[ಅಂಕಣ್] 1. ಹೊಂದ್ವೊನ್ ಗೆಲ್ಲಿಂ ದೇವ್-ತೆಂಪ್ಲಾಂ
ಇಂಗ್ಲೆಂಡಾಚ್ಯಾ ಬಡ್ಗಾ ಕುಸಿನ್ ಅಸ್ಚೆ ಸೊಭಿತ್ ಶೆಹರ್ ಮನ್ಚೆಸ್ಟರ್. ಪುಟ್ಬೊಲ್ ಪ್ರೇಮಿಕ್ ಖಂಡಿತ್ ಜಾವ್ನ್ ಹೆಂ ಪರಿಚಿತ್ ನಾಂವ್, ಕಿತ್ಯಾಗೀ ಮಳ್ಯಾರ್ ಸಂಸಾರಾಂತ್ಲಿ ದೊನ್ ವಡ್ಲಿ ಪೂಟ್-ಬಾಲ್ ಟೀಮಾ, ಮನಚೆಸ್ಟರ್ ಯುನೈಟೆಟ್ (Manchester United) ಅನಿ ಮನಚೆಸ್ಟರ್ ಸೀಟಿ (Manchester City) ಹ್ಯಾಚ್ ಶಹರಾಂತ್ ಅಸಾತ್. ಹ್ಯಾ ಶೆಹರಾಚಾ ಮುಡ್ಲಾ ಕುಸಿನ್ ಅಸಾ ಎಕ್ ಲಾನ್ ಗಾಂವ್ ಗೊರ್ಟನ್ (Gorton), ಪ್ರಸ್ತುತ್ ಪರಿಸ್ಥಿತೆಂತ್ ಇಂಗ್ಲೆಂಡಾಚ್ಯಾ ಪಾಟಿಂ ಉರಲ್ಲ್ಯಾ ಗಾಂವಾಂ ಪಯ್ಕಿ ಎಕ್ ಮ್ಹಳ್ಯಾರ್ ಮ್ಹಜಿ ಚೂಕ್ ಜಾಂವ್ಚಿನಾ. ಗೊರ್ಟನಾಕ್ ಪಯ್ಣ್ ಕರ್ನ್ ಯೆತಾನಾ ಪಯ್ಸ್ ಥಾವ್ನ್ ದಿಸ್ಚೆಂ ವ್ಹಡ್ಲೆಂ, ಅಕರ್ಶಿತ್ ಬಾಂದಪ್ ’ಗೊರ್ಟನ್ ದೇವ್-ತೇಂಪ್ಲ್’ ವಾ ’ಗೊರ್ಟನ್ ಮಠ್’ (Goton Monastery). 1861 ಇಸ್ವೆಂತ್ ಹಾಂಗಾಸರ್ ಅಯಿಲ್ಯಾ ಪ್ರಾಸಿಸ್ಕನ್ ಫ್ರಾದ್, ಹಾಣಿಂ ಭಾಂದ್ಲ್ಲೆಂ ಅಕರ್ಶಿತ್ ದೇವ್-ತೇಂಪ್ಲ್. ಪ್ರಾಸಿಸ್ಕನ್ ಪ್ರಾದ್ ಪಳೆಂವ್ಕ್ ಮಟ್ವಾಸಿಪರಿಂ ದಿಸ್ತಾತ್ ಜಾಲ್ಲ್ಯಾನ್ ಹಾಂಗಾಚ್ಯಾ ಲೊಕಾನ್ ಹಾಕಾ ’ಗೊರ್ಟನ್ ಮಠ್’ ಮ್ಹಣ್ ಅಪಂವ್ಕ್ ಸುರು ಕೆಲೆಂ ಮ್ಹಣ್ ಹಾಂಗಾಚೊ ಲೊಕ್ ಸಾಂಗ್ತಾ.
ಗೋರ್ಟನ್ (೧೯೬೦ ಇಸ್ವಿ) गोर्टन (१९६० इस्वी) Gortton (1960 isvi)
ಗೋರ್ಟನ್ (ಆತಾಂ) गोर्टन (आतां) Gortton (atam)
18 ಅನಿ 19 ಶತಮಾನಾಂತ್ ಯುರೋಪಾಂತ್, ಪ್ರತ್ಯೇಕ್ ಥರಾನ್ ಇಂಗ್ಲೆಂಡಾಂತ್ ಜಾಲ್ಲ್ಯಾ ಕಯ್ಗಾರಿಕಾ ಕ್ರಾಂತಿವೆಳಾರ್ ಸಬಾರ್ ಥರಾಂಚೆ ಕಾರ್ಖಾನೆ, ಮಿಲ್ಲಾಂ, ಗೊರ್ಟನ್ ಅನಿ ಅಸ್ಪಾಸ್ಚ್ಯಾ ಗಾವಾಂನಿ ಅಯ್ಲ್ಯೊ, ತ್ಯಾ ದೆಕುನ್ ಹಾಂಗಾ ಸಭಾರಾಂಕ್ ಹಾಂಗಾಸರ್ ಕಾಮಾಂ ಮೆಳ್ಳಿಂ ಅನಿ ಚಡ್ ಲೊಕಾನ್ ಹಾಗಾಂಸರ್ ರಾವುಂಕ್ ಸುರು ಕೆಲೆಂ. ಹಾಚ್ ವೆಳಾರ್, ಮ್ಹಳ್ಯಾರ್ 1861 ಇಸ್ವೆಂತ್ ಪ್ರಾಸಿಸ್ಕನ್ ಫ್ರಾದಾಂನಿ ಹ್ಯಾ ದೇವ್-ತೇಂಪ್ಲಾಚೆಂ ಕಾಮ್ ಪ್ರಾರಂಬ್ ಕೆಲೆ ಅನಿ 1872 ಇಸ್ವೆಂತ್ ಹೆಂ ವ್ಹಡ್ಲೆ ದೆವಾಳ್ ಉಬೆಂ ಜಾಲೆಂ.
ಗೋರ್ಟನಾಭಿತರ್ (ಪಯ್ಲೆಂ) गोर्टनाभितर (पयलें) Gorttonabhitor (Poilem)
ಗೋರ್ಟನಾಭಿತರ್ (ಆತಾಂ) गोर्टनाभितर (आतां) Gorttonabhitor (atam)
20ವ್ಯಾ ಶತಮನಾಂತ್ ಜಾಲ್ಲಿಂ ದೊನ್ ಮಾಹಾಝುಜಾಂ, ಧಾರ್ಮಿಕ್ ಜೀವನಾಂತ್ ಚರ್ಚ್ ಒಫ್ ಇಂಗ್ಲೆಡ್ ಹಾಚೊ ಅಧಿಕಾರ್, ಪ್ರತ್ಯೇಕ್ ಜಾವ್ನ್ 1970 ಅರ್ಥಿಕತೆಚೆ ನಿರ್ಗಮನ್ (Economic Recession), ಹ್ಯಾ ಸರ್ವಾಂಚ್ಯಾ ಪರಿಣಾಮಾನ್ ಅಸಾ ಜಾಲ್ಲಿ ದುಬ್ಳಿಕಾಯ್, ಸಾಮಾಜಿಕ್, ಧಾರ್ಮಿಕ್, ಅನಿ ಸಾಂಸ್ಕ್ರ್ರತಿಕ್ ಪಡ್ಣೆಂ, ಅಸಲ್ಯಾ ಸಬಾರ್ ಕಾರಾಣಾ ಲಾಗೊನ್ ಪ್ರಾಸಿಸ್ಕನ್ ಫ್ರಾದಾಂಕ್ ಹೆಂ ವ್ಹಡ್ ಬಾಂದಪ್ ಚಲೊಂವ್ಕ್ (Maintain) ಕರುಂಕ್ ಕಷ್ಟ್ ಜಾತಲೆ. ಹ್ಯಾ ದೇವ್-ತೆಂಪ್ಲಾಚೊ ವಿನ್ಯಾಸ್ (High Victorian Gothic Architecture) ಅನಿ ಭಾಂದ್ಲ್ಲಿ ರೀತ್ ಇತ್ಲಿ ಉಂಚ್ ಅಸ್ಲ್ಲಿಗೀ ಮ್ಹಳ್ಯಾರ್ ಹೆಂ ಭಾಂದಪ್ 1963 ಇಸ್ವೆಂತ್ ಇಂಗ್ಲೆಡಾಚ್ಯಾ ಉಂಚ್ಲ್ಯಾ ಭಾಂದ್ಪಾಚ್ಯಾ (Listed Buildings) ವರ್ಗಾಂತ್ ನೊಂದಾಯಿತ್ ಜಾಲ್ಲೆಂ.
ಮ್ಯಾಂಚೆಸ್ಟರ್ ಚಡಂವ್ಚಿ ತರ್ಭೆತೆ ಕೇಂದ್ರ್ (ಆತಾಂ) म्यांचेसटर चडंवची तर्भेते केंद्र (आतां) Manchestor choddomvchi torbhete kendr (atam)
ಸಾಂ|ಜೋನ್ ಅಪೊಸ್ತೊಲಾಚೆಂ ತೇಂಪ್ಲ್ (ಆತಾಂ) सां|जोन अपोसतोलाचें तेंपल (आतां) St|John Opostolachem Templ (atam)
ಕಷ್ಟಾಚಿ ಪರಿಸ್ಥಿತ್ ಸಮ್ಜಲ್ಲ್ಯಾ ಪ್ರಾಸಿಸ್ಕನ್ ಫ್ರಾದಾಂನಿ 1989 ಇಸ್ವೆಚ್ಯಾ ಅಖೇರೆಕ್ ಹಾಂಗಾ ದೇವ್ ಸ್ತುತಿ ಬಂಧ್ ಕೆಲಿ ಅನಿ ಹೆಂ ವ್ಹಡ್ ಭಾಂದಪ್ ಬಿಲ್ಡರಾಂನಿ ಘೆತ್ಲೆಂ, ಬಿಲ್ಡರಾಂನಿ ಹಾಂತುಂ ಅಸಲ್ಲ್ಯೊ ಮೊಲಾದೀಕ್ ವಸ್ತು ಕಾಡ್ನ್ ವಿಕ್ಲ್ಯೊ ಅನಿ ಥೊಡ್ಯಾ ತೆಂಪಾನ್ (1993) ಬಿಲ್ಡರಾಚೆ ಕಾಮ್ ಬಂದ್ ಪಡ್ಲೆಂ (Bankrupt) ಅನಿ ದೇವ್-ತೇಂಪ್ಲ್ ಪಡೀಲ್ ಪಡ್ಲೆಂ. ಥೊಡ್ಯಾಂನಿ ಖುರಿಸ್, ಇಮಾಜಿ, ಪಿಂತುರಾ ಚೊರುನ್ ಪಯ್ಶೆ ಕೆಲೆ ತರ್, ಅನಿ ಥೊಡ್ಯಾನಿ ಶಿಳಾ (Marbel) ಕಾಡ್ನ್ ವಿಕ್ಲೆ, ಪೊಕ್ರಿ ಭುರ್ಗ್ಯಾಂನಿ ಅರ್ಸ್ಯಾಂಕ್ ಫಾತೊರ್ ಮಾರ್ಲೆ, ಅಶೆಂ ದೇವ್-ತೇಂಪ್ಲ್ ಸರ್ವ್ ಅನ್ಯಾಯಾಚೆಂ ಕೇಂದ್ರ್ ಜಾಲೆಂ. ಹಾಂಗಾಚ್ಯಾ ಲೊಕಾಕಡೆ ಹ್ಯಾ ವಿಶ್ಯಾಂತ್ ಸಭಾರ್ ಕಾಣಿಯೊ ಅಸಾತ್, ಹೆಂ ಭಾದಪ್ ಇತ್ಲೆಂ ಪಾಡ್ ಜಾಲ್ಲೆಗೀ ಮಳ್ಯಾರ್, 1997 ಇಸ್ವೆಂತ್ ಹೆಂ ಭಾಂದಪ್ ಸಂಸರಾತ್ಲೆಂ ಅಪಾಯಾಂತ್ ( most endangered site) ಅಸ್ಚಾ 100 ದಾಯ್ಚಾ ಪಯ್ಕಿ ಎಕ್ ಮ್ಹಣ್ ಮಾನುನ್ ಘೆವ್ನ್ World monument fund watch ಹಾಂತುಂ ದಾಖಲ್ ಕೆಲೆ. (ಹಾಂತುಂ ಭಾರತಾಚೆಂ ತಾಜ್ಮಹಲ್ ಅಸಾ!). ಹಾಂಚೆ ಮಧೆಂ, ದೀಸ್ ವೆತಾಂ ವೆತಾಂ ಭಾದ್ಪಾಚಿ ಪಾಡ್ ಜಾವ್ನ್ ವೆಚಿ ಪರಿಸ್ಥಿತಿ ಪಳೆವ್ನ್, 1996 ಇಸ್ವೆಂತ್ ಇಲೆನ್ ಗ್ರಿಪಿತ್ ಮ್ಹಳ್ಯಾ ಬಾಯ್ಲೆಚ್ಯಾ ಮುಖೆಲ್ಪಣಾನ್ (ಹಿಚೊ ಪತಿ ಪಾವ್ಲ್ ಗ್ರಿಪಿತ್ ಹ್ಯಾ ದೆವಾಳಾಂತ್ ಅಲ್ತಾರ್ ಭುರ್ಗೊ ಜಾವ್ನ್ ಅಸ್ಲ್ಲೊ), ಗೊರ್ಟನ್ಚ್ಯಾ ಲೊಕಾಂನಿ ಸಾಂಗಾತಾ ಮೆಳೊನ್, ಎಕ್ ಸೆವಾ ಸಂಘಟನ್ (TRUST) ಅಸಾ ಕರುನ್, ಸುಮಾರ್ 6 ಮಿಲಿಯ ಪಾಂವ್ಡ್ (ಸುಮಾರ್ 54-55 ಕೊರೊಡ್ ರುಪಯ್) ಖರ್ಚುನ್, ಹೆಂ ವ್ಹಡ್ ಭಾದಪ್ ಸಾಂಸ್ಕ್ರತಿಕ್ ಕಾರ್ಯಾಂಕ್ ಸಭಾಂಗಣ್ ಅನಿ ಕಾಜಾರಾಂಕ್ ಹಾಲ್ ಜಾವ್ನ್ ಬದ್ಲಿಲೆಂ. ಹೆಂ ಪುನರ್-ಸ್ಥಾಪನ್ ಕಾಮಾಕ್ ಲೊಕಾಚೊ ಇತ್ಲೊ ಪಾಟಿಂಬೊ ಅಸಲ್ಲೊ ಕೀ, ರಾಯ್-ಕುವರ್ ಚಾರ್ಲ್ಸ್ ತಸಲ್ಯಾ ಮನ್ಶ್ಯಾನಿ ತಾಂಚೊ ಸಹಕಾರ್ ದಿಲ್ಲೊ. ಪಯ್ಸ್ ಥಾವ್ನ್ ಅಜ್ ಹೆಂ ಭಾಂದಪ್ ಪಳೆವ್ನ್ ದೇವ್-ತೇಂಪ್ಲಾಪರಿಂ ದಿಸ್ತಾ ಜಾಲ್ಯಾರಿ, ಭಿತರ್ ಎಕ್ ಸುಸಜ್ಜಿತ್ ಹಾಲ್, ವ್ಹಡಾ ಕಂಪನಿಚ್ಯೊ ಪಾರ್ಟಿ, ಗ್ರೇಸ್ತಾಚ್ಯಾ ಕಾಜಾರಾಕ್ ಹೊ ಲೊಕಾಮೊಗಾಳ್ ಜಾಗೊ.
ಹ್ಯಾ ಭಾಂದ್ಪಾ ಥಾವ್ನ್ ಸುಮಾರ್ ಎಕ್ ಮಯ್ಲ್ ಪಡ್ಲಾ ಕುಸಿನ್ ಅಸಾ Manchester Climbing Centre ಮ್ಹಳ್ಯಾರ್ ಉಬಾರ್ ಜಾಗ್ಯಾಕ್ ಜೊಡಂವ್ಕ್ ತರಭೇತಿ ಕರ್ಚೆಂ ಕೇಂದ್ರ್, ಹಿ ಅದ್ಲಿಂ, ಚರ್ಚ್ ಒಫ್ ಇಂಗ್ಲೆಡ್ ಹಾಚ್ಯಾ ಅಧೀನ್ ಅಸ್ಲ್ಲೆಂ ಸಾಂತ್ ಬೆನೆಡ್ಡಿಕ್ತಾಚೆಂ ದೇವ್-ತೇಪ್ಲ್, ಗೊರ್ಟನ್ ದೇವ್-ತೇಪ್ಲಾ ವೆಳಾರ್ಚ್ ಭಾಂದ್ಲ್ಲೆಂ (1878) ಹೆಂ ದೇವ್-ತೇಪ್ಲ್, ಡಿಸೆಂಬರ್ 2002 ವೆರ್ ಬಂದ್ ಪಡ್ಲೆಂ. ಜೊನ್ ಡನ್ (John Dunne) ಹಾಚ್ಯಾ ಮುಖೆಲ್ಪಣಾರ್ ಉಭಾರ್ ಜಾಗ್ಯಾಕ್ ಜೊಡಂವ್ನ್ ತರಭೇತಿ ಕರ್ಚೆಂ ಕೇಂದ್ರ್ ಜಾಲೆಂ.
ತೆಂ ನ್ಹಯ್ ಅಸ್ತಾಂ, 1845 ಅನಿ 1846 ಇಸ್ವೆಂತ್ ಭಾಂದ್ಲ್ಲೆಂ ಮನಚೆಸ್ಟರಾಂತ್ ಅಸ್ಚಿ ಸಾಂತ್ ಜೊನ್ ಅಪ್ಪೊಸ್ತಲಾಚೆ ದೇವ್-ತೇಪ್ಲ್, ಆಜ್ ಎಕ್ ಮಸೀದ್ (Qudria Jilamia Islamic Centre ) ಚರ್ಚ್ ಒಫ್ ಇಂಗ್ಲೆಡ್ ಹಾಚ್ಯಾ ಅಧೀನ್ ಅಸಲ್ಲೆಂ ಹೆಂ ದೇವ್-ತೇಪ್ಲ್ 1966 ಇಸ್ವೆಂತ್ ಬಂದ್ ಜಾಲ್ಲೆಂ.
ಗೊರ್ಟನ್ ದೇವ್-ತೇಂಪ್ಲ್ ಅನಿ ಮನ್ಚೆಸ್ಟರ್ ಉಭಾರ್ ಜಾಗ್ಯಾಕ್ ಜೊಡಂವ್ಕ್ ತರಭೇತಿ ಕರ್ಚೆಂ ಕೇಂದ್ರ್, ಚಾರಿತ್ರಿಕ್ ದೃಷ್ಟೆನ್ ಎಕಾ ತೆಂಪಾಚಿಂ ದೇವ್-ತೇಂಪ್ಲಾಂ, 19 ಅನಿ 20 ಶತಮನಾಂತ್ ಹ್ಯಾ ಬಾಂದ್ಪಾಂನಿ ದೇವ್-ತೆಂಪ್ಲಾಂ ಜಾವ್ನ್ ಮನ್ಶಾಚ್ಯಾ ದಯ್ವಿಕ್ ಅನಿ ಸಾಮಾಜಿಕ್ ಜೀವನಾಕ್ ಸಹಕಾರ್ ದಿಲಾ. ಬದಲ್ಲ್ಯಾ ವೆಳಾಕ್ ಸರಿ ಜಾವ್ನ್ ಮನ್ಶಾಚೆಂ ಚಿಂತಪ್ ಬದಲ್ಲೆಂ, ಜಿಯೆಂವ್ಚಿ ರೀತ್ ಬದಲ್ಲಿ, ತೊಡ್ಯಾಂಕ್ ದೇವ್ ಬದಲ್ಲೊ ಜಾಲ್ಯಾರ್, ತೊಡ್ಯಾಂಕ್ ದೇವ್ಚ್ ನಾ ಜಾಲೊ, ಪುಣ್ ದಿಸಾನಾತ್ಲ್ಯಾ ದೆವಾಕ್ ಭಾದ್ಲ್ಲಿಂ ಹಿಂ ನಿರ್ಜೀವ್ ಭಾಂದ್ಪಾಂ ಅಜೂನ್ ಮನ್ಶ್ಯಾ ಜೀವನಾಕ್ ಸಹಕಾರ್ ದೀತೆ ಅಸಾತ್. ಅಜ್ ಗೊರ್ಟನ್ ದೇವ್-ತೇಂಪ್ಲ್ ಅನಿ ಮನ್ಚೆಸ್ಟರ್ ಉಬಾರ್ ಜಾಗ್ಯಾಕ್ ಜೊಡಂವ್ಕ್ ತರಭೇತಿ ಕರ್ಚೆ ಕೇಂದ್ರ್ ಹಾಂಗಾ ಸಭಾರ್ ಜಾಣಾಂ ಕಾಮ್ ಕರ್ನ್ ಅಪ್ಲೊ ದಿಸ್ಪಡ್ತೊ ಗ್ರಾಸ್ ಜೊಡ್ತಾತ್. ಸಭಾರ್ ಜಣಾಂಚಿಂ ತಾಲೆಂತಾಂ ಪ್ರರ್ದಶನ್ ಜಾತಾತ್ ಅನಿ ಥೊಡಿಂ ನವಿಂ ತಾಲೆಂತಾಂ ಉಜ್ವಾಡಾಕ್ ಯೆತಾತ್, ಅನಿ ಥೊಡ್ಯಾ ಪಾರ್ಟಿಂನಿ ಥೊಡಿಂ ಗ್ಲಾಸಾಕ್ ಗ್ಲಾಸ್ ಲಾಗವ್ನ್ ಚಿಯರ್ಸ್ ಮ್ಹಣೊನ್, ಕಾಳ್ಜಾ ಥಾವ್ನ್ ಎಕಾಮೆಕಾ ಕಡೆ ಉಲವ್ನ್ ಥೊಡ್ಯೊ ಸಂತೊಸಾಚ್ಯೊ ಘಡಿಯೊ ಪಾಶಾರ್ ಕರ್ತಾತ್.
ಸಾಂ|ಜೊನ್ ಅಪೊಸ್ತಲಾಚಿ ಇರ್ಗಜ್ ಆಜ್ ಎಕ್ ಮಸೀದ್, ಹಾಂಗಾ ದೇವ್ ಸ್ತುತಿ ಚಾಲು ಅಸಾ, ದೆವಾಲಾಗಿಂ ಮಾಗ್ತಾತ್, ದೆವಾಕ್ ಅರ್ಗಾಂ ದಿತಾತ್, ಬದಲ್ಲಾ ತರ್ ಮನ್ಶ್ಯಾನ್ ರಚಲ್ಲೆ ... ಧರ್ಮ್! ವಯ್ಲೆ ದಾಖ್ಲೆ ಪಳೆತಾನಾ ಕಿತೆಂಗಿ ತಳ್ಮಳೆ ಭಗ್ತಾತ್. ಹಾಂಗಾಸರ್ ಎಕ್ ಜೆರಾಲ್ ನದರ್ ಘಾಲ್ಯಾರ್, ಸುಮಾರ್ ದೆಡ್ ಶತಮನಾ ಅದ್ಲ್ಯಾ ದೇವ್-ತೇಂಪ್ಲಾಂಕ್ ಅಪ್ಲ್ಯಾ ಗರ್ಜಾಂಕ್ ಸರಿ ಜಾವ್ನ್ ಹೊದ್ವುಂಕ್ ಮನ್ಶಾನ್ ಬದ್ಲಿಲೆಂ ಅನಿ ಅಶೆಂ ಬದ್ಲಿಲ್ಯಾನ್ ಹಿಂ ಭಾದ್ಪಾಂ ಅಜೂನ್ ಉಭಿಂ ಅಸಾತ್. ಸಂಸಾರಾತ್ ಅಸಲೆ ಅನಿ ಕಿತ್ಲೆ ದಾಖ್ಲೆ ಅಸಾತ್ ಕೊಣ್ಣಾ!.. ಹೊಂದ್ವುನ್ ವ್ಹರುಂಕ್ ಜಾಯ್ನಾಸ್ತಾಂ ಮೊಡುನ್ ಪಡ್ಲ್ಯಾಂತ್!
ಪರಿಸ್ಥಿತೆಕ್ ಬಾಗ್ವೊನ್ ಜೀವನಾಚಿ ರೀತ್ ಬದ್ಲತಾನಾ, ಸದಾಂ ವ್ಹಾಪರ್ಚೆ ವಸ್ತುಚಿ ಉಪಯೋಗ್ ಕರ್ಚಿ ರೀತ್ ಬದಲ್ತಾ. ಪ್ರಸ್ತುತ್ ಪರಿಸ್ಥಿತೆಂತ್ ಕೊರೊನಾ ವೈರಸಾನ್ ಸಬಾರಚಿಂ ಘರಾಂ, ಅಫೀಸ್ ಜಾವ್ನ್ ಬದ್ಲಿಲ್ಯಾಂತ್, ’ಘರಾ ಥಾವ್ನ್ ಕಾಮ್ ಕರ್ಚೆ’ (Working from home ) ಮ್ಹಳ್ಳಿ ನವಿ ಜೀವನ್ ಶಯ್ಲಿಚಿ ಸುರ್ವಾತ್ ಕೆಲ್ಯಾ. ಪರಿಸ್ಥಿಕ್ ಸರಿ ಜಾವ್ನ್ ಸದಾಂಚ್ಯಾ ಜೀವನಾಂತ್ ಸಬಾರ್ ಥರಾಚಿ ಬದ್ಲಾವಣ್ ಜಾತೆ ಅಸಾ, ಒನ್-ಲೈನ್ ಮೀಟಿಂಗಾಂನಿ ಸಭಾರಾಂಚೆಂ ಪಯ್ಣ್ ಉಣೆಂ ಜಾಲೆಂ, ಹಾಂಚೊ ಪರಿಣಾಮ್ ಜಾವ್ನ್ ಪಯ್ಣ್ ಕರ್ಚ್ಯಾ (Travel Sector) ವಿಭಾಗಾಂತ್ ಕಾಮಾಂ ಉಣಿಂ ಜಾಲಿಂ, ತೆಲಾಚೆಂ ಮೋಲ್ ಉಣೆಂ ಜಾಲೆಂ ಅನಿ ಹ್ಯಾ ವಿಭಾಗಾಂತ್ಯಿ ಕಾಮಾಂ ಗೆಲಿಂ. ಪುಣ್ ಬದಲ್ಯಾ ಪರಿಸ್ಥಿಕ್ ಸರಿ ಮನ್ಶ್ಯಾನ್ ಜಿಯೆಂವ್ಕ್ ಅಸಾ, ಅನಿ ಅಶೆಂ ಜಿಯೆಜಯ್ ಜಾಲ್ಯಾರ್, ಜಿಣೆಯೆಚ್ಯಾ ಖಂಚ್ಯಾಯ್ ಹಂತಾರ್ ನವಿ ಕಲಾ (Skill), ಶಿಕಪ್, ಶಿಕ್ಚಿ ಗರ್ಜ್ ದಿಸ್ತಾ. ಮನ್ಶ್ಯಾನ್ ಕೆದಾಳಾಯೀ ಶಿಕಾಜಯ್, ಹೆಂ ಸಾಮಾನ್ಯ್ ಚಿಂತಪ್, ಪುಣ್ ಹಾಂಗಾಸಾರ್ ಫರಕ್.....ವೇಳ್!!!... ಕಿತ್ಲ್ಯಾ ಉಣ್ಯಾ ವೆಳಾಂತ್ ಹೊಂದ್ವೊನ್ ಘೆಂವ್ಚಿ ವಿಶಾಲಾತಾ ದಾಕಯ್ತಾಂವ್ಗೀ, ತಿತ್ಲೆ ವೆಗ್ಗಿಂ ನವ್ಯಾ ಪರಿಸ್ಥಿಕ್ ಹೊಂದೊನ್ ಚಲ್ತಾಂವ್. ಪ್ರಸ್ತುತ್ ಪರಿಸ್ಥಿತಿ ಖಂಡಿತ್ ಜಾವ್ನ್ ಮನ್ಶಾಚಿ ಹೊಂದ್ವೊನ್ (adaptability) ಮುಖಾರ್ ವೆಚ್ಯಾ ಮನೋಸ್ಥಿತಿ ವಯ್ರ್ ಎಕ್ ಸವಾಲ್ ಕರ್ತಾ. ಹೆಂ ಸರ್ವ್ ಚಿಂತಾನಾ, ಸುಮಾರ್ ದೇಡ್ ಶತಮನಾ ಆದ್ಲಿ ಚಾರ್ಲ್ಸ್ ಡಾರ್ವಿನಾಚಿಂ ಉತ್ರಾಂ ಉಡಾಸ್ ಯೇತಾತ್ ''It is not the strongest of the species that survives, not the most intelligent that survives.It is the one that is the most adaptable to change"
ಅದಾರ್ (ತಸ್ವೀರೊ:) www.themonastery.co.uk , www.manchestereveningnews.co.uk, www.manchesterlocalhistory.com
[Onkonn] Hondvon gel'lim devo-templam
