ಅವಸ್ವರ್ 2
ಹ್ಯಾಚ್ ವಗ್ತಾ ಪಯ್ಶಿಲ್ಯಾ ಇಟಲಿಂತ್ಲ್ಯಾ ಜಿಮೆಲ್ಲೊ ಮೈನೊರ್ ನಾಂವಾಚ್ಯಾ ಹಳ್ಳೆಂತ್ ದೊತೊರ್ ಅಲ್ದೊ ಮೆಯೆರ್ ಅಪ್ಲ್ಯಾಚ್ ರಾಟಾವಳಿನಿಂ ಮಗ್ನ್ ಜಾಲ್ಲೊ. ಜಾತಾ ತಿತ್ಲೆ ವೆಗ್ಗಿಂ ಮುಕಾರ್ ಆಸುಲ್ಲೊ ವಾಯ್ನಾಚೊ ತಾಂಬ್ಲೆರ್ ಖಾಲಿ ಕರ್ನ್ ಭಾಯ್ರ್ ನಿಕ್ಳೊಂಕ್ ತೊ ಪ್ರಯತ್ನ್ ಕರುನ್ ಆಸ್ಲೊ. ದೊತೊರ್ ಬಸೊನ್ ಆಸ್ಲೆಂ ಗಡಂಗ್ ಏಕ್ ಫಾತ್ರಾಚೆಂ ಮಾಟೆಂ ಜಾವ್ನಾಸ್ಲೆಂ. ಭಿತೆರ್ ದಾಟ್ ಮಿಸ್ಳೊನ್ ಆಸುಲ್ಲೊ ಬೆಳ್ಶೆಲ್ಲ್ಯಾ ವಾಯ್ನಾಚೊ ವಾಸ್ ತಾಕಾ ಬಾಂದ್ಪಾಸ್ ಹಾಡಾಯ್ತಾಲೊ. ಗಡಂಗಾಚೊ ಧನಿ ಆನಿ ಸೊರ್ಕೆಲ್ಲ್ಯಾ ಪಾಡ್ಯೆ ಬರಿಂ ವಾಡ್ಲೆಲ್ಯಾ ತಾಚ್ಯಾ ಧುವೆಕ್ ಸೊಡ್ಲ್ಯಾರ್, ಥೈಂ ದಾಕ್ತೆರಾಕ್ ದುಸ್ರೊ ಸಾಂಗಾತ್ ನಾತ್ಲೊ.
ಗಡಂಗಾಚೊ ಧನಿ ಏಕ್ ಇರಾಚಿ ಕಾಡಿ ಘೆವ್ನ್ ದಾಂತ್ ನಿತಳ್ ಕರ್ನ್ ಆಸುಲ್ಲೊ. ಚಡುಂ ಕಾಳೊಕಾಂತ್ ಲಿಪೊನ್ ಆಸುಲ್ಲೆಂ. ದಾಕ್ತೆರಾಚೊ ತಾಂಬ್ಲೆರ್ ಖಾಲಿ ಜಾಲ್ಲೆ ಬರಿಂಚ್ ವಾಯ್ನ್ ಭರ್ತಿ ಕರ್ತಾಲೆಂ. ದಾಕ್ತೆರಾಕ್ ಪನ್ನಾಸ್ ಭರೊಂಕ್ ಆನಿಕೀ ಏಕ್ ವರ್ಸ್ ಬಾಕಿ ಆಸ್ಲೆಂ ತರೀ ತಾಚೆ ಕೇಸ್ ಎದೊಳ್ಚ್ ಪಿಕ್ಲ್ಲೆ. ತಾಚ್ಯಾ ಸುಂದರ್ ಜುದೆವ್ ಮುಕಮಳಾರ್ ಕಾತ್ ಅಂರ್ದಾಲ್ಲಿ. ತೊ ಸೂಟಾರ್ ಆಸುಲ್ಲೊ. ಸೂಟ್ ಪರ್ನೊ ಜಾವ್ನಾಸ್ಲ್ಯಾರೀ ನಿತಳ್ ಆಸುಲ್ಲೊ. ತಾಚೆ ಮೊಚೆ ಉಜಳ್ತಾಲೆ.
ಲಂಡನಾಕ್ ಆನಿ ಜಿಮೆಲ್ಲೊ ಮೈನೊರಾಕ್ ರಾತ್ ದಿಸಾಚೊ ಫರಕ್ ಆಸುಲ್ಲೊ. ಮೊನ್ಸಿಜ್ಞೊರ್ ಬ್ಲೇಸ್ ಮೆರ್ಡಿತಾ ಬರಿಂ ದಾಕ್ತೆರಾಕ್ಯೀ ಮರ್ಣಾಚೊ ಲಾಗ್ಶಿಲೊ ಸಂಬಂಧ್ ಆಸುಲ್ಲೊ. ಪುಣ್ ದಾಕ್ತೆರ್ ನಾಸ್ತಿಕ್ ಜಾವ್ನಾಸ್ಲೊ. ತರೀ ಪುಣ್ ಭಂವ್ತಿಲ್ಯಾ ಧಾರ್ಮಿಕ್ ಪರಿಸರಾ ಥಾವ್ನ್ ಮೆಕ್ಳೊ ಜಾಂವ್ಕ್ ತಾಕಾ ಸಾಧ್ಯ್ ನಾತ್ಲೆಂ.
ದನ್ಪರಾಚೆಂ ತಾಕಾ ಪಿಯೆತ್ರೊ ರೊಸ್ಸಿಚ್ಯಾ ಘರಾ ಥಾವ್ನ್ ಅಪವ್ಣೆ ಆಯಿಲ್ಲೆಂ. ಪಿಯೆತ್ರೊಚಿ ಬಾಯ್ಲ್ ಮರಿಯಾ ಪ್ರಸೂತ್ ಜಾಯ್ನಾಸ್ತಾಂ ಕಷ್ಟಾತಾಲಿ. ಸುಮಾರ್ ಧಾ ವೊರಾಂ ಥಾವ್ನ್ ತಿಕಾ ಯೆಣೊ ಯೇಂವ್ಕ್ ಸುರು ಜಾಲ್ಲ್ಯೊ. ದಾಕ್ತೆರ್ ಥೈಂ ಪಾವ್ತಾನಾ ಮಿಡ್ವೈಫ್ ಕಾಲುಬುಲಿ ಜಾಲ್ಲಿ. ಮರಿಯಾಚೆ ಪಿಂರ್ಗೊಣಿ ಆನಿ ಅಕ್ಲಾಸಾಂ ಮಧೆಂ ಬಾಯ್ಲಾಂ ಸಗ್ಳಿಂ ಸಾಂಗಾತಾ ಮೆಳೊನ್ ಎಕಾಚ್ ವೆಳಾ ಉಲವ್ನ್ ಆಸ್ಲಿಂ. ಭಾಯ್ರ್ ಅಂಗ್ಣಾಂತ್ ಬಸೊನ್ ಆಸ್ಲೆ ದಾದ್ಲೆಯೀ ಹಳೂ ತಾಳ್ಯಾನ್ ಉಲವ್ನ್ ಆಸುಲ್ಲೆ. ತಾಂಚೆ ಮಧೆಂ ಏಕ್ ವಾಯ್ನಾಚಿ ಬೋತ್ಲ್ ಅದಲ್-ಬದಲ್ ಜಾವ್ನಾಸ್ಲಿ. ದಾಕ್ತೆರ್ ಥೈಂ ಪಾವ್ತಾನಾ ಎಕಾಚ್ಛಾಣೆ ಥೈಂ ಮೌನ್ ದೆಂವ್ಲೆಂ.
ಪಿಯೆತ್ರೊನ್ ತಾಕಾ ಭಿತೆರ್ ಅಪವ್ನ್ ವೆಲೊ. ಇತ್ಲ್ಯಾ ವಸಾಂ ಥಾವ್ನ್ ತೊ ತಾಂಚೆ ಮಧೆಂ ಆಸ್ಲ್ಲೊ ತರೀ ಅಜೂನೀ ಪರ್ಕಿ ಜಾವ್ನ್ಂಚ್ ಉರುಲ್ಲೊ. ಥೊಡೆ ಪಾವ್ಟಿಂ ತಾಂಚ್ಯಾ ಗಜಾಂಕ್ ಪಾವ್ತಾಲೊ ತರೀ ಎದೊಳ್ ಪಯಾಂತ್ ತಾಕಾ ತಾಂಚೆ ಮಧೆಂ ಹೃತ್ಪೂರ್ವಕ್ ಸ್ವಾಗತ್ ಲಾಭೊಂಕ್ ನಾತ್ಲೊ.
ಭಿತೆರ್ ಬಾಯ್ಲ್ ಮನ್ಶಾಂ ಮಧೆಂಯ್ ಹಿಚ್ ಗಜಾಲ್. ಮೌನ್, ದುಬಾವ್, ಆನಿ ತಿರಸ್ಕಾರ್ . ತ್ಯಾ ಜೈತ್ ಪಿತುಳ್ಚೆ ಖಾಟ್ಯೆರ್ ನಿದೊನ್ ಪಿಂರ್ಗೊನ್ ಆಸ್ಲೆಲ್ಯಾ ಪಿಯೆತ್ರೊಚ್ಯಾ ಬಾಯ್ಲೆಚೆರ್ ದಾಕ್ತೆರ್ ಬಾಗ್ವಾತಾನಾ ಮಿಡ್ವೈಫ್ ಆನಿ ಮರಿಯಾಚಿ ಅವಯ್ ತಾಕಾ ತೆಂಕುನ್ಂಚ್ ಮ್ಹಳ್ಳೆ ಬರಿಂ ಯೇವ್ನ್ ಉಭಿ ರಾವ್ಲಿಂ. ಚೆಡ್ವಾಕ್ ಪರ್ತ್ಯಾನ್ ಯೆಣೊ ಯೆತಾನಾ ಬಾಯ್ಲಾಂ ಮಧೆಂ ಪುಸ್ಪುಸೊ ಸುರು ಜಾಲೊ.; ದಾಕ್ತೆರ್ಚ್ ಕಾರಣ್ ಮ್ಹಳ್ಳೆ ಬರಿಂ. ತೀನ್ಂಚ್ ಮಿನುಟಾನಿಂ ಚೆಡ್ವಾಕ್ ನೈಸರ್ಗಿಕ್ ಬಾಂಳ್ತೆರ್ ಸಾಧ್ಯ್ ನಾ ಮ್ಹಣೊನ್ ದಾಕ್ತೆರಾಕ್ ಸುಸ್ತಾಲೆಂ. ಸಿಜೇರಿಯನ್ ಕರಿನಾಸ್ತಾಂ ದುಸ್ರೊ ಉಪಾವ್ ನಾತ್ಲೊ. ಹ್ಯಾ ವಿಶ್ಯಾಂತ್ ತಾಕಾ ಖಂತ್ ನಾತ್ಲಿ. ಹಾಚೆ ಆಧಿಂ ಸಬಾರ್ ಸಿಜೇರಿಯನಾಂ ತಾಣೆ ಕೆಲ್ಲಿಂ. ವಾತಿಚ್ಯಾ ಉಜ್ವಾಡಾಕ್, ಚಿಮ್ಣೆಚ್ಯಾ ಉಜ್ವಾಡಾಕ್, ರಾಂದ್ಪಾ ಕುಡಾಂತ್ಲ್ಯಾ ಮೆಜಾರ್, ಬಾಂಕಾರ್, ಖಂಯ್ ಮ್ಹಣ್ ನಾ!.
ತಾಕಾ ಖತ್ಕತೆಂ ಉದಾಕ್, ಆನಿ ಅನೆಸ್ತೇಶಿಯ ಇತ್ಲೆಂ ಪುರೊ ಆಸ್ಲೆಂ. ದೊಂಗ್ರಾಚ್ಯಾ ತ್ಯಾ ಘಟ್ಮೂಟ್ ಬಾಯ್ಲಾಂಚೊ ಕುಡಿ ಕಸಲ್ಯಾ ಒಪ್ರೇಶಾನಾಕ್ ಯೀ ತಯಾರ್ ಜಾತಾಲ್ಯೊ!
ಥೈಂ ಜಮನ್ಲೆಲ್ಯಾ ಬಾಯ್ಲಾಂ ಥಾವ್ನ್ ಪ್ರತಿರೋಧ್ ತಾಣೆ ಜರೂರ್ ನಿರೀಕ್ಷಣ್ ಕೆಲ್ಲೊ. ತಾಂಕಾ ತೊ ಬರ್ಯಾನ್ ವಳ್ಕಾತಾಲೊ. ತಾಂಕಾ ಆನಿ ಗಾಡ್ವಾಂಕ್ ಕಾಂಯ್ ಫರಕ್ ನಾತ್ಲೊ. ಪುಣ್ ಪ್ರತಿರೋಧ್ ಹ್ಯಾ ಮಟ್ಟಾರ್ ಆಸಾತ್ ಮ್ಹಣೊನ್ ತಾಣೆ ಚಿಂತುಂಕ್ ನಾತ್ಲೆಂ. ತಿತ್ಲ್ಯಾರ್ ಲಾಂಬ್ ಕೆಸಾಂಚಿ, ದಾಟಿ ಮೊಟಿ ಚೆಡ್ವಾಚಿ ಅವಯ್ ಬೊಬಾಟ್ಲಿ: ಮ್ಹಜ್ಯಾ ಚೆಡ್ವಾಚ್ಯಾ ಪೊಟಾರ್ ಸುರಿ ವೊಡ್ಚಿ ಕಾಂಯ್ಚ್ ಗರ್ಜ್ ನಾ. ಮ್ಹಾಕಾ ಜೀವಂತ್ ಭುರ್ಗೆಂ ಜಾಯ್, ಮೊಡೆಂ ನ್ಹಯ್! ಚೆಡ್ವಾಕ್ ಥೊಡೊ ವೇಳ್ ದಿಲ್ಯಾರ್ ಸಾಂಗೆ ಥಾವ್ನ್ ಬಿ ಉಸಾಳ್ಲ್ಲೆ ಬರಿಂ ಭುರ್ಗೆಂ ಭುಂಯ್ ಪಡ್ತಾಗಿ ನಾ ಪಳೆ! ಮ್ಹಾಕಾ ಬಾರಾ ನಾತ್ರಾಂ ಆಸಾತ್. ತಾಂಕಾ ತುಜೆ ತಸಲ್ಯಾ ಕಸಾಯ್ಗಾರಾಚಿ ಗರ್ಜ್ ಪಡೊಂಕ್ನಾ!
ಮರಿಯಾಚಿ ಪಿಂರ್ಗೊಣಿ ಬಾಯ್ಲಾಂಚ್ಯಾ ಹಾಸ್ಯಾನಿಂ ಜಿರೊನ್ ಗೆಲಿ. ದಾಕ್ತೆರ್ ಮೆಯೆರಾನ್ ಶಾಂತ್ಪಣಿ ಸಾಂಗ್ಲೆಂ: ಒಪ್ರೇಶನ್ ಕರಿನತ್ಲ್ಯಾರ್ ತುಜಿ ಧುವ್ ಮಧ್ಯಾನ್ ರಾತಿ ಪರ್ಯಾಂತ್ ವಾಂಚಿ ನಾ.
ದಾಕ್ತೆರಾಚೆಂ ಅಸಲೆಂ ತೀರ್ಪ್ ಕಸಲ್ಯಾ ಪ್ರತಿರೋಧಾಕ್ಯೀ ಪುಸ್ಕ್ ಕರಯ್ತಾಲೆಂ. ಪುಣ್, ಮರಿಯಾಚಿ ಅವಯ್ ವ್ಯಂಗ್ಯಾನ್ ಹಾಸ್ಲಿ.
ಹ್ಯೆ ಪಾವ್ಟಿಂ ತುಜಿ ಪ್ರೊಫೆಸಿ ಫಟ್ ಜಾತೆಲಿ ಜುದೆವಾ! ತಿಚ್ಯಾ ಉತ್ರಾಂನಿ ತಿರಸ್ಕಾರ್ ಭರ್ಲ್ಲೊ. ತಿಣೆ ಆಪ್ಲ್ಯಾ ಆಂಗ್ಲ್ಯಾಂತ್ ಖಂಯ್ಗೀ ಲಿಪಯಿಲ್ಲಿ ಏಕ್ ರಸ್ಮಾಚ್ಯಾ ಕುಡ್ಕ್ಯಾಚಿ ಪೊಟ್ಲಿ ಭಾಯ್ರ್ ಕಾಡ್ಲಿ. ತಾಂತು ಗುಟ್ಲಾಯ್ಲೆಲ್ಲಿ ಏಕ್ ವಸ್ತ್ ಭಾಯ್ರ್ ಕಾಡ್ನ್ ದಾಕ್ತೆರಾಚ್ಯಾ ನಾಕಾ ಪಂದಾಕ್ ಲೊಟುನ್ ಖೆಂವ್ಚ್ಯಾ ಲಾಗ್ಲಿ:
ಬಹುಶಾಃ ಹೆಂ ಕಿತೆಂ ಮ್ಹಣ್ ತುಂ ನೆಣಾಂಯ್ ನಾಸ್ತಿಕಾ! ಆತಾಂ ಆಮ್ಕಾಂ ಆಮ್ಚೊಚ್ ಸಾಂತ್ ಆಸಾ. ತಾಕಾ ಕುರ್ವಾರ್ ಕರ್ಚಿ ತಯಾರಾಯ್ ರೊಮಾಂತ್ ಚಲೊನ್ ಆಸಾ. ಹೊ ತಾಚ್ಯಾ ಖೊಮಿಸಾಚೊ ಕುಡ್ಕೊ. ತಾಚಾಚ್ ರಗ್ತಾಂತ್ ಬುಡಯ್ಲಾ. ತಾಚಿಂ ಅಜ್ಯಾಪಾಂಯ್ ಘಡೊನ್ ಆಸಾತ್. ತಿಂ ಸಗ್ಳಿಂ ದಾಕಲ್ ಕರ್ನ್ ಪಾಪ್ಸಾಯ್ಬಾಕ್ ಧಾಡ್ಲ್ಯಾಂತ್. ಆಮ್ಚೊ ಸಾಂತ್ ಜಿಯಾಕೊಮೊ ನೆರೊನಾ ಪ್ರಾಸ್ ತುಂ ವ್ಹಡ್ ಮ್ಹಣ್ ಚಿಂತಾಯ್ಗೀ?
ಮರಿಯಾನ್ ಪರ್ತ್ಯಾನ್ ಕಿಂಕ್ರಾಟ್ ಮಾರ್ಲಿ. ಬಾಯ್ಲಾಂ ಸಕ್ಕಡ್ ಎಕಾಚ್ಛಾಣೆ ಥಂಡ್ ಪಡ್ಲಿಂ. ಚೆಡ್ವಾಚಿ ಅವಯ್ ಖಾಟ್ಲ್ಯಾರ್ ಬಾಗ್ವೊನ್ ತಾಂಬ್ಡ್ಯಾ ರಸ್ಮಾ ಕುಡ್ಕ್ಯಾಂತ್ ಗುಟ್ಲಾಯ್ಲೆಲ್ಲಿ ರೆಲಿಕ್ ಚೆಡ್ವಾಚ್ಯಾ ಉಭಾರ್ ಪೊಟಾಚೆರ್ ಭಂವ್ಡಾಯ್ಲಾಗ್ಲಿ. ಚೆಡುಂ ಶಾಂತ್ ಜಾತಾನಾ, ಡೊಕ್ಟರ್ ಅಲ್ದೊ ಮೆಯೆರಾನ್ ಕೊಡ್ಸಾಣೆನ್ ಸಾಂಗ್ಲೆಂ:
ಆಮ್ಚೆಂ ಪ್ರಯತನ್ ಕರಿನಾಸ್ತಾಂ ಅಜ್ಯಾಪಾಂಕ್ ರಾಕೊನ್ ರಾಂವ್ಚೆಂ ಪಾತಕ್ ಮ್ಹಳ್ಳೆಂ ನಾಸ್ತಿಕ್ ಯೀ ಜಣಾಂತ್. ವಕ್ತಾಂ ಬಗ್ಲೆಕ್ ಉಡವ್ನ್ ಸಾಂತ್ ಗೂಣ್ ಕರ್ತಾ ಮ್ಹಣ್ ಪಾತ್ಯೆವ್ನ್ ರಾಂವ್ಚೆಂ ಮೂರ್ಖ್ಪಣ್. ನ್ಹಯ್ ಆಸ್ತಾಂ ಜಿಯಾಕೊಮೊ ಅಜೂನೀ ಸಾಂತ್ ಜಾಂವ್ಕ್ ನಾ. ರೊಮಾಂತ್ ತಾಚೆಂ ಫಾಯ್ಲ್ ಅಜೂನೀ ಉಗ್ತೆಂ ಕರುಂಕ್ನಾ. ತುಮಿ ತಾಚೆ ಲಾಗ್ಗಿಂ ಮಾಗಾ; ಮ್ಹಕಾ ಧೈರಾಚೊ ಹಾತ್ ಆನಿ ಚೆಡ್ವಾಕ್ ಘಟ್ ಕಾಳಿಜ್ ದೀಂವ್ಕ್. ಮ್ಹಾಕಾ ಚಡ್ ವೇಳ್ ನಾ.
ಅವಯ್, ತೊ ಖಟ್ಲ್ಯಾ ಸರ್ಶಿಂ ವಚಾನಾಶೆಂ ಆಡ್ ರಾವ್ಲಿ. ಪಿಯೆತ್ರೊ ಹೊ ನಾಟಕ್ ಪಳೆವ್ನ್ ಮೊನ್ಯಾ ಬರಿಂ ಉಭೊ ಆಸುಲ್ಲೊ.
ಪಿಯೆತ್ರೊ? ದಾಕ್ತೆರಾನ್ ವಿಚಾರ್ಲೆಂ. ತುಕಾ ಭುರ್ಗೆಂ ಜಾಯ್ ವ ಬಾಯ್ಲ್? ಹಾಂವ್ ಒಪ್ರೇಶನ್ ಕರಿನಾ ತರ್ ಭುರ್ಗ್ಯಾ ಸಾಂಗಾತಾ ತುಜಿ ಬಾಯ್ಲ್ಯೀ ಮೊರ್ತೆಲಿ. ಹಾಂವ್ ಕಿತೆಂ ಕರುಂಕ್ ಸಕ್ತಾಂ ತೆಂ ತುಂ ಬರೆಂ ಕರ್ನ್ ಜಣಾಂಯ್. ಜಿಯಾಕೊಮೊ ಕಿತೆಂ ಕರಿತ್ ಮ್ಹಳ್ಳೆಂ ತುಂ ನೆಣಾಂಯ್-ತೊ ಸಾಂತ್ ಮ್ಹಣ್ತಾಯ್ ಜಾಲ್ಯಾರೀ, ಜೆಂ ಹಾಂವ್ ಪಾತ್ಯೆನಾ.
ಪಿಯೆತ್ರೊ ರೊಸ್ಸಿನ್ ’ನಾ’ ಮ್ಹಣ್ಚ್ಯಾ ಜಿನ್ಸಾರ್ ತಕ್ಲಿ ಧಲಯ್ಲಿ.
ಪೋಟ್ ಚೀರ್ನ್ ಭುರ್ಗೆಂ ಭಾಯ್ರ್ ಕಾಡ್ಚೆಂ ಪಾತಕ್ ದಾಕ್ತೆರಾಬಾ. ನ್ಹಯ್’ಸ್ತಾಂ ಜಿಯಾಕೊಮೊ ಚಿಲ್ಲರ್ ಸಾಂತ್ ನ್ಹಯ್. ಆಮ್ಚಾಚ್ ಗಾಂವ್ಚೊ ಮ್ಹಣ್ತಾನಾ ಆಮ್ಕಾಂ ಸೊಡ್ನ್ ಘಾಲ್ಚೊ ನಾ. ತುಂವೆ ಪಾಟಿಂ ವೆಚೆಂ ಬರೆಂ.
ಬರೆಂ ಪಿಯೆತ್ರೊ. ಹಿಚ್ ತುಜ್ಯಾ ಬಾಯ್ಲೆಚಿ ಅಕ್ರೆಚಿ ರಾತ್ ಜಾಂವ್ಕ್ ಪಾವ್ತೆಲಿ.
ತ್ಯಾ ರಯ್ತಾಚೆಂ ಮುಸ್ಕಾರ್ ಸಫಾಯ್ ವೊಣ್ತಿ ಬರಿಂ ರಿತೆಂ ಆಸುಲ್ಲೆಂ. ಡೊಕ್ಟರ್ ಅಲ್ದೊ ಮೆಯೆರಾನ್ ಥೈಂ ಜಮ್ಲೆಲ್ಯಾಂಕ್ ಏಕ್ ಪಾವ್ಟಿಂ ಪಳೆಲೆಂ. ತೆನ್ಕಾ ಇಟೆಲಿಚೊ ಮೂಢ್ ಲೋಕ್. ಅಪುಣ್ ತಾಂಚೆ ವಿಶ್ಯಾಂತ್ ಕಿತ್ಲೆಂ ಉಣೆ ಜಣಾ ತೆಂ ಚಿಂತುನ್ ತಾಣೆ ದಾರಾ ಕುಶಿಕ್ ಮೆಟಾಂ ಕಾಡ್ಲಿಂ.
ತುಂವೆ ಫಾದರ್ ಅನ್ಸೆಲ್ಮೋಕ್ ಅಪಂವ್ಚೆಂ ಬರೆಂ. ತಾಕಾ ಆನಿಕ್ ಚಡ್ ವೇಳ್ ನಾ. ಪಾಟಿಂ ಘುಂವಾನಾಸ್ತಾಂ ತಾಣೆ ಸಾಂಗ್ಲೆಂ.
ಚಡ್ವಾಚ್ಯಾ ಅವಯ್ನ್ ತಿರಸ್ಕಾರಾನ್ ಧರ್ಣಿರ್ ಥುಕ್ಲೆಂ ಆನಿ ಖಾಟ್ಯೆರ್ ಬಾಗ್ವೊನ್ ಮಾಗ್ಣೆ ಮ್ಹಣಾತ್ತ್ ರೆಲಿಕ್ ಚೆಡ್ವಾಚ್ಯಾ ಪೊಟಾರ್ ಭಂವ್ಡಾಯ್ಲಾಗ್ಲಿ. ಭಾಯ್ರ್ ಸರ್ಲ್ಲ್ಯಾ ತಾಚೆರ್ ಸಕ್ಟಾಂಚ್ಯೊ ಶೀತಳ್ ದಿಶ್ಟಿ ಘುಂವ್ಲ್ಯೊ. ವಿಶೇಸ್ ಜಾವ್ನ್ ದಾದ್ಲ್ಯಾಂಚ್ಯೊ ತಾಚ್ಯಾ ಪಾಟಿರ್ ಭಾಲಿಯೆಂ ಬಾಶೆನ್ ತೊಪುನ್ ಆಸಾತ್ಶೆಂ ತಾಕಾ ಭಗ್ಲೆಂ. ಮ್ಹನ್ಶಾಪಣಾಕ್ ಪಾತ್ಯೆಲ್ಲ್ಯಾ ಉದಾರ್ಪಣಾಚ್ಯಾ ಡೊಕ್ಟರ್ ಅಲ್ದೊ ಮೆಯೆರಾಕ್ ಹಿ ನಿಮಾಣಿ ಸಲ್ವಣಿ ಜಾವ್ನಾಸ್ಲಿ. ಹ್ಯಾ ಜಾನ್ವಾರಾಂಕ್ ಖಂಡಿತ್ ಜಾವ್ನ್ ಸುಟ್ಕಾ ನಾ. ತೊ ತಾಂಚೆ ಖಾತಿರ್ ವಳ್ವಳ್ಲ್ಲೊ. ಝಜ್ಲ್ಲೊ ಆನಿ ಶಿಕಾಪ್ ದಿವಂವ್ಕ್ ಪೆಚಾಡ್ಲ್ಲೊ. ಗಿದಾಂ ಬರಿಂ ತಾಣಿ ಸಕ್ಕಡ್ ಭೊಕಾಯಿಲ್ಲೆಂ ತರೀ ಶಿಕ್ಲ್ಲೆಂ ಕಾಂಯ್ಚ್ ನಾತ್ಲೆಂ. ಆಚಾರಾಂಕ್ ಆನಿ ಮೂಡ್ ಪಾತ್ಯೆಣೆಂಕ್ ತಾಣಿ ಬಳಾನ್ ವೆಂಗ್ಲ್ಲೆಂ.
ತಾಂಕಾ ಬರೆಂ ಕರುಂಕ್ ಸಾಧ್ಯ್ ನಾತ್ಲೆಂ ತರೀ ನಿಯಂತ್ರಣಾರ್ ಧವ್ರುಂಕ್ ಇಗರ್ಜ್ಮಾತಾ ಸಕ್ತಾಲಿ. ಪುಣ್ ಇಗರ್ಜೆನ್ ತಾಂಕಾ ಸೈತಾನ್, ಮೆಲ್ಲ್ಯಾಂ ವಿಶ್ಯಾಂತ್ ಬೆಷ್ಟಾವ್ನ್ ಧವರ್ಲೆಲ್ಲೆಂ. ದರಬಸ್ತ್ ಸಾಂತ್ ದಿಲ್ಲೆ, ಪುಣ್ ತಾಪ್ ಯೆತಾನಾ ದಾಕ್ತೆರಾ ಸರ್ಶಿನ್ ವಚೊಂಕ್ ಶಿಕೊಂಕ್ ನಾತ್ಲೆಂ. ಖುದ್ ದಾಕ್ತೆರಾನ್ ಫುಂಕ್ಯಾಕ್ ಗುಳ್ಯೊ ದಿಲ್ಯಾರೀ ಗಿಳುಂಕ್ ತೆ ತಯಾರ್ ನಾತ್ಲೆ. ಸಗ್ಳ್ಯಾನಿತ್ಲ್ಯಾನ್ ಮೌಢ್ಯ್ಚ್ ಭರ್ಲ್ಲೆಂ. ಬಾಯ್ಲಾಂ ಖೆವಾದಿನ್ ಕರ್ಗೊನ್ ಯೆತಾಲಿಂ ಆನಿ ಭುರ್ಗಿಂ ಮಲೇರಿಯಾನ್ ವಳ್ವಳ್ತಾಲಿಂ. ಎಕಾ ಆದರ್ಶ್ ರಯ್ತಾನ್ ಜಾನ್ವಾರಾಂಕ್ ಸುಧಾಂ ಬಾಂಧಿನಾಸ್ಲ್ಯಾ ತಸಲ್ಯಾ ಝೊಪ್ಡ್ಯಾನಿಂ ತಿಂ ಜಿಯೆತಾಲಿಂ. ಒಲಿವ್ ತೆಲಾಂತ್ ಬಿಜಯಿಲ್ಲೊ ಉಂಡೊ, ಪಾಸ್ತಾ ಆನಿ ಅಪ್ರೂಬ್ ಫೆಸ್ತಾಂ ಪರ್ಬೆನಿಂ ತಿಂ ಬೊಕ್ರ್ಯಾಚೆಂ ಮಾಸ್ ಖಾತಾಲಿಂ. ಥೈಂಚೆ ದೊಂಗೊರ್, ರೂಕ್ ಝಡಾಂ ನಾಸ್ತಾಂ ಧುಳಿಚೆ ಪರ್ವತ್ ಕಶೆ ದಿಸ್ತಾಲೆ. ಥೈಂ ಇಸ್ಕೊಲಾಂ ನಾತ್ಲಿಂ ಆನಿ ತಾಂಕಾ ತಾಂಚಿ ಗರ್ಜ್ಯೀ ದಿಸೊಂಕ್ನಾತ್ಲಿ. ಎಕಾ ಶಿಕ್ಷಕಾಕ್ ಸಾಂಬಾಳ್ ದೀಂವ್ಕ್ ತಾಂಕಾ ತಾಂಕ್ ನಾತ್ಲಿ ತರೀ ಕೆಲೆಂಡ್ರಾರ್ ಭರೊನ್ ವೊಮ್ತೆತೆಲ್ಯಾ ಸಾಂತಾಂಚೆ ಪಟ್ಟೆರ್ ಆನ್ಯೆಕಾ ಸಾಂತಾಕ್ ಮೆಳಂವ್ಕ್, ಗಾಂಟ್ ಬಾಂಧುನ್ ಧವರ್ಲೆಲ್ಲಿ ರುವಿ ಪರ್ಯಾಂತ್ ಖರ್ಚುಂಕ್ ತಾಂಕಾ ಸುರಾತ್ ದಿಸಾ ನಾತ್ಲೊ.
ದಾಕ್ತೆರಾನ್ ತಾಚ್ಯಾ ವಾಯ್ನಾಚ್ಯಾ ತಾಂಬ್ಲೆರಾಂತ್ ತಿಳ್ಳೆಂ. ನಿರಾಶಾ ತಾಕಾ ದಿಸ್ಲಿ. ಎಕಾಚ್ ಘೊಟಾನ್ ತಾಣೆ ತಾಂಬ್ಲೆರ್ ಖಾಲಿ ಕೆಲೊ. ಕೊಡ್ಸಾಣೆನ್ ತಾಕಾ ವೊಂಕೊಂಕ್ ಜಾಲ್ಲೆ ಬರಿಂ ಜಾಲೆಂ.
ವೀಸ್ ವರ್ಸಾಂ’ಧಿಂ ಫ್ಯಾಸಿಸ್ಟ್ಗಾರಾನಿಂ ಜುದೆಂವಾಂಕ್ ದಣ್ಸುಂಕ್ ಸುರು ಕರ್ತಾನಾ, ತೊ ಕೆಲಬ್ರಿಯಾ ಪ್ರಾಂತಾಚ್ಯಾ ಹ್ಯಾ ಹಳ್ಳೆಕ್ ಫೊಳ್ನ್ ಆಯಿಲ್ಲೊ. ತಾಣಿ ತಾಕಾ ’ಮೆಡಿಕಲ್ ಒಫಿಸರ್’ ಮ್ಹಳ್ಳೊ ವ್ಹಡ್ ಬಿಲ್ಲೊ ದಿಲ್ಲೊ ತರೀ ವಕ್ತಾಂ ಜಾಂವ್ ಸಾಂಬಾಳ್ ದೀಂವ್ಕ್ ನಾತ್ಲೊ. ತಾಚೆ ಲಾಗ್ಗಿಂ ಆಸ್ಲೆಲ್ಲ್ಯೊ ವಸ್ತು ಮ್ಹಳ್ಯಾರ್ ಏಕ್ ವಯ್ಜಕೀಯ್ ಸಬ್ಧಾಂಕೋಶ್, ನ್ಹೆಸ್ಲ್ಲೊ ಸೂಟ್, ಎಕಾ ಬೆಗಾಂತ್ ತಾಚ್ಯಾ ವೃತ್ತೆಕ್ ಲಗ್ತಿಂ ಹಾತೆರಾಂ ಆನಿ ಏಕ್ ಬೋತ್ಲ್ ಆಸ್ಪಿರಿನ್ ಗುಳಿಯೊ. ಏಕ್ ಕನಿಷ್ಠ್ ವಯ್ಜಕೀಯ್ ಸವ್ಲತ್ ಥೈಂ ದೀಂವ್ಕ್ ತೊ ಸ ವರ್ಸಾಂ ಮಸ್ತು ಪೆಚಾಡ್ಲೊ.
ಏಕ್ ಲ್ಹಾನ್ಶೆಂ ಘರ್ ಬಾಂಧುನ್, ದೋನ್ ಎಕ್ರೆ ಫಾತ್ರಾಂಚೊ ಜಾಗೊ ತೊ ಕೃಶಿ ಕರ್ತಾಲೊ. ಘರ್ಚ್ಯಾ ಎಕಾ ಕುಡಾಂತ್ ತಾಣೆ ಆಸ್ಪತ್ರ್ ಕೆಲ್ಲಿ. ಆನಿ ಗರ್ಜ್ ಪಡ್ತಾನಾ ರಾಂದ್ಪಾ ಕುಡ್ ಒಪ್ರೇಶನ್ ಥಿಯೆಟರ್ ಜಾತಾಲೆಂ. ಗಾಂವ್ಚೊ ಲೋಕ್ ಅಪ್ರೂಬ್ ತಾಕಾ ಧಾನ್ಯಾಂ ರೂಪಾರ್ ಫಾರಿಕ್ ಕರ್ತಾಲೆ. ವಕ್ತಾಂಕ್ ಆನಿ ತಾಚ್ಯಾ ಆಯ್ದಾಂಕ್ ತೊ ಸ್ಥಳೀಯ್ ಅಧಿಕಾರಿಂಕ್ ಪುಸ್ಲಾವ್ನ್ ಘೆತಾಲೊ. ತಾಚ್ಯಾ ವಾವ್ರಾಂತ್ ಕೊಡ್ಸಾಣ್ಂಚ್ ಅಧಿಕ್ ವಾಂಟ್ಯಾನ್ ಭರ್ಲ್ಲಿ ತರೀ. ಹ್ಯಾ ಅಗ್ಯಾನಿ ದೊಂಗ್ರಾ ಜನಾಂಗಾಚ್ಯಾ ಸಮುದಾಯಾಂತ್ ಥೊಡೆ ಪಾವ್ಟಿಂ ಪ್ರವೇಶ್ ಲಾಭ್ತಾನಾ ತೊ ನಿರಾಶಾ ವಿಸರ್ತಾಲೊ.
ಮಹಾ ಝಜಾ ವೆಳಿಂ ಮಿತ್ರ್ ಕೂಟಾಚೆಂ ಬಳ್ ಹ್ಯಾ ಪ್ರದೇಶಾಂತ್ ಚಡೊನ್ ಯೆತಾನಾ, ತಾಂಕಾ ಪಾಟಿಂಬೊ ದಿಂವ್ಚಾ, ದೊಂಗ್ರಾನಿ ಝಜ್ತೆಲ್ಯಾಂಚ್ಯಾ ಪಂಗ್ಡಾಕ್ ತೊ ಭರ್ತಿ ಜಾಲ್ಲೊ. ಝಜಾ ವಿರಾಮಾ ನಂತರ್ ತಾಣೆ ಥೊಡೊ ಕಾಳ್ ರೊಮಾಂತ್ ಖರ್ಚಿಲ್ಲೊ. ಹಾಂಗಾ ತಾಕಾ ನವಿ ಹುಮೆದ್ ಭರ್ಲಿ. ಹಾತಾಂತ್ ಥೊಡೊ ದುಡು ಯೀ ಜಾಲ್ಲೊ. ಸುಧಾರಣ್ ಮನೋಭಾವಾನ್ ತೊ ಹಳ್ಳೆಕ್ ಪಾಟಿಂ ಆಯ್ಲೊ. ಮನ್ ಕೆಲ್ಯಾರ್ ಹಾಂಗಾ ಅಜ್ಯಾಪಾಂ ಕರ್ಯೆತ್ ಮ್ಹಣೊನ್ ತೊ ಧೃಡ್ ಪಾತ್ಯೆಲ್ಲೊ.
ಅಶೆಂ ತೊ ಪಾಟಿಂ ಆಯಿಲ್ಲೊ, ನವಿಂ ಸಪ್ಣಾಂ, ನವ್ಯಾ ಹುರುಪಾನ್. ಅಪುಣ್ ದಾಕ್ತೆರ್ ತಶೆಂ ಎಕ್ಲೊ ಶಿಕ್ಷಕ್ ಜಾವ್ನ್ ಹ್ಯಾ ಲೊಕಾಚಿ ಸೆವಾ ಕರ್ತೊಲೊಂ ಮ್ಹಳ್ಳೊ ಆದರ್ಶ್ ತಾಚೆ ಮುಕಾರ್ ಆಸುಲ್ಲೊ. ತಾಚ್ಯಾ ತಕ್ಲೆಂತ್ ಸಬಾರ್ ನವಿಂ ಯೋಜನಾಂ ಭರೊನ್ ಆಸ್ಲಿಂ: ಏಕ್ ಸಹಕಾರಿ ಸಂಘ್, ನಿರ್ಮಳ್ಕಾಯ್ ಆನಿ ಮಾತ್ಯೆಚ್ಯಾ ಸಂರಕ್ಷಣಾವಿಶಿಂ ಶಿಕ್ಷಣ್ ದೀಂವ್ಕ್ ತೊ ಉತ್ಸುಕ್ ಆಸ್ಲ್ಲೊ. ಲೊಕಾಂ ಮಧೆಂ ತಾಚೆ ವಿಚಾರ್ ಘಾಲುಂಕ್ ತಾಣೆ ತರ್ನಾಟ್ಯಾಂಚೆ ಏಕ್ ಸಯ್ನ್ಂಚ್ ಬಾಂಧುನ್ ಹಾಡುಂಕ್ ಯೆವ್ಜಿಲ್ಲೆಂ. ಕಸಲಿಯ್ ಅಭಿವೃದ್ಧಿ ಹ್ಯಾ ಹಳ್ಳೆಂತ್ ತೀನ್ ಶತಮಾನಾಂ ಆದಿಂಚ್ ಸ್ಥಗಿತ್ ಜಾಲ್ಲ್ಯಾ ಹ್ಯಾ ಹಳ್ಳೆಂತ್ ಅಪುಣ್ ಎಕ್ಲೊಂ ಅಭಿವೃದ್ಧೆಚೊ ಮಿಶ್ಯೊನಾರಿ ಜಾತೆಲೊಂ ಮ್ಹಳ್ಳಿಂ ಸಪ್ಣಾಂ ತಾಣೆ ದೆಕ್ಲ್ಲಿಂ.
ಬಾರಾ ವರ್ಸಾಂ’ಧಿಂ ಖಂಡಿತ್ ಜಾವ್ನ್ ಹೆಂ ಏಕ್ ಸುಂದರ್ ಸಪಾಣ್ ಜಾವ್ನಾಸ್ಲೆಂ. ಹರ್ಯೆಕ್ ಆದರ್ಶ್ವಾದಿ ಸಾಂಪಾಡ್ಚ್ಯಾ ಪಾಸಾಂತ್ ತೊ ಯೀ ಶಿರ್ಕಾಲ್ಲೊ. ಮ್ಹನಿಸ್ ಸುಧಾರಣ್ ಎಕ್ದಂ ಒಪ್ತಾತ್ ಆನಿ ಬರೆಂ ಮನ್ ಬರ್ಯಾ ಮನಾಂಕ್ ಆಕರ್ಶಿತಾ ಮ್ಹಣ್ ತೊ ಪಾತ್ಯೆಲ್ಲೊ. ಪುಣ್ ತಾಚಿಂ ಸಪ್ಣಾಂ, ಅಧಿಕಾರಿಂಚ್ಯಾ ಬ್ರಷ್ಠಾಚಾರಾ ಥಾವ್ನ್ ತಶೆಂ ಇಗರ್ಜ್ ಮಾತೆಚ್ಯಾ ಸಂಪ್ರದಾಯ್ವಾದಿ ಧೋರಣಾಂ, ಲೊಕಾಚ್ಯಾ ಅಗ್ಯಾನಾ ಲಾಗೊನ್ ಚೂರಾನ್ ಚೂರ್ ಜಾಲಿಂ. ಜಿಮೆಲ್ಲೊ ಮೈನೊರಾಂತ್ ಆಧುನಿಕ್ ವಾರೆಂ ವ್ಹಾಳಾಂವ್ಚೆಂ ತಾಚೆಂ ಸಪಾಣ್ ತಿತ್ಲ್ಯಾರ್ಚ್ ಸಂಪ್ಲೆಂ. ತಾಣಿ ತಾಕಾ ಸಲ್ವಾಯ್ಲೊ. ಆತಾಂ ತುಟೊನ್ ಗೆಲ್ಲೆ ಗಾಂಚ್ ಪರ್ತ್ಯಾನ್ ಗುಂತುಂಕ್ ವೇಳ್ ಉತ್ರಾಲ್ಲೊ.
ಭಾಯ್ರ್, ಪಿಯೆತ್ರೊಚ್ಯಾ ಘರಾ ಕುಶಿನ್ ಥಾವ್ನ್ ಸ್ತ್ರೀಯಾಂಚೊ ವಿಳಾಪ್ ಕಾಳೊಕ್ ಚಿರುನ್ ತಾಚ್ಯಾ ಕಾನಾಂಕ್ ಅಪ್ಟಾಲೊ. ಗಡಂಗಾಚ್ಯಾ ಧನಿಯಾನ್ ಆನಿ ತಾಚ್ಯಾ ಧುವೆನ್ ಬಸ್ಲ್ಲೆ ಕಡೆಚ್ ಆಕಾಂತೊನ್ ಆನಂದ್ ಬಾಪಾಚೊ ಗುರ್ತ್ ಕಾಡ್ಲೊ. ದಾಕ್ತೆರ್ ವಾಯ್ನಾಚೆ ಪಯ್ಶೆ ಫಾರಿಕ್ ಕರ್ನ್ ಲೊಕೊನ್ ಲೊಕೊನ್ ದಾರಾ ಕುಶಿಕ್ ಚಲೊಂಕ್ ಲಾಗ್ಲೊ.
ಮರಿಯಾ ಸರ್ಲೆಂ ಆಸ್ತೆಲೆಂ. ಗಡಂಗ್ಗಾರಾನ್ ಮ್ಹಳೆಂ.
ಸಾಂತಾಕ್ ವಚೊನ್ ಸಾಂಗೊದಿತ್.. ಮ್ಹಣಾತ್ತ್ ತೊ ಮಾರ್ಗಾಕ್ ದೆಂವ್ಲೊ. ಗಡಂಗಾ ಭಿತೆರ್ಲ್ಯಾ ಚೆಡ್ವಾನ್ ಅಪಶಕುನ್ ನಿವಾರೊನ್ ಗೆಲೆಂ ಮ್ಹಳ್ಳ್ಯಾ ಜಿನ್ಸಾರ್, ತೋಂಡ್ ಹಿಮ್ಟಾವ್ನ್ ಪರ್ತ್ಯಾನ್ ಆನಂದ್ ಬಾಪಾಚೊ ಗುರ್ತ್ ಕಾಡ್ಲೊ.
ನಿದ್ಲೆಲ್ಯಾ ಪರ್ವತಾಚೆರ್ ಸುಂಯ್ಪುನ್ ಧಾಂವ್ಚ್ಯಾ ವಾರ್ಯಾ ಬರಿಂ ಪಿಯೆತ್ರೊಚ್ಯಾ ಘರಾ ಥಾವ್ನ್ ವಿಳಾಪ್ ಆಯ್ಕಾತಾಲೊ. ತೊ ಘರಾ ಪಾವ್ತಾ ವರೇಗ್ ತ್ಯಾ ಕಾಳಿಜ್ ಕಡಂವ್ಚ್ಯಾ ತಸಲ್ಯಾ ವಿಳಾಪಾನ್ ತಾಚೊ ಪಾಟ್ಲಾವ್ ಕೆಲೊ. ಸಗ್ಳಿ ರಾತ್ ತೊ ವಿಳಾಪ್ ಆಪ್ಲೆಂ ದಾರ್ ಅನಿ ಜನೆಲಾಂ ಬಡಯಿತ್ ಅಸಾ ಮ್ಹಳ್ಳೊ ಜೋಪ್ ತಾಕಾ ಜಾತಾಲೊ.