ಕಥಾ

ಮೊರಿಸ್ ವೆಸ್ಟ್

ಮೊರಿಸ್ ವೆಸ್ಟ್ 1916-ತ್ ಆಸ್ಟ್ರೇಲಿಯಾಚ್ಯಾ ಮೆಲ್ಬೋರ್‍ನಾಂತ್ ಜಲ್ಮಾಲೊ. ತಾಚೆಂ ಶಿಕಾಪ್ Christian Brothers ಹಾಂಚ್ಯಾ ಇಸ್ಕೊಲಾಂತ್ ಚಲ್ಲೆಂ. ಚವ್ದಾ ವರ್ಸಾಂಚೆ ಪ್ರಾಯೆರ್ ತೊ ಹ್ಯಾಚ್ ಮೆಳಾಕ್ ಭರ್ತಿ ಜಾಲೊ. ಬಾರಾ ವರ್ಸಾಂ ನಂತರ್ ನಿಮಾಣಿ ಆಂಗವ್ಣ್ ಘೆನಾಸ್ತಾಂಚ್ ತೊ ಭಾಯ್ರ್ ಆಯ್ಲೊ. ದುಸ್ರ್ಯಾ ಮ್ಹಾಝಜಾ ವೆಳಿಂ ತೊ ಸಯ್ನಾಕ್ ಭರ್ತಿ ಜಾಲೊ. ತೆದ್ನಾಂಚೊ ಪ್ರಧಾನ್ ಮಂತ್ರಿ M.G.Hughes ಹಾಣೆ ತಾಕಾ ಆಪ್ಲೊ ಆಪ್ತ್ ಕಾರ್‍ಯದರ್ಶಿ ಕೆಲೊ.

ಝಜಾ ನಂತರ್ ತಾಣೆ ರೆಕೊರ್ಡಿಂಗಾಚೊ ವ್ಯವಹಾರ್ ಸುರು ಕೆಲೊ. ಫಾಯ್ದೊ ಆಸುಲ್ಲೊ ತರೀ ತಾಚಿ ಅಭಿರೂಚ್ ಸಾಹಿತ್ಯ್ ಜಾವ್ನಾಸ್ಲಿ.

ಥೊಡೊ ತೇಂಪ್ ತೊ ಡೇಯ್ಲಿ ಮೇಯ್ಲ್ ಪತ್ರಾಚೊ ವಾತಿಕಾನ್ ಪ್ರತಿನಿಧಿ ಜಾವ್ನ್ ವಾವುರ್‍ಲೊ. ಹಾಂಗಾಚ್ ತಾಚ್ಯಾ ಥೊಡ್ಯಾ ಕಾದಂಬರಿಂಕ್ ಕಥಾ-ವಸ್ತ್ ಲಾಭ್ಲಿ ಮ್ಹಣ್ಯೆತ್.

‘The Shoes of the Fisherman’ ‘Lazarus’ The Tower of Babel’ ತಾಚ್ಯಾ ಕಾದಂಬರಿಂ ಪೈಕಿ ಥೊಡೆ.

ಮೊರಿಸ್ ವೆಸ್ಟ್ 1999, ಅಕ್ಟೊಬರ್ 9 ತಾರ್ಕೆರ್ ಆಸ್ಟರೇಲಿಯಾಚ್ಯಾ ವಿಕ್ಟೊರಿಯಾಂತ್ ಸರ್‍ಲೊ.

ನಾಂವ್: Gerald William Carlo

ಲಿಖ್ಣೆ ನಾಂವ್: ಜೆ.ವಿ.ಕಾರ್ಲೊ

ಶಿಕಾಪ್: ಬಿ.ಎ., (ಸರ್ಕಾರಿ ಕಲಾ ಕೊಲೆಜ್, ಹಾಸನ್, ಕರ್‍ನಾಟಕ)

ಘರಾಂತ್ ಮ್ಹಜಾ ಪಪ್ಪಾಕ್ ವಾಚ್ಪಾಚಿ ವೋಡ್ ಆಸ್ಲೆಲ್ಯಾನ್ ವಾತಾವರಣ್ ಸಕ್ಕಡ್ ಭುರ್ಗ್ಯಾಂಕೀ ಲ್ಹಾನ್ಪಣಾರ್ ಥಾವ್ನ್ಂಚ್ ವಾಚ್ಪಾಚಿ ವೋಡ್ ಸುರು ಜಾಲ್ಲಿ. ಮ್ಹಾಕಾಯ್ ತಶೆಂಚ್, ಹಾಂವ್ ಹೈಸ್ಕೂಲ್, ಕೊಲೆಜ್ ಪಾವ್ತಾನಾ ತಿ ಆನಿಕೀ ಚಡ್ ಜಾಲ್ಲಿ. ತ್ಯಾ ಕಾಳಾರ್ ಟಿ.ವಿ., ಮೊಬಾಯ್ಲ್, ಇಂಟರ್‌ನೆಟ್ ನಾತ್ಲೆ ವರ್ವಿಂ ಸಹಜ್ ಜಾವ್ನ್ ಆಮ್ಚಿ ಆಸಕ್ತ್ ವಾಚ್ಪಾ ಕುಶಿಕ್ ಗೆಲಿ.

ಹಾಂವ್ ಎಸೆಸೆಲ್ಸಿ ಜಾವ್ನ್ ಕೊಲೆಜ್ ಪಯ್ಸ್ ಆಸ್ಲ್ಯಾನ್ ಏಕ್ ವರ್‍ಸ್ ಘರಾಚ್ ಉರ್‍ಲೊಂ ಆನಿ ತ್ಯಾ ವಗ್ತಾ ಮ್ಹಾಕಾ ಅನಿವಾರ್ಯ್ ಜಾವ್ನ್ ಕೊಂಕ್ಣಿ ಪುಸ್ತಕ್ ತಶೆಂ ಪತ್ರಾಂ ವಾಚಿಜೆ ಪಡ್ಲೆಂ. ತ್ಯಾ ಪರ್‍ಯಾಂತ್ ಮ್ಹಜೆಂ ವಾಚಾಪ್ ಫಕತ್ ಕನ್ನಡಾಂತ್ ಜಾತಾಲೆಂ. ತಶೆಂ ಮ್ಹಾಕಾ ಕೊಂಕ್ಣಿ ಸಾಹಿತಾಚಿ ವಳಕ್ ಜಾಲಿ.

ಕೊಲೆಜಿಕ್ ಪಾವ್ತಾನಾ ಹಾಂವೆ ಇಂಗ್ಲಿಷಾಂತ್ ತಶೆಂ ಕನ್ನಡಾಂತ್ ಚಡ್ ವಾಚುಂಕ್ ಸುರು ಕೆಲ್ಲೆಂ. ಮ್ಹಜಾ ಆಸಕ್ತೆಚೆ ಬೂಕ್ ಜಾವ್ನಾಸ್ಲೆ ಜೇಮ್ಸ್ ಹೆಡ್ಲಿ ಚೇಸ್, ಅರ್‍ಲ್ ಸ್ಟೆನ್ಲಿ ಗಾರ್ಡ್‌ನರ್ ಅಸಲೆ. ಏಕ್ ಪಾವ್ಟಿಂ ಮ್ಹಜಾ ಹಾತಾಕ್ ಮಾರ್ಕ್ ಟ್ವೇಯ್ನ್ ಹಾಚೊ ’ಟೊಮ್ ಸೊಯರ್‍ಸ್ ಅಡ್ವೆಂಚರ್‍ಸ್’ ಮ್ಹಳ್ಳೊ ವಿದ್ಯಾರ್‍ತಿಂ ಖಾತಿರ್ ತಯಾರ್ ಕೆಲ್ಲೊ ಬೂಕ್ ಮೆಳ್ಳೊ ಆನಿ ಮ್ಹಾಕಾ ತೊ ಕೊಂಕ್ಣೆಕ್ ತರ್‍ಜಣ್ ಕರ್‍ಯಾಂ ಮ್ಹಣ್ ಭಗ್ಲೆಂ ಆನಿ ಹಾಂವೆ ಸುರು ಕೆಲೊಚ್. ಆಮ್ಚ್ಯಾ ಘರಾ ’ರಾಕ್ಣೊ’ ಪತ್ರ್ ಯೆತಾಲೆಂ ಆನಿ ಹಾಂವೆ ಧೈರ್ ಕರ್‍ನ್ ತಿ ಕಾಣಿ ರಾಕ್ಣೊ ಪತ್ರಾಕ್ ಧಾಡ್ಲಿ. ತೆದ್ನಾ ಫಾ. ಮಾರ್ಕ್ ವಾಲ್ಡಾರ್ ರಾಕ್ಣೊ ಪತ್ರಾಚೆ ಸಹಾಯಕ್ ಸಂಪಾದಕ್ ಜಾವ್ನಾಸ್ಲೆ ಆನಿ ತಿ ಕಾಣಿ ತಾಣಿ ಸ್ವೀಕೃತ್ ಕರ್‍ನ್ ಭುರ್ಗ್ಯಾಂಚೊ ಕೊನ್ಸೊ ವಿಭಾಗಾಂತ್ ಪ್ರಕಟ್ ಕೆಲಿ. ತಿಚ್ ಮ್ಹಜಿ ಪ್ರಥಮ್ ಅನುವಾದಿತ್ ಕತಾ. ತ್ಯಾ ಉಪ್ರಾಂತ್ ಹಾಂವೆ ಮಧೆಂ ಮಧೆಂ ರಾಕ್ಣೊಕ್ ಅನುವಾದಿತ್ ಲೇಖನಾಂ ಧಾಡುಲ್ಲಿಂ ತಿಂ ಪ್ರಕಟ್ ಜಾಲಿಂ. ತ್ಯಾ ಪೈಕಿ ಮ್ಹಜಾ ಉಡಾಸಾಕ್ ಯೆಂವ್ಚಾ ದೋನ್ ಲೇಖನಾಂಚೆ ನಾಂವ್ ’ಮಂಗಳ ಗ್ರಹಾಂತ್ ಕಿತೆಂ ಆಸಾ?’ ಆನಿ ’ಫಾರಿಜೆವ್ ಮ್ಹಳ್ಯಾರ್ ಕೋಣ್?’

ಬಿ.ಎ., ದುಸ್ರ್ಯಾ ವರ್ಸಾ ಥಾವ್ನ್ ಮ್ಹಾಕಾ ಕೊಂಕ್ಣಿ ಪತ್ರಾಂಚೊ ಸಂಪರ್ಕ್ ತುಟ್ಲೊ ಆನಿ ಹಾಂವ್ ಚಡ್ ಕರ್‍ನ್ ಕನ್ನಡ ಸಾಹಿತಿಕ್ ಸಂಸಾರಾಂತ್ ಬುಡೊನ್ ಗೆಲೊಂ. ತ್ಯಾ ವಗ್ತಾ ಹಾಂವೆ ಏಕ್ ಕನ್ನಡಾಂತ್ ’ಹ್ಯಾಪ್ಪಿ ಕ್ರಿಸ್ಮಸ್’ ಮ್ಹಳ್ಳಿ ಮಟ್ವಿ ಕಾಣಿ ಬರಯಿಲ್ಲಿ ಮ್ಹಜಾ ಮಿತ್ರಾಂಕ್ ಮಸ್ತು ಪಸಂದ್ ಜಾಲ್ಲಿ. ತಾಣಿಂಚ್ ತಿ ’ಕನ್ನಡ ಪ್ರಭ’ ಮ್ಹಳ್ಳ್ಯಾ ದಿಸಾಳ್ಯಾ ಪತ್ರಾಚ್ಯಾ ಅಯ್ತಾರಾಚ್ಯಾ ಪುರವಣಿಂತ್ ಪ್ರಗಟ್ ಜಾಲ್ಲಿ. ತ್ಯಾ ನಂತರ್ ಹಾಂವೆ ಲಿಖ್‌ಲ್ಲಿ ’ಮಳೆ’ ಮ್ಹಳ್ಳೆಲಿ ಕಾಣಿ ’ಮಲ್ಲಿಗೆ’ ಮ್ಹಳ್ಳ್ಯಾ ಮಯ್ನ್ಯಾಳ್ಯಾ ಮ್ಯಾಗಜೀನಾರ್ ಪ್ರಗಟ್ ಜಾಲಿ. ಉಪ್ರಾಂತ್ ಮ್ಹಜಿಂ ಥೊಡಿಂ ಬರ್‍ಫಾಂ ಆಮ್ಚಾ ಕೊಲೆಜಿಚ್ಯಾ ಕನ್ನಡ ಸಂಘ ಮ್ಯಾಗಜೀನರ್ ಪ್ರಗಟ್ ಜಾಲಿಂ ಸೊಡ್ಲ್ಯಾರ್ ದುಸ್ರೆಂ ಕಿತೆಂಯ್ ವಿಶೇಸ್ ಬರಂವ್ಕ್ ನಾ.

ಕೊಲೆಜ್ ಸಂಪ್ಲ್ಯಾ ನಂತರ್ ಹಾಂವ್ ಬೊಂಬಯ್ ಗೆಲೊಂ. ವಾಚ್ಚೆಂ ಏಕ್ ಸೊಡ್ಲ್ಯಾರ್ ಬರಂವ್ಚೆಂ ಮ್ಹಳ್ಳೆಂಚ್ ವಿಸ್ರೊನ್ ಗೆಲೊಂ. ಘರಾ ಕೊಂಕಣಿ ಉಲಂವ್ಚೆಂ, ಗಾಂವಾಕ್ ಪತ್ರಾಂ ಲಿಖ್ಚಿಂ ಸೊಡ್ಲ್ಯಾರ್ ದುಸ್ರೊ ಸಂಪರ್ಕ್‌ಚ್ ನಾ ಜಾಲೊ.

1980 ತ್ ಬೊಂಬಯ್ ಸೊಡ್ನ್ ಗಾಂವಾಕ್ ಪಾಟಿಂ ಆಯ್ಲ್ಯಾ ನಂತರ್ ಮ್ಹಾಕಾ ಪರ್ತ್ಯಾನ್ ಕೊಂಕ್ಣೆಚೊ ಸಂಪರ್ಕ್ ಜಾಲೊ. ತೆದ್ನಾ ಆಮ್ಗೆರ್ ’ಮಿತ್ರ್’ ಮ್ಹಳ್ಳೆಂ ಹಫ್ತ್ಯಾಳೆಂ ಆಮ್ಗೆರ್ ಯೆತಾಲೆಂ. ಹಾಂವ್ ವಾಚ್ತಾಲೊಂ ಸೊಡ್ಲ್ಯಾರ್ ಬರಂವ್ಚೆಂ ವಿಸ್ರೊನ್ ಗೆಲ್ಲೆ ಬರಿಂ ಆಸುಲ್ಲೊಂ. ಹ್ಯಾ ವಗ್ತಾ ಹಾಂವೆ ಮೊರಿಸ್ ವೆಸ್ಟ್ ಮ್ಹಳ್ಳ್ಯಾ ಆಸ್ಟ್ರೇಲಿಯನ್ ಲೇಖಕಾಚಿ ’ಡೆವಿಲ್ಸ್ ಅಡ್ವೊಕೇಟ್’ ಮ್ಹಳ್ಳೆಲಿ ಕಾದಂಬರಿ ವಾಚುನ್ ಆಸುಲ್ಲೊಂ. ತ್ಯಾ ಕಾದಂಬರಿಚ್ಯಾ ಕತಾವಸ್ತುನ್ ಮ್ಹಾಕಾ ಮಸ್ತು ಡಿಸ್ಟರ್ಬ್ ಕೆಲೆಂ. ಕೆನ್ಸರಾನ್ ಮರ್ಣಾಚೆಂ ಫರ್ಮಾಣ್ ವಾಚ್ಲೊಲೊ ಎಕ್ಲೊ ವಾತಿಕಾನ್ ಪಾದ್ರಿ, ಕಥೊಲಿಕ್ ಭವಾಡ್ತ್, ಪಾತಕ್, ಸಾಂತಿಪಣ್, ದುರ್ಬಳ್ಕಾಯ್, ಸಲಿಂಗ್ ಸೆಕ್ಸ್, ಲೈಂಗಿಕ್ ಅಸಂತುಷ್ಠ್‌ಕಾಯೆಂತ್ ವಳ್ವಳೊನ್ ಆಸ್ಚಿ ಸ್ತ್ರೀ, ಎಕ್‌ಚ್ ಖಟ್ಲೆಂ, ಪಾಂಗ್ರುಂಕ್ ಎಕ್‌ಚ್ ಕಾಂಬಳ್ ಆಸಾ ಮ್ಹಣೊನ್ ಘರ್ ಸಾಂಬಾಳ್ಣಾರ್ ಸ್ತ್ರೀಯೇ ಸಂಗಿ ಸ್ಕಾಂದಲಾಚಿ(!) ಜೀಣ್ ಜಿಯೆವ್ನ್ ಆಸ್ಚೊ ಹಳ್ಳೆಚೊ ಪಾದ್ರಿ, ತ್ಯಾ ವಯ್ರ್, ಎಕಾ ವಿಧ್ವಿ ಸಂಗಿ ಪ್ರದುವಾರ್‌ಪಣಾಂತ್ ಜಿಯೆವ್ನ್ ಆಸೊನ್ ಎಕಾ ಚೆರ್ಕ್ಯಾಚೊ, ಸಾಂತ್ ಮ್ಹಣೊನ್ ಸಗ್ಳ್ಯಾ ಗಾಂವಾನ್ ಮಾಂದ್ಚೊ ಬಾಪುಯ್, ಕೆಲಿಫೋರ್‍ನೀಯಾ ಥಾವ್ನ್ ಚಿತುರ್‍ಲೆಚಿ ಝಡಾಂ ಹಾಡವ್ನ್ ಸ್ಥಳೀಯ್ ಲೊಕಕ್ ಕೃಶಿ ಶಿಕ್ಷಣ್ ದಿಂವ್ಚೊ ಭಿಸ್ಪ್... ಹಿ ಕಾದಂಬರಿ ಕೊಂಕ್ಣೆಕ್ ತರ್ಜಿಜೆ ಮ್ಹಣ್ ಭಗ್ಲೆಂ. ಹಿ ಕಾದಂಬರಿ ಕೋಣ್ ಪರ್ಗಟ್ ಕರಿತ್ ಮ್ಹಳ್ಳೆಂ ಸವಾಲ್ ಮ್ಹಜೆ ಥೈಂ ಉದೆಲ್ಲೆಂಚ್ ನಾ! ಹಾಂವೆ ಸುರು ಕೆಲಿಚ್! ಮ್ಹಜೆ ಲಾಗ್ಗಿಂ ಫಕತ್ ಆಸುಲ್ಲಿ, ಡಿ.ಕೆ.ಭಾರದ್ವಜ್ ಸ್ಟ್ಯಾಂಡರ್ಡ್ ಇಂಗ್ಲಿಷ್-ಕನ್ನಡ ಡಿಕ್ಷನರಿ! ಮಲ್ನಾಡಾಂತ್ ವೀಜ್ ಸಂಪರ್ಕ್ ನಾಂವಾ ತೆಕಿದ್! ಚಿಮ್ಣೆ ಉಜ್ವಾಡಾಕ್ ಸುರು ಕೆಲ್ಲೊ ವಾವ್ರ್ ಹಾಂವ್ 1986 ತ್ ಕಾಜಾರ್ ಜಾತಾ ಪರ್‍ಯಾಂತ್ ಮುಂದರೊನ್ ಗೆಲೊ. ಸಿಸ್ಟರಿಂಚ್ಯಾ ಕೊವೆಂತಾನಿಂ ಶಿಕ್ಲೆಲ್ಯಾ ಭುರ್ಗ್ಯಾಂಚಿ ಅಕ್ಷರಾಂ ಬೋವ್ ಸೊಭಿತ್. ಮ್ಹಜಿಂಯ್ ಸೊಭಿತ್ ಆಸ್ಲಿಂ! ಪುಣ್ ತಾಂಕಾ ವೇಗ್ ನಾತ್ಲೊ! ಹಾಂವ್ ಕಾಜಾರ್ ಜಾಲ್ಯಾ ನಂತರ್ ಮ್ಹಜಾ ಹೊಕ್ಲೆನ್, ಮೇರಿನ್ (ಆತಾಂ ಬಾಯ್ಲ್) ಕಸಲಿಚ್ ಕಿರ್‍ಕಿರಿ ಕರಿನಾಸ್ತಾಂ ಮ್ಹಜಾ ಹಾತ್ ಪ್ರತಿಯೆಕ್, ತಿಚಾ, ಮ್ಹಜಾಕೀ ಸುಂದರ್ ಹಾತ್ ಬರ್‍ಫಾನ್ ಛಾಪ್ಯಾ ಯೋಗ್ಯ್ ಪ್ರತಿ ಕರ್‍ನ್ ದಿಲಿ (ತೆಂಚ್ ಪಯ್ಲೆಂ ಆನಿ ನಿಮಾಣೆ!). ಶ್ರೀ ಡೊಲ್ಫಿ ಕಾಸ್ಸಿಯಾ ತೆದ್ನಾ ಮಿತ್ರ್ ಪತ್ರಾಚೊ ಸಂಪಾದಕ್ ಜಾವ್ನಾಸ್ಲೊ. ಅಸಲಿ ಏಕ್ ಕಾದಂಬರಿ ಹಾಂವೆ ಅನುವಾದಿತ್ ಕೆಲ್ಯಾ, ಸಾಮಾನ್ಯ್ ವಾಚ್ಪ್ಯಾಂಕ್ ತಿ ಪಸಂದ್ ಜಾಂವ್ಚಿ ಮ್ಹಾಕಾ ದುಬಾವ್ ಮ್ಹಣೊನ್ಂಚ್ ತಿ ಪ್ರಗಟ್ ಕರ್‍ಶ್ಯಾತ್‌ಗಿ ಮ್ಹಣೊನ್ ಹಾಂವೆ ವಿಚಾರುನ್ ಪತ್ರ್ ಬರಯ್ಲೆಂ. ತಾಣಿ, ವಾಚ್ಪ್ಯಾಂಚ್ಯಾ ಬೌದ್ಧಿಕಾಯೆವಿಶಿಂ ದುಬಾಂವ್ಚೆಂ ನಾಕಾ ತುಮಿ ಧಾಡಾ ಪ್ರಗಟ್ ಕರ್‍ಯಾಂ ಮ್ಹಣ್ ತಾಣಿ ಜಾಪ್ ದಿಲಿ. ಅಶೆಂ, ’ಸೈತಾನಾಚೊ ವಕೀಲ್’ ಪಂಚ್ವೀಸ್ ಹಫ್ತ್ಯಾಂ ಮ್ಹಣಾಸರ್ 1987 ತ್ ಪ್ರಗಟ್ ಜಾಲಿ. ತ್ಯಾ ನಂತರ್ ಥೊಡ್ಯಾ ಕಾರಣಾಂಕ್ ಲಾಗೊನ್ ಮ್ಹಜೊ ಆನಿ ಕೊಂಕಣಿಚೊ ಸಂಪರ್ಕ್ ತುಟ್ಲೊ.

2005 ತ್ ಜಾಯ್ಜೆ. ಹಾಸನ್, ಹಾಂವ್ ಶಿಕ್ಲೆಲ್ಯಾ ಕೊಲೆಜಿಕ್‌ಚ್ ಪ್ರೊಫೆಸೊರ್ ಜಾವ್ನ್ ಆಯಿಲ್ಲೊ ಶ್ರೀ ವಲೇರಿಯನ್ ಡಿಸೋಜಾ ಹಾಣೆ ’ರಾಕ್ಣೊ’ ಪತ್ರಾಚಿ ಏಜೆನ್ಸಿ ಘೆತ್‌ಲ್ಲಿ. ತಾಚ್ಯಾ ವತ್ತಾಯೆಕ್ ಲಾಗೊನ್ ಹಾಂವ್ ಪರ್ತ್ಯಾನ್ ರಾಕ್ಣೊಚೊ ವರ್ಗಣಿದಾರ್ ಜಾಲೊಂ.

ಆಮ್ಚಾ ಸ್ಥಳೀಯ್ ಕನ್ನಡ ಪತ್ರಾಕ್ ತೆದ್ನಾ ತೆದ್ನಾ ಹಾಂವೆ ಅನುವಾದಿತ್ ಕೆಲ್ಲ್ಯೊ ಕಾಣ್ಯೊ ಧಾಡುನಚ್ ಆಸ್ಲೊಂ. ಏಕ್ ಪಾವ್ಟಿಂ ಅಶೆಂ ಭಗ್ಲೆಂ ಕೀ ’ರಾಕ್ಣೊ’ ಕ್ ಏಕ್ ಕಾಣಿ ಧಾಡ್ಯಾಂ. ಅಮೆರಿಕನ್ ಲೇಕಕ್ ಒ’ಹೆನ್ರಿನ್ ಲಿಖ್‌ಲ್ಲಿ The last leaf ಕಾಣಿ ಕನ್ನಡಾಕ್ ಅನುವಾದ್ ಕೆಲ್ಲಿ ಮಾತ್ರ್ ತಿ ಕೊಂಕ್ಣೆಕ್ ’ನಿಮಾಣೊ ಖೊಲೊ’ ತರ್‍ಜುಣ್ ಧಾಡ್ಲಿ. ತಿ ಮುಕ್ಲ್ಯಾ ಹಫ್ತ್ಯಾಂತ್‌ಚ್ ಪ್ರಗಟ್ ಜಾಲ್ಲಿ ಪಳೆವ್ನ್ ಹಾಂವ್ ಅಜ್ಯಾಪ್ಲೊಂ. ತ್ಯಾ ನಂತರ್ ಮ್ಹಜೆ ಆನಿ ಕೊಂಕಣಿ ಸಾಹಿತಾ ಮಧೆಂ ಏಕ್ ನಿರಂತರ್ ಬಾಂಧ್ ಘಡ್ಲೊ ಮ್ಹಣ್ಯೆತ್. ಹಾಕಾ ಮುಕೆಲ್ ಕಾರಣ್ ತೆದ್ನಾಂಚೊ ’ರಾಕ್ಣೊ’ ಸಂಪಾದಕ್ ಫಾ. ಫ್ರಾನ್ಸಿಸ್ ರೊಡ್ರಿಗಸ್ ಆನಿ ಸಹ-ಸಂಪಾದಕ್ ಟೊನಿ ಫೆರೊಸ್ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ. ತ್ಯಾ ನಂತರ್ ಹಾಂವೆ ಕೊಂಕ್ಣೆಂತ್ ಕಿತ್ಲ್ಯೊ ಇಂಗ್ಲಿಷ್ ಆನಿ ಕನ್ನಡ ಕಾಣ್ಯೊ ತರ್‍ಜಿಲ್ಯೊ, ಲೇಖನಾಂ, ಲಲಿತ್ ಪ್ರಬಂಧ್ ಲಿಖ್ಲೆ ತೆ ಸುರ್‍ವೆರ್ ಲೇಖ್ ದವರ್‍ಲೆಂ ತೆಂ ಉಪ್ರಾಂತ್ ಸೊಡ್ಲೆಂ. ಕೊಂಕ್ಣೆಂತ್ ಪ್ರಗಟ್ ಜಾಂವ್ಚ್ಯಾ ಚಡಾವತ್ ಪತ್ರಾಂ, ಅಂತರ್‍ಜಾಳಿ ಪತ್ರಾಂನಿ ಮ್ಹಜಾ ಬರ್‍ಫಾಂಕ್ ಹೃತ್ಪೂರ್ವಕ್ ಅವ್ಕಾಸ್ ದಿಲಾ.

ಕೊಂಕಣಿ ಆನಿ ಕನ್ನಡ ಮ್ಹಣೊನ್ ಹಾಂವೆ ದೊನ್ಶಾಂ ವಯ್ರ್ ಇಂಗ್ಲಿಷ್, ಕನ್ನಡ ಕಾಣ್ಯೊ ತರ್‍ಜಿಲ್ಯಾತ್.

ಪ್ರಕಟಿತ್ ಬೂಕ್: ಕೊಂಕ್ಣೆಂತ್: ’ಗಾಂಧಿಚೆಂ ಪರ್ಜಳಿಕ್ ಫುಡಾರ್‌ಪಣ್’ ಹ್ಯಾ ಕೃತಿಯೆಕ್ ಕರ್‍ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಲಾಬ್ಲಾ.

ಅಪಹರಣ್: ಕರ್‍ನಾಟಕಾ ಕೊಂಕಣಿ ಸಾಹಿತ್ಯ್ ಅಕಾಡೆಮಿ ಪ್ರಕಟಿತ್ ಮಟ್ವ್ಯಾ ಕಾಣಿಯಾಂಚೊ ತರ್ಜಣ್ ಪುಸ್ತಕ್.

Pratham Books ಹಾಂಚ್ಯಾ Story weaver ತ್ 16 ಭುರ್ಗ್ಯಾಂಚೆ ಡಿಜಿಟಲ್ ತಶೆಂ ಛಾಪ್ಯಾ ಕನ್ನಡ ಪುಸ್ತಕ್.

ಸಾಂಕಾಳ್ ಕಾದಂಬರಿ: ಮಾರ್ಕ್‌ಟ್ವೇಯ್ನಾಚೊ ’ಟೊಮ್ ಸೊಯಾರಾಚಿ ಸಾಹಸಾಂ.’ (Adventures of Tom Sawyer) (ರಾಕ್ಣೊ)

ಮೊರಿಸ್ ವೆಸ್ಟ್ ಹಾಚೊ ’ಸೈತಾನಾಚೊ ವಕೀಲ್’ (The Devils Advocate) (ಮಿತ್ರ್)

ಪಾವ್ಲೊ ಕುವ್ಹೆಲೊ ಹಾಚೊ ’ಲಿಪಯಿಲ್ಲೆಂ ದಿರ್ವೆಂ’ (Alchemist) (ರಾಕ್ಣೊ)

ಅರ್‍ನೆಸ್ಟ್ ಹೆಮಿಂಗ್‌ವೇ ಹಾಚೊ, ’ಮ್ಹಾತಾರೊ ಆನಿ ದರ್ಯೊ’ (The Old Man and the Sea) (ವೀಜ್)

ನೀಳ್ ಕತಾ: ಕ್ಯಾಥರಿನ್ ಆನ್ನ್ ಪೋರ್ಟರ್ ಹಿಚೆಂ ’ದನ್ಪರಾಚೆಂ ಅಮಾಲ್’ (Noon Wine) (ರಾಕ್ಣೊ)

ಸಾಮರ್ಸೆಟ್ ಮ್ಹಾಮ್ ಹಾಚೆಂ ’ಪತ್ರ್’ (The Letter) (ರಾಕ್ಣೊ)

ಸಾಮರ್ಸೆಟ್ ಮ್ಹಾಮ್ ಹಾಚೊ ’ತಿರಸ್ಕಾರ್’ (Unconquered) (ರಾಕ್ಣೊ)

ಸುಸಾನ್ನ್ ಗ್ಲಾಸ್ಪೆಲ್ ಹಿಚೊ ’ಸುಕ್ಣೆಂ ಪಿಂಜ್ರ್ಯಾಂತ್ ನಾ (The Jury of her Peers) (ರಾಕ್ಣೊ)

ಅನಿರ್ಬಾನ್ ಭಟ್ಟಾಚಾರ್ಯ ಹಾಚೊ, ’ಸಯನೈಡ್ ಮೋಹನಾಚಿ ಕರಾಳ್ ಕತಾ’ (Cyanide Mohan) (ದಿವೊ)

ಹೆನ್ರಿ ವ್ಯಾನ್ ಡೈಕ್ ಹಾಚೊ ’ಚವ್ತೊ ರಾಯ್’ (The Other Wise Man) (ದಿವೊ)