ..ಂ.. ವ್ಹಡ್ ನಾ ಹಾಂವ್ ವೇಯ್ಟ್ ಕರ್ತಾಂ. ಪುಣ್ ಚಡ್ ವೇಳ್ ಲಾಗ್ತಾ? ಹಿಂ ಮನ್ಶ್ಯಾಂ ಆಶಿಂ ಕಶಿಂ ಕರ್ತಾತ್ ಮ್ಹಳ್ಳೆಂ ಮ್ಹಾಕಾ ಸಮ್ಜಾನಾ. ಎನಿ ಹೌ... ಜಾತಾ ತಿತ್ಲ್ಯಾ ವೆಗ್ಗಿಂ ಟ್ರೈ ಕರುಂಕ್ ಪಳೆ!" ಆಲಿಯಾಚಾ ಉಲೊಣ್ಯಾಂತ್ ಎಕಾ ಥರಾಚೊ ತಿರಸ್ಕಾರ್ ಆಸ್ಲ್ಲೊ. ಆಪ್ಣೆ ಅಪಾಂಯ್ಟ್ಮೆಂಟ್ ಘೆತ್ಲೆಲ್ಯಾ ವೆಳಾಕ್ ದುಸ್ರ್ಯಾನ್ ಆಕ್ರಮಣ್ ಕೆಲಾಂ ಮ್ಹಳ್ಳೊ ತಿರಸ್ಕಾರ್!
ನವನೀತ, ಆಲಿಯಾಕ್ ಸಾರ್ಕೆಂ ವಳ್ಕಾತಾ. ಆಲಿಯಾಚಾ ಸ್ವಭಾವಾ ವಿಶಿಂ ತೆಂ ಜಾಣಾಂ. ತಾಚ್ಯಾ ಸ್ವಭಾವಾ ವರ್ವಿಂಚ್ ಆಲಿಯಾಕ್ ಹ್ಯಾ ಸೆಲೂನಾಂತ್ ನವನೀತಾ ಸೊಡ್ಲ್ಯಾರ್ ದುಸ್ರೆಂ ಕೊಣ್ಯ್ ಚಡ್ ಪಸಂದ್ ಕರಿನಾತ್ಲೆಲಿಂ.
"ನಾಂ.....! ಚಡ್ ವೇಳ್ ಲಾಗ್ಚೊ ನಾ. ಹಾಂವ್ ವೆಗಿಂಚ್ ಫಿನಿಶ್ ಕರ್ತಾಂ!"ಸಾಂಗೊನ್ ನವನೀತ ಭಿತರ್ ಗೆಲೆಂ.
ಆಪ್ಲ್ಯಾ ಸೊಭಿತ್ ತೊಂಡಾರ್, ಎಕಾ ಥರಾಚೊ ತಾತ್ಸಾರಾಚೊ ಛಾರೊ ಹಾಡಾವ್ನ್, ಏಕ್ ಲಾಂಬ್ ಶ್ವಾಸ್ ಸೊಡುನ್, ಆಲಿಯಾ ಆಪ್ಣೆ ಬಸ್ಲೆಲ್ಯಾ ಸೊಫಾಕ್ ವೊಣ್ಕಾಲೆಂ. ಏಕ್ ಪಾವ್ಟಿಂ ತಾಣೆಂ ಆಪ್ಲ್ಯಾ ರಿಸ್ಟ್ ವೊಚಾಚೆರ್ ನದರ್ ಮಾರ್ಲಿ. ತಾಕಾ ಸಮಾಧಾನ್ ಜಾಲೆಂ ನಾ.
"ಅರ್ಧೆಂ ವೋರ್......?" ಆಪ್ಲ್ಯಾ ಮನಾಂತ್ಚ್ ಆಲಿಯಾ ಉದ್ಗಾರ್ಲೆಂ.
"ಅರ್ಧೆಂ ವೋರ್ ಆತಾಂ ಹಾವೆಂ ಹಾಂಗಾ ಆಶೆಂಚ್ ವೊಗೆಂ ಬಸೊನ್ ಪಾಶಾರ್ ಕರುಂಕ್ ಆಸಾ...?" ಆಪ್ಣಾಕ್ಚ್ ಸಾಂಗ್ಲೆಲ್ಯಾ ತಾಚಿ ದೀಷ್ಟ್ ಪರ್ತ್ಯಾಕ್ ತ್ಯಾ ಪಾರ್ಸಿ ಬಾಯ್ಲೆ ವಯ್ರ್ ಗೆಲಿ. ಆಲಿಯಾಚಾ ವಿಶಿಂ ತಿಕಾ ಕಾಂಯ್ ಪಡೊನ್ ವಚೊಂಕ್ ನಾ ಮ್ಹಳ್ಳ್ಯಾ ಪರಿಂ ತಿ ಆಪ್ಲ್ಯಾ ಹಾತಾಂತ್ಲ್ಯಾ ಮ್ಯಾಗಜೀನಾಕ್ ವಾಚ್ಚಾ ಕಾಮಾರ್ಚ್ ಗಂಭೀರಾಯೆನ್ ಮೆತೆರ್ ಜಾಲ್ಲಿ. ತಿಚೆ ವಯ್ಲಿ ನದರ್ ಕಾಡುನ್, ಆಲಿಯಾನ್, ಆಪ್ಣೆಂ ಬಸ್ಲೆಲ್ಯಾ ಸೊಫಾಚಾ ಮುಕ್ಲ್ಯಾ ಟೀಪಾಯ್ಚೆರ್ ಮಾಂಡುನ್ ದವರ್ಲೆಲ್ಯಾ ಮ್ಯಾಗಜೀನಾ ವಯ್ರ್ ತಿ ಧಾಂವ್ಡಾಯ್ಲಿ. ತಾಚೆ ಸವೆಂ ಎಕೇಕ್ಚ್ಚ್ ಮ್ಯಾಗಜೀನಾಕ್ ತೆಂ ಪರ್ತುಂಕ್ ಲಾಗ್ಲೆಂ.
ಟಾಯ್ಮ್ಸ್, ಇಂಡಿಯಾ ಟುಡೇ, ವುಮೆನ್ಸ್ ಇರಾ, ಸಿನಿಬ್ಲಿಟ್ಜ್, ಸ್ಟಾರ್ ಡಸ್ಟ್, ರೀಡರ್ಸ್ ಡೈಜೆಸ್ಟ್ ಸವೆಂ ನ್ಯಾಶನಲ್ ಜಿಯೋಗ್ರಾಫಿಕ್, ಮ್ಯಾಗಜೀನ್ ಪಾಸೊನ್ ತ್ಯಾ ಟೀಪಾಯಿಚೆರ್ ಆಸ್ಲೆಲೆಂ.
ಆಪ್ಲ್ಯಾ ಹಾತಾಂತ್ಲ್ಯಾ ಮೊಬಾಯ್ಲ್ ಟೆಲಿಫೊನಾಕ್ ಆನಿ ಹಾತಾಂತ್ಲ್ಯಾ ಪರ್ಸಾಕ್ ಆಪ್ಲ್ಯಾ ಉಸ್ಕ್ಯಾರ್ ದವರುನ್ ಆಲಿಯಾನ್ ಇಂಡಿಯಾ ಟುಡೇಮ್ಯಾಗಜೀನ್ ಹಾತಿಂ ಘೆತ್ಲೆಂ.
ಮ್ಯಾಗಜೀನ್ ವಾಚ್ಚಾ ತಿತ್ಲೆಂ ಸೈರಣ್ ಆಲಿಯಾಕ್ ನಾತ್ಲೆಲೆಂ. ತಾಕಾ ಬೆಷ್ಟೊ ವೇಳ್ ಕಾಡುಂಕ್ ಜಾಯ್ ಆಸ್ಲ್ಲೊ. ತ್ಯಾ ಪಾಸೊನ್ ತೆಂ ಮ್ಯಾಗಜೀನಾಚಿಂ ಪಾನಾಂ ವಯ್ರ್ ಪಾನಾಂ ಪರ್ತುಂಕ್ ಲಾಗ್ಲೆಂ.
ವಯ್ಲ್ಯಾಭಾರ್ ಮ್ಯಾಗಜೀನ್ ಪರ್ತುನ್ ಜಾವ್ನ್, ಆಲಿಯಾನ್, ಏಕ್ ಪಾವ್ಟಿಂ ಮುಕ್ಲ್ಯಾ ನವನೀತ ಭಿತರ್ ವಚೊನ್ ದಾಂಪ್ಲೆಲ್ಯಾ ದಾರಾಕ್ ಪಳವ್ನ್, ಹಾತಾಂತ್ಲೆಂ ಮ್ಯಾಗಜೀನ್ ಮುಕ್ಲ್ಯಾ ಟೇಬಲಾರ್ ಉಡಯ್ಲೆಂ.
ಆತಾಂ ತಾಚಿ ದೀಷ್ಟ್ ತ್ಯಾ ’ಸ್ಟಾರ್ ಡಸ್ಟ್’ ಮ್ಯಾಗಜೀನಾಚೆರ್ ಪಡ್ಲಿ. ಸೊಭಿತ್ ಸುಂದರ್ ಮಾಧುರಿ ದೀಕ್ಷಿತಾಚಿ ತಸ್ವೀರ್ ತ್ಯಾ ಮ್ಯಾಗಜೀನಾಚಾ ಫ್ರಂಟ್ ಕವರ್ ಪೇಜಿಚೆರ್ ಆಸ್ಲ್ಲಿ.ತಿ ತಸ್ವೀರ್ ಕಿತ್ಯಾಕ್ಗೀ ಆಲಿಯಾಚಾ ದೊಳ್ಯಾಂ ಮಧೆಂ ಜಿರೊನ್ ಗೆಲಿ. ತಾಚ್ಯಾ ಪಾಟ್ಲ್ಯಾನ್ ತಾಕಾ ಆಪ್ಣೆಂ ಪಳೆಲ್ಲ್ಯಾ ತ್ಯಾ ಮಹಾಬಲೇಶ್ವರಾಚಾ ಮಾಧುರಿಚೊ ಉಡಾಸ್ ಆಯ್ಲೊ.
ಆಲಿಯಾನ್ ಆತಾಂ ತೆಂ ಮ್ಯಾಗಜೀನ್ ಪರ್ತುಂಕ್ ಶುರು ಕೆಲೆಂ.
ತೆಂ ಗಾಸಿಪ್ ಆನಿ ತ್ಯಾ ರ್ಂಗೀನ್ ಪರ್ದ್ಯಾ ಪಾಟ್ಲೆಂ ಜಿವಿತ್ ವಾಚ್ಚೆಂ ಪಸಂದ್ ನಾತ್ಲೆಲೆಂ ಆಲಿಯಾ, ತ್ಯಾ ರಂಗೀನ್ ತಸ್ವೀರೆಂಕ್ ಪಳವ್ನ್ ಪಳವ್ನ್ ತಿಂ ಪಾನಾಂ ಪರ್ತಿತಾನಾ, ಅಚಾನಕ್ ತಾಚಿ ನದರ್ ಎಕಾ ತಸ್ವೀರೆ ವಯ್ರ್ ಖಂಚ್ಲಿ.
ಆಪ್ಣಾಚಾ ದೊಳ್ಯಾಂಕ್ ಆಕರ್ಶಿತ್ ಜಾಲ್ಲ್ಯಾ ತಸ್ವೀರೆಕ್ ಪಳಯ್ತಾಂ ಪಳಯ್ತಾಂ ಕಿತೆಂಗೀ ಉಡಾಸ್ ಆಯಿಲ್ಲೆಂ ಆಲಿಯಾ, ಎಕಾ ಕ್ಷಣಾಕ್, ವೆಳಾಕ್ ಮುಕಾರ್ ದಾಂವ್ಡಾಂವ್ಕ್ ಆಶೆಂವ್ಚೆಂ ತೆಂ, ತ್ಯಾ ವೆಳಾಕ್ ವಿಸ್ರೊನ್ ತಾಚ್ಯಾ ಉಡಾಸಾ ಸಾಂಗಾತಾ ಪಾಟಿಂ ಧಾಂವ್ಲೆಂ.
ಪಾಟಿಂ....! ಮಸ್ತ್ ಪಾಟಿಂ....! ತ್ಯಾ ಮಹಾಬಲೇಶ್ವರಾಕ್!
ವ್ಹಯ್! ಆಲಿಯಾಕ್ ಆತಾಂ ಉಡಾಸ್ ಆಯ್ಲೊ.
ರಾಯನ್....!
ಆಜ್ ದುಸ್ರ್ಯಾ ಪಾವ್ಟಿಂ ರಾಯನ್ ಆಲಿಯಾಚಾ ದೊಳ್ಯಾಂ ಮುಕಾರ್ ಆಸ್ಲ್ಲೊ.
ಪುಣ್ ನಿರ್ಜೀವ್ ತಸ್ವಿರೆಂತ್!
ತ್ಯಾ ದಿಸಾಚಿ ಮಹಾಬಲೇಶ್ವರಾಂತ್ಲಿ ತಾಚಿ ಆನಿ ರಾಯನಾಚಿ ಭೆಟ್ ತೆಂ ಅಜೂನ್ಯ್ ವಿಸ್ರೊಂಕ್ ಸಕೊಂಕ್ ನಾ. ಆಲಿಯಾನ್ ತ್ಯಾ ತಾಚ್ಯಾ ಆನಿ ರಾಯನಾಚಾ ಪಯ್ಲ್ಯಾ ಭೆಟೆಂತ್ ರಾಯನಾ ಥಂಯ್ ಕಸಲೆಂಗೀ ಏಕ್ ಆಕರ್ಷಣ್ ಪಳೆಲ್ಲೆಂ. ತಾಚ್ಯಾ ಪರ್ಸನಾಲಿಟಿಂತ್, ತಾಚ್ಯಾ ಉಲೊಣ್ಯಾಂತ್, ತಾಚ್ಯಾ ತಾಳ್ಯಾಂತ್, ಚಡ್ ಕರುನ್ ತಾಣೆಂ ಚಲಿಯೆಕ್ ದಿಂವ್ಚಾ ಮಾನಾಂತ್ ಎಕಾ ಥರಾಚೆಂ ವಿವರ್ಸುಂಕ್ ಜಾಯ್ನಾಸ್ಲೆಲೆಂ ಆಕರ್ಷಣ್ ಆಸ್ಲ್ಲೆಂ.
"ತರ್ ನಿಜಾಯ್ಕ್ಯ್ ರಾಯನ್ ಬಾಲಿವುಡಾಚಾ ಫಿಲ್ಮಾಂಕ್ ಫೈನಾನ್ಸ್ ಕರ್ತಾ? ತೊ ನಿಜಾಯ್ಕ್ಯ್ ಬಾಲಿವುಡ್ ಫಿಲ್ಮ್ ಪ್ರೊಡ್ಯೂಸರ್?"
ಮ್ಯಾಗಜೀನಾ ವಯ್ಲಿ ತಸ್ವೀರ್ ಪಳವ್ನ್ ಆನಿ ತಾಚೆ ಸಕಯ್ಲ್ ಛಾಪ್ಲಲೊ ವಿವರ್ ಪಳವ್ನ್ ಆಲಿಯಾ ಮನಾಂತ್ಚ್ ಉಲಯ್ಲೆಂ.
ತ್ಯಾ ದಿಸಾ ಖುದ್ದ್ ರಾಯನಾನ್ಚ್ ಆಪ್ಣಾ ವಿಶಿಂ ಸಾಂಗ್ತಾನಾ ಆಲಿಯಾಕ್ ತಾಚೆಂ ಉಲೊಣೆಂ ಪಾತ್ಯೆಂವ್ಕ್ ಕಷ್ಟ್ ಮಾರ್ಲೆಲೆ. ಪುಣ್ ಆಜ್.....? ಆಜ್ ಆಯ್ಚ್ಯಾ ಹ್ಯಾ ಘಡಿಯೆರ್ ತ್ಯಾ ದಿಸಾಚಾ ಉಲವ್ಣ್ಯಾಚಿ ಸಾಕ್ಸ್ ಜಾವ್ನ್ ತ್ಯಾ ಸಾಕ್ಶೆ ಪಾಟ್ಲೆಂ ಸತ್ ಆಲಿಯಾಚಾ ದೊಳ್ಯಾಂ ಮುಕಾರ್ ಆಸ್ಲ್ಲೆಂ.
ತಿತ್ಲೆಂಚ್!
ಪಾಟಿಂ ಮುಕಾರ್ ಕಾಂಯ್ ಚಿಂತಿನಾಸ್ತಾನಾ ಆಲಿಯಾನ್ ಆಪ್ಲ್ಯಾ ಉಸ್ಕ್ಯಾರ್ ಯೆದೊಳ್ ವಿಶೆವಾಂತ್ ಆಸ್ಲೆಲೆಂ ಆಪ್ಲೆಂ ಸೆಲ್ಫೋನ್ ಹಾತಿಂ ಘೆವ್ನ್, ತ್ಯಾ ಫೊನಾಚಾ ಟೆಲಿಫೊನ್ ಡೈರಿಕ್ ಉಗ್ತಿ ಕರುನ್, ತಾಂತುಂ ರಾಯನಾನ್ ತ್ಯಾ ದಿಸಾ ಆಪ್ಣಾಕ್ ದಿಲ್ಲೆಂ ತೆಂ ನಂಬರ್ ತೆಂ ಸೊಧುಂಕ್ ಲಾಗ್ಲೆಂ. ಇತ್ಲ್ಯಾ ದಿಸಾಂನಿಂ ತಾಣೆಂ ತೆಂ ನಂಬರ್ ಡಿಲೀಟ್ ಕರುಂಕ್ ನಾ ಮ್ಹಣೊನ್ ತೆಂ ಜಾಣಾಂ. ಪುನ್ ಎಕೇಕ್ ಪಾವ್ಟಿಂ ಕಶೆಂ ಸಾಂಗೊಂಕ್ ಜಾತಾ? ಆವ್ಚಿತ್ತ್ ಆಪ್ಣಾಕ್ ಕಳಿತ್ ನಾತ್ಲೆಲ್ಯಾ ಪರಿಂ ಕಾಂಯ್ ಡಿಲೀಟ್ ಜಾಲಾಂ ಜಾಲ್ಯಾರ್....?
ಎ.ಬಿ.ಸಿ....ಎಲ್.ಎಮ್.....ಪಿ.ಕ್ಯೂ.ಆರ್.....! ಆಲಿಯಾ ಟೆಲಿಪೋನ್ ಡೈರಿಂತ್ ರಾಯನಾಚೆಂ ನಂಬರ್ ಸೊಧ್ತಾಲೆಂ.
"ಆರ್,ಆರ್,ಆರ್,......" ಘುಣ್ಘುಣ್ಚೆಂ ಆಲಿಯಾ ಆತಾಂ ರಾಯನಾಚೆಂ ನಂಬರ್ ಪಳೆವ್ನ್ "ಎಸ್....! ರಾಯನ್... ೯೮೪೧೨೨೭೦....!" ಮುಕ್ಲಿಂ ನಂಬ್ರಾಂ ವಾಚ್ಚೆಂ ವ್ಯರ್ಥ್ ಪ್ರಯತ್ನ್ ಕರಿನಾತ್ಲ್ಲ್ಯಾ ಆಲಿಯಾಚಾ ತೊಂಡಾರ್ ಹಾಸೊ ಉದೆಲ್ಯೊ.
ತಿತ್ಲೆಂಚ್!
ಮುಕಾರ್ ಪಾಟಿಂ ಕಾಂಯ್ಚ್ ಪಳೆನಾಸ್ತಾನಾ ತಾಣೆಂ ತೆಂ ರಾಯನಾಚೆಂ ನಂಬರ್ ಡಯಲ್ ಕೆಲೆಂ.
ತ್ಯಾ ಕುಶಿಂನ್ ಫೋನ್ ರಿಂಗ್ ಜಾತಾಲೆಂ.
ತಿತ್ಲ್ಯಾರ್,
ತ್ಯಾ ಕುಶಿಂನ್ ಫೋನ್ ಆನ್ ಕೆಲ್ಲೊ ಆವಾಜ್! ತಾಚ್ಯಾ ಪಾಟ್ಲ್ಯಾನ್ಚ್ ಅಯ್ಕೊನ್ ಆಯ್ಲೊ ರಾಯನಾಚೊ ತಾಳೊ!
"ಹಲೋ...?"
" ಹಲೋ...ಇಸ್ ದಿಸ್ ರಾಯನ್?" ಆಲಿಯಾ ಉಲಯ್ಲೆಂ.
"ಯಿಯಾ.. ಸ್ಪೀಕಿಂಗ್...!" ರಾಯನಾಚಾ ತಾಳ್ಯಾಂತ್ ಮಿಸ್ತೆರಾಚೊ ಸ್ವರ್ ಉಟೊನ್ ರಾವ್ಲ್ಲ್ಯಾಪರಿಂ ಆಲಿಯಾಕ್ ದಿಸ್ಲೊ.
"ಹಾಂವ್ ಆಲಿಯಾ ಉಲಯ್ತಾಂ!"
"ಆಲಿಯಾ? .....ಊಂ....ಂ..." ರಾಯನಾಕ್ ವಳೊಕ್ ಮೆಳ್ಳಿ ನಾ.
"ಮಹಾಬಲೇಶ್ವರಾಂತ್ ತುಂ ಮ್ಹಾಕಾ ಮೆಳ್ಲ್ಲೊಯ್....!"
"ಮಹಾಬಲೇಶ್ವರಾಂತ್? ಆಲಿಯಾ....?"
"ತುವೆಂಚ್ ಮ್ಹಾಕಾ ತುಜೆಂ ನಂಬರ್ ದಿಲ್ಲೆಂಯ್!"
"ಹಾವೆಂ ತುಕಾ ಮ್ಹಜೆಂ ನಂಬರ್.....!? ಮಹಾಬಲೇಶ್ವರಾಂತ್?"
"ತುಜ್ಯಾ ಫಿಲ್ಮಾಚೆಂ ಶೂಟಿಂಗ್ ಚಲ್ತಾಲೆಂ....! ಮಾಧುರಿ ದೀಕ್ಷಿತಾಚೆಂ.....!"
ಆಲಿಯಾನ್ ಉಲಂವ್ಚೆಂ ಪಳವ್ನ್ ತಾಚಿಂ ಉತ್ರಾಂ ಆಯ್ಕಾಲ್ಲಿ ತಿ ಸೆಲೂನಾಚಿ ಮಾಲ್ಕಿಣ್ ಆತಾಂ ಪಾಟಿಂ ಘುಂವೊನ್ ಆಲಿಯಾಕ್ ಪಳಂವ್ಕ್ ಪಡ್ಲಿ. ಬಾಲಿವುಡ್..! ತೆಂಯ್ ಆಲಿಯಾ ಬಾಲಿವುಡಾಚಾ ಎಕಾ ಫಿಲ್ಮ್ ಪ್ರೊಡ್ಯೂಸರಾ ಲಾಗಿಂ ಉಲಯ್ತಾ ತೆಂ ಕಳ್ತಾನಾ ಕೊಣಾಕಾಲಿಯಾ ತೆವ್ಶಿಂ ಮನ್ ವೊಡಿನಾ ಜಾಯ್ತ್?
"ಮ್ಹಾಕಾ ಬಾಲಿವುಡಾಕ್ ಯೆಂವ್ಚೆಂ ಲಕ್ಷಣ್ ಆಸಾ ಮ್ಹಣೊನ್ ತುವೆಂಚ್ ಮ್ಹಾಕಾ ತುಜೆಂ ನಂಬರ್ ದಿಲ್ಲೆಂ....!"
"ಓಹ್ ಯ್ಯಾ...! ವ್ಹಯ್ ವ್ಹಯ್! ಕಶೆಂ ಆಸಾಯ್ ತುಂ?" ರಾಯನಾನ್ ಆಲಿಯಾಕ್ ಆತಾಂ ಪಾರ್ಕಿಲೆಂ.
"ಫೈನ್...! ಹಾಂವ್ ಬರಿಂ ಆಸಾಂ. ತುಂ ಕಸೊ ಆಸಾಯ್?"
"ಸೆಂಟ್ ಪರ್ಸಂಟ್! ತ್ಯಾ ದೀಸ್ ತುಂ ಕಾಂಯ್ ಉಲಯ್ನಾತ್ಲ್ಲೆಂಯ್....! ಆಜ್ ಬರೆಂ ಉಲಯ್ತಾಯ್... ಮ್ಹಾಕಾ ಡೌಟ್ ಲಾಗ್ತಾ ಕೀ ತುಂ ತೆಂಚ್ ಆಲಿಯಾ?"
"ಎಬ್ಸಲ್ಯೂಟ್ಲೀ!"
"ಕಿತೆಂ ಫೋನ್ ಕೆಲೆಂಯ್?"
"ತುಂ ಬಿಜಿ ಆಸಾಯ್?"
"ನಾ! ಸ್ಟೂಡಿಯೋಚಾ ವಾಟೆರ್ ಆಸಾಂ!"
"ಹಾವೆಂ ಆಶೆಂಚ್ ಫೋನ್ ಕೆಲೆಂ. ಆಜ್ ಅಚಾನಕ್ ತುಜಿ ತಸ್ವೀರ್ ಸ್ಟಾರ್ ಡಸ್ಟಾಚೆರ್ ಪಳೆಲಿ. ತುಜೊ ಉಡಾಸ್ ಆಯ್ಲೊ ತಶೆಂ ತುಕಾ ಡಯಲ್ ಕೆಲೆಂ. ತುಕಾ ಡಿಸ್ಟರ್ಬ್ ಜಾಲೆಂ?"
"ನೋ ನೋ....! ನಾಟ್ ಎಟ್ ಆಲ್!"
"ಓಕೆ ದೆನ್....!"
"ಒಕೆ...!"
"ಬಾಯ್...!"
"ಸೀ ಯು!"
ಆಲಿಯಾನ್ ಫೋನ್ ಬಂಧ್ ಕೆಲೆಂ. ಹೆಂ ಪಳೆಲ್ಲಿ ತಿ ಪಾರ್ಸಿ ಬಾಯ್ಲ್, ಆಲಿಯಾಕ್ ತ್ಯಾಚ್ ತಿಚಾ ತಾಂಬ್ಡ್ಯಾ ವೊಂಟಾನಿಂ ಪಯ್ಲೆಂಚಾ ಪ್ರಾಸ್ ಚಡ್ ಮಾಫಾನ್ ಇಸ್ಕಳ್ ಹಾಸೊ ಪಾಟವ್ನ್ ಪರ್ತ್ಯಾಕ್ ಆಪ್ಲ್ಯಾ ಕಾಮಾರ್ ಪಡ್ಲಿ.
ಫೋನ್ ಬಂಧ್ ಕೆಲ್ಲ್ಯಾ ಆಲಿಯಾಚಿ ಮತ್ ಆತಾಂ ವ್ಹಳೂ ತ್ಯಾ ದಿಸಾ ಮಹಾಬಲೇಶ್ವರಾಂತ್ ಜಾಲ್ಲ್ಯಾ ಆಪ್ಣಾಚಾ ಆನಿ ರಾಯನಾಚಾ ಭೆಟೆಕ್ ನಿಯಾಳುಂಕ್ ಲಾಗ್ಲಿ.
ತೆಂಚ್ ಖಾಲ್ತೆಂ ಉಲೊಣೆಂ. ತೊಚ್ಚ್ ಶಾಂತ್ ಸ್ವಭಾವ್. ತೊಚ್ಚ್ ಕೊಣಾಯ್ಕ್ಯ್ ಪಿಶ್ಯಾರ್ ಘಾಲ್ಚೊ ಮಧುರ್ ತಾಳೊ.
ಆಲಿಯಾಕ್ ಆತಾಂ ಆಪ್ಲೆಂ ಮನ್ ಸವ್ಕಾಸ್ ರಾಯನಾ ತೆವ್ಶಿಂ ವ್ಹಾಳ್ತಾ ತಶೆಂ ಜಾಲೆಂ. ತಾಚ್ಯಾ ದೊಳ್ಯಾಂ ಮುಕಾರ್ ತಿಚ್ಚ್ ಮಹಾಬಲೇಶ್ವರಾಂತ್ಲಿ ರಾಯನಾಚಿ ತಸ್ವೀರ್ ಉಭಿ ಜಾಲಿ. ತ್ಯಾ ತಸ್ವೀರೆಕ್ ತೆಂ ಮನಾಂತ್ಚ್ ಪಳವ್ನ್ ರಾವ್ಲೆಂ.
ತಿತ್ಲ್ಯಾರ್!
ಮುಕ್ಲೆಂ ದಾರ್ ಉಗ್ತೆಂ ಕರುನ್, ಭಿತರ್ ಥಾವ್ನ್ ಏಕ್ ಚಲಿ ಭಾಯ್ರ್ ಆಯ್ಲೆಂ. ತಾಚ್ಯೆ ವಯ್ರ್ ದಿಷ್ಟ್ ವೆಲ್ಲ್ಯಾ ಆಲಿಯಾಕ್, ತಾಚೆಂ, ತಾಣೆಂ ನ್ಹೆಸ್ಲೆಲೆಂ ನ್ಹೆಸಾಪ್ ಪಳೆತಾನಾ, ತೆಂ ಕಸಲ್ಯಾ ತರ್ಯ್ ಏರ್ವೇಸಾಂತ್ ಏರ್ ಹೊಸ್ಟೆಸ್ ಜಾವ್ನ್ ಕಾಮಾರ್ ಆಸಾ ಮ್ಹಳ್ಳ್ಯಾ ಪರಿಂ ಭೊಗ್ಲೆಂ. ಆಲಿಯಾಕ್ ಪಳೆಲ್ಲ್ಯಾ ತ್ಯಾ ಚಲಿಯೆನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ. ಹ್ಯೊ ಹಾಸೊ ಆಪ್ಣಾಕ್ ಯೆದೊಳ್ ಪಾಸೊನ್ ಹಾಂಗಾಸರ್ ಬಸಯಿಲ್ಲ್ಯಾಚೆಂ ಇನಾಮ್ ಮ್ಹಣೊನ್ ಆಲಿಯಾಕ್ ಕಳಾನಾಸ್ತಾನಾ ಗೆಲೆಂ ನಾಂ. ತೆಂ ಮನ್ಶ್ಯಾ ಸ್ವಭಾವಾಕ್ ಬರೆಂ ಕರುನ್ ವಳ್ಕಾತಾಲೆಂ.
"ಯೇ ಆಲಿಯಾ...! ಐ ಯಾಮ್ ಸಾರ್ರಿ ಹಾಂ... ತುಕಾ ಮಸ್ತ್ ರಾಕೊಂಕ್ ಪಡ್ಲೆಂ!" ನವನೀತಾನ್ ನಮ್ರತಾಯೆನ್ಸಾಂಗ್ತಾನಾ,
"ಇಟ್ಸ್ ಆಲ್ರೈಟ್!" ಮ್ಹಳ್ಳೆಂ ಆಲಿಯಾ ಆತಾಂ ಉಟೊನ್ಭಿತರ್ ಗೆಲೆಂ. ತಾಚ್ಯಾ ಪಾಟ್ಲ್ಯಾನ್ ನವನೀತಾಯ್ ಭಿತರ್ ಸರ್ಲೆಂ.
"ಎಕ್ಚುವಲ್ಲೀ..... ಅಭಿಲಾಷಾಚೆಂ ಪ್ಲೈಟ್ ಡಿಲೇ ಜಾಲ್ಲೆಂ ಖಂಯ್ ತಶೆಂ ತಾಕಾ ಥೊಡೊ ವೇಳ್ ಜಾಲೊ. ತುಕಾ ಹಾಂಗಾ ರಾಕೊಂಕ್ ಪಡ್ಲೆಂ ಮ್ಹಣೊನ್ ಬೆಜಾರ್ ಜಾಲೆಂ......?"
ಆಲಿಯಾ ಭಿತರ್ಲ್ಯಾ ಚೇರಾಚೆರ್ ಬಸ್ತಾನಾ ನವನೀತ್ ಉಲಯ್ಲೆಂ.
"ತೆಂ ಏರ್ವೇಸಾಂತ್ ಕಾಮ್ ಕರ್ತಾ?"
"ವ್ಹಯ್...!"
"ಖಂಯ್ಚ್ಯಾ ಏರ್ವೇಸಾಂತ್.....?"
"ವೆಸ್ಟ್ ಲೈನ್!"
ಹ್ಯಾ ಉಪ್ರಾಂತ್ ಆಲಿಯಾನ್ ನವನೀತಾಕ್ ಕಾಂಯ್ ಸವಲಾಂ ಕೆಲಿಂ ನಾಂತ್. ನವನೀತಾ ಆಪ್ಲೆಂ ಕಾಮ್ ಚಾಲು ಕರ್ತಾನಾ ಆಲಿಯಾನ್ ಆಪ್ಣಾಕ್ ಕಿತೆಂ ಕಿತೆಂ ಜಾಯ್ ಮ್ಹಳ್ಳ್ಯಾ ವಿಶಿಂ ಸಾಂಗ್ಲೆಂ ಮಾತ್ರ್ ಶಿವಾಯ್ ತೆಂ ದುಸ್ರೆಂ ಕಾಂಯ್ ಉಲಯ್ಲೆಂ ನಾ.
ಅಭಿಲಾಷಾಕ್ ಸೆಲೂನಾಂತ್ ಪಳೆಲ್ಲ್ಯಾ ಘಡಿಯೆ ಥಾವ್ನ್, ಆಲಿಯಾಕ್, ತಾಚ್ಯಾ ನ್ಹೆಸ್ಣಾಚೆರ್ ಅಭಿಮಾನ್ ಭೊಗ್ಲೊ. ತ್ಯಾ ನ್ಹೆಸ್ಣಾಕ್ ಆನಿ ಆಪ್ಣಾಚಾ ಸಪ್ಣಾಂಕ್ ಖಂಯ್ಚರ್ ತರ್ಯ್ ಸಂಭಂಧ್ ಆಸಾ ಮ್ಹಳ್ಳ್ಯಾ ಪರಿಂ ತಾಕಾ ದಿಸ್ಲೆಂ.
ವಾರ್ಯಾರ್ ಉಬ್ಚೆಂ ಆಪ್ಲೆಂ ಸಪಾಣ್ ಜಾವ್ನಾಸ್ಲ್ಲೆಂ. ತ್ಯಾ ಖಾತಿರ್ ಆಪುಣ್ ಪೈಲೆಟ್ ಜಾಂವ್ಕ್ ಸೊಧ್ತಾಲಿಂ.
ವಾರ್ಯಾರ್ ಉಬೊಂಕ್ ಪೈಲೆಟ್ ಜಾವ್ನ್ಚ್ ಉಬೊಂಕ್ ಜಾಯ್ ಮ್ಹಣೊನ್ ನಾ. ಹಾಂಗಾ ದಿಸಾಂದೀಸ್ ತ್ಯಾ ವಾರ್ಯಾರ್ ತೆಂ ಅಭಿಲಾಷಾಯ್ ಉಬ್ತಾ. ತರ್....?
ಹಾಂವೆಂ ಕಿತ್ಯಾಕ್ ನುಜೊ?
ಕಾಪ್ಟನ್ ರಾಣಾಚಾ ಗರ್ವಾನ್ ಹಾಂವ್ ಪೈಲೆಟ್ ಜಾಂವ್ಕ್ ಸಕ್ಲಿಂ ನಾ. ಪುಣ್, ಏರ್ ಹೊಸ್ಟೆಸ್ ಜಾವ್ನ್, ಆಪ್ಲ್ಯಾ ಸಪ್ಣಾಂ ಸಂಗಿಂ ಆಪುಣ್ ವಾರ್ಯಾರ್ ಉಬೊಂಕ್ ತರೀ ಸಕ್ತಾಂ....!
ವ್ಹಯ್ ! ಆಲಿಯಾ ಫಕತ್ತ್ ಆಪ್ಲ್ಯಾ ಮತಿಂತ್ಲ್ಯಾ ತ್ಯಾ ಆಶೆ ವಿಶಿಂ ಮಾತ್ರ್ ಚಿಂತಾಲೆಂ. ತಾಚ್ಯಾ ಮತಿಕ್ ತಾಕಾ ಖುಶ್ ಕರುಂಕ್ ಜಾಯ್ ಆಸ್ಲ್ಲೆಂ. ಆಪ್ಲ್ಯಾ ಮತಿಕ್ ಖಂಯ್ಚರ್ ಸಮಾಧಾನ್ ಮೆಳ್ತಾ ಥಂಯ್ಚರ್ ಆಲಿಯಾ ಆಪ್ಣಾಕ್ಚ್ ಸಗ್ಳೆಂಚ್ ಸಮರ್ಪಿತ್ ಕರ್ತಾಲೆಂ.
ಆಜ್, ಆಲಿಯಾಚಾ ಮತಿಂತ್ ಹಿಂ ಏರ್ ಹೊಸ್ಟೆಸಾಚಿಂ ಚಿಂತ್ನಾ ಆಯ್ಲ್ಯಾ ಉಪ್ರಾಂತ್ ತಾಣೆಂ ಪಾಟಿಂ ಪಳೆಲೆಂ ನಾ. ಆಪ್ಲ್ಯಾ ಸಪ್ಣಾಕ್ ಸಾಕಾರ್ ಕರ್ಚಿ ವಾಟ್ ಅಜೂನ್ ಆಪ್ಣಾ ಮುಕಾರ್ ಉಭಿ ಆಸಾ ಆನಿ ಹಾಂವ್ ತ್ಯಾ ವಾಟೆಕ್ ಸೊಧುನ್ ಇತ್ಲೆ ದೀಸ್ ಇತ್ಲ್ಯಾ ಟೆನ್ಶನಾಂತ್....?
ಬಾಪಾಯ್ನ್ ಆಶೆಲ್ಲೆಂ "ಬೂಟಿಕ್ ಚಲಂವ್ಚೆಂ ಬಿಜ್ನೆಸ್ ಯಾ ನಿಖಾ ಜಾವ್ನ್ ನೊವ್ರ್ಯಾಚಾ ಘರಾ ವೆಚೆಂ" ಹ್ಯಾ ದೊನಾಂಯ್ ಮಧೆಂ ಆಪುಣ್ ಖಂಯ್ಚಾಕ್ ಸೈ ಘಾಲುಂ ಮ್ಹಳ್ಳೆಂ ತೆಂ ಆಲಿಯಾಕ್ ಸಮ್ಜಾಲ್ಲೆಂ ನಾ. ಹಾಂಗಾಸರ್ ವಿಂಚವ್ಣ್ ಆಸ್ಲ್ಲಿ ಖರೆಂ. ಪುಣ್ ಹ್ಯಾ ವಿಂಚವ್ಣೆಂತ್ ಆಲಿಯಾಕ್ ಪಸಂದ್ ಜಾಲ್ಲಿ, ಆಲಿಯಾನ್ ಆಶೆಲ್ಲಿ ವಿಂಚವ್ಣ್ ನಾತ್ಲ್ಲಿ.
ಜಿವಿತಾಚಾ ಮುಕ್ಲ್ಯಾ ಚಿಂತ್ನಾನಿಂ ಬುಡ್ಲೆಲ್ಯಾ ಆಲಿಯಾಕ್ ಆತಾಂ ಮತಿಕ್ ಸಮಾಧಾನ್ ಭೊಗ್ಲೆಲ್ಯಾ ಪರಿಂ ಜಾಲೆಂ.
"ನವನೀತಾ.... ತುಂ ಮ್ಹಕಾ ಅಭಿಲಾಷಾಕ್ ಮೆಳಯ್ತಾಯ್?" ಆಪ್ಲ್ಯಾ ಮತಿಂತ್ಲ್ಯಾ ಆಶೆಕ್ ಕಾರ್ಯಾಗತ್ ಕರುಂಕ್ ಚಿಂತ್ಲೆಲ್ಯಾ ಆಲಿಯಾನ್ ವಿಚಾರ್ಲೆಂ.
"ಅಭಿಲಾಷಾಕ್? .....ಕಿತ್ಯಾಕ್?"
"ಮ್ಹಕಾಯ್ ಏರ್ಹೊಸ್ಟೆಸ್ ಜಾಂವ್ಕ್ ಜಾಯ್!"
"ತುಂ....! ಏರ್ ಹೊಸ್ಟೆಸ್?" ನವನೀತಾಕ್ ಆಶ್ಚರ್ಯ್ ಜಾಲೆಂ.
"ಕಿತ್ಯಾಕ್? ಜಾಂವ್ಕ್ ನುಜೊ....?"
"ತಶೆಂ ನ್ಹಯ್. ಏರ್ ಹೊಸ್ಟೆಸ್ ಮ್ಹಣ್ಚೆಂ ಸಾದೆಂ ಕಾಮ್. ತುಂ....!" ಆಪ್ಣಾಚಾ ಮತಿಂತ್ ಆಸ್ಲ್ಲೆಂ ತೆಂ ತಾಚ್ಯಾ ಜಿಬೆರ್ ಗಳ್ಳೆಂ ಜಾಲ್ಯಾರ್ಯ್ ತಾಂಕಾಂ ಜಿಬೆರ್ ಥಾವ್ನ್ ಉತ್ರಾಂ ರುಪಾರ್ ಉಲಂವ್ಕ್ ನವನೀತಾ ಕಾವ್ಜೆಲೆಂ.
"ಹಾಂವ್? ಮ್ಹಾಕಾ ಕಿತೆಂ ಜಾಲಾಂ?"
"ತುಂ ಪೈಲೆಟ್ ಜಾಂವ್ಚೆಂ ಶಿಕ್ತಾಲೆಂಯ್....!"
"ತುಂ ಮ್ಹಾಕಾ ಅಭಿಲಾಷಾಕ್ ಮೆಳಯ್ತಾಯ್?"
"ಹಾಂ! ಖಂಡಿತ್!"
"ಕೆದ್ನಾಂ?"
"ತಾಚೆಂ ಮೊಬಾಯ್ಲ್ ಫೋನ್ ನಂಬರ್ ಮ್ಹಜ್ಯೆ ಲಾಗಿಂ ನಾ. ಪುಣ್ ಹಾಂವ್ ಜಾಣಾಂ ತೆಂ ಖಂಯ್ ರಾವ್ತಾ ಮ್ಹಳ್ಳೆಂ ತೆಂ....!"
"ತರ್ ತುಮ್ಚಾ ಮಧೆಂ ಬರೀ ಇಷ್ಟಾಗತ್ ಆಸಾ...!?"
"ವ್ಹಯ್!"
ನವನೀತಾಚಾ ಜವಾಬೆನ್ ಆಲಿಯಾಚಾ ತೊಂಡಾರ್ ಹಾಸೊ ಮಾತ್ರ್ ಉದೆಲ್ಯೊ ಶಿವಾಯ್ ತೆಂ ಕಾಂಯ್ ಉಲಯ್ಲೆಂ ನಾ.
"ತೆಂ ವ್ಹಯ್....." ನವನೀತಾಚ್ಚ್ ಉಲಯ್ಲೆಂ. "ತುಂ ಏರ್ ಹೊಸ್ಟೆಸ್ ಜಾಂವ್ಕ್ ಕಿತ್ಯಾಕ್ ಚಿಂತಾಯ್?"
"ಐ ವಾಂಟ್ ಟು ಸೀ ಹಿಮ್ ಬ್ಯಾಕ್!"
ಮನಾಂತ್ಲ್ಯಾ ಮನಾನ್ ಉದ್ಗಾರ್ತಾನಾ ಆಲಿಯಾಚಾ ತೊಂಡಾರ್ ಹಾಸೊ ಮಾತ್ರ್ ಉದೆಲ್ಯೊ ಶಿವಾಯ್ ತಾಚ್ಯಾ ಜಿಬೆ ಥಾವ್ನ್ ತಿಂ ಮನಾಂತ್ಲಿಂ ಉತ್ರಾಂ ಭಾಯ್ರ್ ಪಡ್ಲಿಂ ನಾಂತ್. ಕಾರಾಣ್, ತಾಚ್ಯಾ ದೊಳ್ಯಾ ಮುಕಾರ್ ಕ್ಯಾಪ್ಟನ್ ರಾಣಾಚೆಂ ಪ್ರತಿರೂಪ್ ಉಭೆಂ ಜಾಲ್ಲೆಂ. ತ್ಯಾ ರುಪಾಕ್ ಆಲಿಯಾ ಪರ್ತ್ಯಾಕ್ ಜಿವೆಂ ಜಿವೆಂ ಪಳಂವ್ಕ್ ಆಶೆಲೆಂ.
ಆಪ್ಣಾಚಾ ಸವಾಲಾಕ್ ಆಲಿಯಾನ್ ಜವಾಬ್ ದೀಂವ್ಕ್ ನಾತ್ಲೆಲಿ ಪಳವ್ನ್, ದುಸ್ರೆಂ ಸವಾಲ್ ವಿಚಾರಿನಾಸ್ತಾನಾ ನವನೀತಾ ಆಪ್ಲ್ಯಾ ಕಾಮಾರ್ ಮೆತೆರ್ ಜಾಲೆಂ.
****************
ಹರ್ಯೆಕಾ ಸಂಗ್ತಿಕ್ಯ್ ತಾಚಿಚ್ ಮ್ಹಳ್ಳಿ ಏಕ್ ಪರಿಮಿತ್ ಆಸಾ. ಹ್ಯಾ ಪರಿಮಿತಾಕ್ ಸೊಡುನ್ ಭಾಯ್ರ್ ವೆಚೆಂ ಮ್ಹಳ್ಯಾರ್, ಎಕ್ಚ್ ಆಪ್ಲ್ಯಾ ಸ್ರಷ್ಟೆಕ್ ಆಪ್ಣೆಂ ವಿಸ್ರೊಂಚೆಂ ವಾ ಆಪುಣ್ಚ್ ಸ್ರಷ್ಟಿಕರ್ತ್ ಜಾಂವ್ಚೆಂ. ಹ್ಯೊ ದೊನ್ಯ್ ಆದಿ ಥಾವ್ನ್ ಮನ್ಶ್ಯಾ ಸೈಂಬಾಚ್ಯೊ ಆಸ್ಕತ್ಕಾಯೊ ಜಾವ್ನ್ ಆಯ್ಲ್ಯಾತ್. ಆಪ್ಲ್ಯಾ ಸ್ರಷ್ಟೆಕ್ ವಿಸ್ರಾಲ್ಲೊ ಮಾತ್ರ್ ಸ್ರಷ್ಟಿಕರ್ತ್ ಜಾಂವ್ಕ್ ಪೆಚಾಡ್ತಾ ಆನಿ ಆಪ್ಣೆ ಕೆಲ್ಲ್ಯಾ ಸ್ರಷ್ಟೆಂತ್ ಆಪುಣ್ಚ್ ಬಲಿ ಜಾತಾ.
ಆಲಿಯಾ ಆಜ್ ಆಪ್ಲ್ಯಾ ಸ್ರಷ್ಟೆಕ್ ವಿಸ್ರೊಂಕ್ ನಾತ್ಲ್ಲೆಂ. ಆಪ್ಲ್ಯಾ ಸ್ರಷ್ಟೆನ್ ಆಪ್ಣಾಕ್ ಭಾಸಾಯಿಲ್ಲ್ಯಾ ತ್ಯಾ ರಿವಾಜೆಂಕ್ ಮೊಡುಂಕ್ ವೆಚೆಂ ನೆಣಾರ್ಪಣ್ ತಾಣೆಂ ಕರುಂಕ್ ನಾ. ಪುಣ್ ಆಪ್ಲ್ಯಾ ಸ್ರಷ್ಟೆಚಾ ಭಾಯ್ಲ್ಯಾ ಸ್ರಷ್ಟೆನ್, ಸಮಾಜ್ ಮ್ಹಳ್ಳ್ಯಾ ನಾಂವಾಚೆರ್ ಚಲಿಯೆಕ್ ದಾಂಬುನ್ ದವರುನ್ ಆಡ್ಚಾಯಿಲ್ಲ್ಯಾ ವಿಚಾರಾಂಕ್ ಮಾತ್ರ್ ನವೆಂ ರೂಪ್ ದೀವ್ನ್, ಹೆಂ ರೂಪ್ ಸಭಾರ್ ಚಲಿಯಾಂಕ್ ಎಕ್ ಮಾರ್ಗದರ್ಶನ್ ಜಾಂವ್ಕ್ ಜಾಯ್ ಜಾಲ್ಯಾರ್, ಆಪುಣ್ಯ್ ಹ್ಯಾ ಸಮಾಜೆಚಾ ಫುಡೆಂ ಏಕ್ ಸ್ರಷ್ಟಿಕರ್ತ್ ಜಾಯ್ಜಯ್ ಮ್ಹಣೊನ್ ತೆಂ ಪಾತ್ಯೆಲ್ಲೆಂ.
"ಆಲಿಯಾ....... !" ಶಬೀರಾಚೊ ತಾಳೊ ಹರ್ಶೆಂಚಾ ಪ್ರಾಸ್ ಚಡ್ ಉಂಚಾಯೆನ್ ಉಟ್ಲೊ. "......ತುಂ ಕಿತೆಂ ಉಲಯ್ತಾಯ್ ತೆಂ ತುಂ ಜಾಣಾಂಯ್? ತುಂ ಮ್ಹಜೆಂ ಧುವ್! ಶಬೀರ್ ಅಹ್ಮದಾಚೆಂ ಧುವ್! ತುಜ್ಯಾ ನಾಂವಾ ಪಾಟ್ಲ್ಯಾನ್ ಮ್ಹಜೆಂ ನಾಂವ್ ಆಸಾ. ’ಆಲಿಯಾ ಶಬೀರ್ ಖಾನ್! ಆಲಿಯಾ.... ಕೋಣ್? ......ಆಲಿಯಾ ಶಬೀರ್ ಖಾನ್!’ ಸಮ್ಜಾಲೆಂ ತುಕಾ? ತುಜ್ಯಾ ನಾಂವಾ ಸಾಂಗಾತಾ ಮ್ಹಜೆಂ ನಾಂವ್ ಆಸ್ತಾ ಪಾಸೊನ್ ತುಂ.... ಆನಿ ಏರ್ ಹೊಸ್ಟೆಸ್? ನೆವರ್!"
ಆಲಿಯಾನ್ ಆಪ್ಣೆಂ ಏರ್ ಹೊಸ್ಟೆಸ್ ಜಾಂವ್ಚೊ ನಿರ್ಧಾರ್ ಆಪ್ಲ್ಯಾ ಬಾಪಾಯ್ ಮುಕಾರ್ ದವರ್ತಾನಾ ಧುವೆಕ್ ಆಯ್ಕಾಲ್ಲೊ ಶಬೀರ್ ಶಿರಿಂ ಚುಕ್ಲೊ. ಆಲಿಯಾಚಾ ಆವ್ಚಿತ್ತ್ ಪಿಶ್ಯಾ ನಿರ್ಧಾರಾಕ್ ಲಾಗೊನ್ ಶಬೀರಾಚೊ ರಾಗ್ ತಕ್ಲೆಕ್ ಚಡ್ಲೊ. ತಾಕಾ ಕಿತೆಂ ಕರ್ಚೆಂ ತೆಂ ಕಳೊಂಕ್ ನಾ. ಆಪ್ಲಿ ಧುವ್ ಆಸಲೊ ನಿರ್ಧಾರ್ ಘೆವ್ನ್ ಆಪ್ಲ್ಯಾ ಮುಕಾರ್ ಪ್ರಸ್ತುತ್ ಜಾಯ್ತ್ ಮ್ಹಣೊನ್ ತಾಣೆಂ ಚಿಂತುಂಕ್ ಪಾಸೊನ್ ನಾತ್ಲೆಲೆಂ.
"ಪಳೆ ಅಬ್ಬೂ.... ಕಾಮ್ ತೆಂ ಕಸಲೆಂಯ್ ಜಾಂವ್, ತಾಂತುಂ ಕಾಂಯ್ ವಾಯ್ಟ್ ನಾ. ಜಾಂವ್ಕ್ ಪುರೊ ಹಿ ಸಮಾಜ್ ತುಜ್ಯಾ ಧುವೆನ್ ಏಕ್ ಎರ್ ಹೊಸ್ಟೆಸ್ ಜಾಂವ್ಚೆಂ ಪಸಂದ್ ಕರ್ಚಿ ನಾ. ಹಿಚ್ಚ್ ಸಮಾಜ್ ಚಲಿಯೆಕ್ ದಿಸಾ ಉಜ್ವಾಡಾಕ್ ಆಲ್ತಾರಿಕ್ ಚಡಾಯ್ತಾ...., ತಿಚಿ ಪುಜಾ ಕರ್ತಾ...., ಉಪ್ರಾಂತ್ ಕಾಳೊಕ್ ಪಡ್ತಾನಾ, ಹಿಚ್ಚ್ ಸಮಾಜ್ ತಿಕಾ ಆಲ್ತಾರಾ ವಯ್ಲಿ ಕಾಡುನ್ ಖಾಟಿಯೆರ್ ಸೊಭಯ್ತಾ, ಆನಿ ತಿಕಾ ವೇಶ್ಯಾ ಕರ್ತಾ! ಹಾಂವ್...."
"ತುಂ ಏಕ್ ವೇಶ್ಯಾ ನ್ಹಯ್ ಆಲಿಯಾ!" ಆಲಿಯಾಚಿಂ ಉತ್ರಾಂ ಆಖೇರ್ ಜಾಂವ್ಚಾ ಪಯ್ಲೆಂಚ್ ಶಬೀರ್ ಬೊಬಾಟ್ಲೊ.
ಆಜ್ ಬಾಪಯ್ ಧುವೆ ಮಧೆಂ ಕಾಂಯ್ ತರ್ಯ್ ಖಂಡಿತ್ ಚಲ್ತೆಲೆಂ ಮ್ಹಣೊನ್ ಪಯ್ಲೆಂಚ್ ಜಾಣಾಂ ಜಾಲ್ಲಿ ಸಾರಾ, ಸಾಲಾ ಥಾವ್ನ್ ಭಿತರ್ ವೆಚಾ ದಾರಾರ್ ಉಭಿ ಆಸ್ಲ್ಲಿ ತಿ, ಆಪ್ಲೊ ಘೊವ್ ಉಚಾಂಭಳ್ ಜಾಲ್ಲೊ ಪಳವ್ನ್ ಸವ್ಕಾಸ್ ತಿ ಆಲಿಯಾಚಾ ಲಾಗಿಂ ಆಯ್ಲಿ.
"ಆಲಿಯಾ....?" ಸಾರಾ ಉಲಯ್ಲಿ ".... ಪುತಾ ತುಂ ಕಿತೆಂ ಚಿಂತಾಯ್? ತುವೆಂ ಚಿಂತ್ಲ್ಲ್ಯಾ ಪರಿಂ ಹೊ ಸಂಸಾರ್ ನಾ. ಹ್ಯಾ ಸಂಸಾರಾಕ್ ಲಾಗ್ಚಾ ಪರಿಂ ಆಮಿಂ ಚಲೊಂಕ್ ಜಾಯ್!" ಧುವೆಕ್ ಸಮ್ಜಾಂವ್ಚೆಂ ತಿಣೆ ಪ್ರಯತ್ನ್ ಕೆಲೆಂ. ತಿ ಖಂಡಿತ್ ಜಾಣಾಂ ಆಸ್ಲ್ಲಿ ಶಬೀರ್ ಆಪ್ಲ್ಯಾ ಧುವೆಕ್ ಏಕ್ ಏರ್ ಹೊಸ್ಟೆಸ್ ಜಾಂವ್ಕ್ ಭಿಲ್ಕುಲ್ ದಿಂವ್ಚೊ ನಾ.
"ಅಮ್ಮೀ....!, ತುಂ ಮ್ಹಾಕಾ ಹೆಂ ಸಾಂಗ್....., ತುಂಯ್ ಎಕ್ ಚಲಿ ಜಾವ್ನ್ಚ್ ಹ್ಯಾ ಘರಾ ಯೇಂವ್ಕ್ ನಾಂಯ್? ಆಮಿಂ ಜೆಂ ಕಿತೆಂ ಆಪ್ಲಿ ಸಮಾಜ್ ಮ್ಹಣ್ತಾಂವ್ ತಿ ಸಮಾಜ್ ವೇಶ್ಯಾಕ್ ಫಾತರ್ ಮಾರುಂಕ್ ಸಕ್ತಾ ತರ್ ತ್ಯಾಚ್ ವೇಶ್ಯಾಕ್, ವೇಶ್ಯಾ ಜಾಯ್ನಾತ್ಲೆಲ್ಯಾ ಪರಿಂ ಆಡಾಂವ್ಕ್ ಕಿತ್ಯಾಕ್ ಸಕಾನಾ?"
ಆಲಿಯಾಚಾ ಸವಾಲಾಕ್ ದೊಗಾಂಯ್ ಲಾಗಿಂ ಕಾಂಯ್ ಜವಾಬ್ ನಾತ್ಲ್ಲಿ.
"ತುಂ ಜಾಣಾಂಯ್ ಕಿತ್ಯಾಕ್?" ಆಲಿಯಾಚ್ಚ್ ಪರ್ತ್ಯಾಕ್ ಉಲಯ್ಲೆಂ ".......ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ಸಮಾಜೆಕ್ ತ್ಯಾ ವೇಶ್ಯಾಚಿ ಗರ್ಜ್ ಆಸಾ. ದೆಕುನ್ಚ್ ಹಿ ಸಮಾಜ್ ಹಾಂಗಾ ವೇಶ್ಯಾಕ್ ಜಲ್ಮಾಯ್ತಾ ಆನಿ ತಿಚ್ಚ್ ಸಮಾಜ್ ತಿಕಾ ಸಮಾಜೆ ಥಾವ್ನ್ ಭಾಯ್ರ್ಯ್ ದವರ್ತಾ!"
ಆಲಿಯಾಚಾ ಮತಿಂತ್ ಕಿತೆಂ ಚಲ್ತಾ? ತೆಂ ಕಿತೆಂ ಆಶೆತಾ? ತೆಂ ಕಿತೆಂ ಚಿಂತಾ? ಮ್ಹಳ್ಳೆಂ ಸಾರಾಕ್ ಕಾಂಯ್ಚ್ ಸಮ್ಜಾಲೆಂ ನಾ. ತಿಚ್ಯಾ ಘರ್ಚ್ಯಾ ರಾಟಾವಳಿಂತ್ ತಿಕಾ ಆಪ್ಲ್ಯಾ ಕುಟ್ಮಾ ವಿಶ್ಯಾಂತ್ ಚಿಂತುಂಕ್ಚ್ ಸಾರ್ಕೊ ವೇಳ್ ಮೆಳಾನಾತ್ಲ್ಲೊ. ಆಶೆಂ ಆಸ್ತಾನಾ ಆಲಿಯಾನ್ ಚಿಂತ್ಚಾ ತಾಚಾ ಸಮಾಜೆಚಾ ವಿಶಿಂ ತಿ ಕಶಿ ಚಿಂತುಂಕ್ ಪಾವ್ತೆಲಿ?
"ಅಬ್ಬೂ......, ಹಾವೆಂ ಏರ್ ಹೊಸ್ಟೆಸ್ ಜಾಂವ್ಚಾಂತ್ ಕಿತೆಂ ವಾಯ್ಟ್ ಆಸಾ?" ಆಲಿಯಾ ಆತಾಂ ಬಾಪಯ್ ತೆವ್ಶಿಂ ಘುಂವ್ಲೆಂ.
"ವಾಯ್ಟ್....?" ಶಬೀರಾಚೊ ತಾಳೊ ಆತಾಂ ತಗ್ಸಾಲೊ "ವಾಯ್ಟ್ ಕಾಂಯ್ ನಾ ಬೇಟಾ. ಪುಣ್....!"
"ಪುಣ್ ಕಿತೆಂ ಅಬ್ಬೂ?"
"ಪಳೆ ಬೇಟಾ.... ಹಾಂವ್ ತರ್ಯ್ ತುಜ್ಯಾ ಹರ್ಯೇಕಾ ಹಟಾಕ್ ತುಜ್ಯಾ ಲ್ಹಾನ್ಪಣಾರ್ ಥಾವ್ನ್ ಮಾಂದುನ್ ಆಯ್ಲಾಂ ಆಸ್ತಾಂ, ಹೆಂ ಏಕ್ ತುಜೆಂ ಹಟ್ ಜ್ಯಾರಿ ಕರುಂಕ್ ಕಾಂಯ್ ಪಾಟಿಂ ಸರ್ಚೊಂ ನಾ. ಪುಣ್, ಫಾಲ್ಯಾಂ ತುಂ ನಿಖಾ ಜಾಂವ್ಚೆಂ ಚೆಡುಂ. ತುಜ್ಯಾ ನಿಖಾಕ್, ತುಜೆಂ ಹೆಂ ಕಾಮ್ ಆಡ್ ಯೇಂವ್ಕ್ ನುಜೊ ಬೇಟಾ. ನಾಸಿರ್ ಹಾಕಾ ತಯಾರ್ ಜಾತಲೊ....?"
ಶಬೀರ್ ಧುವೆಚಾ ಫುಡಾರಾಚಾ ಸಂಭಂಧಾ ವಿಶಿಂ ಚಡ್ ಚಿಂತಾಲೊ. ಆಲಿಯಾಕ್ ಆನಿ ತಾಚ್ಯಾ ಹ್ಯಾ ಘರಾಕ್ ಆಸ್ಚೊ ಸಂಭಂಧ್ ಆನಿ ಥೊಡ್ಯಾಚ್ ಥೆಂಪಾಚೊ ಮ್ಹಣೊನ್ ತೊ ಸಮ್ಜಾಲ್ಲೊ.
ಬಾಪಾಯ್ಚಿಂ ಉತ್ರಾಂ ಆಯ್ಕೊನ್ ಎಕಾ ಕ್ಷಣಾಕ್ ಆಲಿಯಾ ಆಜಾಪ್ ಜಾಲೆಂ.
"ಅಬ್ಬೂ, ತುಂ ಮ್ಹಜ್ಯೆ ವಿಶಿಂ ಚಿಂತಾಯ್? ವಾ ತ್ಯಾ ಹಾವೆಂ....?" ತೆಂ ಪುರ್ತೆಂ ಉಲಯ್ಲೆಂ ನಾ.
"ಆಲಿಯಾ....., ಆನಿ ಥೊಡ್ಯಾಚ್ ದಿಸಾನಿಂ, ತುಜೆಂ ನಿಖಾ ಜಾಲ್ಯಾ ಉಪ್ರಾಂತ್, ತುಜೆಂ ಘರ್ ಹೆಂ ನ್ಹಯ್, ಬಗಾರ್, ತುಕಾ ನಿಖಾ ಕರುನ್ ದಿಲ್ಲೆಂ ಘರ್ ತುಜೆಂ ಘರ್ ಜಾತೆಲೆಂ. ತ್ಯಾ ಘರಾಚಾ ಮರ್ಯಾದೆ ವಿಶಿಂ ತುವೆಂ ಚಿಂತುಂಕ್ ಜಾಯ್ ಬೇಟಾ...!"
"ಮರ್ಯಾದೆಕ್ ಕಿತೆಂ ವಾಯ್ಟ್ ಆಸಾ ಅಬ್ಬೂ? ಏಕ್ ಚಲಿ ಜಾವ್ನ್, ಹಾವೆಂ ಮ್ಹಜ್ಯಾ ಆಸ್ಥಿತ್ವಾಕ್ ಏಕ್ ರೂಪ್ ದೀವ್ನ್, ಹ್ಯಾ ಸಮಾಜೆ ಮುಕಾರ್ ಉಭೆಂ ಜಾಂವ್ಚೆಂ ತೆಂ ತುಂ ಚೂಕ್ ಮ್ಹಣೊನ್ ಚಿಂತಾಯ್?"
"ತಶೆಂ ನ್ಹಯ್ ಆಲಿಯಾ...! ತುಕಾ ಹಾವೆಂ ಸಾಂಗ್ಚೆಂ ಸಮ್ಜಾನಾ. ಯೆದೊಳ್ಚಾ ತುಜ್ಯಾ ಹಟಾ ಪರಿಂ, ಹ್ಯಾ ತುಜ್ಯಾ ವಿಚಾರಾಂತ್ಯ್ ತುಜೆಂ ಹಟ್ ತುಂ ಸೊಡಿನಾಂಯ್. ಏಕ್ ಪಾವ್ಟಿಂ ತುಜೆಂ ಹಟ್ ಸೊಡುನ್ ತುಂ ಚಿಂತುನ್ ಪಳೆ. ಉಪ್ರಾಂತ್ ತುಂ ಕಶೆಂ ಚಿಂತಾಯ್ ತಶೆಂ ಕರ್. ಪುಣ್ ಬೇಟಾ, ಏಕ್ ವಿಶಯ್ ಮಾತ್ರ್ ಉಡಾಸ್ ದವರ್! ಹೊ ತುಜೊ ಬಾಪಯ್ ಅಸ್ಲ್ಲ್ಯಾ ತಿತ್ಲೊ ಥೇಂಪ್ ತುಕಾ ಸಾಂಗಾತ್ ದೀಂವ್ಕ್ ಆಸ್ಚೊ ನಾ. ಹೆಂ ಉಡಾಸ್ ದವರ್....!" ಸಾಂಗ್ಲಲೊ ಶಬೀರ್ ಥಂಯ್ ಥಾವ್ನ್ ಭಿತರ್ ಚಲ್ಲೊ.
"ಅಬ್ಬು.... ಅಬ್ಬೂ...ಉ....ಊ....?"
ಧುವೆನ್ ಆಪಯಿಲ್ಲೆಂ ಆಯ್ಕಾಲ್ಯಾರ್ಯ್ ಶಬೀರಾನ್ ಪಾಟಿಂ ಘುಂವೊನ್ ಪಳೆಲೆಂ ನಾ.
ಆಲಿಯಾ ಆತಾಂ ಆಪ್ಲ್ಯಾ ಆವಯ್ ತೆವ್ಶಿಂ ಘುಂವ್ಲೆಂ. ಸಾರಾ ತರ್ಯ್ ದೊಗಾಂಯ್ಚೆಂ ಉಲೊಣೆಂ ಆಯ್ಕಾತಾಲಿ. ತಿಕಾ ಕಿತೆಂ ಕರ್ಚೆಂ ತೆಂ ಕಾಂಯ್ ಸಮ್ಜಾನಾತ್ಲ್ಲೆಂ. ಆಪ್ಲ್ಯಾ ಧುವೆಚಾ ಉಲವ್ಣ್ಯಾಕ್ ಕಾಂಯ್ ಜವಾಬ್ ದೀಂವ್ಕ್ ಸಕಾನಾಸ್ತಾನಾ, ಸಾಲಾ ಥಾವ್ನ್ ಉಟೊನ್ ಭಿತರ್ ಗೆಲ್ಲ್ಯಾ ಆಪ್ಲ್ಯಾ ಘೊವಾಚಾ ಪಾಟಿಕ್ಚ್ ತಿ ಪಳವ್ನ್ ರಾವ್ಲಿ.
ತಿಚಾ ಪುತಾಂಕ್, ಅಕ್ಬರಾಕ್ ಆನಿ ಸಲೀಮಾಕ್ ಕಶೆಂ ತರ್ಯ್ ತಿ ಸಮ್ಜಾಯ್ತಿ. ತಶೆಂ ತಿಚೆ ದೊಗ್ಯ್ ಪೂತ್ ತಾಂಚಾ ಆವಯ್ನ್ ಸಾಂಗ್ಲೆಲ್ಯಾ ಕಸಲ್ಯಾಯ್ ಉತ್ರಾಕ್ ನಾ ಮ್ಹಣ್ಚೆ ತಸಲೆ ನ್ಹಯ್. ರಝಿಯಾ ಜಾಲ್ಯಾರ್ಯ್ ತಶೆಂಚ್. ತೆಂ ಅಕ್ಬರಾಚಾ ಕುಶಿಕ್ ಚಡ್ ಆಸ್ತಾಲೆಂ. ಘರಾಂತ್ ತೆಂ ಕೊಣಾಯ್ಕ್ಯ್ ಮಾಂದಿನಾ ಜಾಲ್ಯಾರ್ಯ್ ಆಪ್ಲ್ಯಾ ವ್ಹಡ್ಲ್ಯಾ ಭಾವಾಕ್ ಅಕ್ಬರಾಕ್ ತೆಂ ಗೌರವಾನ್ ಮಾಂದ್ತಾಲೆಂ. ಆಪ್ಲೆಂ ವ್ಹಡ್ಲೆಂ ಭಯ್ಣ್ ಆಪ್ಣಾಕ್ ಪುರ್ತೊ ಸಾಂಗಾತ್ ದೀಂವ್ಕ್ ಸಲ್ವಾಲ್ಲ್ಯಾ ವೆಳಾರ್, ಆಪ್ಲ್ಯಾ ಆಶೆಚೊ ಸಾಕ್ರಿಫಿಸ್ ಕರುನ್ ಅಕ್ಬರಾನ್ ರಝಿಯಾಕ್ ಸಾಂಬಾಳ್ಲ್ಲೆಂ. ಸಲೀಮ್ ತರ್ಯ್ ಪಾಟ್ಲ್ಯಾ ಆನಿ ಮುಕ್ಲ್ಯಾಂ ಮಧೆಂ ಹೆವ್ಶಿಂ ತೆವ್ಶಿಂ ಆಸ್ಲ್ಲೊ. ರಝಿಯಾಕ್ ಪಾಟ್ಲ್ಯಾನ್ ಕೊಣ್ಯ್ ನಾತ್ಲ್ಲೊ. ಅಕ್ಬರಾಕ್ ವ್ಹಡ್ಲಿಂ ಕೊಣ್ಯ್ ನಾಸ್ತಾನಾ ಸಗ್ಳಿಂ ತಾಚ್ಯಾ ಪಾಟ್ಲ್ಯಾನ್ ಆಸ್ಲ್ಲ್ಯಾನ್ ಸಗ್ಳ್ಯಾಂಕ್ ತೊಚ್ಚ್ ವ್ಹಡ್ಲೊ ಜಾಲ್ಲೊ. ತಶೆಂ ಅಕ್ಬರಾಚೆ ಗೂಣ್ಯ್ ಸರ್ವಾಂಕ್ ಮೆಚ್ವೊಂಚೆ ತಸಲೆ.
ಆಪ್ಲ್ಯಾ ಘೊವಾನ್ ಆಲಿಯಾಕ್ ಜಿವಿತಾಂತ್ ತಾಚ್ಯಾಚ್ ಪಾಂಯಾರ್ ತೆಂ ಉಭೆಂ ಜಾಂವ್ಕ್ ಕಿತ್ಲೆಂ ಪ್ರಯತ್ನ್ ಕೆಲ್ಲೆಂ ನಾ? ಶಬೀರಾನ್ ಆನಿ ಸಾರಾನ್ ಮೆಳೊನ್ ಕಿತ್ಲೆ ಪಾವ್ಟಿಂ ತಾಕಾ ಸಾರ್ಕಿ ಎಕ್ ದಿಶಾ ದಾಖಂವ್ಕ್, ಆಪ್ಲ್ಯಾ ಆನ್ಭೋಗಾಕ್ ಆಲಿಯಾಚಾ ದೊಳ್ಯಾಂ ಮುಕಾರ್ ಉಗ್ತೆಂ ದವರ್ಲ್ಲೆಂ ನಾ? ಜಾಲ್ಯಾರ್ಯ್ ಆಲಿಯಾ ಕಾಂಯ್ಚ್ ಬದ್ಲಾಲ್ಲೆಂ ನಾ.
ಆಪ್ಲ್ಯಾ ಭುರ್ಗ್ಯಾಂಚಿ ಆಶಾ, ತಾಂಚಿಂ ಸಪ್ಣಾಂ, ತಾಂಚೆ ಆತ್ರೆಗ್, ತಾಂಚಿ ಖುಶಿ, ಕಿತೆಂ ತಿ ಮ್ಹಣೊನ್ ಹರ್ಯೆಕ್ ಆವಯ್ ಬಾಪಾಯ್ನ್ ಪಯ್ಲೆಂ ಚಿಂತುನ್ ಪಳಂವ್ಕ್ ಜಾಯ್ ಖಂಡಿತ್. ಹ್ಯಾ ಖಾತಿರ್ ಭುರ್ಗ್ಯಾ ವಯ್ರ್ ತಾಂಚಾ ಆವಯ್ ಬಾಪಾಯ್ಕ್ ಕಾಂಯ್ ಹಕ್ಕ್ ನಾ.? ಹ್ಯಾಚ್ ಖಾತಿರ್ ಆವಯ್ ಬಾಪಯ್ ಆಪ್ಲ್ಯಾ ಭುರ್ಗ್ಯಾಂಕ್ ಗುವಾ ಮುತಾಂತ್ಲೆಂ ವಯ್ರ್ ಕಾಡುಂಕ್ ಆಪ್ಲೆಂ ಜಿವಿತ್ಚ್ ಶರ್ತಾಕ್ ಸಮರ್ಪಿತಾತ್?
ಪಳಂವ್ಕ್ ಗೆಲ್ಯಾರ್ ಭುರ್ಗ್ಯಾಂಚೊ ಜಲ್ಮ್ , ತೊ ತಾಂಚೊ ಜಲ್ಮ್ ನ್ಹಯ್. ತಾಂಕಾಂ ತಾಂಚಾ ಆವಯ್ ಬಾಪಾಯ್ನ್ ಹ್ಯಾ ಸೊಭಿತ್ ಸಂಸಾರಾಂತ್ ಜಿಯೆಂವ್ಕ್ ದಿಂವ್ಚೆಂ ತೆಂ ಭಿಕ್! ಆಪ್ಲ್ಯಾ ಹಾತಾನಿಂ ಘೆತ್ಲೆಲ್ಯಾ ಹ್ಯಾ ಭಿಕೆಕ್ ತಿ ಭುರ್ಗಿಂ ಕಶೆಂ ಗಳ್ಸಿತಾತ್? ಆನಿ ತ್ಯಾ ಗಳ್ಸೊಣೆಂತ್ ತಿಂ ಕಿತ್ಲಿಂ ಯಶಸ್ವಿ ಜಾತಾತ್ ಮ್ಹಳ್ಳೆಂ ಸವಾಲ್.
ಎಕಾ ವಾಟೆನ್ ಹೆಂಯ್ ಸ್ಪಷ್ಟ್ ಕೀ, ಖಂಯ್ಚೆಂಯ್ ಭುರ್ಗೆಂ ಆಪುಣ್ ಜಲ್ಮೊಂಚಾ ಆದಿಂ ಖಂಯ್ಚಾಯ್ ಆವಯ್ ಬಾಪಯ್ ಲಾಗಿಂ ಹಾತ್ ವೊಡ್ಡಾವ್ನ್ ಭಿಕೆಕ್ ಬಸಾನಾ. ದೋನ್ ಕುಡಿಂಚಾ ವೊಡ್ನೆಕ್ ಜಾಂವ್, ದೋನ್ ಮತಿಂಚಾ ಆಶೆಕ್ ಜಾಂವ್, ದೋನ್ ಕಾಳ್ಜಾಂಚಾ ಮೊಗಾನ್ ಜಾಂವ್, ಯಾ ಪೃಕೃತೆಚಾ ನಿಯಾಮಾಕ್ ಜಾಂವ್, ದೋನ್ ಜೀವ್ ಸಾಂಗಾತಾ ಮೆಳೊನ್ ಎಕಾ ಜಿವಾಕ್ ಉತ್ಪತ್ತಿ ಕರ್ತಾನಾ, ತ್ಯಾ ಜಿವಾ ವಯ್ರ್ ತಾಕಾ ಉತ್ಪತ್ತಿ ಕೆಲ್ಲ್ಯಾಂಚೆಂ ಹಕ್ಕ್ ಕಶೆಂ ಯೆಂವ್ಚೆಂ?
ಸಾರಾ ಸಾಲಾಂತ್ಲ್ಯಾ ಸೊಫಾರ್ ಬಸೊನ್ ಚಿಂತಾಲಿ.ತಿಚ್ಯಾ ಮತಿಂತ್ ನಾನಾಂತರ್ ಚಿಂತ್ನಾ ಧಾಂವೊಂಕ್ ಲಾಗ್ಲಿಂ.
ಪೃಕೃತೆಚೆಂ ನಿಯಮ್ ಪಳಯ್ಲ್ಯಾರ್ ಉತ್ಪತ್ತಿಕ್ ಮಾತ್ರ್ ಎಕ್ವಟ್ ಆನಿ ಎಕ್ವಟಾಂತ್ ಮಾತ್ರ್ ಉತ್ಪತ್ತಿ ! ಉಪ್ರಾಂತ್.....?
ಉಪ್ರಾಂತ್ ಹರ್ ಏಕ್ ಏಕ್ ಜೀವ್ ಆಪಾಪ್ಲ್ಯಾ ಜಿವಾ ಸಾಂಗಾತಾ ಸ್ವತಂತ್ರ್!
ತರ್ ಆಲಿಯಾ?
ಆಲಿಯಾ ಆಜ್ ಸ್ವತಂತ್ರ್ ನ್ಹಯ್?
ಆಪ್ಲ್ಯಾ ಜಿವಿತಾಚಿ ಕಸಲಿಯ್ ವಿಂಚವ್ಣ್ ತೆಂ ಕರುಂಕ್ ಸಕಾನಾ?
ತಾಚ್ಯಾ ವಿಂಚವ್ಣೆಂತ್ ತಾಚ್ಯಾ ಜಿಣಿಯೆ ದಾತಾರಾಂಚೊ ಸ್ಥಾನ್ ಮಾನ್ ಖೆಳ್ ಖೆಳೊಂಕ್ ಸಕ್ತಾ?
ಫುಡಾರಾಚಾ ಜಿವಿತಾಂತ್, ಆಲಿಯಾಕ್, ಹಿ ಸಮಾಜ್, ಫಕತ್ತ್ ತಾಚ್ಯಾ ದಾತಾರಾಂಚಾ ನಾಂವಾನ್ ಯಾ ಜಿಣಿಯೆ ಸಾಂಗಾತಿಚಾ ನಾಂವಾನ್ ವಳ್ಕಾತಾ?
ತರ್ ಆಲಿಯಾಕ್ ತಾಚೆಂ ಮ್ಹಳ್ಳೆಂ ಕಾಂಯ್ ಆಸ್ಥಿತ್ವ್ ನಾ?
ಆಶೆಂ ತರ್...., ಹರ್ ಏಕ್ ಜೀವ್ ಆಪಾಪ್ಲ್ಯಾ ಜಿವಾ ಸಾಂಗಾತಾ ಸ್ವತಂತ್ರ್ ಕಸೊ ಜಾಂವ್ಚೊ?
ಚ್ಯಾರ್ ವೊಣೊದಿ ಭಿತರ್ಲ್ಯಾ ಭಂಧಡೆ ಥಾವ್ನ್ ಭಾಯ್ರ್ ವಚೊಂಕ್ ಆನಿ ಭಂಧಡೆಕ್ ಭಿತರ್ ಯೇಂವ್ಕ್ ಎಕ್ಚ್ ದಾರ್ ಆಸ್ಲ್ಲೆಂ. ಹ್ಯಾ ಭಂಧಡೆಚ್ಯಾ ದಾರಾ ಭಿತರ್ ರಾವೊನ್ ಹ್ಯಾ ಭಂಧಡೆ ಭಾಯ್ಲೊ ಉಜ್ವಾಡ್ ಪಳಂವ್ಚ್ಯಾಂಕ್, ಹೆಂ ದಾರ್ ಮುಕ್ತಿಚೊ ದೂತ್ ಜಾವ್ನ್ ದಿಸ್ತಾಲೆಂ ತರ್, ಹ್ಯಾ ಭಂಧಡೆಚಾ ದಾರಾ ಭಾಯ್ರ್ ಥಾವ್ನ್ ಹ್ಯಾ ಭಂಧ್ ವೊಣೊದಿ ಭಿತರ್ ತಿಳುಂಕ್ ಯೆಂವ್ಚ್ಯಾಂಕ್, ಹೆಂಚ್ ದಾರ್ ಕಯ್ದಿಪಣಾಚ್ಯಾ ವ್ಹೊವ್ಳಿಗೆಚೊ ದೂತ್ ಜಾವ್ನ್ ದಿಸ್ತಾ!
ಆಶೆಂಚ್ ಜಿವಿತ್!
ಜಶೆಂ ಆಜ್ ಆಲಿಯಾ ಆನಿ ತಾಚೆ ಸಾಂಗಾತಾ ಆಸ್ಲ್ಲ್ಯಾ ತಾಚ್ಯಾ ಆವಯ್ಕ್ ಹೆಂ ತಾಂಚೆಂ ಘರಾಚೆಂ ಹೆಂ ಸಾಲ್!
ಆಲಿಯಾ ಆನಿ ಸಾರಾ ದೊಗಾಂಯ್ ಜಲ್ಮಾನ್ ಚಲಿಯೆ ಜಾತಿಚಿಂಚ್ ತರ್ಯ್ ಆಯ್ಚಾ ಹ್ಯಾ ಪರಿಗತೆಂತ್, ತಿಂ ಚಿಂತ್ಪಾಂತ್ ಎಕಾಚ್ ಜಲ್ಮಾಚಾ ಜಾತಿಚಿಂ ನ್ಹಯ್ ಜಾಲ್ಲಿಂ.
ಆಲಿಯಾ, ಆಪ್ಲ್ಯಾ ಜಾಗ್ಯಾರ್, ಆಪ್ಲ್ಯಾ ಪರಿಗತೆಚಿಂ ಚಿಂತ್ನಾಂ ಚಿಂತಾಲೆಂ ತರ್, ತಾಚಿ ಆವಯ್ ಸಾರಾ, ತಿಚ್ಯಾ ಜಾಗ್ಯಾರ್ ರಾವೊನ್, ತಿಚ್ಯಾ ಚಲಿಯೆಪಣಾಚಾ ಚಿಂತ್ನಾನಿಂ ಚಿಂತಾಲಿ.
"ಅಮ್ಮಿ...!" ಸುಮಾರ್ ವೆಳಾ ಉಪ್ರಾಂತ್ ಆಲಿಯಾ ಉಲಯ್ಲೆಂ.
ಸಾಲಾ ಥಾವ್ನ್ ಭಿತರ್ ಗೆಲ್ಲ್ಯಾ ಆಲಿಯಾಚಾ ಬಾಪಾಯ್ಕ್, ಆಪ್ಲ್ಯಾ ಘೊವಾಕ್ಚ್ ಪಳವ್ನ್ ಚಿಂತ್ನಾಂ ಆಟಂವ್ಚಿ ಸಾರಾ, ಆತಾಂ ಆಪ್ಲ್ಯಾ ಧುವೆನ್ ಆಪಯಿಲ್ಲೆಂ ಆಯ್ಕೊನ್ ಹೆವ್ಶಿಂ ಘುಂವ್ಲಿ.
"ಅಮ್ಮಿ.... ಹಾವೆಂ ಏರ್ ಹೊಸ್ಟೆಸ್....."
""ಏಕ್ ಮಿನಿಟ್ ಆಲಿಯಾ!" ಧುವೆಚ್ಯಾ ಉತ್ರಾಂಕ್ ಸಾರಾನ್ ಮಧೆಂಚ್ ಕಾತರ್ಲಿಂ.
"ಸಾಂಗ್ ಅಮ್ಮಿ!"
"ಪುತಾ, ತುಕಾ ಹಾವೆಂ ಜಾಂವ್ ಯಾ ತುಜ್ಯಾ ಅಬ್ಬುನ್ ಜಾಂವ್ ಕಿತೆಂಯ್ ಸಾಂಗ್ಲ್ಯಾರ್ ತೆಂ ತುಜ್ಯಾ ಬರ್ಯಾಕ್ ಮ್ಹಣೊನ್ ತುಕಾ ದಿಸಾನಾ. ತುಜ್ಯಾ ಭಾಂವ್ಡಾಂಚಿ ಸಲಹಾ ಘೆಂವ್ಚಿ ತುಕಾ ಗರ್ಜ್ ನಾ. ತರ್..... ತುಜ್ಯಾ ಮತಿಂತ್ ತುಕಾ ಆಮ್ಚಾ ಖುಶೆ ವಿರುದ್ದ್ಚ್ ಚಿಂತ್ನಾಂ ಕಶಿಂ ಯೆತಾತ್? ಆಮ್ಚೆ ಶಿವಾಯ್ ಕೊಣ್ಯ್ ತರ್ಯ್ ಆಮ್ಕಾಂ ಕಳಿತ್ ನಾತ್ಲೆಲ್ಯಾ ಪರಿಂ ತುಕಾ ಮಾರ್ಗದರ್ಶನ್ ದಿತಲೊ ಪುಣಿಂ ಆಸಾ?"
ಸಾರಾಚಾ ತಾಳ್ಯಾಂತ್ ಭಾವುಕತಾ ಆಸ್ಲ್ಲಿ. ಜಿವಿತಾಂತ್ ಪಯ್ಲೆ ಪಾವ್ಟಿಂ ತಿಣೆಂ ತಿಚಾ ಸಂಸಾರಾ ಥಾವ್ನ್ ಭಾಯ್ರ್ ವಚೊನ್ ಚಿಂತುಂಕ್ ಪ್ರಯತ್ನ್ ಕೆಲ್ಲೆಂ.
"ತುಮಿಂ ಆಶೆಂ ಸಮ್ಜಾತಾತ್?" ಶಾಂತ್ಪಣಿಂ ಆಪ್ಲ್ಯಾ ಆವಯ್ಕ್ ಆಲಿಯಾನ್ ಪಾಟಿಂ ಸವಾಲ್ ಕೆಲೆಂ.
"ಹಾಂವ್ ತೆಂಚ್ ಆತಾಂ ಸಮ್ಜೊಂಕ್ ಆಶೆತಾಂ. ತುಂ ನೆಣಾಂಯ್ ಆಲಿಯಾ ಚಲಿಯೆಚೆಂ ಜಿವಿತ್ ಕಿತೆಂ ತೆಂ....! ತುಜ್ಯೆ ಸಾಂಗಾತಾ ಆಸ್ತಾನಾ ಹಾವೆಂ ತುಜ್ಯೆ ವಿಶಿಂ ಚಿಂತುಂಕ್ ಪಡ್ತಾ. ತುಂ ನಾತ್ಲೆಲ್ಯಾ ವೆಳಾರ್ ಮ್ಹಾಕಾ ಉರ್ಲೆಲ್ಯಾ ಮ್ಹಜ್ಯಾಂಚಾ ವಿಶಿಂ ಚಿಂತುಂಕ್ ಪಡ್ತಾ ಆನಿ ವಿಶೆವ್ ಆಶೆವ್ನ್ ನಿದೊಂಕ್ ವೆಚಾ ವಗ್ತಾ ಹಾವೆಂ ಮ್ಹಜ್ಯಾ ಘೊವಾ ವಿಶಿಂ ಚಿಂತುಂಕ್ ಪಡ್ತಾ!"
ಉಲಂವ್ಚಾ ಸಾರಾಚಾ ತಾಳ್ಯಾಂತ್ ಎಕಾ ಥರಾಚ್ಯಾ ಭೊಗ್ಣಾಂಚೆ ಉಮಾಳೆ ಉಪ್ಯೆತಾಲೆ.
"ಆಜ್ ಕಿತ್ಯಾಕ್ ಅಮ್ಮಿ ತುಂ ಆಶೆಂ ಉಲಯ್ತಾಯ್? ಕೆದ್ನಾಂಯ್ ತುಂ ಆಶೆಂ ಉಲಯಿಲ್ಲಿ ನಾ!" ಆಲಿಯಾಕ್ ಆಪ್ಲ್ಯಾ ಆವಯ್ಚಾ ಉತ್ರಾಂಚೊ ಮಿಸ್ತೆರ್ ಸಮ್ಜಾಲೊ ನಾ.
"ಬೇಟಾ...., ತತ್ವ್ ಶಾಸ್ತಿರ್ ಶಿಕ್ಲ್ಲೊ ಮಾತ್ರ್ ಏಕ್ ತತ್ವ್ ಶಾಸ್ತ್ರಿ ಯಾ ಫಿಲೋಸೊಫರ್ ನ್ಹಯ್. ತಶೆಂ ಜಾಲ್ಲೆಂ ಜಾಲ್ಯಾರ್ ಆಮ್ಚಾ ಮಾಲ್ಗಡ್ಯಾಂಚಾ ತೊಂಡಾನಿಂ ಪಾರಂಪರಿಕ್ ಜಾವ್ನ್ ವ್ಹಾಳೊನ್ ಆಯಿಲ್ಲಿಂ ಜಾಣ್ವಾಯೆಚಿಂ ಉತ್ರಾಂ ವ್ಹಾಳೊನ್ ಯೆತಿಂ ನಾಂತ್. .....ತಶೆಂಚ್ ತುಂ!"
"ಹಾಂವ್....!?"
ಅಚಾನಕ್ ಆಘಾತ್ ಜಾಲ್ಲ್ಯಾ ಪರಿಂ ಹಾಂಕ್ರೆವ್ನ್ ಆಲಿಯಾಚಾ ದೊಳ್ಯಾಂಚೊ ಆಸ್ಡ್ಯೊ ವಯ್ರ್ ವಚೊನ್ ತಾಚ್ಯೆ ದೊಳೆ ರೂಂದಾಲೆ.
"ಬೇಟಾ ಆಲಿಯಾ, ತುಜಿ ಹಿ ಸೊಭಾಯ್ ಆಸಾ ಪಳೆ, ಸದಾಂಚ್ ತುವೆಂ ಆರ್ಶ್ಯಾ ಮುಕಾರ್ ರಾವೊನ್ ಪಳವ್ನ್ ಖುಶಿ ಪಾಂವ್ಚಿ....., ತಿ ತುಜಿ ನ್ಹಯ್! ಅಲ್ಲಾಹ್ನ್ ತುಕಾ ದಿಲ್ಲಿ ತಿ ಏಕ್ ಕಾಣಿಕ್. ತಶೆಂಚ್ ತುಜೆಂ ಹೆಂ ಚಲಿಯೆಪಣ್ ಆಸಾ ಪಳೆ ತೆಂ ತುಜೆಂ ನ್ಹಯ್. ಅಲ್ಲಾಹ್ತಲಾನ್ ತುಜೆ ತಾಬೆಂತ್ ದಿಲ್ಲೆಂ ಕೊಣಾ ಎಕ್ಲ್ಯಾಚೆಂ ಮಾನ್ ಮರ್ಯಾದಿಚೆಂ ಫುಲ್. ಹ್ಯಾ ಫುಲಾಕ್ ಆನಿ ತ್ಯಾ ಕಾಣಿಕೆಕ್ ತುವೆಂ ಸದಾಂಚ್ ಸಾಂಬಾಳುಂಕ್ ಆಸಾ. ತುಂ ಎದೊಳ್ ಆಮ್ಚಾ ವೊಡ್ತಾಂತ್ ಆಸ್ತಾನಾ ಆಮಿಂ ತುಜಿ ಜತನ್ ಕೆಲ್ಯಾ. ತೆದಾಳಾ ತುಂ ಲ್ಹಾನ್ ಆಸ್ಲ್ಲೆಂಯ್. ಆತಾಂ ತುಂ ವ್ಹಡ್ ಜಾಲಾಂಯ್. ಆತಾಂ ತುವೆಂಚ್ ತುಕಾ ಸಮ್ಜೊಂಕ್ ಜಾಯ್!"
"ಮ್ಹಳ್ಯಾರ್?"
"ಮ್ಹಳ್ಯಾರ್, ಏಕ್ ಪಾವ್ಟಿಂ ತುಕಾಚ್ ತುಂ ಸೊಧ್ಚೆಂ ಪ್ರಯತ್ನ್ ಕರ್!"
"ಸಮ್ಜಾಲೆಂ ಅಮ್ಮಿ ತುಂ ಕಿತೆಂ ಉಲಯ್ತಾಯ್ ತೆಂ!"
ಆಪ್ಲ್ಯಾ ಆವಯ್ಚಾ ತೊಂಡಾರ್ ಖಂಚಯಿಲ್ಲಿ ಆಪ್ಲಿ ದೀಶ್ಟ್ ಆಲಿಯಾನ್ ಆಪ್ಲ್ಯಾ ಆವಯ್ಚ್ಯಾ ತೊಂಡಾ ಥಾವ್ನ್ ಸಕಯ್ಲ್ ಗಳವ್ನ್ ಸವ್ಕಾಸ್ ಆಪ್ಲ್ಯಾ ಮುಖಮಳಾಕ್ ತ್ಯಾ ಸಾಲಾಂತ್ಲ್ಯಾ ಜನೆಲಾ ತೆವ್ಶಿಂ ಘುಂವ್ಡಾಯ್ಲೆಂ.
ಭಾಯ್ರ್ ಪಳೆಲ್ಲ್ಯಾ ತಾಚ್ಯಾ ದಿಷ್ಟೆಕ್, ಭಾಯ್ಲಿಂ ತಿಂ ವ್ಹಡ್ಲಿಂ ವ್ಹಡ್ಲಿಂ ಬಾಂದ್ಪಾಂ ದಿಸ್ತಾಲಿಂ ತರ್ಯ್ ಆಲಿಯಾಚಾ ದೊಳ್ಯಾಂಕ್ ಮಾತ್ರ್ ಭಾಯ್ರ್ ಕಾಂಯ್ಚ್ ನಾ ತಶೆಂ ಭೊಗ್ಲೆಂ.
ಸಗ್ಳೆಂ ಶೂನ್ಯ್!
ಸಂಪೂರ್ಣ್ ಮೌನ್!!
ಅಖಂಡ್ ಸ್ರಷ್ಟಿಚ್ ವೀರಾನ್!!!
ಹ್ಯಾ ದಿಷ್ಟೆಚಾ ವೀರಾನ್ ಮೌನಾಂತ್, ಆಲಿಯಾಕ್ ಆತಾಂ ಸಗ್ಳೆಂ ಶೂನ್ಯ್ ಕಶೆಂ ದಿಸೊಂಕ್ ಲಾಗ್ಲೆಂ.
ತ್ಯಾ ವಯ್ಲ್ಯಾ ದಿಷ್ಟೆಂತ್.....?
ತೊಚ್ಚ್ ಮೊಳಾಬ್!
ತಿಂಚ್ ಕುಪಾಂ!!
ತಿಂಚ್ಚ್ ಸುಕ್ಣಿಂ!!!
ಹ್ಯಾ ದೋನ್ ದಿಷ್ಟೆ ಮಧೆಂ, ಆಲಿಯಾ ಆತಾಂ ಆಪ್ಣಾಕ್ಚ್ ಸೊಧುಂಕ್ ಲಾಗ್ಲೆಂ. ಹಾಂಗಾ..... ಥಂಯ್, ಹೆವ್ಶಿಂ....., ತೆವ್ಶಿಂ, ದೊಳ್ಯಾಂ ದೀಷ್ಟ್ ಧಾಂವ್ತಾ ತಿತ್ಲ್ಯಾ ಪಾಸೊನ್ ಆಪ್ಲ್ಯಾ ಆಸ್ಥಿತ್ವಾಕ್ ತೆಂ ಸೊಧಿಲಾಗ್ಲೆಂ.
ನಾ!
ಖಂಯ್ಚರ್ಯ್ ನಾ!!
ಅನಂತಾಚಾ ಅನಂತಾಕ್ಯ್ ನಾ!!!
ಎಕಾ ಚಲಿಯೆಚೆಂ ಆಸ್ಥಿತ್ವ್, ಖಂಯ್ಚರ್ಯ್ ಭಾಗಿಂತ್ಲೆಂ ಫುಲ್ ಜಾವ್ನ್, ಸೊಭಿತ್ ಫುಲೊನ್ ಹಾಸ್ಚಾ ಪರಿಂ ಆಲಿಯಾಚಾ ದಿಷ್ಟೆಕ್ ಬೆಟ್ಲೆಂ ನಾ. ಖಂಯ್ಚರ್ಯ್, ಚಲಿ, ಆಪ್ಲ್ಯಾ ಸ್ವತಂತ್ರ್ಪಣಾಂತ್, ಆಲಿಯಾಚೆಂ ರೂಪ್ ಘೆವ್ನ್, ತ್ಯಾ ಮೊಳಾಬಾರ್ ಜಾಂವ್, ತ್ಯಾ ಕುಪಾಂ ಮಧೆಂ ಜಾಂವ್, ಯಾ ತ್ಯಾ ಸುಕ್ಣ್ಯಾಂ ಪಾಟಿರ್ ಜಾಂವ್ ಉಭೊನ್ ವೆಚೆಂ ತಾಕಾ ದಿಸ್ಲೆಂ ನಾಂ.
ದಿಸ್ಲೆಂ ಜಾಲ್ಯಾರ್,
ಫಕತ್ತ್ ತಾಂಬ್ಡ್ಯಾ ಬಣಾಂತ್ ರಂಗ್ ಬದ್ಲುಂಚೊ ಮೊಳಾಬ್, ಕುಪಾಂ ಮಧೆಂ ವ್ಹಾಳೊನ್ ವೆಚಿಂ ಉಭಾಳ್ ದುಖಾಂ, ಬಂದುಕೆಚಾ ಫಾರಾಕ್ ಭಿಯೆವ್ನ್ ಧಾಂವ್ ಮಾರ್ಚೆ ಸುಕ್ಣ್ಯಾ ಜಾತಿಚೆ ಜೀವ್, ಆನಿ....., ಆನಿ......, ಆನಿ ತ್ಯಾ ವಾರ್ಯಾಂತ್ ಆಯ್ಕೊನ್ ಯೆಂವ್ಚಿ ತಿ ಬೋಬ್ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ಚ್ ಆಲಿಯಾಕ್ ದಿಸ್ಲೆಂ ನಾ ಯಾ ತಾಚ್ಯಾ ಕಾನಾಂಕ್ ಆಯ್ಕಾಲೆಂ ನಾ.
ತರ್ ಮ್ಹಾಕಾಚ್ ಹಾಂವ್ ಖಂಯ್ ಸೊಧುಂ?
ಇಸ್ಕೊಲಾಚಾ ಭಾಯ್ಲ್ಯಾ ರಸ್ತ್ಯಾರ್, ನೆಣ್ತ್ಯಾ ಬಾಳಾಕ್ ಪಾಟಿರ್ ಉಮ್ಕಾಳಾವ್ನ್ ರಸ್ತ್ಯಾಕ್ ಜಾಡು ಮಾರ್ಚಾ ತ್ಯಾ ಮೆಳ್ಕುಟ್ಯಾ ಕಾಪ್ಡಾಕ್ ನ್ಹೆಸ್ಲ್ಲ್ಯಾ ತರ್ನಾಟ್ಯಾ ಸತ್ರಾ ವರ್ಸಾಂಚಾ ಚೆಡ್ವಾಚಾ ದೊಳ್ಯಾಂ ದಿಷ್ಟೆಂತ್?
ತ್ಯಾ ಸಿಗ್ನಲಾರ್, ಆಪುಣ್ ಬಾಪಯ್ ಸಾಂಗಾತಾ ಆಪ್ಲ್ಯಾ ಕಾರಾರ್ ವೆತಾನಾ, ಆಪ್ಣಾಚೆಂ ವ್ಹಡ್ಪಣ್ ಪಳವ್ನ್ ರಸ್ತ್ಯಾ ದೆಗೆರ್ ಥಾವ್ನ್ ಧಾಂವೊನ್ ಯೇವ್ನ್ ಹಾತ್ ಬಾಸೆನ್ ಜೇಂವ್ಕ್ ಕಾಂಯ್ ಥೊಡೆಂ ದಾನ್ ಕರ್ ಮ್ಹಣೊನ್ ದೀನ್ ಪಣಿಂ ಕಾರಾಚಾ ಆರ್ಶ್ಯಾ ಸಾಮ್ಕಾರ್ ಉಭೆಂ ಜಾಂವ್ಚಾ ತ್ಯಾ ಪಾಂಚ್ ವರ್ಸಾಂಚಾ ಚೆಡ್ವಾಚಾ ದೊಳ್ಯಾನಿಂ ಉಪ್ಯೆಂವ್ಚಾ ಭುಕೆಂತ್?
ತ್ಯಾ ಸಮಾಜೆಂತ್ಲೆ, ಆಪುಣ್ ವ್ಹಡ್ಲೆ ಮನಿಸ್ ಮ್ಹಣೊನ್ ಚಿಂತ್ಲೆಲ್ಯಾಂಚಾ ಘರಾ ಟೆಲಿಫೋನ್ ಸೌಲಬ್ಯ್ ದೀಂವ್ಕ್ ಮ್ಹಣೊನ್, ರಸ್ತ್ಯಾ ದೆಗೆಚಾ ರೂಕಾಚಾ ಆಡ್ ಫಾಂಟ್ಯಾಕ್, ಆಪ್ಲ್ಯಾ ಕಾಪ್ಡಾನ್ಚ್ ಪಾಳ್ಣೆಂ ಕರುನ್, ತ್ಯಾ ಪಾಳ್ಣ್ಯಾಂತ್ ಕಾಲ್ ಜಲ್ಮ್ ದಿಲ್ಲ್ಯಾ ಬಾಳಾಕ್ ಸಾಂಡುನ್, ರಸ್ತ್ಯಾ ದೆಗೆನ್ ಹಾತಿಂ ಪಿಕ್ಕಾಸ್ ಘೆವ್ನ್ ಆಪ್ಲೆಂ ಬಾಂಳ್ತಿಪಣ್ ದಾಡಾಂವ್ಚಾ ತ್ಯಾ ಬಾಯ್ಲೆಚಾ ನಶೀಬಾಂತ್?
ಆಪ್ಣೆಂ ಪಯ್ಣ್ ಕರ್ಚೆಂ ಸೊಭಿತ್ ಕಾರ್, ತೆಂ ಹಾಲೊನ್ ಧಲೊನ್ ವಚಾನಾ ಜಾಂವ್ಚಾಕ್, ಆಪ್ಲ್ಯಾ ಮಾತ್ಯಾರ್ ಹ್ಯಾ ದನ್ಪರಾ ಭರಾಕ್, ಖಾಲಿ ಪಾಂಯಾನಿಂ ತೊ ಜಲ್ಲಿ ಫಾತ್ರಾ ಪಿಟೊ ವ್ಹಾವವ್ನ್, ರಸ್ತೊ ಸಾರ್ಕೊ ಕರ್ಚಾ ತ್ಯಾ ಬರ್ಲೆಲ್ಯಾ ಗುರ್ವಾರ್ ಬಾಯ್ಲೆಚಾ ಫುಡಾರಾಂತ್?
ಖಂಯ್ ಸೊಧುಂ ಹಾಂವ್ ಖಂಯ್ ಸೊಧುಂ?
"ಸಾಂಗ್ ಅಮ್ಮಿ, ಹಾಂವ್ ಆಲಿಯಾಕ್ ಖಂಯ್ ಸೊಧುಂ?"
ಆಲಿಯಾಕ್ ಕಳಿತ್ ನಾತ್ಲ್ಲ್ಯಾ ಪರಿಂಚ್ ಸಿಂತಿಮೆಂತಾಚಾ ಉಮಾಳ್ಯಾಂ ಮುಕಾರ್ ತಾಚ್ಯಾ ತೊಂಡಾ ಥಾವ್ನ್ ಸವಾಲ್ ಭಾಯ್ರ್ ಪಡ್ಲೆಂ.
ಎಕಾ ಕ್ಷಣಾಕ್ ಆಲಿಯಾಕ್ ತಾಣೆಂ ಪಳೆಲ್ಲ್ಯಾ ಚಲಿಯೆಚೆಂ ಜಿವಿತಾ ಪಿಂತುರ್ ತಾಚ್ಯಾ ದೊಳ್ಯಾಂ ಮುಕಾರ್ ಆಯ್ಲೆಂ.
ತಾಚ್ಯಾ ಪಾಟ್ಲ್ಯಾನ್, ತ್ಯಾ ರಸ್ತ್ಯಾ ವಯ್ಲ್ಯಾ ಸಿಗ್ನಲಾರ್, ಭಿಕ್ ಮಾಗೊನ್ ಆಸ್ಲ್ಲ್ಯಾ ನೆಣ್ತ್ಯಾ ಚೆಡ್ವಾಚಾ ಕಾನ್ಸುಲಾರ್ ಹ್ಯಾ ಸಮಾಜೆನ್ ವ್ಹಾಜಯಿಲ್ಲಿಂ ಥಾಪ್ಡಾಂ, ಆಲಿಯಾಚಾ ಕಾನಾಂಕ್ ಘಡ್ಗಡ್ಯಾ ಪರಿಂ ಮಾರುನ್ ಗೆಲಿಂ. ತೆಂ ಸಂಪೂರ್ಣ್ ದೆದೆಸ್ಪರ್ ಜಾವ್ನ್ ಮೌನ್ ಜಾಲೆಂ.
"ಬೇಟಾ ಆಲಿಯಾ....!" ಸಾರಾನ್ ಆಪ್ಲ್ಯಾ ಹಾತಾನಿಂ ಆಲಿಯಾಚಾ ಹಾತಾಕ್ ಧರ್ಲೆಂ.
"ಆಲಿಯಾ? ಬೇಟಾ....... ಮ್ಹಾಕಾ ಪಳೆ!" ಆಲಿಯಾಚಾ ಆವಯ್ನ್ ಆತಾಂ ಆಲಿಯಾಚಾ ಹಾತಾಕ್ ಧರುನ್ ವೊಡುನ್, ಆಲಿಯಾಚಿ ದೀಷ್ಟ್ ಭಾಯ್ಲ್ಯಾ ಮೊಳಾಬಾ ಥಾವ್ನ್ ಹೆವ್ಶಿಂ ವೊಡುಂಕ್ ಪ್ರಯತ್ನ್ ಕೆಲೆಂ.
"ಬೇಟಾ ಆಲಿಯಾ!"
ಪರ್ತ್ಯಾಕ್ ಸಾರಾ ಆಪಯ್ತಾನಾ, ಆಲಿಯಾನ್ ಆತಾಂ ಆಪ್ಲಿ ತಕ್ಲಿ ಹೆವ್ಶಿಂ ಘುಂವ್ಡಾವ್ನ್, ಏಕ್ ಕ್ಷಣಾಕ್ ಆವಯ್ಕ್ಚ್ ಪಳವ್ನ್, ಉಪ್ರಾಂತ್ ಸವ್ಕಾಸ್ ತೆಂ ಆಪ್ಲಿ ತಕ್ಲಿ ಬಾಗಾವ್ನ್ ಧರ್ಣಿಕ್ ಪಳೆಲಾಗ್ಲೆಂ. ಮುಕಾರ್ ಧರ್ಣಿರ್ ಸೊಭಿತ್ ಸೊಭಯಿಲ್ಲ್ಯಾ ಮಾರ್ಬಲ್ ಫಾತ್ರಾ ವಯ್ರ್ ತಾಂಬ್ಶಾ ರಂಗಾಂತ್ ಸೊಭಿತ್ ವಿಣ್ಲ್ಲಿ ರತ್ನಕಾಂಬೊಳ್, ತ್ಯಾ ಮಾರ್ಬಲ್ ಫಾತ್ರಾಂಚಾ ಸೊಭಾಯೆಕ್ ದೊಡ್ತಿ ಸೊಭಾಯ್ ದಿತಾಲಿ. ಆಲಿಯಾ ಆತಾಂ ತ್ಯಾ ಕಾಂಬೊಳಿಚೆರ್ ವಿಣ್ಲೆಲ್ಯಾ ತ್ಯಾ ಫುಲಾಂಚಾ ವಿನ್ಯಾಸಾಕ್ಚ್ ಆಪ್ಲಿ ದೀಷ್ಟ್ ಜೊಕುನ್ ಪಳೆಲಾಗ್ಲೆಂ.
"ಆಲಿಯಾ, ಮ್ಹಜ್ಯಾ ಉತ್ರಾಂಚೊ ಮತ್ಲಬ್ ತೊ ನ್ಹಯ್ ಪುತಾ!"
"ಹಾಂ ಅಮ್ಮಿ, ತುವೆಂ ಆತಾಂ ಮ್ಹಾಕಾ ಚಲಿ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ತುಜ್ಯಾ ಅಸ್ಪಷ್ಟ್ ಉತ್ರಾಂನಿಂ ಸಮ್ಜಾಯ್ಲೆಂಯ್. ಬರೆಂ......!, ಆತಾಂ ತುಂ ಮ್ಹಾಕಾ ಸಾಂಗ್ "ಹಾಂವ್ ಮ್ಹಳ್ಯಾರ್ ಕಿತೆಂ? ತುಜ್ಯಾ ಆಲಿಯಾಚೆಂ ’ಹಾಂವ್’ ಮ್ಹಳ್ಯಾರ್ ಕಿತೆಂ?
ಧುವೆಚಾ ಹ್ಯಾ ಸವಾಲಾಕ್ ಸಾರಾಚಾ ಜಿಬೆರ್ ಕಾಂಯ್ ಉತ್ರಾಂ ಸುಟೊಂಕ್ ನಾಂತ್. ತಿತ್ಲ್ಯಾ ವೆಗ್ಗಿಂ ತಿಂ ಸುಟೊಂಕ್ ಸಾದ್ಯ್ಯ್ ನಾತ್ಲ್ಲೆಂ. ತಿಣೆಂ ಆತಾಂ ಚಿಂತುಂಕ್ ಆಸ್ಲ್ಲೆಂ.
"ಅಮ್ಮಿ.....,!" ಆಲಿಯಾಚ್ ಉಲಯ್ಲೆಂ ".....ತುಮಿಂ ಚಿಂತಾತ್ ಜಾಂವ್ಕ್ ಪುರೊ ಹೆಂ ತುಮ್ಚೆಂ ಆಲಿಯಾ, ತುಮ್ಚಾ ಉರ್ಲೆಲ್ಯಾ ಭುರ್ಗ್ಯಾಂ ಪರಿಂ ಕಿತ್ಯಾಕ್ ನಾ? ಹಾಂವ್ಯ್ ತಶೆಂಚ್ ಆಸ್ಲ್ಲಿಂ ಜಾಲ್ಯಾರ್ ಕಿತ್ಲೆಂ ಬರೆಂ ಆಸ್ಲ್ಲೆಂ. ಪುಣ್ ಅಮ್ಮಿ ಕಿತೆಂ ಜಾಲ್ಯಾರ್ಯ್ ಹಾಂವ್ ತುಮ್ಚಾ ಮಾನಾಕ್ ಆನಿ ಮರ್ಯಾದೆಕ್ ಕಾಂಯ್ ವಾಯ್ಟ್ ಕರ್ತೆಲಿಂ ಮ್ಹಣೊನ್ ಚಿಂತಿನಾಕಾತ್. ಹಾವೆಂ ಮ್ಹಜೆಂಯ್ ಚಿಂತುಂಕ್ ಆಸಾ ಅಮ್ಮಿ..... ಮ್ಹಜ್ಯಾ, ’ಹಾಂವ್’ ಮ್ಹಳ್ಳ್ಯಾಕ್ ಹಾವೆಂ ಸೊಧುಂಕ್ ಆಸಾ. ತ್ಯಾ ದೆಕುನ್...."
"ಆಲಿಯಾ?"
ಎಕಾಚ್ಚ್ಫರಾ ಆಯ್ಕೊನ್ ಆಯ್ಲೆಲ್ಯಾ ಬಾಪಾಯ್ಚಾ ತಾಳ್ಯಾಕ್ ಪಾರ್ಕುನ್ ತಾಳೊ ಆಯ್ಕೊನ್ ಆಯಿಲ್ಲ್ಯಾ ಕುಶಿಂನ್ ಆಲಿಯಾನ್ ಆನಿ ಸಾರಾನ್ ಘುಂವೊನ್ ಪಳೆಲೆಂ.
ಶಬೀರ್ ಥಂಯ್ಚರ್ ತಾಂಚೆ ಪಾಟ್ಲ್ಯಾನ್ ಉಭೊ ಜಾಲ್ಲೊ.
"ಆಲಿಯಾ, ಹ್ಯಾ ವಿಶಯಾಂತ್ ತುಂ ಅಮ್ಮಿಲಾಗಿಂ ಚಡ್....." ಮುಕಾರ್ ಸಾಂಗೊಂಕ್ ಆಸ್ಚೆಂ ತೆಂ ಸಾಂಗಿನಾಸ್ತಾನಾ "ಹಾವೆಂ ತುವೆಂ ಸಾಂಗ್ಲ್ಲ್ಯಾ ವಿಶಿಂ ಚಿಂತುನ್ ಪಳೆಲೆಂ. ತುಕಾ ತರ್ ಏರ್ ಹೊಸ್ಟೆಸ್ ಜಾಂವ್ಚೆಂ ಮನ್ ಆಸಾ ಜಾಲ್ಯಾರ್, ತುಕಾ ಹಾಂವ್ ಆಡಾಯ್ನಾ!" ಸಾಂಗ್ಲ್ಲೊ ಶಬೀರ್ ಆತಾಂ ಆಪ್ಲ್ಯಾ ಬಾಯ್ಲೆಕ್ ಪಳವ್ನ್, "ಹಾಂವ್ ಥೊಡೆಂ ಭಾಯ್ರ್ ವಚೊನ್ ಯೆತಾಂ...... ಮ್ಹಾಕಾ ಇಲ್ಲೆಂ ಕಾಮ್ ಆಸಾ." ಮ್ಹಣೊನ್ ಥಂಯ್ ಥಾವ್ನ್ ಭಾಯ್ರ್ ಚಲ್ಲೊ.
ಶಬೀರಾನ್ ಆಪ್ಲ್ಯಾ ಧುವೆಚಾ ಖುಶೆಕ್ ಖಾಲ್ತಿಮಾನ್ ಘಾಲುನ್ ಮಾತ್ರ್ ಆಲಿಯಾಕ್ ತಾಣೆಂ ಏರ್ ಹೊಸ್ಟೆಸ್ ಜಾಂವ್ಚಿ ಪರ್ವಣ್ಗಿ ದಿಲ್ಯಾ ಮ್ಹಣೊನ್ ಆಲಿಯಾ ಆನಿ ಸಾರಾ ದೊಗಾಂಯ್ ಸಾರ್ಕಿಂ ಜಾಣಾಂ ಜಾಲ್ಲಿಂ. ಶಬೀರಾಚಾ ಮುಕಾರ್ ದುಸ್ರಿ ವಾಟ್ಯ್ ನಾತ್ಲೆಲಿ. ಆಪ್ಲ್ಯಾ ಧುವೆಕ್ ಕಿತ್ಲೆಂ ಸಮ್ಜಂವ್ಕ್ ಪ್ರಯತ್ನ್ ಕೆಲ್ಯಾರ್ಯ್, ತೆಂ ಆಪ್ಲ್ಯಾ ಮತಿಂತ್ ಕಿತೆಂ ಆಸಾ ತ್ಯಾಚ್ ವಿಶಿಂ ಚಿಂತಾ ಶಿವಾಯ್ ಕೊಣೆಯ್ ಸಾಂಗ್ಲ್ಲೆಂ ಆಯ್ಕೊಂವ್ಚೆಂ ಚೆಡುಂ ತೆಂ ಭಿಲ್ಕುಲ್ ನ್ಹಯ್ ಮ್ಹಣೊನ್ ತಾಚ್ಯಾ ಜಲ್ಮಾ ಥಾವ್ನ್ ತಾಚಿಂ ಆವಯ್ ಬಾಪಯ್ ಜಾಣಾಂತ್. ಜಾಲ್ಯಾರ್ಯ್ ಧುವೆಚಾ ಬರ್ಯಾ ಫುಡಾರಾ ವಿಶಿಂ ಚಿಂತ್ಚಾ ತಾಣಿಂ ಆಲಿಯಾಕ್ ಕೆದಾಳಾಯ್ ಆಶೆಂಚ್ ಸಮ್ಜಂವ್ಚಾ ಪರಿಂ ಆಜ್ಯ್ ಸಮ್ಜಯಿಲ್ಲೆಂ.
"ಬರೆಂ ಆಲಿಯಾ. ಅಬ್ಬುನ್ ತುಕಾ ಪರ್ವಣ್ಗಿ ದಿಲಿ ಮ್ಹಣ್ತಾನಾ, ತಾಣೆಂ ಸಾರ್ಕೆಂ ಚಿಂತುನ್ಚ್ ಸಾಂಗ್ಲಾಂ ಆಸ್ತಲೆಂ. ಬರೆಂ ತರ್, ತುಂ ಬಸ್....... ಮ್ಹಾಕಾ ಥೊಡೆಂ ಕಾಮ್ ಆಸಾ.....!"
ಸೊಫಾ ವಯ್ಲಿ ಉಟ್ಲೆಲಿ ಸಾರಾಸವ್ಕಾಸ್ಭಿತರ್ ಚಮ್ಕಾಲಿ.
****************
"ಜರ್ ತರ್ ಆಲಿಯಾ ಆಪ್ಲೆಂ ಜಾಲ್ಲೆಂ ಜಾಲ್ಯಾರ್ ತೆಂ ಆಪ್ಣಾ ಸಾರ್ಕೆಂ ಕಿತ್ಯಾಕ್ ನಾ?"
ರಾತಿಚೆಂ ಜೆವಾಣ್ ಜಾವ್ನ್ ನಿದೊಂಕ್ ಗೆಲ್ಲ್ಯಾ ಶಬೀರಾಕ್ ಆನಿ ಸಾರಾಕ್ ತಾಂಚ್ಯಾ ದೊಳ್ಯಾಂ ಮುಕಾರ್ ನೀದ್ ಮ್ಹಳ್ಳಿ ತಿ ಆಯ್ಲಿ ನಾ. ಧುವೆಚಾ ಚಿಂತ್ನಾನಿಂ ಬುಡೊನ್ ತಾಂಚಾ ಮತಿಚಿ ಶಾಂತಿ ತಾಣಿಂ ಹೊಗ್ಡಾಯಿಲ್ಲಿ. ಏಕ್ಚ್ಚ್ ಚಿಂತಾಪ್ ದೊಗಾಂಯ್ಚಾ ಮನಾಂತ್ ಕಾಂತಯ್ತಾಲೆಂ. ಜರ್ ತರ್ ಆಲಿಯಾ ಆಪ್ಣಾಚೆಂ ಚೆಡುಂ ಜಾಲ್ಯಾರ್ ತೆಂ ಆಪ್ಣಾ ಸಾರ್ಕೆಂ ಕಿತ್ಯಾಕ್ ನಾ? ಆಪ್ಣಾ ಸಾರ್ಕೆಂ ತೆಂ ಕಿತ್ಯಾಕ್ ಚಿಂತಿನಾ? ಆಮ್ಚ್ಯಾ ಸಗ್ಳ್ಯಾಂ ಪ್ರಾಸ್ ತೆಂ ವೆಗ್ಳೆಂಚ್ ಕಿತ್ಯಾಕ್ ಆಸಾ?
ಖಾಟಿಯೆರ್ ಉದಾರೊ ನಿದ್ಲಲೊ ಶಬೀರ್ ಆತಾಂ ಆಪ್ಲ್ಯಾ ದಾವ್ಯಾ ಕುಶಿಕ್ ಪರ್ತಾಲೊ.
ಘೊವಾಚಾ ಮತಿಂತ್ಲ್ಯಾ ತಳ್ಮಳ್ಯಾಂಕ್ ಹ್ಯಾ ತಾಣಿಂ ನಿದ್ಚ್ಯಾ ಖಾಟಿಯೆರ್ ಘಡಿಯೆಕ್ ಏಕ್ ಪಾವ್ಟಿಂ ಶಬೀರಾನ್ ಬದ್ಲುಂಚಾ ತಾಚ್ಯಾ ಆವ್ತಾರಾಂತ್ ಪಳೆವ್ನ್ಚ್ ಸಾರಾ ಸಮ್ಜಾಲಿ. ತಿಣೆಂ ಶಬೀರಾಕ್ ಆಪ್ಣಾ ಥಾವ್ನ್ ಕಿತ್ಲೆಂ ಸಾದ್ಯ್ ಆಸಾ ತಿತ್ಲೆಂ ಸಮಧಾನ್ ಕೆಲ್ಲೆಂ. ಪುಣ್ ಶಬೀರ್....?
ಆಲಿಯಾಚಾ ಆತಾಂಚಾ ತಾಚ್ಯಾ ನಿರ್ಧಾರಾನ್ ತಾಚ್ಯಾ ಬಾಪಾಯ್ಚೆರ್ ಬರೊಚ್ಚ್ ಪ್ರಭಾವ್ ಘಾಲ್ಲೊ. ತಾಚ್ಯಾ ಬಾಪಾಯ್ನ್ ತಾಚ್ಯಾ ಸಮಾಜೆಂತ್ ಇತ್ಲ್ಯಾ ವರ್ಸಾಂ ಥಾವ್ನ್ ರುತಾ ಕೆಲ್ಲಿ ಮರ್ಯಾದ್, ಆಜ್ ಆಲಿಯಾಚಾ ಹ್ಯಾ ನಿರ್ಧಾರಾಕ್ ಲಾಗೊನ್, ತಿಆಪ್ಲ್ಯಾ ಮುಳಾ ಥಾವ್ನ್ ಹಾಲೊಂಕ್ ಲಾಗ್ಲ್ಲಿ.
ಘೊವಾಚೆ ತಳ್ಮಳೆ ಸಮ್ಜೊನ್, ದುಸ್ರೆ ಕುಶಿಂನ್ ಸಾರಾ ಕಾಂಯ್ಚ್ ಉಲಂವ್ಕ್ ಜಾಯ್ನಾಸ್ತಾನಾ ಆಪುಣ್ಯ್ ಉಜ್ವ್ಯಾ ಕುಶಿಂನ್ ಪರ್ತಾಲಿ. ಜಿವಿತಾಂತ್ ಪಯ್ಲ್ಯಾ ಪಾವ್ಟಿಂ, ತಿಣೆಂ, ಆಲಿಯಾಕ್ ಆಪ್ಣಾ ಥಾವ್ನ್ ಜಾತಾ ತಿತ್ಲೆಂ ಸಮ್ಜಾಯಿಲ್ಲೆಂ. ಪುಣ್ ಹಿ ಆಪ್ಣಾಚಿ ಸಮ್ಜಾವ್ಣಿ ಕಾಂಯ್ ಉಪ್ಕಾರಾಕ್ ಪಡ್ಚಿ ನ್ಹಯ್ ಮ್ಹಳ್ಳೆಂ ತಿಕಾ ಸಮ್ಜಾಲ್ಲೆಂ.
ಮತಿಚೆಂ ಸಮಾಧಾನ್ ನಾತ್ಲಲೊ ಮನಿಸ್, ಕಿತ್ಲ್ಯಾ ವ್ಹಡ್ಲ್ಯಾ ರಾವ್ಳೆರಾಂತ್ಯ್ ಎಕ್ ಸುಖಾಚಿ ನೀದ್ ಕಾಡುಂಕ್ ಸಕಾನಾ ಮ್ಹಳ್ಳೆಂ ತೆಂ, ಆಜ್, ಪಯ್ಲ್ಯಾ ಪಾವ್ಟಿಂ ಶಬೀರಾಕ್ ಸಮ್ಜಾಲೆಂ. ತ್ಯಾ ಕುಶಿನ್ ಸಾರಾ......, ಹ್ಯಾ ಕುಶಿನ್ ಹಾಂವ್....., ಕಿತೆಂ ಕರುಂ? ಶಬೀರಾಕ್ ಕಾಂಯ್ ಸಮ್ಜಾಲೆಂ ನಾ. ಹಿ ಕೂಸ್ ಆನಿ ತಿ ಕೂಸ್ ಮ್ಹಣೊನ್ ತಾಣಿಂ ದೊಗಾಂಯ್ನಿಂ ಸಭಾರ್ ಪಾವ್ಟಿಂ ಹೆವ್ಶಿಂ ತೆವ್ಶಿಂ ಲೊಳೊನ್ ಜಾಲ್ಲೆಂ. ಆತಾಂ ದುಸ್ರೊ ಉಪಾಯ್ ನಾಸ್ತಾನಾ ಶಬೀರ್ ಪರ್ತ್ಯಾಕ್ ಉದಾರೊ ಪಡ್ಲೊ.
"ಸಾರಾ.....!" ತೊ ವ್ಹಳೂ ಉಲಯ್ಲೊ.
ಘೊವಾನ್ ಆಪಯಿಲ್ಲೆಂ ಆಯ್ಕೊನ್ ಉಜ್ವ್ಯಾ ಕುಶಿಕ್ ನಿದ್ಲೆಲಿ ಸಾರಾಉದಾರಿ ಜಾಲಿ.
"ಕಿತ್ಲೊ ಖುಶ್ ಜಾಲ್ಲೊಂ ಹಾಂವ್.......!ಜೆದ್ನಾಂ ಆಲಿಯಾಕ್ ತುವೆಂ ಜಲ್ಮ್ ದಿಲ್ಲ್ಯಾ ವೆಳಾರ್! ಮ್ಹಾಕಾ ತೆಂ ತುಜ್ಯಾಚ್ ಸಾರ್ಕ್ಯಾಚೆಂ ದಿಸ್ಲ್ಲೆಂ. ತಾಚ್ಯಾ ದೊಳ್ಯಾನಿಂ, ಮ್ಹಾಕಾ ತುಜೆಂಚ್ ರೂಪ್ ದಿಸ್ಲ್ಲೆಂ. ಪುಣ್ ಹೆಂ ಆಲಿಯಾ ಆಶೆಂ......!"
ಶಬೀರಾಚಾ ತಾಳ್ಯಾಂತ್ ಎಕಾ ಥರಾಚೆ ಕಳ್ವಳೆ ಆನಿ ಭೊಗ್ಣಾಂಚೆ ವಳ್ವಳೆ ಉಮಾಳುನ್ ಯೆತಾತ್ ಮ್ಹಳ್ಳ್ಯಾ ಪರಿಂ ಸಾರಾಕ್ ದಿಸ್ಲೆಂ.
ತಾಣೆಂ ಉಲಂವ್ಚೆಂಯ್ ಸಾರ್ಕೆಂ. ನಿಜಾಯ್ಕ್ಯ್ ಶಬೀರಾನ್ ಆಲಿಯಾಚೊ ವಿಷೇಶ್ ಮಾಫಾನ್ ಮೋಗ್ ಕೆಲ್ಲೊ.
ಘೊವಾಚಾ ಭಗ್ಣಾಂ ಮುಕಾರ್ ಸಾರಾ ಕಾಂಯ್ಚ್ ಉಲಯ್ಲಿ ನಾ. ತಿ ತಶಿಚ್ಚ್ ಶಬೀರಾಕ್ ಪಳವ್ನ್ ರಾವ್ಲಿ.
"ಕಿತೆಂಯ್ ಜಾಂವ್ದಿ......! ಆಲಿಯಾ ಆಪುಣ್ ಏಕ್ ಚಲಿ, ಆಪುಣ್ ಏಕ್ ಸ್ತ್ರೀ ಮ್ಹಣೊನ್ ಕಿತ್ಯಾಕ್ ಮಾಂದುನ್ ಘೆನಾ?" ಥೊಡೊ ವೇಳ್ ಮೌನ್ ಜಾಲ್ಲೊ ಶಬೀರ್, ".....ತುವೆಂ, ತುವೆಂಚ್ ಪಳೆಲೆಂಯ್ ತೆಂ ಆಪ್ಲ್ಯಾ ಬಾಪಯ್ ಲಾಗಿಂ ಕಶೆಂ ವರ್ತನ್ ಕರ್ತಾ ತೆಂ!" ಶಬೀರಾಚಾ ಉತ್ರಾಂನಿ ದೂಖ್ ಸ್ಪಶ್ಟ್ ಝಳ್ಕಾತಾಲೆಂ.
ಸಾರಾ, ಏಕ್ ಪತಿಣ್ ಜಾವ್ನ್,ತಿ ಆಪ್ಲ್ಯಾ ಘೊವಾಕ್ ಸದಾಂಚ್ ಮಾನ್ ದಿತಾಲಿ. ಹೆಂ ತಿಚೆಂ ಧರ್ಮ್ ಮ್ಹಣೊನ್ ತಿ ಪಾತ್ಯೆತಾಲಿ. ಆಶೆಂ ಆಸ್ತಾನಾ ಆಪ್ಲಿಂ ಭುರ್ಗಿಂಚ್ ಬಾಪಾಯ್ಚಾ ಖುಶೆ ವಿರೋಧ್ ವಚೊನ್, ತ್ಯಾ ವರ್ವಿಂ ತಿಚ್ಯಾ ಘೊವಾಕ್ ದೂಖ್ ಭೊಗಾತ್ ಜಾಲ್ಯಾರ್ ತಿ ಸೊಸ್ತೆಲಿ ತರೀ ಕಶಿ? ಫಕತ್ತ್ ಇತ್ಲೆಂಚ್ ತಿಚ್ಯಾ ದುಖಿಚೆಂ ಕಾರಾಣ್ ನ್ಹಯ್. ತಿಚ್ಯಾ ಭುರ್ಗ್ಯಾಂ ಪಯ್ಕಿ ಅಕ್ಬರ್, ಸಲೀಮ್, ಆನಿ ರಝಿಯಾ ಬಾಪಾಯ್ನ್ ಸಾಂಗ್ಲ್ಲೆಂ ಕೆದ್ನಾಂಚ್ ಮಿರ್ವೊನ್ ಗೆಲ್ಲಿಂ ನ್ಹಯ್ ಆಸ್ತಾಂ ಹ್ಯಾ ಆಲಿಯಾಕ್ ಮಾತ್ರ್ ಇತ್ಲೆಂ ಹಟ್ ಖಂಯ್ ಥಾವ್ನ್ ಆಯ್ಲೆಂ ಮ್ಹಳ್ಳೆಂಚ್ ತಿಚ್ಯಾ ದುಖಾಕ್ ಚಡ್ ಕಾರಾಣ್.
"ಆಲಿಯಾ ಆಜ್ ಆಶೆಂ ಜಾಲಾಂ ಜಾಲ್ಯಾರ್ ತಾಕಾ ಆಮಿಂಚ್ ಕಾರಾಣ್!"
ಸಾರಾನ್ ಉದಾರೆಂ ನಿದ್ಲೆಲ್ಯಾ ಕಡೆನ್ ಥಾವ್ನ್ ವಯ್ಲ್ಯಾ ಸೀಲಿಂಗಾಕ್ ಪಳವ್ನ್ ಆಫ್ರಾದ್ ಆಪ್ಣಾಚಾಚ್ ಮಾತ್ಯಾರ್ ಘೆತ್ಲೊ.
"ತೆಂ ಲ್ಹಾನ್ ಭುರ್ಗೆಂ ಆಸ್ತಾನಾ......!" ತಿಚ್ಚ್ ಉಲಯ್ಲಿ. ".......ಜಾಣಾಂಯ್ ತುಂ? ತುವೆಂಚ್ ತಾಕಾ ಸಳ್ಗಿ ದಿಲ್ಲಿ. ಮಾಂಯ್ನ್ ತುಕಾ ಕಿತ್ಲೆ ಪಾವ್ಟಿಂ ಸಾಂಗ್ಲ್ಲೆಂ...... ತಿ ಆಸ್ತಾ ವರೇಗ್ ತಿ ಪುರ್ಪುರೊನ್ ಆಸೊಂದಿ ಮ್ಹಣ್ತಾಲೊಯ್. ಆತಾಂ ಪಳೆ....!"
ಸಾರಾಚಾ ಉತ್ರಾಂನಿಂ ಶಬೀರಾಕ್ ಆಪ್ಲ್ಯಾ ಆವಯ್ಚೊ ಉಡಾಸ್ ಜಿವೊ ಜಾಲೊ. ಎಕಾ ಕ್ಷಣಾಚಾ ಆವ್ದೆಂತ್, ತಿ ಆಪ್ಲ್ಯಾ ಮುಕಾರ್ ಜಿವಿ ಜಿವಿಚ್ ದಿಸ್ತಾ ತಶೆಂ ತಾಕಾ ಭೊಗ್ಲೆಂ.
"ಪುತಾ ಶಬೀರ್, ಆಲ್ಲಾಹ್ತಲಾನ್ ಚಲಿಯೆಕ್ ಚಲ್ಯಾ ಖಾತಿರ್ ರಚ್ಲಾಂ. ಆಶೆಂ ದೊಗಾಂನಿಂ ಸಾಂಗಾತಾ ಮೆಳೊನ್ ಆಪ್ಲೆಂ ಕುಟಾಮ್ ವ್ರದ್ಧಿ ಕರುಂಕ್ ಆನಿ ಹ್ಯಾ ಸೊಭಿತ್ ಸಂಸಾರಾಂತ್ ಸೊಭಿತ್ ಜಿಣಿ ಜಿಯೆಂವ್ಕ್! ಪುಣ್, ಆಲಿಯಾ ಆಶೆಂಚ್ ವ್ಹಡ್ ಜಾಲೆಂ ಜಾಲ್ಯಾರ್, ತುಜ್ಯಾ ಜಿವಿತಾಚೆ ನಿಮಾಣೆ ದೀಸ್, ತುಕಾ ಮಸ್ತ್ ದೂಖ್ ದೀಂವ್ಕ್ ಪಾವ್ತೆಲೆ!"
ವ್ಹಯ್! ಶಬೀರಾಚಾ ಆವಯ್ನ್ ಉಚಾರ್ಲೆಲಿಂ ಉತ್ರಾಂ ಸತ್ ಜಾಲ್ಲಿಂ. ಆಲಿಯಾ ನೆಣ್ತೆಂ ಭುರ್ಗೆಂ ಆಸ್ತಾನಾ ಆಪ್ಣಾಕ್ ಕಾಂಯ್ ಸಮ್ಜೊಂಕ್ ನಾತ್ಲೆಲೆಂ. ತೆದ್ನಾಂ, ಬಾಯ್ಲೆಚೆಂ ಜಾಂವ್ ಆವಯ್ಚೆಂ ಜಾಂವ್ ಉತಾರ್ ಕಾನಾರ್ ಘೆತ್ಲಲೆಂ ನಾ. ಆತಾಂ......?
ಶಬೀರ್ ಆಪ್ಲ್ಯಾ ಮನಾಂತ್ಚ್ ಉಲಯ್ಲೊ.
ಆಯ್ಚಾ ರಾತಿಂ, ಶಬೀರಾಚಾ ಹಾತಾಂತ್ ಜಾಂವ್ ಸಾರಾಚಾ ಹಾತಾಂತ್ ಜಾಂವ್ ಕಾಂಯ್ಚ್ ನಾತ್ಲ್ಲೆಂ. ಸಗ್ಳೆಂ ಆಲಿಯಾಚಾ ಚಿಂತ್ಪಾಚೆರ್ ಹೊಂದೊನ್ ಆಸ್ಲ್ಲೆಂ.
ಭುರ್ಗ್ಯಾಪಣಾರ್ ಥಾವ್ನ್ ಆಲಿಯಾ, ತಾಚ್ಯಾ ಸ್ವಭಾವಾ ವರ್ವಿಂ ಎಕ್ಸುರೆಂಚ್ ಜಾವ್ನ್ ಜಿಯೆಲಾಂ. ತಾಚ್ಯಾ ಎಕ್ಸುರ್ಪಣಾಂತ್ ತೆಂ ಆಪ್ಲ್ಯಾ ಆಪಾರ್ಟ್ಮೆಂಟಾ ಭಾಯ್ರ್ ಸುಖ್ ಆನಿ ಸಂತೊಸ್ ಆಶೆಲೆಂ. ಆಪ್ಲ್ಯಾ ಹಟ್ಟಾನ್ ಆನಿ ಗರ್ವಾನ್ ಆಪ್ಲ್ಯಾಚ್ ಘರಾ ಆಪ್ಣಾಚೆಂ ಕಾಂಯ್ ನಾ ಮ್ಹಳ್ಳೆಂ ಚಿಂತಾಪ್ ತಾಚ್ಯಾ ಮತಿಂತ್ ಉದೆಲೆಂ. ತಾಚ್ಯಾ ಚಿಂತ್ಪಾಕ್ ಸಾಂಗಾತ್ ಜಾವ್ನ್, ತ್ಯಾ, ತಾಣೆಂ ನಿದ್ಚಾ ಕುಡಾಚಾ ಜನೆಲಾ ಥಾವ್ನ್ ಭಾಯ್ರ್ ಪಳೆತಾನಾ, ಥೊಡ್ಯಾಚ್ ಪಯ್ಸ್ ತಿಂ ಲ್ಹಾನ್ ಲ್ಹಾನ್ ಚಾಲಿಚಿಂ ಘರಾಂಚ್ ತಾಕಾ ದಿಸ್ತಾಲಿಂ. ಥಂಯ್ ಹಾಂಗಾ ಜೊಪ್ಡಿಂ, ಥೊಡಿಂ ತಗ್ಡಾಚಾ ತಟ್ಟ್ಯೆನ್ ಬಾಂದ್ಲ್ಲಿಂ, ಥೊಡಿಂ ಸಿಮೆಟ್ ಶೀಟಾಚಿಂ, ಥೊಡಿಂ ನಿಳ್ಶಾ ರಂಗಾಚಾ ಪ್ಲಾಸ್ಟಿಕಾಚಿಂ. ತ್ಯಾ ಪಾಕ್ಯಾಂ ವಯ್ರ್ ಥಂಯ್ ಹಾಂಗಾ ಕಿತೆಂ ಕಿತೆಂ ಕಚ್ರೊ ದವರ್ಲೆಲ್ಯಾ ಪರಿಂ ದಿಸ್ತಾಲೆಂ.
ಹೆವ್ಶಿಂ ಲಾಗಿಂಚ್ ವಿಮಾನ್ ನಿಲ್ದಾನ್. ಘಡಿಯೆ ಘಡಿಯೆ ವಾರ್ಯಾರ್ ಉಟ್ಚಿಂ ತಿಂ ವಿಮಾನಾಂ. ತ್ಯಾ ವಿಮಾನಾಂಕ್ ಥಂಯ್ ಹಾಂಗಾ ವೆಗ್ಳೊ ವೆಗ್ಳೊ ರಂಗ್. ಹ್ಯಾ ರಂಗಾಂತ್ ತಾಂಚಿ ಸೊಭಾಯ್. ಹ್ಯಾ ವಿಮಾನಾಂಚಾ ತಾಂಚಾ ರಂಗಾನ್ ತಿಂ ಖಂಯ್ಚಾ ದೇಶಾ ಥಾವ್ನ್ ಉಭೊನ್ ಅಯ್ಲ್ಯಾಂತ್ ಮ್ಹಣೊನ್ ಪಾರ್ಕುಂಕ್ ಯೆತಾ ತೆಂ ಆಲಿಯಾಕ್ ತ್ಯಾ ವೆಳಾರ್ ಕಳಿತ್ ನಾತ್ಲೆಲೆಂ. ಹೆಂ ತಾಚ್ಯಾ ಬಾಪಾಯ್ ಥಾವ್ನ್ಚ್ ತೆಂ ಶಿಕ್ಲ್ಲೆಂ.
ಆಪ್ಲ್ಯಾ ಅರ್ಗಂಟಾನ್ ವ್ಹಡ್ಲಿಮಾಂಯ್ಚಾ ಪುರ್ಪುರ್ಯಾಂಕ್ ಆಯ್ಕೊನ್ ಆನಿ ಆಪ್ಲ್ಯಾ ಆವಯ್ಚಾ ಮಾರಾಂಕ್ ಖಾವ್ನ್, ಆಲಿಯಾ ಭಿತರ್ಲ್ಯಾ ನಿದ್ಚಾ ಕುಡಾಂತ್ ಬಸೊನ್ ರಡ್ತಾನಾ, ತ್ಯಾ ಜನೆಲಾ ಭಾಯ್ಲ್ಯಾನ್ ವಿಮಾನ್ ಉಭೊನ್ ಯೆಂವ್ಚೆಂ ಆಯ್ಕೊನ್, ಖುಶ್ ಜಾವ್ನ್, ಆಪ್ಲೆಂ ರಡ್ಣೆಂ ರಾವವ್ನ್ ಜನೆಲಾ ಲಾಗಿಂ ಯೇವ್ನ್, ವಿಮಾನಾಕ್ ಪಳವ್ನ್ ಆವಯ್ಚಾ ಮಾರಾಂಚಿ ದೂಖ್ ನ್ಹಯ್, ತ್ಯಾ ಮಾರಾಂಚೊ ಉಡಾಸ್ ವಿಸ್ರಾತಾಲೆಂ.
ಭುರ್ಗ್ಯಾಪಣಾರ್, ದೂಖ್ಃ ತಿ ಕಸಲಿಯ್ ಜಾಂವ್, ತಿ ಕ್ಷಣಿಕ್. ತ್ಯಾ ದುಖಿಚೊ ಉಡಾಸ್ ಮಾತ್ರ್ ರಡ್ನ್ಯಾಚಾ ಲಾಂಬಾಯೆಕ್ ಕಾರಾಣ್. ಕಿತ್ಲ್ಯಾ ವೆಗ್ಗಿಂ ದುಖಿಚೊ ಉಡಾಸ್ ವಿಸ್ರಾತಾ ತಿತ್ಲ್ಯಾ ವೆಗ್ಗಿಂ ದೂಖ್ ಥಾಂಬ್ತಾ.
ತಶೆಂಚ್ ಆಲಿಯಾ!
ದೊಳ್ಯಾಂ ಮುಕ್ಲೆಂ ವಿಮಾನ್ ಉಭೊನ್ ಖಿಣಾನ್ ನಪಂಯ್ಚ್ ಜಾತಾನಾ ಮೊಳಾಬಾ ವಯ್ರ್ ಪಾಸಾಯೊ ಮಾರ್ಚಿಂ ಸುಕ್ಣಿಂ, ತಾಂಚೆ ವಯ್ರ್ ಪಾಲಂವ್ ವೊಡ್ಲೆಲಿಂ ತಿಂ ರೂಪಾಂ ನಾತ್ಲೆಲಿಂ ಧವಿಂ ಧವಿಂ ಕುಪಾಂ ಪಳೆತಾನಾ, ಆಲಿಯಾ ಕಸಲ್ಯಾಗೀ ಎಕಾ ದುಸ್ರ್ಯಾಚ್ ಸಂಸಾರಾಕ್ ಪಾವ್ತಾಲೆಂ. ಹ್ಯಾ ಆಪ್ಲ್ಯಾ ಸಂಸಾರಾಚಾ ಭಾಯ್ರ್ ಕಿತೆಂ ತರ್ಯ್ ಆಸಾ ಮ್ಹಣೊನ್ ತೆಂ ಚಿಂತಾಲೆಂ. ಥಂಯ್ ತ್ಯಾ ಮೊಳಾಬಾರ್ ಆಪ್ಣೆಂ ಸುಕ್ಣ್ಯಾಂ ಸಾಂಗಾತಾ ಉಬ್ಚೆಂ, ಕುಪಾಂ ಮಧೆಂ ಖೆಳ್ಚೆಂ, ಭಿಲ್ಕುಲ್ ತ್ಯಾ ಟಿ.ವಿ. ಚೆರ್ ದಾಖಂವ್ಚಾ ಕಾರ್ಟೂನಾಂತ್ ಪಳೆಲ್ಲ್ಯಾ ಪರಿಂ....! ರಂಗ್ ರಂಗೀನ್ ಪಿಂತುರಾ ತಾಚ್ಯಾ ದೊಳ್ಯಾಂ ಮುಕಾರ್ ಯೇವ್ನ್, ಆಲಿಯಾ ಆಪ್ಲ್ಯಾಚ್ ಕಾಲ್ಪನಿಕ್ ಸಂಸಾರಾಂತ್ ಆಸ್ತಾಲೆಂ.
ದೀಸ್ ವೆತಾಂ ವೆತಾಂ, ತಾಕಾ ಪ್ರಾಯ್ ಭರ್ತಾಂ ಭರ್ತಾಂ, ಆಲಿಯಾಚಿಂ ಎಕ್ಸುರ್ಪಣಾಚಿಂ ಚಿಂತ್ನಾಂ, ನೆಣ್ತಿಂ ಆಸ್ಲೆಲಿಂ ತಿಂ ಜಾಣ್ತಿಂ ಜಾವ್ನ್ ಯೆತಾಲಿ. ಭುರ್ಗ್ಯಾಪಣಾಚೊ ತಾಚೊ ಸಂಸಾರ್ ಆತಾಂ ತಾಚ್ಯಾ ದೊಳ್ಯಾಂ ಮುಕ್ಲೊ ಮಾಯಾಗ್ ಜಾಲ್ಲೊ. ಕಾಲ್ಪನಿಕ್ಪಣಾ ಥಾವ್ನ್ ಆಲಿಯಾ ಖರ್ಯಾಪಣಾಕ್ ಪಾವ್ಲೆಂ. ತಾಕಾ ಆತಾಂ ಸಗ್ಳೆಂ ಸಮ್ಜಾತಾಲೆಂ. ತೆಂ ಚಿಂತುಂಕ್ ಸಕ್ತಾಲೆಂ. ತಾಚ್ಯಾ ಸ್ವಭಾವಾಂತ್ ಚಲಿಯೆ ಜಾತಿಚೆಂ ಮೊವಾಳ್ಪಣ್ ಆಯ್ಲೆಂ. ಪುಣ್....
ದಿಸಾಚಾ ಉಜ್ವಾಡಾನ್ ಆಲಿಯಾಚಾ ದೊಳ್ಯಾಂ ಮುಕಾರ್ ದಾಖವ್ನ್ ದಿಲ್ಲ್ಯಾ ಘಡಿತಾಂತ್ಲಿಂ ಸತಾಂ, ಮನ್ಶ್ಯಾ ಜಿವಿತಾಚಿಂ ಲುಟ್ಲ್ಲಿಂ ಹಕ್ಕಾಂ, ಝುಜಾಂ, ಥಂಯ್ ಹಾಂಗಾ ಆಯ್ಕೊನ್ ಯೆಂವ್ಚಿ ದಗ್ದೊಣಿ, ದೊಳ್ಯಾಂ ಫುಡೆಂ ದಿಸೊನ್ ಯೆಂವ್ಚಿಂ ಚಲಿಯೆಚಾ ನಾನಾಂತರ್ ರುಪಾಚಿಂ ಪಿಂತುರಾಂ, ತಾಕಾ ತಾಚ್ಯಾ ಘರಾಂತ್ ತಾಚ್ಯಾ ಆವಯ್ ಬಾಪಾಯ್ನ್ ಸಾಂಗ್ಚಿ ಬೂದ್ಬಾಳ್, ಆಜೆಚಿಂ ಸಮ್ಜೊಣೆಚಿಂ ಉತ್ರಾಂ ಕಿತ್ಯಾಕ್ಗೀ ಪಟ್ಕಿರಿಂ ಮ್ಹಳ್ಳ್ಯಾ ಪರಿಂ ದಿಸ್ಲಿಂ.
ಮನಿಸ್!
ಸಂಸಾರಾರ್ ಸಗ್ಳೆ ಮನಿಸ್ಚ್!!
ವಯ್ಲೊ ಆನಿ ಸಕಯ್ಲೊ ಸಗ್ಳೆ ಮನಿಸ್ಚ್!!!
ಅಲ್ಲಾಹ್ನ್ ಸಗ್ಳ್ಯಾಂಕ್ ಎಕಾಚ್ ಮಾಫಾನ್ ರಚ್ಲಾಂ ಜಾಲ್ಯಾರ್, ತಾಚ್ಯಾ ದೊಳ್ಯಾಂ ದಿಷ್ಟೆಂತ್ ಕೊಣ್ಯ್ ಲ್ಹಾನ್ ಆನಿ ವ್ಹಡ್ ನಾ ಜಾಲ್ಯಾರ್ ಆಜ್ ಹೊಚ್ಚ್ ಮನಿಸ್,
ವಯ್ರ್ ಆನಿ ಸಕಯ್ಲ್ ಕಸೊ?
ಎಕ್ಲೊ ಖೊಟಾಯ್ತಾ ತರ್ ಎಕ್ಲೊ ಖೊಟೊ ಕಿತ್ಯಾಕ್ ಖಾತಾ?
ಎಕ್ಲೊ ಪೋಟ್ ಭರ್ತಾ ತರ್ ಎಕ್ಲೊ ಭುಕೆನ್ ಕಿತ್ಯಾಕ್ ವ್ಹಳ್ವಾಳ್ತಾ?
ಆಲಿಯಾಚಾ ಮತಿಂತ್ಲ್ಯಾ ಸವಾಲಾಂಕ್ ತಾಚೆ ಲಾಗಿಂ ಜಾಂವ್ ಯಾ ತಾಚ್ಯಾ ಮಾಲ್ಗಡ್ಯಾಂ ಲಾಗಿಂ ಜಾಂವ್ ಜವಾಬ್ ನಾತ್ಲೆಲಿ. ಎಕ್ಸುರ್ಪಣಾಚೆಂ ಚಿಂತಾಪ್ ಆಲಿಯಾಚಾ ಮತಿಂತ್ ಮನ್ಶ್ಯಾಪಣಾಚೆಂ ಸವಾಲ್ ಉಟಯ್ತಾಲಿ ಆನಿ ಜಿವಿತಾಚಾ ಹಕ್ಕಾಂಚಾ ವಯ್ರ್ ವಾದಾಳ್ ಉಟಯ್ತಾಲಿ.
ತಾಚ್ಯಾ ಚಿಂತ್ನಾಂಕ್ ತಾಣೆಂ ಜೊಡ್ಲೆಲಿ ಜಾಣ್ವಾಯ್ ಸಾಂಗಾತ್ ದಿತಾನಾ, ಆದಿಂ ಮಾಗಾಂತ್ ಥಾವ್ನ್ ಚಲಿಯೆನ್ ಆಪ್ಲೆಂ ಜಿವಿತ್ ಸಾರುನ್ ಆಯಿಲ್ಲಿಂ ಪಿಂತುರಾಂ ತಾಚ್ಯಾ ದೊಳ್ಯಾಂ ಮುಕಾರ್ ಯೆತಾಲಿಂ. ಸಂಸಾರಾಚಾ ಸುರ್ವೆರ್ ಥಾವ್ನ್ ಆಜ್ ವರೇಗ್ ಚಲೊ ಆಪ್ಣಾಕ್ ಜಾಯ್ ತಸೊ ಬದ್ಲಾಲಾ ಆನಿ ಸಂಸಾರಾಂತ್ ಜಿಯೆಲಾ ಶಿವಾಯ್ ಚಲಿಯೆಚಾ ಜಿವಿತಾಚಾ ಮೊಲಾಚೆಂ, ತಾಣೆಂ ಕೆದಿಂಚ್ ಗಣ್ಣೆಂ ಕೆಲ್ಲೆಂ ನಾ. ಆಜ್ ಚಲಿ ಚಂದ್ರಾರ್ ಪಾಂಯ್ ತೆಂಕೊಂಕ್ ಪ್ರಯತ್ನ್ ಕರ್ತಾ ಮ್ಹಣೊನ್ ದಿಸಾಳ್ಯಾ ಪತ್ರಾರ್ ತಾಣೆಂ ವಾಚ್ಲ್ಲೆಂ ತರ್ಯ್, ತ್ಯಾಚ್ ಪತ್ರಾಚಾ ದುಸ್ರ್ಯಾ ಪಾನಾರ್ ಚಲಿಯೆಚಾ ವಯ್ರ್ ತ್ಯಾಚ್ ಚಂದ್ರಾಚಾ ಉಜ್ವಾಡಾಂತ್ ಚಲ್ಲ್ಲೆಂ ಸಾಮೂಹಿಕ್ ಬಲತ್ಕಾರ್ಯ್ ತಾಣೆಂ ವಾಚ್ಲೆಲೆಂ.
ತರ್ ಆಜ್ ಚಲಿ ಸುರಕ್ಷಿತ್ ಆಸಾ?
ಚಲಿಯೆಕ್ ಸಮಾಜ್ ಬರಾಬರ್ಪಣಾಂತ್ ವಳ್ಕಾತಾ?
ಚಲಿಯೆಕ್ ಕುಟ್ಮಾಂತ್ ಸಮಾಸಮ್ ಹಕ್ಕ್ ಆಸಾ?
ಮತಿಂತ್ಲಿಂ ಸವಾಲಾಂ ಸಮಾಜೆಂತ್ ವ್ಯಕ್ತ್ ಕರುಂಕ್ ಸಕಾನಾಸ್ತಾನಾ ಆಲಿಯಾ ಏಕ್ ಮೊನೆಂ ವಾದಾಳ್ ಜಾಲೆಂ. ಹ್ಯಾಚ್ ವಾದಾಳಾಂತ್ ಶಿರ್ಕೊನ್ ತೆಂ ತಾಚ್ಯಾ ತರ್ನಾಟ್ಪಣಾರ್, ತಾಚಿ ಸಮ್ಜಣಿ ವಾಡೊನ್ ಯೆತಾನಾಂಯ್ ಆಪ್ಣೆಂ ಕೆಲ್ಲೆಂಚ್ ಆನಿ ಆಪ್ಣೆಂ ಚಿಂತ್ಲ್ಲೆಂಚ್ ಸಾರ್ಕೆಂ ಮ್ಹಣೊನ್ ಪಾತ್ಯೆಲೆಂ.
ಮತಿಂತ್ ಆಟಯಿಲ್ಲಿಂ ಚಿಂತ್ನಾ ಕಾರ್ಯಾ ರುಪಿಂ ಭಾಯ್ರ್ ಯೇನಾಂತ್ ಜಾಲ್ಯಾರ್ ತಿಂ ಚಿಂತ್ನಾ ಧರ್ಣಿ ಪಂದ್ಲ್ಯಾ ಲಾವಾ ಪರಿಂ ಹರ್ಯೇಕ್ ಘಡಿ ಖತ್ಕತೊನ್ ಉಮಾಳ್ಚಾ ಘಡಿಯೆಕ್ ಆತ್ರೆಗಾನ್ ರಾಕೊನ್ ಆಸ್ತಾತ್.
ಆಶೆಂಚ್ ಘಡ್ಲೆಂ ಆಲಿಯಾ ಥಂಯ್.....!
ಆಲಿಯಾ ಆಜ್ ಹ್ಯಾ ಸಮಾಜೆಂತ್ ಏಕ್ ಭಳಾಧೀಕ್ ಲಾವಾ ಜಾವ್ನ್ ಖತ್ಕತ್ತಾಲೆಂ. ಹ್ಯಾ ಸಮಾಜೆಂತ್ ಏಕ್ ಕ್ರಾಂತಿ ಹಾಡುನ್ ಹ್ಯಾ ಸಮಾಜೆಚೆಂ ರೂಪ್ ನವೆಂ ಕರುಂಕ್ ತೆಂ ಸೊಧ್ತಾಲೆಂ. ಸಂಪೂರ್ಣ್ ಸೃಷ್ಟೆಕ್ಚ್ ಏಕ್ ನವೊ ಸರ್ಗ್ ಕರುಂಕ್ ತೆಂ ಆಂವ್ಡೆಲೆಂ.
ಹ್ಯಾಚ್ ಬದ್ಲಾವಣೆಕ್ ಲಾಗೊನ್ ಆಲಿಯಾಚಾ ಜಿವಿತಾಂತ್ ಸಭಾರ್ ಘುಂವ್ಡ್ಯೊ ಆಯ್ಲ್ಯೊ.
ತಾಕಾ ಆಜ್ ಸಮಾಜೆಚಿ ಭಿರಾಂತ್ ನಾತ್ಲ್ಲಿ!
ತಾಕಾ ಆಜ್ ಸಮಾಜೆಂತ್ಲ್ಯಾ ಮಾನ್ ಮರ್ಯಾದೆಚೊ ಹುಸ್ಕೊ ನಾತ್ಲ್ಲೊ!!
ತಾಕಾ ಆಜ್ ಸಮಾಜೆಂತ್ಲ್ಯಾ ಆಪ್ಲ್ಯಾ ಚಲಿಯೆಪಣಾ ವಯ್ರ್ ಕಾವ್ಜೆಣಿ ನಾತ್ಲ್ಲಿ!!!
ಕಿತ್ಯಾಕ್......, ಆಲಿಯಾ ಆಜ್ ಅಪ್ಣಾಕ್ ಫಕತ್ತ್ ಎಕಾ ಚಲಿಯೆಚಾ ನದ್ರೆನ್ ನ್ಹಯ್ ಬಗಾರ್ ಎಕಾ ಮನ್ಶ್ಯಾ ಜಿವಾಚಾ ನದ್ರೆನ್ ಮಾತ್ರ್ ವಳ್ಕಾಲ್ಲೆಂ.
*****************
ಸಪ್ಟೆಂಬರ್ ಮಹಿನ್ಯಾಚಿ ವೀಸಾವಿ ತಾರಿಕ್!
ಆಯ್ಚೊ ಉದೆವ್ ಆಲಿಯಾಚಾ ಜಿವಿತಾಂತ್ ತಾಣೆಂ ಘೆತ್ಲೆಲ್ಯಾ ನಿರ್ಧಾರಾಕ್ ಸಾಂಗತ್ ದೀಂವ್ಕ್ ಉದೆಲ್ಲೊ.
ಆಲಿಯಾ ಏರ್ ಹೊಸ್ಟೆಸ್ ಜಾವ್ನ್ ಪಯ್ಲ್ಯಾ ಪಾವ್ಟಿಂ ವಿಮಾನಾರ್ ಚಡ್ಲೆಂ.
ಏರ್ವೇಸಾಚಾ ಆಫಿಶಿಯಲ್ ಬ್ರಾಂಡಾಚಾ ನ್ಹೆಸ್ಣಾರ್ ತಾಕಾಚ್ ತಾಣೆಂ ಆರ್ಶ್ಯಾಂತ್ ಸಭಾರ್ ಪಾವ್ಟಿಂ ಪಳೆಲೆಂ. ಪಯ್ಲೆಂಚ್ ಭೊವ್ ಸೊಭಿತ್ ಆಲಿಯಾ, ಹ್ಯಾ ನವ್ಯಾ ನ್ಹೆಸ್ಣಾಚೆರ್, ಪಯ್ಲೆಂಚಾ ಪ್ರಾಸ್ ದೊಡ್ಯಾ ಮಾಫಾನ್ ಸೊಭ್ತಾಲೆಂ. ತೊ ದಾಟ್ ನಿಳ್ಸೊ ರಂಗ್, ಆಪ್ಣಾಕ್ ಚಡಚ್ಚ್ ಸೊಭಯ್ತಾ ತಶೆಂ ತಾಕಾ ದಿಸ್ಲೆಂ. ಆರ್ಶ್ಯಾ ಮುಕಾರ್ ಉಭೆಂ ಜಾಲ್ಲ್ಯಾ ತಾಕಾ ಆಜ್ ಆಪ್ಣಾಕ್ ಪಳವ್ನ್ ಕಸಲಿಗೀ ತೃಪ್ತಿ ಭೊಗ್ಲಿ.
ಆಜ್ ಆಪ್ಣೆಂ ಪೈಲೆಟ್ ಜಾವ್ನ್ ಹ್ಯಾ ಆರ್ಶ್ಯಾ ಮುಕಾರ್ ರಾವೊಂಕ್ ಜಾಯ್ ಆಸ್ಲ್ಲೆಂ ಮ್ಹಳ್ಳೆಂ ಚಿಂತಾಪ್ ಏಕಾ ಘಡಿಯೆಕ್ ತಾಚ್ಯಾ ಮತಿಂತ್ ಆಯ್ಲೆಂ ಜಾಲ್ಯಾರ್ಯ್ ತ್ಯಾ ವಿಶಿಂ ತಾಚಿ ತಕ್ಲಿ ಚಡ್ ಧಾಂವ್ಲಿ ನಾ. ಪುಣ್, ತ್ಯಾ ತಾಚ್ಯಾ ನಿಶ್ಯಬ್ದ್ ಕುಡಾಂತ್ಲ್ಯಾ ತಾಚ್ಯಾ ಸೊಭಾಯೆಕ್ ಚಾಕೊನ್ ಆಸ್ಚಾ ತ್ಯಾ ಆರ್ಶ್ಯಾಂತ್ ಮಾತ್ರ್ ಕ್ಯಾಪ್ಟನ್ ರಾಣಾಚಿ ಅಸ್ಪಷ್ಟ್ ತಸ್ವೀರ್ ಉದೆವ್ನ್ ಗೆಲ್ಲ್ಯಾ ಪರಿಂ ಆಲಿಯಾಕ್ ದಿಸ್ಲಿ.
ತೆಂ ಏರ್ಹೊಸ್ಟೆಸ್ ಜಾವ್ನ್ ಪಯ್ಲ್ಯಾ ಪಾವ್ಟಿಂ ವಿಮಾನಾರ್ ಚಡ್ತಾನಾ ತಾಚ್ಯಾ ಪಯ್ಲ್ಯಾ ಪಯ್ಣಾಚಿ ದಿಶಾ ಜಾವ್ನಾಸ್ಲೆಲಿ ಮಂಗ್ಳುರ್!
ತಾಣೆಂ ಉಬ್ಚೆಂ ವಿಮಾನ್ ಮುಂಬಯಿ ಏರ್ಪೋರ್ಟಾ ಥಾವ್ನ್ ಉಟೊನ್ ಘಡಿಯೆನ್ ತ್ಯಾ ದರ್ಯಾ ಉಸ್ಕ್ಯಾರ್ ಪಾವ್ಲೆಂ. ಥಂಯ್ ಥಾವ್ನ್ ಪಂಚ್ವೀಸ್ ಮಿನುಟಾಂಚಿ ಆವ್ದಿ ಲ್ಹಾನ್ ಲ್ಹಾನ್ ಕುಪಾಂ ಮದ್ಲ್ಯಾನ್ ಉಭೊನ್, ತೆಂ ವಿಮಾನ್ ಫುಡೆಂ ಕುಪಾಂಚಾ ಸಂಸಾರಾಂತ್ ಪಾವ್ಲೆಲೆಂ ದ್ರಶ್ಯ್ ಆಲಿಯಾಕ್ ಭಾರಿಚ್ಚ್ ರೊಮಾಂಚಕ್.
ತಾಚ್ಯಾ ಮತಿಂತ್ ಸಂತೊಸಾಚಿಂ ಲ್ಹಾರಾಂ ಉಮಾಳುನ್ ಆಯ್ಲಿಂ. ತ್ಯಾ ಭಾಯ್ಲ್ಯಾ ಕುಪಾಂ ಮಧೆಂ ಆಲಿಯಾ ಖಂಯ್ಸರ್ಗೀ ಆಪ್ಣಾಕ್ಚ್ ವಿಸ್ರಾಲೆಂ.
ಎಕಾ ವಾಟೆನ್ ಆಪ್ಲ್ಯಾ ಏರ್ಹೊಸ್ಟೆಸ್ಪಣಾಚೆಂ ಪಯ್ಲೆಂ ಪಯ್ಣ್! ದುಸ್ರ್ಯಾ ವಾಟೆನ್ ಆಪ್ಣೆ ಲ್ಹಾನ್ಪಣಾರ್ ಥಾವ್ನ್ ತ್ಯಾ ಮೊಳಾಬಾಚಾ ಆಂಗ್ಣಾಂತ್ ಪಳವ್ನ್ ಖುಶಿ ಪಾವ್ಲೆಲಿಂ ಕುಪಾಂ!
ಎಕಾ ಖಿಣಾಕ್ ಆಲಿಯಾಕ್ ತಾಚೊ ಸಂಸಾರ್ ತಾಚ್ಯಾಚ್ ಹಾತಾ ತಾಳುವೆರ್ ಆಸಾ ಮ್ಹಳ್ಳ್ಯಾ ಪರಿಂ ಭೊಗ್ಲೆಂ.
ಮ್ಹಜ್ಯಾ ಜಿವಿತಾಚೊ ಹಾವೆಂ ಚಡ್ ಖುಶ್ ಪಾವ್ಲಲೊ ದೀಸ್ ಹೊ. ಆಲಿಯಾ ಮತಿಂತ್ಚ್ ಉಲಯ್ಲೆಂ.
ತೊಚ್ಚ್ ಮೊಳಾಬ್!
ತಿಂಚ್ ಕುಪಾಂ!!
ಆನಿ ಹಾಂವ್.... ಹಾಂವ್ ಆಜ್ ತೆಂ ಸುಕ್ಣೆಂ!!!
ಆಲಿಯಾ ಸರ್ಗಾಚಾ ದಾರಾರ್ ಉಭೆಂ ಜಾಲೆಂ. ಸಕಯ್ಲ್ ಸೊಡುನ್ ಆಯ್ಲೆಲ್ಯಾ ತ್ಯಾ ಮುಂಬಯಿಚಾ ಸಂಸಾರಾಕ್ತಾಣೆಂ ಉಡಾಸ್ ಪಾಸೊನ್ ಕೆಲೊ ನಾ.
ಕಿತ್ಯಾಕ್, ಆಲಿಯಾಕ್ ಹೊಚ್ಚ್ ತಾಚೊ ಸರ್ಗ್ ಆನಿ ಹೊಚ್ಚ್ ತಾಚೊ ಸಂಸಾರ್!
ವಿಮಾನಾಚಾ ಜನೆಲಾ ಭಾಯ್ಲ್ಯಾನ್.....,
ಧವಿಂ ಧವಿಂ ದೂದಾ ಸಾರ್ಕಿಂ....., ಗುಡ್ಯಾ ದೊಂಗೊರಾ ಭಾಶೆಚಿಂ........, ವ್ಹಡ್ಲಿಂ ವ್ಹಡ್ಲಿಂ ಕುಪಾಂ!
ತ್ಯಾ ಕುಪಾಂ ಮಧ್ಲ್ಯಾನ್ ಕಾಂಯ್ಚ್ ದಿಸಾನಾತ್ಲೆಲೆಂ.
ಫಕತ್ತ್ ಕುಪಾಂಚ್ ಕುಪಾಂ! ಕುಪಾಂಚೊಚ್ ಸಂಸಾರ್!
ಹ್ಯಾ ಕುಪಾಂ ಮಧೆಂ ಆಪುಣ್ ದೆಂವೊನ್ ವೆತಾಂ........, ಹ್ಯಾ ಕುಪಾಂ ಸಂಗಿಂ ಆಪುಣ್ ಖೆಳ್ತಾಂ......, ಹ್ಯಾ ಕುಪಾಂ ವಯ್ರ್ ಆಪುಣ್ ಲೊಳೊನ್ ವೆತಾಂ........, ಹ್ಯಾ ಕುಪಾಂ ವಯ್ರ್ ಹಾಂವ್ ನಿದ್ತಾಂ......., ಹಿಂ ಕುಪಾಂ ಮ್ಹಜೊ ಸಂಸಾರ್, ಹಿಂ ಕುಪಾಂ ಮ್ಹಜೊ ಸಂತೊಸ್, ಹಿಂ ಕುಪಾಂ ..... ಹಿಂ ಕುಪಾಂ.....!
ಆಲಿಯಾಚಾ ಮತಿಂತ್ ಕುಪಾಂಚ್ ಕುಪಾಂ!
ತಾಚಿ ಮತ್ ಕುಪಾಂ ಮಧೆಂಚ್ ಆಪ್ಲೊ ಸಂಸಾರ್ ಬಾಂದ್ತಾಲಿ.
ತ್ಯಾ ಮಧೆಂಯ್.......
ಎಕೇಕ್ ಪಾವ್ಟಿಂ ತ್ಯಾ ದಾಟ್ ಕುಪಾಂಕ್ ಆದ್ಳೊನ್ ವಿಮಾನ್ ಥೊಡೆಂ ’ಗಡ್ ಗಡ್’ ಕರುನ್ ಹಾಲ್ತಾನಾ ವಿಮಾನಾರ್ ಪಯ್ಣ್ ಕರ್ಚೆ ಪಯ್ಣಾರಿಭಿರಾಂತೆಚಾ ನದ್ರೆನ್ ಭಾಯ್ರ್ ಪಳೆತಾಲೆ ತರ್ಯ್ ಆಲಿಯಾ ಮಾತ್ರ್ ಮೌನ್ ಬಸೊನ್ ತ್ಯಾ ಕುಪಾಂಚಾ ಸಂಸಾರಾಂತ್ ಆಪ್ಣಾಕ್ಚ್ ವಿಸ್ರಾಲೆಂ.
ಮುಕಾರ್ ದಿಸ್ಚಾ ದಿಷ್ಟೆಕ್ ತಿಂ ಕುಪಾಂ ವ್ಹಡ್ಲ್ಯಾ ಜಯ್ತ್ ಶಿಖರಾ ಪರಿಂ ದಿಸ್ಲ್ಯಾರ್ಯ್ ವಿಮಾನ್ ಲಾಗಿಂ ಜಾವ್ನ್ ತ್ಯಾ ಕುಪಾಂಕ್ ಚಿರುನ್ ಧಾಂವ್ತಾನಾ ಹಿಂ ಕುಪಾಂ ಲಾಗ್ಶಿಲ್ಯಾನ್ ದಾಟ್ ಧುಂವ್ರೆ ಪರಿಂ ದಿಸ್ತಾಲಿಂ. ವಿಮಾನಾಚಾ ಭಿತರ್ ಥಾವ್ನ್, ಪಯ್ಶಿಲ್ಯಾ ಕುಪಾಂಕ್ ಪಳೆತಾನಾ, ತೊಚ್ಚ್ ಸರ್ಗ್ ಆನಿ ಹಾಂವ್ ತ್ಯಾ ಸರ್ಗಾಕ್ ಮೆಳೊಂಕ್ ವೆತಾಂ ತಶೆಂ ಆಲಿಯಾಕ್ ಜಾಲೆಂ.
"ಆಜ್ ಮಸ್ತ್ ಸೊಭಿತ್ ದಿಸ್ತಾ ಪಳಂವ್ಕ್.....!"
ಆಲಿಯಾಚೆಂ ಸಾಂಗಾತಿ ಏರ್ಹೊಸ್ಟೆಸ್ ಉಲಯ್ಲೆಂ.
"ಹಾಂ....!" ಭಾಯ್ರ್ ಪಳವ್ನ್ ಉದ್ಗಾರ್ಲ್ಲೆಂ ಆಲಿಯಾ, "ಹಿಂ ಕುಪಾಂ ಸದಾಂಚ್ ಆಶಿಂ ಆಸ್ತಾತ್?" ತಾಣೆಂ ವಿಚಾರ್ಲೆಂ. ಆಲಿಯಾನ್ ಆಪ್ಣಾಚ್ಯಾ ಇತ್ಲ್ಯಾ ಲಾಗಿಂ ಥಾವ್ನ್ ಆಶಿಂ ಕುಪಾಂ ಪಯ್ಲ್ಯಾ ಪಾವ್ಟಿಂ ಪಳಂವ್ಚಿಂ. ತ್ಯಾ ಮುಂಬಯಿಚ್ಯಾ ಧರ್ಣಿ ಥಾವ್ನ್ ತಾಣೆಂ ಪಳೆಲ್ಲಿಂ ತಿಂ ಕುಪಾಂ ತಾಕಾ ಪಯ್ಸ್ ಥಾವ್ನ್ ಕಾಪ್ಸಾ ಗುಡ್ಯಾ ಪರಿಂ ದಿಸೊನ್ ತ್ಯಾ ಕುಪಾಂ ಭಿತರ್ ಆನಿ ತ್ಯಾ ಕುಪಾಂ ಪಾಟ್ಲ್ಯಾನ್ ಕಿತೆಂ ಆಸಾ ಮ್ಹಳ್ಳೊ ತಾಕಾ ಮಿಸ್ತೆರ್ ಜಾವ್ನ್ ಉರ್ಲ್ಲೊ. ಪುಣ್ ಆತಾಂ.....? ಆತಾಂಚೆಂ ಹೆಂ ದ್ರಶ್ಯ್ಚ್ ವಿಂಗಡ್. ತರ್, ಆಪುಣ್ ಆನಿ ಸದಾಂ ಹ್ಯಾ ಕುಪಾಂಕ್ ಇತ್ಲ್ಯಾ ಲಾಗಿಂ ಥಾವ್ನ್ ಪಳಂವ್ಕ್ ಸಕ್ತೆಲಿಂ....? ಹಿಂ ಕುಪಾಂ ಮ್ಹಾಕಾ ಆಶಿಂಚ್ ಸದಾಂ ಸಾಂಗಾತ್ ದೀಂವ್ಕ್ ಸಕ್ತೆಲಿಂ.....? ಆಲಿಯಾ ಚಿಂತಾಲೆಂ.
"ನಾ. ಭಾರಿ ಅಪ್ರೂಪ್. ಪುಣ್ ಪಾವ್ಸ್ ಸರೊನ್ ಹಿಂವ್ ಪಡ್ಚಾ ಪಯ್ಲೆಂ ಆಶಿಂ ಕುಪಾಂ ದಿಸ್ತಾತ್. ಎಕೇಕ್ ಪಾವ್ಟಿಂ ಹಿಂ ಚಡ್ ದಾಟ್ ಆಸ್ತಾತ್. ವಿಮಾನಾಚಾ ಪಯ್ಣಾಕ್ ಅಡ್ಕಳ್ ಹಾಡುಂಕ್ಯ್ ಸಕ್ತಾತ್. ಸಗ್ಳ್ಯಾ ವಿಮಾನಾಕ್ ಧರುನ್ ಹಾಲಯ್ತಾತ್ ತಿಂ.....!"
ಆಲಿಯಾಚೆಂ ಸಾಂಗಾತಿಣ್ ಆಪ್ಲೊ ಆನ್ಭೊಗ್ ಆಲಿಯಾಕ್ ಸಾಂಗ್ತಾಲೆಂ.
ಫಕತ್ತ್ ಎಕಾ ವೊರಾಚೆಂ ಪಯ್ಣ್ ಭಾರಿಚ್ಚ್ ಸೊಭಿತ್ ರಿತಿನ್, ಮತಿಚಾ ಉಲ್ಲಾಸಾಂತ್ ಪಾಶಾರ್ ಜಾವ್ನ್ ಗೆಲೆಂ.
ಆಲಿಯಾನ್ ಆಪ್ಲ್ಯಾ ಸಪ್ಣಾಕ್ ಸಾಕಾರ್ ಕೆಲ್ಲೆಂ ಪಯ್ಲೆಂ ಪಯ್ಣ್!
ವಾರ್ಯಾರ್ ಉಭೊಂಕ್ ಆಶೆವ್ನ್ ರಾಕೊನ್ ರಾವ್ಲ್ಲೆಂ ಪಯ್ಣ್!!
ಸಪಾಣ್ ಸತ್ ಜಾಲ್ಲೆಂ ಪಯ್ಣ್!!!
***************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: ಅವಸ್ವರ್ 1, ಅವಸ್ವರ್ 2, ಅವಸ್ವರ್ 3,
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
