ಅವಸ್ವರ್ 5
ದುಸ್ರೆ ದೀಸ್ ಸಾಕಾಳಿಂ ಇಕ್ರಾ ವೊರಾಂಚೆರ್ ಮೊನ್ಜಿಞರ್ ಬ್ಲೇಸ್ ಮೆರ್ಡಿತಾನ್ ರೊಮಾ ಥಾವ್ನ್ ಕೆಲಬ್ರಿಯಾ ಕುಶಿಕ್ ಪಯ್ಣ್ ಸುರು ಕೆಲೆಂ. ತಾಚೆ ಮುಕಾರ್ ಧಾ ವೊರಾಂಚೆ ಪಯ್ಣ್ ಆಸುಲ್ಲೆಂ. ಪವಿತ್ರ್ ಶ್ಹೆರಾಕ್ ಭೆಟ್ ದೀವ್ನ್ ಪಾಟಿಂ ಪರ್ತೊಂಚ್ಯಾ ಯಾತ್ರಿಕಾಂ ಥಾವ್ನ್ ರೈಲ್ ಭರೊನ್ ವೊಮ್ತೊತಾಲೆಂ. ಮೆರ್ಡಿತ್ ಎಕಾ ಮೊಟ್ಯಾ ಮಾನೆಸ್ತಿಣಿ ಆನಿ ಪಯ್ಣಾ ಲಾಂಬಾಯ್ಕೀ ಪೆಕೆಟಿ ಥಾವ್ನ್ ಅವಾಜಾ ಸವೆಂ ಪೆಪ್ಪರ್ ಮಿಂಟಾಂ ಚಿಂವೊನ್ ಆಸ್ಲೆಲ್ಯಾ ಎಕಾ ಕಾಳ್ಯಾ ಪಾದ್ರಿ ಮಧೆಂ ಚಿಡ್ಕಾಲ್ಲೊ. ತಾಚಿ ಮುಕ್ಲಿ ಬಸ್ಕಾ ಎಕಾ ನಾಡಾಚ್ಯಾ ಜೊಡ್ಯಾನ್ ಆನಿ ತಾಂಚ್ಯಾ ಚೊವ್ಗ್ ಭುರ್ಗ್ಯಾಂನಿ ಆಕ್ರಮಣ್ ಕೆಲ್ಲಿ. ಡಬ್ಬ್ಯಾಂತ್ಲಿಂ ಸಕ್ಕಡ್ ಜನೆಲಾಂ ಧಾಂಪ್ಲ್ಲಿಂ. ಮೆರ್ಡಿತಾನ್ ಬ್ರಿವಿಯರಿ ಉಗ್ತಿ ಕರುನ್ ಚೀತ್ ದೀವ್ನ್ ವಾಚುಂಕ್ ಪ್ರಯತನ್ ಕೆಲೆಂ. ಪುಣ್ ಭಿತೆರ್ಲೆಂ ಹುನ್ ವಾರೆಂ, ರೈಲಾಚೊ ನಿರಂತರ್ ಅವಾಜ್ ಆನಿ ಭುರ್ಗ್ಯಾಂಚ್ಯಾ ಕಿಂಕ್ರಾಟೆ ವರ್ವಿಂ ತಾಕಾ ತಕ್ಲಿ ಫಡೊಂಕ್ ಸುರು ಜಾಲಿ. ಬ್ರಿವಿಯರಿ ಧಾಂಪುನ್ ತೊ ಉಟ್ಲೊ ಆನಿ ದಾರಾ ಸರ್ಶಿಂ ವಚೊನ್ ಭಾಯ್ಲಿ ಸೊಬಾಯ್ ಚ್ಯಾಕೊಂಕ್ ಲಾಗ್ಲೊ.
ಸಗ್ಳ್ಯಾನಿಂ ಪಾಚ್ವೆಂ ದಿಸ್ತಾಲೆಂ. ಭುಂಯ್ಚೆರ್ ಚಲಯಿಲ್ಲ್ಯಾ ನಿರಂತರ್ ಅತ್ತ್ಯಾಚಾರಾಚೆ ಕುರ್ಹು ಪಾಚ್ವ್ಯಾ ತಣಾನ್ ಲಿಪಯಿಲ್ಲೆ. ರೊಮಾಚ್ಯಾ ಪುರಾತನ್ ವಿಲ್ಲಾಂಚೆರ್ ಆನಿ ಕಾಲ್ವ್ಯಾಂಚೆರ್ಯೀ ಪಾಚ್ವಿ ಪಾಜ್ ಮಾಂಡ್ಲ್ಲಿ. ಹೆಣೆಂಚಿ ಭುಂಯ್ ಥಕೊನ್ ಗೆಲ್ಲಿ. ತಿಚೆ ಗುಡೆ ಝರೊನ್ ಗೆಲ್ಲೆ, ರಾನಾಂ ಧ್ವಂಸ್ ಜಾಲ್ಲಿಂ ಆನಿ ನ್ಹಂಯೊ ಸುಕೊನ್ ಗೆಲ್ಲ್ಯೊ. ತರೀ ಹರ್ಯೆಕಾ ವರ್ಸಾ, ಹ್ಯಾಚ್ ವೆಳಾರ್ ಭುಂಯ್ ಪಾಚ್ವೆಂ ನ್ಹೆಸ್ಚ್ಯಾ ಕಾರ್ಯಾಂತ್ ಜೈತ್ ವ್ಹರ್ತಾಲಿ.
ತಾಚೆ ಬರಿಂಚ್ ಭಿತೆರ್ಲ್ಯಾ ಸಿಗಾರಾಂಚ್ಯಾ ಧುಂವ್ರಾಕ್, ಹುನ್ ತಶೆಂ ಮೆಳ್ಯಾ ವಾರ್ಯಾಕ್ ಉಬ್ದೇಸ್ ಭಗುನ್ ಭಾಯ್ರ್ ಆಯ್ಲೆಲ್ಯಾಂಚೆರ್ ತಾಣೆ ದೀಶ್ಟ್ ವ್ಹೆಲಿ. ಬೊಟಾಚೆರ್ ಪರ್ಜಳ್ಚಿ ಮುದಿ ಘಾಲ್ಲೊ ನೇಪಲ್ಸಾಚೊ ವೆಪಾರಿ, ದಾಟ್ ಮೊಚೆ ಆನಿ ಗಳ್ಯಾಕ್ ’ಲೈಕಾ’ ಕೆಮರಾ ಉಮ್ಕಾಳಾಯಿಲ್ಲೊ ಜರ್ಮನ್ ಪ್ರವಾಸಿ, ಸುಂದರ್ ವದನಾಚೊ ಅಮೆರಿಕನ್ ವಿದ್ಯಾರ್ಥಿ, ಆನಿ ಏಕ್ ಸ್ಥಳೀಯ್ ತರ್ನಾಟೆಂ ಜೊಡೆಂ ತಾಚ್ಯಾ ನದ್ರೆಕ್ ಸಾಂಪಾಡ್ಲೆಂ.
ಮೆರ್ಡಿತಾಚಿ ದೀಶ್ಟ್ ವೊಡ್ಲ್ಲ್ಯಾ ತರ್ನಾಟ್ಯಾ ಜೊಡ್ಯಾಂತ್ಲೊ ತರ್ನಾಟೊ ತೆನ್ಕಾಚೊ ರಯ್ತ್ ಜಾವ್ನಾಸೊನ್, ತಾಕಾ ಪರ್ಜಳ್ಚೆ ದೊಳೆ ಆನಿ ಉಟೊನ್ ದಿಸ್ಚೆ ಘಟ್ಮೂಟ್ ಬಾವ್ಳೆ ಆಸುಲ್ಲೆ. ಚೆಡುಂ ಚಿಕ್ಕೆ ಮಟ್ವೆಂ ಆಸೊನ್ ಪೆಂಕಾಟ್ ರೂಂದ್ ಆಸುಲ್ಲೆಂ. ಮಟ್ವ್ಯಾ ಗಳ್ಯಾಚಿ ಬ್ಲಾವ್ಜ್ ತಾಚಿಂ ಉಭಾರ್ ಸ್ತನಾಂ ನಿಯಂತ್ರಣಾರ್ ಧವ್ರುಂಕ್ ಕಷ್ಟಾತಾಲಿ. ತಾಂಚೆ ಶಿವಾಯ್ ಭಂವ್ತಿಲ್ಯಾಂಕ್ ತಿಂ ವಿಸ್ರಾಲ್ಲಿಂ. ರೈಲಾಚ್ಯಾ ಧಲವ್ಣೆಕ್ ತಿಂ ಯೀ ಧಲ್ತಾಲಿಂ. ತರ್ನಾಟ್ಯಾಚ್ಯಾ ತೊಂಡಾರ್ ಸಂಸಾರ್ ಜಿಕ್ಲ್ಯಾ ಕೊಂಬ್ಲ್ಯಾಚೊ ಜಿನೊಸ್ ಉಟೊನ್ ದಿಸ್ತಾಲೊ ತರ್, ಚಲಿಯೆಚ್ಯಾ ತೊಂಡಾರ್ ತೃಪ್ತಿ ನಿಶೆತಾಲಿ.
ತಾಂಕಾ ಪಳೆವ್ನ್ ಮೆರ್ಡಿತ್ ಚಿಕ್ಕೆ ಅಸ್ವಸ್ಥ್ ಜಾಲೊ. ದೇವ್ ಶಾಸ್ತಿರಾಂತ್ಲೆಂ ವಿವರಣ್ ಆನಿ ಅಪ್ರೂಬ್ ಕುಮ್ಸಾರಿಂತ್ ಆಯ್ಕಾಲ್ಲೆಂ ಸೊಡ್ಲ್ಯಾರ್ ಮೋಗ್ ಮ್ಹಳ್ಳೊ ಸಬ್ದ್ ತಾಚ್ಯಾ ಜಿಣಿಯೆಂತ್ ಅಪರಿಚಿತ್ ಜಾವ್ನಾಸ್ಲೊ. ಕಾಡ್ದಿನಾಲ್ ಮಾರೊಟ್ಟಾನ್ ಸಾಂಗ್ಲ್ಲೆಂ ಖರೆಂ ಮ್ಹಣೊನ್ ತಾಕಾ ಭಗ್ಲೆಂ: ತೊ ಮ್ಹನ್ಶಾ ಕುಟ್ಮಾ ಥಾವ್ನ್ ಬೋವ್ ಪಯ್ಸ್ ಆಸುಲ್ಲೊ.
ತಾಚ್ಯಾ ಪೊಟಾಚ್ಯಾ ಗೂಂಡಾಯೆ ಥಾವ್ನ್ ಹಳೂ ದೂಕ್ ಸುರು ಜಾಲಿ. ಥೊಡೊ ವಿಶೆವ್ ಘೆಂವ್ಚೆ ಖಾತಿರ್ ತೊ ಆಪ್ಲ್ಯಾ ಬಸ್ಕೆಕ್ ಪಾಟಿಂ ಪರ್ತಾಲೊ. ಥೈಂ ಕಾಳ್ಯಾ ಪಾದ್ರಿನ್ ಸೆರ್ಮಾಂವ್ ಸುರು ಕೆಲ್ಲೊ:
..... ನಿಜಾಯ್ಕೀ ಆಮ್ಚೆ ಪಾಪಾಸಾಯ್ಬ್ ಭಾಗೆವಂತ್ಚ್ ಮ್ಹಣಾಜಾಯ್. ಸಾಂ. ಪೆದ್ರುಚ್ಯಾ ಬಾಸಿಲಿಕಾಂತ್ ತೆ ಮ್ಹಾಕಾ ಲಾಗೊನ್ಂಚ್ ಆಸ್ಲ್ಲೆ ಬರಿಂ ರಾವೊನ್ ಆಸ್ಲೆ. ತಾಂಚೆ ಥಾವ್ನ್ ಭಾಯ್ರ್ ಸರ್ಚಿ ತಿ ದೈವಿಕ್ ಸಕತ್ ಕೊಣಾಕೀ ಪಾರ್ಕಿವ್ಯೆತಿ. ರೊಮಾ ಪವಿತ್ರ್ ಶ್ಹೆರ್ ಮ್ಹಣೊನ್ ವೊಲಾಯಿಲ್ಲ್ಯಾಂಚಿ ಜಾಣ್ವಾಯ್ ನಿಜಾಯ್ಕಿ ಹೊಗ್ಳಿಕೆಕ್ ಪಾತ್ರ್ ಜಾವ್ನಾಸಾ. ಪುಣ್ ಏಕ್ ಉಗ್ಡಾಸ್ ಧವರಾ, ಇಗರ್ಜ್ಮಾತೆಚೆ ಸಕ್ಕಡ್ ಸಾಂತ್ ರೊಮಾಂತ್ ನಾಂತ್. ಆಮ್ಚ್ಯಾ ಲ್ಹಾನ್ ಪ್ರಾಂತಾಂತೀ ಅಧಿಕೃತ್ ನ್ಹಯ್ ತರೀ ಎಕ್ಲೊ ಖರೊ ಸಾಂತ್ ಆಸಾ.
ಮೆರ್ಡಿತಾನ್ ದೊಳೆ ಧಾಂಪ್ಲ್ಲೆ ತರೀ ತೊ ತಕ್ಷಣ್ ಜಾಗೃತ್ ಜಾಲೊ.
.॒ ತಾಕಾ ಅಲ್ತಾರಿಚೊ ಮಾನ್ ಫಾವೊ ಕರುಂಕ್ ತಯಾರಾಯ್ ಚಲೊನ್ ಆಸಾ. ತಾಚೆಂ ನಾಂವ್ ಜಿಯಾಕೊಮೊ ನೆರೊನ್. ತುಮಿಂ ಆಯ್ಕಾಲಾಂ ಜಾಂವ್ಕ್ ಪುರೊ. ತಾಚಿ ಜಿಣಿಂಚ್ ವಿಚಿತ್ರ್ ಆನಿ ಅಜ್ಯಾಪಿ. ತೊ ಖಂಯ್ ಥಾವ್ನ್ ಆಯಿಲ್ಲೊ ಮ್ಹಣ್ ಕೊಣೀ ನೆಣಾಂತ್. ಪುಣ್ ಏಕ್ ದೀಸ್ ದೆವಾನ್ಂಚ್ ತಾಕಾ ಧಾಡ್ಲೊ ಮ್ಹಳ್ಳೆ ಬರಿಂ ತೊ ಹಳ್ಳೆಕ್ ಪ್ರವೇಶ್ ಜಾಲೊ. ಸ್ವ-ಹಾತಾಂನಿ ತಾಣೆ ಆಶ್ರಮ್ ಬಾಂಧ್ಲೆಂ. ಮಾಗ್ಣ್ಯಾಂತ್ ಆನಿ ಲೊಕಾಚೆ ಸೆವೆಂತ್ ತಾಣೆ ವೇಳ್ ಖರ್ಚಿಲೊ. ಝಜಾ ನಂತರ್ ಕೊಮ್ಯುನಿಸ್ತಾನಿಂ ತಾಕಾ ಜಿವೆಶಿಂ ಮಾರ್ಲೊ. ಭಾವಾಡ್ತಾ ಖಾತಿರ್ ತೊ ಮಾಡ್ತಿರ್ ಮೆಲೊ. ತೊ ಸರ್ಲ್ಯಾ ನಂತರ್ ತಾಚ್ಯಾ ನಾಂವಿ ಅಜ್ಯಾಪಾಂ ಪಾಟ್ಲ್ಯಾನ್ ಅಜ್ಯಾಪಾಂ ಘಡೊನ್ ಆಸಾತ್.
ಮೆರ್ಡಿತಾನ್ ದೊಳೆ ಉಘಡ್ಲೆ ಆನಿ ಮುಗ್ಧತೆನ್ ವಿಚಾರ್ಲೆಂ:
ಫಾದರ್, ತುಮಿಂ ತಾಕಾ ವಳ್ಕಾತೆಲ್ಯಾತ್ಗಿ?
ಕಾಳ್ಯಾ ಪಾದ್ರಿನ್ ಮೆರ್ಡಿತಾ ಹೆವ್ಶಿಂ ಏಕ್ ದುಬಾವಿ ನದರ್ ಮಾರ್ಲಿ.
ವ್ಹಯ್. ಪುಣ್ ವಯುಕ್ತಿಕ್ ಥರಾನ್ ನ್ಹಯ್. ತಾಚೆ ವಿಶ್ಯಾಂತ್ ಹಾಂವ್ ಮಸ್ತು ಜಾಣಾ. ಹಾಂವ್ ತಾಚ್ಯಾ ಸೆಜಾರಾ ಕೊಸೆಂಜಿ ದಿಯೆಸೆಜಿಚೊ
ದೇವ್ ಬರೆಂ ಕರುಂ ಫಾದರ್. ಮ್ಹಣೊನ್ ಮೆರ್ಡಿತಾನ್ ಪರ್ತ್ಯಾನ್ ದೊಳೆ ಧಾಂಪ್ಲೆ. ಕಾಳೊ ಪಾದ್ರಿ ಆಪ್ಲೆ ಬಸ್ಕೆರ್ ಅಸ್ವಸ್ಥೆನ್ ಹುಳ್ವುಳೊಂಕ್ ಲಾಗ್ಲೊ. ಪುಣ್ ಮೆರ್ಡಿತಾಕ್ ಕಸಲೊಚ್ ಪಶ್ಚಾತ್ತಾಪ್ ಭಗ್ಲೊ ನಾ. ಕೊಣೆಂಯ್ ದೇವ್ ಶಾಸ್ತಿರಾಚ್ಯಾ ಶಯ್ಲೆರ್ ಉಲಂವ್ಚೆಂ ತಾಕಾ ಬರೆಂ ಲಾಗಾನಾತ್ಲೆಂ. ದೆವಾಚ್ಯಾ ಉತ್ರಾನಿಂ ಆನಿ ತರ್ಕಾನ್ ಬಾಂಧುನ್ ಹಾಡ್ಲೆಲ್ಯಾ ಇಗರ್ಜ್ಮಾತೆಚ್ಯಾ ತತ್ವಾಂಕ್ ಥೊಡ್ಯಾನಿಂ ಪೆಪ್ಪರ್ಮಿಂಟ್ ಭಕ್ತೆಕ್ ದೆಂವಯಿಲ್ಲೆಂ. ಆಧುನಿಕ್ ಕಾಳಾಚ್ಯಾ ಸಾಮಾಜಿಕ್ ಆನಿ ನೈತಿಕ್ ಸಮಸ್ಯಾಂಕ್ ಪರಿಹಾರ್ ಸೊದ್ಚ್ಯಾ ವರ್ನಿ ಭವಾಡ್ತ್, ಭಕ್ತ್ ಮ್ಹಳ್ಳಿ ಸಸಾರ್ ವಾಟ್ ಥೊಡ್ಯಾ ಆಳ್ಶಿ ಪಾದ್ರಿನಿಂ ಧರ್ಲ್ಲಿ. ತ್ಯಾ ದೆಕುನ್ ಸಾಮಾನ್ಯ್ ಲೊಕಾಕ್ ಭಯಾನಕ್ ಜಾವ್ನಾಸ್ಚೆಂ ಮರಣ್, ದೂಕ್, ಪಾಶಾಂವ್ ಆನಿ ಮೆಲ್ಲ್ಯಾ ನಂತರ್ಚ್ಯಾ ಮಿಸ್ತೆರಾಕ್ ಫುಡ್ ಕರುಂಕ್ ಆಯ್ದಾವಿಣ್ ಲೊಟ್ಲ್ಲೆ ಬರಿಂ ಮ್ಹಣೊನ್ ಮೆರ್ಡಿತಾಕ್ ಭಗ್ತಾಲೆಂ.
ಥೊಡ್ಯಾ ವೆಳಾಕ್ ವಿಚಲಿತ್ ಜಾಲ್ಲೊ ಕಾಳೊ ಪಾದ್ರಿ ಆಪ್ಲ್ಯಾ ಸಭಿಕಾಂಕ್ ಸೊಡುಂಕ್ ತಯಾರ್ ನಾತ್ಲೊ. ತಾಣೆ ಮೆರ್ಡಿತಾಚ್ಯಾ ದೊಂಪ್ರಾಚೆರ್ ಕುಟ್ಟಿಲೆಂ.
ಮೊನ್ಸಿಜ್ಞೊರ್, ತುಮಿಂ ರೊಮಾಚೆ ಮ್ಹಣ್ ದಿಸ್ತಾ?
ವ್ಹಯ್. ಮೆರ್ಡಿತಾನ್ ಮಟ್ವಿ ಜಾಪ್ ದಿಲಿ.
ಇತಾಲಿಯನ್?
ನ್ಹಯ್. ಇಂಗ್ಲಿಶ್.
ಒಹ್, ವಾತಿಕಾನಾಕ್ ಆಯ್ಲೆಲೊ ಯಾತ್ರಿಕ್?
ನಾ. ಹಾಂವ್ ವಾತಿಕನಾಂತ್ ಕಾಮ್ ಕರ್ತಾಂ.
ಕಾಳೊ ಪಾದ್ರಿ ತಾಕಾ ಭಾವಾ ಪರಿಂ ಪಳೆವ್ನ್ ಹಾಸ್ಲೊ. ತುಂ ಅದೃಷ್ಟ್ವಂತ್ಚ್ ಮ್ಹಣಾಜೆ! ತುಮಿಂ ಸಾಂತಾಂಚೆ ಮೋವ್ ಗಾದೆ ಕೊಸ್ತಾನಾ, ಆಮಿಂ ಹಳ್ಳೆಂತ್ಲೆ ಫಾತ್ರಾಳ್ ಜಾಗೆ ಕೊಸುನ್ ಆಸಾಂವ್!
ಹಾಂವ್ ಕಸಲೆಂಚ್ ಕೊಸ್ತೆತ್ ನಾ. ಮೆರ್ಡಿತಾಚ್ಯಾ ತಾಳ್ಯಾಂತ್ ತಿರಸ್ಕಾರ್ ಭರ್ಲ್ಲೊ. ರೊಮ್; ಪ್ಯಾರಿಸ್, ಲಂಡನ್ ಆನಿ ಬರ್ಲಿನಾ ಬರಿಂಚ್ ಏಕ್ ಸಾಮಾನ್ಯ್ ಶ್ಹೆರ್. ಸಾಂತಾಂಚೆ ಶ್ಹೆರ್ ನ್ಹಯ್. ರೊಮ್ ಇತ್ಲ್ಯಾ ಸುವ್ಯವಸ್ತಿತ್ ರಿತಿನ್ ಚಲ್ತಾ ಕಿತ್ಯಾಕ್ ಮ್ಹಳ್ಯಾರ್: ತೆಂ ಕ್ರಿಸ್ತಾಂವ್ಪಣಾಚೆಂ ಕೇಂದ್ರ್ ಜಾವ್ನಾಸ್ಲೆ ವರ್ವಿಂ. ಪಾಪಾ, ತೆಂ ಸುವ್ಯವಸ್ತಿತ್ ಥರಾನ್ ಚಲಾಜೆ ಮ್ಹಣ್ ಚಿಂತಾ.
ಕಾಳ್ಯಾ ಪಾದ್ರಿನ್ ವಿಷಯ್ ಬದ್ಲಿ ಕೆಲೊ. ತುಂ ಮ್ಹಜೆಂ ಕುತೂಹಲ್ ಉಸ್ಕಾವ್ನ್ ಆಸಾಯ್ ಮೊನ್ಸಿಜ್ಞೊರ್! ತೊ ಮ್ಹಣಾಲೊ. ತುಕಾ ಮ್ಹಜೆ ಪ್ರಾಸ್ ಚಡ್ ಅನ್ಭೋಗ್ ಆಸಾ ತೆಂ ಖರೆಂ. ಪುಣ್ ತುಂ ಕಿತೆಂಯ್ ಮ್ಹಣ್, ಹಳ್ಳೆಚೊ ಪರಿಸರ್ ಎಕ್ಲ್ಯಾಕ್ ಸಾಂತಿಪಣಾಕ್ ವೊಡ್ತಾ ಜಾಲ್ಯಾರ್, ಶ್ಹೆರ್ ಲೌಕಿಕ್ ಜಿಣ್ಯೆ ಕುಶಿಕ್ ಲೊಟ್ತಾ! ತುಜಿ ಅಬಿಪ್ರಾಯ್ ಕಿತೆಂ?
ಮೆರ್ಡಿತಾನ್ ನಿರುತ್ಸಾಹಾನ್ ಜಾಪ್ ದಿಲಿ.
ಮ್ಹಜಾ ಅನ್ಭೋಗಾ ಫರ್ಮಾಣೆ, ಸಾಂತ್ ಆಮಿಂ ನಿರೀಕ್ಷಣ್ ಕರಿನಾಸ್ಲ್ಯಾ ಜಾಗ್ಯಾನಿಂ ತಶೆಂ ಕಾಳಾರ್ ಉದೆಲ್ಯಾತ್.
ಸಾರ್ಕೆಂ ಸಾಂಗ್ಲೆಂಯ್! ಕಾಳೊ ಪಾದ್ರಿ ಉದ್ಗಾರ್ಲೊ. ಹೆಂ, ಆಮ್ಚ್ಯಾ ದೆವಾಚ್ಯಾ ಸೆವಕಾಕ್, ಜಿಯಾಕೊಮೊ ನೆರೊನಾಕ್ ಶೆಂಬರ್ ಠಕ್ಕೆ ಲಾಗು ಜಾತಾ. ತೊ ಜಿಯೆಲ್ಲೊ ಗಾಂವ್, ಜಿಮೆಲ್ಲೊ ದೇಯಿ ಮೊಂತಿ ವಿಶಿಂ ತುಮಿಂ ಜಣಾಂತ್ವೇ ಮೊನ್ಸಿಜ್ಞೊರ್?
ಎದೊಳ್ ನಾ.
ಜಿಯೆಲ್ಲೊ ದೇಯಿ ಮೊಂತಿ ಎಕಾ ಪರ್ವತಾಚ್ಯೊ ದೋನ್ ತಕ್ಲ್ಯೊ. ಏಕ್ ತಕ್ಲಿ ಜಿಮೆಲ್ಲೊ ಮೈನೊರ್. ಬೋವ್ ದುರ್ಬಳಿ. ದುಸ್ರಿ, ಜಿಮೆಲ್ಲೊ ಮ್ಯಾಗಿಯೊರ್. ಚಿಕ್ಕೆ ಆಧುನಿಕ್. ಆಮ್ಚ್ಯಾ ಪ್ರಾಂತಾಂತ್ ಜಿಯಾಕೊಮೊ ನೆರೊನಾಕ್ ಮಾನ್ ಲಾಬ್ತಾ ಪರ್ಯಾಂತ್ ಹ್ಯಾ ಹಳ್ಳೆಂಕ್ ಕೊಣ್ಂಚ್ ವಳ್ಕಾನಾತ್ಲೆ.
ಉಪ್ರಾಂತ್?... ಉಪ್ರಾಂತ್ ಏಕ್ ವಿಚಿತ್ರ್ ಗಜಾಲ್ ಘಡ್ಲಿ. ಜಿಯಾಕೊಮೊ, ಜಿಮೆಲ್ಲೊ ಮೈನೊರಾಂತ್ ಜಿಯೆಲ್ಲೊ ಆನಿ ವಾವುರ್ಲೊಲ್ಲೊ. ಹ್ಯಾಚ್ ಹಳ್ಳೆಂತ್ ತಾಕಾ ಘಾತ್ ಕೆಲ್ಲೊ ಆನಿ ಜಿವೆಶಿಂ ಮಾರ್ಲ್ಲೆಂ. ಜಿಮೆಲ್ಲೊ ಮ್ಯಾಗಿಯೊರಾಂತ್ ಎಕಾ ಗ್ರೊಟ್ಟ್ಯಾ ಲಾಗ್ಗಿಂ ತಾಕಾ ನಿಕೆಪಿಲೆಂ. ತ್ಯಾ’ಪ್ರಾಂತ್ ಜಿಮೆಲ್ಲೊ ಮೈನೊರ್ ದುಬ್ಳಿಕಾಯೆನ್ ಬುಡೊನ್ ವೆತಾನಾ, ಜಿಮೆಲ್ಲೊ ಮ್ಯಗಿಯೊರ್ ಸುದ್ರೊನ್ ಆಯ್ಲೆಂ. ಥೈಂ ಆತಾಂ ಏಕ್ ನವಿ ಇಗರ್ಜ್, ಆಸ್ಪತ್ರ್ ಆನಿ ಯಾತ್ರಿಕಾಂ ಲಾಗೊನ್ ಏಕ್ ಧರ್ಮ್ಶಾಳ್ ಬಾಂಧ್ಲಾಂ. ಹೆಂ ದೆವಾಚೆಂ ಕೃತ್ಯೆಂ. ಘಾತ್ ಕೆಲ್ಲ್ಯಾಂಕ್ ಲಾತ್, ಸಾಸ್ಣಾಚೊ ಆಸ್ರೊ ದಿಲ್ಲ್ಯಾಂಕ್ ಪುರಸ್ಕಾರ್!
ಗ್ರೇಸ್ತ್ಕಾಯ್ ದೈವಿಕ್ ಪುರಸ್ಕಾರಾಚೊ ಗುರ್ತ್ ಮ್ಹಣೊಂಕ್ ಜಾಯ್ನಾ. ಮೆರ್ಡಿತಾನ್ ಮ್ಹಳೆಂ. ಜಿಮೆಲ್ಲೊ ಮ್ಯಾಗಿಯೊರಾಚ್ಯಾ ಅಭಿವೃದ್ಧೆಕ್ ಥೈಂಚೊ ಮೇಯರ್, ನಾಗರಿಕ್ ತಶೆಂ ಫಿರ್ಗಜ್ ಪಾದ್ರಿಯೀ ಕಾರಣ್ ಜಾವ್ನಾಸ್ಯೆತ್.
ಕಾಳೊ ಪಾದ್ರಿ ಬೊಬಾಟ್ಲೊ:
ತುಜೆಂ ವಿಶ್ಲೇಷಣ್ ಚಡ್ ಜಾಲೆಂ ಮೊನ್ಸಿಜ್ಞೊರ್!! ಹೆಂ ಸಗ್ಳೆಂ ದೆವೊತ್ ಮ್ಹನ್ಶಾನಿಂ ವರವ್ನ್ ತೀರ್ಪ್ ದಿಲಾಂ!
ಅಂವ್ಸರಾಚೆ ನಿರ್ಣಯ್ ಹಾಂವ್ ಮಾಂದಿನಾ. ಮೆರ್ಡಿತಾನ್ ಸಾಂಗ್ಲೆಂ. ಭವಾಡ್ತ್ಯಾಂಚಿ ಅಭಿಪ್ರಾಯ್ ವಿಚಾರ್ನ್ ಸಾಂತ್ ಕರಿನಾಂತ್. ತ್ಯಾ ಲಾಗುನ್ ಇಗರ್ಜ್ಮಾತೆಚೆ ಕಠಿಣ್ ನೇಮ್ ಆಸಾತ್. ತ್ಯಾ ದೆಕುನ್ ಜಿಯಾಕೊಮೊ ನೆರೊನಾಚೆ ತನ್ಕೆಕ್ ಮ್ಹಾಕಾ ಭವಾಡ್ತಾಚೊ ಪ್ರೇರಕ್ ಜಾವ್ನ್ ನೆಮ್ಲಾ. ತ್ಯಾ ಲಾಗೊನ್ ಹಾಂವ್ ಭಾಯ್ರ್ ಸರ್ಲಾಂ. ತುಜೆ ಲಾಗ್ಗಿಂ ಕಸಲ್ಯೊಯ್ ವಯುಕ್ತಿಕ್ ರುಜ್ವಾತಿ ಆಸ್ಲ್ಯಾರ್, ಹಾಂವ್ ಆಯ್ಕೊಂಕ್ ಖುಶಿ ವ್ಹರ್ತಾಂ.
ಕಾಳೊ ಪಾದ್ರಿ ಪಯ್ಲೆಂ ನಾರ್ಗಾಲೊ. ಉಪ್ರಾಂತ್ ಅಪುಣ್ ನೆಣಾ ಮ್ಹಣಾಲೊ. ರೈಲ್ ಫೊರ್ಮಿಯೊ ನಿಲ್ಧಾಣಾಂತ್ ಥಾಂಬ್ತಾನಾ ತೊ ದೆಂವೊನ್ ಗೆಲೊ. ರೈಲಾಕ್ ಹಾಂಗಾ ವೀಸ್ ಮಿನುಟಾಂಚಿ ಥಾಂಬ್ಣಿ ಆಸುಲ್ಲಿ. ಮೆರ್ಡಿತಾಕ್ ಪಾಂಯ್ ಸದಿಳ್ ಕರುಂಕ್ ಆನಿ ಆಪ್ಲ್ಯಾ ನಡ್ತ್ಯಾ ವಯ್ರ್ ಲಜ್ ಫಾವೊಂಕ್ ಸಂದ್ರಾಪ್ ಮೆಳ್ಳೊ. ತಾಣೆ ತನ್ಕಿ ಕರುಂಕ್ ಆಯಿಲ್ಲ್ಯಾ ವೆಕ್ತಿ ವಿಶಿಂ ಜಾಣ್ಕಾರಿ ಜೊಡ್ಚೊ ಪ್ರಥಮ್ ಅವ್ಕಾಸ್ ಹೊಗ್ಡಾವ್ನ್ ಘೆತ್ಲ್ಲೊ.
ಫ್ಲ್ಯಾಟ್ಫೊರ್ಮಾಚೆರ್ ಪಾಸಾಯೊ ಮಾರಿತ್ತ್ ತೊ ಅಪ್ಣಾ ಥೈಂ ಕಿತೆಂ ಊಣ್ ಆಸಾ ಮ್ಹಣ್ ಚಿಂತುಂಕ್ ಪಡ್ಲೊ. ತೊ ಜಣಾ’ಸ್ಲೊ, ದುಸ್ರೆ ಪಾದ್ರಿ ರಯ್ತಾಂಚ್ಯಾ ಜ್ಹೆವ್ಣಾ ಮೆಜಾರ್ಗಿ, ವ ಕುಲ್ಕಾರಾಂಚ್ಯಾ ಕುಜ್ನಾನಿಂ ಏಕ್ ಕೋಪ್ ವಾಯ್ನ್ ಪಿಯೆತಾನಾ ಸಮ್ಜಣಿ ತಶೆಂ ಅನ್ಭೋಗ್ ಜೊಡ್ತಾಲೆ. ತೆ ಮಾಸ್ಳೆ ಮಾರ್ಕೆಟಿಂತ್ಲಿ ಫೊಕಣಾಂ ತಶೆಂಚ್ ಕಾಡ್ದಿನಾಲಾಚ್ಯಾ ಮೆಜಾ ವಯ್ಲೆಂ ಗಂಬೀರ್ ಉಲವ್ಣೆ ಜಿರಂವ್ಕ್ ಸಕ್ತಾಲೆ. ತೆವೀ ಆದರ್ಶ್ ಯಾಜಕ್ಚ್. ತಾಂಚೆ ಆನಿ ಅಪ್ಣಾ ಮಧೆಂ ಕಿತೆಂ ವೆತ್ಯಾಸ್? ಪಾಶಾಂವ್. ಅಶೆಂ ಕಾಡಿನಾಲ್ ಮಾರೊಟ್ಟಾನ್ ಮ್ಹಳ್ಳೆಂ. ದುಸ್ರ್ಯಾಂಚಿ ದೂಕ್ ಅನ್ಭೋಗ್ ಕರ್ಚಿ ಆನಿ ಸಂತೊಸಾಂತ್ ವಾಂಟೆಲಿ ಜಾಂವ್ಚಿ ಸಕತ್. ಜೆಜು ಕ್ರಿಸ್ತ್ ಪಾತ್ಕ್ಯಾಂ ಮಧೆಂ, ವೆಭಿಚಾರಿಣಿಂ ಸಾಂಗಾತಾ ಜೆವ್ಲ್ಲೊ, ವಾಯ್ನ್ ಪಿಯೆಲ್ಲೊ. ಪುಣ್ ತಾಚೊ ಯಾಜಕ್, ಮೊನಿಜ್ಞೊರ್ ಬ್ಲೇಸ್ ಮೆರ್ಡಿತ್ ಮ್ಹನ್ಶಾ ಕುಳಾಕ್ ಪಾಟ್ ಕರುನ್ ತಾಚ್ಯಾ ಗ್ರಂಥಾಂಚಿ, ಫಾಯ್ಲಾಂಚಿ ಧುಳ್ ಉಸ್ವಾಸ್ತಾಲೊ. ಆತಾಂಯ್ ತೊ ಎಕ್ಸುರೊಚ್ ಆಸುಲ್ಲೊ ಆನಿ ಮರಣ್ ತಾಚ್ಯಾ ಪೊಟಾಂತ್ ವಾಡೊನ್ಂಚ್ ಆಸುಲ್ಲೆಂ.
ಗಾರ್ಡಾನ್ ವಿಶಿಲ್ ಫುಂಕ್ತಾನಾ ಬ್ಲೇಸ್ ಮೆರ್ಡಿತ್ ಹಳೂ ವಯ್ರ್ ಚಡ್ಲೊ.