Porot ugddottolim (- Rupali Mauzo Kirtani)

[kovita] Porot ugddottolim (- Rupali Mauzo Kirtani)

Devacher patyenni aschim ’devo sogollean asta’ mhonnun patyetat tor‌yi, jednam monoxachea bhoktechem soval yeta, to ti bhokt fokot mondir, igorz, mosjident matr dakoita ani devan ascho zago fokot tea zageamni mhonnun lekta. Hech chintpacher matxe gunddayen kel'lem chintop hea kovitent disun yeta.

[kovita] Porot ugddottolim (- Rupali Mauzo Kirtani)

Porot ugddottolim

bond jen'nasaun deusthana

tum sogleanchea jiber bosla

vegvegllea rupant tum

ghora ghorant vosla

deullant zori yeunk mellna

namv gheuchem konn soddna

tunch bhair sorla zal'lean

paula konnkonnim deusthana

igrji bond mosjidi bond

deullanchi-i dara bond

konn ken'na paut kollna

modot korchi soddnat sond

deusthanamni sodtat tuka

bhair konnak disna kiteak?

kiteak tu dakhoina vollokh

vollkhonat tuka konn kiteak?

konn na konn koso na koso

konnak na konnak pauta

oxea vellar rup tujem

teancheat disunk lagta

parkhi nodor asli tor

torekovar tujim distat rupam

visvas ten'na ghott'tt zata

pois zatli kalli kupam

porot zatlim ek soglim

porot poddttolo paus khoxyecho

porot ugddottolim deusthanam

porot hamstolo vatthar bhomvontonnocho

- Rupali Mauzo Kirtani. [Jun, 2020]

Rupali Mauzo Kirtani: Konkonni, Moratthi, Inglix ani Hindint 300 voir kovita boroyil'li bai rupali mauzo kirtoniche Mhojeantolem Hamv (2012), Mollbothaun (2012), Wings - chap book (2012), My mirror - chap book (2017) kovitazome porgottleat. Sauditole te dis (2016) isvent porgottla. Konkonni Bhasha monddoll (Gõy) puroskar, TMA Pai xifaros puroskar hika labh‌l'le promuk puroskar.