ಅವಸ್ವರ್ 3
ತ್ಯಾಚ್ ವಸಂತ್ ಋತುಚೆ ಸಾಂಜೆರ್ ಕಾಡ್ದಿನಾಲ್ ಯೂಜಿನಿಯೊ ಮಾರೊಟ್ಟಾ ಆಪ್ಲ್ಯಾ ಫುಲಾಂಚ್ಯಾ ವೊಡ್ತಾಂತ್ ಪಾಸಾಯೊ ಮಾರ್ತಾಲೊ. ಸಕಯ್ಲ್, ದನ್ಪರಾಚ್ಯಾ ವೊತಾಕ್ ನಿದ್ರೆಸ್ತ್ ಆಸುಲ್ಲೆಂ ರೊಮ್ ಶಹರ್ ಜಾಗೆಂ ಜಾಲ್ಲೆಂ ಮಾತ್ರ್. ರಸ್ತೆ ವಾಹನಾನಿಂ ಭರೊನ್ ಗೆಲ್ಲೆ. ಪ್ರವಾಸಿ ಸಾಂ. ಪೆದ್ರುಚ್ಯಾ ಬಸಿಲಿಕಾ ಆನಿ ಕೊಲೊಸಿಯಾಮಾ ಥಾವ್ನ್ ಪಾಟಿಂ ಪರ್ತಾತಾಲೆ. ಸುರ್ಯಾಸ್ತಮಾ ವೆಳಿಚೆಂ ಭಾಂಗ್ರಾಳೆಂ ವೋತ್ ಲಾಗ್ಸಿಲ್ಯಾ ಪರ್ವತಾಂಚೆರ್ ಪರ್ಜಳ್ತಾಲೆಂ ತರೀ ಸಕಯ್ಲ್, ಗಲ್ಲ್ಯಾಂನಿ ಧುಳಿಚಿ ಮೊಡಾಂ ಉಟ್ಲ್ಲಿಂ.
ವಯ್ರ್, ಕಾಡ್ದಿನಲಾಚ್ಯಾ ನಿವಾಸಾ ಲಾಗ್ಗಿಂ ವಾರೆಂ ನಿತಳ್ ಆನಿ ಶಾಂತ್ ಆಸುಲ್ಲೆಂ. ’ಸೇಕ್ರೆಡ್ ಕೊಂಗ್ರೆಗೇಶನ್ ಒಫ್ ರೈಟ್ಸ್’ ಹಾಚೊ ಪ್ರಿಫೆಕ್ಟ್, ’ಸುಪ್ರೀಮ್ ಟ್ರಿಬ್ಯೂನಲ್ ಒಫ್ ದಿ ಅಪೊಸ್ತೊಲಿಕ್ ಸಿಗ್ನೇಚರ್’ ಹಾಚೊ ಪ್ರೊಪ್ರಿಫೆಕ್ಟ್, ’ಕೆನನ್ ಲೊ’ಚೊ ಕಮಿಶನರ್, ಸಾಂ. ಜುಜೆಚ್ಯಾ ಪುತ್ರಾಂಚೊ ಅನಿ ಅಂಕ್ವಾರ್ ಸಾಯ್ಬಿಣಿಚ್ಯಾ ಮೇಳಾಚ್ಯಾ ಧುವಾಂಚೊ ಸಂರಕ್ಷಕ್ ಆನಿ ಪವಿತ್ರ್ ಇಗರ್ಜ್ ಮಾತೆಚ್ಯಾ ಇತರ್ ವೀಸ್ ಸಂಘಾಂಚೊ ವ್ಹಡಿಲ್ ಕಾಡ್ದಿನಾಲ್ ಯೂಜಿನಿಯೊ ಮಾರೊಟ್ಟಾಚ್ಯಾ ವಿಲ್ಲಾಚೊ ಉಭಾರ್ ದೊರೊ, ಗೇಟ್, ಭೆಟೆಕ್ ಆಯ್ಲೆಲ್ಯಾಂಕ್ ತಾಚ್ಯಾ ಸ್ಥಾನಾಚೆಂ ಭರ್ಮ್ ಧಾಕಾಯ್ತಾಲೆಂ. ಕಾಡ್ದಿನಾಲ್ ಮಾರೊಟ್ಟಾ ಆಪ್ಲೊ ಭರ್ಮ್ ಆನಿ ಅಧಿಕಾರ್ ಭಾಯ್ರ್ ದಾಕಾಯ್ನಾತ್ಲೊ ತರೀ ತಾಚ್ಯಾ ಹಾಸ್ಕುರ್ಯಾ ವದನಾ ಭಿತೆರ್ ಲಿಪೊನ್ ಆಸ್ಲೆಲಿ ಬುದ್ವಂತ್ಕಾಯ್ ಆನಿ ಧೃಡ್ ಮನ್ ಲಿಪವ್ನ್ ಧರುಂಕ್ ಸಾಧ್ಯ್ ನಾತ್ಲೆಂ. ಕಾಡ್ದಿನಾಲ್ ಜಿವಾನ್ ಮೊಟ್ವೊ ಆನಿ ಧಡಂಗ್ ಜಾವ್ನಾಸ್ಲೊ. ಪರ್ಜಳುಂಚೆ ಮಾಜ್ರಾ ದೊಳೆ, ಮಟ್ವೆ ಹಾತ್ ಆನಿ ಪಾಂಯ್, ಉಭಾರ್ ಬೋರ್ ಮಾತೆಂ-ತಾಂತ್ಯಾ ಬಾಶೆನ್ ತಾಚ್ಯಾ ತೊಪಿಯೆ ಪಂದಾ ಲಿಪ್ಲ್ಲೆಂ. ತಾಚಿ ಪ್ರಾಯ್ ಸಾಟಾಂ ವಯ್ರ್ ತೀನ್ ಜಾಲ್ಲಿಂ. ತಾಂಬ್ಡಿ ತೊಪಿ ನ್ಹೆಸುಂಕ್ ತಿ ಪ್ರಾಯ್ ಚಿಕ್ಕೆ ತರ್ನಿಚ್ ಮ್ಹಣ್ಯೆತ್.
ಮುಕ್ಲೊ ಪಾಪ್ಸಾಯ್ಬ್ ಜಾವ್ನ್ ತಾಕಾ ಥೊಡ್ಯಾನಿಂ ಆತಾಂಚ್ ವಿಂಚ್ಲ್ಲೊ. ದುಸ್ರೆ ಥೊಡೆ, ಮುಕ್ಲೊ ಪಾಪ್ಸಾಯ್ಬ್ ಚಡ್ ಭಾಗೆವಂತ್ ಆನಿ ವಾತಿಕಾನಾಚ್ಯಾ ರಾಜಕೀಯಾ ಥಾವ್ನ್ ಪಯ್ಸ್ ಆಸ್ಚೊ ಜಾವ್ನಾಸಾಜೆ ಮ್ಹಣ್ತಾಲೆ. ಖಂಚ್ಯಾಕೀ ಕಾಡ್ದಿನಾಲ್ ಮಾರೊಟ್ಟಾ ಸಂದರ್ಭಾಕ್ ರಾಕೊನ್ ಆಸ್ಲೊ. ಸಾಂ ಪೆದ್ರುಚ್ಯಾ ಬಸ್ಕೆಕ್ ಅಂತರ್ ಮಸ್ತು ಆಸುಲ್ಲೊ. ಮೊಗ್ರಾಚಿ ಮುದಿ, ತ್ರಿಕೋನ್ ಚೆಪೆಂ ನ್ಹೆಸ್ಲ್ಲ್ಯಾನ್ ಸಂಸಾರಾಚಿ ಪಾತ್ಕಾಂ, ಸಿಸ್ಯಾಚ್ಯಾ ದಗ್ಲ್ಯಾ ಬಾಶೆನ್ ಖಾಂದಾರ್ ವ್ಹಾವಾಯ್ಜಾಯ್ ಆಸುಲ್ಲೆಂ. ತಾಣೆ ವಾರ್ಯಾ ವಾದಾಳಾಂತ್ ಎಕ್ಲೊಚ್ ಶಿಖರಾರ್ ಉಭೊ ರಾವೊನ್ ಆಸಾಜಾಯ್ ಆಸುಲ್ಲೆಂ. ಸಗ್ಳೆ ಗಾಂವ್ ತಾಚ್ಯಾ ಪಾಂಯಾ ಥಳಾ ಆಸ್ತಾತ್. ವಯ್ರ್ ಸರ್ವೆಸ್ಪೊರಾಚೆಂ ಉಗ್ತೆಂ ತೋಂಡ್. ಫಕತ್ ಎಕ್ಲೊ ಮೂರ್ಖ್ ಮಾತ್ರ್ ಪಾಪಾ ಸಾಯ್ಬಾಚಿ ಪದ್ವಿ, ಅಧಿಕಾರ್, ತ್ಯಾ ಎಕ್ಸುರ್ಪೊಣಾಚಿ ಕಠೋರತಾ ಆಶೆತ್! ಕಾಡ್ದಿನಾಲ್ ಮಾರೊಟ್ಟಾಕ್ ಅಪ್ಲೆಚ್ ಮಾತೆಂಭರ್ ಸಮಸ್ಯೆ ಆಸುಲ್ಲೆ.
ಆಜ್ ಕೆಲೆಬ್ರಿಯಾ ಪ್ರಾಂತಾಚಿ ಲ್ಹಾನ್ ದಿಯೆಸೆಜ್ ವಾಲೆಂತಿಚ್ಯಾ ಭಿಸ್ಪಾ ಥಾವ್ನ್ ತಾಕಾ ಪತ್ರ್ ಆಯಿಲ್ಲೆಂ. ತಾಕಾ ವಾಲೆಂತಿಚ್ಯಾ ಭಿಸ್ಪಾಚಿ ವಯ್ಲ್ಯಾಬಾರ್ ವಳಕ್ ಆಸುಲ್ಲಿ. ತೊ ಪ್ರಗತಿಪರ್ ಧೋರಣಾಂಚೊ ತಶೆಂ ಪ್ರಚಲಿತ್ ರಾಜಕೀಯಂತ್ ಅಸಕ್ತ್ ಧವರ್ನ್ ಆಸ್ಲೊಲೊ ಗೊವ್ಳಿ ಮ್ಹಣೊನ್ ತಾಣೆ ಆಯ್ಕಾಲ್ಲೆಂ. ದೋನ್ ವರ್ಸಾಂ’ಧಿಂ ತಾಣೆ ಸ್ಕಾಂದಲ್ಬರಿತ್ ಜಿವಿತ್ ಸಾರ್ತೆಲ್ಯಾ ದೋಗ್ ಯಾಜಕಾಂಕ್ ಆನಿ ಅದಕ್ಷತೆಕ್ ಲಾಗೊನ್ ದೋಗ್ ಪ್ರಾಯೆಸ್ತ್ ಪಾದ್ರಿಂಕ್ ನಿವೃತ್ತ್ ಕರುನ್ ಏಕ್ ಲ್ಹಾನ್ಶೆಂ ವಾದಾಳ್ ಉಟಯಿಲ್ಲೆಂ. ಪತ್ರ್ ಮಟ್ವೆಂ ಆನಿ ಸರಳ್ ಜಾವ್ನಾಸ್ಲೆಂ. ಸಾಂಪ್ರಾದಾಯಿಕ್ ವಂದನಾ ಸವೆಂ ಪತ್ರಾಚೊ ಸಾರಾಂಶ್ ಜಾವ್ನಾಸ್ಲೊ: ಜಿಮೆಲ್ಲೊ ದೇಯಿ ಮೊಂತಿಚ್ಯಾ ದೋನ್ ಹಳ್ಳೆಂ ಥಾವ್ನ್ ಭಾವಾಡ್ತ್ಯಾನಿಂ ಆನಿ ಫಿರ್ಗಜ್ ಪಾದ್ರಿನ್ ಜಿಯಕೊಮೊ ನೆರೊನ್ ಹಾಕಾ ಅಲ್ತಾರಿಚೊ ಮಾನ್ ಫಾವೊ ಕರಿಜಾಯ್ ಮ್ಹಣೊನ್ ಪಾಟಾಯ್ಲೆಲ್ಲ್ಯಾ ಮನವೇ ಪತ್ರಾಚೊ ತಪ್ಶೀಲ್ ವಿವರ್ ತ್ಯಾ ಪತ್ರಾಂತ್ ಅಟಾಪುನ್ ಆಸ್ಲೊ.
ಜಿಯಾಕೊಮೊ ನೆರೊನ್ ಕೊಮುನಿಸ್ತಾಂಚ್ಯಾ ಹತಾಂತ್ ಮರಣ್ ಪಾವ್ಲ್ಲೊ. ಹೆ ಸಂದರ್ಬ್ ತಾಚ್ಯಾ ಮಾಡ್ತಿರ್ಪಣಾಕ್ ಸಾಕ್ಸ್ ದಿತಾಲೆ. ತೊ ಮೆಲ್ಯಾ ನಂತರ್ ಲೊಕಾನ್ ಅಪ್ಶೆಂಚ್ ತಾಚೆ ನಾಂವಿ ಭಕ್ತ್ ಸುರು ಕೆಲಿ. ತಾಚ್ಯಾ ಪ್ರಭಾವಾನ್ ಸಬಾರ್ ಪಿಡಾ ಗೂಣ್ ಜಾಲ್ಲೆ ದಾಕ್ಲೆ ಆಸಾತ್. ವಯ್ಜಕೀಯ್ ಸಮ್ಜಣೆ ಪ್ರಮಾಣೆ ಹಿಂ ಅಜ್ಯಾಪಾಂ ಜಾವ್ನಾಸಾತ್. ಭಿಸ್ಪಾನ್ ಹೆಂ ಮನವಿ ಪತ್ರ್ ವಾತಿಕಾನಾಚ್ಯಾ ನ್ಯಾಯಾಂಗ್ ತನ್ಖೆಕ್ ಒಪ್ಸುಂಕ್ ಯೆವ್ಜಿಲ್ಲೆಂ. ಹಾಚೆ ಪಯ್ಲೆಂ, ಕಾಡ್ದಿನಾಲ್ ಮಾರೊಟ್ಟಾ ’ಧಾರ್ಮಿಕ್ ವಿಧಿಂಚ್ಯಾ ಪವಿತ್ರ್ ಮೇಳಾಚೊ ಪ್ರಿಫೆಕ್ಟ್’ ಜಾಲ್ಲೆ ವರ್ವಿಂ, ಭಿಸ್ಪಾನ್ ತಾಚೆಂ ಮಾರ್ಗ್ದರ್ಶನ್ ವಿಚಾರ್ಲ್ಲೆಂ ಆನಿ ತನ್ಖೆ ಖಾತಿರ್ ರೋಮಾ ಥಾವ್ನ್ ದೊಗಾಂ ಬುದ್ವಂತಾಂಕ್- ಎಕ್ಲೊ ಕಕ್ಷಿದಾರಾ ಕುಶಿಕ್ (Postulator) ತನ್ಖಿ ಚಲಂವ್ಕ್ ಆನಿ ದುಸ್ರೊ ಭಾವಾಡ್ತಾಚೊ ಪ್ರೇರಕ್ ವ ಸೈತಾನಾಚೊ ವಕೀಲ್ (Devil's Advocate: ಎಕಾ ವೆಕ್ತಿಕ್ ಅಲ್ತಾರಿಚೊ ಮಾನ್ ಫಾವೊ ಕರ್ಚೆ ಪಯ್ಲೆಂ, ಸಂಬಂಧ್ ಜಾಲ್ಲೆ ಸಾಂತಿಪಣಾಕ್ ಪೂರಕ್ ಜಲ್ಲೆ ದಾಕ್ಲೆ ಎಕ್ದಮ್ ಸೂಕ್ಷಿಮಾಯೆನ್ ಪರೀಕ್ಷಾ ಕರುಂಕ್ ಇಗರ್ಜ್ ಮಾತೆನ್ ನಮಿಯಾರ್ಲೆಲ್ಲೊ ಅಧಿಕಾರಿ) ನಮಿಯಾರುಂಕ್ ತಾಣೆ ವಿಚಾರ್ಲ್ಲೆಂ.
ಪ್ರಾಥಮಿಕ್ ತನ್ಕಿ ಚಲಂವ್ಕ್ ದಿಯೆಸೆಜಿಚ್ಯಾ ಭಿಸ್ಪಾಕ್ಚ್ ಅಧಿಕಾರ್ ಆಸುಲ್ಲೊ. ಅಧಿಕಾರಿಯೀ ತಾಣೆಂಚ್ ನಮಿಯಾರ್ಯೆತೆಂ. ತರ್, ಭಿಸ್ಪ್, ರೊಮಾಚಿ ಸಸಾಯ್ ಕಿತ್ಯಾಕ್ ಮಗೊನ್ ಆಸಾ? ಕಾಡ್ದಿನಾಲ್ ಮಾರೊಟ್ಟಾ ಆಪ್ಲ್ಯಾ ವೊಡ್ತಾಂತ್ ಪಾಸಾಯೊ ಮಾರಿತ್ತ್ ಚಿಂತುಂಕ್ ಪಡ್ಲೊ.
ಕಾಡ್ದಿನಾಲ್ ಮಾರೊಟ್ಟಾ ಜಣಾಸ್ಲೆಲೆ ಬರಿಂ ಜಿಮೆಲ್ಲೊ ದೇಯಿ ಮೊಂತಿ ತಸಲ್ಯಾ ಹಳ್ಳೆನಿಂ ಕಸಲಿಯ್ ಭಕ್ತ್ ಚಡ್ ತೇಂಪ್ ಬಾಳ್ವಾನಾತ್ಲಿ. ಥೈಂ ಭವಾಡ್ತ್ ಧಾಟ್ ಫಿತಿಸ್ಪಣಾನಿಂ ರೆವೊಡ್ನ್ ಆಸ್ತಾಲೊ. ಕಾಡ್ದಿನಾಲಾಕ್ ವಾಲೆಂತಾಚ್ಯಾ ಭಿಸ್ಪಾಚ್ಯೊ ಕುಯೊಕ್ತ್ಯೊ ಸಮ್ಜೊಂಕ್ ಚಡ್ ವೇಳ್ ಲಾಗ್ಲೊ ನಾ. ಭಿಸ್ಪಾಕ್ ಆಪ್ಲ್ಯಾ ದಿಯೆಸೆಜಿಕ್ ಎಕ್ಲೊ ಸಾಂತ್ ಜರೂರ್ ಜಾಯ್ ಆಸ್ಲೊ ಪುಣ್ ತ್ಯಾ ಖಾತಿರ್ ತೊ ಆಪ್ಲ್ಯಾ ಗೌರವಾಚೆರ್ ಜುಗಾರ್ ಖೆಳೊಂಕ್ ತಯಾರ್ ನಾತ್ಲೊ. ತನ್ಕಿ ಫಳಾದಿಕ್ ಜಾಲಿ ತರ್ ತಾಚ್ಯಾ ದಿಯೆಸೆಜಿಕ್ ಎಕ್ಲೊ ಸಾಂತ್ ಮೆಳ್ತಲೊ. ತಾಚ್ಯಾ ಪ್ರಾಂತಾಂತ್ಲ್ಯಾ ಕೊಮ್ಯುನಿಸ್ತಾಂಕ್ ಮಾರುಂಕ್ ಏಕ್ ಸಂಪೆ ಹಾತೆರ್ ಮೆಳ್ತೆಲೆಂ, ತನ್ಕಿ ನಾ ಯಶಸ್ವಿ ಜಾಯ್ತ್ ತರ್, ರೊಮಾಂತ್ಲ್ಯಾ ಬುದ್ವಂತ್ ಮ್ಹನ್ಶಾಂಚ್ಯಾ ತೊಂಡಾರ್ ಕರಿ ಲಾಗ್ತೆಲಿ. ಭಿಸ್ಪಾಚೊ ಉಪಾಯ್ ಚಿಂತುನ್ ಕಾಡ್ದಿನಾಲ್ ಮಾರೊಟ್ಟಾ ವಿಜ್ಮಿತ್ ಪಾವ್ಲೊ. ತೆನ್ಕಾ ಇಟೆಲಿಗಾರಂಕ್ ಕಿತ್ಯಾಕ್ ಕೊಲೆ ಮ್ಹಣ್ತಾತ್ ಮ್ಹಣ್ ತೊ ಆತಾಂ ಸಮ್ಜಾಲೊ!
ಹಾಂಗಾ ಎಕಾ ಭಿಸ್ಪಾಚ್ಯಾ ಪ್ರತಿಷ್ಠೆ ವರ್ನಿ ವರ್ತಿಂ ಸವಾಲಾಂ ಅಟಾಪುನ್ ಆಸ್ಲಿಂ. ಇಟೆಲಿಂತ್ಲ್ಯಾ ಎಲಿಸಾಂವಾಕ್ ಫಕತ್ ಏಕ್ ವರಸ್ ಉರ್ಲ್ಲೆಂ. ಹೊ ಸಂದರ್ಭ್ ಖಂಡಿತ್ ಜಾವ್ನ್ ಇಗರ್ಜ್ ಮಾತೆಚೆ ಪ್ರಬಲ್ ವಿರೋಧಿ ಗಳ್ಸಿತೆಲೆ. ಹಾಂತು ಆನಿಕೀ ಗೂಂಡ್ ವಿಷಯ್ ಲಿಪೊನ್ ಆಸ್ಲೆ: ಎಕಾ ವೆಕ್ತಿಕ್ ಭಾಗೆವಂತ್ ಮ್ಹಣೊನ್ ಪಾಚಾರ್ಚೆಂ, ತ್ಯಾ ವೆಕ್ತಿಕ್ ದೆವಾಚೊ ಧೀರ್ ಸೆವಕ್ ಆನಿ ತಾಕಾ ಉರ್ಲೆಲ್ಯಾ ಭಾವಾಡ್ತ್ಯಾಂ ಆನಿ ದೆವಾ ಮಧೆಂ ಮಧ್ಯವರ್ತಿ ಮ್ಹಣೊನ್ ವೊಲಾಯ್ಲ್ಲೆ ಬರಿಂ. ತಾಚಿಂ ಅಜ್ಯಾಪಾಂ ಮಾಂದ್ಚೆ, ದೆವಾಚಿ ಸಕತ್ ತಾಚೆ ಥಾವ್ನ್ ವ್ಯಕ್ತ್ ಜಾತೆತ್ ಆಸಾ ಮ್ಹಣೊನ್ ದುಬಾವಾವಿಣೆ ಮಾಂದ್ಚೆ ತಸಲೆ. ತಸಲ್ಯಾ ಸಂಗ್ತೆಂತ್ ಚೂಕ್ ಘಡೊಂಕ್ ಸಾಧ್ಯ್ಚ್ ನಾತ್ಲೆಂ. ಅಖ್ಖ್ಯಾ ಧಾರ್ಮಿಕ್ ವಿಧಿಂಚ್ಯಾ ಪವಿತ್ರ್ ಮೆಳಾಚೆ ನಿಯಮ್ ಅಸಲಿ ಚೂಕ್ ಘಡೊಂಕ್ ಸಾಧ್ಯ್ಚ್ ನಾತ್ಲೆ ಬರಿಂ ರಚಿತ್ ಜಾಲ್ಲೆ. ಅಪರಿಪೂರ್ಣ್ ತನ್ಖಿ ಸ್ಕಾಂದಲ್ ಉಟಯ್ತಾ ಆನಿ ಇಗರ್ಜ್ಮಾತೆಚ್ಯಾ ಅಸಂಖ್ಯಾತ್ ಸಾಂದ್ಯಾಂಚೊ ಭವಾಡ್ತ್ ಧಂಡಳಾಯ್ತಾ.
ಪರ್ವತಾಂ ಮಧೆಂ ಸುರ್ಯೊ ಲಿಪೊನ್, ಕಾಳೊಕ್ ಪೃಥ್ವೆಚೆರ್ ದೆಂವ್ತಾನಾ ಥಂಡ್ ಹವ್ಯಾಕ್ ಕಾಡ್ದಿನಾಲ್ ಬಾಪಾನಿಂ ಆಂಗ್ ಕಾಡ್ಲೆಂ. ಆಧಿಕಾರಾನ್ ತಾಕಾ ಧೃಡ್ ಕೆಲ್ಲೊ, ಭಕ್ತೆ ವಿಶಿಂ ತಾಕಾ ದುಬಾವ್ ಆಸುಲ್ಲೊ ತರೀ ತಾಚ್ಯಾ ಖಾಂದಾರೀ ಭಾವಾಡ್ತಾಚೊ ಖುರಿಸ್ ಆಸುಲ್ಲೊ. ತಾಚ್ಯಾ ಸೆಕುಲಾರ್ ಭರ್ಮಾರೀ ತಾಚೆಂ ಪ್ರಮುಖ್ ಮಿಸಾಂವ್ ಆಧ್ಯಾತ್ಮಿಕ್ ಜಾವ್ನಾಸ್ಲೆಂ. ಮಿಸಾಂವ್, ಆತ್ಮ್ಯಾಂಚೆ, ತಾಂಚ್ಯಾ ಸಾಲ್ವಾಸಾಂವಾಂಚೆ ಆನಿ ತಾಂಚ್ಯಾ ದೆಸ್ವಾಟೆಚೆಂ.
ಭಿಸ್ಪಾಚಿ ಮನವಿ ಪುರಸ್ಕಾರ್ ಕರುಂಕ್ ತಾಣೆ ಚಿಂತ್ಲೆಂ. ತಾಚೆಂ ಲ್ಹಾನ್ ಜೈತ್ ತೊ ಚಾಕೊಂದಿ. ಜಿಯಾಕೊಮೊ ನೆರೊನಾಚಿ ತನ್ಕಿ ಮಾಂಡುನ್ ಹಾಡುಂಕ್ ಆನಿ ತಾಚ್ಯೊ ಸಾಕ್ಷಿ ತೀರ್ ತಿರ್ಕುಟ್ ಕರುಂಕ್, ಸಾಧ್ಯ್ ಜಾಲ್ಯಾರ್, ಎಕಾ ಸೈತಾನಾಚ್ಯಾ ವಕೀಲಾಕ್ಯೀ ಧಾಡ್ತೊಲೊ. ಹಾಂಗಾ ಸೈತಾನಾಚ್ಯಾ ವಕೀಲಾಚಿ ಪ್ರಾಮುಖ್ಯತಾ ಪೋಸ್ತುಲೇಟರಾ ವರ್ನಿ ಚಡ್ ಆಸ್ತಾ. ತಾಚಿ ಅಧಿಕೃತ್ ಪದ್ವಿಚ್ ಭಾವಾಡ್ತಾಚೊ ಪ್ರೇರಕ್ ಜಾವ್ನ್. ತಾಣೆ ಕೊಣಾಯ್ಚಿಂ ಕಾಳ್ಜಾಂ, ಮನಾಂ ದುಕಯ್ಲ್ಯಾರೀ ಪರ್ವಾ ಕರುಂಕ್ನೊಜೊ. ತೊ ಗ್ಯಾನಿ, ಸೀದಾ ಆನಿ ಪಾಶಾಂವಾ ರಹಿತ್ ಜಾವ್ನಾಸಾಜೆ. ನ್ಯಾಯಾಂತ್ ಪಕ್ಷಾತೀತ್ ಆನಿ ಖಂಡನಾಂತ್ ಖಡಕ್ಕ್. ಅಸಲೆ ವೆಕ್ತಿ ಬೋವ್ ವಿರಳ್ ಜಾವ್ನಾಸ್ಲೆ ಆನಿ ಆಸ್ಲ್ಯಾರೀ ದುಸ್ರ್ಯಾ ರಾಟಾವಳಿನಿಂ ವೆಸ್ತ್ ಜಾವ್ನಾಸ್ಲೆ.
ತ್ಯಾಚ್ ವಗ್ತಾ ಕಾಡ್ದಿನಾಲಾಕ್ ಮೊನ್ಸಿಜ್ಙೊರ್ ಬ್ಲೇಸ್ ಮೆರ್ಡಿತಾಚೊ ಉಗ್ಡಾಸ್ ಆಯ್ಲೊ. ಮರ್ಣಾಚಿ ಸಾವ್ಳಿ ತಾಚೆರ್ ಪಡೊನ್ ಆಸ್ಲಿ. ತೊ ವಿಶೇಸ್ ಕಾಮಾರ್ಯೀ ನಾತ್ಲ್ಲೊ. ಖಾಲಿಚ್ ಆಸ್ಲೊ ಮ್ಹಣ್ಯೆತ್. ಸೈತಾನಾಚ್ಯಾ ವಕೀಲಾಕ್ ಜಾಯ್ ಆಸ್ಲಿ ಯೋಗ್ಯತಾ ತಾಕಾ ಆಸುಲ್ಲಿ. ತಾಕಾ ಮನ್ ಆಸಾಗಿ ವ ಜಾಯ್ ಪುರ್ತೊ ವೇಳ್ ಆಸಾಗೀ ನಾ ಮ್ಹಳ್ಳಿ ಗಜಾಲ್ ವೆಗ್ಳಿ.