Mhojea sahitik survater Edwin J.F. Dsouza-chem namv kon'nodd lipintlea konknni nemalleamni lokamogall zaunasolem; ek bhollvont kadomborikar, kothakar zaun. To Kuwait-ant kam' korn aslo, ek pauttim to rojer mam-igamvak ayil'levellar (kaim 1986-88 isvent) , Mongllurant ayojit zal'lea mottvea kanniancher uloupant ’Ek kop hunoni kofi’ cher to eka mottvea kanniechea tantrik vixeancher uloitalo. Tench poilepauttim hamvem eddvinak poixilean pollomvchem. To uloupant xida (Blunt) dekun tachelagim ulvonk tache choddtavo somkallin boroupi norgotale va kaujetale.
1987 isvent hamv mongllurant vosti korun aslom toryi Edwin Kuwait-ant kam' korn aslo dekun taka mellcho sondhrbh mell'llona. 1990 isvent kuveytt-irak zhuz survatolem dekun eddvin oplea kuttmasovem mongllurak pautana hamv mhojea dispoddtea grasak lagon Mumboi paulom, uprant 2000 isvent hamv Kuwait-ak paulom. Edwin tednam Raknno doftorant mottvea kanniancho vibhagacho sompadok zaunasolo.
Digital kallachi survat zalea matr, dubomyt ’daijidubhoi’ survat zali mhonnon uprant her pranteamni soit konknni boroupeanchim songhttonam udelim; kuveyttant ’konknni kullvar’ suru zalem. Ddijittol madhyomacher konknni sahity porgottunk suru zalem, oxem imeylam mukhantr boroupi ekameka somprk korun aslevellar mhojea kanant ek khobor poddloli zaunasa gleddis bayechi. Tinnem oplea mottvea kannimyanchem pustok porgottunk asa dekun ek prostaun boromvchak eddvinak vicharolele vellar eddvinan tika zap dil'li kom-i "poilem mhojem prostaun yemvchea mott'ttak kannio borvonk xik". Him utram aikon gleddis bai bhovo chodd duk pavol'li mholl'lli gozal mhojea kanamni poddli. Hamv soit mhojea poilea mottvea kannianchea pustokak prostaun borvonk sodhun aslom. Hamvem motint chintlem; ’mhojea poilea mottvea kannianchea pustokacher eddvin prostaun boroitkai?’ oxem chintun, eddvinak imeyl kelem. ’Dear Sir Edwin, I am planning to publish my short stories, may I kindly request you for a suitable foreword.'
Mhojea imeylak dusrech disa eddvinachi zap aili: 'Dear Valley, Firstly, don't call me Sir or Bab, call me Edwin, secondly, I cannot promise you about my foreword, but you must send me the printed copies of your short stories, once I go through them, I will confirm.'
Hamvem thoddeach disamni mhojea kannianchi printt kopi taka posott keli. Kaim pondra-vis disamni tachem opurbhayechem prostaun mhaka imeylacher paulem. Oxem mhojea poilea mottvea kannianchea pustokacher (axavadi) eddvinachem frostaun ailem, toxench tachesovem mhoji ixttagot ani somprk imeylacher sorag ritin zalo.
Mhojem poilem pustok chhapon ayil'lench fek namvacher mhaka ek imeyl ailem. Tea imeylant mhojea pustokacher khoddi kaddun boryil'lem. Hamvem taka zovab divun boroilem; "tujea protikriek dhinvas, doikorun hi khonchyai eka nemalleak dhaddun di, porgottonnek favo zal'li tor tim chhaptolim." toxench hem imeyl soit havem eddvinak farvordd kelem.
Eddvinachi ekach vakheachi zap mhaka aili; "If you do not like smoke, then get out of the kitchen.".
Hamv kuveyttant kam' korn aslom, dekun 2002-3 isvent, mhojea poilea rojer gamvak yemvchem chintop motint attoun aslevellar eddvinan mhaka kolloilem; "tum rojer yemvchi olochon kortai tor so moine pattim ghal, kiteak mhollear mhojea ekleach dhuvechem ’rutachem kazar’ asa ani tuvem yeunk zai"
Oxem hamvem rojer yemvchem so moineak pattim ghalun hamv gamvak paulom ani rutachea kazarak hazor aslom.
Thoddea disamni mhaka eddvinak pursoter mellonk zai aslem dekun eddvinak fon kortana tannem zap divun mhollem; "sokallim dha thaun bhara, va sanjer char thaun so poreant, kednam-i tuka pautt melltana yeuyet". Hamv ojekar rautalom, toull sokallochem poilem bos dhorn karkoll, karkoll thaun mongllurak pautana unnear unnem ikra-sadde ikra tori zatat. Mongllur thaun eddvinachea ghora rikxa dhorn pautana pondra-vis minuttam mhollear choddunnem bhara voram zatat. Atam sanjer porot karkoll thaun ojekar vellar pavazoi tor sadde charank tori mongllur thaun suttonk zai. Dekun eddvinak koxem mellchem mholl'llem chintun aslom.
Tednam ’sangati mitr’ suru zalam matr. Vitori ani richchi konknaddint aslea tanchea doftorantcho ratchem nidtale zal'lean ek-don pauttim hamv soit tanchesovem mitr doftorant rat paxar korun dusre disa sokallim eddvinak mell'llom.
Oxem chodd korun kednam-i hamv mongllurak paulom tor eddvinak ek bhett dimvchi rivaz mhoji souy koxi zali. Kedinch tannem mhaka ’lhan’ va ’unnea onbhogacho’ mhonnon chintunk kel'lem na. Khoroch to ek khoro mitr koso zalo. Amche choddtavo boroupi prayen bhortoch kuddint matr vaddtat xivai chintpant va voicharik ritin kedinkcho vaddanant. Dekun oslea choddtavanchem chintop eka sadea vachpeachea chintpacheaki sokla asta. Punn eddvin ek boro vachpi, xikpi toxench gamva-porgamvant ’vyousotit/xistechem kam'’ korn onbhog zoddlolo. Ani hem tachea utramni toxench kornemni parkiet aslem. Utramni to khoddok distalo punn kallzant titloch movall ani pramannik zaunasolo. Herank mechvonk tannem kedinch bonautti utram zamv korni zamv adharunk na.
2004 isvent rojer ayil'lom hamv mongllurank ek ghor sodhun asli khobor tachea kanim poddtana hamv pattim kuveytt pavol'lom. Mhaka tachi zap aili; "If you truly consider me as your good friend, then never rethink of buying a house/flat in Mangalore".
Tye uprant kedinkcho hamvem mongllurant ek biddar korchem chintop purtea monant haddl'lench na.
Kuveyttant hamv kam' korn aslevellar novo dexank hamvem meanez korunk aslem dekun choddtavo zaun mhozo somsar zaunasolo ’konknni boroupi’. Zamv dubhai, moskot, khotar, saudi, bahreyon va her dexamni soit vosti korun aschea konknni boroupeamsovem somprkar aslom. Tanchim borpam daiz.Kom'cher porgottotalom. Ani daiz.Kom'nt chhaplelem nokkol korn oplea nemalleamni chhapun thodde apapolem pott bhorn jietale. ’konknni’ konnak misamv, paxamv tor konnak opli dall xizomvchem/pott bhorchem stesamv.
Porgamvant kam' korn aslea thoddeamni tanchim pustokam chhapun dimvchak mhaka maglem. Havem tim chhapun tim sorv pustokam tea boroupeakcho dilim.
Oxem eddvinan tachim thoddim pornim borpam, onknnam porot chhapunk mhaka dhaddun dilim. Hamvem tim daiz.Kom'cher porgottolim. Kuveyttant ’konknni obhian somiti’ ghoddun, sobharanchea ghoramni bhett divun konknni nemalleank pattimbo divonk vetata lokamni konknni pustokam, konknni songit koulleo soit vicharunk suru kelem. Konknni mhaka kedinch pott bhorchem stesamv zaunk nhoi.
Ek ghoddit oxem asa: dubhai thaun eka namnechea boroupean oplem pustok chhaplem ani mhaka kuveyttant lokank paumvchak ponchvis protio dhaddleo. Kuveyttant zoni surtkol hem kam' bhovo opurbhayen choloitalo. Kuveyttant konknni nemalleank, pustokank pattimbo dimvcho lok choddtavo zaun ghor kamacho zal'lean kuveytt igrjechea lagsar aschea don-tin pustokanchea sttolamni tim nemallim molak gheun vhortalim. Hofteallim tor xembhor fils, moineallim tor deddxem fils, vixes onko va her pustok tor oddeyxim fils (kaldo dinar). Hacheaki choddtik mol diun konnyi vhorinatolim. Atam hea boroupean him pustokam mhaka kiteak dhaddlim tem hamv nennam, dekun hamvem zoni surtkolak somprk kortana tannem him pustokam buk-sttolamni ghalunk suchailem ani oddeyxim filsacheaki choddit divun konnyi ghemvchimnant mhonn sanglem. Hi vixoi hamvem tea dubhoichea boroupeak kolloitana tachi zap "vol'lu, mhaka eka pustokak don dinar lekar zai". Hamvem ponchvis pustokanche pon'nas dinar taka dhaddun dile. Punn tim pustokam ozun kuveyttantlea buk-sttolamni asonk puro.
Onyek ghoddit oxem asa: dusro namnecho boroupi mhojelagim opnnachem ek pustok chhapon divonk maglem dekun hamvem tachem pustok chhaplem ani chhapleleo sorv protio takach dileo.
2009 isvecho kall to, arthik mondi somsarbhor asli, mhojem kam' soit hogddaun ghetlem. Toull poreant duddu divun viza gheunk tran natle, punn tech vorsa duddu divn viza gheunk konnacheamni sadhy zalem na. Dekun hamv kam' hogddaun ghetleari, kompenichea vizacher aslom dekun kompenin mhoji sivil-oiddi tanchelagim douroleli. Tech vorsa vorsan voros karachi topasonni korun kliyrensa khatir sivil-oiddi magli. Mhojelagim sivil-oiddi natli, kompenilagim ti divonk vichartana tannim poilem mhoji viza ttransfor koroun sivil-oiddi vhorunk sanglem. Punn viza ttransfor zaunk praivett viza mellanant dekun hamv purto foslom. Gaddiechim dostavezam zamv, mhoji sivil-oiddi zamv nastam hamv ghorabhair vechem soit bhirantechem zalem. Dekun mhojesovem pasportt gheun bhair vetalom.
Hech vellar mhoji auy sorli dekun hamv gamvak vochon pattim kuveytt paulom. Thoddeach disamni mhaka pustok chhapol'lea tea namnechea boroupeachem imeyl ailem "vol'li, mhaka mhojea pustokak chhapleleak tuvem kitench sombhaun diunk nam-i....."
Hamvyi chintunk poddlom..... Konknni mhollear thoddeank fokot duddu, to kosoi yeunk, konnathaunyi yeunk, punn duddu... Duddu...
Hamvem taka turont dha hozar rupoi dhaddon dile.
Eka vatten kam' na, ghorak divonk bhaddem na, ghora bhair vochonk gaddiechim dostavezam nant, sivil-oiddi na. Thoddeach disamni mhaka eddvinachem imeyl ailem; "Just because it was published earlier, does not mean it is free for you." eddvinachem imeyl vachun duklom. Eddvin toryi mhaka somzotolo mhonnon chintun aslom. Hamvem daiz.Kom' sompadon korun mhojeach samballantolo duddu konknni vaurak, sahitik spordheank, pustokam porgottonnek ghaltalom xivai daiz.Kom' thaun kedinch konnai thaun eka rupeachi vorgonni va zahirat havem gheunk na.
Punn osle sobhar onbog hamvem jiroun ghetleat. Punn mhaka bhogloli duk hamvem kedinch konnalagim kollvonk va somzaunk vochonk na.
Punn eddvin mhaka lagsilo dekun kitem korchem mhonn vichar korn aslevellar mitr melvin vasan ek boro suchavo dilo; "vol'li, muyechem mas khaun ekleachi zat bhrixott zal'leporim zamvchem nhoi, moddem vhavaun vorteleak moddeachem vozon unnem korunk kes taslear pavana, dekun taka tum duddu dhaddon sodd". Oxem hamvem eddvinak duddu dhaddlo.
Punn mhojea kallzant zal'lo ghai tosoch jivo aslo, thoddea tempant hamv gamvak gel'lom eddvinak mell'llom ani taka somzailagolom;
"konknni boroupi, mhaka bhovo obhimanacho vekti, dekun hamv tanchea borpank pon'nas-xembor rupoi dimvche pras tachem pustok chhapon dimvchem va taka vorsacho kothakar, vorsacho kovi inamasovem il'lo vhodd oivz dilear mhaka somdhan. Dekun tujem pustok soit hamv chhapunk, uprant tujea borpak ek boro oivz soit dimvchem chintop mhojea motint gheun aslom." eddvinan kitench zap dilina. Punn amim ekameka toull toull uloun, imeylacher somprkar asleamv.
Tye uprant daaiz.com domain bondh zalem, thoddea tempan hamvem poinnari.com suru kelem, punn Edwin-ak shida sanglem; "tujim borpam mhojea poinnaricher yemvchimnant". Punn Edwin-acher mhaka aslo obhiman ani mog kedinch unno zaunk natlo.
Edwin ek adheatmik chintpacho vekti, tachea borpamni gunddayen aschi adheatmikota govai dita tachea vachpachi giresotkai. Konknni vortul disandis sonkirnn zaun veta ani hea sondhrbhar ekekole tunddurai apapoli dall xijvonk korche vevegolle khell lagxilean polleun ayil'lo to khoroch kantthallotalo, mhakai pois ravonk suchavo ditalo.
Tachea kadomborincher vimrso soddeam, ek borem somikxatmok lekhon soit chhapunk khonchyai boroupeak futtvonk na. Punn tachea mottvea kanniancher ek raxttri-i mott'ttachem odhyoin cholomvchi olochon mhojea motint asli. Dekun tacheo chear mottvea kanniancher tulnatmok odhyoin korun tem odhyoin lekhon eddvinak dhaddlem. To amchesovem aslevellar tachea sahiteacher odhyoin korun porgottolelem poilem/ek pustok zaunasolem ’chol don chondrank’.
Atam okherik ho ’chokrourti’ sobhdak yetam, hea sobdhak aikon to chiddtalo toryi chiddotleank chiddamvchi mhoji porni souy dekun eddvinak soit hamv chiddaitalom. Hye vixim mhojelagim tannem vicharolelea vellar hamvem taka dil'li zap; "her khonchyai bhasentole sahiti ekameka melltana sahiteacher uloitat, punn konknnint ekamekacheo khobro uloitat. Ani ek-don boroup nemalleamni chhapon ailem tor te sahitik ponddit va tunddu rai zale. Uprant tanchey ondh-bhokt pattlaudar somajik zallizageamni hankam toull toull pattosar choddomvcho sorkos porno. Punn ek sahiti zaun sahiteacher kholayen somvad korchi xeathi ason, herank aikonk toxench xikonk ugtem mon ascho eddvin mhaka ’konknni sahiteacho chokrourti’ koxem distalo. Az 14 jyun, eddvinacho zolmadis. 2026 isvent eddvinachea kothencher raxttri-i mott'ttachea ddijittol kothapatthacher odhyoin choltolem. Toxench addio pustokacher tacheo kotha prosar zatleo. Heo kotha inglix bhasent torzonn zaun chhapon aileat.
Hea kothemsovem yuttyubacher ’axavadi prokaxon’ 2018 thaun azvoreg tinxim konknni mottvea kanniank prosar korunk soklem mhonnon sangonk obhiman bhogta. Hem misamv fokot ek survat matr. Lipicho gondoll, pursokaranche kusatt'tt khell sod'deak boglen dourun, amkam mellchea vellant fokot konknni mottvea kanniank aikonk ulo ditam.
Jyun, 2026
