परत उगडटलीं (- रुपाली मावजो कीर्तनी)

तूं सगल्यांच्या जिबेर बसला

वेगवेगळ्या रूपांत तूं

घरा घरांत वसला

देवळांत जरी येवंक मेळना

नांव घेवचें कोण सोडना

तूंच भायर सरला जाल्ल्यान

पावला कणकणीं देवस्थाना

इगर्जी बंद मस्जिदी बंद

देवळांचीय दारा बंद

कोण केन्ना पावत कळना

मदत करची सोडनात संद

देवस्थानांनी सोदतात तुका

भायर कोणाक दिसना कित्याक?

कित्याक तू दाखयना वळख

वळखनात तुका कोण कित्याक?

कोण ना कोण कसो ना कसो

कोणाक ना कोणाक पावता

अश्या वेळार रूप तुजें

त्यांच्यात दिसूंक लागता

पारखी नदर आसली तर

तरेकवार तुजीं दिसतात रूपां

विस्वास तेन्ना घट्ट जाता

पयस जातली काळी कुपां

परत जातलीं एक सगलीं

परत पडटलो पावस खोश्येचो

परत उगडटलीं देवस्थानां

परत हांसतलो वाठार भोंवंतणचो

-  रुपाली मावजो कीर्तनी. [ज्यून, २०२०]