ಕಪಲ್ [ಆರ್. ರಾಮ್‌ನಾಥ್]

ಸಂಸಾರಾಂತ್ ಸಭಾರ್ ಥರಾಚಿಂ ಆಮಾಲಾಂ ಆಸಾತ್ ತಾಂತುಂ ಕವಿತಾ ಎಕಾಥರಾಚೆಂ ಆಮಾಲ್ ಮ್ಹಳ್ಳೆಂ ತೆಂ ಆಮಾಲ್ ಸೆಂವ್ಚಿ ಸವಯ್ ಆಸ್ಚ್ಯಾಂಕ್ ಕಳಿತ್ ಆಸಾ. ಪುಣ್ ಹರ್ ಕವಿತೆಂನಿ ತೆಂ ಆಮಾಲ್ ಆಸಾನಾ, ಪುಣ್ ಜ್ಯಾ ಕವಿತೆಂತ್ ತೆಂ ಆಮಾಲ್ ಆಸ್ತಾ ತ್ಯಾ ಕವಿತೆಚಿ ಸೊಭಾಯ್ ವೆಗ್ಳಿಚ್. ಹಾಂಗಾಸರ್ ತಸಲಿಚ್ ಏಕ್ ಆಮಾಲಾಚಿ ಕವಿತಾ ಹಾಂಗಾಸರ್ ಆಸಾ. ದಿಸುಂಕ್ ಭೋವ್ ಸೊಂಪಿ ದಿಸತ್ ಪುಣ್ ಭಾರ್ಕಾಯೆನ್ ವಾಚ್ಲಿ ತರ್ ಹ್ಯಾ ಕವಿತೆಂತಲಿಂ ಲಿಪ್ತಿಂ ರುಪಾಂ ಏಕ್ ಅಥ್ವೊಚ್ ಅಣ್ವವ್ ದಿತಾ.

ಬಾಬ್ ಆರ್. ರಾಮ್‌ನಾಥ್ ಗೊಂಯ್ಚೊ ಏಕ್ ಜಾಣ್ತೊ ತಶೆಂಚ್ ಉತ್ತೀಮ್ ಕವಿ. ತಾಚ್ಯಾ ಕವಿತೆಂನಿ ಸಭ್ದಾಂಚಿ ರಾಸ್ ನ್ಹಯ್ ಅರ್ಥಾಂಚೊ ವ್ಹಾಳೊ ಆಸ್ತಾ. ಆನಿ ಹೆ ಅರ್ಥಾಚ್ಯಾ ಎಕೆಕಾ ಘೊಟಾಂತ್ ಕವಿತೆಚ್ಯಾ ಆಮಾಲಾಕ್ ಘೆವ್ನ್ ಯೆತಾತ್ ಜಾಲ್ಲ್ಯಾನ್ ಕವಿತಾರಸಿಕಾಂಕ್ ಹಾಚ್ಯೊ ಕವಿತಾ ಖೂಬ್ ಆವಡ್ತಾತ್. ಆತಾಂ ಹೆಂ ಕವಿತೆಚೆಂ ಆಮಾಲ್ ಸೆಂವ್ಕ್ ತುಕಾಚ್ ಸೊಡ್ತಾಂ.

[ಕವಿತಾ] ಕಪಲ್  [ಆರ್. ರಾಮ್‌ನಾಥ್]

ಕಪಲ್

ತುಜ್ಯಾ ಕಪಲಾವೆಲೊ ಹಾಂವ್

ವ್ಹಡ್ ಜಾವಂದೀ

ಆನೀ ಘಟ್ ಜಾವಂದೀ

ಖರ್ಯಾಂನೀಚ್ ತೂಂ ಖೂಬ್ ಬರೆಂ ದಿಸತಲೆಂ

ಆನೀ ಸಾಮಕೆ ಖರೆಂ ದಿಸತಲೆಂ

ಮ್ಹಾಕಾಯ್ ತೆಂ ಬರ್ಯಾಕ್ ಪಡತಲೆಂ...

ಪೂಣ್ ಹಾಲೀಂಸರ್

ತುಜ್ಯಾ ಕಪಲಾವೆಲೊ ಹಾಂವ್

ದಿಸಾನ್‌ದೀಸ್ ಭಾಗತ್ ಚಲ್ಲಾಂ

ಆನೀ ಆಯಜ್ ತರ್ ಹಾಂವ್ ಫಕತ್ ಟಿಂಬ್ ಮ್ಹೂಣ್ ಉರಲಾಂ..

ಖರ್ಯಾಂನೀಚ್ ಸಾಂಗತಾಂ

ಮ್ಹಾಕಾ ಹ್ಯಾ ಟಿಂಬಾಪರಸೂಯ್ ಬಾರೀಕ್ ಕರಪಾಕ್

ಫಾಲ್ಯಾಂ ಹಾಂವ್ ತುಕಾ

ಬಿಲಕೂಲ್ ಚಾನ್ಸೂಚ್ ದಿವಚೊನಾ

ತೆಂ ಮ್ಹಜೆಂ ತುಕಾ ಉತರ್...

ಹಾಂವ್ ಉತರಾನ್ ಸಾಮಕೊ ಸೊರ್ತ್..

- ಆರ್. ರಾಮ್‌ನಾಥ್ [ಮಾಯ್, 2019]

ಆರ್. ರಾಮ್‌ನಾಥ್: ಹಾಯ್ಕೂ, ರೂಬಯೀ, ಚಾರೊಳೀ, ಗಝಲ್ ತಶೆಂಚ್ ಫ್ರೀ ವರ್ಸಾಂಚೆರ್ ಕವಿತಾ ಬರಂವ್ಚೊ ಆರ್. ರಾಮ್‌ನಾಥ್ (ರಾಮ್‌ನಾಥ್ ರಾಮ್‌ನಾಥ್‌ಕಾರ್) ಕೊಂಕಣಿಚ್ಯಾ ಉತ್ತೀಮ್ ಕವಿಂ ಪಯ್ಕಿಂತ್ಲೊ ಎಕ್ಲೊ. ಪರ್ಗಟ್ ಜಾಲ್ಲೆ ಕವಿತಾಜಮೆ; ಕೊಂಕಣೀ: ಮಳಬರಂಗಮಾಚೀ (1989), ನಿಸಣ್ (2013), ವಿಸ್ತವ್ (2015), ಮರಾಠೀ: ’ದರವಾಜೆ: ಬುಟಕೆ ಆನೀ ಉಂಚ್ (1994). ಕಲಾ ಅಕಾದಮೀ ಸಾಹಿತ್ ಪುರಸ್ಕಾರ್, ಗೊವಾ ಕೊಂಕಣೀ ಅಕಾದೆಮೀಚೊ ಸಾಹಿತ್ಯ್ ಪುರಸ್ಕಾರ್, ಬಿಂಬ್, ಗೋಮಂತ್ ವಿಧ್ಯಾನಿಕೆತನಚೊ ತಶೆಂಚ್ ಸಭಾರ್ ಹೆರ್ ಸಾಹಿತ್ಯ್ ಪುರಸ್ಕಾರ್ ಲಾಭ್ಲ್ಯಾತ್.