ಕಾಳೊಕಾಂತ್ ಜಿಯೆವ್ನ್ ಸವಯ್ ಜಾಲೆಲ್ಯಾಂಕ್ ಉಜ್ವಾಡ್ ದೊಳ್ಯಾಂಕ್ ಖೊಂಕ್ತಾ
ಕೊಂಕಣಿ ಭಾಸ್ ಸಭಾರ್ ಶೆಕ್ಡ್ಯಾಂ ಥಾವ್ನ್ ಲೊಕಾಚ್ಯಾ ಜಿಣ್ಯೆಂತ್ ವ್ಹಾಳೊನ್ ಆಯ್ಲಲಿ ಭಾಸ್ ಮ್ಹಳ್ಳೆಂ ಆಮಿಂ ಸಮ್ಜತಾಂವ್, ಪುಣ್ ಸಾಹಿತ್ಯಿಕ್ ಪಾಂವ್ಡಾರ್ ಕೊಂಕಣಿ ಭಾಸ್ ಲಗ್ಬಗ್ ದೆಡ್ಶಿಂ ವರ್ಸಾಂ (1889 ಇಸ್ವೆಂತ್ ಸುರ್ವಾತ್ ಜಾಲ್ಲೆಂ ಪಯ್ಲೆಂ ನೇಮಾಳೆಂ ಥಾವ್ನ್ ಲೆಕಾಕ್ ಧರ್ಚೆಂ ತರ್). ಹ್ಯಾ ದೆಡ್ಶೆಂ ವರ್ಸಾಂನಿ ಹ್ಯಾ ಭಾಸೆಕ್ ಅಪ್ಲ್ಯಾ ಜಿಣ್ಯೆಂತ್ ಪೊಸುನ್ ಆಯಿಲ್ಲೆ ಕಾಂಯ್ ಮಹಾ-ಶಿಕ್ಪಿ ವ ಪಂಡಿತ್ ನ್ಹಯ್. ದೆಡ್ಶೆಂ ವರ್ಸಾಂ ಚಡ್ ಜಾತಿತ್ ತರ್ ಪಾಟ್ಲಿಂ ಪನ್ನಾಸ್ ವರ್ಸಾಂಚಿ ಸಮಾಜಿಕ್, ಆರ್ಥಿಕ್, ರಾಜಕೀಯ್ ಪರಿಸ್ಥಿತಿ ಆಮ್ಕಾಂ ಕಳಿತ್ ಆಸಾ. ಆಜ್ ಆಮಿ ತಾಂತ್ರಿಕತೆಚಿ ಉಪಲಬ್ಧಿ ಆಸೊನ್, ಶಿಕಪ್ ಆಸೊನ್ ಅಜೀಕ್ ದೆಡ್ಶೆಂ ವರ್ಸಾಂತ್ ಜಿಯೆತೆಲ್ಯಾ ಲೊಕಾಂಕ್ ಆಯ್ಚ್ಯಾ ಮಾಪ್ದಂಡಾಂತ್ ತುಕುಂಕ್ ಜಾಯ್ನಾ. ದೆಕುನ್ ಥೊಡಿಂ ಮುಳಾವಿ ಸಮ್ಜಣಿ ಭಾಸ್/ಶಿಕಪ್ ವಿಶಿಂ ಆರಾಂವ್ಚಿ ತರ್;
ಪಯ್ಲಿ: ಕೊಂಕಣಿ ಭಾಸ್ ಕೊಣೆಂಯ್ ಇಸ್ಕೊಲಾಂನಿ ಶಿಕ್ಲಲಿ ಭಾಸ್ ನ್ಹಯ್.
ದುಸ್ರಿ: ಕೊಂಕಣಿ ಸಾಹಿತ್ಯ್ ರಚನ್ ಕೆಲ್ಲೆ ಕೊಣ್ಯೀ ’ಸಾಹಿತ್ಯ್ ಮ್ಹಳ್ಯಾರ್ ಕಿತೆಂ ತೆಂ ಶಿಕೊನ್’ ಸಾಹಿತ್ಯ್ ರಚ್ಲಲೆ ನ್ಹಯ್.
ತರ್ ವಾಚುಂಕ್ ಆನಿ ಬರಂವ್ಕ್ ಅಪ್ಶೆಂಚ್ ಶಿಕ್ಲೆಲೆ ನ್ಹಯ್. ದೋನ್ ಪ್ರಮುಕ್ ವಿಧಾನಾಂನಿ ತಿಂ ಕೊಂಕಣಿ ವಾಚುಂಕ್ ಆನಿ ಬರಂವ್ಕ್ ಶಿಕ್ಲಿಂ: ಪಯ್ಲೆಂ: ಧಾರ್ಮಿಕ್ ಬರ್ಪಾಂನಿ, ಇಗರ್ಜೆಂನಿ ಮಾಗ್ಣಿಂ, ಭಕ್ತಿಕ್ ಗಿತಾಂ/ಕಾಂತಾರಾಂ, ವಾಂಜೆಲ್ ವಾಚುನ್ ಯೆಂವ್ಚೆಂ ಚಡುಣೆಂ ಸರ್ವಾಂಕ್ ಗರ್ಜೆಚೆಂ ಜಾವ್ನ್ ಆಸ್ಲೆಂ.
ದುಸ್ರೆಂ: ಅಪ್ಲ್ಯಾ ಕುಟ್ಮಾಚಿಂ ಪರ್ಗಾಂವಾಂತ್ ಘೊಳೊನ್ ಆಸ್ಲೆಲ್ಯಾ ವೆಳಾರ್ ತಾಂಕಾಂ ತಪ್ಪಾಲಾರ್ ಚಿಟಿ ಬರಂವ್ಚಿ ಏಕ್ ರಿವಾಜ್ ಆಸ್ಲಿ, ಅಶೆಂ ಎಕಾಮೆಕಾಚಿ ಖಬರ್ ಚಿಟಿಂ ಮುಖಾಂತ್ರ್ ಮಾತ್ರ್ ಜಾವ್ನ್ ಆಸ್ಚೊ ತೊ ಕಾಳ್ ಆಸ್ಲೊ.
ಹ್ಯಾ ಸಂಧರ್ಭಾರ್ ವಿಶೇಸ್ ಶಿಕ್ಪಿ ನ್ಹಯ್ ತರ್ಯೀ, ಅಪ್ಲ್ಯಾ ಜಿಣ್ಯೆಚೆ ಅನ್ಭೋಗ್, ಸಾಹಿತಿಕ್ ರುಪಾರ್ ಬರವ್ನ್ ಬರವ್ನ್ ಶಿಕ್ಲಲೆಚ್ ಚಡ್; ಜಾಂವ್ ತೆ ಕಥಾಕಾರ್, ಕವಿ, ಕಾದಂಬರಿಕಾರ್ ವಾ ನಾಟಕಿಸ್ತ್. ತವಳ್ ಜಾಯ್ತಿಂ ನೆಮಾಳಿಂ ಕೊಂಕಣಿಂತ್ ಆಸ್ತಾಲಿಂ; ಹಫ್ತ್ಯಾಳಿಂ, ಪಂದ್ರಾಳಿಂ, ಮ್ಹಯ್ನ್ಯಾಳಿಂ. ಆನಿ ಹ್ಯಾ ಸರ್ವ್ ನೆಮಾಳ್ಯಾಂಕ್ ಖಾಯ್ಸ್ ಕರ್ಚೊ ವಾಚ್ಪಿ ವರ್ಗ್ಯೀ ಆಸ್ಲೊ. ಪುಣ್ ಏಕ್ ಸತ್ ಸುಟಾವೆಂ ಸಾಂಗ್ಚೆಂ ತರ್; ಕೊಣೆಂಚ್ ದುಡ್ವಾಚ್ಯಾ ವಾ ಪುರಸ್ಕಾರಾಚ್ಯಾ ಆಶೆನ್ ಬರಂವ್ಕ್ ಧರ್ಲ್ಲೆಂ ನಾ. ಕಿತ್ಯಾಕ್ ಮ್ಹಳ್ಯಾರ್ ತೆದ್ನಾಂ ದುಡುಯೀ ನಾತ್ಲೊ, ಪುರಸ್ಕಾರ್ಯೀ ನಾತ್ಲೆ. ಪಿಸಾಯ್ ಮ್ಹಣಾ ವಾ ಹವ್ಯಾಸ್, ಪುಣ್ ಸಾಹಿತ್ಯ್ ಬರಂವ್ಚಿ ಖೊರೊಜ್ ಆಸ್ಲಿ.
ಪುಣ್ ವೆಳಾಕಾಳಾನುಸಾರ್ ಶಿಕಪ್ ಆಯ್ಲೆಂ, ಲೊಕಾಚಿ ಸಮಾಜಿಕ್, ಆರ್ಥಿಕ್ ಪರಿಸ್ಥಿತಿ ಸುಧಾರ್ಲಿ. ಶಿಕಪ್ ಲಾಭ್ಲೆಂ ಪುಣ್ ತ್ಯಾ ಮಟ್ಟಾರ್ ಕೊಂಕಣಿ ಸಾಹಿತ್ಯ್ ಬರವ್ಪ್ಯಾಂನಿ ಮುಕಾರ್ ಆಯಿಲ್ಲೆಂ ವಾ ಯೆಂವ್ಚೆಂ ಮ್ಹಾಕಾ ದಿಸೊನ್ ಯೇನಾ. ಚಡ್ತಾವಾಂಕ್ ಇಲ್ಲಿ ಮಾಹೆತ್ ತಾಂಚ್ಯಾ ಕಾನಾರ್ ಪಡ್ತಾ; ಜಾಂವ್ ತಿ ಇಗರ್ಜೆಂನಿ/ರೆತಿರೆಂನಿ ಪ್ರಸಂಗಾರುಪಾರ್, ವಾ ಥಂಯ್ ಹಾಂಗಾ ಪಳೆಲ್ಲ್ಯಾ/ಆಯ್ಕಲ್ಲ್ಯಾಚೆರ್ ಲಬ್ದೊನ್. ಆನಿ ಕಾನಿಂ ಪಡ್ಲ್ಲಿ (ಜೊಡ್ಲ್ಲಿ) ಮಾಹೆತ್ಚ್ ಗಿನ್ಯಾನ್ ಮ್ಹಣ್ಚೆಪರಿಂ ಬರಯ್ತಾತ್. ಹಾಂಕಾಂ ’ಮಾಹೆತ್’ ಕಾರಣ್ ಕರ್ತಾ ’ಸಮ್ಜಣಿ’ ಜೊಡುಂಕ್, ಜೊಡ್ಲಲಿ ಸಮ್ಜಣಿ ಜಿಣ್ಯೆಂತ್ ಗಳ್ಸುಂಚೆಂ ’ಗಿನ್ಯಾನ್’. ಹೆಂಚ್ ವ್ಹಡ್ಲೆಂ ದುರಂತ್ ಭಗುನ್ ಜಿಯೆತಾತ್ ಚಡ್ತಾವ್ ’ಮಹಾನ್ ಸಾಹಿತಿ’. ಕೊಂಕಣಿಚೆಂ ಅನ್ಯೇಕ್ ಲಾಚಾರ್ಪಣ್ ಮ್ಹಳ್ಯಾರ್ ’ಮತ್ ನಾತ್ಲ್ಲ್ಯಾಂಕ್ ಗತ್ ನಾತ್ಲ್ಲೊ’ ಮ್ಹಳ್ಳೆಪರಿಂ, ಹ್ಯಾ ಮಾಹೆತಿಚೆರ್ ಬರಯಿಲ್ಲೆಂ ಆರಾವ್ನ್ ಛಾಪ್ಚೆ ಸಂಪಾದಕ್ ಮ್ಹಣ್ತಾನಾ ಕೊಂಕಣಿಂತ್ ’ಶಿಕ್ಷಣ್’ ಸೊಡ್ಯಾಂ, ಅಪ್ಣಾಚೆಂ ಸೊಡ್ನ್ ಹೆರಾಂಚೆಂ ವಾಚುಂಕ್ ಸಾಂಗ್ಲ್ಯಾರ್ ’ಜೀವ್ ಗೆಲ್ಯಾರೀ ವ್ಹಣ್ ನಾ ಪುಣ್ ಹೆರಾಂಚೆಂ ವಾಚುಂಕ್ ಹಿಂ ವಚಾನಾಂತ್’. ಫಕತ್ ಅಕಸ್ಮಿತ್ ಪಳೆತಾತ್ ಆನಿ ಪಳೆಲ್ಲೆಂಚ್ ಮತಿಂತ್ ಭರ್ಲೆಲ್ಯಾ ವಿಕಾಪರಿಂ ಫಯ್ಸಲ್ ಕರ್ತಾತ್. ಹಾಂಕಾಂ ಕಾಳೊಕಾಂತ್ ಜಿಯೆವ್ನ್ ಸವಯ್ ಜಾಲ್ಯಾ, ಕಿತ್ಯಾಕ್ ಮ್ಹಳ್ಯಾರ್ ಕಾಂಯ್ ಇಲ್ಲೆಂ ಬರಯ್ತಿತ್ ತರ್, ಆನಿ ’ಗತ್ ನಾತ್ಲ್ಲೆ’ ಸಂಪಾದಕ್ ತೆಂ ಛಾಪ್ತಿತ್ ತರ್, ತಿತ್ಲೆಂಚ್ ಪುರೊ. ತೆ ಮಾಗಿರ್ ನಿಟ್ಟ್ ಸರ್ಗಾಕ್. ಮಾಗಿರ್ ಸಮಾಜಿಕ್ ಮಾಧ್ಯಮಾಂನಿ ವಾಂಟ್ಚೆಂ ಕಿತೆಂ, ತಾಂಚ್ಯಾ ಭಕ್ತಾಂಚಿ ಶಿಫಾರಸ್ ಕಿತೆಂ, ಕಾಂಯ್ ನೋಬೆಲ್ ಪುರಸ್ಕಾರ್ ಮೆಳ್ಳೆಲೆಪರಿಂ ಲೆಕ್ತಾತ್. ಇಲ್ಲೆ ದಿಸಾಂನಿ ತಾಂಚೆಂ ಪುಸ್ತಕ್ ಯೆತಾ, ಸರ್ಕಸಾಕ್ ನವೆಂಚ್ ರೂಪ್ ಯೆತಾ, ಉಪ್ರಾಂತ್ ಪುರಸ್ಕಾರಾಚ್ಯಾ ಲಾಯ್ನಿರ್ ಉಭೆ. ಆಜ್ಕಾಲ್ ಬರವ್ಪ್ಯಾಂಚ್ಯಾಕೀ ಚಡ್ ಪುರಸ್ಕಾರ್ ಆಸಾತ್ ಜಾಲ್ಲ್ಯಾನ್ ಕಾಂಯ್ ಪುರಸ್ಕಾರ್ ಲಾಭ್ಲೊ ತರ್ ಉಪ್ರಾಂತ್ ತೆಚ್ ಪಂಡಿತ್. ತೊ ಪುರಸ್ಕಾರ್ ಕಸ್ಲೊಯ್ ಆಸೊಂ, ಕೊಣೆಂಯ್ ದಿಲ್ಲೊ ಆಸೊಂ ವಾ ಕಸ್ಲ್ಯಾಯ್ ಸಂಕ್-ಪಾಶಣಾಚೊ ಆಸೊಂ. ತೊ ಪುರಸ್ಕಾರ್ ನ್ಹಯ್?
ಎಡ್ವಿನ್ ಜೆ. ಎಫ್. ಡಿಸೋಜಾಕ್ ಹಾಂವ್ ಸಭಾರ್ ಕಾರಣಾಂಕ್ ಲಾಗೊನ್ ಮಾಂಧ್ತಾಂ. ತಾಂತುಂ ಏಕ್ ಕಾರಣ್ ಮ್ಹಳ್ಯಾರ್ ತೊ ಹೆರಾಂಚೆಂ ವಾಚ್ತಾಲೊ. ಮ್ಹಜ್ಯಾ ಸಮ್ಜಣೆಪ್ರಕಾರ್ ತಾಚ್ಯಾ ಸಮಕಾಳೀನ್ ಬರವ್ಪ್ಯಾಂ ಪಯ್ಕಿಂತ್ ಹೆರಾಂಚೆಂ ವಾಸ್ಚಿ ಶ್ಯಾಥಿ ಆಸ್ಲಲೊ ಎಡ್ವಿನ್ ಮಾತ್ರ್. ಕಿತ್ಯಾಕ್ ಮ್ಹಳ್ಯಾರ್ ತಾಚೆಲಾಗಿಂ ಶಿಕಪ್ ಆಸ್ಲೆಂ, ಸಮ್ಜಣಿ ಆಸ್ಲಿ. ಚ್ಯಾರ್ ಗಾಂವಾಂನಿ ಭಂವ್ಲ್ಲೊ ತೊ, ಹೆರ್ ಭಾಸೆಂತ್ಲೆಂ ಸಾಹಿತ್ಯ್ ವಾಚ್ತಾಲೊ. ಮ್ಹಜ್ಯಾ ಸಭಾರ್ ಬರ್ಪಾಂಚೆರ್ ತಾಣೆಂ ಸಮೀಕ್ಶಾ ಕೆಲ್ಲಿ ಆಸಾ. ಮ್ಹಾಕಾ ಕೆದ್ನಾಂಯ್ ಮಂಗ್ಳುರಾಕ್ ಭೆಟ್ ದಿಂವ್ಚ್ಯಾ ಸಂಧರ್ಭಾರ್ ಎಡ್ವಿನಾಕ್ ಮೆಳ್ಚೆಂ ಆನಿ ತಾಚೆಸವೆಂ ಥೊಡೊ ವೇಳ್ ಖರ್ಚುಂಚೆಂ ಮ್ಹಳ್ಯಾರ್ ಏಕ್ ಪುಸ್ತಕ್ ವಾಚ್ಲಲೊ ಅನ್ಭೋಗ್ ಜಾತಾಲೊ. ’ಹೆರ್ ಭಾಸಾಂನಿ ಜೆದ್ನಾಂ ಥೊಡೆ ಬರವ್ಪಿ ಮೆಳ್ತಾನಾ ಥಂಯ್ಚರ್ ಸಾಹಿತಿಕ್ ಚರ್ಚಾ ಚಲ್ತಾ, ಪುಣ್ ಕೊಂಕಣಿಂತ್ ಎಕಾಮೆಕಾಚ್ಯೊ ಖಬ್ರೊ ಜಾತಾತ್’. ಆನಿ ಹೆಚ್ ಕಾರಣಾಂಕ್ ಲಾಗೊನ್ ಆಜ್ ಕೊಂಕಣಿಂತ್ ಪುರಸ್ಕಾರಾಕ್ ಲಾಗೊನ್ ಬರಯ್ತೆಲೆ ಚಡ್ ದೆಕುನ್ ಪುರಸ್ಕಾರಾಂಕ್ ಮೊಲ್ ನಾ.
2000 ಇಸ್ವೆಂತ್ ಹಾಂವ್ ಕುವೆಯ್ಟಾಂತ್ ’ಐಟಿ ಪ್ರೊಜೆಕ್ಟ್ ಮ್ಯಾನೆಜರ್’ ಜಾವ್ನ್ ಕಾಮ್ ಕರುನ್ ಆಸ್ಲೆವೆಳಾರ್, ಅಖಿಲ್ ಭಾರತೀಯ್ ಲೇಖಕಾಂಚ್ಯಾ ಎಕ್ತಾರಾಚೊ ಜೆರಾಲ್ ಕಾರ್ಯದರ್ಶಿ ಜಾವ್ನಾಸ್ಲೊಂ. ದೆಕುನ್ ಹರ್ಯೆಕಾ ಮಯ್ನ್ಯಾಕ್ ಮೆಳಾವೊ ಆಸ್ತಾಲೊ. ತ್ಯಾ ಮೆಳಾವ್ಯಾಂತ್ ಏಕ್ ರೆಗ್ರ್ ಆಸ್ಲಿ; ಏಕ್ ಸಾಹಿತಿಕ್ ಚರ್ಚಾ, ಆನಿ ಸರ್ವಾಂನಿ ಆಪಾಪ್ಲೆಂ ಏಕ್ ಕವಿತಾ ಇಂಗ್ಲಿಶಾಂತ್ ವ ಹಿಂದಿಂತ್ ತರ್ಜಣ್ ಕರುನ್ ವಾಸ್ಚೆಂ. ತೆದ್ನಾಂ ಹಾಂವೆಂ ಚಿಂತ್ಲೆಂ, ಜರ್ತರ್ ಹೆರ್ ಭಾಸೆಂನಿ ಅಶೆಂ ಚಲ್ತಾ ತರ್ ಕೊಂಕಣಿಂತ್ ಸಯ್ತ್ ಕಿತ್ಯಾಕ್ ನ್ಹಜೊ? ಅಶೆಂ ಸುರ್ವಾತ್ ಕೆಲ್ಲಿ ಮ್ಹಯ್ನ್ಯಾಳ್ಯಾ ಅಧ್ಯಯನಾಚಿ ’ಕವಿತಾಪಾಠ್’. ಸಾಹಿತಿಕ್ ಆಸಕ್ತ್ ಆಸ್ಚ್ಯಾಂಕ್ ಲಾಗಿಂ ಹಾಡ್ನ್ ಕಾಂಯ್ ತೀನ್-ಚ್ಯಾರ್ ವರ್ಸಾಂ ಹರ್ಯೆಕಾ ಮ್ಹಯ್ನ್ಯಾಕ್ ಚುಕಾನಾಸ್ತಾಂ ಹಿಂ ಅಧ್ಯಯನಾಂ ಚಲಯ್ಲಿಂ, ಹ್ಯಾ ಅಧ್ಯಯನಾಂ ಲೇಖನಾಂಕ್ ಎಕ್ಟಾಂಯ್ ಕರುನ್ ’ಕವಿತಾಪಾಠ್’, ’ದರ್ಯಾಕ್ ಉದಕ್’, ’ಕಾಳೊಕ್ ನಾತ್ಲೊ ಗಾಂವ್’ ಅಶೆಂ ತೀನ್ ಪುಸ್ತಕಾ ರುಪಾರ್ ಪರ್ಗಟ್ಲಿಂ. ಪುಣ್ ಹಾಂವ್ ಮುಳಾನ್ ಕಥಾಕಾರ್ ಜಾಲ್ಲ್ಯಾನ್ 2004 ಇಸ್ವೆಂತ್ ’ಕಥಾಪಾಠ್’ ಡಿಜಿಟಲ್ ರುಪಾರ್ ಅಧ್ಯಯನ್ ಸುರ್ವಾತ್ಲೆಂ. ದಾಯ್ಜ್.ಕೊಮ್ಚೆರ್ ಏಕ್ ಕಥಾ ಪರ್ಗಟ್ಚಿ, ಉಪ್ರಾಂತ್ ತ್ಯಾ ಕಥೆಚೆರ್ ಆಯಿಲ್ಲಿಂ ಸಮೀಕ್ಷಾ ಲೇಖನಾಂ ಪರ್ಗಟ್ಚಿಂ. ಪುಣ್ ಆಮ್ಚೆ ಕಥಾಕಾರ್ ಕಿತ್ಲೆ ವಿಶಾಲ್ ನದ್ರೆಚೆ ಮ್ಹಳ್ಯಾರ್ ತಾಂಚಿ ದಿಷ್ಟ್ ತಾಂಚ್ಯಾ ತಳ್ಹಾತ್ ಉತ್ರೊನ್ ಸಯ್ತ್ ವಚಾನಾ, ಅಸಲ್ಯಾ ಪರಿಸ್ಥಿತೆಂತ್ ಹೆರಾಂಚೆಂ ವಾಚುಂಕ್ ಮನ್/ವೇಳ್ ನಾತ್ಲ್ಯಾರ್ ’ಸಮೀಕ್ಷಾ’ ಮಯ್ಲಾಂ ಪಯ್ಸಿಲಿ ವಾಟ್. ಅನ್ಯೇಕ್ ಭಿರಾಂತ್/ಕಾವ್ಜೆಣಿ ತಾಂಕಾಂ ಆಸ್ಲಿ ಮ್ಹಳ್ಯಾರ್ ’ಹೆರಾಂಚೆಂ ಅಪ್ಣಾನ್ ಖೆಂಡ್ಲ್ಯಾರ್, ಫಾಲ್ಯಾಂ ಅಪ್ಣಾಚೆಂ ಸಯ್ತ್ ಹೆರಾಂ ಖೆಂಡ್ತಿತ್’ ಮ್ಹಳ್ಳಿ; ಜಶೆಂ ಇಂಗ್ಲಿಶಾಂತ್ ಏಕ್ ಸಾಂಗ್ಣಿ ಆಸಾ (If you live in glass house then don't throw stones on others), ದೆಕುನ್ ಹಾಂಕಾಂ ಘೊಂಖ್ಚೆ/ಚಾಬ್ಕೊರ್ ಪೆಟೆ ಜಾಯ್. ಹಾಡಾಂ/ಬಿಸ್ಕುಟೊ ದಿಲ್ಯಾರ್ ಅಶೆಂ ಘೊಂಕ್ಚೆ/ಚಾಬ್ಚೆ ಪೆಟೆ ಕಶೆಯ್ ಸವಾಯ್ ಸಾಂತ್ ಆಸಾತ್ ಕೊಂಕಣಿಂತ್. ಹಿ ಗಜಾಲ್ ಸರ್ವಾಂಕ್ ಕಳಿತ್ ಆಸ್ಚಿಚ್ ಪುಣ್ ಕೊಣ್ಚ್ ಪರ್ಗಟ್ ಉಲಯ್ನಾಂತ್ ಆಸೊಂ.
ಕಥಾಪಾಠ್ ಅಧ್ಯಯನಾಂತ್ ಪಾಟ್ಲ್ಯಾ ಸ ವೆಬಿನಾರ್ ಶಿಂಕಳೆಂನಿ ಕಾಂಯ್ ಪನ್ನಾಸಾಂಲಾಗಿಂ ವೆಬಿನಾರಾಂ ಚಲ್ಲಿಂ. ಹಿಂ ಪರಿಪೂರ್ಣ್ ನ್ಹಯ್ ಆಸ್ಯೆತ್ ಪುಣ್ ಏಕ್ ಸುರ್ವಾತ್ ತರೀ ಕೆಲಿ ಮ್ಹಳ್ಳಿ ತೃಪ್ತಿ ಆಸಾ. ಹೆರಾಂಚ್ಯಾ ಕಥೆಂಚೆರ್ ಅಧ್ಯಯನ್ ಚಲಂವ್ಚೆಂ ಮನ್ ಆಸ್ಚಾಂಕ್ ಲಾಗಿಂ ಘೆವ್ನ್ ಹಿಂ ಕಾಮಾಸಾಳಾಂ ಭೋವ್ ವೆವಸ್ತಿತ್ ರಿತಿನ್ ಚಲವ್ನ್ ಆಯ್ಲ್ಯಾಂವ್. ಮಂಗ್ಳುರಾಂತ್ ಹಿ ಸಮ್ಜಣಿ ಆಸ್ಚಿಂ ಕೊಣ್ಯೀ ಮಯ್ಲಾಂ ಮಯ್ಲಾಂ ಪಯ್ಸ್ ದಿಶ್ಟಿಕ್ ಪಡಾನಾಂತ್, ಪುಣ್ ಗೊಂಯಾಂತ್ ಉರ್ಭಾ ಆಸ್ನಿ ಆಸಕ್ತ್ ಆಸ್ಚಿಂ ಸಭಾರಾಂ ಆಸಾತ್. ಪುಣ್ ತಾಂಕಾಂ ಲಿಪಿ/ಬೊಲಿಚಿ ಅಡ್ಕಳ್ ಆಸಾ, ಆನಿ ತಿ ನಿವಾರುಂಕ್ ತಾಂತ್ರಿಕ್ ಮಜತ್ ಘೆವ್ನ್ ಕನ್ನಡ ಲಿಪಿಚ್ಯೊ ಕಥಾ ಲಿಪ್ಯಂತರ್ ಕರುನ್ ತಾಂಕಾಂ ದಿಂವ್ಚೆಂ ಕಾಮ್ ಹಾಂವ್ ಕರ್ತಾಂ, ಅಶೆಂ ಹ್ಯಾ ಕಥೆಂಚೆರ್ ಬರಯಿಲ್ಲಿಂ ಪ್ರಪತ್ರಾಂ ಹಾಂವ್ ವೆಳಾರ್ ವೊರಾವ್ನ್ ಪಳೆತಾಂ, ಗರ್ಜೆಚಿ ತಿದ್ವಣ್ ಸಯ್ತ್ ಕರಯ್ತಾಂ ಆನಿ ನಮ್ಯಾರ್ಲೆಲ್ಯಾ ದಿಸಾಚ್ಯಾ ವೆಬಿನಾರಾಚೆರ್ ಹಿಂ ಪ್ರಪತ್ರಾಂ ಸಾದರ್ ಜಾತಾತ್. ಯೆದೊಳ್ಚ್ ಚ್ಯಾರ್ ಪುಸ್ತಕಾಂ (’ಕಥಾವಿಹಾನ್’, ’ಚಲ್ ದೊನ್ ಚಂದ್ರಾಂಕ್’, ’ಸಾಳಕಾಚ್ಯಾ ಸಿರಿವಂತಾಚ್ಯೊ ಕಥಾ’, ’ಕಥಾಪಾಠ್’) ಹ್ಯಾ ಪ್ರಪತ್ರಾಂಕ್ ಪರ್ಗಟುಂಕ್ ಸಕ್ಲ್ಯಾಂವ್. ’ಕಥನ್’ ಪಾಂಚ್ವೆಂ ಪುಸ್ತಕ್.
ಭೋವ್ ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್ ಆಸಾ ಮ್ಹಣ್ಚ್ಯಾಕ್ ಆಮ್ಚೆಲಾಗಿಂ ಸರ್ವ್ ಆಸಾ, ಅಕಾಡೆಮಿ ಆಸಾ, ಅಧ್ಯಯನ್ ಪೀಠ ಆಸಾ. ಪುಣ್ ’ಅಧ್ಯಯನ್’ ಮಾತ್ರ್ ಕೊಣಾಕ್ಚ್ ನಾಕಾ. ಜಶೆಂ ಹೆರ್ ಸಂಘಟನಾಂ ವೆದಿಕಾರ್ಯಿಂ ಮಾಂಡುನ್ ಹಾಡ್ಚಾಂತ್ ವೆಸ್ತ್ಗಿ, ತಶೆಂಚ್ ಹಿಂ ಸಯ್ತ್ ವೆದಿ ಕಾರ್ಯಾಂನಿ ಮಗ್ನ್. ’ಯಾರದ್ದೋ ದುಡ್ಡು ಯೆಲ್ಲಮ್ಮನ ಜಾತ್ರೆ (ಕೊಣಾಚೊಕೀ ದುಡು ಆನಿ ಎಲ್ಲಮ್ಮಚೊ ಜಾತ್ರೊ)’ ಮ್ಹಳ್ಳೆಪರಿಂ ಚಲ್ತಾ ಕಾರ್ಬಾರ್. ಹಾಂಚೊ ವಿಚಾರ್ ಕರ್ಪಿಯ್ ನಾ ಹಾಂಕಾ ಬೂದ್ ಸಾಂಗ್ಪಿಯ್ ಕೊಣ್ ನಾ, ಸಾಂಗ್ಲ್ಯಾರೀ ಆಯ್ಕತಿತ್ ಮ್ಹಳ್ಳೆಂ ಧಯ್ರ್ ಸಯ್ತ್ ನಾ.
ಕೊಂಕಣಿ ಬಿಯೊಂಡ್ ಸ್ಕ್ರಿಪ್ಟ್ ಮ್ಹಳ್ಯಾರ್ ಕಸಲ್ಯೊಚ್ ಬಂಧಡ್ (ಲಿಪಿ, ಬೊಲಿ, ಪ್ರಾಂತ್ಯ್..) ನಾಸ್ತಾಂ ಕೊಂಕಣಿಚೆಂ ಬರೆಂ ಸಾಹಿತ್ಯ್ ಎಕಾ ಲಿಪಿಥಾವ್ನ್ ಅನ್ಯೇಕಾ ಲಿಪಿಕ್ ವ್ಹರ್ಚೆಂ ಮಿಸಾಂವ್. ಹಾಂಗಾಸರ್ ದುಡು ನಾ, ನಾಂವ್ ನಾ ಪುರಸ್ಕಾರ್ ನಾ. ಫಕತ್ ಕಾಮ್, ತೆಂಯ್ ಆವಾಜ್ ನಾಸ್ತಾಂ. ಕಾಳೊಕಾಕ್ ದುರ್ಸೊಂಚ್ಯೆ ಪ್ರಾಸ್ ವಾತ್ ಪೆಟಂವ್ಚಿ ಏಕ್ ಪಿಸಾಯ್. ಆತಾಂ ಹಿ ಪೆಟಯಿಲ್ಲಿ ವಾತ್ ಕಿತ್ಲೊ ತೆಂಪ್ ಝಳೊನ್ ಉರ್ತಾ ತೆಂ ಮಹತ್ವಾಚೆಂ ನ್ಹಯ್. ಪುಣ್ ಹ್ಯಾ ಪೆಟಯ್ಲೆಲ್ಯಾ ವಾತಿಂತ್ ಕಿತ್ಲೆಶ್ಯಾಂಕ್ ದೊಳೆ ಸೊಡ್ನ್ ಪಳೆಂವ್ಚಿ ಉರ್ಭಾ ಯೆತಾ ತೆಂ ಮಹತ್ವಾಚೆಂ. ಜಶೆಂ ಸುರ್ವಾತೆರ್ ಸಾಂಗ್ಲೆಲೆಪರಿಂ ’ಕಾಳೊಕಾಂತ್ ಜಿಯೆವ್ನ್ ಸವಯೆರ್ ಪಡ್ಲೆಲ್ಯಾಂಕ್ ಉಜ್ವಾಡಾಂತ್ ದೊಳೆ ಖೊಂಕ್ತಾತ್’, ದೆಕುನ್ ತಿಂ ದೊಳೆ ಧಾಂಪ್ತಿತ್, ಧಾಂಪುಂದಿತ್.
ಕೊಂಕಣಿಚೆಂ ಸದಾಂ ಬರೆಂಚ್ ಜಾಂವ್,
ವಲ್ಲಿ ಕ್ವಾಡ್ರಸ್ (ಕೊಂಕಣಿ ಚಾಕೊರ್)
